Qan Turalı: Mən o məktəbli qızı tanıyıram

qan

20 May 2016 18:44

Xəbər 284 dəfə oxunub

 

Qan Turalı yazır

Dünən qarşımıza bir xəbər çıxdı və bu xəbərin fonunda nə qədər iyrənc bir cəmiyyətdə yaşadığımıza bir daha əmin olduq

Söhbət artıq hamımızın tanıdığı Şamaxı məktəblisindən gedir.

15 yaşında məktəbli müəllimindən hamilə qalıb.

İndi bir anlıq əlimizi saxlayaq və Sədinin “Gülüstan”ındakı rəvayəti xatırlayaq: “Bir hökmdar qəribə bir xəstəliyə mübtəla olubmuş, nə qədər müalicə olunsa da xeyri olmurmuş, sonda təbiblər deyib ki, filan görkəmdə, filan xasiyyətdə olan adamın ödü hökmdara dərmandır. Ailəsi oğlanı pul müqabilində satır, qazı fərman verir ki, hökmdar üçün bir təbəəni öldürmək caizdir. Ölümündən əvvəl oğlan dua etmək üçün icazə istəyir, ondan nə barədə dua edəcəyi soruşulanda deyir ki, insan əvvəlcə ata anasına pənah aparar, ata-ana onu satıbsa qazıya ümid edər, o da ümidi boşa çıxartsa hökmdardan ədalət diləyər. Hökmdar da bu sözü eşidib kövrəlir və oğlanı bağışlayır”.

Bu qədim rəvayət əslində elə dünən yenidən təkrarlandı.

Qız zorlanıb, ya da öz xoşuyla cinsi əlaqədə olub, bunun heç bir fərqi yoxdur, çünki yetkinlik yaşına bu əlaqə cinayət tərkibi daşıyır.

Və bu qızı indi kim müdafiə edəcək?

Atası onu zorlayan müəllimə ərə verməyə hazırdır, hətta onun qızını alacağı ümidiylə indiyədək susub, gözləyib, polisə müraciət etməyib.

Hətta ata düşünməyib ki, müəllimin ailəsi var, orda da bir drama var, və bunlar heç, ata 15 yaşlı qızını bir pedofilə (əlbəttə ki, ittihamlar təsdiqlənərsə…) verməyə hazırdır.

Atanın öz adı-sanı var axı…

Bu ad-sanı qorumaq üçün qız bədbəxt olsa da olar.

Demək, elə ilk həmlədə atası qızı başından eləyir, onu cinayətkarın ağuşuna itələyir və qız da elə birinci zərbəni burdan alır.

İndi qayıdaq müəllimə…

Qızla evlənsin, ya evlənməsin, qızla ya zorla olsun, ya xoşla, bunların önəmi çox azdır, əsas o ləyaqət məsələsidir ki, bir müəllim hansı ləyaqətlə, hansı mənəviyyatla belə bir şeyə qol qoya bilər?

Bir müəllimin ki, ürəyində təhsil, maarif işığı əvəzinə şəhvət korluğu olsun, ehtiras düşkünlüyü olsun, öz körpə tələbəsinə tamah salacaq qədər alçalmış olsun – bu artıq dəhşətdir, faciədir!

Amma bu fərdi bir faciədir, bir müəllimin faciəsidir, bu fərdi qüsurları ləğv edəcək, onu boşa çıxaracaq, cəzalandıraraq tədbir görərək qarşısını alan bir sistem mövcud deyilsə cəmiyyətin faciəsi o zaman başlayır.

Şamaxı Təhsil Şöbəsinin açıqlaması da məhz bu cürə bir faciədən xəbər verir.

Bir müəllim bir şagirdi zorlayırsa rayon təhsil şöbəsi ictimai ləyaqəti zorlamağa cəhd edir.

Təsəvvür edin, qız 7 aylıq hamilədir və bu yeddi aydı təhsil şöbəsi heç bir tədbir görməyib.

Məsələ ictimailəşdikdən sonra guya müəllimi aprel ayında işdən çıxartdıqları ilə bağlı əmr imzalandığını deyir.

Bu biabırçılıq əlbəttə ki, təhsil şöbəsinin biabırçılığıdır və indi qurum günahı öz üzərindən necə atamaq istəyir.

Bu məsələyə görə nəinki müəllim işdən çıxarılmalıdır, məktəbin direktoru da, təhsil şöbəsinin müdiri də cəzalandırılmalıdır.

Ailə polisə müraciət etsin, ya da etməsin, fərq etməz, məktəbdə belə bir hadisə olub və təhsil şöbəsi heç bir tədbir görməyib.

Müəllimin hadisəsi fərdi hadisədir, lakin təhsil şöbəsi bu cür hallara qarşı fəal mübarizə aparmalıdır. Görükənsə odur ki, onlar öz vəzifələrini qorumaq üçün hadisəni ört-basdır etməyə çalışırlar.

İndi sabah bu cür hallara görə qız uşaqları məktəbdən yayınsalar təhsil şöbəsinin açıqlaması necə olacaq?

Məsuliyyəti üstündən atan təhsil şöbəsi hansı sifətlə bu cür hallarla mübarizə aparacaq?

Eynən, Sədinin əhvalatında olduğu kimi o qızın da Allahdan başqa bir pənahı qalmır.

Müəllim elə, ata belə…

Bu da təhsil şöbəsi!

Və ən ağrılısı odur ki, bu cürə onlarla cinayət, onlarca ört-basdır halı var, görükən isə aysberqin bircə üzüdür.

Biz bu cür məktəbli qızları çox görmüşük və bu təfəkkürlə hələ çox görəcəyik.

Biz o qızı artıq tanıyırıq, adı gizli qalsa belə… (kulis)

80 min nə puldur ki… – “Rabitə işi”

vidadi-zeynalov

Bu gün Bakı Ağır Cinayətlər Məhkəməsində mənimsəmədə və vəzifə səlahiyyətlərindən sui-istifadə etməkdə təqsirləndirilən Rabitə və Yüksək Texnologiyalar Nazirliyinin (RYTN) sabiq Aparat rəhbəri Vidadi Zeynalov, "Aztelekom" MMC-nin sabiq baş direktoru Məhəmməd Məmmədov, "Bakı Telefon Rabitəsi" İstehsalat Birliyinin sabiq rəhbəri Beytulla Hüseynov, "Bakı Telefon Rabitəsi" İstehsalat Birliyinin baş mühasibi Anar Mustafayev, “AzİnTelekom” MMC-nin sabiq baş direktoru Cəlil Cəfərov, “Azərpoçt” MMC-nin sabiq baş direktoru Qəmbər Bəybalayev, “Optik Rabitə, Tikinti və Quraşdırma” MMC-nin baş mühasibi Səhrab Hümbətov, həmçinin Emin Məmmədov, “Bakı Rabitə Təmir Tikinti” və “Təmir Təchizat Servis” MMC-lərinin direktoru Bayram Vəliyev, "Optik Qurğular" İdarəsinin rəisi Namazəli Məmmədov və “Aztelekom” MMC-nin baş mühasibi Oktay Rüstəmovun cinayət işi üzrə məhkəmənin növbəti iclası keçirilib. Faktinfo.az-ın məlumatına görə, hakim Əfqan Hacıyevin sədrliyi ilə keçirilən prosesdə şahid qismində Faiq Hümbətov ifadə verib. O bildirib ki, "Aztelekom" MMC-nin Şamaxı qovşağında rəis işləyib. O, istintaqa verdiyi ifadəsini təsdiqləyib: "Görülməli işlər üçün 80 min manat alınıb. Həmin pullar da işlərə sərf olunub. Bu məbləğ nə puldur ki, mənə də qalsın?! Bizə qalan yeyib-içmək olub". Daha sonra onun istintaqa verdiyi ifadəsi elan olunub. F.Hümbətov istintaqa verdiyi ifadəsində bildirib ki, nazir Əli Abbasov rayona gələndə işlər görülüb: "Nazirin göstərişi ilə işlərin görülməsi üçün vəsait ayrılıb. Həmin vəsait işlər görüləndən sonra 3 min manat qalıb. Həmin pulu da xərcləmişəm". Şahid ifadəsini təsdiqləyib. Ədalət Hüseynov isə bildirib ki, Qazax filialınln müdiri vəzifəsində çalışıb. Proses yanvarın 25-də davam etdiriləcək. Qeyd edək ki, 2015-ci ilin noyabr ayının 13-də Baş Prokurorluğun Rabitə və Yüksək Texnologiyalar Nazirliyindəki həbslərlə bağlı yaydığı rəsmi məlumata görə, nazirliyin Aparat rəhbəri V.Zeynalovun qulluq mövqeyindən sui-istifadə edərək nazirliyin strukturuna daxil olan ayrı-ayrı qurumların vəzifəli şəxsləri ilə qabaqcadan razılaşmaqla həmin strukturlar tərəfindən işlərin görülmədiyi, tam yerinə yetirilmədiyi, avadanlıqlar alınmadığı, istifadə olunan avadanlıqların, xidmətlərin qiymətlərinin isə 4-5 qat şişirdilməsi və digər üsullarla işlərin və xidmətlərin guya yerinə yetirilməsini özlərinin himayə etdikləri, yaxın münasibətdə olduqları şəxslərin adına olan özəl şirkətlər tərəfindən saxta sənədlər əsasında rəsmiləşdirməsini təmin etməklə müvafiq müəssisələrin ayrı-ayrı banklardakı hesabına köçürülmüş 73 milyon 590 min manat pul vəsaitinin nağdlaşdırılmaqla mənimsənilməsini və israf edilməsini təşkil etməsində şübhələr üçün əsaslar müəyyən edilib. Bundan başqa, Baş Prokuror yanında Korrupsiyaya qarşı Mübarizə Baş İdarəsi tərəfindən RYTN sistemində həyata keçirilmiş yoxlamalar nəticəsində “Aztelekom” MMC-nin sabiq baş direktoru M.Məmmədov, "Bakı Telefon Rabitəsi" İstehsalat Birliyinin sabiq rəhbəri B.Hüseynov, "Bakı Telefon Rabitəsi" İstehsalat Birliyinin baş mühasibi A.Mustafayev, “AzİnTelekom” MMC-nin sabiq baş direktoru C.Cəfərov, “Azərpoçt” MMC-nin sabiq baş direktoru Q.Bəybalayev, “Optik Rabitə, Tikinti və Quraşdırma” MMC-nin baş mühasibi S.Hümbətov, həmçinin E.Məmmədov, “Bakı Telefon Rabitəsi” İstehsalat Birliyinin (BTRİB) Nizami telefon qovşağının sabiq rəisi F.Seyidov və həmin birliyin baş mühasibi R.Məmmədov, “Bakı Rabitə Təmir Tikinti” və “Təmir Təchizat Servis” MMC-lərinin direktoru B.Vəliyev, "Optik Qurğular" İdarəsinin rəisi N.Məmmədov və “Aztelekom” MMC-nin baş mühasibi O.Rüstəmov da saxlanılıb. Daha sonra məhkəmə onlar barəsində həbs qətimkan tədbirinin seçilməsi barədə qərar verib. RYTN-in mənimsəmədə və vəzifə səlahiyyətlərindən sui-istifadə etməkdə təqsirləndirilən 11 keçmiş əməkdaşı ümumilikdə 40 milyon manat pulu mənimsəməkdə ittiham olunurlar. İittiham aktına əsasən, A.Mustafayev 567 min, E.Məmmədov 7 milyon 700 min, O.Rüstəmov 250 min, S.Hümbətov 32 min 400 min, Q.Bəybalayev 2 milyon, C.Cəfərov 1,5 milyon, B.Vəliyev 204 min, V.Zeynalov 8 milyon, B.Hüseynov 10 milyon, M.Məmmədov 4 milyon 500 min və N.Məmmədov isə 4 milyon manat mənimsəməkdə təqsirli bilinirlər. V.Zeynalov, B.Hüseynov, A.Mustafayev, E.Məmmədov, M.Məmmədov, O.Rüstəmov, N.Məmmədov, S.Hümbətov, Q.Bəybalayev Cinayət Məcəlləsinin 179.3.1-ci (mənimsəmə və ya israf etmə, mütəşəkkil dəstə tərəfindən törədildikdə), 179.3.2-ci (mənimsəmə və ya israf etmə, külli miqdarda törədildikdə), 29, 179.3.1-ci (mənimsəmə və ya israf etməyə cəhd, mütəşəkkil dəstə tərəfindən törətməyə cəhd), 29, 179.3.2-ci (mənimsəmə və ya israf etməyə cəhd, külli miqdarda törətməyə cəhd),308.2 (vəzifə səlahiyyətlərindən sui-istifadə) və 313-cü (vəzifə saxtakarlığı), C.Cəfərov 179.3.1-ci (mənimsəmə və ya israf etmə, mütəşəkkil dəstə tərəfindən törədildikdə), 179.3.2-ci (mənimsəmə və ya israf etmə, külli miqdarda törədildikdə) və B.Vəliyev isə 179.3.1-ci (mənimsəmə və ya israf etmə, mütəşəkkil dəstə tərəfindən törədildikdə), 179.3.2-ci (mənimsəmə və ya israf etmə, külli miqdarda törədildikdə), 308.2 (vəzifə səlahiyyətlərindən sui-istifadə) və 313-cü (vəzifə saxtakarlığı), 213.2.2-ci (vergi ödəməkdən yayınma, külli miqdarda törədildikdə) maddələri ilə ittiham olunurlar. RYTN dəymiş ziyana görə 163 milyon manat dəyərində mülki iddia qaldırıb. Vergilər Nazirliyi (VN) isə təqsirləndirilən B.Vəliyevə qarşı 255 min manatlıq mülki iddia irəli sürüb. Xatırladaq ki, hazırda Bakı Ağır Cinayətlər Məhkəməsində “Bakı Telefon Rabitəsi” İstehsalat Birliyinin (BTRİB) Nizami telefon qovşağının sabiq rəisi F.Seyidov və həmin birliyin baş mühasibi R.Məmmədovun cinayət işi üzrə məhkəmə prosesi başa çatıb. Hər iki şəxsə şərti cəza təyin edilib və onlar məhkəmə zalından azadlığa buraxılıb.

18 Yanvar 2017 13:17

Ən iri miqyaslı yenidənqurma: min kilometrlərlə kabel, yarımstansiyalar, transformatorlar..

177236_res_0155

“Azərişıq” ASC ötən il görülən işlərin yekunlarına dair məlumat yayıb. Şirkətdən virtualaz.org-a daxil olan məlumata əsasən  prezident  İlham Əliyev tərəfindən təsdiq edilmiş  “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqrami”nın icrası məqsədi ilə istehlakçıların keyfiyyətli, dayanıqlı və fasiləsiz elektrik enerjisi ilə təchiz edilməsi üçün “Azərişıq” ASC tərəfindən 2016-cı il ərzində də iri miqyaslı yenidənqurma və əsaslı təmir-tikinti işləri həyata keçirilib. Rayon mərkəzlərində,  qəsəbə və kəndlərində olan istehlakçıların etibarlı, təhlükəsiz və dayanıqlı elektrik enerjisi ilə təmin olunması üçün  yararsız, istismar müddəti başa çatmış avadanlıq müasir tipli avadanlıqlarla əvəz olunub, uzun illər istismar olunan agac dayaqlar yeni dəmir və dəmir beton dayaqlarla əvəzlənib. Yararsız vəziyyətə düşən və heç bir standarta uygun gəlməyən alüminium naqillər özünüdaşıyan izolyasiyalı naqillərlə (ÖİN) əvəz edilib. “Azərişıq” ASC bildirir ki, Şabran rayonunda 2x16 mVA gücündə “Rəhimli”, Lənkaranda “Lənkaran-1” (2x25 mVA), Şəkidə “Cəfərabad” (2x10 mVA), Ağsuda “Ağsu” (2x16 mVA), Zaqatalada “Bəhmədli” (2x6,3), Goranboyda “Kürəkçay” (2x40 mVA), Qazaxda “Daş Salahlı” (2x10 mVA), Masallıda “Tüklə” (2x16 mVA), Saatlıda  “Sarıcalar” (2x25 mVA), Samuxda “Yenikənd” (2x16 mVA) olmaqla, 10 ədəd 110 kV-luq yarımstansiya əsaslı şəkildə yenidən qurularaq müasir tipli avadanlıqlarla təchiz olunub. Abşeron, Quba, Neftçala, Sumqayıt, Lənkaran, Şəki, Zaqatala, İmişli, Zərdab, Tərtər, Bərdə, Ucar, Ağdaş, Ağstafa, Gədəbəy, Qazax, Lerik, Beyləqan, Ağcabədi, Ağdam, Göygöl, Samux, Hacıqabul, Şabran, Yevlax, Salyan, Mingəçevir, Cəlilabad, Daşkəsən, Astara şəhər və rayonlarında olmaqla, ümumilikdə 35 ədəd 35 kV-luq yarımstansiya tikilib və yenidən qurulub. O cümlədən 2016-cı ildə regionlarda: - 30,7 km 110 kV-luq hava xətləri; - 59,0 km 35 kV-luq  kabel  və  308,7 km hava xətləri; - 338,7 km 6-10 kV-luq  kabel və  1810,7 km hava xətləri; - 420,5 km 0,4 kV-luq kabel və  376,6 km hava xətləri; - 2640,7 km özünüdaşıyan izolyasiyalı naqillər (ÖİN) çəkilib; - 960 ədəd Komplekt Transformator Məntəqəsi (KTM) quraşdırılmış; - 127 589 ədəd dayaq basdırılıbr. Bundan əlavə, uzunluğu  35,3 km 110 kV-luq, 128,3 km 35 kV-luq, 416,7 km 6-10 kV-luq və 901,7 km 0,4 kv-luq hava xətlərində təmir işləri aparılıb. Görülmüş tədbirlər onminlərlə abonentin elektrik enerjisinə olan təlabatını yaxşılaşdırmaqla bərabər texnoloji itkilərin azaldılmasına və uçot sisteminin daha təkmil şəkildə aparılmasına müsbət təsir göstərir.  İstehlakçıların fasiləsiz və yüksək keyfiyyətli elektrik enerjisi ilə təmin olunması istiqamətində “Azərişıq” ASC tərəfindən həyata keçirilən tədbirlər 2017-ci ildə də uğurla davam etdiriləcəkdir. “Azərişiq” ASC-nin mətbuat xidməti ◀▶  

18 Yanvar 2017 11:57