Tikinti materialları bahalaşdı

10 Yanvar 2017 15:18

Xəbər 220 dəfə oxunub

Dolların bahalaşması digər sahələr kimi tikinti materialları bazarına da təsir edib. Burada söhbət təkcə xaricdən idxal olunan tikinti materiallarından getmir. Yerli istehsal olan tikinti materiallarının da qiyməti qalxıb. Ekspertlər deyirlər ki, qiymətlərin aşağı düşməsi və yaxud daha da bahalaşması dolların vəziyyəti ilə bağlı olan məsələdir. Və yaxın zamanlar üçün tikinti materiallarının qiymətinin aşağı düşməsi barədə heç bir proqnoz verilmir.

 

Məsələ ilə bağlı daşınmaz əmlak üzrə ekspert Ramil Osmanlı açıqlama verib.

 

Ekspert ayrı-ayrı istehlak bazarlarındakı qiymət artımının indiki şəraitdə başa düşülən olduğunu bildirib.

“Bunun müəyyən iqtisadi əsaslandırması da var. Çünki ümumi bazarda olan tikinti materiallarının 40 faizi idxal olunan tikinti materiallarının payına düşür. Azərbaycanda dolların kursunun günü-gündən yuxarıya doğru dəyişməsi qeyri-təbii də olsa Azərbaycan bazarında infilyasiya norması yaradır. Qiymətlərdə artım müşahidə olunur. Bu tikinti materialları bazarında da öz təsirini göstərir. Əsasən də xaricdən idxal olunan məhsullarda. Konkret desək, taxta və taxta məmulatlarına aid olan məhsullar dik, dvp, dəmir və dəmir məmulatları, dam örtükləri, armatur kimi tikinti materiallarının qiymətində 5 faizlik artım var. Bu artımlar da alıcıların diqqətini cəlb edir”.

 

Ramil Osmanlı hesab etmir ki, indiki şəraitdə süni qiymət artımları və cəhdləri var.

“ Sadəcə olaraq, bu sahə ilə məşğul olan sahibkarlar dollarda itirdiklərini məhsulların üzərinə gəlməklə itkilərini kompensasiya etməyə çalışırlar.  Əgər Mərkəzi Bank manatın kursunu sabiq mərhələyə gətirib çıxararsa, mən hesab edirəm ki, istehlak bazarlarındakı qeyri-müəyyənlik aradan qalxar. Bu da ticarət dövriyyəsinin artmasına gətirib çıxara bilər. Müaliyyə Nazirliyi və Mərkəzi Bankın rəhbərliyi tez-tez manatın ədalətli kursundan danışırlar. Mən hesab edirəm ki, o ədalətli kursun tapılması üçün əslində şərait yaratmaq lazımdır. Buna əngəl yaratmaq lazım deyil”.

 

Ekspert bildirib ki, tikinti materiallarının qiymətinin qalxması ilə əlaqədar ev tikmək istəyən şəxslərin sayında  kəskin azalma var.

“Azərbaycanda bu gün bütün istehlak bazarı üzrə sahələrdə mənfiyə doğru azalmalar var. Bu eyni zamanda fərdi yaşayış evlərinin tikintisinə də təsir göstərir. Hazırda tikinti tempinin kəskin şəkildə azalması müşahidə olunur. Biz bunu hətta çoxmənzilli binaların tikintisində də müşahidə edirik”.

Azərbaycanda neft hasilatı 7,3% azalıb

Bu ilin yanvar-fevral aylarında Azərbaycanda sənaye sahəsində 6,5 mlrd. manatlıq və ya əvvəlki ilin müvafiq dövrü ilə müqayisədə 3,7% az sənaye məhsulu istehsal edilib. Dövlət Statistika Komitəsindən “APA-Economics”ə verilən məlumata görə, sənayenin qeyri-neft sektorunda məhsul istehsalı 5% artıb, neft sektorunda isə 5,1% azalıb. Sənaye məhsulunun 71,8%-i mədənçıxarma sektorunda, 22,5%-i emal sektorunda, 5%-i elektrik enerjisi, qaz və buxar istehsalı, bölüşdürülməsi və təchizatı sektorunda, 0,7%-i isə su təchizatı, tullantıların təmizlənməsi və emalı sektorunda istehsal olunub. Mədənçıxarma sektorunda neft hasilatı 7,3% azalıb, əmtəəlik qaz hasilatı isə 5,3% artıb. Emal sektorunda qida məhsullarının istehsalı 1%, içkilərin istehsalı 59,8%, toxuculuq sənayesi məhsullarının istehsalı 2,6 dəfə, geyim istehsalı 48,5%, ağacın emalı və ağacdan məmulatların istehsalı 46,7%, kağız və karton istehsalı 4,6%, əczaçılıq məhsullarının istehsalı 58,9%, rezin və plastik kütlə məmulatlarının istehsalı 82,3%, tikinti materiallarının istehsalı 71,2%, metallurgiya sənayesi məhsullarının istehsalı 23%, kompüter və elektron məhsulların istehsalı 82,8%, elektrik avadanlıqlarının istehsalı 3,4 dəfə, sair nəqliyyat vasitələrinin istehsalı 25,6%, mebel istehsalı 73,2% artıb, tütün məmulatlarının istehsalı 63,5%, dəri və dəri məmulatlarının, ayaqqabıların istehsalı 36,2%, poliqrafiya məhsullarının istehsalı 66,1%, neft məhsullarının istehsalı 6,1%, kimya sənayesi məhsullarının istehsalı 6,7%, hazır metal məmulatlarının istehsalı 11,0%, maşın və avadanlıqların istehsalı 66,2%, maşın və avadanlıqların quraşdırılması və təmiri işləri isə 53,7% azalıb. Elektrik enerjisi, qaz və buxar istehsalı, bölüşdürülməsi və təchizatı sektorunda istehsalın həcmi 3,3 faiz artıb, su təchizatı, tullantıların təmizlənməsi və emalı sektorunda isə 1,3% azalıb.

14 Mart 2017 18:23