“Qarabağı işğaldan azad etmək üçün…” –Türkiyə ordusunun generalı

“Türkiyə Azərbaycan, Azərbaycan Türkiyədir, biz bu şəkildə baxırıq. Ona görə də, 30 avqust eyni zamanda Azərbaycanın da zəfər bayramıdır. Əziz vətən torpaqlarının müvəqqəti də olsa, erməni işğalı altında qalması, əlbəttə ki, hamımızı fövqəladə dərəcədə narahat edir”. Bunu Türkiyə Quru Qüvvələrinin keçmiş komandanı, istefada olan ordu generalı Ərdal Ceylanoğlu deyib. Dörd dəfə Qarabağ bölgəsində olduğunu söyləyən general Azərbaycan ordusunun oradakı mövqelərinin hər dəfə daha çox gücləndiyinin şahidi olduğunu bildirib: “Qarabağı işğaldan azad etmək üçün azərbaycanlı qardaşlarımızın həyəcanını görmüşəm. İşğal altındakı əziz vətən torpaqları bir an əvvəl qeydsiz-şərtsiz millətimizə qaytarılmalıdır, haqsızlığın aradan qaldırılması üçün lazım olan barış mexanizmləri işlədilmirsə, onun aradan qaldırılması üçün başqa mexanizmlərin dövriyyəyə girməsi qaçılmaz olacaq. Məhəmməd Əmin Rəsulzadə “Bir kərə yüksələn bayraq bir daha enməz” deyərək o torpaqlarda əbədi azadlıq tonqalı yandırıb, Heydər Əliyev “Bir millət, iki dövlət” deyərək qardaşlığımızı pərçimləyib. Bundan o tərəfə deyiləcək söz varmı?”. Qeyd edək ki, ordu generalı Ərdal Ceylanoğlu 2010-cu ildə Türkiyə Quru Qüvvələrinin komandanı vəzifəsinə təyin edilib. Türk ordusuna qarşı təşkil edilmiş saxta “Balyoz” və “Ergenekon” əməliyyatlarına etiraz əlaməti olaraq 2011-ci ilin iyulunda Baş Qərargahın o vaxtkı rəisi, ordu generalı İşık Koşanər ilə birlikdə istefa verib. APA

30 Avqust 2016 12:06

“Qafqaz” müəmmasına son:Universitet rəsmən bağlanacaq, tələbələr yeni ali məktəbə köçürüləcək!

Yaxın günlərdə Azərbaycan hökuməti bu ilin 20 iyulundan etibarən Bakı Ali Neft Məktəbinin (BANM) müvəqqəti idarəçiliyinə verilmiş Qafqaz Universitetiylə bağlı son qərarını elan edəcək. Faktinfo.az Təhsil Nazirliyinə yaxın mənbələrinə istinadla xəbər verir ki, Qafqaz Universitetinin verildiyi SOCAR-ın nəzdindəki Azərbaycan Beynəlxalq Təhsil Mərkəzinin sentyabrın 15-dək növbətisi toplantısı keçiriləcək və həmin toplantının qərarı ilə də Qafqaz Universitetinin rəsmən bağlandığı elan ediləcək. Universitetin 5 min nəfərə çatan tələbə heyətinin isə yeni yaradılacaq başqa bir ali məktəbdə təhsillərini davam etdirəcəkləri gözlənilir.Yeni universitetin hansı ad altında fəaliyyət göstərəcəyi və rektorunun kim olacağı haqda hər hansı məlumat verməyən mənbə bildirib ki, Azərbaycan hökumətinin belə qəfil qərarına səbəb bir tərəfdən yeni tədris ili başlayanadək bu ali məktəb tələbələrini müəmmalı durumuna və valideynlərin intizarlarına son qoymaqdırsa, o biri tərəfdən də SOCAR-ın adının “Gülən qalmaqalı”ndan maksimum dərəcədə uzaq tutulmasına nail olmaqdır: “Türkiyədəki 15 iyul olaylarından sonra Azərbaycan hökumətinin Qafqaz Universitetiylə bağlı atdığı addımlar, həqiqətən, gözlənilməz oldu. Çünki bu universitet, əvvəla, Azərbaycan ali təhsil ocaqları sırasında ciddi nüfuzu, yüksək reytinqi ilə seçilirdi, ikincisi də, orada 5 min nəfərə yaxın azərbaycanlı tələbə təhsil alırdı. Birdən-birə bu qədər insanı – tələbələri, onların valideynlərini, qohum-əqrabalarını dövlətdən narazı salmaq olmazdı. Odur ki, Azərbaycan hökuməti incə bir siyasət işlətdi: əvvəlcə, Qafqaz Universitetinin idarəçiliyini özünün etibarlı kadrlarından birinə – BANM rektoru Elmar Qasımova həvalə etdi. Onun qarşısına belə bir mühüm vəzifə qoyuldu ki, ən qısa müddətdə Qafqaz Universitetindəki mühiti tam şəkildə öyrənsin və xüsusən azərbaycanlı tələbələr arasında narazılıqlar yaratmadan, “Gülən camaatı”na yaxın heyəti təmizləsin. Etiraf olunmalıdır ki, Elmar Qasımov da ona həvalə edilən missiyanı uğurla başa vurdu: qısa müddət ərzində universitetin idarəçiliyini həyata keçirən Gülənçi fiqurları müəyyənləşdirdilər, sonra da 50-dən yuxarı Türkiyə vətəndaşını ikicə günün içərisində rəsmi əmrlə vəzifələrindən azad etdilər və ölkədən çıxardılar. Ancaq problem bununla bitmədi. Çünki ortada 5 minə yaxın azərbaycanlı tələbə-müəllim heyətinin taleyi vardı və bu hal yeni dərs ili öncəsi ölkədə gərginlik yaradardı. Ona görə də indi Azərbaycan hökuməti qərar gəlib ki, həm yeni tədris ili başlayanadək unversitet tələbələrinin, onların valideynlərinin intizarlarına son qoyulsun, həm də SOCAR-ın adı birdəfəlik bu qalmaqaldan qurtarsın”. Mənbənin dediyinə görə, Qafqaz Universitetinin SOCAR-ın himayəsinə verilməsi əslində son illər ərzində ortaya çıxmış və zorən atılmış addım olub: “Bu universitet 1993-cü ildən Azərbaycanda fəaliyyət göstərir. Sadəcə, bir neçə ilə əvvəl Gülən-Ərdoğan ziddiyyətləri ortaya çıxan vaxt Türkiyənin təzyiqi ilə Azərbaycandakı “Çağ Öyrətim” məktəblərinin də bağlanması zərurəti ortaya çıxdı. Ancaq bu məktəblərdə, o cümlədən Qafqaz Universitetində oxuyan azərbaycanlıların təhsilalma prosesində axsama olmasın, təhsilin səviyyəsi aşağı düşməsin deyə, həmin məktəblər Azərbaycan Dövlət Neft Şirkətinin nəzdində yaradılan Beynəlxalq Təhsil Mərkəzinə verildi. Beləcə, SOCAR-a da ittihamların bünövrəsi qoyuldu. İndi Azərbaycan hökuməti bu problemdən birdəfəlik yaxa qurtarmaq qərarına gəlib və çox yaxın günlərdə gərəkli addımlar atılacaq”.  

30 Avqust 2016 9:55

Ara Papyan: “İlham Əliyev ilk mərhələdə 5, sonra isə daha 2 rayonu götürmək istəyir”

"Modus Vivendi" Strateji Araşdırmalar Mərkəzinin direktoru, Ermənistanın Kanadadakı keçmiş səfiri, nüfuzlu politoloq Ara Papyan bir az əvvəl Dağlıq Qarabağ ətrafındakı vəziyyət, eləcə də Azərbaycan və Ermənistan prezidentləri arasında danışıqlarla bağlı bir sıra maraqlı açıqlamalarla çıxış edib. Bu barədə Ermənistan KİV-i yazır.Ermənistan tərəfi 7 rayonu güzəştə gedəcək və qarşılığında Dağlıq Qarabağ üçün aralıq statusu alacaq: “İstəsəniz, bunu qarşılıqlı güzəştlər kimi də xarakterizə etmək olar. Yəni deyəcəklər ki, biz 7 rayonda, onlar isə Dağlıq Qarabağ üçün status məsələsində güzəştə getdilər və üstəlik gələcəklə bağlı əlavə vədlər də verdilər. Məgər bu müqayisə ediləcək güzəştlərdir? Əlbəttə, yox! Bu qarşılıqlı güzəşt deyil, təslim olmaqdır!”. Erməni politoloq daha sonra deyib: "Azərbaycan prezidenti İlham Əliyev ilk mərhələdə 5, sonrakı mərhələdə daha 2 rayonu, üçüncü mərhələdə yenə 5 rayonu, dördüncüdə Zəngəzuru, beşinci həmlədə isə İcevanı götürmək istəyir. Və belə də olacaq. Heç kim şübhə etməsin: həmin güzəştlərdən sonra İlham Əliyev tək Qarabağla qane olmayacaq. Əliyev həmişə sözünə sadiq olub və artıq neçə ildir o, bəyan edir ki, vaxtilə itirdiklərinin hamısını götürmək istəyir. O heç vaxt deməyib ki, mənə hansısa ərazini qaytarın, mən qane olum. Heç vaxt deməyib”. Ara Papyan əmindir ki, Ermənistan və Azərbaycan arasında hərbi balans rəsmi Bakının xeyrinə dəyişib: “Biz həmçinin indiki Ermənistan hakimiyyətinin bu balans bərpa etmək iqtidarında olduğunu görmürük. Bunu faktlar və rəqəmlər də sübut edir... Artıq sübut olunub ki, Ermənistanı hər gün orta hesabla 100 nəfər birdəfəlik tərk edir. Aprel müharibəsində 100 əsgər itirməyimizi o vaxt böyük ürək ağrısı ilə qəbul etdik. Bəs indi-hər gün 100 vətəndaşımızı itirəndə ürəyimiz niyə ağrımır? Axı mahiyyətcə fərqi yoxdur ki, biz insanlarımızı harada və necə itiririk: Və bu bizim hökumətin heç nəyə qadir olmadığını sübut edən ən yaxşı göstəricidir.”

28 Avqust 2016 12:13

Hasan Oktay: “Türkiyə İŞİD-dən sonra PYD-ni vuracaq” – ÖZƏL

“Türkiyənin Cerablus əməliyyatının həyata keçirildiyi tarix önəmlidir”. Bu barədə  Ankarada fəaliyyət göstərən Qafqaz Strateji Araşdırmalar Mərkəzinin (KAFKASSAM) rəhbəri, türkiyəli politoloq Hasan Oktay deyib. Onun sözlərinə görə, Türkiyə-Rusiya münasibətlərinin irəliləməyə başladığı bir vaxtda 15 iyul dövlət çevrilişinə cəhd oldu: “Bu, türk ordusunun içindəki bir qrup FETÖ-ya bağlı olan hərbiçilər tərəfindən həyata keçirildi. Məqsəd Rusiya-Türkiyə yaxınlaşmasının qarşısını almaq və Türkiyədə iqtidarı ələ keçirərək, rus-türk müharibəsi çıxarmaq idi. Çevriliş uğurlu olmadı, amma ordu ciddi şəkildə xalqın gözündən düşdü. Belə bir vaxtda ordunun etibarı yenidən qazanması üçün Türkiyənin cənubunda yaranan təhlükənin qarşısını almaq üçün hərbi əməliyyata başlanıldı”. Türkiyəli politoloq qeyd edib ki, 15 iyuldan sonra Türkiyə-Rusiya yaxınlaşması Ankaranın İŞİD-i səbəb göstərərək, əməliyyata başlaması üçün əsaslı dayaq nöqtəsi oldu. H. Oktay İŞİD-ə qarşı olan Cerablus əməliyyatından sonra hədəfin PYD olacağına diqqət çəkib. “Bu əməliyyatın kürdlərə qarşı olmadığını göstərmək üçün Bərzani ilə təmas quruldu və əməliyyat getdiyi müddətdə Bərzani Ankaraya gələrək, bunun kürdlərə qarşı yox, terror qruplarına qarşı hücum olduğunu göstərdi. Həmçinin, Türkiyə Suriyanın ərazi bütövlüyünü tanıdığını açıqlayaraq, Suriyadakı hakimiyyətə qarşı olmadığını da bəyan etdi. Hesab edirəm ki, Suriyanın şimalından Türkiyəyə gələ biləcək təhlükə ortadan qalxana qədər əməliyyat davam edəcək”, - deyə politoloq vurğulayıb. H. Oktay ABŞ-ın bu əməliyyatı dəstəkləməsini də şərh edib. Onun sözlərinə görə, burada iki məqamın olması mümkündür: “Ya ABŞ 15 iyuldan sonra Türkiyənin ortaya qoyduğu mövqedən sonra Suriya siyasətini dəyişdirdi, ya da Türkiyənin həmləsinə səs çıxarmayaraq dəstəkləmək məcburiyyətində qaldı. İŞİD onsuz da ortaq düşməndir və Türkiyə bu terror qrupuna qarşı qurulan koalisiya qüvvələrində təmsil olunur. Bundan çıxış edən Türkiyə əvvəlcə İŞİD-ə qarşı hərəkətə keçərək, beynəlxalq dəstəyi qazanmış oldu”. H. Oktay qeyd edib ki, Türkiyəyə təhdid ola biləcək bölgəni təmizləmək və Suriya üçün qurulacaq masada yer almaq Ankaranın prioritet məqsədidir: “Regional sülh üçün bunların təmin olunması şərtdir”. Faktinfo.az

27 Avqust 2016 11:06

Putin Xəzər donanmasını da hərəkətə keçirdi, Pentaqon narahatdır

Rusiya prezidenti Vladimir Putinin qəfil əmri ilə Xəzər və Qara dəniz donanmalarının da qüvvələri hərəkətə keçib. Pentaqon Rusiya ordusunun növbəti qəfil manevrlərindən narahatdır və Moskvanı qonşular üçün hərbi təhdid yaratmamağa çağırır. Virtualaz.org xəbər verir ki, bu gün səhərdən Qara dəniz donanmasının 15 gəmisi və Xəzər donanmasının 10 gəmisi, o cümlədən 4 mindən çox hərbçi və 300 vahid döyüş texnikası qəfil yoxlamalar çərçivəsində həyacan siqnalı ilə hərəkətə gətirilib. Qara dəniz donanmasından gəmi zərbə qruplaşması, sualtı qayıqlara qarşı zərbə qrupu və desant gəmiləri döyüş manevrlərinə çıxıblar. Xəzər donanmasından isə raket gəmiləri “Qrad Sviyajsk”, “Velikiy Ustyuq”, “Uqliç” təchizat gəmilərinin müşaiyəti ilə təyin olunmuş manevr zonasına hərəkət ediblər. Habelə qoşunların qəfil döyüş yoxlaması çərçivəsində Qərb dairəsinin qırıcı aviasiyası havaya qaldırılıb və NATO sərhədləri boyu uçuşlara başlayıb. Pentaqon avqustun 25-də bəyan edib ki, Rusiyanın növbəti qəfil manevrlərindən narahatdır və Moskva silahlar üzərində nəzarətə dair öhdəliklərini yerinə yetirib qonşular üçün hərbi təhdid yaratmamalıdır. Müdafiə naziri Sergey Şoyqu isə bildirib ki, qoşunların qəfil əmrlə hərəkətə gətirilməsinin məqsədi strateji əhəmiyyətli cənub-qərb istiqamətində mümkün böhranların lokallaşdırılması üçün silahı qüvvələrin hazırlığını yüksəltməkdir.

26 Avqust 2016 10:52

İtaliyada zəlzələ: ölü sayı 73-ə çatdı, 100 yaralı

İtaliyada zəlzələ qurbanlarının sayının artaraq 73 nəfərə çatdığı bildirilir. Bu barədə İtaliya Mülki Müdafiə Xidmətinin rəsmi nümayəndəsi İmmakolata Postilyone bildirib. İktin düşənlərin sayı barədə hələ dəqiq məlumat verilmir. Təqribən 100 nəfərin xəsarət aldığı deyilir. *   *   *12:16 İtaliyada baş vermiş dağıdıcı zəlzələnin qurbanlarının sayı 24-ə çatıb. Bu barədə “RİA Novosti” xəbər verib. *   *   *10:53 İtaliyada baş vermiş dağıdıcı zəlzələ nəticəsində ən azı 14 nəfərin həlak olduğu bildirilir. Bu barədə İtaliya kütləvi informasiya vasitələri xəbər verib. *   *   *09:45 İtaliyanın mərkəzində yerləşən Latsio və Umbriya vilayətlərinin sərhədində, Terni şəhəri ərazisində 6,2 bal gücündə yeraltı təkanlar qeydə alınıb. Bu barədə Avropa Aralıq dənizi Seysmoloji Mərkəzi (EMSC) məlumat yayıb. Onun məlumatına görə, yeraltı təkanların episentri Askoli-Piçeno şəhərindən qərbdə yerin təqribən 24 km-də və L'Akuila şəhərindən şimalda 50 km. dərinlikdə qeydə alınıb. Zəlzələnin ocağı 2 km. dərinlikdə olub. İtaliyanın mərkəzi hissəsində yerləşən Amatriçe şəhərində zəlzələ nəticəsində ilkin məlumatlara görə 2 nəfər həyatını itirib. Şəhər meri Sercio Pirotssi televiziya vasitəsi ilə çıxış edərək bildirib ki, şəhər binalarına ciddi ziyan dəyib, dağıntılar altında insanlar ola bilərlər. "Baxın, bəzi binalar tamamilə dağılıb, biz ümid edirik ki, yardım alacağıq", - deyə o bildirib. Merin sözlərinə görə, dağılmış binaların altında qala bilən insanlara çatmaq üçün şəhərə ağır texnika lazımdır.

24 Avqust 2016 6:50

Boşanma zamanı əmlak necə bölünür?

  Bu gün məhkəmələrdə araşdırılan işlərin böyük qismi məhz boşanma zamanı yaranan əmlak mübahisələri ilə əlaqədardır.Bu mövzu ilə əlaqədar cəmiyyətin müxtəlif təbəqələrində aparılan müzakirələrdə boşanmadan sonra daha çox qadınların mülkiyyət hüquqlarının pozulduğu iddia olunur. Məhkəmə proseslərində daha çox qadınlar boşanma ərizəsi ilə müraciət ediblər. Boşanma halına gəlib çatmanın səbəbləri müxtəlifdir. Elə ailə var ki, maddi cəhətdən hər cür təminatlı olduğu halda ərlə-arvadın "xasiyyətlərinin uyğun gəlməməsi" boşanmaya səbəb olur. Amma əksər hallarda ailələrdəki boşanma halları daha çox maddi yetərsizlikdən və gənc ailələrə böyüklərin mudaxiləsi nəticəsində baş verir. Digər səbəblərdən biri də insanların, əsasən da qadınların son zamanlarda sosial şəbəkələrdə fəallığıdır. Qadınların sosial şəbəkələrdə "görünməsini" həzm edə bilməyən kişilər var. Həm də bir-çox hallarda qadınların sosial şəbəkələrdəki "fəallığı" kişilərin haqlı qısqanclığı ilə müşahidə olunur. Nikaha girməzdən əvvəl tərəflərin hər birinə mənsub olmuş əmlak, habelə onlardan birinin nikah dövründə hədiyyə kimi və ya vərəsəlik qaydasında aldığı əmlak onun öz mülkiyyətidir. Məsələn, ərə babasından vərəsəlik qaydasında verilmiş mənzil və ya arvada toy hədiyyəsi kimi verilmiş müxtəlif zinət əşyası onların öz mülkiyyətidir və birgə mülkiyyət sayıla bilməz. Həmçinin fərdi istifadə olunan əşyalar - geyim, ayaqqabı və s. əşyalar ümumi vəsait hesabına əldə edilsə də belə, həmin əşyadan istifadə edən şəxsin öz mülkiyyəti hesab edilir. Boşanan ailələrin əksəriyyətində əmlakın bölüşdürülməsi məsələsi ortaya çıxır və bu halda mübahisələrə səbəb olur. Məhkəmə təcrübəsinə əsaslanaraq qeyd etmək istəyirəm ki, arvadın ərlə birlikdə nikah zamanı yaşadıqları mənzildə boşanmadan sonra yaşayış və istifadə hüququnun mövcud olması barədə mübahisə həll edilərkən ilk öncə mənzilin hüquqi vəziyyəti qimətləndirilməlidir. Mülki Məcəllənin tələbinə görə yaşayış binasının tərkib hissəsindən istifadə hüququnun əmələ gəlməsi üçün mülkiyyətçi ilə bağlanmış, notariat qaydasında təsdiqlənmiş yazılı razılaşma zəruridir. Məsələn, gəlinin qayınatasının mülkiyyətçisi olduğu evdə yaşaması üçün qayınatası ilə aralarında notarial qaydada təsdiq olunmuş razılaşma olmalıdır. Bu müddəa ilə bağlı Konstitusiya Məhkəməsi tərəfindən bir neçə Plenum qərarı qəbul edilmişdir. Bəzi hallarda məhkəmələr öz qərarlarında bu növ mübahisələrə qiymət verərkən mülkiyyətçi ilə birgə yaşayan ailə üzvünün yaşayış sahəsindən istifadə hüququnun yaranması üçün tərəflər arasındakı etibarlı ailə əlaqələrinin əsas rol oynadığını göstərirlər. Məsələn, mülkiyyətçi ər olarsa, bu halda arvadın onlar arasında etibarlı ailə əlaqələrinin olması məhkəmələr tərəfindən əsas kimi qəbul edilir. Yaşayış sahəsindən istifadə hüququna gəlincə isə, yaşayış sahəsindən istifadə hüququ olan mənzil mülkiyyətçisinin hər bir ailə üzvü, hətta boşanmadan sonra mənzildən sərbəst surətdə istifadə edə bilər. Uşaqlar qadında qalacaqsa, ər narkomaniyaya meyllidirsə, qadın qeydiyyat vəsiqəsi onun adına təsbit edilməklə əmlakın üçdə iki hissəsinin ona verilməsi tələbini qaldıra bilər. Praktikada da hallar var ki, qadın sübutlarını, həmçinin, uşaqların onun yanında qalmasını nəzərdə tutan boşanma haqqında məhkəmə qətnaməsini təqdim edirsə, onlar təsdiqini tapırsa, hakimlər problemsiz olaraq müvafiq qərar çıxarır. Nikah pozulduğu təqdirdə isə bu məsələyə münasibət bildirmək məhkəmənin vəzifəsidir. Adətən məhkəmədə əmlak bölgüsü işin mürəkkəbliyi  və başqa şəxslərin maraqlarına toxunmamaq üçün boşanmadan sonraya saxlanılır ki, daha ətraflı baxılsın. Evlenin, amma boşanmayin! Samira Sedyarli Faktinfo.az

24 Avqust 2016 11:00

Məşhur idmançının qohumu Gülənə şillə vurub

Türkiyənin  dünyaca məşhur keçmiş ağır atleti Naim Süleymanoğlu 90-cı illərdə Fətullah Gülənin bir videosunda "Naim Süleymanoğlunu heç sevmirəm" deməsinə aydınlıq gətirib.   Avropa.info xəbər verir ki, dünyaca məşhur idmançı N.Süleymanoğlu Fətullah Gülənin ona qarşı MİT-də işləyən bir qohumu səbəbindən nifrət etdiyini deyib.   "Gülən 1990-cı ildə axtarışda olarkən  Burdurda  yaxalanıb İstanbula gətirilir. MİT-in  Beşiktaş Yıldızdakı  mərkəzində sorğuya çəkilir. Onu mühakimə edən də, hazırda təqaüdçü olan MİT-də çalışan bir qohumum idi. İfadəsində şəkər və təzyiq xəstəsiyəm deyib. Bir müddət sonra da Ankaradan gələn bir telefon zəngi ilə sərbəst buraxıldı. Mənim qohumum da dindirərkən ona bir neçə şillə vurub. Qohumum olduğunu öyrənəndən sonra, mənə qarşı mediada kampaniya başlatdı.   90-cı illərdə  idman arenalarında bunlar görüşlər keçirirdilər. Çoxlu sayda insanlar gedib bunların söhbətlərinə qulaq asırdı. Məni həm mühafizə edən polislər, həm də dövlətin əhəmiyyətli yerlərindən vətənpərvər insanlar bu toplantılarda iştirak etməkdən çəkindirirdilər. Deyirdilər ki, diqqətli ol. Sən indi gündəmdəsən. Dünya, Türkiyə səndən danışır. Bunların şousuna alət olma.   Camaat iclaslarına qatılmadığım üçün məni hədəf seçdilər. Sonrakı dövrlərdə qoruma polisim də əlimdən alındı. Əhəmiyyətli yerlərdə rəhbərlik etməyimi mane oldular. Təkliflərinə xeyr deyincə mənə qarşı yönəldilər" - Naim Süleymanoğlu qeyd edib.

23 Avqust 2016 4:01

Fakt

Bizi izləyin