Eldar Mahmudovun «devalivasiya əməliyyatı»-TƏFSİLAT

Və ya sabiq nazir bir gecədə 1,27 milyard dolları necə qazandı? Bu ilin fevralında Azərbaycanda baş vermiş devalivasiyadan sonra ortaya çıxan mənzərə ilk baxışda sakit görünsə də, işin «məsum» məcrada davam etmədiyi aydınlaşmağa başladı. JAM.AZ xəbər verir ki, hadisədən sonra ortaya çıxan mənzərə belədir ki, Mərkəzi Bank manatın dəyərdən düşməsindən başqa çıxış yolu görməyib. Amma əsas vacib məsələ devalivasiyadan kimlərin qazanclı çıxmalarıdır. JAM.AZ-ın bununla bağlı apardığı araşdırmalarından məlum olub ki, devalivasiya oyunundan ən çox qazananlar sırasında iki adamın adı çəkilir. Onlardan biri sabiq MTN şefi Eldar Mahmudov, digəri isə Beynəlxalq Bankın sabiq rəhbəri Cahangir Hacıyevdir. Lakin burada üçüncü bir sima daha var ki, onun adı bir müddət hallansa da, sonradan müəmmalı şəkildə ortadan qaldırıldı. Həmin şəxs Eldar Mahmudovun qohumu, mandatı əlindən alınmış «Azəriqaz» Bankın rəhbəri Çingiz Əsədullayevdir. İddialar var ki, Əsədullayev də «devalivasiya əməliyyatı»nda tərəf olub və onun Eldar Mahmudovun pullarını ölkədən çıxarmaq üçün addımlar atdığı qeyd edilir.Bildirək ki, Eldar Mahmudov bütün dövlət ərkanını dinlətdirdiyi üçün devalivasiya məsələsindən əvvəl xəbər tutub. Bu məlumatı dəyərləndirən sabiq nazir qudası Cahangir Hacıyevin vasitəsi ilə qazanc əməliyyatına başlayıb. Gələn xəbərlərdə vurğulanır ki, Beynəlxalq Bank vasitəsi ilə bir günün içində Eldar Mahmudova məxsus olan 1 milyard manata yaxın vəsait təcili şəkildə dollara çevrilib. Və bu prose sbir çox sahibkarların əliylə həyata keçirilib ki, iz itirilsin. Toplam 1 milyard 270 milyon dollar vəsait gecəykən xarici ölkələrdən birində fəaliyyət göstərən bankdakı hesaba köçürülüb. Elə sirin üstü də buradan açılıb.JAM.AZ-ın məlumatına görə, Cahangir Hacıyev isə Eldar Mahmudovun işlərini gördüyü bir ərəfədə, paralel olaraq özü devalivasiyadan qazanmağa başlayıb. Belə ki, o, özünə simsar bildiyi iş adamlarını başına yığaraq, onlara manatla kredit vermək imkanı olduğunu çatdırıb. Və situasiyanı da izah edib. Nəticədə dövlət sirri yayılıb, möhtəkirlər qazanc əldə etməyə başlayıblar.Bildirək ki, sahibkarlar krediti manatla götürüblər. Elə götürdükləri vaxt da dollara çeviriblər. Bir gecədə 34 faizlik devalivasiyadan əldə etdikləri qazanc isə elə göstərilən faiz dərəcəsində olub. Yəni, əgər «X» adlı sahibkar Beynəlxalq Bankdan 100 milyon manat kredit götürübsə, onu dollara çevirdikdə (həmin dövrün kursu ilə) toplam 127 milyon dollara bərabər olub. Bu da orta hesabla devalivasiyadan sonra həmin şəxslərin bütün faiz dərəcələrini çıxmaq şərtiylə 30 faizlik qazanca bərabərdir. Yəni, adamlar pulu manatla götürdüklərindən onu elə manatla da geri qaytardıqları üçün qazanc əldə ediblər.Amma burada bir başqa problem daha var. Həmin problem ondan ibarətdir ki, Beynəlxalq Bankdan götürülən kreditlər üçün qoyulan girvoların dəyəri alınmış məbləğlə tərs mütənasibdir. Yəni, əgər sahibkar 10 milyon manat kredit alıbsa, girov olaraq qoyduğu əmlakın dəyəri heç 3 milyon manat təşkil etmir. Sadəcə, həmin əmlakın qiyməti şişirdilib.JAM.AZ-ın araşdırmalarına görə, bir müddət əvvəl DİN-in Mütəşəkkil Cinayətkarlığa Qarşı Mübarizə İdarəsinin əməkdaşlarının xeyli sayda sahibkarı saxlamasının arxasında da «devalivasiya əməliyyatı» dayanırdı. Daha doğrusu, DİN ölkənin iqtisadiyyatına ciddi zərbə vurmuş Eldar Mahmudov və komandasının izinə düşsə də, həmin dövrün şərtlərinə uyğun şəkildə sabiq nazirlə əlbir olmuş iş adamlarının ifadəsini almağa çalışırdı. Çünki Mahmudovu zərərsizləşdirmək üçün ən yaxşı yol ona dolayı yolla yaxınlaşmaqdan keçirdi. Yəni, bu sirrin üstünü yalnız «devalivasiya əməliyyatı»nda iştirak etmiş iş adamları aça bilərdilər.Qeyd edək ki, Eldar Mahmudovun dövlət ərkanını dinləməsi sirrinin də üzəri elə fevraldan sonra üzə çıxmağa başlayıb. Daha doğrusu, hakimiyyət dairələri sabiq MTN şefinin onları dinlədiyini məhz bu prosesdən sonra aşkarlaya biliblər. Amma əmin olmaq üçün bir xeyli müddət araşdırma aparmalı olublar. Nəticədə, «bomba» oktyabrın 17-də «partladıldı». Ki, bundan bir həftə qabaq Eldar Mahmudov və bütün dəstəsini zərərsizləşdirməyin planı hazır olub.JAM.AZ-ın araşdırmalarına görə, Eldar Mahmudov, Cahangir Hacıyev və digərlərinin devalivasiya prosesində vurduğu zərərin ümumi məbləği 8 milyard dollara yaxındır. Bunun 6 milyard dollarlıq hissəsi Beynəlxalq Bank vasitəsi ilə reallaşdırılıb. Digər 2 milyard dolların isə səpələnmiş şəkildə həyata keçirildiyi deyilir. Yəni, prosesdə bir yox, bir neçə bank iştirak edib.Məsələ ilə bağlı araşdırmamız davam edir. Yazıda adı keçən şəxslərin də mövqeyini dərc etməyə hazırıq.

8 Dekabr 2015 12:26

«Aztelekom»un «kilid adamı»: Zahir Vəliyev – İTTİHAM VAR

  “MTN işi» ilə əlaqədar prosesin əvvəlindən məlum idi ki, məsələ təkcə sahibkarların incidilməsindən ibarət deyil. Həmçinin ortada ayrı-ayrı məmurların, o cümlədən dövlət başçısının dinlənilməsi məsələsi də var. Zaman içində aydınlaşdı ki, həqiqətən də baş verən həbslər məhz bu olaya görədir. JAM.AZ xəbər verir ki, prosesin əvvəlində ilk həbs olunan Bakı Telefon Rabitəsi İstehsalat Birliyinin (BTRİB) baş direktoru Beytulla Hüseynovun konkret olaraq dinləmələrə görə saxlanıldığı aydınlaşdı. Sonradan proses Rabitə və Yüksək Texnologiyalar Nazirliyinə sıçradı və qısa müddətdə xeyli sayda adam həbs olundu. Lakin baş verənlər bununla da yekunlaşmadı. Ardından «Aztelekom» İstehsalat Birliyinin də rəhbərliyinin saxlanılmasına start verildi. Qısa müddətdə 10 nəfərə yaxın şəxsin həbs edildiyi açıqlandı. İlk olaraq qurumun baş direktoru Məhəmməd Məmmədov həbs olunduqdan sonra belə aydın oldu ki, ortada təkcə dinləmə problemi yox, həm də seçkilərin nəticələrini dəyişdirmək cəhdləri də var. JAM.AZ bildirir ki, həbs olunan MTN-çilərə qarşı qaldırılan cinayət işində bu maddə də öz yerini alıb. İstintaqın gəldiyi qənaət budur ki, başda Eldar Mahmudov olmaqla, Akif Çovdarov ölkədə keçirilən seçkilərinin nəticələrinə müdaxilə ediblər. Hazırda Akif Çovdarova qarşı irəli sürülən ittihamlardan biri də məhz budur. Amma bu zaman diqqəti çəkən bir maraqlı məqam daha var. JAM.AZ-ın araşdırmalarına görə, «Aztelekom» İB-də seçki məktəqələrində müşahidə kameralarının quraşdırılması və onlara nəzarət missiyası da sözügedən qurumla, BRTRİB-də olub. Belə ki, bu ilin avqust ayından etibarən seçkilərə qədər "Aztelekom” İB və Bakı Telefon Rabitəsi İstehsalat Birliyi (BTRİB) tərəfindən ölkədə keçiriləcək parlament seçki məntəqələrinin müşahidə kameraları ilə təchizatı istiqamətində texniki işlər həyata keçirilib. Rəsmi məlumatda vurğulanır ki, Mərkəzi Seçki Komissiyasının (MSK) qərargahına qədər xətt şəbəkəsində parametrlərin ölçülməsi, müəyyən istiqamətlərdə optik kabellərin, əlavə kameraların qurulacağı ehtimal olunan məntəqələrin yerləşdiyi ərazilərdə texniki imkanın mövcudluğu ilə bağlı təhlillər aparılıb və işlər görülüb. JAM.AZ-ın əldə etdiyi məlumata görə, bütün bu prosesə əsasən iki nəfər nəzarət edib. Onlardan biri hazırda həbsdə olan BTRİB-in baş direktoru Beytulla Hüseynov, digəri isə «Aztelekom» İB-nin texniki məsələlər üzrə direktoru Zahir Vəliyev olub. Elə rəsmi məlumatlarda da vurğulanır ki, Zahir Vəliyev seçki məntəqələrində müşahidə kameralarının quraşdırılması ilə bağlı yerli qovşaqlara müvafiq tapşırıqlar verib. Ortaya belə bir sual çıxır ki, Beytulla Hüseynovla birgə çalışan və müşahidə kameralarının quraşdırılmasına nəzarət etmiş Zahir Vəliyev necə olub ki, MTN işinə qarışmayıb və ya bu prosesdə əli olmayıb. Belə bir ehtimal var ki, Vəliyevin də dinləmə və müşahidə məsələlərində əli olub. Lakin o indiyə qədər istintaqın diqqətini çəkməyib. «Aztelekom» İB-nin texniki məsələlər üzrə direktoru Zahir Vəliyevin məsuliyyətdən kənar qalması təbii olaraq bir sıra suallar da yaradıb. Xüsusən də Aztelekom» İB-də belə bir rəy hökm sürür ki, Zahir Vəliyevin məsuliyyətdən kənar qalmasına hansısa sehrli əl yardımçı olub. Əks təqdirdə, həm «Aztelekom» İB-nin direktorunun birinci müavini, həm də «Aztelekom» İB-nin texniki məsələlər üzrə direktoru olaraq Zahir Vəliyevin məsuliyyətdən kənarda qalması imkansız olardı. Çünki mənbənin bildirdiyinə görə, Zahir Vəliyev baş direktoru Məhəmməd Məmmədovdan daha çox, Akif Çovdarovun dəstəsinə yaxın olub və bu dəstə məhz Zahir Vəliyevin əlaqəli şəkildə çalışdığı iddia olunur. Bu durumda Zahir Vəliyevin məsuliyyətdən kənar qalması doğurdan bir sıra sualların yaranmasına rəvac verir. Hər şeydən əvvəl «Aztelekom» İB-də bütün texniki məsələlərə cavabdeh olan şəxsin deyil, baş direktorun həbc olunması kiminsə Zahir Vəliyevi birbaşa müdafiə edir. Qeyd edək ki, mənbə bu barədə daha ətraflı məlumata sahib olduğunu və gərəkirsə bir çox mətləblərə aydınlıq gətirə biləcəyini bildirir. Gedişatdan da belə görünür ki, heç bir səsi-sorağı olmayan və faktiki olaraq Məhəmməd Məmmədovun həbsindən sonra «Aztelekom» İB-yə rəhbərlik edən Zahir Vəliyev "MTN işi" istintaqından də yaxasını kənara çəkə bilməyəcək. Böyük ehtimalla istintaq yaxın vaxtlarda onunla bağlı araşdırmalara başlayacaq. Mənbə onu da qeyd edir ki, Zahir Vəliyev öz sahəsini mükəmməl bilən biridir və əgər ortada hər hansı bir dinləmə məsələsi varsa, bu prosesdən onun mütləq xəbəri olmalıydı. Qarşı tərəfi də dinləməyə hazırıq.

7 Dekabr 2015 6:01

Valideynlər rektora hücum çəkdi: – «Pulumuzu geri qaytarın»

Valideynlər rektora hücum çəkdi: Xəbər vermişdik ki, Gəncə Dövlət Universitetində tələbələr aylığa buraxılır və bunun üçün onlardan pul alınır. Hətta bəzi tələbələrin adları belə oxuculara təqdim olunmuşdu. JAM.AZ xəbər verir ki, fizika-riyaziyyat fakultəsinin dekanı İldırım Qasımovun həyata keçirdiyi «plan» artıq problemə çevrilib.Bununla bağlı JAM.AZ-a verilən məlumatda vurğulanır ki, aylığa çıxarılmış tələbələrin geri qaytarılması və dərsdə iştirakının təmin olunmasından sonra valideynlər GDU-ya hücum çəkiblər. Belə ki, ötən həftənin son günlər bir qrup valideyn GDU-nun rektoru Yusif Yusifovun otağının qarşısında toplaşaraq, onunla görüşmək istədiklərini bildiriblər. Rektor isə məsələnin nədən ibarət olduğunu öyrəndikdən sonra onları qəbul etməkdən boyun qaçırıb.Məlumata görə, valideynlər rektordan hər ay uşaqlarının adına alınmış aylıqların geri verilməsini tələb edirlər. Onlar əvvəlcədən belə razılaşmadıqlarını bildirir və indiyə qədər verdikləri pulların geri ödənilməsini istəyirlər.JAM.AZ-a daxil olan məlumatda deyilir ki, artıq GDU-nun fizika-riyaziyyat fakultəsinin dekanı İldırım Qasımovun kabinetində hər gün vur-çatlasın yaşanır. Belə ki, validyenlər Yusifovun qəbuluna düşə bilmədiklərindən dekanın qapısına üz tuturlar. İldırım Qasımovla müavini Yəhya Namazov isə onları sakitləşdirə bilmir. Amma…İşin əmması odur ki, İldırım Qasımov da bu qalmaqaldan yaxasını qurtarmaq üçün günahkar tapıb. Belə ki, o, validyenlərə ona pul vermədiklərini deyərək, həmin məbləği Yəhya Namazovdan tələb etmələrini bildirir. Dekanın bununla problemdən yaxa qurtarmaq istədiyi vurğulansa da, baş tutacağı inandırıcı görünmür. Çünki bu prosesdə rektorun da adı hallanır və alınmış aylıqların böyük bir qisminin Yusifova verildiyi deyilir.O da qeyd olunur ki, İldırım Qasımovla Yəhya Namazov kirvədirlər. Üstəlik, Namazova tələbələr maraqlı bir ləqəb də veriblər: Güdükçü Yəhya…Qarşı tərəfi də dinləməyə hazırıq.

7 Dekabr 2015 9:34

“İŞİD”dən də dəhşətli terror təşkilatı gəlir” – Keçmiş “KQB” polkovniki

“...“İŞİD”dən də dəhşətli bir terror təşkilatı “növbə” gözləyir”. Bu barədə dünən “Monolit” sarayda “Qafqazda mədəni-dini irsin” qorunması mövzusunda beynəlxalq konfrans başlamamışdan öncə həmsöhbət olduğumuz AMEA İnsan Hüquqları İnstitutunun departament rəhbəri, araşdırmaçı-politoloq, professor Rövşən Novruzoğlu qısa açıqlama verdi. Xatırladaq ki, R.Novruzoğlunun sözlərinə görə, o, 1980-ci illərdə SSRİ DTK-nın xüsusi əməliyyatçısı kimi Əfqanıstan müharibəsində iştirak etmiş, ABŞ Mərkəzi Kəşfiyyat İdarəsinin kurasiyası ilə “Əl-Kaidə” terror təşkilatının formalaşmasında iştirakı olmuş bir sıra şəxslərlə kəşfiyyatçı kimi təmasda olmuşdur. Keçmiş “KQB” polkovniki hafta.az-a bunları söylədi: “Dünyanı öz bildikləri kimi yönəltməyə çalışan qaranlıq güclərin formalaşdırdığı bu terror təşkilatının planlaşdırdığı olaylar gözlənilməzliyi, kütləvi insan qırğınları törədə bilməsi baxımından daha təhlükəlidir. Həmin qurumun adı da artıq məlumdu, amma onu “reklam” etməmək üçün hələlik açıqlamırıq. Əgər “İŞİD” avtomat, top, tankla vuruşursa və haradan zərbə vuracağını təxmin etmək asandırsa, yeni radikal qrup sırf bioloji terror üzərində ixtisaslaşıb və onun hansı istiqamətdən həmlə edəcəyini öyrənmək çox çətindir. Bioterrorun bir forması kimi bu terror qurumu əsasən su, qida mənbələrinin, taxıl məhsullarının, unun, çörəyin, ayrı-ayrı ərzaq məhsullarının və s. kütləvi olaraq zəhərlənməsindən, cürbəcür xəstliklər yayılmasından istifadə etməyə hazırlaşırlar. Son günlər Azərbaycan rəhbərliyinin dini ekstremizmlə mübarizə istiqamətində atdığı addımlar, qanun layihələri müzakirəsi təqdirəlayiqdir. Ancaq görünür, terrorun digər formaları, o cümlədən bioloji terror cəhdlərinə qarşı da öncədən düşünülmüş adekvat, profilaktik tədbirlər görmək gərəkdir”. P.S. Məlumatın nə dərəcədə həqiqətəuyğun olduğunu zaman göstərəcək. Amma artıq dünən axşam saatlarında müxtəlif saytlar Kürd Qızıl Aypara cəmiyyətinə istinadən “İŞİD” terror qruplaşmasının çürüyən cəsədləri küçəyə atmaq yolu ilə Suriyada ət yeyən bakteriya yayması haqda məlumat dərc etdi... İnşallah, biloloji terror mövzusunda araşdırmalarımızı davam etdirəcəyik.

5 Dekabr 2015 12:08

“MTN işi”ndə 6 ay əvvəl müəmmalı həbs – Putin deyib ki…

Bu ilin iyul ayında DİN-nin Baş Mütəşəkkil Cinayətkarlığa Qarşı Mübarizə İdarəsinin əməliyyatı nəticəsində MTN-in adından dələduzluq edən dəstənin yaxalanması barədə məlumat yayılmışdı. Həmin məlumatda deyilirdi ki, Bakı sakini olan vətəndaş (şəxsin adı naməlum səbəblərdən açıqlanmamışdı) DİN-ə müraciət edərək bildirib ki, özlərini MTN-in əməkdaşları kimi təqdim edən bir qrup şəxs onun 3 milyon 400 min ABŞ dolları məbləğində pulunu ələ keçirib. Baş Mütəşəkkil Cinayətkarlığa Qarşı Mübarizə İdarəsinin həyata keçirdiyi əməliyyat nəticəsində dəstənin üzvləri Loğman Abdullayev, Elnur Qasımov, Ruslan Hacıyev, Pərviz Rzayev və Fərhad Tağıyev həbs edilib. Dəstənin digər üzvlərinin də tutulması istiqamətində zəruri tədbirlər davam etdirilir.İstiqlal.az-a bu məsələ ilə bağlı ilginc məlumat daxil olub. Məlumatda deyilir ki, dəstənin üzvü Loğman Abdullayev həqiqətən də MTN əməkdaşı olub və bu dəstə adıçəkilən nazirliyin nəzarəti altında fəaliyyət göstərib. İddialara görə, Loğman Abdullayev həbs edilən MTN generalı Akif Çovdarovun tabeliyində olan şəxs olub.Məlumatda deyilir ki, dəstənin hədəfinə gələn şəxs pulu alınandan sonra Rusiyaya gedib. Bu ölkənin siyasi dairələrindəki tanışları vasitəsilə məsələni Vladimir Putinə çatdırıb. Məhz bundan sonra DİN-ə dəstəni zərərsizləşdirmək barədə göstəriş verilib. Polisin peşəkarlığı nəticəsində dəstə dərhal zərərsizləşdirilib. Eyni zamanda məsələ bütün çılpaqlığı ilə "yuxarılar"a məruzə edilib. Həmin vaxt Akif Çovdarov Loğman Abdullayevin həbsinə mane olmağa çalışsa da, bu mümkün olmayıb.

5 Dekabr 2015 11:11

“Nardaranda baş verənlər dövlət çevrilişinə cəhd və terrordur” – Allahşükür Paşazadə

“Nardaranda baş verənlər bizi məyus etdi. Hadisələr zamanı biz müraciət yaydıq. Baş verənlərin dinə aidiyyəti yoxdur. Bu, dövlət çevrilişinə cəhd, terrordur. Biz bunu qəti şəkildə pisləyirik”. Faktinfo-nun xəbərinə görə, bunu Qafqaz Müsəlmanları İdarəsinin sədri Hacı Allahşükür Paşazadə deyib.O qeyd edib ki, Azərbaycanda dövlət din üçün hər cür şərait yaradıb: “Kim Taleh Bağırzadə kimilərinin yanında olacaqsa, bu, nankorluqdur, dövlətə, dövlət başçısına qarşı olmaq deməkdir. Nardaranda bəzi dindarlar, ağsaqqallar var. Bir qrup adam onların inamından istifadə edib. O adamlar nardaranlı deyil. Ulu öndərin vaxtında Nardaranda 40-a yaxın insanın həbsdən buraxılması, ziyarətgahın bərpa edilməsində rolumuz oldu. Bir növ sülh yarada bildik. Heyfislənirəm ki, bu məsələ sonradan həllini tapa bilmədi. Artıq bir neçə gündür, güc yolu ilə həll olunur. Bu, düzgün qərardır. Bu məsələnin həllində biz aciz qaldıq”. “Nardaranda baş verənlərin kökü başqa yerlərə gedib çıxır. Bunların kökü xaricdən gəlir. Xaric deyəndə bəziləri qonşuluqdakı dövlətləri nəzərdə tutur. Lakin nə Türkiyə, nə də İran Azərbaycanda iğtişaşın tərəfdarıdır. İran Azərbaycanda sülh olmasını istəyir”.Bunu da Qafqaz Müsəlmanları İdarəsinin (QMİ) sədri şeyxülislam Allahşükür Paşazadə deyib.O bildirib ki, Azərbaycanın düşməni Ermənistandır: “Ola bilsin ki, onlar da burda iğtişaş törətmək istəsinlər. Saxlanılan şəxslərin bədənlərində olan rəmzlər erməniliyin simvoludur”.A. Paşazadə qeyd edib ki, Taleh Bağırzadənin çıxışlarında insanları ancaq dövlət çevrilişinə səsləmək olub: “Onun çıxışlarında imam Hüseynin adı çəkilmirdi. Biz dindarlar prezidentimizin siyasətini bəyənirik. Daxili işlər naziri Ramil Usubovla, başqa dövlət adamları ilə danışmışam. Onlar bizə arxalanırlar. Onları bilirlər ki, bizim adamlarımızın Taleh Bağırzadə ilə əlaqəsi ola bilməz. Gələcəkdə bu cür hadisələrdə ayıq-sayıq olmalıyıq. Bu, bizim borcumuzdur”.Şeyxülislam onu da qeyd edib ki, dinin özünə qarşı getməyin də tərəfdarı deyil: “Burada əqidə sahibləri var. Onların qəlbinə toxunmaq olmaz”.

3 Dekabr 2015 3:25

Rusiyaya 400 litr alkoqol aparan azərbaycanlı saxlanılıb

Rusiyanın Sankt-Peterburq şəhərində etiraz edən uzaq məsafə sürücülərinin maşınından böyük həcmdə spirtli içki aşkarlanıb. Faktinfo-nun məlumatına görə, Rusiyanın iqtisadiyyat polisi şəhərdəki iritonnajlı yük avtomobillərinin dayanacağında yoxlama aparıb.Bu zaman maşınların birindən 5 litrlik şüşələ doldurulmuş 400 litr spirtli içki aşkarlanıb. Yük maşının azərbaycanlıya məxsus olduğu müəyyən edilib.O, məhsulların daşınması üçün lazım olan sənədləri polisə təqdim etməyib və həmin məhsulların mənbəyini bildirə bilməyib. Bu səbəbdən polis spirtli içkiləri müsadirə edib, nümunələrini araşdırmaq üçün müvafiq qurumlara göndərib.Uzaq məsafə sürücüləri dekabrın 1-də "Platon" sisteminə qarşı etiraz aksiyası keçiriblər. Onlar həmin sistemin ləğv edilməsini tələb edirdilər. Bu, sürücülərin sayca üçüncü aksiyası olub.Etirazlar zamanı yük maşınlarından biri etirazçıların üstünə sürülüb. Faciəvi hadisə nəticəsində bir nəfər maşının təkərləri altında qalaraq ölüb, 3 nəfər yaralanıb.Yeni qanun bir çox sürücülər üçün problem yaradıb. Bəziləri dövlət yollarına toplanan ödənişlərə görə noyabr ayının ortalarından etibarən yolda qalıblar. Onlar maliyyə və digər səbəblərdən Moskvaya girə bilmirlər.Noyabrın 15-dən qüvvəyə minən "Platon" sistemi zərər çəkən yolların bərpa edilməsi üçün sürücülərdən əlavə rüsumun ödənilməsini tələb edir. Həmin vəsait maksimal yükgötürmə icazəsi 12 tondan artıq olan nəqliyyat vasitələrinin yollara vurduğu zərərin aradan qaldırılmasına xərclənəcək.

3 Dekabr 2015 2:22

Nəşriyyatın qarşısında jurnalistlərə tələ-kamera

Bakıda yol hərəkəti ilə bağlı tez-tez dəyişikliklər baş verir. Əvvəllər aidiyyatı dövlət qurumları bu dəyişikliklər barədə kütləvi informasiya vasitələrində sürücülərə məlumat verirdisə, budəfəki dəyişiklikdən çoxlarının xəbəri yoxdur. Söhbət Mətbuat prospekti və Həsən bəyə Zərdabi küçəsindən gedir. Faktinfo.az avtosfer.az saytına istinadən verdiyi məlumata görə, bu yolda hərəkətin kim tərəfindən dəyişdiyi bəlli deyil. Bir ay əvvəl Nəşriyyatın qarşısından üzü Bakı Dövlət Universitetinə tərəf gedən istiqamətdəki svetoforda sola dönmə bölməsi ləğv edildi. Bunun ardınca da həmin yerdə asfalt üzərindəki sola dönmə nişanlanma xətti silinib. Qarşıda ayırıcı zolağa bununla bağlı müvafiq yol nişanı da qoyulub. Bu dəyişiklik o deməkdir ki, Badamdar qəsəbəsi tərəfdən Azərbaycan Nəşriyyatına gəlmək istəyənlər Mətbuat prospekti boyunca sola dönüb geri qayıda bilməzlər. Bunun üçün prospekt boyu düzünə hərəkət edib «Qələbə» meydanına çıxmaq, oradan da sağa – Nəqliyyat Nazirliyinin yanına düşüb, körpünün altından dövrə vurmaqla geri qayıtmaq lazımdır. Ən yaxşı halda isə vaxtilə Musabəyovun heykəli olan parkın qarşısındakı svetofordan sağa dönüb bir neçə metr getdikdən sonra qırıq-qırıq xətt olan yerdən geri dönüb həmin parkın başına dövrə vurandan sonra yenidən Mətbuat prospektinə düşmək olar. Bu dəyişikliyi yol hərəkətinin təşkilində çatışmazlıq kimi qiymətləndirmək olar. Çünki o boyda məsafəni qət etməli olan sürücü istər-istəməz qarşıdakı küçə və prospektlərdən keçməlidir və bu zaman heç şübhəsiz ki, tıxac-sıxlıq yaratmış olacaq. Həmin küçədə sağa-sola dönməni ləğv edənlər başa düşməlidir ki, burada paralellik pozulur və bu küçənin yükü başqa küçələrinin üzərinə düşür. Ümumiyyətlə, bu dəyişikliyin məntiqi də yoxdur. Çünki Mətbuat prospektində bir neçə svetofor var və burada bir neçə saniyəlik sağa-sola dönməni təşkil etmək heç vaxt problem yaratmayıb. İllər uzunu həmin yolda sağa və sola dönmək mümkün idi. Hər halda, diqqətinizə çatdırırıq ki, Mətbuat prospekti və Həsən bəy Zərdabi küçəsində geriyə dönmə qadağandır və bunun üçün bir neçə kilometr yol qət etmək lazımdır. Artıq qeyd etdiyiimiz kimi, yol nişanları götürülüb və ya silinib, kameralar isə çəkir. *** İndi vəziyyət belədir ki, "Azərbaycan" nəşriyyatında çalışan jurnalistlər nəşriyyatın qarşısına gəlmək üçün ən azı 4-5 km məsafə qət etmlidirlər. Nəticədə təkrarən tıxaca düşüb əziyyət çəkməli olurlar... Hətta yolun əks tərəfindən hərəkət edərək nəşriyyatın həyətinə yük gətirmək, yaxud burada çalışanların həyətə girməsi süni olaraq məhdudlaşdırılıb. Halbuki əvvəllər sola dönmək üçün işıqforda sola dönməni bildirən işarə var idi, sonradan onu ləğv edərək yolun üstünə dönməni bildirən xətt-işarə vuruldu... Təcrübə göstərir ki, məqsəd yenə də cərimələri işə salmaq, buradan dönənləri tələyə salmaqdır. Ən vacibi, belə bir ciddi dəyişiklik barədə heç kimin xəbəri yoxdur. Hətta yolun üstündəki dönmə xətti də durur, amma başqa bir nişanla çaşdırıcı və aldadıcı vəziyyət yaradılıb...

1 Dekabr 2015 2:15

Tərtərdə biabırçılıq: İcra başçısı müəllim və həkimləri qul əməyinə cəlb edib

Hacıkənddə villa tikdirən Tərtərin icra başçısı, müəllim və həkimləri Gəncəyə yer süpürtdürməyə aparır Tərtərin icra başçısı Müstəqim Məmmədovun yeni-yeni əməlləri meydana çıxır. Zaman içində daha da varlanan icra başçısı, bunun qarşılığında tərtərlilərə hörmət etmək əvəzinə, onlara qul kimi baxır. Və bunun əyani sübutu isə bu yaxınlarda davamlı olaraq baş vermiş hadisələrdir. Faktinfo.az Demokratiya.info-ya istinadən xəbər verir ki, Müstəqim Məmmədov hal hazırda Göygöl rayonunun Hacıkənd qəsəbəsinin Mixayılovka kəndində özünə bahalı villa inşa etdirir. Həmin məlumatlara görə, inşa edilən villanın bütün tikinti materialları, hətta topağı belə Tərtər rayonundan daşınır. Təbii ki, yerli idarə və müəssisə rəhbərlərinin maddi imkanları hesabına. Amma Müstəqim Məmmədov bununla kifayətlənmir. O tərtərlilərə hörmət etmək əvəzinə, onlara qarşı daha xoşagəlməz hərəkətləri ilə diqqəti çəkir. Bildirilir ki, Müstəqim Məmmədov artıq bir müddətdir Tərtər rayonundakı bütün səhiyyə, təhsil və digər büdcə təşkilatlarının işçilərini avtobuslara dolduraraq, onları Gəncə şəhərinə yer süpürtdürməyə gətirir. Bütün bu baş verənlərdən dolayı Tərtər camaatı da bezib. Onlar Gəncədə yer süpürmələrini özlərinə həqarət hesab edirlər və bu səbəbdən də dövlət başçısına müraciət etməyə hazırlaşırlar. Nəzərinizə çatdıraq ki, Tərtərin icra başçısı Müstəqim Məmmədovun əməlləri bununla da bitmir. Onun mütəmadi olaraq, atdığı addımlar mahiyyət etibarə ilə cəbhə xəttində yerləşən bir rayonun rəhbərinə qəti yaraşmır. Elə bu səbəbdəndir ki, Tərtərin «barıt çəlləyi» üzərində qərarlaşdığı düşüncəsi yaranıb. Və rayonda hər an hər şeyin baş verməsi istisna edilmir.

27 Noyabr 2015 6:00

Keçmiş MTN-çi: “Nardarandakı əməliyyat yaxşı planlaşdırılsaydı, ölüm olmazdı”

Milli Təhlükəsizlik Nazirliyinin keçmiş polkovniki İlham İsmayıl Nardaranda baş verən insidentə münasibət bildirib O, açıqlamasında baş verənlərə təəssüfləndiyini deyib: “Fikrimcə, dindarlarla çox ehtiyatsız davranılıb. Əgər əməliyyat qarşı tərəfin silahlı olub-olmadığını öyrənmədən başladılıbsa, bu, ehtiyatsızlıqdır. Mən bunu yaxşı planlaşdırılmamış əməliyyat kimi dəyərləndirirəm. Təəssüf edirəm ki, hadisə zamanı ölənlər var. Dindarların aqressivliyi əvvəldən bəlli idi. Əməliyyat düşünülmüş olsaydı sakitcəsinə, qanunsuz silah saxlamaq adı ilə həmin şəxsləri həbs etmək olardı. Təəssüf ki, əməliyyat sona qədər işlənilməyib və ortada faciə yaşanır. Dindarlar “Taleh Bağırzadə həbs edilərsə Azərbaycanda qan su yerinə axıdılacaq” deməklə hədə-qorxu gəlmişdilər. Uğurlu bir əməliyyatla həmin şəxsləri qansız-qadasız tutmaq olardı. Sübut etmək olardı ki, bunlar dindar yox, məhz silahlı terrorçulardır. Onda dövlətin təbliğatı da genişlənmiş olardı”. Keçmiş MTN-çi bir neçə il əvvəl dindarlara qarşı həyata keçirilən əməliyyatı indiki ilə müqayisə edib: “Təxminən 4-5 il əvvəl Gəncədə Padarov soyadlı zaqatalalı vəhhabi polis zabiti tərəfindən tutulanda hər ikisi ölmüşdü. Çünki əməliyyat ciddi hazırlanmamışdı. Qarşıdakının özünü öldürməyə hazır olduğunu bilə-bilə bəsit formada, qapını döyərək “səni tutmağa gəlmişik” demişdilər. Bu da o tipli əməliyyatdır. Silahlı dindara heç bir halda haqq qazandırmırıq. Amma əməliyyat uğursuz alınıb. O qədər ehtiyatlı olmaq lazım idi ki, qarşı tərəfin fikirləşməyə zamanı olmasın. Ehtiyatlı olmaq, təbliğatı elə etmək olardı ki, əhali də radikalların din bayrağı altında gizləndiyini əyani görərdi”. Daxili İşlər Nazirliyi (DİN) və Baş Prokurorluğun Sabunçu rayonu Nardaran qəsəbəsində baş vermiş silahlı insidentlər bağlı birgə yaydığı məlumata əsasən, hadisə zamanı 2 polis, 4 dindar həlak olub. Həmçinin bir neçə nəfərin yaralandığı qeyd edilir. 14 nəfər isə həbs edilib.

26 Noyabr 2015 6:06

İranda 14 yeraltı raket bazası var

İranda 14 yeraltı raket bazası var və bu bazalar yerin 30-500 metr dərinliyində yerləşir. Bu sözləri İranın İslam İnqilabı Keşikçilər Korpusunun (Sepah) Qüds Qoşunlarının komandirinin baş müşaviri general Həsən Kərimpur deyib. Faktinfo-nun  məlumatına görə, bu barədə İranın İSNA agentliyi məlumat verib.H.Kərimpur deyib ki, bu yeraltı bazalarda lazımi qədər təchizat var: "Hər hansı ölkədən İrana qarşı raket atılarsa, bu bazalardan avtomatik olaraq hücum edən ölkənin bütün önəmli yerləri bombalanacaq". O deyib ki, İran yeganə ölkədir ki, ərazisinin hər 20 kilometrindən bir hava hücumundan müdafiə (HHM) üçün sistem quraşdırılıb: “Hazırda bu HHM sistemlərinin sayı 3500-dir və bu rəqəm 5500-ə çatsa, İrana heç bir təyyarə hücum edə bilməz”. H.Kərimpur deyib ki, düşmənlər və ABŞ-ın səyi nəticəsində “Hermes 450" pilotsuz kəşfiyyat təyyarəsi İran ərazisinə girdi və Nətənz bölgəsində biz onu vurub sala bildik.Qeyd edək ki, 2014-cü ilin avqustun 24-də İran hərbçiləri bəyan ediblər ki, onlar İranın hava məkanında İsrail istehsallı "Hermes 450" pilotsuz kəşfiyyat təyyarəsini vurublar. Pilotsuz kəşfiyyat təyyarəsi uranın zənginləşdirilməsi üçün atom müəssisəsinin yerləşdiyi Nətənz bölgəsini görməyə cəhd edib.Xatırladaq ki, cari ilin oktyabr ayında İran İqilabı Keşikçiləri Korpusu (Sepah) ilk dəfə yerin 500 metr altında olan hərbi bazanın qapısını dövlət telekanalının üzünə açaraq öz hərbi gücünü dünya ictimaiyyətinə nümayiş etdirib. Bazada skat raketlərinə aid görüntülər nümayiş etdirilib. Hərbi bazanın harada yerləşməsi barədə isə məlumat verilməyib.

26 Noyabr 2015 1:34

Mandatsız qalan partiya sədrlərinin planı – Avropa Məhkəməsi

  Milli Məclisə keçirilən 1 noyabr seçkiləri geridə qalsa da, səsvermənin nəticələrindən narazı qalanlar var. Narazılıqları haqlı saymayan  Mərkəzi Seçki Komissiyası seçkinin nəticələrini təsdiqlənmək üçün artıq Konstitusiya Məhkəməsinə göndərib. Modern.az saytı namizədliyini irəli sürüb deputat seçilməyənlərin Avropa Məhkəməsinə müraciət edib-etməyəcəkləri barədə fikirlərini öyrənib. 106 saylı Tovuz-Qazax-Ağstafa seçki dairəsindən deputatlığa keçmiş namizəd, Ədalət Partiyasının sədri İlyas İsmayılov bu barədə hələ ki düşünmədiyini deyir: “Hələ ki Azərbaycandakı məhkəmələrə müraciət etməklə məşğulam. Apelyasiya Məhkəməsinin cavabını gözləyirəm. Bəlkə heç Avropa Məhkəməsinə müraciət etməyə ehtiyac qalmadı. Ona görə bu barədə hələ ki düşünmürəm” Ümid Partiyasının sədri İqbal Ağazadə isə Avropa Məhkəməsinə müraciət göndərəcəyini istisna etməyib: “Bir neçə dairə ilə bağlı şikayətlərimiz hələ də qüvvədədir. Konstitusiya Məhkəməsinin cavabını gözləyirik. Cavab qənaətbəxş olmazsa, Avropa Məhkəməsinə müracət edəcəyik” 63 saylı Sabirabad birinci seçki dairəsindən deputatlığa sabiq namizəd, Azərbaycan Xalq Partiyasının sədri Pənah Hüseyn də Avropa Məhkəməsinə müracət etməyi düşünür: “Ali Məhkəmədən qərar alandan sonra Avropa Məhkəməsinə də müraciət etmək fikrim var. Çünki mənim haqqımda mətbuatda belə bir yazı gedib ki, guya, “mən Avropa Məhkəməsinə müraciət etməyəcəm”. Bundan sonra  keçmiş rəqiblərim və onların komandası sosial şəbəkələrdə belə xəbər də yaymışdılar ki, Pənah Hüseynin halallığını veriblər. Guya, buna görə şikayət etmirəm. Mən də bunları nəzərə alaraq, Avropa Məhkəməsinə müraciət etməyi düşünürəm”

23 Noyabr 2015 5:45

Vahid Əzizdən Anara şok ittiham: “Qaçıb Türkiyədə gizlənmişdi…”

Bu gün şair, tərcüməçi, Azərbaycan Yazıçılar Birliyinin üzvü, Azərbaycan Jurnalistlər Birliyinin üzvü Vahid Əzizin 70 illik yubileyidir. Yubilyar aznews.az-a açıqlamasında Yazıçılar Birliyindən ona qarşı gözləmədiyi diqqətsizlik olunduğunu bildirib.Bundan həm pərt olduğunu, həm də qəzəbləndiyini söyləyən səbəbkar AYB-nin sədri Anara qarşı ağır ittihamlar səsləndirib: “Heç kəs məni təbrik etmədi. Yazıçılar Birliyinin ümumiyyətlə yadına düşmədim. “Ədəbiyyat” qəzeti belə mənimlə bağlı bir cümlə də təbrik verməyib. Necə ola bilər? Vahid Əziz 40 ildir Yazıçılar Birliyinin üzvüdür. “Ədəbiyyat” qəzetinin nizamnaməsinə görə yubileyi olan hər bir yazıçı, şair orada təbrik olunmalıdır. Mən Qarabağ müharibəsi veteranıyam. Mən erməni gülləsinin qarşısında oturanda onlar haradasa kabab yeyib. bığlarını yağlayırdılar. Həmin vaxt – vətənin dar günündə Anar, Fikrət Qoca keflə məşğul idilər. Qorxudan Azərbaycandan qaçıb Türkiyədə gizlənmişdilər. Amma mən döyüşürdüm, xidmət edirdim.Anar müəllim və Fikrət Qocadan soruşuram: Vahid Əziz Yazıçılar Birliyinin katibi olub, niyə məni təbrik etmədiniz? Heç olmasa, təbrik məktubu yazardınız... Bunu necə başa düşək? Bu nə deməkdir axı? Bu nə ayrı-seçkilikdir?” Xatırladaq ki, Vahid Əziz 1945-ci il noyabrın 23-də Ermənistanın Dərələyəz mahalının Əzizbəyov rayonunun Əzizbəyov kəndində qulluqçu ailəsində anadan olub. Tərtər rayonunda orta məktəbi bitirib, əmək fəaliyyətinə Əli Bayramlı şəhərində "Şirvanneft" trestində başlayıb. Azərbaycan Politexnik İnstitutunu bitirib, Bakı Şəhər Partiya Komitəsində təbliğat və təşviqat şöbəsində təlimatçı (1976-1982), Azərbaycan KP Mərkəzi Komitəsində təlimatçı, mətbuat bölməsinin müdiri (1982-1989), Azərbaycan Dövlət Mətbuat Komitəsində sədr müavini (1989-1991) vəzifələrində çalışıb.Azərbaycan Yazıçılar Birliyi İdarə Heyətinin katibi, Bakı Şəhər İcra Hakimiyyətinin Reklam və Şəhər tərtibatı Departamentində "Reklamların Azərbaycan dilində yazılışına nəzarət bölməsi"nin müdiri, Dağlıq Qarabağ üzrə respublika təşkilat komitəsinin üzvü olub.Bədii yaradıcılığa 1967-ci ildə "Ədəbiyyat və incəsənət" qəzetində çıxan ilk şeirindən sonra başlayıb. 40-dan çox şerinə musiqi bəstələnib, diski buraxılıb...

23 Noyabr 2015 2:47

Fakt

Bizi izləyin