İcra Hakimiyyətinin yaxınlığında intihara cəhd – Ağdamda

Baharlı qəsəbə sakini Əhmədov Saleh Hümbət oğlu Ağdam rayon İcra Hakimiyyətindən çıxıb və təqribən 100-150 metr aralandıqdan sonra özünə od vurub   Təqribən bir saat əvvəl Quzanlı qəsəbəsində Ağdam rayon İcra Hakimiyyətinin inzibati binasından təqribən 100-150 metr məsafədə Ağdam rayon sakini özünü yandırıb. Faktinfo.az saytı pia.az-a Ağdamdan daxil olan məlumata görə, bu gün sabah saatlarında Ağdam rayon Quzanlı qəsəbəsində icra hakimiyyətinin inzibati binasının yaxınlığında Baharlı qəsəbə sakini Əhmədov Saleh Hümbət oğlu Ağdam rayon İcra Hakimiyyətindən çıxıb və təqribən 100-150 metr aralandıqdan sonra özünə od vurub. Ətrafdakılar intihar cəhdinin qarşısını almaq üçün köməyə gəliblər və odu söndürməyə nail olublar. Hazırda Salehin Ağdam rayon Mərkəzi Xəstəxanasına çatdırıldığı və vəziyyətinin orta ağır olduğu qeyd olunur. Aldığımız məlumata görə, Saleh Əhmədov icra hakimiyyətinə oğluna iş istəmək üçün gedib. Hadisə baş verən vaxt Ağdam rayon İcra Hakimiyyətinin başçısı Raqub Məmmədovun Bakıdan Quzanlıya yeni qayıtdığı bildirilir. Başqa bir mənbədən aldığımız məlumata görə, intihara cəhd edən 45 yaşlı Əhmədov Saleh Hümbət oğlunun psixoloji problemləri olub. İnsidentlə bağlı Ağdam rayon İcra Hakimiyyətinin mövqeyini öyrənməyə çalışırıq.

20 İyul 2016 5:48

​Bakı çimərliklərində 23 obyekt sahibi məsuliyyətə cəlb olunub

Tədbirlər çimərlik mövsümü başa çatanadək davam etdiriləcək Xəzər dənizinin sahilboyu ərazilərindəki çimərliklərdə, əyləncə mərkəzlərində, digər kütləvi istirahət yerlərində əcnəbilərin və ölkə vətəndaşlarının təhlükəsizliklərini təmin etmək, sağlamlıqlarını qorumaq məqsədilə Bakı şəhər Baş Polis İdarəsinin (BŞBPİ) müvafiq qurumlarının əməkdaşlarından ibarət qruplar təşkil olunub və paytaxtın ümumilikdə 6 rayonun inzibati ərazisindəki çimərliklərdə fəaliyyət göstərən 86 iaşə obyektində sanitariya-gigiyena və epidemiya qaydalarına, eyni zamanda, istehsalat və məişət tullantıları haqqında qanunvericiliyin tələblərinə əməl edilməsinin vəziyyəti yoxlanılıb.Bu barədə “Report”a Daxili İşlər Nazirliyinin (DİN) mətbuat xidmətindən məlumat verilib.Yoxlamalarla Xəzər və Sabunçu rayonlarında fəaliyyət göstərən 16, Suraxanı rayonunda 4 iaşə obyektinin sahibinə İnzibati Xətalar Məcəlləsinin 211 (istehsalat və məişət tullantıları haqqında qanunvericiliyin pozulması), Binəqədi rayonunda fəaliyyət göstərən 3 obyektin sahibinə isə 266.3-cü (məişət tullantılarının tutumlardan kənar yerlərə atılması) maddələri ilə, ümumilikdə, 23 şəxsə inzibati xəta haqqında protokol tərtib edilib və onların məsuliyyətə cəlb olunmaları təmin olunub. “Vətəndaşların sağlamlığının qorunması, yoluxucu xəstəliklərin qarşısının alınması və çimərlik ərazilərində antisanitariya şəraitinin aradan qaldırılması istiqamətində tədbirlər çimərlik mövsümü başa çatanadək davam etdiriləcək”, - DİN-dən bildirilib.

20 İyul 2016 11:55

​Akif Çovdarov və daha üç nəfərin cinayət işi üzrə ibtidai istintaqı başa çatıb – EKSKLÜZİV

Keçmiş MTN-in həbsdə olan 4 yüksək vəzifəli əməkdaşının cinayət işi ayrıca icraata verilib Ləğv edilmiş Milli Təhlükəsizlik Nazirliyinin (MTN) həbsdə olan 4 yüksək vəzifəli əməkdaşının cinayət işi ayrıca icraata verilib. "Report"un əldə etdiyi məlumata görə, bunlar keçmiş MTN-in Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarov, MTN-in Energetika və Nəqliyyat Sahələrində Təhlükəsizlik Baş İdarəsinin sabiq işçisi, polkovnik Səlim Məmmədov, MTN-in sabiq idarə rəisi, mayor Akif Əliyev və keçmiş şöbə rəisi Orxan Osmanovdur.Artıq həmin şəxslərin cinayət işi üzrə ibtidai istintaqı başa çatıb. Hazırda vəkillər və tərəflər cinayət işinin materialları ilə tanış olurlar. Tanışlıq mərhələsi başa çatandan sonra iş baxılması üçün məhkəməyə göndəriləcək.Qeyd edək ki, ötən il noyabrın 25-də Baş Prokurorluğun yaydığı məlumatda keçmiş MTN-in 21 sabiq əməkdaşının Cinayət Məcəlləsinin müvafiq maddələri ilə təqsirləndirilən şəxs qismində cəlb edildiyi bildirilib. 19 şəxs barəsində həbs qətimkan tədbiri, 1 nəfər barəsində başqa yerə getməmək haqqında iltizam qətimkan tədbiri seçilib, istintaqdan yayınan 1 şəxs barəsində isə həbs qətimkan tədbiri seçilməklə axtarış elan edilib. MTN əməkdaşlarının törətdiyi cinayət əməlləri nəticəsində hüquqları pozulmuş 57 nəfər zərər çəkmiş şəxs qismində tanınıb. Onlara dəymiş ziyanın ümumi məbləğinin on milyonlarla manat olduğu müəyyən edilib.A.Çovdarov və digərləri barəsində Cinayət Məcəlləsinin 308.2 (Vəzifə səlahiyyətlərindən sui-istifadə, bu Məcəllənin 308.1-ci maddəsi ilə nəzərdə tutulmuş əməllər ağır nəticələrə səbəb olduqda və ya seçkinin (referendumun) nəticələrinə təsir məqsədilə törədildikdə), 311.3.1 (Rüşvət alma (passiv rüşvətxorluq), qabaqcadan əlbir olan bir qrup şəxs və ya mütəşəkkil dəstə tərəfindən), 311.3.2 (Rüşvət alma (passiv rüşvətxorluq) təkrar törədildikdə), 311.3.3 (Rüşvət alma (passiv rüşvətxorluq) külli miqdarda törədildikdə), 311.3.4 (Rüşvət alma (passiv rüşvətxorluq) hədə-qorxu tətbiq olunmaqla törədildikdə) maddələri ilə ittiham olunur. Bundan başqa, onun barəsində Cinayət Məcəlləsinin 145.3-cü (Qanunsuz azadlıqdan məhrum etmə, iki və ya daha çox şəxsə qarşı törədildikdə; təqsirkar şəxs üçün aşkar surətdə hamilə vəziyyətində olan qadına qarşı törədildikdə; yetkinlik yaşına çatmayan şəxs barəsində törədildikdə; bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (cinayətkar təşkilat) tərəfindən törədildikdə; zərərçəkmiş şəxsin həyatı və ya sağlamlığı üçün təhlükəli olan zor tətbiq etməklə törədildikdə; silahdan, yaxud silah kimi istifadə edilən əşyalardan istifadə etməklə törədildikdə, bu əməllər ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda) maddəsi ilə də cinayət işi açılıb.

20 İyul 2016 11:43

Həbsdə olan MTN generalının ailəsilə görüşünə icazə verildi

Vəzifə səlahiyyətlərindən sui-istifadə və mənimsəməkdə təqsirləndirilərək 14 il azadlıqdan məhrum edilən, Naxçıvan Muxtar Respublikasının sabiq milli təhlükəsizlik naziri Vəli Ələsgərovun ailə üzvləri ilə görüşünə icazə verilib. Bu barədə Trend-ə V.Ələsgərovun vəkili Tofiq Allahverdiyev məlumat verib. Vəkil bildirib ki, V.Ələsgərov barəsində məhkəmə hökmü çıxarılandan sonra onun qanunvericiliyə uyğun olaraq ailə üzvləri ilə görüşü bərpa edilib: "Məhkəmə qərarından sonra Vəli Ələsgərov qardaşı ilə bir neçə dəfə görüşüb. Hazırda Vəli Ələsgərov saxlanma şəraiti və səhhətindən şikayətçi deyil. Onun saxlanma şəraiti normaldır. Lakin, ona kənardan ərzaq qəbul etməsinə icazə verilmir. Bunun səbəbi isə məhbusun təhlükəsizliyinin təmin edilməsi, zəhərlənmə və digər xoşagəlməz hallardan qorunmasıdır". V.Ələsgərov Cinayət Məcəlləsinin 179.3.2-ci (mənimsəmə və ya israf etmə, külli miqdarda törədildikdə), 308.1-ci (vəzifə səlahiyyətlərindən sui-istifadə, yəni vəzifəli şəxsin xidməti vəzifələrinin icrası ilə əlaqədar özü və ya üçüncü şəxslər üçün qanunsuz üstünlük əldə etmək məqsədi ilə qulluq səlahiyyətlərindən qulluq mənafeyinə qəsdən zidd olaraq istifadə) və 309.1-ci (vəzifə səlahiyyətlərini aşma, vəzifəli şəxs tərəfindən xidməti səlahiyyətlərinin hüdudlarından açıq-aşkar surətdə kənara çıxan hərəkətlər etmək) maddələri ilə ittiham olunub. Naxçıvan Hərbi Məhkəməsinin hökmü ilə o, 14 il müddətinə azadlıqdan məhrum edilib. Qərarla razılaşmayan V. Ələsgərov Naxçıvan Apelyasiya Məhkəməsinə şikayət edib və bəraət istəyib. Hələlik apelyasiya şikayətinə baxılacaq vaxt müəyyən edilməyib.

16 İyul 2016 2:09

Kamaləddin Heydərovun bu gün 55 illik yubleyidi

Bu gün Azərbaycan Respublikasının fövqəladə hallar naziri, general-polkovnik, Azərbaycan Taekvondo və Boks federasiyalarının prezidenti, Dünya Taekvondo Federasiyasının vitse-prezidenti Kəmaləddin Heydərovun doğum günüdü. Bu gün Fövqaladə Hallar naziri 55 yaşını qeyd edəcək Kəmaləddin Heydərov15 iyul1961-ci ildə Naxçıvan MR-in Babək rayonununÇeşməbasar kəndində anadan olub. 1978-ci ildə Naxçıvan şəhər 1 saylı orta məktəbi, 1984-cü ildəAzərbaycan Dövlət Universitetinin geoloji-kəşfiyyat fakültəsini bitirmişdir.Azərbaycan Universitetində ikinci ali təhsil alıb.Əmək fəaliyyətinə 1978-ci ildə "Xəzərdənizneftqaz" kəşfiyyatı idarəsində başlamış, texnik və geoloq vəzifələrində çalışmışdır. 1995-ci ilin yanvar ayında Azərbaycan Respublikası Dövlət Gömrük Komitəsinin sədri, 2006-ci ilin fevral ayında Azərbaycan Respublikası Fövqalədə Hallar Naziri vəzifəsinə təyin edilmişdir.Ailəlidir. 2 övladı var.Naxçıvanda mühüm dövlət vəzifələrində çalışmış Fəttah Heydərovun oğludur. "Avropa-Azərbaycan Cəmiyyəti"nin sədri, "Qəbələ” Futbol Klubunun prezidenti Tale Heydərovun atasıdır.Azərbaycanda populyar müğənnilərin ifa etdiyi bir sıra mahnıların musiqisi Kamaləddin Heydərova məxsusdur. Mahnılarını "Kamal" imza ilə bəstələyir. Bir neçə hit mahnının müəllifidir. Özbək müğənnisi Nəsibə Abdullayevanın ifa etdiyi "Nigaranam" mahnısı bunlardan ən məşhurudur. 2009-cu ildə bəstəkar Kamalın "Sənə güvəndiyim dağlar" adlı albomu buraxılıb. 4 diskdən ibarət albomdakı mahnılardan ikisinin sözləri Leyla Əliyevaya, digərləri isə şair Baba Vəziroğluna məxsusdur. Müəlliflərin birgə ərsəyə gətirdikləri mahnılar və onların ekran görüntüləri CD və DVD şəklində yerləşdirilib. Disklərin üz qabığında "Səndən nigaranam", "Yenə yaz gələcək", "Xalq Heydər söyləyəcək", "Ayrılığa dözmərəm" mahnılarının adları yazılıb. Disklərdəki mahnılar xalq artistləri Flora Kərimova, Alim Qasımov, Yalçın Rzazadə, İlhamə Quliyeva, Aygün Kazımova və Zülfiyyə Xanbabayevanın, əməkdar artistlər İlqar Muradovun, Aygün Bəylərin, müğənni Röyanın və başqalarının ifasında yazılıb.

15 İyul 2016 12:09

Yanğında həlak olmuş 2 yaşlı Ayxanın nənəsi danışdı: “Nəvəm ölməyə bilərdi”

Bu gün Bakı Ağır Cinayətlər Məhkəməsində Binəqədi rayonunda yaşayış binasında baş verən yanğınla bağlı təqsirləndirilən şəxslərin cinayət işi üzrə məhkəmə prosesi davam etdirilib. Virtualaz.org saytının əldə etdiyi xəbərə görə, prosesə hakim Əfqan Hacıyev sədrlik edib. Prosesdə zərərçəkmiş qismində nəvəsi Öməri yanğında itirmiş Təyyar Cavadov ifadə verib. O bildirib ki, yanğın zamanı mənzildə qızı və 1 yaş 9 aylıq nəvəsi olub. Nəvəsinin tüstüdən boğulduğunu, qızının isə ağır xəsarət aldığını deyən zərərçəkmiş hadisə baş verərkən evdə olmadığını qeyd edib: "Mən Qızlar Universitetində tələbələrdən imtahan götürürdüm. Qızım zəng edib ki, evimiz yanır. 15 dəqiqəyə maşınla evə necə gəlmişəm, onu bir Allah bilir. Binaya çatanda qışqırmağa başladım. Dörd saat binanın qarşısında qışqırmışam. Alov hər yeri bürümüşdü. Birinci mərtəbəyə qalxanda gördüm ki, gedə bilmirəm. Digər üç övladım gözümün qarşına gəldi. Onları düşünüb geri qayıtdım. Xeyli gözləyəndən sonra dedilər ki, yaxınlarınızı xəstəxanalarda axtarın, hamı çıxarılıb. Bacım zəng elədi ki, qızım Şahnaz xəstəxanadadır. Nəvəmi soruşdum. 5 nömrəli xəstəxanda olduğunu və dünyasını dəyişdiyini öyrəndim. Tüstüdən boğulmuşdu. Qızımın da vəziyyəti ağır idi, “toksikologiya”da idi". T.Cavadov onlara dəymiş mənəvi zərərə görə günahları sübut olunan şəxslərdən 100 min manat təzminat tələb etdiyini bildirib: "İki övladım, həyat yoldaşım ölümlə üz-üzə qalmışıq. Bizə dəyən mənəvi ziyan heç nə ilə ölçülə bilməz. Əgər bu hadisə xaricdə olsaydı, ən azı 10 milyon təzminat tələb olunardı. Mən isə Azərbaycan reallığını nəzərə alıb 100 min təzminat istəyirəm. Əgər bu şəxslərin cinayətləri sübut olunsa, həmin məbləğ onların üzərində qalacaq". Digər zərərçəkmiş Səbinə Manafova ifadəsində yanğın zamanı anasının evdə olduğunu və hadisəni də ondan eşitdiyini söyləyib: "Anam zəng edəndə 12:04 idi. Mən 20 dəqiqəyə evə gəldim. İlk yanğınsöndürən onda gəlmişdi. Evdən çıxanda blokda tüstüdən boğulub. Qonşular çıxarıb. Binada yanğının bitişik əlavə tikilinin üstündəki zibillikdən çıxmasını bilmirəm. Orada zibil yox idi. Yanğının necə baş verdiyini bilmirəm. Binaya vurulan üzlük bir dəfə qaynaq edilərkən alışmışdı. Sonra atam həmin materialın bir hissəsini alışqanla yandırdı və alışdı. İşi dayandırdılar. Dedilər yanan material olub-olmaması araşdırılır. Sonra yenidən iş başladı. Düşündük ki, yəqin icazə verilib və yanan material deyil". Təqsirləndirilən Miryusif Mahmudov söz istəyərək deyib: "Yanğın baş verən binaya bitişik əlavə tikilinin olması tikinti normalarına ziddir. Ən azı binanın hündürlüyünün 1/3 qədər məsafədə tikilməlidir. Bu tikintiyə kim icazə verib? Bunu da araşdırmaq lazımdır. Həm də yanğın baş verən gündən insanları fərqli istiqamətə yönəldirlər. Həmin gün müsahibə verənlər deyir ki, üzlükdən yanıb. Tərkibinə qatqı qalılmayıb. Axı həmin an bunu necə bilmək olardı. Ekspertiza rəyi 9 ay sonra verib". Yanğın zamanı dünyasını dəyişən 2 yaşlı Ayxanın nənəsi Səbinə Babayeva da zərərçəkmiş qismində ifadə verib: "İşdə xəbər tutub evə gəldim. Mən gələndə bizim ev tərəf yanmırdı. Düşündüm ki, uşaqlar çıxar yəqin. Nəvəmin yanında dayə var idi. Zəng edirdik. Saat 11-12 arasında nəvəm sağ idi. Nəvəm ölməyə bilərdi. Biz yalvaırdıq FHN və polis işçilərinə. Bizi buraxmırdılar. Xilasedicilər gəlmişdi. Kran yox idi, FHN işçilərinin maskası yox idi deyə, içəri girə bilmirdilər, polislər bizi itələyirdi. 16 mərtəbəli binaya gətirilən kran 5-ci mərtəbəyə qədər qalxdı. İçəri girən FHN işçiləri 3-cü mərtəbədə pəncərədə oturub siqaret çəkirdi. Vertolyot suyu binanın yox, camaatın üstünə tökdü. 13:30 da gələn kran hündür idi. Biz dayə ilə sonra danışanda dedi ki, artıq uşaq nəfəs almır. Kran bizim mərtəbəyə qalxanda yanğınsöndürən pəncərədən baxıb işarə etdi ki, heç kim yoxdur. İçəri girmək istəmirdi. Aşağıdan biz qışqırandan sonra içəri girdi. 11:03-də uşaq artıq ölmüşdü. Uşağı çıxardı. Xəstəxanaya aparanda bizi aparmadılar. Dedilər sağdır. Kürəkənim dedi ki, köynəyinin üstündən iynə vurublar. Nəvəm bizim nəfəsimiz, həyatımız idi. Biz onunla nəfəs alırdıq. Həmin gün bütün xəstəxanaları axtardıq. Nəvəmin cansız bədənini morqdan tapdıq. Həkim rəy verib ki, nəvəm dəm qazından boğulub. Həmin həkimin üzünə tüpürmək istəyərdim. Bu bizi bilirsinizmi necə yandırır? Bizim binada qazmı olub? Niyə düzünü yazmırlar ki, tüstüdən boğulub?". Zərəçəkmiş kimi ifadə verənlər arasında FHN-nin xilasedicilərindən Xətai Şahverdiyev də olub. Yanğın baş verən vaxt işdə olmadığını, lakin könüllü şəkildə hadisə yerinə gəldiyini spyləyib: "Eşitdim ki, yanğımın miqyası böyükdür. İşdən icazə alıb, hərbi formada ora gəldim. Xüsusi formamız olmadığından içəri girə bilmədik. Digər əməkdaşlardan biri qucağında uşaqla çıxdı. Vəziyyəti ağır idi. Soruşdum, dedi ki, içəridə çox adam qalıb. Sonra texnika gələndə mən forma və əleyhqaz aldım. Bloka girəndə alov və tüstü var idi. Temperatur yüksək idi. 4 və 5-ci mərtəbələrə qalxdım. Sonrası çətin oldu. İsti idi. Ancaq güclə qalxmağa davam etdim. 6-cı mərtəbədə uşaq gördüm. Ölmüşdü. Vaxt itkisi olmasın, sağ adam çıxara bilim deyə yuxarı qalxdım. 15-ci mərtəbədə köməksiz bir qadın gördüm. Maskanı və formanı ona verdim. Dedim ki, qaça-qaça düşək. Biz düşəndə 6-cı mərtəbədə özümüzdən getdik. Bizi FHN işçiləri çıxardı. Mən qolumdan xəsarət aldım. Tüstüdən də zəhərlənmişdim". Proses günün ikinci yarısında davam edəcək. Qeyd edək ki, ötən il mayın 19-da paytaxtın Binəqədi rayonu ərazisində çoxmərtəbəli yaşayış binasında ağır nəticələrə səbəb olmuş yanğın hadisəsi ilə bağlı Cinayət Məcəlləsinin müvafiq maddələri ilə cinayət işi başlanıb. Qulluq mənafeləri tələb etdiyi halda səlahiyyətlərindən istifadə etməmələri nəticəsində vətəndaşların, dövlətin hüquqlarına və qanunla qorunan mənafelərinə mühüm zərər vurmalarında kifayət qədər əsaslar olduğundan binaların üzlənməsində istifadə olunan “poliuretan” məmulatını istehsal edən "Qlobal Stone" və "Global Constuction" MMC təsisçisi Yusif Mahmudov, “Qlobal Stone” MMC-nin baş direktoru Uğur Bəşirov, “Global Construction” MMC-nin sədr müavini Ələkbər Əsgərov, 2012-2013-cü illərdə Binəqədi Rayon Mənzil-Kommunal Təsərrüfatı Birliyinin rəisi işləmiş rayon İcra hakimiyyətinin təsərrüfat şöbəsinin müdiri Ədalət Rəcəbov, Binəqədi rayonu, 72 saylı Mənzil-kommunal istismar sahəsinin rəisi Nizami Orucov və binanın poliuretan materialla üzlənməsi işlərinə nəzarət funksiyalarını həyata keçirməli olan, 2012-2013-cü illərdə Binəqədi Rayon İcra Hakimiyyəti başçısının birinci müavini işləmiş Qəzənfər Novruzov Cinayət Məcəlləsinin 225.2-ci (ehtiyatsızlıqdan zərərçəkmiş şəxsin ölümünə və digər ağır nəticələrə səbəb olan yanğın təhlükəsizliyi qaydalarını pozma) və 308.2-ci (vəzifə səlahiyyətlərindən sui-istifadə ağır nəticələrə səbəb olduqda) maddələri ilə təqsirləndirilən şəxs qismində cəlb edilərək barələrində məhkəmənin qərarları ilə 4 ay müddətinə həbs-qətimkan tədbiri seçilib. Həmin müddət bir neçə dəfə artırılıb. Bundan başqa, cinayət işinə "Dərnəgül Boru" Zavodunun laboratoriya rəhbəri Ağacavad Məmmədov və Səhiyyə Nazirliyi yanında Gigiyena və Epidemiologiya Mərkəzinin baş direktoru Akif Əlibəyov da cəlb edilib. Onlar barəsində həbs-qətimkan tədbiri seçilməyib. Yanğın nəticəsində 15 nəfər ölüb, 50 nəfər xəsarət alıb.

14 İyul 2016 2:27

Bakıda 80 min manatlıq qızıl oğurlayan şəxslərin şikayəti əsasında məhkəmə başlayıb

Məhkəminin baxış iclası iyulun 21-nə təyin edilib Bakı Apellyasiya Məhkəməsində oğurluqda təqsirləndirilən Yevgeniy Şepiya və Xalid Gülməmmədov barəsində olan hökmdən verilən apellyasiya şikayəti üzrə məhkəmənin ilkin hazırlıq iclası başlayıb. "Report"un xəbərinə görə, hakim Əflatun Qasımovun sədrliyi ilə keçirilən prosesdə təqsirləndirilən şəxslərin anket məlumatları dəqiqləşdirilib. Məhkəminin baxış iclası iyulun 21-nə təyin edilib. Qeyd edək ki, oğurluq hadisəsi ötən ilin dekabrın 24-də Sabunçu rayonunda baş verib. Bu rayonda yaşayan Vidadi Hüseynovun evindən pəncərədən girmək yolu ilə məişət əşyaları və dəmir seyfdən qapısı sındırılaraq 80 min manat dəyərində qızıl əşyalar oğurlanıb. Sabunçu Rayon Polis İdarəsinin (RPİ) 13-cü Polis Bölməsi (PB) əməkdaşlarının həyata keçirdikləri əməliyyat-axtarış tədbirləri nəticəsində hadisəni törətmiş Bakı şəhər sakinləri Y.Şepiya və X.Gülməmmədov tutulublar. Təqsirləndirilən şəxslər Cinayət Məcəlləsinin 177.3.2-ci (oğurluq, külli miqdarda ziyan vurmaqla törədildikdə) maddəsi ilə ittiham olunublar. Bu ilin may ayının 16-da Bakı Ağır Cinayətlər Məhkəmənin hökmü ilə Y.Şepiya və X.Gülməmmədovun hər biri 8 il müddətinə azadlıqdan məhrum edilib. Hökmdən narazı qalan məhkumlar apellyasiya şikayəti veriblər.

14 İyul 2016 2:13

Uğursuz siyasətçinin liderlik iddiası…

"Borçalı” ictimai cəmiyyətinin (birliyinin) 25 iyun 2016-cı il tarixli növbədənkənar konfransı günlər ötsə də, onun nəticələri ilə bağlı razılaşmayanlar hələ də var. Konfransın qərarınıtanımayanların başında isə Cəmiyyətin sabiq sədri Zəlimxan Məmmədli dayanır. Azərbaycan siyasi səhnəsində uğur qazana bilmədikdən sonra "Borçalı” ictimai cəmiyyəti ilə özünü gündəmdə saxlamağa çalışan Zəlimxan Məmmədlinin indi Cəmiyyətin 25 iyun 2016-cı il Konfransının qərarlarını qəbul etməməsini, sədrlikdən əl çəkmək istəməməsini anlamaq da olar. Axı, Zəlimxan Məmmədli Qüdrət Həsənquliyev, Fazil Mustafa, Fərəc Quliyevdən fərqli olaraq, AXCP-dən kənarlaşdırıldıqdan sonra nə özünün lider olduğu siyasi partiya yarada bildi, nə fərdi qaydada uğur qazanıb deputat seçildi. Siyasi partiya lideri və ya deputat ola bilməyən uğursuz bir siaysətçinin yeganə sığınacaq yeri ictimai birliklər, qeyri-hökumət təşkilatları ola bilər. Zəlimxan Məmmədli də bu yolu tutub. Ancaq onun "Borçalı” ictimai cəmiyyətinin sədri vəzifəsində fəaliyyəti uğurlu alınmayıb. Məsələn, Gürcüstan Azərbaycanlıları Milli Assambleyasının (GAMA) Analitik İnformasiya Mərkəzinin rəhbəri İsmayıl Qacarın Zəlimxan Məmmədli haqqındakı ittihamlarını xatırlamaqla "Borçalı” İctimai Cəmiyyətinin sabiq sədrinin fəaliyyətinin nədən ibarət olduğu məlum olar. Qeyd edək ki, İsmayıl Qacar Zəlimxan Məmmədlini hansısa dövlətin gizli sifarişini həyata keçirərək Borçalı türkləri, Borçalıda fəaliyyət göstərən təşkilatlar arsında, Azərbaycandakı əslən Borçalıdan olan ziyalılar arasında nifaq toxumu səpməkdə ittiham etmişdi. Halbuki, "Borçalı” ictimai cəmiyyətinin qarşısında duran məsələlər əslən Borçalı əsilli insanları ictimai, mədəni-mənəvi cəhətdən birləşdirmək, Borçalıdakı insanların problem və qayğılarının həllinə çalışmaq, bölgədə fəaliyyət göstərən təşkilatlar arasında birləşdiricilik rolu oynamaq, Azərbaycan və Gürcüstan hökumətlərinin mədəni əlaqələrinin inkişafına kömək etmək kimi məsələlərdən ibarət olmalıdır. "Borçalı” ictimai cəmiyyəti 1993-cü ildə Azərbaycan Respublikası Ədliyyə Nazirliyində dövlət qeydiyyatına alınıqdan sonra məhz bu prinsiplər əsasında fəaliyyət göstərib. Bunun nəticəsidir ki, Cəmiyyətə qarşı indiyinə kimi heç bir iradlar da olmayıb. "Borçalı”ictimai cəmiyyəti ilə bağlı iradlar, tənqidlər və hətta ittihamlar məhz Zəlimxan Məmmədlinin sədrliyi dövründə meydana çıxıb. Hətta belə iddialar var ki, Rusiya xüsusi xidmət orqanları ilə borçalıların əlaqə yaratmaq ənənəsini məhz Zəlimxan Məmmədli qoyub. Gürcüstan Azərbaycanlıları Milli Assambleyasının (GAMA) Analitik İnformasiya Mərkəzinin rəhbəri İsmayıl Qacar tərəfindən səsləndirilən bu iddia indiyədək Zəlimxan Məmmədli tərəfindən əsaslı şəkildə təkzib olunmayıb. Rusiya xüsusi xidmət orqanlarının aborigen borçalılardan və başqa milli azlıqlardan istifadə edərək, bölgədə ziddiyyət və koflikt yaratmaq istəyi isə həmişə olub və son on ildə bu cəhdlər daha da güclənib. Bu məsələləri Gürcüstanda stabilliyin pozulmasına, Azərbaycanla münasibətlərin zədələnməsinə, ölkə üçün həyati əhəmiyyətə malik enerji və nəqliyyat layihələrinə təhlükə yarada biləcək cəhdlər olaraq dəyərləndirmək olar. Ona görə də, Azərbaycan dövləti bu məsələdə həmişə aydın mövqe tutub, Gürcüstanda qeyri-stablliyə yol verməmmək üçün hər cür fədəkarlıq edib. Azərbaycan Respublikasının milli maraqları ilə ziddiyət təşkil edən bu məsələlərlə bağlı "Borçalı” ictimai cəmiyyəti Zəlimxan Məmmədlinin sədrliyi dövründə prinsipial mövqe tuta bilməyib. Sədr olduğu dönəmlərdə özünün addımlarını "QHT-lər haqqında”qanunun və Cəmiyyətin nizamnaməsinin müddəalarına uyğun apara bilməyib. İctimai birliyin fəaliyyət istiqamətini dəyişərək ona siyasi rəng verib. Bütün bunlar zaman-zaman Zəlimxan Məmmədliyə və bütövlükdə "Borçalı” ictiami cəmiyyətinə qarşı haqlı tənqid və ittihamların meydana çıxmasına səbəb olub. Nəhayət, Cəmiyyətin təsisçiləri və fəalları iyun ayının 25-də növbədənkənar konfrans çağıraraq Zəlimxan Məmmədlini sədrlikdən kənarlaşdırıblar. Bununla belə, Zəlimxan Məmmədli Cəmiyyətin təsisçilərinin və fəallarının iradəsi ilə barışmaq və sədrlik iddiasından əl çəkmək istəmir. Özünü də cəmiyyətin adını da nüfuzdan salmaqda davam edir. Əlbəttə, bu məsələ tezliklə hüquqi müstəvidə öz həllini tapacaq. Ancaq Zəlimxan Məmmədli bu günə kimi "Borçalı” ictimai cəmiyyətinin imicinə vurduğu ziyanı anlamaq istəmir.Və qurumda qəsdən ikitirəlik yaranmasına şərait yaradır və bununla da ictimai fikrə təsir göstərməyə çalışır. Bu isə görünür, onun "Borçalı” ictiami cəmiyyətinə, bütövlükdə Borçalıya və borçalılara son zərbəsidir. Ancaq bunun da sonu var. Bundan sonra Zəlimxan Məmmədlinin həmyerlilərinin məclislərinə hansı üzlə gedəcək? O, bu haqda düşünsə özünün olan-qalan hörmətini saxlamış olardı. Amma görünür, təəssüf ki, o, bunu istəmir... Bütün hallarda"Borçalı” ictimai cəmiyyəti isə üzərindəki bu ağır yükü atmalı, Zəlimxan Məmmədli isə özünün sonrakı fəaliyyətini götür-qoy etməlidir.   Arzuman LOĞMANOĞLU, "Yeni Sözçü"  

13 İyul 2016 7:06

Baş redaktorun xanımı prezidentə müraciət etdi

  Jam.Az saytının baş redaktoru Fikrət Fərəməzoğlunun (İbişbəyli) xanımı Faiqə İbişbəyli prezident İlham Əliyevə müraciət ünvanlayıb Onun şəxsi feysbuk səhifəsindən yaydığı müraciətdə deyilir: "Cənab Prezident! 30 iyun 2016-cı il tarixdə Mütəşəkkil Cinayətkarlığa Qarşı Mübarizə İdarəsinin 4 əməkdaşı yaşadığımız evə gələrək həyat yoldaşım, "Jam.az" saytının baş redaktoru Fikrət İbişbəylinin (Fərəməzoğlu) həbs olunduğunu deyərək evdə araşdırma apardılar. Bizə onun hansı qurum tərəfindən və niyə həbs olunduğu barədə heç bir məlumat verilmədi. Yoldaşıma məxsus kompüteri, evimizin bütün sənədlərini, toy disklərimizi müsadirə edərək apardılar. Onlar evə daxil olarkən mən və iki azyaşlı körpə uşağım evdə idik. Bizə qarşı olduqca kobud davrandılar, hətta qapını da qırdılar. Biz bir neçə gündür ki, qorxu altında yaşayırıq. Cənab Prezident, yoldaşım İbişbəyli Fikrət iyun ayının 30-da saxlanılıb. Sonradan öyrəndik ki, onun barəsində iyulun 2-də Nərimanov Rayon Məhkəməsində 4 ay həbs-qətimkan tədbiri seçilib. Hədə-qorxu ilə rüşvətalmaq da ittiham olunur, ancaq mən onun rüşvət almasına inanmıram. Əgər belə bir fakt varsa, əməliyyatın çəkilişini, video-görüntüsünü ortaya qoysunlar. Onun vəkildən və apellyasiya şikayətindən imtina etməsi də müəmmalıdır və hesab edirik ki, o, təzyiq altındadır. Artıq 12 gündür ki, qanunsuz olaraq, MCQMİ-də saxlanılır. Bu da qanun pozuntusudur. Dəfələrlə müstəntiq Hacı Əfəndiyevlə əlaqə saxlayıb onun niyə hələ də orada saxlanmasını soruşsam da, heç bir məlumat vermir. Məgər rüşvət ittihamı ilə saxlanılan şəxsləri məhkəmənin qərarından sonra 12 gün MCQMİ-də saxlayırlarmı? Bu cür davranış ancaq terrorçu və dövlət çevrilişinə cəhd edən şəxslərə qarşı ola bilər. Mənim həyat yoldaşım isə tanınmış jurnalistdir, söz adamıdır. Qeyd edim ki, Fikrət Fərəməzoğlu həbs olunduğu gündən sonra şəxsi avtomobilinin də harada olduğunu bilmirik. Özü ilə isə ümumiyyətlə, əlaqə saxlaya bilmirik. Bu problemlə bağlı Baş Prokurorluğa və Ombudsman Aparatına etdiyimiz müraciətlərə də cavab verilmir. Mən həyat yoldaşımın müəmmalı həbsindən və hələ də MCQMİ-də saxlanmasından narahatam. Əldə etdiyimiz son məlumata görə, Fikrət Fərəməzoğlu bu gün Kürdəxanı təcridxanasına aparılıb. Amma bir neçə saatdan sonra yenidən oradan çıxarılaraq harasa aparılıb. Onu da qeyd edim ki, şəxsi mobil telefonu (0552107647) bir neçə gündür işləkdir. Amma zənglərimizə cavab verilmir. Cənab Prezident, hesab edirəm ki, həyat yoldaşımın həbsi hansısa məmurların sifarişidir. Ona görə də bu məsələni nəzarətinizə götürüb obyektiv araşdırılmasını təmin etməyinizi xahiş edirəm. Hörmətlə, İbişbəyli Faiqə".

13 İyul 2016 6:56

Məişət zorakılığının qurbanları ilə bağlı yeni təklif

  Ailə, Qadın və Uşaq Problemləri üzrə Dövlət Komitəsinin sədri Hicran Hüseynova məişət zorakılığının qurbanları üçün yeni mərkəzlərin yaradılmasını təklif edir. Faktinfo.az Trend-ə istinadən xəbər verir ki, bu təkliflə Ailə, Qadın və Uşaq Problemləri üzrə Dövlət Komitəsinin sədri Hicran Hüseynova 2016-2020-ci illər BMT-Azərbaycan Tərəfdaşlıq Çərçivə Sənədinin imzalanması mərasimində çıxış edib. Onun sözlərinə görə, məişət zorakılığına məruz qalan qadınların yalnız komitəyə və hüquq-mühafizə orqanlarına müraciət edilməsi ilə iş bitmir: "İmkan olmalıdır ki, onlar hansısa mərkəzlərə də müraciət etsinlər. Konkret olaraq, regionlarda belə mərkəzlər və orada "Qaynar xətt" olmalıdır ki, qadınlar vaxtında oraya müraciət edə bilsinlər. Onlar operativ formada dəstək almalıdırlar. İnkişaf bu yönümdə güclənsə, Azərbaycan bir çox ölkələr üçün nümunəvi ölkə olacaq". H.Hüseynova qeyd edib ki, qadınların biznesə cəlbi, bir çox sahələrdə fəal olması onları çox sevindirir: "Bu imkan verir ki, qadınlar iqtisadi baxımdan daha çox inkişaf etsinlər və daha da sərbəst olsunlar. Bu inkişaf da məişət zorakılğı, qızların təhsildən yayınması, erkən nikahların olması kimi halların azalmasına təsir göstərir. Ona görə də bunlar bir-biri ilə çox sıx bağlı olan məsələlərdir".

12 İyul 2016 2:11

Televiziya rəhbəri öz işçisini döydü – QALMAQAL

Tovuzda televiziya müdiri öz işçisi ilə dalaşıb. Gununsesi.info xəbər verir ki, rayonda fəaliyyət göstərən Türkel Televiziyasının (TTV) müdiri Nadir Şəfiyev öz işçisi Vüqar Kərimovu döyüb. Məlumata görə, müdir səsyazma otağına gələrək işçiləri “qeyrətsiz” deyə təhqir edib. Daha sonra şirkətdə səs rejissoru vəzifəsində çalışan Vüqar Kərimova yumruq ataraq, onunla əlbəyaxa olub. İşçilərin bir neçəsi təhqirlə bağlı müdirə etiraz bildirsə də, rəhbərlik onların bu etirazlarına məhəl qoymayıb. Daha sonra təhlükəsizlik kameralarından dava kadrlarının çıxaralacağından ehtiyat edən N. Şəfiyev şirkətdə İT Menecer vəzifəsində çalşan Asim Cəfərovu yanına çağıraraq kameraların gizli şifrələrini istəyib. Ardından isə həmin görüntülər kameranın yaddaşından silinib. Məsələ ilə bağlı saytımıza açıqlama verən Asim Cəfərov bunları deyib: “Mən bazar günü evdə idim. Mənə texniki direktor İskəndər müəllim Qafarov zəng vuraraq təcili kameraların parollarını istədi. Bilmədim, niyə soruşurlar. Amma səhəri gün işə gəldikdə teleşirkətdə dava hadisəsinin olmasını eşitdim. Mən parolları verməsəydim, müdriyyət məni işdən ata bilərdi. Vəzifəmə uyğun olaraq öz müdirimin göstərişinə əməl etdim. Amma mən özüm bu davada olmamışam. Bir şey deyə bilmərəm”. Qeyd edək ki, ötən ay Türkel Televiziyasından 10-dan çox işçi öz işindən azad edilib.

12 İyul 2016 1:11

Azərbaycanda yenid oğulan əkizlərdən biri öldü

22 yaşlı qadın hamiləliyinin 7-ci ayı bitməmiş övladlarını dünyaya gətirib. Ötən gün Bərdə Mərkəzi Rayon Xəstəxanasının Doğum Evində uşaq ölümü qeydə alınıb. 1994-cü il təvəllüdlü Aysel İlham qızı Qocayeva erkən doğuş diaqnozu ilə doğum şöbəsinə yerləşdirilib. Salyanda iki qardaşı ölən körpə də öldü Qadının anası Şəhla Qocayevanın ANS PRESS-ə verdiyi məlumata görə, qızının hamiləliyinin 7 ayının tamamlanmasına sayılı günlər qalmışdı. Lakin vaxtından öncə sancıları tutuduğu üçün xəstəxanaya aparılıb. Gənc qadının əkiz övladı doğulub. Onlardan biri qız, digəri isə oğlan olub. Lakin körplərdən biri - oğlan ölüb. Digərinin vəziyyəti isə ağırdır. "Qızımın ağrıları 10 gün öncə başlamışdı. Həkim körpələri dünyaya gətirəcəyini boynuna götürmüş, bizə söz vermişdi. Heç olmasa deyərdi ki, vəziyyəti ağırdır Şəki və ya Bakıya aparın". Ş.Qocayeva körpələrdən digərinin də vəziyyətinin olduqca ağır olduğunu deyib. Həkimlər isə ölüm faktını erkən doğuşla əlaqələndiriblər. Xatırladaq ki, bənzər hadisə ötən ay Salyanda da qeydə alınıb. Salyanda doğulan üçəmlərdən ikisi rayon xəstəxanasında dünyasını dəyişib. Salyan şəhər sakini Abdullayeva Mirzabitə İlham qızı iyunun 21-də Salyan Rayon Mərkəzi Xəstəxanasının Doğum şöbəsində 3 oğlan uşağı dünyaya gətirib. Doğuşdan sonra üçəmlərdən ikisi ölüb. Valideynləri doğuşdan sonra küvezə yerləşdirilən körpələrin ölümünü elektrik enerjisinin kəsilməsi, yaranan oksigen çatışmazlığı ilə əlaqələndiriblər. Salyan Mərkəzi Rayon Xəstəxanasından isə uşaqların ölümünün elektrik enerjisinin kəsilməsi ilə əlaqəsi olmadığı açıqlanıb. Körplərdən biri isə Bakıya gətirilib. Lakin həkimlərin bütün müdaxiləsinə baxmayaraq o da keçinib.

12 İyul 2016 12:14

Fakt

Bizi izləyin