Zakir Fərəcovdan xırda və orta sahibkarlara dəstək

İcra başçısının təşəbbüsü ilə icarə haqları azaldılıb Sumqayıt Şəhər İcra Hakimiyyətinin başçısı Zakir Fərəcov xırda və orta sahibkarlara dəstək məqsədi ilə şəhərin ən iri ticarət mərkəzlərindən biri hesab edilən “Karvan” Ticarət Mərkəzində icarə qiymətlərinin 50 manat məbləğində azaldılmasına nail olub. Bu barədə Moderator.az-ı etibarlı mənbə məlumatlandırıb. Mənbənin sözlərinə görə, “Karvan” Ticarət Mərkəzində icarə haqqı bir ay üçün 360 manat məbləğində olsa da, ölkədəki mövcud böhran və onun doğurduğu çətinlikləri nəzərə alan ticarət mərkəzinin sahibi Ağamirzə Əhədov, icarə haqlarının 150 manat məbləğində azaldılmasına göstəriş verib. A.Əhədovun məlum addımından sonra, “Karvan” Ticarət Mərkəzində icarə qiymətləri 210 manata düşüb. Lakin ötən gün icra başçısının müavininin ticarət mərkəzinə baş çəkməsindən istifadə edən xırda sahibkarlar ondan icarə qiymətlərinin bir qədər də azaldılmasına yardımçı olmağı xahiş edib. Bundan sonra məlum məsələ icra başçısına məruzə edilib və icra hakimiyyətinin A.Əhədovla apardığı danışıqlardan sonra icarə qiymətləri daha 50 manat aşağı salınıb. Belə ki, bu gün “Karvan” Ticarət Mərkəzindəki dükanlarda bir aylıq icarənin qiyməti 150-160 manat təşkil edir. Mənbənin sözlərinə görə, icarə qiymətlərində edilən məlum ixtisarlar həm Z.Fərəcov, həm də A.Əhədova olan rəğbətin artmasına, xırda və orta sahibkarlarda ciddi ruh yüksəkliyinə səbəb olub. Xatırladaq ki, ölkə başçısı sonuncu müşavirədə də ölkədə sahibkarlığın inkişafının zəruriliyini vurğulayıb, icra hakimiyyəti və digər inzibati qurumları bu məsələdə aktiv olmağa səsləyib.

30 Yanvar 2016 1:47

Bakıda RƏZALƏT: Oteldə açıq-aşkar əxlaqsızlıq yuvası – VİDEO

  Bakıda “Günəşli” yolunun üzərində yerləşən “Günəşli” oteli açıq-aşkar əxlaqsızlıq yuvası kimi fəaliyyət göstərir. Təsadüfən bu yoldan keçən insanlar belə, otelin qapısı önündə “müştəri” çağıran qadınların “hücum”una məruz qalırlar. Faktinfoş.az saytı musavat.com-a istinadən xəbər verir ki, otelin qapısının önündə toplaşan qadınlar oradan keçən insanlara intim xidmət təklif edirlər. Otel adı ilə fəaliyyət göstərən “Günəşli” əslində, pritondur və otelin həyətindəki balaca daxmalarda qadınlar cinsi istismara məruz qalırlar. Onlardan müştəriləri elə otelin girişində qarşılamaq tələb olunur. Belə ki, qadınlar həmin yoldan keçən şəxslərə, avtomobillərə yaxınlaşırlar, oteldə belə bir “xidmət”in təklif olunduğunu deyirlər. Qeyd edək ki, otel yaşayış evlərinin arasında yerləşir. Bu durum həmin ərazidə yaşayan sakinləri də narahat edir. Ən acınacaqlısı odur ki, otel “fəaliyyət”ə keçmək üçün gecə saatlarını da gözləmir. Yəni günün istənilən saatlarında burada eyni mənzərə ilə qarşılaşmaq mümkündür. Sakinlərin şikayəti əsasında otelin yerləşdiyi əraziyə baş çəkdik. Deyildiyi kimi, qapının önündə duran 3 qadından biri bizə yaxınlaşaraq, oteldə təklif olunan “xidmət”ləri sadaladı, qiymətin isə 50 manat olduğunu bildirdilər: “Hər bir xidmətimiz var, VİP otaqlardır. Gedək..? 50 manata görüşürəm. İstəyirsinizsə, otelin həyətinə gedək. Otelimiz də superdir”. Daha ətraflı aşağıda təqdim etdiyimiz videodan izləyə bilərsiniz. https://youtu.be/1-S-2hBMR8M

30 Yanvar 2016 11:12

Ağamirzə Əhədova qarşı icarədar qiyamı – Onlarla şəxs icarə haqqını ödəməkdən imtina etdi

Dünən Sumqayıtda köhnə adı ilə “kolxoz bazarı” kimi tanının meyvə bazarında, icarədarlar icarə haqqını ödəməkdən imtina edib. Bu barədə Moderator.az-ı etibarlı mənbə məlumatlandırıb. Mənbənin sözlərinə görə, “Karvan” Ticarət Mərkəzi və meyvə bazarının sahibi Ağamirzə Əhədovun icarə haqlarını yığan adamı hər zamankı kimi gündəlik arenda haqlarını yığmaq üçün bazara gəlsə də, ona bir qəpik də olsa vəsait ödənilməyib. Bazar əməkdaşları öncə icarə qiymətlərinin aşağı salınmasını tələb ediblər və bildiriblər ki, vətəndaşların alıcılıq qabiliyyətinin kəskin şəkildə azaldığı, alış-verişin zəiflədiyi indiki dönəmdə bu qədər yüksək icarə haqqı ödəmək iqtidarında deyillər. Onlar icarə qiymətlərinin azaldılmasını, ölkədəki mövcud böhranın nəzərə alınmasını tələb edib. Mənbənin sözlərinə görə, bazar əməkdaşları tərəfindən əhatəyə alndığını və izdihamın getdikcə böyüdüyünü görən A.Əhədovun adamı onlardan dağılışmağı xahiş edib və kimsədən icarə haqqı almadan hadisə yerini tərk edib. Məlumat üçün qeyd edək ki, hazırda meyvə bazarında meyvə satanlardan gündəlik 20 manat, ət alveri ilə məşğul olanlardan isə 40 manat məbləğində icarə haqqı alınır.

29 Yanvar 2016 6:24

Baş redaktor məhkəməyə verildi

Qazaxda jurnalist,“Şəfəqə Doğru” qəzetinin baş redaktoru Neymət Novruzov haqqında rayonda yerləşən “Avey” Dövlət Qoruğunun müdiri Səadət Əliyeva tərəfindən məhkəməyə ərizə ilə müraciət edilib. Qoruq müdiri S.Əliyeva ərizəsində N.Novruzovun Daş Salahlı kəndində yerləşən ,“Damcılı Bulağı” adlanan istirahət mərkəzi haqqında yazdığı araşdırma-yazılarında onun təhqir olunduğunu, şərəf və ləyaqətinin alçaldıldığını iddia edib .“Şəfəqə Doğru” qəzetində və “shafaqadogru.com” saytında “Damcılı Bulağı” istirahət mərkəzi haqqında dəfələrlə araşdırma-yazılar dərc olunub.Yazılarda sözügedən istirahət mərkəzində son vaxtlar artan neqativ hallardan və bu vəziyyətlə bağlı yerli sakinlərin şikayətlərindən söz açılıb.Qoruq rəhbərliyinin istirahət mərkəzinə gələnlərdən qeyri-qanuni şəkildə pul tələb etməsi və digər qanunsuzluqlara imkan verilməsi ictimailəşdirilib.Nəticədə isə qoruğun müdiri S.Əliyeva məmurluq statusundan “yararlanaraq “, qəzetinin baş redaktorunu məhkəməyə verməklə azad sözü susdurmağa çalışır. Tərəflərin dinlənilməsi üçün yanvar ayının 29-na təyin olunan məhkəmə iclası Bakı şəhər Yasamal rayon məhkəməsi binasında baş tutacaq. Xatırladaq ki, Avey Dövlət Qoruğunun müdiri Səadət Əliyevanın atası (adının Həbib olduğu bildirilir) Gəncə şəhərində məhkəmədə hakim işləyir.

29 Yanvar 2016 6:15

Krediti qaytarmasan, bank zaminə nə edə bilər?

Krediti qaytarmasan, Azərbaycanda bütün valyuta növləri daxil olmaqla ümumi kredit portfelinin dəyəri 19 milyard 744 milyon manatdır. Xarici valyutada olan kreditlərin həcmi isə 7 milyard 477 milyon dollardır. Bu isə o deməkdir ki, dollar ilə olan kreditlər ikinci devalvasiyadan öncə milli valyuta ifadəsində 7 milyard 851 milyon manat idisə, hal-hazırda rəsmi məzənnə ilə 11 milyard 664 milyon manatadək yüksəlib. Deməli, sonuncu məzənnə dəyişikliyindən sonra vətəndaşlar və iş adamları əlavə olaraq banklara 3 milyard 813 milyon manat vəsait ödəməlidirlər. Mərkəzi Bankın məlumatına görə, hal-hazırda borclananların sayı 2 milyon 532 min 712 nəfərə çatıb. Bunların böyük əksəriyyəti isə istehlak kreditlərindən istifadə edən vətəndaşlardır. Belə ki, 2 milyon 497 min 609 nəfər fərdi borclanandır. Borclanan hüquqi şəxslərin sayı cəmi 11 min 241 şəxsdir. 2 milyondan artıq olan borclanan arasında sahibkarlıq subyektlərinin sayı cəmi 23 min 862 iş qurumudur. Fərdi borclananların sayı ondan xəbər verir ki, hal-hazırda orta hesabla hər ailədə ən azı bir borclu var. Yəni, orta hesabla hər bir ailə banka borcludur. Hal-hazırda Azərbaycanda 1 milyon 205 min 81 zamin var. Ölkədə orta hesabla hər 4 nəfərdən birinin banka borcu var və orta hesabla hər 8 nəfərdən biri isə zamindir. Son günlər kreditlərlə bağlı hər kəsi düşündürən suallara bank üzrə ekspert Əkrəm Həsənov cavab tapmağa çalışıb. - Əkrəm müəllim, vətəndaş aldığı krediti qaytara bilmirsə, hazırki durumda bank nə edə bilər? - Krediti qaytarmamağa görə sizi cinayət və ya inzibati məsuliyyətə cəlb edə bilməzlər. Bu, həm beynəlxalq, həm də milli qanunvericiliyimizdən irəli gəlir. Məsuliyyətiniz yalnız mülki ola bilər. Yəni kredit əmlakınızdan tutula bilər. Bu da yalnız məhkəmə qərarı əsasında ola bilər. Deməli, əmlakınız yoxdursa, kreditin qaytarılması qeyri-mümkündür. Məsələn, adınıza “kupça”lı (sərəncam əsasında yox) daşınmaz əmlak və ya “texpasport”lu (“doverennost”lu yox) avtomobil yoxdursa, faktiki olaraq bank çarəsizdir. Daşınar əmlakınızın alınması isə müşkül məsələdir, çünki sizə mənsubiyyətini sübut etmək çətindir. Banklar adətən buna girişmir. Adınıza qeyd edilən əmlak olsa belə, orta səviyyəli hüquqşünas vasitəsilə məhkəmə və icra proseslərini azı 3 il uzada bilərsiniz. Yəni bank azı 3 il çarpışmalıdır ki, həmin əmlakı əlinizdən alsın. Bank əmlakı satıb pulunu götürməlidir. Banka bu sərf etmir. - Kredit borcu aylıq gəlirdən tutula bilərmi? - Əgər gəliriniz rəsmidirsə, kredit aylıq gəlirinizdən tutula bilər. Belə ki, əmək müqaviləsi üzrə işləyirsinizsə, məhkəmə qərarı əsasında əmək haqqınızdan bankın xeyrinə aylıq əsasda cüzi məbləğ tutula bilər. Bu o deməkdir ki, bank 1 illik verdiyi krediti 10 il ərzində geri alacaq. Ona görə də heç nədən qorxmayın. Öz şərtlərinizi diktə edin. Hər şeydən əvvəl özünüzün və ailə üzvlərinizin sağlamlığını, əsəblərini qoruyun. İmkan verməyin ki, bank işçiləri sizi daim narahat etsin. Sözünüzü deyin və tələb edin ki, sizi narahat etməsinlər. Onların sizi və ailənizi bezdirməyə haqqı yoxdur. Riayət etməsələr, polisə müraciət edin. - Borc qaytarılmasa, zamini hansı təhlükə gözləyir? - Belə məqamda zamin də borclu kimi hesab edilir. Zamin götürülən borca görə bütün əmlakı ilə məsuliyyət daşıyır. Buna görə də borclunun əmlakı, vəsaiti yoxdursa, yaxud borcu ödəməyə tam imkan vermirsə, bank borcun ödənilməsini zamindən tələb edir. Əgər zamin borcu tam və ya qismən ödəyirsə, borc üzrə tələb hüququ zaminə keçir. Daha sonra zamin borcludan ödənişi tələb edə bilər. Əgər zaminin adına əmlak varsa, özünün və himayəsində olan şəxslərin yaşayış minumundan artıq aylıq gəliri varsa, həmin vəsait zamindən də tutula bilər. -Borcalan kredit götürən zaman banka hər hansı bir girov qoymayıbsa, borc zaminin əmlakından borc tutula bilərmi? - Girov yoxdur, amma borcalanın zamini var. Banka girov qoyulsa, belə bank zamindən ödənişi tələb edə bilər. Kimsə kreditə görə zamin durubsa, o şəxs bilsin ki, bank ondan borcu tələb edəcək. Bu, qanunauyğun haldır. Burada bir fərq var. Əgər kreditin verilmə müddəti bitibsə və borclu ödəmirsə, bank bu borcu 3 il ərzində borcludan tələb edə bilər. Bank zamini kreditin verilmə müddəti bitdikdən sonra 1 il ərzində məhkəməyə verərək borcu tələb edə bilər. -İş məhkəməyə çatanda, zamin hansı məsuliyyəti daşıyır? - Məsələn, borclunun banka 10 min borcu var və aylıq əmək haqqı 500 manatdır. Himayəsində isə heç kim yoxdur. Məhkəmə qərar çıxarır ki, bu puldan 250 manat tutulsun. Amma zamin də var. Bu halda məhkəmə borcun ödənilməsini zamindən də tələb edə bilər. Yəni, o demək deyil ki, borclunun əmək haqqından tutulur, zamindən tutulmayacaq. Xeyr. Axı, bank bütün borcu tələb edir. Bu halda zaminin də aylıq gəliri varsa, ondan da məhkəmə qaydası ilə vəsait tutula bilər.

29 Yanvar 2016 4:51

Bağlanan banklarda müştərilərin hesabında problem yaranacaq?

Hazırda ölkənin bank sektorunda baş verən proseslər bütün ictimaiyyətin diqqətindədir. “Qafqazinfo” xəbər verir ki, son günlər bir neçə bankın lisenziyasının ləğv edilməsi ilə bağlı xəbərlər sosial şəbəkələrdə, mediada müzakirə olunmaqdadır. Bağlanan banklar Əmanətlərin Sığortalanması Fondunun üzvüdürsə, həmin bankların əmanətçiləri narahat olmur. Belə ki, qanunla qorunan əmanətlər 30 min manatı aşmamaq şərtilə müştərilərə yeddi iş günü ərzində geri qaytarılır. Ancaq nəzərə alaq ki, banklarda təkcə qorunan əmanətlər deyil, eyni zamanda, ayrı-ayrı hüquqi və fiziki şəxslərin cari hesabları da olur. İndi müştərilər cari hesablarının taleyindən çox narahatdır. Qanunvericiliyə əsasən, Mərkəzi Bank tərəfindən bankın lisenziyası ləğv olunduğu halda, həmin banka inzibatçı təyin olunur. Kredit borclarının qaytarılması məsələsindən başqa, qalan bütün əməliyyatlar dondurulur. Bəs, cari hesabları olan müştərilər barədə qanunvericilik nə deyir? Onların hesabları üzərindəki vəsaitləri geri qaytarılacaqmı? “Qafqazinfo” sözügedən suallarla iqtisadçı ekspert Rəşad Əliyevə müraciət edib. Onun sözlərinə görə, ləğvetmə prosesini Mərkəzi Bank həyata keçirir. Bu zaman müddətində bankın müştəriləri ilə müəyyən işlər aparılır: “Müştərilərin sayı mümkün qədər minumumlaşdırıldıqdan sonra ləğvetmə haqqında qərar verilir. Bundan sonrakı dövrdə bankın kredit portfelinin toplanması, depozit və əmanət öhdəliklərinin yerinə yetirilməsi artıq seçilmiş müvəkkil banklara həvalə olunur. İkinci mərhələdə isə, hesabların bir bankdan digər banka transfer olması müştərinin öz seçimi ilə baş tutur. Bundan sonra sahibkarlıq subyektləri, biznesmenlər, müəssisələr fəaliyyətini digər seçdikləri banklar vasitəsilə davam etdirə bilərlər. Bank ləğv edilib deyə, bu o demək deyil ki, sahibkarların, müəssisələrin, hüquqları mütləq pozulacaq, depozitləri geri qaytarılmayacaq”. Ekspert əlavə edib ki, ləğvetmə prosesinə gedilərkən bankın bütün aktivləri və passivləri qiymətləndirilir: “Əmanətlərin, depozitlərin geri qaytarılması məsələsi aktivlərin geri yığılması hesabına baş verir. Ondan sonrakı mərhələdə artıq bankın daşınmaz əmlakının satışının həyata keçirilməsi baş verir. Daha sonrakı mərhələdə isə bunları kompensasiya etmək mümkün deyilsə, qanun çərçivəsində həll olunur. Sığortalanan əmanətlər Əmanətlərin Sığortalanması Fondu tərəfindən əvəzlənir. Fondun qaydalarına uyğun olmayan müştərilərin isə əmanətləri bata bilər. Amma cari hesablar üzərindəki depozitlər seçilmiş müvəkkil banklar vasitəsilə geri qaytarılacaq. Bankın depozitləri geri qaytarmaq üçün aktivləri, məcmu kapitalı, problemli kreditlərin ödənilməsi üçün yığımları vardır. Bu vəsaitlər bankın sərəncamından kənarda olur. Məcmu kapitalı az olan bankların müştərilərinin carı hesabları da məhduddur. Sadəcə ola bilər ki, bir neçə gün ərzində hər hansı texniki problemlər baş versin və gecikmələr olsun. Heç bir halda fiziki şəxslərin depozitləri batmır. Çünki qanunvericilik buna imkan vermir. Əgər bu baş verərsə, artıq hüququ pozuntu hesab olunur”.

29 Yanvar 2016 2:01

“Kristal Abşeron” qurbanları prezidentə üz tutur – ŞİKAYƏT VAR

"Kristal Abşeron” şirkətinin payçıları aksiyalara hazırlaşır. VİZUAL.az xəbər verir ki, şirkətin Xırdalanda tikdiyi binalarda yaşayanlar devalvasiyadan sonra üzləşdikləri problemlə bağlı şikayət edəcəklər. Onlar prezident İlham Əliyevə müraciət etməyi planlaşdırır. Şirkətin manatın üzən məzənnəyə keçidindən sonra krediti dollarla tələb etməsi və bir mənzilin üç dəfə baha qiymətə başa gəlməsi payçıları müflis edib. Zərərə düşən mənzil sahibləri şirkətdən prezidentə şikayət məktubu yazacaq. Məlumata görə, "Kristal Abşeron” müqavilədə dollar şərtini irəli sürüb. Lakin ikinci böhran dalğasında sakinlər daha ağır vəziyyətlə qarşılaşıb. Ölkə başçısının iş adamlarına, məmurlara etdiyi xəbərdarlığa rəğmən şirkət öz siyasətini davam etdirir. Məsələn, əvvəl 500 manat olan kredit indi 800 manata qalxıb. Xəbərə görə, "Kristal Abşeron” sakinlərə yeni şərt irəli sürüb. Kredit məbləğnini əvvəlki qaydada saxlanması, əvəzində müddətin uzadılması. 10 illik kredit götürən ev sahibi 20 il ödəmək məcburiyyətində qalıb. Məlumata görə, buna etiraz edən sakinlər İ.Əliyevə məktub yazacaq. Bundan başqa, Tovuz sakini Samir Eldar oğlu Verdiyev "Kristal Abşeron” şirkətinin onu aldadaraq, gərəkdiyindən çox pul ödətdiyini yazıb. 2014-cü ildə bu şirkətin Xırdalanda tikdiyi binalarda kreditə ev satışı ilə bağlı reklamını televiziya ekranlarından izləyən S.Verdiyev mənzil üçün "Kristal Abşeron”a müracət etdiyini, 62 kvadrat metrlik ikiotaqlı mənzilin 53 min manata alqı-satqısını razılaşdırdıqlarını bildirir. Qafqaznews.az-aq ünvanlanan məktubda qeyd edilir: ""Kristal Abşeron”la müqavilə bağlayarkən, alıcı qismində həyat yoldaşım Türkan Elman qızı Müseyibovanın adı qeyd olunub. Razılaşmışdıq ki, 15 min manatı ilkin ödəniş olaraq keçirəcəm, qalan 38 min manatı isə 12 ay ərzində Azərbaycan Beynəlxalq Bankına kredit kimi ödəyəcəm. Müqavilə bağlandıqda mənə bildirdilər ki, banka gərək yoxdur və pulu aybaay onların ofisində ödəməliyəm. Bundan başqa, mənim sadəlövhlüyümdən istifadə edərək inandırdılar ki, müqavilədə məbləği 72 min dollar göstərəcəyik. Amma sən manatla ödəyəcəksən. Beləliklə, "Kristal Abşeron” qanunsuz olduğu halda, mənə dollarla alqı-satqı müqaviləsi imzalatdırmış, borcumu tam ödədiyim halda isə yeni məzənnə ilə daha çox pul ödəməyi tələb edir”. S.Verdiyev yazıb ki, müqavilə imzalandıqdan sonra 4 ay ərzində hər ay 3190 manat olmaqla, ödənişi vaxtlı-vaxtında şirkətin Xırdalandakı ofisinə keçirib: "2015-ci ilin fevral ayındakı birinci devalvasiyadan sonra mənə dedilər ki, artıq hər ay 3190 yox, 4290 AZN kredit ödəməliyəm. Həmin vaxtdan sonra, mən 7 ay ərzində hər ay 4290 AZN dəyərində ödəniş etdim, lakin bir neçə gün gecikmələri bəhanə edərək, məndən bir dəfə 177 AZN, bir dəfə də 100 AZN dəyərində "gecikmə” cəriməsi aldılar. Halbuki, aldığım qəbzləri bank vermirdi. Bundan əlavə, şirkət özünün mənzili gec təhvil verməsini də nəzərə almır, amma vətəndaşla hər günün hesabatını aparır”. “Kristal Abşeron” qurbanları prezidentə üz tutur Vətəndaşın sözlərinə görə, növbəti devalvasiyadan sonra isə "Kristal Abşeron” ondan sonuncu ayın ödənişini 6378 AZN həcmində keçirməyi tələb edib. S.Verdiyev bu məbləği ödəməkdən imtina etdikdə isə ona deyiblər ki, "borcunu tam ödəməsə, mənzilini ala bilməyəcək”. S.Verdiyev vurğulayır ki, dövlət başçısı İlham Əliyevin göstərişinə baxmayaraq, sözügedən binaların inşaatında tezyanan materiallardan istifadə olunub və bununla da şirkət vətəndaşların nəinki artıq pulunu alır, həm də insanların həyatını təhlükəyə atır. Şikayətçi müqavilənin 2014-cü il may ayında bağlandığını və müqaviləyə görə, şirkətin mənzili ən gec 12 ay ərzində təhvil verməyi öhdəsinə götürdüyünü qeyd edib: "Öhdəlik müddətindən çoxdan keçib, mənzili hələ indi və səhlənkar şəkildə "təmir olunmuş” halda təhvil verirlər, ona görə də, devalvasiyanın "fəsadlar”ını mənim boynuma qoymağa çalışırlar. Satış müdiri Azər müəllimlə də görüşdüm, dedi ki, müqavilədə necə (xarici valyuta ilə) göstərilibsə, ödənişi də o cür, sona qədər ödəməliyəm. Şirkətin "Facebook” səhifəsində də reklamların manatla edildiyi halda, müştərilərə xarici valyuta ilə müqavilə imzalatdırmaq qanunsuzluqdur. Mən hüquqlarımı bilmədən o müqaviləni səhvən imzalaya bilərəm, amma dövlətin qanunlarından, imkanlarından yararlanan bir şirkətin vətəndaşları bu cür aldatması yolverilməzdir. Mən o şirkətə borcumu çoxdan ödəyib bitirmişəm. Sadəlövhlüyümdən istifadə edərək məni aldadıblar, indi isə artıq pul tələb edirlər. Həmçinin, Mərkəzi Kredit Reyestrində qeydiyyatı olmayan bir şirkətin vətəndaşlara kredit verməsi, mənzil satışını xarici valyuta ilə aparması, üstəlik də "gecikmə” faizləri tələb etməsi qanunsuzdur. Məndən daha 6378 manat pul tələb edirlər, yoxsa, mənzilimi verməyəcəklər. Sizdən xahiş edirəm, bu məsələni işıqlandırmaqda və hüquqlarımın qorunmasında mənə dəstək verəsiniz”. Mövzunu diqqətdə saxlayacağıq. Qarşı tərəfin də mövqeyini dinləməyə hazırıq.

29 Yanvar 2016 12:17

“Günəşli”də yanan neftçi gələn həftə evə buraxılacaq

Dekabrın 4-də "Günəşli" yatağının 10-cu platformasında qəza zamanı müxtəlif yanıq xəsarətləri alan neftçi Bəxtiyar Ələkbərov gələn həftə evə buraxılacaq Bu barədə Modern.az-a açıqlamasında Əziz Əliyev adına Cərrahiyyə Klinikasının Yanıq Mərkəzinin baş həkimi Şöhrət Məmmədov deyib. O qeyd edib ki, neftçinin vəziyyəti stabildir. “Xəstənin vəziyyəti kafidir. Müalicəsi davam edir, gələn həftə evə buraxılacaq. Buna baxmayaraq o, daim nəzarətdə saxlanılacaq. Ambulator şəaitdə müalicələrini davam etdirəcək”. Ş.Məmmədov neftçinin işə başlaması üçün hələ tez olduğunu vurğulayıb. “İki dəfə əməliyyat olunub. Əllərində yanıq çox olduğu üçün barmaqlarını normal işlətməsi mümkün deyil. Onun üçün müəyyən zaman lazımdır. Bir müddətdən sonra yenidən əməliyyat olunub”. Dekabrın 4-də saat 17:40 radələrində güclü tufan nəticəsində “Günəşli” yatağındakı 10 saylı dərin dəniz özülündə yüksək atmosfer təzyiqi ilə işləyən sualtı qaz xəttinin dayaq borusu qırılmış, boru kəməri zədələnmiş və yanğın baş vermişdi. Xilasetmə əməliyyatı nəticəsində 32 nəfər xilas edilib. İndiyədək 11 nəfərin cəsədi tapılıb, 19 nəfərin axtarışları davam etdirilir. Eyni zamanda “Neft daşları”nın Neft-Qaz Çıxarma İdarəsinin 501 saylı özülündə baş verən qəza zamanı üç neftçi itkin düşüb.

29 Yanvar 2016 11:13

Dövlət Komitəsi zorakılığa məruz qalan uşaqlara müraciət edib

Belə hallar baş verəndə zorakılığa məruz qalan uşaqların özlərinin müvafiq qurumlara müraciət etməsini tövsiyyə edirik "Uşağı o adam vurur ki, onun uşağı öyrətməyə, dəyişdirməyə bacarığı, qabiliyyəti çatmır". Bunu "Report"a açıqlamasında Ailə, Qadın və Uşaq Problemləri üzrə Dövlət Komitəsinin Uşaq problemləri şöbəsinin böyük məsləhətçisi Pərviz Əliyev deyib.Komitə rəsmisi hesab edir ki, əgər şagird dərsə hazır deyilsə onu vurmaqla bu məsələni həll etmək olmaz: "Müəllimin tərbiyə üsulundan çox şey asılıdır. Şagirdlə oturub söhbət etməklə bu məsələni yoluna qoymaq, uşağı istiqamətləndirmək olar. Uşağı vurmaq ən asand üsuldur. Uşağı vurmaq uşaq hüquqlarının pozulmasıdır. Bu zaman uşaq fiziki və mənəvi xəsarət alır. Zorakılıqla böyüyən uşaq düşünəcək ki, məni vurdular ağıllandım, qaydalara əməl etdim, mən də bu üsulu tətbiq edim".O bildirib ki, uşaqlara qarşı törədilən zorakılıq halları daha çox ailə-məişət zəminində baş verir: "Ailə-məişət zəminində zorakılıq halları ilə bağlı tədbirlər görülür. Zorakılıq törədənlərin hərəkətlərinə birbaş nəzarət olunur. İctimai yerlərdə, məktəblərdə, ali mətəblərdə baş verən zorakılıq halları ilə bağlı isə konkret statistika yoxdur. Çünki belə halların baş verməsini aşkar etmək çətindir. Uşaqlara qarşı törədilən zorakılıqla bağlı sübutlar, xüsusən də video çəkiliş olduğu halda müvafiq qurumlar bunu araşdırır. Belə hallar aşkarlananda Dövlət Komitəsi müdaxilə edə bilmir. Amma komitə həm orta məktəblərdə, həm də uşaq evlərində, internatlarda daimi monitoriqlər aparır. Təbii ki monitorinqlər bütün təhsil müəssisələrini əhatə edə bilməz. Belə hallar baş verəndə zorakılığa məruz qalan uşaqların özlərinin müvafiq qurumlara müraciət etməsini tövsiyyə edirik. Bunun üçün də əlavə "Qaynar xətt" yaradılmalı və təhsil müəssisələrində əlaqə nömrələri elan formasında vurulmalıdır".P.Əliyev vurğulayıb ki, uşağı vurmaqla cəzalandırmaq tərbiyə üsulu deyil: "Komitə 2012-ci ildə "Uşaqları döymək və vurmaq olarmı?" mövzusunda region müəllimləri arasında sorğu keçirib. Sorğunun nəticələrinə görə, müəllimlər yüngül vurmaqla uşaqları tərbiyə eləməyi normal hesab edirlər. Yəni Azərbaycan reallığında belə bir fikir qəbul edilir. Dövlət Komitəsi keçmişdən qalan bu kimi düşüncələrin qarşısını almaq üçün maarifləndirmə tədbirləri görür. Ancaq son vəziyyət onu göstərir ki, bu istiqamətdə yenə də xeyli işlər görülməyinə ehtiyac var".

28 Yanvar 2016 10:33

“Bazarkom”un idmançı oğlu Bakıda “Rembo” rolunda…

İsa Əzizov və dostları yanadacaqdoldurma məntəqəsində dava saldılar; generalın uzaq qohumu əvvəl törətdiyi cinayətlərə görə niyə cəzasız qalıb?Qudurğan, ictimai qaydaları kobud şəkildə pozan məmur övladlarının daha bir qovğası yanvarın 26-dan 27-nə keçən gecəyə təsadüf edib. Gecəyarısı Bakının Tiflis prospektindəki “Azpetrol” yanacaqdoldurma stansiyasına Az 90 HN 999 dövlət nömrə nişanlı “Bentley” avtomobili gəlib. Yanacaqdoldurma məntəqəsinin işçisinə aldığı benzinin qarşılığında maşının şüşəsindən 100 manatlıq uzadıb, qalıq pulun geri qaytarılmasını tələb edib. Bu zaman əməkdaş ondan gözləməyi xahiş edib. Amma bu, “Bentley” sərnişinlərinin xoşuna gəlmir və onlar həmin oğlanla mübahisə etməyə başlayıblar. Nə baş verdiyini aydınlaşdırmaq üçün maşına yanacaqdoldurma məntəqəsinin mühafizəçisi Sadiq Bağırov gəlib və sərnişinlərə gözləməyi tövsiyə edib. Bu da ikinci qığılcıma səbəb olub. Maşından düşən “qoçular” S.Bağırovu mağaza tərəfə, təhlükəsizlik kameraları olmayan istiqamətdə sıxışdırıblar.Bir neçə dəqiqə sonra isə hadisə yerinə ağ rəngli “Prado” gəlib. Bu maşından da idmançılar düşərək məntəqənin işçilərinin üstünə gedib və dava etməyə başlayıblar. Bundan sonra, “Bentley”in sürücüsü maşınından silah götürərək, “hamını güllələyəcəyəm” deyib. Amma dostu silahı onun əlindən almağa müvəffəq olub. Daha da hiddətlənən “Bentley” sürücüsü POS-terminalı götürərək Sadiq Bağırova başından zərbələr endirməyə başlayıb. Bundan sonra qoluzorlular çıxıb gediblər. Məlum olub ki, qoluzorlu dəstənin başçısı general Məhərrəm Əliyevin qohumudur. Bu barədə KİV-lərdə yayılan informasiyanı generalın qardaşı, deputat Adil Əliyev təsdiqləyib. Adil Əliyev öz facebook səhifəsində bunları yazıb: “Dostlar, cinayət varsa, cəzası da olmalıdır. Uzaq qohumumuz olan İsa Əzizovun və dostlarının yanacaqdoldurma məntəqələrindən birində zorakılıq halına yol verdiyi bildirilir. Biz uzaq qohum olaraq bu şəxsin əməllərinə cavabdeh deyilik. Onun ailəsinin böyüyü həmin şəxsi tənbeh etməlidir. Təəssüf ki, bəzi saytlar məsələnin mahiyyətini kənara qoyaraq sanki əllərinə fürsət düşmüş kimi başlığa İsa Əzizovun bizimlə qohumluq əlaqələrini ön plana çəkirlər. İsa Əzizovun hərəkətində qanunsuzluq təsbit olunarsa, o da hamı kimi qanun qarşısında cavab verəcək. Bunun başqa alternativi yoxdur. Bəzi saytlarda yazıblar ki, guya adıçəkilən şəxs Kikboksinq Federasiyasının üzvüdür. Bu da kökündən yanlış xəbərdir, İsa Əzizovun yaxından, uzaqdan federasiyamıza aidiyyəti yoxdur, yarışlarımızda iştirak etməyib. Onun hansı idman növü ilə məşğul olması haqqında da məlumatım yoxdur. Hər gün ölkədə nə qədər cinayət hadisəsi baş verir. Bu kimi cinayətlər də onlardan biridir. Hər kəs özünə və ailə üzvlərinin hərəkətlərinə cavabdehlik daşıyır”. Dəqiqləşdirmələr nəticəsində məlum olub ki, İsa Əzizov “8-ci km” bazarının sahibi Nadir Əzizovun oğludur. Eyni zamanda o, bir müddət əvvəl general Məhərrəm Əliyevin Pirşağıdakı bağ evini alıb. Jam.az yazır ki, İ.Əzizov orada bahalı quşlar saxlayır. Quşları kimsənin tutması, toxunması, hətta yaxınlaşması belə qadağandır. Əks təqdirdə, həmin şəxsin üzərinə Əzizovun “qoçu dəstəsi” göndərilir və məsələ “həll” edilir. Ötən ilin mayında İsa Əzizov və dostları  “Famous” karaoke klubunda qızları döyməklə gündəmə gəlmişdilər. O zaman döyülmə faktı ilə bağlı Rusiya vətəndaşı Diana Babayeva və Elvina Əliyeva polisə ərizə ilə müraciət etmişdilər. Diana Babayeva həm də Rusiyanın Bakıdakı səfirliyinə müraciət etmişdi. Elvina Əliyevanın sözlərinə görə, İsa Əzizov onu döyüb və güclə maşına oturtmaq istəyirmiş. O zaman təhqirə məruz qalan aktrisa Diana Babayeva mətbuata açıqlamasında bildirmişdi ki, rəfiqəsi Elvina Əliyevanı döyən çempion İsa Əzizov qorxulu adamdır: “İsa Əzizovun bəyənib rədd cavabı aldığı qızların həyatı təhlükədədir. Bir neçə dəfə həmin klubda qızlara qarşı kobudluq edib. İsa Əzizovun ailə üzvləri mənə zəng edərək ərizəmi geri götürməyi, görüşməyi təklif edirlər. İsanın barəsində başqa bir cinayət işi olduğundan şikayətçi olmamağımı xahiş edirlər. Onlara dedim ki, sizin böyükdən də, kiçikdən də, hər birinizdən qorxuram”. İndi məlıum olur ki, həmin dövrdə şikayət əsasında cinayət işi başlasa da, hüquq-mühafizə orqanları İsa Əzizovu tapa bilməyiblər. Ərköyün “bazarkom” oğlu daha bir zorakılığa yol verəndən sonra isə məlum olub ki,  əslində onu heç kim axtarmırmış. Sonuncu insidentdən sonra Nəsimi Rayon Polis İdarəsi əməkdaşlarının həyata keçirdikləri əməliyyat-axtarış tədbirləri nəticəsində hadisəni törətməkdə şübhəli bilinən Bakı şəhər sakinləri Mahir İsgəndərov və İsa Əzizov müəyyən edilərək saxlanılıblar. Aldığımız son məlumata görə isə artıq hər iki şəxs azad olunub. Qanunda edilən son dəyişikliklərə görə döyməyə görə cərimə nəzərdə tutulur. Odur ki, varlı-hallı məmur övladları, generalın qohumu və onun dostu artıq azadlıqdadır. 1000 manat cəriməni ödəyib sakitcə polis məntəqəsini tərk ediblər... (musavat.com)  

28 Yanvar 2016 10:25

“Azəriqaz”ın qaz vurub qazan dolduran məmuru…

Moderator.az - a adının çəkilməyini istəməyən bir oxucumuzdan ilginc informasiya daxil olub. Məlumatda qərb bölgəsində qaz istismar sahəsində özbaşınalığın hökm sürdüyündən bəhs edilir.Baş mühəndis Məzahir Hüseynovun "əhatə dairəsi"ndə olan ərazilərdə öz istədiyi kimi vəziyyət yaratdığı iddia edilir. Belə ki, Məzahir Hüseynov hər evə qaz çəkilişi zamanı layihə pulu, boru pulu, qazı buraxmaq pulu və s. adlar altında abonentdən üst - üstə 800 manat tələb edir. Əsasən Gədəbəy və Şəmkir rayonlarında baş mühəndisin "işi" rahat gedir. M. Hüseynov əvvəllər Gədəbəydə qaz istismar sahəsinin rəisi vəzifəsində çalışıb. Çoxlu gəlir əldə etdiyinə, daha doğrusu, diribaşlığına görə SOCAR - ın Əsaslı investisiya qoyuluşu idarəsinin rəis müavini, bu günlər adı xanımının Türkiyədə 20 milyon dollara bir neçə villa alması iddialarına görə dilə - dişə düşən Qiymət Mehdiyevin Məzahir Hüseynovu qərb bölgəsinə - yəni Gədəbəylə yanaşı Şəmkir, Qazax, Tovuz, Ağstafa rayonlarına baş mühəndis təyin etdiyi də iddialar arasındadır...Bizə verilən məlumata görə, baş mühəndis Məzahir Hüseynov Qiymət Mehdiyevə güvənirmiş. Məlumatı verən qərb bölgəsindən olan oxucumuz iddia edir ki, Azəriqaz" rəhbərliyi iddiaları yerində araşdırmaq niyyətinə düşsə maraqlı faktlarla qarşılaşacaqlarına şübhə yoxdur...

27 Yanvar 2016 9:33

Problem çox, böhran dərindir – Biz hazırda pis və lap pis seçimin arasındayıq

Cəmiyyətdə belə bir hakim mövqe var ki, hökumətin indiki davranışları mövcud böhrana adekvat deyil və heç bir kəsərli antiböhran tədbiri atmaq iqtidarında deyil. Xüsusən Samir Şərifovun dollarla götürülən kreditlər məsələsində məsuliyyəti boyunlarından atması insanların qəzəbinə səbəb olub. Bank məsələləri üzrə tanınmış mütəxəssis Əkrəm Həsənov Moderator.az - a açıqlamasında deyir ki, əslində Samir Şərifovun belə fikirlər səsləndirəcəyi gözlənilən idi: "Əvvəla, Samir Şərifovun dollar kreditləri ilə bağlı mövqeyi başadüşüləndir. Maliyyə naziri həmişə büdcə xərclərini azaltmaqda maraqlıdır, bu təbiidir. Xüsusən də belə məsələdə. Əvvəllər də bildirdiyim kimi, sözügedən güzəşt əslində əhalinin deyil, ilk növbədə bankların marağındadır. Çünki 5000 - 10 000 məbləğli kreditlər onsuz da batmış kimidir, bir qayda olaraq onlar üzrə girov yoxdur, borclularınsa ödəniş qabiliyyəti yoxdur. Buna görə də banklar onsuz da həmin məbləğləri itirib. Deməli, dövlətin yardımı məhz banklara edilən kömək olacaqdı. Məhz buna görə də nazir faktiki dedi ki, qoy banklar əvvəlki mənfəətləri hesabına bu zərərləri bağlasınlar.Fikir verin, təklif məhz banklardan qaynaqlanırdı və rəsmilərdən yalnız Elman Rüstəmov onu faktiki dəstəkləyirdi. Bir sölə, bunun arxasında böyük bank lobbisi dururdu. Axı dövlət niyə 5000 -10 000 məbləğli kredit alanlara yardım etməli, yuxarı məbləğ götürənlərə isə heç olmasa həmin civarda etməməlidir? Digər borclular vətəndaşlarımız deyil?! O ki, qaldı antiböhran planlarına, hələlik nəticə çıxarmaq tezdir. Hər bir halda hazırda istənilən addım yalnız müəyyən problemləri yumşalda bilər, tam həll edə bilməz. Buna görə də hamını razı sala biləcək plan və tədbirlər mümkünsüzdür, çünki problem çoxdur, böhran dərindir. Biz hazırda pis və lap pis seçimi arasındayıq. Bazar iqtisadiyyatı prinsiplərinə uyğun əhaliyə hökumətə deyil, daha çox özlərinə bel bağlamağı tövsiyyə edirəm".

26 Yanvar 2016 12:05

”Günay Musayeva ilə bağlı tədbir görülməlidir” – Deputat

“Bu stil mənim” verilişində türk dilində danışan model Günay Musayeva ilə bağlı tədbir görülməlidir”. Faktinfo.az-ın məlumatına görə, bunu aznews.az-a açıqlamasında millət vəkili Nizami Cəfərov ATV kanalında yayımlanan “Bu stil mənim” verilişindəki qalmaqalı şərh edərkən deyib. Deputat bildirib ki, Azərbaycanın dövlətinin öz dili var və bütün televiziya və radiolar da bu dildə danışmalıdır: “Televiziyada başqa dildə danışmaq olmaz. Əgər danışan şəxs Azərbaycan dilini bilmirsə, bu zaman da tərcüməçilərdən istifadə olunmalıdır. Dəb xatirinə başqa dildə danışmaq olmaz. Dövlət dili haqqında qanun var”. N.Cəfərovun fikrincə, yaranmış vəziyyətdə ATV kanalı bir tədbir görməyibsə, o zaman məsələyə Milli Televiziya və Radio Şurası müdaxilə etməlidir: “Bu məsələdə mübahisə etməyin yeri yoxdur, hər şey ortadadır. Televiziya vəziyyətin daha da pisləşməməsi üçün mütləq bunu müzakirə edib həll etməlidir. Ortada ictimai rəy var”. Xatırladaq ki, ATV kanalında “Bu stil mənim” verilişində iştirakçı Günel Məmmədova ilə münsif üzvü Günay Musayeva arasında qalmaqal yaşanıb. İştirakçını tənqid edən G.Musayevanın yerli proqramda Türkiyə türkcəsində danışması da birmənalı qarşılanmayıb. Milli Televiziya və Radio Şurası (MTRŞ) isə baş vermiş qalmaqalla bağlı kanal təmsilçiləri ilə müzakirələr aparıldığını bildirib https://youtu.be/FVWUc84-trg

25 Yanvar 2016 6:43

Daha bir körpənin həyatı xilas edildi

14 oktyabr 2015-ci il tarixində Azərbaycan Tibb Universitetinin Tədris Cərrahiyyə Klinikasının mama-ginekologiya şöbəsinə 26 həftəlik hamiləliyi sonlandırmaq məqsədi ilə ümidsiz halda hamilə qadın daxil olub. Tibb Univeristetinin mətbuat xidmətindən Moderator.az-a verilən məlumata görə, daha əvvəl ultrasəs müayinələrindən dölün sol böyrəyindən inkişaf edən iri ölçülü kista aşkar edilib. Bu kista, getdikcə böyüyərək bütün qarın boşluğunu tamamilə tutub. Azərbaycan Tibb Universitetin Tədris Cərrahiyyə Klinikasının Mama-Ginekologiya şöbəsinə müraciət edən hamilə xanım şöbə müdiri Uzm.Turab Canbaxışov tərəfindən müayinə edilib.Turab Canbaxışov deiyr ki, pasientimiz klinikamıza müraciət olunan zaman ultrasəs müayinəsində döldə sol böyrək kıstasının ölçüsü 88,7 mm-ə çatmışdı: "Belə ki, dölün öz bədən uzunluğu 221 mm idi. Dölün sol böyrək kıstası həm qarın boşluğundakı orqanları həm də döş qəfəsindəki ağciyər və ürəyi sıxışdıraraq, ürək fəaliyyətini zəiflətmişdi. Ultrasəs müayinəsində dölün ana bətnində ürək çatışmazlıqdan dərialtı ödem izlənilirdi və ağ ciyərlərin, ürəyin ətrafında maye yığılmağa başlamışdı. Təcili müdaxilə etməsəydik, uşaq tələf ola bilərdi. Bu səbəbdən, dölün sol böyrək kıstasına təcili müdaxilə edərək, tək bir seansla təxminən 235 ml sidik (maye) çəkildi. Kistanın ölçüsü 90 mm-dən 21,8 mm-ə qədər kiçilmişdi və artıq dölün həyatı üçün təhlükə törətmirdi. Ürək, ağciyərlər və qarın boşluğundakı orqanların fəaliyyətləri bərpa olmuşdu. Hamilə xanım hər iki həftədən bir müayinələrə gələrək kistanın ölçüsü qeyd olunurdu və kistanın həcmi böyümədiyi üçün müdaxiləyə ehtiyac olmadı.”Hamiləliyin 40-cı həftəsində mama-ginekologiya kafedrasının dosenti Şölə İsmayılova tərəfindən anaya keysəriyyə əməliyyatı aparıldı və döl sağlam şəkildə dünyaya gəldi. Əməliyyat fəsadsız keçdi, lakin sol böyrək kistası hələ döl 26 həftəsindəykən çox böyük ölçülərə çatdığı üçün göbək dəliyinin tam sağalmamasına səbəb olmuşdu. Ana bətnində müdaxilə edilməsinə baxmayaraq, sidik kisəsi ilə göbək dəliyinin arasında olan axacaq tam qapanmamışdı. Nəticədə uşaq müştərək qüsurla - perforasiya olunmuş embrional göbək dəliğiylə və sidik kisəsi ilə göbək dəliyi arası fistulası ilə doğulmuşdu. Neonatologiya şöbəsinin müdiri Səadət Yaqubovanın sözlərinə görə, belə uşaqlarda infeksiyalaşma riski çox yüksəkdir. Bu riski nəzərə alaraq, uşaq cərrahiyyəsi şöbəsinin müdiri Tibb üzrə fəlsəfə doktoru Ramiz Poluxovla konsilium aparılaraq təcili əməliyyata qərar verildi. Uşaq neonatoloji reanimasiyada əməliyyata hazırlandı və əməliyyata götürüldü. Əməliyyatda həm embrional yırtıq ləğv olundu, həm də sidik kisəsi ilə göbək dəliyi arasında olan həddindən artıq geniş fistula ayrılaraq tikildi. Əməliyyat uğurla başa çatdı. Əməliyyatda iştirak edən böyük briqadanın operativliyi və profesionallığı nəticəsində bütün risklərin qarşısı alındı və hər bir lazımi neonatoji tədbirlər görüldü. Hal-hazirda körpənin vəziyyəti yaxşıdı, həkim neonatoloqların nəzarəti altındadır və evə buraxılması üçün hazırlıqlar görülür.

25 Yanvar 2016 1:22

Fakt

Bizi izləyin