Dubaya aparılan azərbaycanlı qadınlardan ilginc etiraf

  Bu gün Bakı Ağır Cinayətlər Məhkəməsində insan alverində təqsirləndirilən 1961-ci il təvəllüdlü Əkbərzadə Gülnarə Musa qızının cinayət işi üzrə növbəti məhkəmə iclası keçirilib “Qafqazinfo”nun prosesdə iştirak edən əməkdaşının verdiyi xəbərə görə, hakim Rauf Əliyevin sədrliyi ilə keçirilən iclasda zərərçəkənlər ifadə verib. Zərərçəkən Fərqiyə Bağırova ifadəsində bildirib ki, G.Əkbərzadəni 2006-cı ildən tanıyır: “Məni 2006-cı ildə Gülnarə ilə Sima xanım tanış etdi. Dedi ki, iş var, gedib işləyərsiz. Məni burdan birinci Türkiyəyə apardılar. Viza probleminə görə noyabrın 29-dan dekabrın 13-ə kimi Türkiyədə qaldım. Dekabrın 13-də ordan Dubaya getdik. Elə çatan günü məni bara göndərdilər, dedilər get işə başla. Əvvəl razı olmadım, dedim mən bura buna görə gəlməmişəm. Sonra məcbur olub işlədim. Birinci dəfə altı ay işlədim, 2007-ci ilin may ayında qayıtdım. Gülnarə pulumuzu gecikdirirdi, evə pul göndərə bilmirdim. Mənə ancaq yemək verirdi, bir də dişlərimi düzəltdirdi”. Fərqiyə Bağırova sonradan isə tək işləməyə qərar verib: “2007-ci ilin iyulun 12-də özüm Dubaya getdim. Bir həftə oteldə qaldım. Bu dəfə nəyə getdiyimi də bilirdim. Tək işləmək istəyirdim, işlədim də. Çünki gördüm Gülnarə pul verən deyil”. F.Bağrova deyib ki, bu şəbəkənin xarici dil problemlərini və qiymət məsələlərini həll edən meneceri də var: “Zəminə bizim menecer idi, müştəri ilə ünsiyyətdə dil problemi yarananda o kömək edirdi. Bütün məsələləri isə Gülnarə həll edirdi, viza, bilet, yol pulu, orda qalmaq filan”. Fərqiyə Bağırova 1500 dollardan günə 4-5 kişi qəbul etdiyini deyib: “Bəzən elə olurdu bir kişi ilə görüşmək 150 dollar olurdu, amma bütün günü görüşəndə 1500 dollar verirdilər. Orta qiymət 500 dollar idi. Gündə 4-5 kişi ilə görüşürdüm. Hər gün işləyirdim. Gülnarənin özünün sevgilisi var idi, amma kişilərlə görüşüb-görüşmədiyini bilmirəm. Qiyməti isə menecer danışırdı”. Fərqiyə Bağırova bildirib ki, Dubaya getmədən öncə Antalyada işləyib: “Orada Çiçək kafesində ofisiant işləyirdim, bu işlə məşğul olmurdum. Dubaya getməzdən öncə evli idim, ailəm vardı”. Gülnarə Əkbərzadə deyib ki, Fərqiyə bəzi hissələrdə yalan danışır: “O özü Bakıda olanda ora nə üçün getdiyini bilirdi. Qiyməti də yalan deyir, 1500 dollara iş olar?! Cəmi 400-500 dollar idi. Özünə də pul verirdim, anasına göndərirdim. Dişlərini də düzəltdirmişəm”. Fərqiyə Bağırova təqsirləndirilən şəxsin ifadəsinə belə reaksiya verib: “Düzəltdirdiyin dişlər budur da, hamısı tökülür”. Məhkəmədə qeyd olunub ki, istintaq materialına əsasən Fərqiyə 2004-cü ildən bu işlə məşğul olub: “Dubaydan öncə Türkiyəyə gedib-gəlməyin, orada qədim peşə ilə məşğul olmağın, hamısı qeyd olunub”. Fərqiyə Bağırova bildirib ki, Gülnarədən halal pulunu istəyir: “Ondan tələbim budur ki, 6 aylıq işimin pulunu versin, zəhmət haqqımı qaytarsın. Menecerlə bu mənim pulumu yeyiblər”. Hakim bildirib ki, fahişəlik qanunda müdafiə olunan peşə deyil, buna görə də məhkəmə onun vəsatətini qəbul edə bilməz: “Bu məsələni özünüz həll edərsiniz”. Hakimin hazırda bu işlə məşğul olub-olmaması haqda sualına F.Bağırova belə cavab verib: “Xeyr, cənab hakim, özünüz də yoxlaya bilərsiniz”. Bundan sonra digər zərərçəkən Turanə Həsənova ifadə verib. T.Həsənova bildirib ki, onu Dubaya hazırda həbsdə olan Sevinc Qasımova aparıb: “2007-ci ilin may ayında Sevinc məni Dubaya apardı. Dedi ki, orada dükanda satıcı işləyəcəyəm. Məni Gülnarə ilə tanış etdi. Onda mənim 18 yaşım tamam olmamışdı. Mən ora gedənə kimi bu işə məcbur ediləcəyimi bilmirdim. Dubayda bunu biləndə Sevinc ilə savaşdım, razı olmadım. Gülnarə dedi ki, onda mənim sizə çəkdiyim xərcləri qaytarın, çıxıb gedin. Dedilər get işlə, qazan, pulumuzu ödə, sonra çıx get. Mən razılaşmadım. Gülnarə Sevincə dedi ki, onu salın otağa, yemək, su verməyin. Dörd gün məni ac-susuz saxladılar. Sonra gördüm dözə bilmirəm, bunlara yalandan dedim ki, razıyam kişilərlə görüşməyə. Məni bir bara apardılar, orada qızlardan birindən gizlicə telefon alıb Azərbaycandakı tanışlara zəng etdim. Sonra orada da dava salıb kişilərlə görüşmədim, evə qayıtdım. Evdə olanda gördüm Gülnarə iki hindistanlı oğlanı otağa göndərib, 200 dollar da pul vermişdilər. Oğlanlar birgə oradan qaçdım, qarajda gizləndim. Sevinc gəlib tapdı, mən ağladım. Sonra məni Azərbaycana qaytardılar, burada da tanışlar qarşıladı. Mən cəmi bir dəfə getmişəm, ondan sonra heç yerə getməmişəm. Dubayda da 5 gün qaldım, heç bir kişi ilə də görüşmədim. Dubaya aparılanda da qızlıq bakirəliyim pozulmamışdı”. Məhkəmənin növbəti iclası avqustun 31-nə təyin edilib.

24 Avqust 2015 5:03

Xalq artistləri polis bölməsində yumruq davasına çıxdılar

  Akademik Milli Dram Teatrı ilə bağlı qalmaqallar pik həddə çatıb Faktinfo.az aznews.az-a istinadən məlumata görə, bu gün teatrda Xalq artistləri yumruq davasına çıxıb. Belə ki, mətbuatda teatr direktoru İsrafil İsrafilovun bərəsində verilən açıqlamalara Xalq artisti Ramiz Novruz reaksiya verib. Bu barədə söhbət zamanı Ramiz Novruzun teatr direktorunu müdafiə etməsi Xalq artisti Ramiz Məlikə xoş gəlməyib. Nəticədə mübahisə düşüb. Bu zaman isə əsəblərinə hakim ola bilməyən Ramiz Novruz Ramiz Məliki yumruqlayıb. Nəticədə ikincinin gözünün altı qaralıb və paltarı cırılıb. Bir müddət əvvəl ağır ürək əməliyyatı keçirən Ramiz Məlik aktyorların köməyi ilə Ramiz Novruzun əlindən güclə alınıb. Xəsarət alan Xalq artisti polisə (102) müraciət edib. Bir qədər sonra Xalq artistləri Yasamal Polis İdarəsinin 27-ci Polis Bölməsinə aparılıblar. Məsələni dəqiqləşdirmək üçün aznews.az-ın əməkdaşı hər iki Xalq artisti ilə əlaqə saxlayıb. Məsələ ilə bağlı sualı eşitdikdən sonra Ramiz Məlik telefonu qapadıb. Xalq artisti Ramiz Novruz isə faktı təsdiqləyib. O, belə bir hadisənin olduğunu və buna təssüfləndiyini bildirib. Danişa bilmədiyini deyən Xalq artisti olduğu yerdən polis bölməsinə gedəcəyini vurğulayıb. Qeyd edək ki, yumruqlaşmaq həddinnə gəlib çatmasa da, Xalq artistləri arasında gərginlik bir neçə ay əvvəl də olmuşdu.

23 Avqust 2015 3:54

YPX-nin alay komandirindən növbəti özbaşınalıq

Rəşadət Babayev saxlatdırdığı maşını cərimə meydançasına salıb, sahibindən 500 manat tələb edir Bakı Şəhər Baş Dövlət Yol Polisində sözün həqiqi mənasında özbaşınalıq və yiyəsizlik hökm sürür. Bu idarədə elə rütbə sahibləri var ki, onlar bütün şəhərin «ağası» hesab olunurlar. Onların maşınlarını ötmək, yaxınlıqlarından sürətlə keçəmək qeyri-rəsmi olaraq qadağan edilib. Hətta elə şöbə rəisləri və ya alay komandirləri var ki, onlar üçün qanun yalnız şəxsi istəklərinə işləyir. Onlara kimsənin söz deməsi də hələ müşahidə olunmayıb. Və rəhbərliyə edilən şikayətlərin də heç bir təsiri və nəticəsi yoxdur. DYP-nin YPX-nin alay komandiri Rəşadət Babayev məhz belə «toxunulmaz»lardandır. Onun «kəsdiyi başın sorğusu» aparılmır. Özünü Bakınırn «ağası» hesab edən alay komandininin bir maşını saxlaması üçün isə minlərlə bəhanə var. Ən əsası əmr verib, saxlatdırır, sonra da sübut edə bilməsə də, cərimə edərək buraxır. JAM.AZ-a şikayət edən Masallı sakini Rafil Həsənov bildirib ki, avqustun 19-də 90 XX 055 dövlət nömrə nişanlı «Porşe» markalı avtomobili ilə «İçərişəhər» metrosunun qarşısından hərəkət edərkən 99 YP 330 dövlət nömrə nişanlı maşının ekipajı olan YPX əməkdaşları tərəfindən saxlanılıb. YPX-nin alay komandirinin göstərişi əsasında saxlanıldığı barədə xəbərdarlıq edilən Rafil Həsənova saxlamanın səbəbi kimi, idarə etdiyi «Porşe» markalı maşınınına guya, əlavə qurğuların quraşdırılması gösərilib. Və YPX-nin əməkdaşı rəisin təlimatına əsasən bildiriblər ki, bəs, maşının səsboğucu hissəsindən əlavə səslər gəlir və onların hamısı sonradan quraşdırılmış avadanlıqların yaratdığı problemlərdir. Amma Rafil Həsənov bildirib ki, polisin iddiası əsassızdır. Çünki o, idarə etdiyi avtomobilinə heç bir əlavə qurğu qoşmayıb və bunu təsdiq edən sənədə də malikdir. Belə ki, o, 2014-cü ildə aldığı avtomobilə heç bir əlavə qurğunun və avadanlığın quraşdırılmadığına dair «Porşe»nin Bakı Mərkəzinin polisə təqdim etdiyi sənədi YPX əməkdaşlarına göstərib. Amma bunun Rəşadət Babayevə heç bir təsiri olmayıb. Şikayətçi bildirib ki, Rəşadət Babayev saxlatdırdığı avtomobili məcburi qaydada cərimə meydançasına apartdırıb. Və sürücüəyə bildirib ki, 500 manat gətirməsə, maşını cərimə meydançasından çıxmayacaq. Qeyd edək ki, bu cərimənin hansı məqsədlə istənildiyi məlum deyil. Çünki mövcud qanunvericilikdə 500 manatlıq cərimə yoxdur. Görünür, bu, Rəşadət Babayevin «yazdığı» başqa «qanun kitabın»dakı maddələrə əsasən müəyyən edilmiş məbləğdir. Qarşı tərəfi də dinləməyə hazırıq.

21 Avqust 2015 5:41

Prokuror Xədicə İsmayılovaya 9 il iş istədi

Bu gün Bakı Ağır Cinayətlər Məhkəməsində həbsdə olan jurnalist Xədicə İsmayılovanın cinayət işi üzrə növbəti məhkəmə prosesi keçirilib Virtualaz.org saytının prosesdə iştirak edən müxbirinin verdiyi xəbərə görə, hakim Ramella Allahverdiyevanın sədrlik etdiyi prosesdə dövlət ittihamçısı təqsirləndirilən şəxsə iş istəyib.Prokuror X.İsmayılovanın 9 il müddətinə azadlıqdan məhrum edilməsini istəyib.Məhkəmə prosesi avqustun 26-da davam etdiriləcək.Baş Prokurorluğun mətbuat xidmətinin X.İsmayılovanın həbsi ilə bağlı yaydığı məlumatda bildirilir ki, “Azadlıq” radiosu və “Meydan TV” teleradio şirkətində müxbir vəzifəsində işləmiş Tural Mustafayevin oktyabrın 20-də Dənizkənarı Milli Parkda sink-oksid dərmanı qəbul edərək özünü öldürməyə cəhd etməsi faktına örə Səbayel Rayon Prokurorluğunda Cinayət Məcəlləsinin 125-ci (özünü öldürmə həddinə çatdırma) maddəsi ilə cinayət işi başlanıb.X.İsmayılova jurnalist Tural Mustafayevin şikayəti əsasında saxlanılıb. T.Mustafayevin intihara cəhd etməsi ilə bağlı Səbayel Rayon Prokurorluğunda fakt əsasında Cinayət Məcəlləsinin 125-ci (özünü öldürmə həddinə çatdırma) maddəsi ilə cinayət işi başlanıb və bu ittiham üzrə 5 dekabr, 2014-cü ildə X.İsmayılova barəsində 2 ay müddətinə həbs-qətimkan tədbiri seçilib.Sonradan X.İsmayılovaya qarşı Cinayət Məcəlləsinin 179.3.2 (mənimsəmə və israf etmə - külli miqdarda törədildikdə), 192.2.2 (qanunsuz sahibkarlıq), 213.1 (vergi ödəməkdən yayınma) və 308.2-ci (vəzifə səlahiyyətlərindən sui-istifadə) maddələri ilə yeni ittihamlar elan olunub. Bu ittihamlara görə jurnalisti 12 ilədək həbs gözləyir.

21 Avqust 2015 2:34

İŞİD-ə qoşulan azərbaycanlı ailədən yeni xəbər

İŞİD-ə qoşulan azərbaycanlı ailəsi ilə bağlı heç bir məlumat yoxdur Bu barədə aznews.az-a Şəki şəhər Daşüz bələdiyyəsindən məlumat verilib. Məlumata görə, doqquz ay keçməsinə baxmayaraq Məmmədova Elnurə Beydullah qızı və üç uşağından kənd sakinləri hec bir məlumat ala bilmir. Ailənin başçısı isə yenə də işləmək üçün Rusiyaya gedib.Qeyd edək ki, bu ilin yanvarında Şəki şəhər Daşüz kənd sakini İbrahim Məmmədov bildirmişdi ki, həyat yoldaşı qayınanası - Şaxbanova Qərinə Sədi qızı, bacanağı - Alxasov Daşqın Abid oğlu və baldızı - Alxasova Bahar Beydullah qızı ilə birgə üç uşağını da götürüb Suriyaya gedib. Onlar ötən il dekabrın 23-də Balakən rayonu ərazisindən ölkə sərhəddini keçərək Gürcüstana, oradan isə Türkiyə vasitəsi ilə Suriyaya keçiblər. Bundan əvvəl isə Məmmədova Elnurə Beydullah qızının iki qardaşı Suriyaya gedibmiş.Belə ki, Sahib Şabanov Suriyada döyüşlərdə iştirak edirmiş. Sonradan isə o, öz qardaşları Tahir Şabanovla, Rövşən Şabanovu da özü ilə Suriyaya aparıb. Elnurə Məmmədova gedərkən apardığı böyük qızı - Məmmədova Günay İbrahim qızının 15, kiçik qızı – Məmmədova Ülkər İbrahim qızının 12, oğlu – Məmmədov Rüstəm İbrahim oğlunun isə 13 yaşı olub.Onu da bildirək ki, sayt İbrahim Məmmədovla əlaqə saxlamaq istəsə də, telefonları bağlı olub.

21 Avqust 2015 11:51

İcra başçısı olmaq istəyən rəis əlavə problem istəmir

  Kür-Araz Çaylarında Bəndlərin İstismarı İdarəsinin rəisi Elman Nuriyev idarədə isləyən qohumları və yaxınlarına bildirib ki, çalışan qədər nöqsansız və qüsursuz işləsinlər. Buna səbəb isə Elman Nuriyevin qohumlarının ona arxalanaraq özlərini digər işçilərdən üstün tutmasıdır. Bu hal idarə rəisini çətin duruma qoyub əlavə xərcə salıb, söz-söhbətə yol açıb. İki il əvvəl idarə rəisinin qohumu olan Cavad kənd sakini Zabit Ağayev ona məxsus UAZ markalı avtomaşında qanunsuz dizel yanacağı satarkən Kürdəmir RPŞ-nin polis kapitanı Aqil Kərimov tərəfindən saxlanılmışdır. Zabit Ağayev polisə tabe olmamaq üçün özünü yandırmışdı. Zabit Ağayevin yanacaq satarkən tutulması , özünü yandırması və yüngül yanıq xəsarəti ilə xəstəxanaya yerləşdirilməsi ölkə boyu kütləviləşdi, idarə rəisini çətin vəziyyətə saldı. Hətta, Elman Nuriyevə qohumunun yanacaq satmasına dair deyil, özünü yandırmasına görə ciddi şəkildə irad bildirilmişdir. Bu səbəbdən də idarə rəisi qohumlarına tapşırıb ki, özlərini maksimum səviyyədə nümunəvi aparsınlar. Mənbənin verdiyi məlumata görə, idarə rəisi adının hallanmasını hazırda da istəmir. Çünki, onun müəyyən məqsədi var və o buna nail olmaq istəyir. Faktinfo.az saytı olaraq bir müddət əvvəl Elman Nuriyevin Sabirabad rayon İcra Hakimiyyətinin başçısı olmaq ehtimalını vurğulamışdıq. Hətta onda qeyd etmişdik ki, Elman Nuriyev icra başçısı olmaqla bərabər, həm də Sabirabad rayonunda yerləşən “Meliorasiya və Su Təsərrüfatı” ASC-yə məxsus idarələri nəzarətdə saxlamaq istəyir. Bir il bundan qabaq qeyd etdiyimiz məsələ hazırda da qüvvəsini saxlayır. Çünki, Sabirabadda yerləşən meliorasiya idarəsi rəhbərlərindən  birinin Elman Nuriyevin rayona rəhbərliyinin faydalı  ola biləcəyini vurğulaması zamanında  irəli sürdüyümüz ehtimalları doğruldur. Bu təsadüfi sayıla bilməz və planlaşdırılmış işin tərkib hissəsidir. Hətta, Elman Nuriyev rayonun rəhbəri olacağı halda  yerinə müavini Paşa müəllimin təyin edilə biləcəyi vurğulanır. Məlumat üçün bildirək ki, Kür-Araz Çaylarında Bəndlərin İstismarı İdarəsi kifayət qədər vəsait israfçılığına yol vermiş bir idarə olub. Orada külli-miqdarda dövlət vəsaitinin özününküləşdirilməsi   idarə rəisi üçün çətin olmayıb. Dövlət vəsaiti sahə rəislərinin əli ilə müxtəlif təyinatlı işlərin həyata keçirilməsi zamanı silinib. Mətbuat bunu yazıb, qeyd edib. Bütün bunlar da kifayət qədər imkanı olan Elman Nuriyevin daha yüksək vəzifədə işləməsinə hardasa şərait yaradır. Faktinfo.az

20 Avqust 2015 5:11

Mübariz Ağayev Göyçayın abalaşdırılmasını kimlərə “yükləyib”? 

  Üç məmurdan üst-üstə 600 min manat aldığı iddia olunan icra başçısının həmçinin həmin məmurlara “abadlıq zonaları” ayırdığı bildirilir Göyçayın icra başçısı Mübariz Ağayev bir neçə məmuru çətin vəziyyətə saldığı iddia olunur. Belə ki, icra başçısı rayonun abdlaşdırılması üçün bir neçə məmuru sözün həqiqi mənasında “yüklədiyi” Göyçayda gəzən dedi-qoduların əsasını təşkil edir. Göyçaydan AzMedi.ino-ya daxil olan məlumata görə, Mübariz Ağayevin abadlaşdırılma üçün “yüklədiyi” məmurlar Göyçay təhsil şöbəsinin müdiri Asif Nəbiyev, rayon Mərkəzi Xəstəxanasının baş həkimi Famil Zeynalov və Mədəniyyət və Turizm Şöbəsinin müdiri Sahib Şükürovdur. Qeyd edək ki, bir qayda olaraq büdcə vəsaitlərinini silinməsi üçün bu üç büdcə təşkilatından yararlanırlar. Lakin bu dəfə Göyçay rayon İcra Hakimiyyətin başçısı Mübariz Ağayev bu üç büdcə təşkilatının rəhbərlərini özünə məxsus şəkildə “cəzalandırdığı” qeyd olunur. Daxil olan məlumata görə adını çəkdiyimiz bu üç büdcə təşkilatının rəhbəri uzun müddətdir ki, həmin vəzifələrdə çalışıblar və elə Mübariz müəllim də olmaqla bir neçə icra başçısını yola salıblar. Mənbə qeyd edir ki, Mübariz Ağayev Göyçaya ikinci dəfə icra başçısı təyinatı alanda rayonda söz söhbət gəzirdi ki, icra başçısı hər üç məmurla vidalaşacaq. Çünki Mübariz müəllimin köhnədən bu idarə müdirlərinə acığı qaldığı iddia olunurdu. Yəni əhali güman edirmiş ki, Mübariz müəllim onları çıxardıb başqası ilə əvəz edəcək və həm əvvəlki acığını soyudacaq, həm də bu dəyişiklikdən kifəyət qədər qazanclı çıxacaq. Ancaq rayon camaatının gözləntisinin əksinə olaraq icra başçısı hər üç məmuru yerində saxladı. Mənbə qeyd edir ki, əslində Mübariz Ağayev hər üç məmuru vəzifəsindən çıxartmaq istəyirdi. Lakin sonradan icra başçısı öz fikrini dəyişib və acıqlı olduğu büdcə təşkilatı rəhbərlərini fərqli şəkildə “cəzalandırıb”. Mübariz Ağayev əvvəlcə üç məməurun hərəsindən 200 min manat “xoşgəldin” pulu alıb. Bu pulu aldıqdan sonra isə icra başçısı öz acığını tam olaraq soyutmaq üçün hər üç məmura ayrı-ayrılıqda “abadlıq zonası” ayırıb və onlardan tələb edib ki, avqust ayının sonuna qədər həmin ərazilər abalaşdırılaraq təhvil verilməlidir. Mənbə qeyd edir ki, hər üç məmur ayrı-ayrılıqda “abadlıq zonası”na 150 min manatdan artıq xərc çəksələr də, hələ də işləri yekunlaşdıra bilməyiblər və avqustun axırı yaxınlaşdığı üçün onların vəzifədən alınması haqqında söz-söhbət yenidən Göyçayda əsas deli-qoduya çevrilib. Məndə bildirir ki, Göyçay cammatı yenidən bu söz-söhbətin necə bitməsini maraqla gözləməkdədir. Yazıda adı keçən şəxslərin mövqeyini dərc etməyə hazırıq.

20 Avqust 2015 4:54

Xədicə İsmayılın məhkəmə istintaqı başa çatıb

Bu gün Bakı Ağır Cinayətlər Məhkəməsində Xədicə İsmayılovanın cinayət işi üzrə məhkəmə prosesi keçirilib APA-nın məlumatına görə, hakim Ramella Allahverdiyevanın sədrlik etdiyi prosesdə Bakı Vergilər Departamentinin vergi müfəttişi İmran Nurməmmədov ifadə verib. O, X. İsmayılovanın imzası olan hər hansı sənədin olmadığını, lakin onun büro rəhbəri kimi radioda olan qanun pozuntularına cavabdeh olduğunu deyib.Bakı Vergilər Departamentinin digər vergi müfəttişi Elçin Əliyev də ifadəsində X. İsmayılovanın Xarici İşlər Nazirliyində xarici jurnalist kimi akkreditasiyadan keçməyərək fəaliyyət göstərdiyini, bununla da qanun pozuntusuna yol verdiyini bildirib.E. Əliyev eyni zamanda radionun ofisində “Fəqrli düşüncə” jurnalının redaksiyasının fəaliyyət göstərdiyinin aşkarlandığın da qeyd edib. Müfəttiş X. İsmayılovanın bunu təkzib etdiyini, belə bir hal olmaması haqda ifadə verdiyini açıqlayıb.X. İsmayılovanın vəkili Fariz Namazlı cinayət işi üzrə tərtib olunan aralıq aktının verilmiş ekspertiza rəyinin sübutlar siyahısından çıxarılması barədə vəsatət qaldırıb.Məhkəmə vəsatəti təmin etməyib, buna yekunda qiymət veriləcəyi bildirilib. Daha sonra məhkəmə istintaqının başa çatması barədə qərar qəbul olunub. Çıxış üçün söz dövlət ittihamçısına verilib. Prokuror məhkəmədən sabahadək vaxt istəyib. Proses sabah davam etdiriləcək.Qeyd edək ki, Baş Prokurorluğun yaydığı məlumata görə, “Azadlıq Radiosu” və “Meydan" TV teleradio şirkətində müxbir vəzifəsində işləmiş Tural Mustafayevin özünü öldürməyə cəhd etməsi faktına görə Səbail Rayon Prokurorluğunda Cinayət Məcəlləsinin 125-ci (özünü öldürmə həddinə çatdırma) maddəsi ilə cinayət işi başlanıb.T. Mustafayev Baş Prokurorluğa müraciət edərək, “Azadlıq Radiosu”nun Bakı ofisində jurnalist işləyən və onunla uzun müddət yaxın münasibətlərdə olmuş İsmayılova Xədicə Rövşən qızı tərəfindən ona qarşı təzyiq və təqiblər edilməsi, mütəmadi olaraq şərəf və ləyaqətinin alçaldıldığına görə özünü öldürmə həddinə çatdırılması ilə əlaqədar barəsində müvafiq tədbirlərin görülməsini istəyib.Səbail Rayon Məhkəməsinin 5 dekabr tarixli qərarı ilə X. İsmayılova barəsində 2 ay müddətinə həbs qətimkan tədbiri seçilib. Həmin müddət bir neçə dəfə uzadılıb.Daha sonra Xədicə İsmayılovaya qarşı yeni ittihamlar irəli sürülüb. O, Cinayət Məcəlləsinin 179.3.2-ci (mənimsəmə və israf etmə- külli miqdarda törədildikdə), 192.2.2 (qanunsuz sahibkarlıq), 213.1(vergi ödəməkdən yayınma) və 308.2-ci (vəzifə səlahiyyətlərindən sui-istifadə) maddələri üzrə də təqsirləndirilir.

20 Avqust 2015 3:41

Göygölü zibilləyənlər cərimədən yayına bilməyəcəklər

Ötən gün Göygöl Milli Parkının ərazisi bir neçə saatlığa turistlərin üzünə bağlı olub Ans Tv-nin Gəncə bürosunun məlumatına görə, buna milli park ərazisini turistlərin çirkləndirməsi səbəb olub. Göygöl Milli Parkının ərazisinə girişdə olan məhdudiyyət çox qısa zamandır ki, aradan qaldırılsa da, bəzi bura gələn turistlər və sakinlər təbiətə laqeyd münasibət göstərərək ətrafı zibilləməyə cəhd göstərirlər. Lakin belə turistlərə qarşı çox ciddi cəza tədbirləri nəzərdə tutulur. Belə ki, fiziki şəxslər ətrafı zibillədikdə onlar 800 manat miqdarında cərimələnə bilərlər. Meşə zolağında və göl ərazisinə atılan tullantıları təmizləmək üçün əraziyə parkın işçilərilə yanaşı, bir neçə qoruğun əməkdaşları da cəlb olunublar. 12 min hektardan çox olan ərazinin istifadə olunan 5 kilometr ərazidə təmizlik işləri aparıldı. Bundan sonra isə hərəsi 100 kiloqram tutumlu olmaqla raziyə 40 ədəd zibil qabları yerləşdirilib. Parkın direktoru deyir ki, gələn vətəndaşlara polietilen torbalar da təklif olunur ki, tullantıları bura yığsınlar. Lakin qaydalara əməl etməyənlər üçün cəzalar sərt olacaq. "Bu kimi halların qarşısını almaq məqsədilə vətəndaşlardan sənədlərin təqdim etməsini tələb edirik. Çox zaman vətəndaşlar sənədlərini təqdim etməkdən imtina edirlər. Bu zaman isə biz onların avtomobillərinin dövlət nömrə nişanlarının qeydiyyatını aparıb polisə müraciət edirik. Polisin köməyi ilə onların şəxsiyyəti müəyyənləşdirilir. Müəyyənləşdirildikdən sonra vətəndaşa qarşı cərimə tətbiq olunur", - deyə Göygöl Milli Parkının direktoru Xaliq İsgəndərov bildiib. Əksər turistlər də ətrafı zibilləyənlərə qarşı sərt mövqedədirlər. Onlar təbii sərvətin qorunmasının tərəfdarıdırlar. "Göygöl Milli Parkının təkrar olaraq insanların xidmətinə verilməsini alqışlayıram. Ərazini tullantılarla zibilləmək isə düzgün deyil. Hesab edirəm ki, ərazini təmiz saxlamaq lazımdır", - deyə turist Elsəvər Əhmədov qeyd edib. Bununla belə park ərazindəki mövcud qaydalara əməl etməyən şəxslərin qara siyahısı tərtib olunacaq və bu şəxslər Göygölə buraxılmayacaq. Hazırda isə Göygölə giriş bilet əsasında sərbəst həyata keçirilir.

20 Avqust 2015 11:10

Generalın adam bıçaqlayan oğlunu azadlığa buraxdılar

Bu gün Bakı Ağır Cinayətlər Məhkəməsində DİN-in İnsan Alverinə Qarşı Mübarizə İdarəsinin rəisi, general-mayor Şərif Əsədullayevin oğlu Tamerlan Əsədullayevin işi üzrə məhkəmə prosesi keçirilib. Virtualaz.org saytının əldə etdiyi xəbərə görə, prosesə hakim Azad Məcidov sədrlik edib. Prosesdə hökm oxunub. Hökmə görə, CM-in 126.3-cü maddəsi ilə ittiham olunan Tamerlan Əsədullayev barəsində 3 il şərti cəza təyin olunub və o, məhkəmə zalından azadlığa buraxılıb. Xatırladaq ki, T.Əsədullayev Bakının Yasamal rayonunda, Nəriman Nərimanovun heykəli yaxınlığındakı “Senator” restoranında dava-dalaş salmaqda və həmin insident zamanı bir nəfəri bıçaqlamaqda ittiham olunurdu. Həmin qanlı dava aprelin 10-da bir neçə nəfərin iştirakı ilə baş vermiş, bu zaman bir nəfər bıçaqlanmışdı. Davanın iştirakçılarından biri general-mayor Şərif Əsədullayevin oğlu Tamerlan Əsədullayev idi. O, hadisə yerindən qaçıb gizlənmiş, dava ilə bağlı Yasamal Rayon Polis İdarəsi 26-cı polis bölməsində təhqiqat başlanmışdı. Həmin vaxt yayılan xəbərə görə, hadisədən xəbər tutan general çox qəzəblənmiş, oğlunu taparaq əvvəlcə özü tənbeh etmiş, daha sonra onu polisə təhvil vermiş və barəsində həbs-qətimkan tədbiri seçilməsində israr etmişdi. Növbətçi məhkəmənin qərarı ilə generalın oğlu barədə 4 aylıq həbs-qətimkan tədbiri seçilmişdi. Bu, general Əsədullayevin oğlunun adı qarışan ilk qalmaqal deyildi. Ötən ilin may ayında Bakıda Tamerlan Əsədullayev və dostları polisləri döydüyünüə görə gündəmə gəlmişdi. Belə ki, Bakıda, “Qış parkı”nın yaxınlığında gecə saat 04 radələrində növbə çəkən post patrul polisləri sərxoş vəziyyətdə olan T.Əsədullayevin bir qadını döydüyünü görərək onu saxlamağa cəhd etmişdilər. Lakin generalın oğlu onlara tabe olmamış, polisləri söymüş və onları vuraraq hadisə yerindən uzaqlaşmışdı. Daha sonra yenidən geri qayıdan Tamerlan Əsədullayev polis əməkdaşlarını növbəti dəfə təhqir etmişdi. Polislər isə hadisə yerinə Post Patrul Xidməti əməkdaşlarını çağırmaq məcburiyyətində qalmış və köməyə gələn polislərin yardımı ilə Tamerlan Əsədullayevi çətinliklə də olsa 27-ci polis bölməsinə aparmışdılar. Bölməyə çatan kimi qardaşına zəng edən Tamerlan Əsədullayev ondan kömək istəmiş və bir neçə dəqiqə sonra idmançılarla birgə polis idarəsinə gələn qardaşı polis əməkdaşlarını təhqir etməyə, döyməyə başlamışdı. Mətbuat yazmışdı ki, bu zaman döyülən polislərdən biri ağır xəsarət alıb. Hadisə ilə bağlı araşdırma başladılsa da iki gün sonra dayandırılıb. Belə görünür ki, generalın oğlunun növbəti dəfə bir nəfərin bıçaqlanması ilə müşayiət olunan davaya qarışması onun atasını boğaza yığıb və Əsədullayev oğlunu həbs etdirməkdən başqa yol görməyib. Xatırladaq ki, general Şərif Əsədullayev Qafqaz Müsəlmanları İdarəsinin rəisi Şeyxülislam Hacı Allahşükür Paşazadənin bacısının həyat yoldaşıdır. Virtualaz.org    

19 Avqust 2015 5:02

«Qaçqınkom» hansı məmurlara ev verib? – Siyahı

Siyahıda Ağdam icra başçısının müavininin, musiqi kollecinin və baş həkimin də adı var Azərbaycanda qaçqın və məcburi köçkünlər üçün evlərin tikilməsi uzunillərdir davam etsə də, narazılıq səngimək bilmir. Ötən günlərdə Bərdədə keçirilən ard-arda iki aksiya da təsdiq etdi ki, prosesi həyata keçirən «Qaçqınkom»u məcburi köçkünlər deyil, şəxsi mənafeləri maraqlandırır. JAM.AZ-ın apardığı araşdırma zamanı məlum olub ki, «Qaçqınkom» məcburi köçkünləri deyil, elə yerli məmurları düşünür. Bunu təsdiq edən faktlar isə yetərli qədərdir. Bildirək ki, «Qaçqınkom»un mənzil peşkəş etdiyi məmurlardan biri Ağdam rayon İcra Hakimiyyəti başçısının müavini Arzu Rəhimovadır. JAM.AZ-ın dəqiqləşdirmələrinə görə, xanım Rəhimovanın Bakıda, Bərdədə evləri olduğu halda, «Qaçqınkom» ona yeni tikilən qəsəbədə daha bir mənzil hədiyyə edib. Və bu da belə əsaslandırılıb ki, guya, qaçqınlıq həyatı yaşayan icra başçısının müavininin evə ehtiyacı var. Amma Əli Həsənovun mənzil peşkəş etdiyi məmurların sayı heç də Arzu Rəhimovayla məhdudlaşmır. JAM.AZ-ın araşdırmasına əsasən məlum olub ki, Ağdamda yüksək vəzifədə çalışan Hafiz Əzizadə də komitə sədrindən mənzil alıb. Bu məmurun da Bakıda və Bərdədə bir neçə evi var və başqalarının işlətməsinə verdiyi obyektləri mövcuddur. Və bunun üzərindən «imkansız» məmura daha bir ev də verilib. Bir başqa mənzil sahibi olmuş şəxs Ağdam Musiqi Kollecinin direktoru Laura Ağayevadır. Bakıda və Bərdədə evləri olan Laura xanımın Ağdamdakı Təzə Qəsəbədə də mənzil sahibi olması hamını təəccübləndirib. Çünki direktorun olmayan bir şeyi yoxdur. Ağdam Uşaq Xəstəxanasının həkimi Həqiqət Süleymanova da «ehtiyac içində» yaşayanlar kateqoriyasına şamil edilib. JAM.AZ-ın əldə etdiyi məlumata görə, baş həkim Bərdə və Bakıda mənzillərə sahibdir. İmkanları da xeyli çoxdur. Amma o da digər məmurlar kimi, Əli Həsənovun mənzili ilə «təltif» olunub və ona Təzə Qəsəbədə yeni ev verilib. Araşdırmamız davam edir.

19 Avqust 2015 4:56

Azərbaycanlı Çarli Çaplin amerikalıları yenidən ayağa qaldırdı

America's Got Talent şousunda çıxışını davam etdirən Üzeyir Novruzov təhlükəli nömrə ilə yadda qalıb ABŞ-da yayımlanan ən məşhur şoulardan biri olan America's Got Talent-da çıxışını davam etdirən azərbaycanlı Üzeyir Novruzov bu gün növbəti dəfə səhnəyə çıxıb. Azərbaycanlı Çarlin Çaplin kimi tanınan Üzeyir bu dəfə də izləyiciləri heyrətləndirərək onların böyük rəğbətini qazana bilib. Belə ki, o, şouda indiyədək heç zaman səhnədə nümayiş etdirmədiyin nömrə ilə çıxış edib. Heç bir təhlükəsizlik tədbiri görülmədən təhlükəli hündürlükdə olan nərdivanın ən yuxarı pilləsində ayaq üstə dayanaraq izləyicilərə həyacan dolu anlar yaşadıb. Bu nömrəni daha da həyacanlı edən şounun canlı yayımlanması olub. Nyu-York şəhərinə ezam olunan əməkdaşımız Emil Quliyev də məşhur Radio City Music Hall-da keçirilən şounu canlı izləyib. Əməkdaşımızın verdiyi məlumata görə, həm münsiflər heyəti, həm də auditoriya Üzeyir Novruzovu ayaq üstə alqışlayıb. Çıxışa münasibət bildirən münsiflər heyətindən Hovard Stern Üzeyirin çıxışını izlərkən özünü Olimpiya Oyundan hiss etdiyini bildirib. O daha sonra televiziya tamaşaçılarını Üzeyirə səs verməyə çağırıb. Nəzərinizə çatdıraq ki, artıq şounun bu mərhələsində növbəti şouya vəsiqə qazanacaq iştirakçıları münsiflər heyəti deyil, amerikalılar verdiyi səslər müəyyən edir. Üzeyir Novruzovla müsahibəni qarşıdakı günlərdə Amerikanın Səsində izləyə bilərsiniz. (amerikaninsesi.org)

19 Avqust 2015 11:42

Zakir Həsənov vətəndaşların qəbulu haqda yeni əmr verdi

Müdafiə naziri, general-polkovnik Zakir Həsənovun əmrinə əsasən, nazirliyin fəaliyyəti ilə bağlı daxil olan ərizə və şikayətlərə baxmaq, müəyyən olunmuş qaydada tədbirlər görmək, habelə vətəndaşların qəbul edilməsi işinin səmərəli təşkili məqsədilə qəbul qaydalarında bəzi dəyişikliklər edilib. Virtualaz.org Müdafiə Nazirliyinin saytına istinadən bildirir ki, hərbi qulluqçuların və digər vətəndaşların müraciətlərinə diqqət və qayğının artırılması məqsədilə Müdafiə Nazirliyində rəhbər vəzifəli şəxslərin qəbul günləri müəyyən olunub. Əmrə əsasən Silahlı Qüvvələr və Qoşun növləri komandanları, nazirliyin baş idarə, idarə, müstəqil şöbə, xidmət rəisləri, birlik, birləşmə və əlahiddə hərbi hissə (gəmi) komandirləri və digər müəssisə rəisləri də müəyyən edilmiş vaxtlarda vətəndaşları qəbul etməli və müraciətlərə baxmalıdırlar. Nazirliyin rəhbər vəzifəli şəxsləri tərəfindən vətəndaşların qəbulu müəyyən olunmuş günlərdə saat 16.00-dan 18.00-dək Müdafiə Nazirliyinin Həzi Aslanov adına Mərkəzi Zabitlər Evində və digər yerlərdə həyata keçiriləcək. Hərbi qulluqçuların və digər vətəndaşların qəbulu barədə daha ətraflı məlumatı Müdafiə Nazirliyinin rəsmi internet səhifəsinin "Azərbaycan Respublikası Müdafiə Nazirliyində rəhbər vəzifəli şəxslər tərəfindən vətəndaşların qəbul günləri" bölməsindən əldə etmək olar.

18 Avqust 2015 1:57

Bakıda körpələr üçün satılan şirədən şüşə qırıntısı çıxdı

Azərbaycanda satılan bir sıra ərzaq məhsulları tələblərə cavab vermir. Bunu çərşənbə axşamı Trend-in Mətbuat Mərkəzində jurnalistlər üçün keçirilən brifinqdə Azad İstehlakçılar Birliyinin sədri Eyyub Hüseynov deyib. Onun sözlərinə görə, qurumun apardığı araşdırmalar zamanı Azərbaycanda satılan bitki yağlarının qida normalarına cavab vermədiyi aşkarlanıb. Qurum bunun üçün aidiyyatı qurumlara müraciət edib deyən E.Hüseynov insanları bu yağları almamağa çağırıb: “Bizim araşdırmalarımız zamanı “Zolotoya Semeçka” markası adı altında satılan yağlarda turşuluğun normadan artıq olduğu aşkarladıq. Bununla yanaşı Abşeron rayonu, Məhəmmədi kəndində yerləşən “Fazil” firması tərəfindən istehsal olunan yağların üzərində 40 faiz kərə yağı yazılmasına baxmayaraq, sözügedən məhsulda ümumiyyətlə kərə yağının olmadığı aşkarlnaıb. Bu isə təbii ki, alıcıların faktiki aldadılmasıdır. Bununla bağlı aidiyyatı qurumlar hərəkətə keçməli və sözügedən şirkət məsuliyyətə cəlb olunmalıdır”. Bakıda körpələr üçün satılan “Helier” şirəsinin qutusundan şüşə qırıntısının aşkarlandığını bidlirən qurum rəhbəri qeyd etdi ki, dünya təcrübəsində belə bir hal olanda həmin məhsulun partiyası zavoda geri qaytarılır. E.Hüseynov qeyd etdi ki, sözügedən məhsulu Azərbaycana gətirən şirkətin rəhbərliyi ilə görüşsə də, həmin şirələr hələ də ölkəmizə idxal olunur: “Belə hallar çoxdur. Məsələn bir sıra rayonlarımızda sanitar normalara cavab verməyən sexlərdə düşes şirələri istehsal olunaraq satışa çıxarılır. Bununla yanaşı bəzi sexlər gecə saatlarında gizli yollarla məhsul istehsal edərək ucuz qiymətlə satışa çıxarır. Biz bununla bağlı aidiyyatı qurumlara müraciət eləmişik. Ümid edirik ki, yaxın vaxtlarda bu faktlar araşdırılacaq və lazımi tədbirlər görüləcək”.

18 Avqust 2015 1:39

Bakıda taksi üsyanı baş verə bilər

Taksi sürücüləri Nəqliyyat Nazirliyinin qadağasına etiraz edir Xəbər verildiyi kimi Nəqliyyat Nazirliyi Bakının bəzi yerlərində özəl taksilərin fəaliyyətinə qadağalar qoyub. Nazirlik vətəndaşların şəxsi nəqliyyatdan taksi xidmətləri göstərməsinin qadağan edildiyi 14 yer müəyyən edib. Həmin zonalar bunlardır: “Həzi Aslanov”, “28 May”, “Xalqlar dostluğu”, “Gənclik”, “Xətai”, “Azadlıq prospekti”, “Içərişəhər”, “Sahil”, “Neftçilər”, “Əhmədli”, “Qara Qarayev”, “Koroğlu”, “20 yanvar” metro stansiyaları, həmçinin “Beşmərtəbə” və “Qış bulvarı” parklarının yanı. Bu məkanlarda yalnız “London taksiləri” işləyə bilər. Artıq Nəqliyyat Nazirliyinin əməkdaşları taksi sürücülərini xəbərdar ediblər. Məlumatlara görə, demək olar ki, hər gün nazirliyin işçiləri reyd keçirir. Bunu taksi sürücüləri təsdiqləyir. Əvvəllər 28 May metrostansiyasının yaxınlığında taksi fəaliyyəti ilə məşğul olan Tahir Məmmədov AzadlıqRadiosuna bildirib ki, Nəqliyyat Nazirliyindən onlara xəbərdarlıq ediblər: “Bir-iki gün əvvəl nəqliyyatdan (Nəqliyyat Nazirliyini nəzərdə tutur-red.) gəlmişdilər, dedilər ”gələn həftədən metronun qarşısında dayanmaq yoxdur", söz-söhbət olmasın deyə mən də daha orda dayanmıram". 61 yaşlı Məhəmməd Kərimov isə bildirib: “Orda dayanma, burda dayanma, onda desinlər ki, ”öl acından". Gör mən nə vəziyyətdəyəm ki, 88 yaşlı anam pensiyasının 100 manatını mənə verdi ki, get təkər al. Gündə 10-15 manat güclə qazanıram. 20 manat olanda sevinirəm, onun da tən yarısı benzinə gedir. Bəyəm biz ağ günümüzdən taksiçilik edirik" Ən aşağı işdir bu. Planı zorla verirəm, hər şeyini özüm eləyirəm. Indi də bu qadağa. Hələ bura metronun ağzıdır, müştəri zorla tapırsan, qıraqda neyləyəcəyəm?" 20 Yanvar metrostansiyasının yaxınlığında taksi fəaliyyətilə məşğul olan Kərim Əvəzov da deyib ki, qadağalarla bağlı onları xəbərdar ediblər: “Ancaq hələ bir-iki gün var. Işləməliyəm. Sonra Allah Kərimdir. Yəqin dayanmağa bir yer taparıq” deyib yaxınlıqdakı müştərini az qala zorla maşına oturdur. Bir-iki gündür Xətai metrosunun yanında müştəri gözlədiyini deyən London taksilərindən birinin sürücüsü Hacıbaba Rəhimov isə onların da müştərisinin çox olmadığını bildirib: “Nə deyim, çörəyi yetirən Allahdır. Guya bizim maşına müştəri belə çox minir ki. Elə belə baxanda yenə onların müştərisi çoxdur. Çünki müştəri ilə sürücü danışır, ikisini də qane edən bir qiymətdə razılığa gəlirlər. Ancaq bizdə elə deyil, sayğac nə yazdı, müştəri onu ödəməlidir. Deyim ki, bu maşınlar bir yaxına, bir də uzağa gedənlərə sərf eləyir. Görək nə olur”. Avqustun 17-dən küçələrdə Nəqliyyat Nazirliyinin daha çox əməkdaşına rast gəlinir. Nazirliyin xətt nəzarətçisi Rafiq Əliyev söyləyib ki, ayın axırı London taksilərindən başqa digər taksilərə metroların qarşısında dayanmağa icazə verməyəcəklər: “Ayın axırından qərar qüvvəyə minəcək. Metronun qarşısında ancaq təzə London taksiləri fəalyyət götərəcək. Digərlərinə icazə verilməyəcək. Bu, həm də şəhərin gözəlləşdirilməsi üçündür”. Nəqliyyatçıların Hüquqi Problemlərinin Həllinə Yardım birliyinin sədri Məzahir Rüstəmovun sözlərinə görə, taksi sürücüsünün lisenziyası varsa, ona harda dayanmaqla bağlı qadağa qoymaq doğru deyil: “Bu, həmin sürücünün hüququnun pozulmasıdır. Düzdür, taksi parkları olmalıdır, taksilər həmin parklara yığışmalıdır. Ancaq bizdə iri taksi parkları yoxdur. Olan parkların da imkanları aşağıdır”. Ekspert deyib ki, taksi fəaliyyəti ilə bağlı reallıqları da nəzərə almaq lazımdır. Hansısa qadağalarla neçə illik problemi bir neçə günə həll etmək olmaz. Məlumat üçün deyək ki, Bakıda şəxsi avtomobili ilə taksi xidməti göstərən minlərlə vətəndaş var. Nəqliyyat Nazirliyinin bu qadağası əslində həmin insanları çörəksiz qoymaqdır. Bəzi ekspertlər hesab edir ki, indiki ağır iqtisadi durumda belə bir qadağanın tətbiqi taksi üsyanına səbəb ola bilər.

18 Avqust 2015 8:59

Ölkə vətəndaşları kredit bataqlığında

Yarıtmaz siyasət əhalini necə müflisləşdirir? Artıq elə bir mərhələ yetişib ki, ehtimallar irəli sürməyə, proqnozlar verməyə ehtiyac qalmayıb. Çünki, Azərbaycandakı indiki və gələcək vəziyyəti dəqiq qiymətləndirmək mümkündür. Təkcə statistik rəqəmlərin müqayisəsi kifayət edir ki, ölkənin hansı sürətlə uçuruma getdiyini dərk edəsən. Heç kimə sirr deyil ki, Azərbaycan hakimiyyəti uzun illər neft pulları hesabına çatışmazlıqları gizlədə bilib və süni inkişaf mənzərəsi yaradıb. Indi isə neft pulları ilə fironluq etmək dövrü arxada qalıb. Çünki, indi neftin bareli 140 dollar yox, 50 dollardı. Daha yırtıq-yamağı örtmək üçün “örtük” kifayət eləmir. Onu da qeyd edək orta aylıq əmək haqqının 457 manat olması da neft pullarının hesabına müəyyənləşib. Azərbaycan vətəndaşının aldığı əməkhaqqı heç vaxt əlavə dəyər yaratmayıb. Vətəndaş ən zəruri ehtiyaclarını kredit hesabına ödəyib. Yəni, insanların avtomobil, mənzil, soyuducu, telefon alması qazandığı pul hesabına olmayıb. Uzun və ya qısa müddətli kredit borcunun altına girməklə insanlar zəruri ehtiyaclarını ödəyib. Məsələ burasındadır ki, indi əvvəlki imkanlar da tükənir və kütləvi yoxsullaşma prosesi gedir. Yəni, hakimiyyətin uzun illər boyu süni göl yaradıb və bunu dəniz kimi qələmə verib. Indi isə bu gölə “su” axmır və quruma baş verir. 2015-ci ilin I yarısında Azərbaycan bankları istehlak kreditinin həcmini ötən ilin analoji dövrünün göstəricisi ilə müqayisədə 15,6 faiz artırıb. Bu barədə Azərbaycan Mərkəzi Bankının (AMB) yanvar-iyun aylarının yekunlarına həsr olunmuş hesabatında deyilir. Hesabata əsasən, istehlak kreditlərinin bankların kredit qoyuluşlarının ümumi həcmində payı 38,9 faiz və ya 7,88 milyard manat təşkil edib. Müqayisə üçün deyək ki, ötən ilin yanvar-iyun aylarında istehlakçı kreditlərinin payı 40,7 faiz və ya 6,8 milyard manat təşkil edib. Bankların ümumi kredit portfelində xüsusi çəkisinə görə, ikinci yerdə ticarət və xidmət sahəsi (14,2 faiz və ya 2,89 milyard manat), üçüncü yerdə tikinti və daşınmaz əmlak sektoru (13,8 faiz və ya 2,79 milyard manat) gəlir. Hesabat dövründə Azərbaycan iqtisadiyyatının real sektorunun kreditləşməsinin ümumi həcminin 10,7 faizi və ya 2,17 milyard manatı sənaye və istehsal sahəsinə yönəldilib. Bu dövrdə nəqliyyat və rabitə sahəsinin payına 4,4 faiz və ya 894,9 milyon manat, kənd təsərrüfatı və təkrar emal sahəsinə 4,6 faiz və ya 937,9 milyon manat, energetika, kimya və təbii resurslara 1,4 faiz və ya 280,2 milyon manat düşüb.ÿ Göründüyü kimi əhali sürətlə borclanmaya gedir və bütün sahələrdə bu neqativ tendensiya müşahidə olunur. Ticarətlə məşğul olan da, daşınmaz əmlak alan da, təhsil haqqını ödəyən də banklardan asılı vəziyyətdə qalıb Başqa bir məqam bundan ibarətdir ki, Azərbaycanı düşdüyü çətin vəziyyətdən kənd təsərrüfatının hesabına xilas etmək olar. Ekspertlər də hesab edir ki, kənd təsərrüfatının inkişafı həm əlavə dəyər yarada bilər, həm də iqtisadiyyatın şaxələnməsini təmin edər. Amma statistik rəqəmlər də göstərir ki, kənd təsərrüfatının kreditləşməsini ümumi həcmi 1 milyarda da çatmır. Onu qeyd etmək yerinə düşər ki, Azərbaycanın neftsiz ixracatı 1.8 milyard təşkil edir. Gürcüstanda bu rəqəm 3 milyard, Ermənistanda isə 1.4 milyard təşkil edir. Aparılan yarıtmaz siyasət sayəsində böyük potensiala malik olan Azərbaycanın neftsiz ixracatı təxminən Ermənistanla eyniləşib. Belə bir vəziyyətdə utanmadan inkişafdan, hakimiyyətin uğurlu siyasətindən söhbət açılır. Ölkəyə 10 il ərazində 100 milyardan artıq neft pulları daxil olsa da, 2.5 milyon vətəndaş kredit girovluğundadır. Bir daha aydın olur ki, Azərbaycan hakimiyyəti iqtisadiyyatın real inkişafı üçün heç bir addım atmayıb. Ölkəni taleyi neftdən asılı vəziyyətə salınıb ki, bu da öz fəsadlarını verməkdədir.

18 Avqust 2015 8:57

Binəqədidə yanan binanın sakinlərinə məişət əşyalarının verilməyəcəyi açıqlanıb

Abid Şərifov sakinlərlə görüşüb Binəqədi Rayon İcra Hakimiyyətinin inzibati binasında Azadlıq prospekti 200/36 ünvanında yerləşən çoxmərtəbəli binada yanğınla əlaqədar yaradılan Dövlət Komissiyasının üzvləri bina sakinləri ilə görüşüb. Bu barədə "Report"a görüşdə iştirak edən sakinlərdən biri məlumat verib. Görüşdə baş nazirin müavini, Dövlət Komissiyasının sədri Abid Şərifov, Binəqədi Rayon İcra Hakimiyyətinin (RİH) başçısı Xaləddin İsgəndərov, RİH-in Ərazi idarəetmə və yerli özünüidarəetmə orqanları ilə iş şöbəsinin müdiri Ramiz Göyüşov və digər rəsmilər iştirak edib. Sakin həmçinin qeyd edib ki, mənzilindəki bütün əşyaları yanan vətəndaşlardan biri dövlətin onun daşınar əmlakı üçün ödəniş edib-etməyəcəyini soruşub: "Abid Şərifov cavab verdi ki, hesabınıza 20 min manat ilkin ödəniş köçürülüb, həmin pulla alarsız. Amma bu ilkin ödəniş bizə psixoloji, mənəvi dəyən ziyana görə ödənilib. Biz hələ də özümüzə gəlməmişik. İlkin ödənilən pul çoxdan xərclənib. Kreditlərimizi ödədik, müalicələrimizə xərclədik, yeməyimiz, geyimimiz, dərmanımızı bu müddət ərzində həmin pullarla ödədik. İndi də bizə deyirlər ki, sizə televizor, soyuducu, kondisoner verməyəcəyik. Televizorda baxırıq, deyirlər ki, hər şeyi verəcəyik".

17 Avqust 2015 3:35

Fakt

Bizi izləyin