Vidadi Zeynalovun vəkili jurnalistləri təhqir edib

Bu gün Bakı Ağır Cinayətlər Məhkəməsində Rabitə və Yüksək Texnologiyalar Nazirliyinin sabiq Aparat rəhbəri Vidadi Zeynalov və digərlərinin cinayət işi üzrə məhkəmə prosesi davam etdirilir. APA-nın məlumatına görə, hakim Əfqan Hacıyevin sədrliyi ilə keçirilən iclas başlamazdan əvvəl zala daxil olan Vidadi Zeynalovun vəkili Elxan Süleymanov jurnalistlərə hücum çəkib. O, istintaq materiallarını dərc edən KİV nümayəndələrini "əxlaqsız", "şərəfsiz" sözləri ilə təhqir edib. Buna görə onunla jurnalistlər arasında qarşıdurma yaşanıb. V. Zeynalovun və digərlərinin zaldakı qohumları da jurnalistlərin ünvanına təhqirlər səsləndiriblər. Qeyd edək ki, Bakı Telefon Rabitəsi İstehsalat Birliyinin baş direktoru Beytulla Hüseynovun 2009-2015-ci illərdə arvadının təsisçisi olduğu “Bakı Rabitə Təmir Tikinti” və “Təmir Təchizat Servis” MMC-lərinin direktoru Bayram Vəliyev, yaxın münasibətlərdə olduğu “3 nömrəli Rabitə Təmir Tikinti”, “Rabitə Mülki Tikinti” MMC-lərinin direktoru Emin Məmmədov və birliyin baş mühasibi Anar Mustafayevlə qabaqcadan əlbir olub yeni rabitə xətlərinin çəkilməsi, binaların, qurğuların təmiri-tikintisi və sair işlərin yerinə yetirilməsi üçün onların hesablaşma hesablarına köçürüləcək pul vəsaitlərinin işlərin həcmindən asılı olaraq 35-45% həcmində hissəsinin nağdlaşdırılaraq B. Hüseynovun özünə verilməsi barədə razılığa gəliblər. B. Hüseynov tabeliyində olan qovşaqların formal olaraq keçirdikləri tenderlərdə vəzifə saxtakarlığı ilə həmin məhdud məsuliyyətli cəmiyyətlərin qalib elan olunaraq müqavilələr bağlanmaqla və faktiki işlərin tam icra olunmadığı halda, o cümlədən internet xidmətinin təmin edilməsi üçün fiber-optik kabel xətlərinin çəkilişi zamanı işlərin faktiki olaraq telefon qovşaqları tərəfindən aparıldığı halda guya həmin işlərin faktiki özünə məxsus olan müəssisələr tərəfindən görülməsi və işlərin həcminin artırılması barədə saxta sənədlərin tərtib edilməsi yolu ilə adıçəkilən MMC-lərin hesabına köçürülmüş ümumilikdə 71 milyon 263 min manat məbləğində vəsaitin 21 milyon 379 min manatını mənimsəməklə dövlətin qanunla qorunan mənafelərinə ağır nəticələrə səbəb olan zərər vurmalarında şübhələr üçün əsaslar müəyyənləşib. Nazirliyin Aparat rəhbəri Vidadi Zeynalov qulluq mövqeyindən sui-istifadə edərək nazirliyin strukturuna daxil olan ayrı-ayrı qurumların vəzifəli şəxsləri ilə qabaqcadan razılaşmaqla həmin strukturlar tərəfindən işlərin görülmədiyi, tam yerinə yetirilmədiyi, avadanlıqlar alınmadığı, istifadə olunan avadanlıqların, xidmətlərin qiymətlərinin isə 4-5 qat şişirdilməsi və digər üsullarla işlərin və xidmətlərin guya yerinə yetirilməsini özlərinin himayə etdikləri, yaxın münasibətdə olduqları şəxslərin adına olan özəl şirkətlər tərəfindən saxta sənədlər əsasında rəsmiləşdirməsini təmin etməklə müvafiq müəssisələrin ayrı-ayrı banklardakı hesabına köçürülmüş 73 milyon 590 min manat vəsaitin nağdlaşdırılmaqla mənimsənilməsini və israf edilməsini təşkil etməsində şübhələr üçün əsaslar müəyyənləşib. Cinayət işi üzrə nazirliyin strukturuna daxil olan “Aztelekom” MMC, “AzİnTelekom” MMC, “Azərpoçt” MMC, Məlumat Hesablama Mərkəzi və özəl şirkət “Optik Rabitə Tikinti və Quraşdırma” MMC-nin fəaliyyətində də mənimsəmə və israf etmə, vəzifə səlahiyyətlərindən sui-istifadə və vəzifə saxtakarlığı faktları müəyyənləşib. İş üzrə Beytulla Hüseynov, Anar Mustafayev, Emin Məmmədov, Bayram Vəliyevə və “Aztelekom” MMC-nin baş mühasibi Oktay Rüstəmova Cinayət Məcəlləsinin 179.3.2 (külli miqdarda mənimsəmə), 308.2 (vəzifə səlahiyyətlərindən sui-istifadə) və 313-cü (vəzifə saxtakarlığı), Vidadi Zeynalova, həmçinin “AzİnTelekom” MMC-nin baş direktoru Cəlil Cəfərova, “Azərpoçt” MMC-nin baş direktoru Qəmbər Bəybalayevə və “Optik Rabitə, Tikinti və Quraşdırma” MMC-nin direktoru Namazalı Məmmədova həmin məcəllənin 179.3.2 və 308.2-ci, MMC-nin baş mühasibi Səhrab Hümbətova isə 179.3.2, 308.2 və 313-cü maddələrdə nəzərdə tutulan ittiham elan edilməklə barələrində məhkəmənin müvafiq qərarları ilə həbs qətimkan tədbiri seçilib.

28 Noyabr 2016 11:51

“15 milyon manatın 30 faizini iş otağımda qəbul etmişəm”

Külli miqdarda mənimsəmədə ittiham olunan “Rabitə çetesi”ndəki sabiq məmurlar istintaq zamanı özləri özlərini ifşa ediblər. İllərlə milyonları soyub-talayıblar, ata malı kimi öz aralarında bölüşdürüblər. İndi isə günahı bir-birlərinin üzərinə atmaqla məsuliyyətdən yayınmağa can atırlar. Virtualaz.org saytı istintaq materiallarına istinadən xəbər verir ki, “Rabitə işi” üzrə həbs olunan “Optik Rabitə Tikinti və Quraşdırma” MMC-nin rəhbəri Namazəli Məmmədov ifadəsində cəmiyyətlərə köçürülmüş pul vəsaitindən heç kimə, eləcə də Aparat rəhbəri Vidadi Zeynalova və baş mühasib Səhrab Hümbətova pul vermədiyini göstərib. Aparat rəhbəri isə əksinə, N.Məmmədovun direktoru olduğu “Optik Rabitə Tikinti və Quraşdırma” MMC, təsisçisi və idarə heyətinin sədri olduğu “Rabitə Tikinti” ASC, eləcə də partnyoru olduğu “Optik Tikinti Montaj” MMC-yə köçürülmüş təxminən 15 milyon manat pul vəsaitinin 30 faizini iş otağında ondan qəbul etdiyini açıqlayıb. “Optik Rabitə Tikinti və Quraşdırma” MMC-nin təsisçisi və direktoru, hazırda həbsdə olan Namazalı Məmmədov istintaqa verdiyi ifadəsində göstərib ki, 1996-cı ildə Rabitə və Yüksək Texnologiyalar Nazirliyinin tabeliyində olan 2 saylı Tikinti-Quraşdırma idarəsinin müdiri təyin olunub. Bir il sonra həmin müəssisə özəlləşdirilib, “Rabitə Tikinti” ASC adlandırılıb. 140 səhmdarı olan bu müəssisənin İdarə Heyətinin sədri N.Məmmədov, baş mühasibi isə Səhrab Hümbətov təyin edilib. Namazalı Məmmədov, eyni zamanda, həmin ildə “Optik Rabitə Tikinti və Quraşdırma” MMC-ni təsis edərək, müəssisənin direktoru olub. Müəssisələrin hesablaşma hesabı “Rabitəbank” ASC-nin Mərkəzi filialında olub: ”Maliyyə Nazirliyinin Dövlət Maliyyə Nəzarəti Xidmətinin mütəxəssisləri tərəfindən “Optik Rabitə Tikinti və Quraşdırma” MMC və “Rabitə-Tikinti” ASC-nin maliyyə-təsərrüfat fəaliyyətləri yoxlanılarkən işlərin dəyərinin artırılması ilə bağlı göstərilən hesablamalar, mal-materialların, görülmüş işlərin, maşın-mexanizm xərclərinin və əlavə xərclərin müəyyən edilməsi zamanı real bazar qiymətləri nəzərə alınmayıb. 2011-2012-ci illərdə eyni dövrdə Sabirabad, Kürdəmir, Lənkəran və Tərtər Telekommunikasiya Qovşaqlarında eyni qiymətlərə xətt şəbəkələrinin çəkilişi həyata keçirilib, lakin maliyyə-təsərrüfat fəaliyyətinin yoxlanılmasına dair aktda qiymət artımı faiz əmsalı götürüldükdə Sabirabad rayonunda 27%, Kürdəmir rayonunda 50%, Tərtər rayonunda 58%, Lənkəran rayonunda isə 81% göstərilib. Halbuki, işlərin görülməsi zamanı eyni qiymətlər tətbiq edilib. Təkliflər sorğusu əsasında Abşeron TKQ-da gördüyü xətt şəbəkəsinin çəkilişi ilə əlaqədar Dövlət Satınalmalar Agentliyinin razılıq məktubları ilə Abşeron TKQ ilə təxminən 2.600.000 manatlıq iş görülüb, şişirtmə əmsalı 69% göstərilib”. Namazəli Məmmədov N.Məmmədov deyib ki, şişirtmə kimi qeyd olunmuş belə hallar direktoru olduğu cəmiyyət tərəfindən işlər görülmüş digər obyektlərə də tətbiq edilib. Kotirovka sorğusu və tenderin keçirilməsi sifarişçi təşkilatın səlahiyyətlərinə aid olmaqla, həmin təşkilatların qəbul edəcəyi qərarlara təsir etmək imkanı olmayıb. Rabitə sahəsində uzun müddət təcrübəyə malik tanınmış mütəxəssis olduğuna görə, sifarişçi təşkilatlar həmin işlərin keyfiyyətlə görülməsi üçün ona müraciət ediblər. Sifarişçi təşkilatdan rəsmi təklif aldıqdan sonra mövcud bazar qiymətlərinə uyğun olaraq görüləcək işləri dəyərləndirıb və rəsmi məktubla öz rəsmi qiymətlərini sifarişçi təşkilatlara göndərib. Sifarişçi təşkilatda həmin təkliflərin hansı qaydada həll olunmasından məlumat olmayıb: ”Sifarişçi təşkilat keçirilmiş tender və kotirovka sorğusunda qalib elan olunduğunu bildirdikdə həmin təşkilatla müqavilə bağlayıb işi icra etmişəm, müqavilə bağladığım TKQ-ların nümayəndələrinin deməsinə görə, həmin təşkilatın büdcəsində olan pul vəsaitinə uyğun olaraq kotirovka sorğuları əsasında ərazilər üzrə hissə-hissə iş görülüb”. N.Məmmədov ifadəsində həmçinin bildirib ki, “Optik Rabitə Tikinti və Quraşdırma” MMC, “Rabitə-Tikinti” ATSC, eləcə də “Optik Tikinti Montaj” MMC-lərə ümumilikdə işlərin görülməsi üçün köçürülmüş pul vəsaitinin hamısı nəzərdə tutulmuş təmir-tikinti və quraşdırma işlərinin görülməsinə sərf olunub. Həmin cəmiyyətlərə köçürülmüş pul vəsaitindən əlavə olaraq, heç kimə, eləcə də Vidadi Zeynalova və Səhrab Hümbətova verməyib. Heç bir məbləği mənimsəməyib, belə bir fikri də olmayıb: ”Baş mühasib Səhrab Hümbətova iki-üç dəfə övladının müalicəsi üçün öz şəxsi vəsaitimdən pul vermişəm”. “Optik Rabitə Tikinti və Quraşdırma” MMC-nin rəhbəri qeyd edib ki, Səhrab Hümbətovun baş mühasib olduğu müəssisələr üzrə nə bank, nə də ki kassa sənədlərində, habelə təhtəlhesab şəxs kimi heç bir sənəddə pul vəsaitinin ayrılması və xərclənməsi ilə bağlı imzası olmayıb, bank hesabından pul vəsaitini özü götürüb. Lakin Vidadi Zeynalov bildirib ki, Namazalı Məmmədovun 2009-2014-cü illər ərzində respublikanın müxtəlif rayonlarında kabel xətlərinin çəkilişi və rekonstiksiyası məqsədilə direktoru olduğu “Optik Rabitə Tikinti və Quraşdırma” MMC, təsisçisi və idarə heyətinin sədri olduğu “Rabitə Tikinti” ASC, eləcə də partnyoru olduğu “Optik Tikinti Montaj” MMC-yə köçürülmüş təxminən 15 milyon manat pul vəsaitinin 30 faizini iş otağında ondan qəbul edib. Üzləşdirmə zamanı ona verdiyi pullardan əlavə, Namazalı Məmmədova da əlavə pul qaldığını üzünə deyib. N.Məmmədov isə Aparat sədrinin dediklərini təkzib edib. Qeyd edək ki, RYTN-in mənimsəmədə və vəzifə səlahiyyətlərindən sui-istifadə etməkdə təqsirləndirilən 11 keçmiş əməkdaşı ümumilikdə 153 milyon 143 min manat vəsaitin mənimsənilməsində ittiham olunurlar.

27 Noyabr 2016 11:20

Mahmudovun “çirkli pulları” “Zaminbank”la çıxarılırmış – MTN POLKOVNİKİ QARDAŞINI BANKA NƏZARƏTÇİ GÖNDƏRİB

 “MTN işi” çərçivəsində ləğv olunmuş nazirliyin həbsdəki yüksək vəzifəli şəxsləri ilə bağlı araşdırmalarını davam etdirir. Xatırladaq ki, iki gün əvvəl MTN–in Transmilli İqtisadi Cinayətkarlıqla Mübarizə Baş İdarəsinin sabiq şöbə rəisi, polkovnik Fizuli Əliyev barəsində maraqlı məlumatlar yazmışdıq. Belə ki, MTN-də “Kilkə Akif“, cəmiyyətdə isə “Akula Akif” kimi tanınan Akif Mustafayevin Eldar Mahmudova təqdimatı ilə nazirlikdə yüksələn Füzuli Əliyevin qızıl-zinnət əşyalarının ölkəyə gətirilməsi, pul köçürülmələri, MMC-lərin fəaliyyəti kimi sahələri kurasiya edib. Bu şəxs MTN-də işlədiyi dönəm ərzində yüzlərlə iş adamına qarşı ağlasığmaz cinayətlər törədib və buna görə də hazırda həbsdədir. Bu vəzifədə olduğu zaman Füzuli Əliyev yüzlərlə iş adamının müflis edilməsi ilə nəticələnən qurama əməliyyatlar təşkil edərək, vəzifə cinayətləri törədib. Bu qanunsuz əməlləri ilə Eldar Mahmudova milyonlar gətirən Füzuli Əliyevin general rütbəsi üçün artıq təqdimatı hazırlanıb. Ancaq Eldar Mahmudovun “vurulması” ilə MTN-nin dağılması onun general olmasının üstündən xətt çəkib. Hazırda Baş Prokurorluğun Ağır Cinayətlərə Dair İşlər üzrə İstintaq İdarəsində ittiham olunan Füzuli Əliyevin əməllərindən onlarla zərərçəkən şəxs müəyyən olunub. İstintaqa ifadələrində və üzləşmə prosesində həmin şəxslər onu bir daha ifşa edərək, şikayətçi olduqlarını ifadə ediblər. Saytımızın araşdırması zamanı Eldar Mahmudovun Füzuli Əliyevin vasitəsilə hazırda fəaliyyəti dayandırılan “Zaminbank”ın rəhbəri Nadir İsmayılovla işbirliyi ortaya çıxıb. Belə ki, sabiq nazir Azərbaycanda cinayət yolu ilə qazandığı yüz milyonlarla vəsaitin bir hissəsini Beynəlxalq Bankla yanaşı həm də adıçəkilən bank vasitəsilə xaricə çıxarırmış. Məlumatlarda qeyd olunur ki, Eldar Mahmudovun ailə üzvlərinin adına Avropada alınan mülklərin pullarının ödənişi də bu bank vasitəsilə həyata keçirilib. Bundan başqa “Zaminbank” rəhbərliyi iş adamlarının hesabları barəsində MTN-nə davamlı informasiyalar ötürməklə bank sirri prinsiplərinə xəyənt edib. Araşdırmamız zamanı Nadir İsmayılov MTN-nin tapşırığı ilə Transmilli İqtisadi Cinayətkarlıqla Mübarizə Baş İdarəsinin sabiq şöbə rəisi, polkovnik Fizuli Əliyevin qardaşı Elşən Əliyevi məhz bu bankda yüksək vəzifəyə təyin edib. Eldar Mahmudovun himayəsi altında çalışan Nadir İsmayılov da kifayyət qədər varlana bilib. Belə ki, “Zaminbank”ın hazırda bağlanmasına baxmayaraq, Nadir İsmayılovun Sankt-Peterburqda otel və restoranlara sahibdir. Bu iddialarla bağlı Gununsesi.info-nun əməkdaşı Nadir İsmayılovla danışa bilib. Ancaq bank rəhbəri özü bizimlə əlaqə saxlayacağını və danışacağını deyib. Bütün hallarda Nadir İsmayılovun cavab haqqını tanıdığımızı bildiririk.

25 Noyabr 2016 2:06

Nazirlik 225 minlik iddia qaldırdı, Vidadi Zeynalov itihamı rədd etdi –Məhkəmə

  Bu gün Bakı Ağır Cinayətlər Məhkəməsində Rabitə və Yüksək Texnologiyalar Nazirliyinin sabiq Aparat rəhbəri Vidadi Zeynalov və digərlərinin cinayət işi üzrə məhkəmə prosesi davam etdirilib. Hakim Əfqan Hacıyevin sədrliyi ilə keçirilən iclasda hakim bildirib ki, prosesdə Vergilər Nazirliyinin nümayəndəsi iştirak edir. Hakimin sözlərinə görə, iş üzrə nazirlik 255 min manatlıq mülki iddia qaldırıb. Daha sonra təqsirləndirilən Səhlab Hümbətovun vəkili onun barəsində seçilmiş həbs qətimkan tədbirinin ev dustaqlığı ilə əvəzlənməsi haqqında vəsatət verib. Məhkəmə vəsatəti təmin etməyib. Vidadi Zeynalovun vəkili Ceyhun Yusifov isə müdafiə etdiyi şəxsin hamıdan sonra ifadə vermək istədiyini və bunun nəzərə alınmasını xahiş edib. İclasda məhkəmə istintaqının başlanması elan olunub. Dövlət ittihamçısı Fərid Nağıyev ittiham aktının nəticə hissəsini elan edib . İttihama görə, V. Zeynalov digərləri ilə korrupsiya şəbəkəsi formalaşdırıblar. Onlar nəzərdə tutulan işlərin bəzi hallarda görülməməsi, məbləğlərin şişirdilməsi və digər yollarla pul mənimsəyiblər. İttihama münasibət bildirən V. Zeynalov özünü təqsirli bilmədiyini deyib. Proses günün ikinci yarısında davam edəcək(APA). Qeyd edək ki, Bakı Telefon Rabitəsi İstehsalat Birliyinin baş direktoru Beytulla Hüseynovun 2009-2015-ci illərdə arvadının təsisçisi olduğu “Bakı Rabitə Təmir Tikinti” və “Təmir Təchizat Servis” MMC-lərinin direktoru Bayram Vəliyev, yaxın münasibətlərdə olduğu “3 nömrəli Rabitə Təmir Tikinti”, “Rabitə Mülki Tikinti” MMC-lərinin direktoru Emin Məmmədov və birliyin baş mühasibi Anar Mustafayevlə qabaqcadan əlbir olub yeni rabitə xətlərinin çəkilməsi, binaların, qurğuların təmiri-tikintisi və sair işlərin yerinə yetirilməsi üçün onların hesablaşma hesablarına köçürüləcək pul vəsaitlərinin işlərin həcmindən asılı olaraq 35-45% həcmində hissəsinin nağdlaşdırılaraq B. Hüseynovun özünə verilməsi barədə razılığa gəliblər. B. Hüseynov tabeliyində olan qovşaqların formal olaraq keçirdikləri tenderlərdə vəzifə saxtakarlığı ilə həmin məhdud məsuliyyətli cəmiyyətlərin qalib elan olunaraq müqavilələr bağlanmaqla və faktiki işlərin tam icra olunmadığı halda, o cümlədən internet xidmətinin təmin edilməsi üçün fiber-optik kabel xətlərinin çəkilişi zamanı işlərin faktiki olaraq telefon qovşaqları tərəfindən aparıldığı halda guya həmin işlərin faktiki özünə məxsus olan müəssisələr tərəfindən görülməsi və işlərin həcminin artırılması barədə saxta sənədlərin tərtib edilməsi yolu ilə adıçəkilən MMC-lərin hesabına köçürülmüş ümumilikdə 71 milyon 263 min manat məbləğində vəsaitin 21 milyon 379 min manatını mənimsəməklə dövlətin qanunla qorunan mənafelərinə ağır nəticələrə səbəb olan zərər vurmalarında şübhələr üçün əsaslar müəyyənləşib. Nazirliyin Aparat rəhbəri Vidadi Zeynalov qulluq mövqeyindən sui-istifadə edərək nazirliyin strukturuna daxil olan ayrı-ayrı qurumların vəzifəli şəxsləri ilə qabaqcadan razılaşmaqla həmin strukturlar tərəfindən işlərin görülmədiyi, tam yerinə yetirilmədiyi, avadanlıqlar alınmadığı, istifadə olunan avadanlıqların, xidmətlərin qiymətlərinin isə 4-5 qat şişirdilməsi və digər üsullarla işlərin və xidmətlərin guya yerinə yetirilməsini özlərinin himayə etdikləri, yaxın münasibətdə olduqları şəxslərin adına olan özəl şirkətlər tərəfindən saxta sənədlər əsasında rəsmiləşdirməsini təmin etməklə müvafiq müəssisələrin ayrı-ayrı banklardakı hesabına köçürülmüş 73 milyon 590 min manat vəsaitin nağdlaşdırılmaqla mənimsənilməsini və israf edilməsini təşkil etməsində şübhələr üçün əsaslar müəyyənləşib. Cinayət işi üzrə nazirliyin strukturuna daxil olan “Aztelekom” MMC, “AzİnTelekom” MMC, “Azərpoçt” MMC, Məlumat Hesablama Mərkəzi və özəl şirkət “Optik Rabitə Tikinti və Quraşdırma” MMC-nin fəaliyyətində də mənimsəmə və israf etmə, vəzifə səlahiyyətlərindən sui-istifadə və vəzifə saxtakarlığı faktları müəyyənləşib. İş üzrə Beytulla Hüseynov, Anar Mustafayev, Emin Məmmədov, Bayram Vəliyevə və “Aztelekom” MMC-nin baş mühasibi Oktay Rüstəmova Cinayət Məcəlləsinin 179.3.2 (külli miqdarda mənimsəmə), 308.2 (vəzifə səlahiyyətlərindən sui-istifadə) və 313-cü (vəzifə saxtakarlığı), Vidadi Zeynalova, həmçinin “AzİnTelekom” MMC-nin baş direktoru Cəlil Cəfərova, “Azərpoçt” MMC-nin baş direktoru Qəmbər Bəybalayevə və “Optik Rabitə, Tikinti və Quraşdırma” MMC-nin direktoru Namazalı Məmmədova həmin məcəllənin 179.3.2 və 308.2-ci, MMC-nin baş mühasibi Səhrab Hümbətova isə 179.3.2, 308.2 və 313-cü maddələrdə nəzərdə tutulan ittiham elan edilməklə barələrində məhkəmənin müvafiq qərarları ilə həbs qətimkan tədbiri seçilib.

25 Noyabr 2016 1:10

“Rabitəçilər işi” və yaxud iş işdən keçəndə…

1-ci yazı   Son bir həftə ərzində  müxtəlif KİV-lərdə  Rabitə və Yüksək Texnologiyalar Nazirliyinin (RYTN) keçmiş rəhbərliyi dövründə baş verən məlum hadisələrdən bəhs edən məlumat xarakterli yazılar kulminasiya nöqtəsinə çatdı. Faktinfo.az da bu xəbərləri istinadla yayımladı. Elə bilirəm ki, bu hadisələrin bilavasitə “MTN işi” ilə əlaqəli olduğunu nəzərə alıb, barəsində bəhs edəcəyimiz prosesləri də şərti olaraq “Rabitəçilər işi” adlandırmağıma heç kəs etiraz etməz. İstənilən halda, bunun artıq hansısa bir əhəmiyyət kəsb etmədiyi də aydındır. Beləliklə, “Rabitəçilər işi” üzrə keçirilmiş həbslər, bir müddət əvvələ qədər RYTN-nin rəhbərliyində duran şəxslərin istintaqa verdikləri ifadələr, külli miqdarda dövlət vəsaitinin  mənimsənilməsi, qeyri-qanuni dinləmələr, rabitəçilərin keçmiş MTN rəhbərliyinin və bəzi əməkdaşlarının dövlət əleyhinə yönələn fəaliyyətlərində iştirakı, hətta bu iştirakın hansı hallarda könüllü və hansı hallarda məcburi olması barədə ehtimallar və ümumiyyətlə bu məsələlərin istənilən bir təfərrüatına aydınlıq gətirə biləcək hər hansı məlumat hələ uzun müddət ictimai marağını saxlayacaq. Elə biz də məhz bu marağı nəzərə alaraq, bu günə qədər mətbuatda dərc olunan məlumatlar əsasında müəyyən təhlillər aparmaq və bu təhlillərin bəzi nəticələrini oxucularımızla bölüşmək qərarına gəldik.   Başlıqlar niyə şişirdilir?   Razıyam, əvvəlcə gərək mən özüm “başlıq şişirdilir” ifadəsilə nə demək istədiyimə aydınlıq gətirim. Şəxsən mən bu ifadəni, sərlövhəsində oxucuya az qala canlı dinozavr vəd edib, mətnində isə, ən çoxu orta ölçülü bir timsahdan bəhs olunan yazılara şamil edirəm. Əlbəttə, oxucu diqqətini cəlb etmək məqsədilə bu kimi fəndlərə müraciət olunmasına bütün dünya ölkələrinin KİV-lərində geniş  rast gəlinir. Amma necə deyərlər, hər bir medalın ikinci üzü də var. Təsəvvür edin ki, konkret oxucunun nə timsahlar, nə də dinozavrlar barədə elə də dərin məlumatı, bilgisi yoxdur. Bu zaman nə baş verir? Həmin oxucunun şüurunda, nəhəng, güclü-qüdrətli dinozavr orta ölçülü timsah obrazında formalaşır. Ən əsası da budur ki, bu effektdən qəsdən, məqsədyönlü şəkildə də yararlanmaq mümkündür. Məsələn, götürək elə keçmiş nazir Əli Abbasovun “Rabitəçilər işi” üzrə istintaqa verdiyi bəzi ifadələrin mətbuatda ictimaiyyətə təqdim edilməsi formalarını. Şəxsən mənim diqqətimi belə bir başlıq cəlb etmişdi – Əli Abbasovun istintaqa dəhşət saçan etirafı... Amma yazı ilə tanış olduqda məlum oldu ki, söhbət sadəcə keçmiş nazirin hər ay 200-300 min manat məbləğində “xərclik” almasına dair etdiyi etirafdan gedir. İndi soruşuram, budurmu dəhşət?! Yəni, kimsə keçmiş rabitə nazirinin  sadəcə aylıq məvaciblə dolandığına inanırdı? Yoxsa, bu məbləğləri biz mənimsəmələrin “son həddi” kimi qəbul etməliyik? Amma bu ifadələrdə dəhşət də olmasa, hiddət doğura biləcək məqamlar kifayət qədərdir. İlk növbədə, Əli Abbasovun bilavasitə özünə aid etdiyi mənimsəmələri aylıq 200-300 min manat civarına sığışdırmaqla, dövlətin yüz milyonlarla, milyardlarla mənimsənilən vəsaitlərindən diqqəti yayındırmaq cəhdləri hiddət doğurur. Eyni zamanda da, keçmiş nazirin rəhbərlik etdiyi qurumun fəaliyyətinə nəzarəti faktiki olaraq itirməsinə və bu fəaliyyətin ölkə qanunlarının ziddinə yönəldilməsindən xəbərdar olmasına rəğmən, ən azından tutduğu vəzifədən istefa verməməsi, baş verənlərə hətta passiv müqavimət belə göstərməməsi də birmənalı şərh oluna bilməz. Amma bu barədə bir qədər sonra, xüsusi bəhs etsək daha yaxşı olar. Hələlik isə, bir qədər də rəqəmlərin dili ilə danışaq və aydınlaşdırmağa çalışaq ki, əsil “dəhşət”lər harada gizlədilir...   STV – sadələşdirilmiş talan vergisi   Gəlin nümunə olaraq, Bakı Telefon Rabitəsi İstehsalat Birliyinin (BTRİB) keçmiş baş mühasibi, hal-hazırda həbsdə olan Anar Mustafayevin bəzi ifadələrinə diqqət edək. Bu ifadələr artıq mətbuatda dəfələrlə əks olunsa da, aydınlıq üçün bir daha qeyd edim ki, öz ifadələrində Anar Mustafayev dövlət vəsaitlərinin mənimsənilməsi üçün tətbiq olunan klassik maxinasiya üsulundan -“nəğdləşmə” əməliyyatlarından bəhs edir. Həmin ifadələrdən məlum olur ki, özəl MMC rəhbərləri Bayram Vəliyev və Emin Məmmədov 2005-ci ilin may ayından 2007-ci ilin sonuna kimi olan dövr ərzində köçürülən vəsaitin ƏDV-siz hissəsindən 15 faiz, 2008-2009-cu illər ərzində 20 faiz, 2010-2013-cü illər ərzində 25 faiz, 2014-cü ilin yanvar ayından 2015-ci ilin sentyabr ayının axırına kimi olan dövrdə isə, 30 faizini nağd olaraq Anar Mustafayevə veriblər. Bu məmur isə, öz növbəsində Bayram Vəliyev və Emin Məmmədovun ona verdiyi pulları hesabatları ilə birlikdə hər ayın sonunda, ya da növbəti ayın əvvəlində BTRB-nin rəisi olmuş Beytulla Hüseynova çatdırıb: “Əvvəlki dövrlərdə hər ay Beytulla Hüseynova verdiyim pulların miqdarını dəqiq xatırlamıram. Lakin 2015-ci ilin yanvar ayından həmin ilin sentyabr ayına kimi olan dövrdə isə, hər ay Beytulla Hüseynova 270-310 min manat məbləğində pul vermişəm...” Onlarla, yüzlərlə uğurlu sahibkar göstərmək olar ki, hətta on-on beş il bundan əvvəl, istənilən bir ayın ümumi əməliyyat dövriyyəsini də, gəlirləri və xərcləri də heç bir sənədə baxmadan, əzbərdən söyləyə bilərlər. Niyə? Ona görə ki, işləyiblər, zəhmət çəkiblər və pul qazanıblar. Qazandıqları pulların da hər qəpiyini hara xərclədiklərini beyinlərinə həkk ediblər. Amma Anar Mustafayev “əvvəlki dövrlərdə hər ay Beytulla Hüseynova verdiyi pulların miqdarını dəqiq xatırlamır”. Əlbəttə xatırlamır! Niyə də xatırlamalıdır?! Sadəcə olaraq, əlini uzadıb, bir-iki sənədə dərkənar qoyub, ya da imzalayıb və dövlətin ayırdığı pullara öz malı kimi sahib çıxıb. Həmin pullar da aşağıdan yuxarı, RYTN-nin rəhbərliyinə qədər piramidal şəkildə toplanıb. Sonda isə, əldə olunan məbləğin böyük bir hissəsi bu talançılığa “göz yumulmasını” təmin etmələrinə görə MTN rəhbərliyinə təqdim olunub, qalan məbləğ isə, artıq həmin piramida ilə əks istiqamətdə, yəni yuxarıdan aşağı hər kəsin “payı” verilə-verilə bölüşdürülüb. Əslində deməyə də çətinlik çəkirəm ki, ümumiyyətlə bu əməliyyatlardan danışarkən konkret məbləğləri qeyd etməyin bir əhəmiyyəti var, ya yox. Məncə elə də böyük əhəmiyyəti yoxdur. Çünki istənilən halda, bu talançılığa yalnız bir ad vermək olar – dövlətə xəyanət! Təsəvvür edin ki, bu insanların əksəriyyəti birbaşa dövlət başçısı tərəfindən səlahiyyətləndirilib və istisnasız olaraq, hamısı da dövlət qulluğunda olmaqla, büdcədən, həmin o taladıqları büdcədən məvacib alıblar! Bəziləri isə, hətta mütəmadi olaraq dövlət başçısının qarşısına çıxmalı, qarşıya qoyulmuş vəzifələrin icrası ilə bağlı məruzələr etməli olublar! Ölkə rəhbərliyinin göstəriş və tapşırıqlarını, tövsiyyələrini dinləyəndə isə, sakitcə başlarını da yelləyiblər. Və bütün bunlardan sonra da, dövlətin içərisində dövlət qurmaq xülyasına qapılmış “güc sahiblərinə” bac verməklə, özlərinə talançılıq lisenziyası alıblar. Bəlkə mən bu insanların ödədikləri xəracı “talan vergisi” adlandırmaqda səhv edirəm? Olsun, başqa ad verək. Amma, əsla başqa don geyindirməyə çalışmayaq! Çünki, məhz bu talanın sayəsində əldə olunan pullardan qidalanan, güc toplayan ünsürlər, sonda daha böyük və daha təhlükəli xəyanətlərə imza atmağa hazırlaşmışdılar... Ardı var... Fuad İsgəndərov Faktinfo.az

24 Noyabr 2016 6:58

“Rabitə işi”ndə korrupsiya faktları tükənmir –“Aztelekom”un mühasibi də külli miqdarda “şapka” alırmış

  Rabitə və Yüksək Texnologiyalar Nazirliyinin (RYTN) “Aztelekom” Məhdud Məsuliyyətli Cəmiyyətinin həbsdə olan sabiq baş mühasibi Oktay Rüstəmovun tender qalibindən külli miqdarda pul alması müəyyən olunub. Bu barədə Baş Prokuror yanında Korrupsiyaya qarşı Mübarizə Baş İdarəsində RYTN-in sabiq yüksək rütbəli məmurları ilə bağlı aparılmış cinayət işinin istintaq materiallarında qeyd olunur. (Trend) Sözügedən cinayət işi ilə bağlı ibtidai istintaqda şahid qismində dindirilmiş “Xəzər” MMC və “Xəzər 2011” MMC-nin təsisçisi və direktoru Cabbarov Ənvər Məmməd oğlunun ifadəsindəki bir çox məqamlar tenderlərdə udulmuş işlərin icrası zamanı yol verilmiş yeyinti faktları ilə bağlı diqqət çəkir. Ə.Cabbarov ifadəsində bildirib ki, 2002-ci ildə “Xəzər” MMC-ni təsis edərək, sahibkarlıq fəaliyyəti ilə məşğul olmağa başlayıb. 2009-cu ildə qonşusu Vilayət Səlimov RYTN-də tanışları olduğunu deyərək, ona nazirliyin tikinti işlərini birlikdə görməyi təklif edib. Ə.Cabbarov V.Səlimovla razılaşıb. Razılaşmaya görə, “Xəzər” MMC-nin hesabına köçürüləcək vəsaitin 2 faizi Ə.Cabbarova veriləcəkmiş. Razılaşmadan sonra “Xəzər” MMC-nin sənədləri V.Səlimova verilib və faktiki olaraq, tenderdə udulan işlərin icrasına rəhbərliyi o edib. Bir müddət “Azərpoçt” MMC ilə işlədikdən sonra V.Səlimov “Aztelekom” MMC-nin tabeliyində olan Telekommunikasiya Qovşaqları ilə Ə.Cabbarovun təsisçisi olduğu “Xəzər” MMC və “Xəzər 2011” MMC-lər arasında podrat müqavilələri imzalamağı təşkil edib. Bu işlərlə bağlı bütün sənədləşmə işlərini, kotirovka sorğularında iştirakları V.Səlimov təşkil edib. “Xəzər” MMC “Aztelekom” MMC-nin tabeliyində olan Salyan, Qobustan, Goranboy və Beyləqan rayon Telekommunikasiya Qovuşaqlarının ATS-lərinin təmiri işlərini həyata keçirib. Ümumilikdə, “Aztelekom” MMC-dən “Xəzər-2011” MMC-nin hesabına 250.000 manata yaxın vəsait köçürülüb. Cəmiyyətlərin hesabına köçürülmüş vəsaitləri “Zaminbank” ASC-nin İnam filialından nağd götürülüb. Məbləğin 18 faizi əlavə dəyər vergisi, 0,5 faizi isə bank xidmət haqqı kimi çıxılıb. Ə.Cabbarov nağdlaşdırdığı pulu V.Səlimova verib. Fəhlələrin əmək haqqını, avtomobil xərclərini V.Səlimov ödəyib. Köçürülən pulun 2 faizi, yəni 500-1000 manat arası məbləğ Ə.Cabbarova qalıb. İşləri V.Səlimov təşkil etdiyindən, “Aztelekom” MMC-nin baş mühasibi O.Rüstəmovla da əlaqələri özü qurub. Ə.Cabbarov Telekommunikasiya Qovşaqları tərəfindən elan edilmiş kotirovkalarda iştirak etməyib, sənədləşmələr formal olaraq aparılıb. Ə.Cabbarov ifadəsində “Xəzər-2011” MMC-yə ayrılmış 490.152 manat vəsaitdən iş həcmlərinin dəyərinin artırılması yolu ilə şişirdilmiş 308.087 manatdan 200.000 manatın V.Səlimovun vasitəsi ilə “Aztelekom” MMC-nin baş mühasibi O.Rüstəmova göndərildiyini, qalan pulu isə V.Səlimovla aralarında böldüklərini, işlərə görə aylıq onlara 1000-1500 manat arası pul qaldığını göstərib. Şahid qismində dindirilmiş Səlimov Vilayət Əmiraslan oğlu isə ifadəsində göstərib ki, Ə.Cabbarovu yaşadığı 7-ci mkr. ərazisində qonşu kimi tanıyıb, onunla yaxın münasibətləri olub. V.Səlimov deyib ki, Ə.Cabbarov dəfələrlə ondan təmir-tikiniti işlərində yardım etməyi xahiş edib. O bildirib ki, 2009-cu ildə “Azərpoçt” MMC və “Aztelekom” MMC-nin tabeliyində olan filiallarla bağlı təmir tikinti işlərinin icra olunduğunu eşidib və bu barədə qonşusu Ə.Cabbarova məlumat verib, birlikdə işləmələrini məsləhət bilib. İşlərin ona verilməsi ilə əlaqədar “Aztelekom” MMC-nin baş mühasibi O.Rüstəmov və “Azərpoçt” MMC-nin əməkdaşı ilə danışıb. O.Rüstəmov kotirovka və tenderdə qalib gələn müəssisələrin hesabına köçürülən vəsaitin bir hissəsinin onlara qaytarılmalı olduğunu bildirib. V.Səlimov O.Rüstəmovla razılaşıb və Ə.Cabbarova bu barədə məlumat verib. V.Səlimov 2010-cu ildən başlayaraq, “Xəzər-2011” MMC ilə “Aztelekom” MMC-nin tabeliyində olan Telekommunikasiya Qovşaqları ilə müqavilə imzalayıb. “Aztelekom” MMC-də bütün sənədləşmələri, kotirovkaları O.Rüstəmov icra edib. “Xəzər” MMC və “Xəzər 2011” MMC tərəfindən “Aztelekom” MMC-nin tabeliyində olan Salyan, Qobustan, Goranboy və Beyləqan rayon Telekommunikasiya Qovşaqlarının ATS-lərinin təmir işləri həyata keçirilib. Ümumilikdə, “Aztelekom” MMC-dən “Xəzər-2011” MMC-nin hesabına 250.000 manata yaxın vəsait köçürülüb. “Aztelekom” MMC-dən cəmiyyətlərin hesabına köçürülmüş vəsaitləri Ə.Cabbarov nağd olaraq alıb, qalan 50 faizini isə “Aztelekom” MMC-nin baş mühasibi O.Rüstəmova verib. “Aztelekom” MMC-nin tabeliyində olan Telekommunikasiya Qovşaqlarına aid olan Elektron Avtomat Telefon Stansiyası (EATS) binalarının təmir-tikintisi ilə əlaqədar qiymətlər şişirdilərək yazılıb. EATS binasının təmir-tikintisinə, kv.m-dən asılı olaraq maksimum 800-5000 manat arası vəsait sərf olunmasına baxmayaraq, kotirovka sorğularında qiymətlər 10.000-17.000 manat arası sənədləşdirilib.

24 Noyabr 2016 12:03

Eldar Mahmudovun oğlunun telefon danışıqları yayıldı: “Qardaş, Əli Abbasov hər şeydən məmnundur”

Rabitə və Yüksək Texnologiyalar Nazirliyinin vəzifəli şəxslərinin cinayət işləri üzrə məhkəmə prosesinin davam etdiyi bir zamanda adıkeçən adamların törətdiyi əməllər barədə hər gün yeni məlumatlar ortaya çıxır. “Qafqazinfo” nazirliyin sabiq Aparat rəhbəri Vidadi Zeynalov və “AzİnTelekom” MMC-nin rəhbəri Cəlil Cəfərovun əlbir olaraq “Cartburg NC” şirkəti ilə güzəştli şərtlərlə müqavilə bağlanılmasına razılıq əldə etməklə külli miqdarda pul mənimsəməsi epizodu üzrə telefon yazışmalarını əldə edib. “Cartburg NC” şirkəti sabiq milli təhlükəsizlik naziri Eldar Mahmudovun oğlu Anar Mahmudovun şəriki Ayaz Kərimovun olub. Telefon yazışmalarından görünür ki, A.Kərimov bu işdə sadəcə təşkilatçı olub, şirkət faktiki olaraq A.Mahmudovun nəzarətində olub. Belə ki, cinayət işi materiallarında A. Kərimov A. Mahmudova ayda 1 və ya 2 dəfə “SMS” yazaraq Rabitə Nazirliyi ilə “Cartburg NC” şirkəti arasında aparılan danışıqlar barədə hesabat verib və qarşı tərəfin müvafiq tapşırıqları əsasında növbəti addımlar atılıb. “Azərcell” mobil operatorunun rəsmi məktubunda A.Mahmudovun istifadəsində olan telefon nömrəsinin sabiq nazir Eldar Mahmudovun adına rəsmiləşdirildiyi aydın olur. Sabiq nazirin adına olan nömrə ilə A.Kərimovun istifadəsində olan telefon nömrəsi arasında yazışmalara 10 dekabr 2012-ci ildən başlanıb. Mesajların əksəriyyəti rus və ingilis dillərində yazılıb. Növbəti yazışmada sabiq deputat Çingiz Əsədullayevin də bu işin içində olduğu bəlli olur. 04 noyabr 2013-cü il tarixdə A.Kərimov sabiq nazirin oğluna “Qardaş, səndə viber proqramı var? Onunla danışmaq yaxşıdır. Boş olanda, məni yığ, müzakirə edək. Avadanlığın çatıdırlması 60 iş günüdür. Biz gərək məsələləri tez həll edək. Lazım olarsa, Çingizlə danışa və ona girov üçün sifariş edəcəyimin siyahısını verə bilərəm” deyə mesaj yazır. Mahmudov isə “Ok, yaxşı. mən də artıq layihəni hazırladım” cavabını göndərir. 31 avqust 2013-cü ildə A.Kərimov A.Mahmudova “Qardaş salam təcili görüşmək lazımdır. Təzə xəbərlər var”, noyabrın 1-də “Təbriklər müqavilə imzalandı”, 18 noyabrda “Qardaş salam. Başa düşürəm ki, məşğulsan, lakin mən bu gün mütləq bilməliyəm ki, avadanlığı hansı şirkətə göndərim. Əgər bu Caspian Cristal olacaqsa, o zaman mənə əlaqəli şəxsi bildir və mən özüm onunla danışaram. Ya da mən öz şirkətimin adına gətirə bilərəm, onda sadəcə aeroportda gömrükdə razılıq olmalıdır”, 06 dekabrda “Qardaş təbrik edirəm. Avadanlığı quraşdırdılar və işə saldılar. Allah xeyir-bərəkət versin” məzmunlu mesajlar yazıb. Bu işlərin texniki tərəfi həll olduqdan sonra tərəflər artıq rabitə naziri Əli Abbasovla danışıqlara başlayıblar. A.Mahmudov 2 aydan sonra, 27 fevral 2014-cü il Ayaz Kərimova məktub yazaraq Əli Abbasovla görüş təşkil etdiyini bildirib: “Salam, Ayaz. Bizim rəhbərlər bu gün danışiblar. Sabah mən MCIT-də (Ministry of Communication and İnformation Technology (Rabitə və İnformasiya Texnologiyaları Nazirliyi – red.) görüş təşkil edirəm, Əli Abbasovla görüşək bu məsələni sonlandıraq”. Bundan sonra isə A.Kərimov nazir oğluna məktub yazaraq “SMS layihə” ilə bağlı hansı işlər görüldüyünü, hansıların görülməsi vacib olduğunu qeyd edərək onu tələsməyə çağırır. A.Kərimov A.Mahmudova aprelin 29-da “Salam qardaş. SMS-lə bağlı danışa bilmədin? Türklər bizi gözləyir”, iyunun 11 –də “Salam, qardaş. Bu gün Əli Abbasovun yanında oldum. O hər şeydən məmnundur”, 23 sentyabrda “qardaş, nazirliklə həll etmək lazımdır. Sonra problemlər olacaq”, 24 sentyabrda “Yoldaş Mahmudov”, 25 sentyabrda “Anar, indi tikintiyə başlamasaq, onda avqustda onları işə salmaq mümkün olmayacaq və ən yaxşı məhsul ili itir. Bir də mənim moskvalı dostumun yanında yaxşı düşmür”məzmunlu mesajlar yazıb. Növbəti ayların yazışmalarından Ayaz Kərimovun sabiq nazir Eldar Mahmudova ad günü hədiyyə aldığı bəlli olur. Noyabrın 27-də Anar Mahmudova “Salam qardaş. Necəsən? Mən Almaniyada müalicədəyəm və Bakıya yalnız sabah gələcəyəm. Mən papanın ad gününə kiçik hədiyyə hazırlamışam. Onu hara gətirim?” yazaraq soruşur. A.Mahmudov elə həmin gün də “Salam. Hər şey yaxşıdır. Müalicə necə gedir. Payın artıq olsun, bizim ofisə verə bilərsən” deyə cavab verir. Hədiyyə isə A.Mahmudovun ofisində yaxın adamı olan Orxan adlı şəxsi verilir: “Hər şey qaydasındadır, qardaş. Müalicə etdilər. Onda sabah səhər Elmar Orxanla əlaqə saxlayar və verər. Papanı mənim və Nananın adından təbrik et. Biz onu cox dəyərləndirir və sevirik” mesajından sonra ad günü mövzusunda hər hansı yazışma aparılmayıb. Növbəti ilin ilk ayında Ayaz Kərimov keçmiş nazir Əli Abbasovla görüşərək məsələni həll edir. 11 yanvarda Anar Mahmudova “Qardaş, salam. Mən Əli Abbasovla turla əlaqədar danışdım. Hər şey yaxşıdır. Mənə əlaqə saxlamaq üçün adam ver”məzmunlu mesaj yazıb, ortağı isə ona Adil adlı şəxslə əlaqə saxlaması göstərişini verib. 2015-ci ilin may ayında isə artıq tərəflərin Əli Abbasovla görüşərək onu sərəncam verilməsinə razı saldıqları aydın olur: Mayın 6-da “Salam qardaş. Əli Abbasovla görüşdüm. Sərəncamla bağlı Hüseyn danışdı və ayın 14-nə görüş təyin edib. Hər şey yaxşıdır”. Qeyd edək ki, bu epizod üzrə A.Mahmudovun hər hansı formada cinayət işinə cəlb edilib-edilmədiyi bəlli olmasa da, A.Kərimov barəsində həbs-qətimkan tədbiri seçilib. O, ölkədən qaçdığı üçün barəsində axtarış elan edilib. A.Kərimovun 2013-cü ilin oktyabr-dekabr aylarında sabiq nazir Əli Abbasovla 3 dəfə telefonla danışdığı müəyyən olunub.

23 Noyabr 2016 12:39

“AzEvrotel”in baş direktoru da sirləri açdı:”800 min Vidadi Zeynalovun şirkətinə köçürdük, Beytulla Hüseynovsa,…”

Rabitə və Yüksək Texnologiyalar Nazirliyinin sabiq aparat rəhbəri Vidadi Zeynalov və digərlərinin cinayət işi üzrə yeni məqamlar ortaya çıxır. Faktinfo.az Lent.az-a istinadən ittiham aktının maraq doğuran məqamlarını təqdim edir. Cinayət işi üzrə şahid qismində ifadə verən "AzEvrotel” MMC-nin direktoru Cabit Rəsulov 2011-ci ildən adı çəkilən MMC-ə rəhbərlik etdiyini deyib: "Cəmiyyətin səhmləri əvvəllər 50 faiz olmaqla "Luk Oil Avropa" şirkətinə, 50 faiz isə Azərbaycan Respublikası Rabitə Nazirliyinə məxsus olub. Sonradan isə öhdəlikləri yerinə yetirə bilmədiyimizdən öz payımızdan imtina etmişik.  "AzEvrotel” MMC nizamnaməyə əsasən telefon çəkilişləri, internet xətlərinin çəkilişləri, banklar arasında rabitə sistemi olan SVİFT-in təşkili, beynəlxalq şəhərlərarası telefon rabitə xidməti, simsiz rabitə xidməti və başqa geniş zolaqlı rabitə xidmətlərini həyata keçirib. Göstərilmiş xidmətlərə görə abonentlər tərəfindən ödənilən bütün xidmət haqları cəmiyyətin hesabına ödənilib, cəmiyyət tabeçilik qaydasında Bakı Telefon Rabitəsi İstehsalat Birliyinə tabe olub”. Cabit Rəsulov ifadəsində bildirib ki, Bakı Telefon Rabitəsi İstehsalat Birliyi tərəfindən rabitə qurğularının təmiri və tikintisi ilə əlaqədar əsaslı işlər görülməyib. "O cümlədən "AzEvrotel" MMC-nin inzibati binasında kondisionerlərin quraşdırılması işləri tam aparılmadı. Lakin Beytulla Hüseynovun göstərişi ilə görülən işlərin dəyəri olaraq onun özünə yaxın olan müəssisələrin hesabına pul vəsatiləri köçürdük. O, cümlədən Beytulla müəllimin göstərişi ilə "PLZ" MMC-nin hesabına 800 min manat məbləğində pul vəsaitini köçürdük. Sonradan isə həmin cəmiyyətin Rabitə və Yüksək Texnologiyalar Nazirliyinin Aparat rəhbəri Vidadi Zeynalova məxsus olduğunu bildim. Cəmiyyət üzrə görülmüş kimi sənədləşdirilmiş bütün işlərə birliyin direktoru Beytulla Hüseynovun göndərdiyi şəxslər nəzarət edirdi. Yəni görüləsi işlər cəmiyyətin direktoru tərəfindən görülmüş kimi sənədləşdirilsə də, faktiki olaraq işləri Beytulla Hüseynov özü gördürüb, gördüyü bütün işləri, o cümlədən mal- material aldıqları təşkilatları B.Hüseynov özü müəyyən etdirdi”.

22 Noyabr 2016 11:01

Mahmudovun qohumunun sehrbazlığı: kondisioner yoxdur, amma 800 min “xərclənib”…

Rabitə və Yüksək Texnologiyalar Nazirliyinin hazırda həbsdə olan yüksək vəzifəli şəxslərinin işi üzrə istintaq materialları bu nazirlikdə illər boyu mövcud olmuş, dəqiq mexanizmə malik korrupsiya sisteminin necə işlədiyini bütün detalları ilə üzə çıxarır. Virtualaz.org xəbər verir ki, bu korrupsiya sistemi nazirliyin strukturuna daxil olan müəssisələrin hər ay xərclərin azı 35 faiz şişirdilməsi yolu ilə ayrılan vəsaitlərdən topladıqları “otkat”ı rəhbərliyə təhvil verməsini, yığılan pullardan isə hər ay nazir Əli Abbasov başda olmaqla vəzifəlilərə “paket”lərin verilməsini, habelə nazirliyə “krışalıq” edən MTN-nin generallarına aylıq haqqın ödənilməsini nəzərdə tuturdu. Xəbər verdiyimiz kimi bu sistemdə nazir Əli Abbasovun aylıq “paketi” 300-400 min manat, nazir müavinlərinin “paketi” isə 30-50 min manat arasında olub. Habelə nazirliyin strukturunda olan müəssisələrin rəhbərləri, digər vəzifələrilər də bol sıfırlı “paketlər” alıblar. Nazirlikdəki korrupsionerlər isə dövlətin pulunu mənimsəmək üçün o dərəcədə həyasızlaşıblarmış ki, nəinki görülən işlərə görə xərcləri şişirdiblər, eyni zamanda ümumiyyətlə görülməyən işlərə görə pul ayırıb mənimsəyiblər. Məsələn, nazirliyin təsis etdiyi “AzEurotel” MMC-də olduğu kimi. Virtualaz.org xəbər verir ki, bu MMC-nin direktoru Rəsulov Cabit Məhəmməd oğlu şahid qismində istintaqda dindirilib. İfadəsində deyib ki, “AzEurotel” MMC-nin səhmlərinin 50 faizi əvvəllər “Lukoil Europe” şirkətinə, qalan 50 faizi Rabitə və Yüksək Texnologiyalar Nazirliyinə məxsus idi. Lakin sonradan “Lukoil Europe” öhdəliklərini yerinə yetirə bilmədiyinə görə payından nazirliyin xeyrinə imtina edib. «AzEvrotel» MMC öz daxili nizamnaməsinə uyğun olaraq telefon çəkilişləri, internet xətlərinin çəkilişləri, banklar arasında rabitə sistemi olan «Sviftin» təşkili, beynəlxalq şəhərlərarası telefon rabitə xidməti, simsiz rabitə xidməti və başqa geniş zolaqlı rabitə xidmətlərini həyata keçirib. MMC Bakı Telefon Rabitəsi İstehsalat Birliyinə (BTRİB) tabe olub. Cabit Rəsulov ifadəsində bundan başqa  göstərib ki, Bakı Telefon Rabitəsi İstehsalat Birliyi tərəfindən rabitə qurğularının təmiri və tikintsi ilə əlaqədar əsaslı işlər görülmədiyi halda birliyin baş direktoru kağız üzərində “görülmüş” işlərə görə münzətəm olaraq “AzEurotel”ə vəsait ayırıb, ayrılan vəsaiti öz şirkətləri üzərindən geri alaraq mənimsəyib. Məsələn, Beytulla Hüseynov BTRİB-in 800 min manatını  “AzEvrotel” MMC-nin inzibati binasında kondisionerlərin quraşdırılması adı altında mənimsəyib. Rəsulovun dediyiyinə görə, sənədlərdə guya binanın bütün kondisioner sisteminin yenilənməsi əksini tapmışdı. Əslində isə heç bir kondisioner-filan quraşdırılmayıb, B.Hüseynov görülməmiş “İşlərə” görə 800 min manatı nazirliyin aparat rəhbəri Vidadi Zeynalova bağlı olan “PLZ” MMC-nin hesabına köçürüb, daha sonra oradan nəğdləşdirərək götürüb.  Cabit Rəsulov direktoru olduğu müəssisədə korrupsiya və mənimsəmənin, dələduzluq sxeminin mövcudluğunu etiraf edir, ancaq deyir ki, bütün bu işlər Beytulla Hüseynovun nəzarəti və göstərişləri altında həyata keçirilirdi. “Mən direktor kimi ancaq onun göstərişlərinə əməl etmişəm”-Rəsulov özünü təmizə çıxararaq deyir...

21 Noyabr 2016 2:09

Qəmbər Bəybalayev naziri də satdı, Zeynalovun özünü də: – “Mənə deyirdilər 35 faizi gətir…”

Rabitə və Yüksək Texnologiyalar Nazirliyinin hazırda həbsdə olan yüksək vəzifəli əməkdaşlarının işi üzrə istintaq materialları bu nazirlikdə uzun illər hökm sürmüş dəhşətli korrupsiya və mənimsəmə mexanizmini üzə çıxarır. Virtualaz.org xəbər verir ki, orada qurulmuş sistemi əsasən nazirliyin tərkibindəki strukturlardan və müəssisələrdən aylıq gəlirlər, habelə xərclərin şişirdilməsi yolu ilə əldə olunan pullar ümumi “kassada”, yaxud oğru dünyasında olduğu kimi “obşak”da toplanırdı. Daha sonra oradan vəzifəsinə və mövqeyinə uyğun olaraq nazirliyin rəhbər işçilərinin hərəsinin öz payı ayrılırdı. Məlum olur ki, nazir Əli Abbasovun aylıq “paketi” 200-300 min manat, nazir müavinlərinin “paketi” isə 30 min manat və daha çox olub. Keçmiş “baş poçtalyon” əvvəl susdu, sonra açıb hər şeyi danışdı Ötən il Eldar Mahmudovun “ulduzu” sönəndən sonra MTN-dəki qruplaşmanın “krışalıq” etdiyi bu nazirlikdə aparılmış yoxlamalar, şübhəlilərin verdikləri ifadələr göstərir ki, Rabitə və Yüksək Texnologiyalar Nazirliyinin ən yoxsul strukturu olan “Azərpoçt” MMC-dən də babat yeyiblər. Hansı ki, “Azərpoçt”un sıravi işçiləri qəpik-quruş maaşa möhtacdır , bəzən aylarla onu da ala bilmirlər. Nazirlikdəki korrupsiya ilə bağlı həbs olunanlardan biri də “Azərpoçt” MMC-nin baş direktoru Qəmbər Bəybalayevdir. Cinayət işinin istintaqı zamanı ilkin və yenidən ittiham elan edilərkən “Azərpoçt” MMC-nin sabiq baş direktoru sulları cavablandırmaqdan imtina edirmiş. Lakin sonradan vəkilinin və özünün qaldırdığı vəsadət əsasında dindirilib. Və Bəybalayev nazir Əli Abbasov və onun aparat rəhbəri Vidadi Zeynalovu ifşa edib. İstintaq sənədlərinə əsasən Qəmbər Bəybalayev ifadəsində deyib ki, ona qarşı irəli sürülən mənimsəmə ittihamları üzrə özünü təqsirli bilmir. Çünki nazirliyin rəhbərliyi “Azərpoçt” MMC üzərindən pulların 35 faizlik “otkat” və xərclərin şişirdilməsi yolu ilə mənimsənilməsini təşkil etsə də onun özü həmin pullardan pay götürməyib. Əli Abbasovun və Vidadi Zeynalovun korrupsiya maşını necə işləyirdi Bəybalayevin sözlərinə görə, onun vəsaitin qiymətlərin şişirdilməsi yolu ilə a rəsmiləşdirilməsində və ayrılmasında, eləcə də nağdılaşadırılmasında iştirakı olmayıb. Çünki təmir-tikinti işləri ilə bağlı layihələr Nazirliyin Aparat rəhbəri Vidadi Zeynalov tərəfindən müvafiq idarələrdə şişirdilmiş qiymətlərlə təsdiq etdirilirdi. Buna uyğun şəkildə dövlət büdcəsindən və Nazirlikdən vəsait ayrılaraq Zeynalovun tapşırdığı özəl təşkilatlara köçürülürdü. “Həmin özəl şikətlərin heç biri mənə, yaxınlarıma və qohumlarıma məxsus olmayıb. Onların hamısı Vidadi Zeynalovun özünə, yaxın adamlarına, nazirin yaxın şəxslərinə məxsus idi. Ona görə də bu işlər üçün ayrılmış vəsaitdən mənə hansısa səbəbdən pul verilməsi mümkün deyildi. Çünki, vəsait nazirlik tərəfindən ayrılırdı və sonra nazirliyin rəhbərliyinin tapşırığına əsasən onların özlərinə bağlı şirkətlərə ödənilirdi”-keçmiş “baş poçtalyon” deyib. Bəybalayev vəsaitlərin nəğdləşdirilməsi və bununla bağlı rəsmiləşmə işləri ilə də məşğul olmadığını deyib. Keçmiş baş direktorun bildirdiyinə görə vəsaitin ayrılması ilə bağlı məktublar Nazirliyin Kollegiyasının qərarına uyğun olaraq ona ünvanlanırdı və işlər üzrə ayrılmış vəsaitin təyinatı üzrə xərclənməsinə nəzarət etmək tapşırılıdı. Lakin, həmin məktublar formal xarakter daşıyırdı. Çünki kollegiyanın qərarı ümumi xarakter daşıyırdı, vəsait ayrılandan sonra isə Vidadi Zeynalov və ya onun kurasiyalıq etdiyi mühasibatlıq şöbəsinin əməkdaşları tərəfindən şifahi olaraq vəsaitin konkret təşkilatlara köçürülməsi tapşırılırdı. “Pulları bağlamada Vidadi Zeynalova verirdim, mənə heç nə çatmırdı...” “Azərpoçt” MMC-yə ayrılmış pul vəsaitinin 35 faiz hissəsinin nağdılaşdırılması və onun müvafiq qaydada bölünməsi ilə bağlı keçmiş baş direktor deyib ki, Vidadi Zeynalov bu puldan ona da pay çatdığını yalandan deyir. Çünki vəsaitdən ona hər hansı məbləğdə pul qalmayıb: “Mən ümumiyyətlə iş görən şirkətlərlə faiz məsləsində müzakirənin aparılmasında, bununla bağlı razılığın əldə olunmasında iştirak etməmişəm. Həmin şirkətlərin nümayəndələri ilə hər hansı ünsiyyətim olmayıb. Vidadi Zeynalovun tapşırığına uyğun olaraq şirkətlərin nümayəndələri Sübhan Kazımovla əlaqə saxlayıb və ona hansısa məbləğdə pul vəsaiti verib, ya da birbaşa Vidadi Zeynalovun özü ilə əlaqə saxlayıb pulu ona təqdim verirdilər. Sübhan da pulu qəbul etdiyi kimi, yəni açıq şəkildə deyil, bağlamada Vidadi Zeynalova çatdırmaq üçün ona və ya Vüqar Əfəndiyevə verirdi. Mən özüm də pulları bu cür bağlamada Vidadi Zeynalova çatdırmışam”. Bəybalayevin dediyinə görə, ona sonradan məlum olub ki, Vidadi Zeynalov həmin vəsaitdən nazirin göstərişinə uyğun olaraq konkret vəzifəli şəxslərə və onları himayə edən başqa şəxslərə “paket” şəklində aylıq ödənişlər edib. Ayda 30 min alırmış, ancaq hərdən... Ancaq istintaqda Vidadi Zeynalov deyib ki, “Azərpoçt”dan əsasən ayda 30 min manat olmaqla “haqq” alırdı və pulların 5 faizini də Bəybalayevə verirdi. Aparat rəhbəri deyib ki, “Azərpoçt”u hər ay “sağmaq” mümkün olmurdu, çünki bəzi hallarda bu idarə ziyanla işləyirdi. V.Zeynalovun bildirdiyinə görə, o, “Azərpoçt”MMC-dən və digər strukturlardan yığılan aylıq haqqa dair yazılı hesabat hazırlayıb nazirə təqdim edirdi. Nazir isə pulları necə bölüşdürmək barədə tapşırıq verirdi. “Bəzən elə olurdu ki, yığılan pullardan artıq qalırdı, onu da növbəti aya saxlayırdıq”-Zeynalov deyib. Keçmiş Aparat rəhbəri “Azərpoçt” MMC-dən pulları ona Qəmbər Bəybalayev və ya baş mühasib Vüqar Əfəndiyev çatdırırdı. Ancaq “Azərpoçt” MMC rentabelli təşkilat olmadığından bu müəssisə üzərindən pulları həzm-rabedən keçirməyin başqa yollarını fikirləşiblər. Zeynalov deyir ki, nazirlik büdcə vəsaitləri hesabına və nazirliyin digər rentabelli təşkilatlarının hesabından həmin MMC üçün avadanlıqların alınması, yeni binaların tikilməsi və təmiri üçün Nazirliyin digər rentabelli təşkilatlarından borc adı altında pul vəsaiti köçürüb. Vidadi Zeynalov: “35 faizlik “otkat” alırdıq...” Zeynalov deyir ki, bu köçürmələr 2009-2015-ci illərdə olub. Pullar köçürülməzdən əvvəl o, Bəybalayevə və Əfəndiyevə tapşırırmş ki, həmin vəsaitlər hansı şirkətlərin hesablarına köçürülməlidir. Və bu pulun bir qismi tikinti işlərinə xərclənməli, qalanı isə “otkat” şəklində nazirliyə geri qayıtmalı idi. Zeynalovun dediyinə görə, MMC-yə ayrılan pullardan “otkat” cəmi 35 faiz təşkil edirdi. Ancaq bəzən bu faiz alınmırdı, çünki şirkətlərin bir qismi pulu qaytarmaq istəmirdi. Aparat rəhbərini deyir ki, “otkat”ın 5 faizini “Azərpoçt”un rəhbərliyinə verirdi. 30 faizi isə nazirliyə çatırdı. Baş mühasib Vüqar Əfəndiyevin istintaqa verdiyi ifadədən isə məlum olur ki, “Azərpoçt” MMC üzərindən pulların mənimsənilməsi əməliyyatında iştirak edən şirkətlərin bir qismi bunlardır: “Avtomatika-Mexanika” MMC, “Aypara-Co” MMC, “Tikinti-Sevis” MMC, “Universal-Cars” MMC, “Qafqaz-S İnşaat” MMC, “PLZ” MMC, “A Construction” MMC, “Araz İnşaatçı” MMC, “Cavad-2011” MMC, “PRİ” MMC, “Xəzər” MMC, “Violin Travel” MMC, “Trans Servis” MMC ,“Tələt” MMC. Və baş mühasib də pulların Vidadi Zeynalovun göstərişi ilə bu şirkətlərə köçürüldüyünü, “otkat” şəklində geri alınan pulları isə hər ay aparıb ona verdiyini təsdiq edib.

19 Noyabr 2016 1:23

“Rabitə işi”: Baş mühasib açdı sandığı, tökdü pambığı

“Müqavilələrdə görüləcək işlərin və alınacaq materialların dəyəri real dəyərindən artıq göstərilib, qiymətlər şişirdilib. Qovşaqlarda sənədləşmələr elə aparılıb ki, guya kotirovka sorğusu və ya elan edilmiş tenderdə həmin müəssisələr qalib olub”. “Rabitə çetesi” üzrə həbs olunanların biri də Bakı Telefon Rabitəsi İstehsalat Birliyinin baş mühasibi Anar Mustafayevdir. Virtualaz.org saytı istintaq materiallarına istinadən xəbər verir ki, həbsdə olan baş mühasib yığılan pullardan, şişirdilmiş rəqəmlərdən tutmuş, Rabitə və Yüksək Texnologiyaları Nazirliyinin aparat rəhbəri Vidadi Zeynalova apardığı “bağlamalar”dan da danışıb. A.Mustafayev BTRİB-də əvvəl anbardar, elektromexanik, mühasib, daha sonra isə baş mühasib vəzifələrində işləyib. İfadəsində göstərib ki, Bakı Telefon Rabitə İstehsalat Birliyinin strukturuna 11 qurum – 6 rayon telefon qovşağı, bundan başqa “AzEuroTel”, “Bakı Kabel Qovşağı”, Rabitə qurğularının təmiri idarəsi, Bakı Avtomat telefon qovşağı və Layihə axtarış kontoru daxil olub. Bu qurumların isə ayrıca mühasibatlığı olub. Həmin mühasibatlıqlarda aparılan hesabatlar barədə BTRİB-ə rüblük, yarımillik və illik hesabatlar verilib. Hər bir struktur bölmənin də ayrıca bank hesabı olub. Qovşaqlar bütün hesablaşma və ödənişləri BTRİB-in razılığı ilə yerinə yetiriblər. Görülən işlərə görə müqavilələr bağlanılıb, müqavilələr üzrə işlərin görülməsinə nəzarət edilib. Görülən işlərə görə isə BTRİB-in rəhbərliyinin şifahi göstərişinə əsasən qovşaqlar tərəfindən ödənişlər aparılıb. Qovşaqların gəliri əhaliyə göstərilən telefon xidməti, abunə haqqı, internet xidməti, servis xidmətləri hesabına formalaşırmış. A.Mustafayev Birliyin uçot işini təşkil etdiyini deyib: ”Qovşaqlara görülmüş işlərə görə özəl təşkilatlara ödəniş aparılması barədə müvafiq göstərişlər verilirdi. Qovşaqlar üzrə işləri əsasən “Bakı Rabitə Tikinti Təchizat” MMC, ”Təmir Tikinti Servis” MMC, eyni zamanda “Rabitə Mülki Tikinti” MMC və “3 nömrəli Təmir Tikinti” MMC-lər icra edirdi. Həmin özəl təşkilatların rəhbərləri - Bayram Vəliyev, Emin Məmmədov və birliyin baş direktoru Beytulla Hüseynovla yaxın münasibətimiz vardı. “Bakı Rabitə Tikinti Təchizat“ MMC-nin əvvəlki təsisçisi isə Beytulla Hüseynovun həyat yoldaşı idi. Həmin müəssisə Bayram Vəliyevin adına sənədləşdirilmişdi. Amma faktiki olaraq Beytulla Hüseynovun özünə məxsus idi”. Baş mühasib ifadəsində göstərib ki, görülmüş işlərə və alınmış materiallara görə pul vəsaitləri adları çəkilən özəl cəmiyyətlərə köçürülüb. Həmin müəssisələr Beytulla Hüseynovun özünə və ona yaxın şəxslərə məxsus olub. B.Hüseynovun tapşırığı ilə pul vəsaitlərinin həmin müəssisələrə köçürülməsi barədə qovşaq rəislərinə göstəriş verib, müəssisə rəhbərləri ilə Beytulla Hüseynov arasında köçürülən vəsaitin hansı hissəsinin sonuncuya qaytarılması barədə əvvəlcədən razılaşma olub. Qovşaqlarda sənədləşmələr elə aparılıb ki, guya kotirovka sorğusu və ya elan edilmiş tenderdə həmin müəssisələr qalib olub. Daha sonra isə qovşaqla işi görəcək və material satacaq həmin müəssisə arasında podrat müqavilələri bağlanılıb, müqavilələrdə görüləcək işlərin, alınacaq materialların dəyəri real dəyərindən artıq göstərilib, qiymətlər şişirdilib. Şişirdilmiş rəqəmlər həmin cəmiyyətlərin bank hesablarına köçürülüb. Özəl cəmiyyətlərin rəhbərləri Bayram Vəliyev və Emin Məmmədov 2005-ci ilin may ayından 2007-ci ilin sonuna kimi olan dövr ərzində köçürülən vəsaitin ƏDV-siz hissəsindən 15 faiz, 2008-2009-cu illər ərzində 20 faiz, 2010-2013-cü illər ərzində 25 faiz, 2014-cü ilin yanvar ayından 2015-ci ilin sentyabr ayının axırına kimi olan dövrdə isə 30 faizini nağd olaraq A.Mustafayevə verib. A.Mustafayev isə öz növbəsində Bayram Vəliyev və Emin Məmmədovun ona verdiyi pulları hesabatı ilə birlikdə hər ayın sonunda, ya da növbəti ayın əvvəlində Beytulla Hüseynova çatdırıb: ”Əvvəlki dövrlərdə hər ay Beytulla Hüseynova verdiyim pulların miqdarını dəqiq xatırlamıram. Lakin 2015-ci ilin yanvar ayından həmin ilin sentyabr ayına kimi olan dövrdə isə hər ay Beytulla Hüseynova 270-310 min manat məbləğində pul vermişəm. Eşitdiyimə görə, o da hər ay nazirliyin Aparat rəhbəri Vidadi Zeynalova pul verib”. Baş mühasib deyir ki, B.Hüseynov hər ay qeyri-qanuni yolla əldə olunan puldan ona 2500 manat, sonrakı illərdə isə 4000-7000 manat pul verib. Həmçinin ifadəsində göstərib ki, 2009-2015-ci illərdə BTRİB-ə və onun struktur qurumları olan telefon qovşaqlarına əhaliyə, müəssisə və təşkilatlara, özəl təşkilatlara göstərilən rabitə xidmətlərindən, həmçinin dövlət büdcəsindən, Rabitə və Yüksək Texnologiyalar Nazirliyinin struktur qurumu olan “Azintelekom” MMC-dən də vəsaitlər daxil olub. Baş mühasib 2009-2015-ci illərdə BTRİB və onun struktur bölmələri üzrə görülən işlərin və alınan materialların qiymətinin artırılmasının təşkilatçısı olmadığını desə də, B.Hüseynovun göstərişi ilə Vidadi Zeynalova “bağlama” apardığını etiraf edib: ”Baş direktor Beytulla Hüseynovun göstərişi ilə Nazirliyin Aparat rəhbəri Vidadi Zeynalova bir-iki dəfə bağlama vermişəm. Lakin həmin bağlamanın içərisində nə olduğunu bilməmişəm. İşlərin görülməsi, materialların alınması üzrə qiymətlərin artırılması ilə əldə olunan vəsaitdən mənə də pul verilib. Hər ay 2000, ya da 2500 manat pul almışam”. Faktinfo.az

18 Noyabr 2016 6:04

“Vidadi Zeynalova hər ay 500 min manat vermişik” – Baş direktordan ŞOK İFADƏ

“Aztelekom” İstehsal Birliyinin sabiq baş direktoru Məhəmməd Məmmədovun istintaqa verdiyi ifadə məlum olub. Lent.az-ın ittiham aktına istinadən məlumatına görə, Məhəmməd Məmmədov ifadəsində bildirib ki, 2004-cü ildən “Aztelekom” İstehsalat Birliyinin baş direktoru vəzifəsində işləyib: “2015-ci ildə “Aztelekom” İstehsalat Birliyinin bazasında “Aztelekom” MMC təsis edildi. Cəmiyyət Rabitə və Yüksək Texnologiyalar Nazirliyinin struktur qrumu olduğundan MMC-nin fəaliyyətinə nazirliyin rəhbərliyi, yəni nazir Əli Abbasov, nazir müavinləri İltimas Məmmədov və Elmir Vəlizadə, aparat rəhbəri Vidadi Zeynalov nəzarət edirdi. İltimas Məmmədov texniki məsələlərə, Elmir Vəlizadə informasiya texnologiyalarına, Vidadi Zeynalov isə maliyyə məsələlərinə nəzarət edirdi. “Aztelekom” MMC-nin baş mühasibi Oktay Rüstəmov nazirliyin nomenklaturası olduğuna görə o, birbaşa Vidadi Zeynalovla hesablaşırdı. Baş mühasibin işə qəbulu, işdən azad olunması, məzuniyyət və ezamiyyə əmrləri birbaşa nazirlik tərəfindən verilirdi. Vidadi Zeynalov Oktay Rüstəmovun özünə göstəriş vermişdi ki, aylıq olaraq pul toplayıb ona təqdim etsin. Oktay Rüstəmov tərəfindən Vidadi Zeynalova 2009-2013-cü illərdə hər ay stabil olaraq 500.000 manat, 2014-2015-ci illərdə isə aylıq 200.000 manat pul verilib. Qeyd edilən vəsaitlər Oktay Rüstəmov tərəfindən nağd olaraq toplanıb, həmin proseslərə müdaxilə etmək, qarşısını almaq səlahiyyətlərim yox idi. Sadəcə olaraq, cəmiyyətin baş direktoru kimi gedən proseslərdən məlumatım olurdu". Sabiq baş direktor ifadəsində bildirib ki, RYTN-nə tabe olan struktur qurumlardan beynəlxalq trafik mübadiləsini təşkil edən “Azintelekom” MMC olub: "Beynəlxalq telefon danışıqlarının mübadiləsi “Azintelekom” MMC ilə “Aztelekom” MMC-nin arasında bağlanmış qarşılıqlı hesablaşma müqaviləsi əsasında həyata keçirilib. Müqavilənin şərtlərinə görə xarici dövlətlərdən Azərbaycan Respublikasının ərazisində fəaliyyət göstərən “Aztelekom” MMC-nin abunəçilərinə daxil olan telefon zənglərinə görə “Azintelekom” MMC “Aztelekom” MMC-yə, “Aztelekom” MMC-nin telefon abunəçilərindən xarici dövlətlərə edilən zənglərə görə isə “Aztelekom” MMC “Azintelekom” MMC-yə ödənişləri həyata keçirib. Beynəlxaq danışıq trafikinə görə xidmət göstərdiyi üçün “Azintelekom” MMC-dən “Aztelekom” MMC-nin hesabına aylıq 1.000.000-2.000.000 manat arası vəsait köçürülüb. “Azintelekom” MMC-nin hesabından köçürülən vəsait birbaşa və ya dolayı yolla Vidadi Zeynalova ödənilib. Belə ki, Vidadi Zeynalov baş mühasib Oktay Rüstəmova göstəriş verdiyi üçün “Azintelekom” MMC-dən daxil olan vəsait onun dediyi müəssisələrə köçürülüb. Podratçı təşkilatların hesabına köçürülmüş vəsaitlərin müəyyən hissəsi, vəsaitlərin əsas hissəsi isə “Optik Rabitə Montaj”, “Optik Rabitə Tikinti və Quraşdırma”, “Rabitəçi İstirahət Bazası”, “Qafqaz-S İnşaat” və “Komplas” MMC-lərin hesablarına köçürülməklə, müxtəlif müqavilələr əsasında nağdılaşdırılaraq Oktay Rüstəmovun vasitəsi ilə Vidadi Zeynalova verilib. Bütün ödənişlər bank hesabları vasitəsi ilə köçürülürdü. “Aztelekom” MMC-nin bank hesabı “Kapitalbank” ASC-nin Rabitə filialında olub. “Aztelekom” MMC kimi Rabitə və Yüksək Texnologiyalar Nazirliyinin tabeçiliyinə olan digər struktur qurumlarının rəhbərləri tərəfindən aparat rəhbəri Vidadi Zeynalova aylıq vəsait vermələrini eşidirdim, həmin ödənişlərin hansı məbləğ təşkil etməsini bilmirdim. Qeyd edək ki, 2015-ci ilin noyabr ayının 13-də Baş Prokurorluğun Rabitə və Yüksək Texnologiyalar Nazirliyindəki həbslərlə bağlı yaydığı rəsmi məlumata görə, nazirliyin Aparat rəhbəri V.Zeynalovun qulluq mövqeyindən sui-istifadə edərək nazirliyin strukturuna daxil olan ayrı-ayrı qurumların vəzifəli şəxsləri ilə qabaqcadan razılaşmaqla həmin strukturlar tərəfindən işlərin görülmədiyi, tam yerinə yetirilmədiyi, avadanlıqlar alınmadığı, istifadə olunan avadanlıqların, xidmətlərin qiymətlərinin isə 4-5 qat şişirdilməsi və digər üsullarla işlərin və xidmətlərin guya yerinə yetirilməsini özlərinin himayə etdikləri, yaxın münasibətdə olduqları şəxslərin adına olan özəl şirkətlər tərəfindən saxta sənədlər əsasında rəsmiləşdirməsini təmin etməklə müvafiq müəssisələrin ayrı-ayrı banklardakı hesabına köçürülmüş 73 milyon 590 min manat pul vəsaitinin nağdlaşdırılmaqla mənimsənilməsini və israf edilməsini təşkil etməsində şübhələr üçün əsaslar müəyyən edilib. Bundan başqa, Baş Prokuror yanında Korrupsiyaya qarşı Mübarizə Baş İdarəsi tərəfindən RYTN sistemində həyata keçirilmiş yoxlamalar nəticəsində “Aztelekom” MMC-nin sabiq baş direktoru M.Məmmədov, "Bakı Telefon Rabitəsi" İstehsalat Birliyinin sabiq rəhbəri B.Hüseynov, "Bakı Telefon Rabitəsi" İstehsalat Birliyinin baş mühasibi A.Mustafayev, “AzİnTelekom” MMC-nin sabiq baş direktoru C.Cəfərov, “Azərpoçt” MMC-nin sabiq baş direktoru Q.Bəybalayev, “Optik Rabitə, Tikinti və Quraşdırma” MMC-nin baş mühasibi S.Hümbətov, həmçinin E.Məmmədov, “Bakı Telefon Rabitəsi” İstehsalat Birliyinin (BTRİB) Nizami telefon qovşağının sabiq rəisi F.Seyidov və həmin birliyin baş mühasibi R.Məmmədov, “Bakı Rabitə Təmir Tikinti” və “Təmir Təchizat Servis” MMC-lərinin direktoru B.Vəliyev, "Optik Qurğular" İdarəsinin rəisi N.Məmmədov və “Aztelekom” MMC-nin baş mühasibi O.Rüstəmov da saxlanılıb. Daha sonra məhkəmə onlar barəsində həbs qətimkan tədbirinin seçilməsi barədə qərar verib. RYTN-in mənimsəmədə və vəzifə səlahiyyətlərindən sui-istifadə etməkdə təqsirləndirilən 11 keçmiş əməkdaşı ümumilikdə 40 milyon manat pulu mənimsəməkdə ittiham olunurlar. İittiham aktına əsasən, A.Mustafayev 567 min, E.Məmmədov 7 milyon 700 min, O.Rüstəmov 250 min, S.Hümbətov 600 min, Q.Bəybalayev 2 milyon, C.Cəfərov 1,5 milyon, B.Vəliyev 204 min, V.Zeynalov 8 milyon, B.Hüseynov 10 milyon və N.Məmmədov isə 4 milyon manat mənimsəməkdə təqsirli bilinirlər. V.Zeynalov, B.Hüseynov, A.Mustafayev, E.Məmmədov, M.Məmmədov, O.Rüstəmov, N.Məmmədov, S.Hümbətov, Q.Bəybalayev Cinayət Məcəlləsinin 179.3.1-ci (mənimsəmə və ya israf etmə, mütəşəkkil dəstə tərəfindən törədildikdə), 179.3.2-ci (mənimsəmə və ya israf etmə, külli miqdarda törədildikdə), 29, 179.3.1-ci (mənimsəmə və ya israf etməyə cəhd, mütəşəkkil dəstə tərəfindən törətməyə cəhd), 29, 179.3.2-ci (mənimsəmə və ya israf etməyə cəhd, külli miqdarda törətməyə cəhd),308.2 (vəzifə səlahiyyətlərindən sui-istifadə) və 313-cü (vəzifə saxtakarlığı), C.Cəfərov 179.3.1-ci (mənimsəmə və ya israf etmə, mütəşəkkil dəstə tərəfindən törədildikdə), 179.3.2-ci (mənimsəmə və ya israf etmə, külli miqdarda törədildikdə) və B.Vəliyev isə 179.3.1-ci (mənimsəmə və ya israf etmə, mütəşəkkil dəstə tərəfindən törədildikdə), 179.3.2-ci (mənimsəmə və ya israf etmə, külli miqdarda törədildikdə), 308.2 (vəzifə səlahiyyətlərindən sui-istifadə) və 313-cü (vəzifə saxtakarlığı), 213.2.2-ci (vergi ödəməkdən yayınma, külli miqdarda törədildikdə) maddələri ilə ittiham olunurlar.

18 Noyabr 2016 4:35

Sürücüdən tutmuş nazirə, generallara qədər: dövlət necə talan edilib…

KİV-lər Rabitə və Yüksək Texnologiyalar Nazirliyinin hazırda həbsdə olan və məhkəməsi keçmiş yüksək vəzifəli şəxslərinin ibtidai istintaqa verdikləri ifadələrdən epizodları yayır. Virtualaz.org xəbər verir ki, bu ifadələrdə səslənən faktlar və rəqəmlər nazirlikdə hökm sürən dəhşətli korrupsiyanı gözlər önünə sərir. Belə məlum olur ki, rabitə sahəsindən daxil olan gəlirlər, habelə dövlət büdcəsindən Nazirliyə ayrılan vəsaitlər açıq-aşkar talan edilib, aylıq “paket”lər halında nazirliyin vəzifəli şəxsləri, o cümlədən keçmiş nazir Əli Abbasov arasında bölüşdürülüb. Habelə vəzifəli şəxslərin şəxsi xərclərinə, özlərinə villalar tikməsinə yönəldilib. Və bu nazirliyə “krışalıq” edən MTN-in generallarına da hər ay “haqq” ödənilib. Rabitə və Yüksək Texnologiyaları Nazirliyinin həbsdə olan aparat rəhbəri Vidadi Zeynalov  ifadəsində elan edilmiş ittiham üzrə özünü təqsirli bilərək göstərib ki, Nazirlikdə işlədiyi dövrdə Bakı Telefon Rabitəsi İstehsalat Birliyinin (BTRİB) rəisi Beytulla Hüseynov 2009-cu ildə mənə ayda 200.000 manat, sonradan birliyin gəlirləri artdığından 2012-ci ildə aylıq olaraq 300.000 manat, bəzi hallarda, yəni həmin ilin yanvar-fevral aylarında 500.000-600.000 manat məbləğində pul verib. V.Zeynalovun bildirdiyin görə, Beytulla Hüseynov bu aylıq “haqqı” ona nazir Əli Abbasovun göstərişi ilə verirdi. Belə məlum olur ki, hər ayın sonunda Beytulla Hüseynov Əli Abbasovun qəbuluna gələrək birliyin gəlirləri, verəcəyi pul barədə məlumat verib: “Beytulla Hüseynov nazirin qəbulundan çıxandan sonra mənimlə görüşürdü və bildirirdi ki, birliyin baş mühasibi Anar Mustafayev mənimlə əlaqə saxlayacaq. Bir müddət sonra Anar Mustafayev mənim yanıma gələrək birliyin gəlirləri, yuxarıda qeyd edilən pul məbləğlərini və yazılı qeydləri mənə verirdi. Mən də onun gətirdiyi məlumat əsasında birliyin gəlir və xərclərini hesablayıb ümumi məbləğ tərtib edib Əli Abbasova verirdim. Aldığım pulu isə otağımdakı seyfdə saxlayırdım”. Bundan başqa, V. Zeynalov ifadəsində göstərib ki, aylıq pul verənlər BTRİB və “Aztelekom” MMC olub. “Azərpoçt” MMC-dən hər ay təqribən 50 min manat, Məlumat Hesablama Mərkəzindən hər ay 50 min manat, Beynəlxalq Əlaqələr və Hesablama Mərkəzindən isə 220.000-240.000  manat məbləğində pul verilib. Lakin həmin struktur bölmələri həmin məbləğləri mütəmadi olaraq verməyib. Elə vaxtlar olub ki, gəlirləri olmayıb və həmin strukturlar pul verməyib. Bundan əlavə, qoyulmuş qaydaya görə həmin idarələr tərəfindən verilən pulların 25-30 faizi onların özlərinə verilib. BTRİB və “Aztelekom” MMC üzrə verilən aylıq puldan onlara verilməyib. Belə ki, onların fəaliyyət sahələri nisbətən geniş olub. Müəyyən olunmuş aylıq pul vəsaitlərini verdikdən sonra qalan vəsaitlər onlara qalıb. Bu qayda ilə həmin idarələrə ayda təxminən 50.000-100.000 manat pul qalıb. “Aztelekom” MMC-dən hər ay pulu cəmiyyətin direktoru Məmməd Məmmədov və ya onun Qulu adlı köməkçisi, həmçinin cəmiyyətin baş mühasibi Oqtay adlı şəxs verib. V. Zeynalov ifadəsində bildirib ki, qeyd olunan ödənişlərlə bağlı hər birliyin və idarənin rəhbəri nazirə əvvəlcədən məlumat verib və verəcəkləri pulun miqdarını onunla razılaşdırıblar. Onda toplanan pullar isə nazirin göstərişi ilə paylanılıb. Nazirin tapşırığı ilə bir il yarım ərzində həmin puldan hər ay 50.000 ABŞ dolları MTN-in Monitorinq Xidmətinin rəisi Teymur (MTN-in Monitorinq Mərkəzinin sabiq rəisi, general-mayor Teymur Quliyev) adlı şəxsə onun sürücüsü, 2011-ci ildən başlayaraq isə hər ay 100.000 ABŞ dollarını nazirliyin kuratoru Sübahir (MTN-in Transmilli İqtisadi Cinayətkarlığa Qarşı Mübarizə Baş İdarəsinin sabiq rəisi, general-mayor Sübahir Qurbanov-red.) adlı şəxsə sürücüsü vasitəsi ilə göndərib.  Bundan əlavə, hər ay toplanan puldan 200.000-300.000 manat nazirin şəxsi işlərinə sərf olunması üçün onun özünə verib. 520.000 manat isə nazirliyin şöbə rəisləri vasitəsi ilə nazirliyin əməkdaşlarına paylanılıb. Təxminən 50.000 manat digər xərclərə, o cümlədən bayram şənliklərinə, qonaqlara hədiyyə alınmasına sərf edilib. Bundan, əlavə həmin puldan hər ay əvvəllər 30.000 manat, son iki ildə isə 50.000 manat onun özünə (“paket” şəklində) ayrılıb və ona verilib. Nazir müavinlərinə ayda əvvəllər 15-20 min manat, son iki ildə isə hər birinə 30 min manat “paket” verilib. BTRİB-in keçmiş rəhbəri B.Hüseynov  isə ifadəsində deyib ki, 2009-2015-ci illərdə nazirliyin rəhbərliyi tərəfindən ona BTRİB üzrə aparılan təmir-tikinti işləri və alınan mal-materiallar üzrə qiymətlərin 20-25 faiz şişirdilib əldə olunan vəsaitlərin 80 faizinin nazirliyə verilməsi barədə tapşırıq verilib.  Həmin göstərişin icrasını təmin etmək məqsədilə BTRİB və onun struktur bölmələri tərəfindən görülən işlər və alınan mal-materiallar üzrə qiymətlərin 20-25 faiz artırılması barədə telefon qovşaqlarının rəhbərlərinə və iş görən təşkilat kimi “Bakı Rabitə Tikinti Təmir” MMC-nin direktoru Bayram Vəliyevə və “Rabitə Mülki Tikinti” MMC-nin direktoru Emin Məmmədova göstəriş verib. Bu vəzifəli şəxslər isə onun göstərişini icra edərək görülən işlərin, alınan mal-materialların qiymətlərini 20-25 faiz artırıb, əldə olunan vəsaitin 5 faizini telefon qovşaqlarının rəislərinə, 5 faizini qovşaqların baş mühasibi və baş mühəndisilərinə verib, mal-material xərcini, əmək haqqı xərclərinı çıxdıqdan sonra qalan vəsaiti onun göstərişi ilə birliyin baş mühasibi A.Mustafayevə ötürüb. O, ifadəsində vurğulayıb ki, keçmiş nazir Əli Abbasovun tapşırığı əsasında birliyin baş mühasibi A.Mustafayev hər ayın sonunda görülən işlər və alınan mal-materiallar üzrə qiymətlərin şişirdilməsi yoluyla əldə olunan vəsaitlər barədə nazirliyin yüksək vəzifəli şəxsinə məlumat verib. Bundan sonra A.Mustafayev birbaşa Aparat rəhbərinə hesabat verib, onun göstərişi ilə əldə olunan vəsaitin 80 faizini sonuncuya verib. Bu qayda ilə A.Mustafayevin vasitəsi ilə ilk aylarda nazirliyin rəhbər şəxslərindən birinə 200.000-250.000 manat, sonrakı aylarda isə 100.000-150.000 manat olmaqla, ümumilikdə 10 milyon  manat pul verib. Bundan əlavə, o, ifadəsində göstərib ki, qiymətlərin şişirdilməsi ilə əldə etdiyi vəsaitdən nazirliyin rəhbər şəxsinə verdiyi hissəsindən sonra qalan vəsaitdən birliyin baş mühasibi A.Mustafayevə ayda “paket” olaraq 7 min manat, “Bakı Rabitə Tikinti Təmir” MMC-nin direktoru B.Vəliyevə  şəklində 1500 manat, birliyin əməkdaşlarına - şöbə rəislərinə “konvert” olaraq ayda 500-700 manat olmaqla qeyd olunan dövr ərzində ümumilikdə hər ayda 4000-5000 manat verilib. Nazir müavini İltimas Məmmədova isə ev tikintisi üçün bir dəfəyə 1,5milyon manat pul verib. O, qiymətlərin şişirdilməsi yolu ilə əldə etdiyi vəsaitdən şəxsən özünə hər ay 25-30 min  manat olmaqla cəmi 1 milyon 200 min manat pul qaldığını, həmin pulu da şəxsi ehtiyaclarına sərf etdiyini bildirib. Xatırladaq ki, keçmiş nazir Əli Abbasov istintaqla anlaşıb və dövlətə vurduğu zərərə görə mənimsədiyi pullardan təqribən 7 milyon manatını geri ödəyib. Göründüyü kimi nazirliyin həbsdəki yüksək vəzifəli şəxsləri dəhşətli korrupsiya və mənimsəmə əməllərini nazirin göstərişi ilə həyata keçirdiklərini deyiblər. Lakin Əli Abbasov barədə cinayət işi qaldırılmayıb... (APA və Report-un materialları əsasında) Faktinfo.az  

17 Noyabr 2016 1:23

«Şəxsi xərclərimə aylıq 200-300 min manat xərclənirdi…» – Əli Abbasovun istintaqa dəhşət saçan etirafı

Rabitə və Yüksək Texnologiyaları Nazirliyinin (RYTN) həbsdə olan aparat rəhbəri Vidadi Zeynalov və digərlərinin işi üzrə sabiq nazir Əli Abbasov ibtidai istintaqa ifadə verib Məlumata görə, iş üzrə şahid qismində dindirilən Əli Abbasov deyib ki, nazirliyin ayrı-ayrı subyektlərindən, eləcə də strukturuna daxil olmayıb tabeliyində olan təşkilatlardan özünün ümumi məlumatı əsasında aylıq olaraq vəsaitlər toplanılıb. Həmin vəsaitlər Vidadi Zeynalovun həmin struktur qurumların rəhbərləri ilə öz aralarında müəyyənləşdirdikləri və razılaşdırdıqları qaydada paylanılıb və digər xərclərə yönəldilib. Bununla bağlı mütəmadi olaraq Vidadi Zeynalovun ümumi hesabatını qəbul edib. Bəzi hallarda həmin struktur qurumların rəhbərləri özləri ona şəxsən məlumat veriblər. Vidadi Zeynalova hansı qurumdan nə qədər vəsait alması barədə göstəriş verməyib, yalnız nazirliyin ümumi xərclərinin tənzimlənməsini tapşırıb. Sonuncu hesabatlarında toplanmış vəsaitlərin ümumi miqdarı və kimlərə paylandığını bildirsə də, konkret olaraq kimə hansı miqdarda vəsait verilməsini bilməyib. Sabiq nazir özünün şəxsi xərclərinə aylıq olaraq 200.000-300.000 manat vəsait xərclədiyini bildirib. Bundan əlavə nazir müavinlərinə əvvəllər 30.000 manat, son iki ildə isə 50.000 manat pul verilib. Bundan başqa, nazirliyin digər əməkdaşlarına da maddi ehtiyaclarını ödəmək üçün pullar verilib. Bayram şənliklərinin və digər mədəni-kütləvi tədbirlərin keçirilməsinə də vəsait xərclənib.Faktinfo.az

16 Noyabr 2016 5:24

Prezident İlham Əliyev: “Azərbaycanın həyata keçirdiyi siyasət bütün region üçün vacibdir”

Noyabrın 16-da Heydər Əliyev Fondunun və AZƏRTAC-ın birgə təşkilatçılığı ilə Bakıda, Heydər Əliyev Mərkəzində Dünya Xəbər Agentliklərinin V Konqresinin, Asiya və Sakit Okean Ölkələri İnformasiya Agentlikləri Təşkilatının (OANA) XVI Baş Assambleyasının birgə açılış mərasimi keçirilir Azərbaycan Respublikasının Prezidenti İlham Əliyev açılış mərasimində iştirak edir. Dövlətimizin başçısı açılış mərasimində nitq söylədi. "Belə mühüm, qlobal miqyaslı tədbiri keçirməkdən qürur duyuruq", - deyən Azərbaycan Prezidenti bildirib ki, tədbir iştirakçıları həm də ölkəmizi tanımaq imkanı əldə ediblər. Bu tədbiri media tərəfindən ölkəmizin nailiyyətlərinə verilən qiymət kimi qəbul edirik. Müstəqilliyimizin 25 ili göstərir ki, biz ölkədə mətbuat azadlığını, bir çox azadlıqları təmin etmişik. Prezident qeyd edib ki, Azərbaycanda ilk demokratik respublika 98 il əvvəl qurulub. İlk demokratik respublika iki il yaşasa da, demokratik ənənələrin əsasını qoyub. O vaxt qadınlara seçib-seçilmək hüququ verilmişdi, o vaxt hələ bir çox Avropa ölkəsində belə hüquq yox idi. Bu gün isə Azərbaycan beynəlxalq arenada yüksək nüfuza malik ölkədir. Azərbaycan bir neçə il əvvəl 155 ölkənin dəstəyi ilə BMT Təhlükəsizlik Şurasının qeyri-daimi üzvü seçildi. Beynəlxalq birliyin əksər üzvü Azərbaycanı dəstəklədi. Bu, fəaliyyətimizə, məsuliyyətli, etibarlı tərəfdaş olmağımıza verilən dəstək idi. Azərbaycan müstəqil xarici siyasət yürüdən dövlətdir və bu siyasət milli maraqlara söykənir, heç kəsə qarşı yönəlməyib. Azərbaycanın gələcəyi öz əlindədir. Dövlətimizin başçısı vurğuladı ki, Azərbaycan az ölkələrdəndir ki, həm İslam Əməkdaşlıq Təşkilatının, həm də Avropa Şurasının üzvüdür. 2008-ci ildə Avropa və İslam ölkələrinin mədəniyyət nazirlərinin toplantısını keçirdik. Bu, tarixi nailiyyət idi. Sonra bu, "Bakı Prosesi" adını aldı. Xalqımızın multikulturalizm ənənələri müxtəlif dinlər, xalqlar arasında sağlam münasibətlərin qurulması baxımından parlaq nümunədir. Prezident İlham Əliyev dedi ki, bu il oktyabr ayında Roma Papası Fransisk Azərbaycana səfər etdi, dini icmaların rəhbərləri ilə görüşdü. Roma Papası Bakıda dinlərarası dialoqun mövcudluğundan danışdı. Bu, bizim əldə etdiyimiz nəticədir. Çünki bu gün dünyada dini, etnik toqquşmaları görürük və bu, bizi çox narahat edir. Ona görə də biz öz multikulturalizm siyasətimizi ortaya qoymuşuq. Biz əməkdaşlığın tərəfdarıyıq. Dövlətimizin başçısı qeyd etdi ki, müxtəlif etnik və dini qrupların nümayəndələri Azərbaycanda sülh və anlaşma şəraitində yaşayırlar. Biz istərdik ki, regionda və dünyada da bu sahədə müsbət inkişaf getsin. Ermənistan-Azərbaycan, Dağlıq Qarabağ münaqişəsindən danışan prezident İlham Əliyev Dağlıq Qarabağın Azərbaycanın əzəli torpağı olduğunu vurğulayaraq dedi ki, SSRİ dövründə Azərbaycanın muxtar vilayəti olan Dağlıq Qarabağ və ona bitişik 7 rayon işğal edilib, 1 milyondan çox azərbaycanlı qaçqın və məcburi köçkün vəziyyətinə düşüb. Ermənistan tərəfindən etnik təmizləmə siyasəti aparılıb. BMT Təhlükəsizlik Şurasının 4 qətnaməsində işğalçı erməni qoşunlarının işğal edilmiş ərazilərdən çıxarılması tələbi qoyulub. Ancaq Ermənistan bu tələblərə məhəl qoymur. Təhlükəsizlik Şurasının qətnamələrinin icrası ilə bağlı mexanizmlərə baxılmalıdır. Bir çox hallarda BMT Təhlükəsizlik Şurasının qətnamələri bir neçə gün ərzində həyata keçirilir, bəzi qətnamələrin icrası isə illərlə çəkir. İslam Əməkdaşlıq Təşkilatı, Qoşulmama Hərəkatı və Avropa strukturları da oxşar qərarlar qəbul ediblər. Lakin Ermənistan o sənədlərə də məhəl qoymur. İşğal olunmuş ərazilərdə məscidlər, abidələr dağıdılıb. ATƏT-in göndərdiyi iki faktaraşdırıcı missiyanın hesabatları da bunu təsdiqləyib. Bakıda isə erməni kilsəsi mühafizə olunur. Prezident İlham Əliyev bir daha vurğuladı ki, Dağlıq Qarabağ münaqişəsi Azərbaycanın ərazi bütövlüyü çərçivəsində həll olunmalıdır. Çünki Azərbaycanın ərazi bütövlüyü digər ölkələrin ərazi bütövlüyü qədər dəyərlidir. Keçmiş sovet məkanında münaqişələrin ərazi bütövlüyü çərçivəsində həlli prinsipi Dağlıq Qarabağ münaqişəsinə də tətbiq edilməlidir. Ölkəmizin iqtisadi uğurlarından danışan dövlətimizin başçısı diqqətə çatdırdı ki, Azərbaycan iqtisadiyyatı bir mənbədən asılı deyil, şaxələndirilib. İqtisadiyyatımızın şaxələndirilməsi davam edəcək. Azərbaycanın təşəbbüsü ilə Xəzər dənizi, Aralıq dənizi, Asiya ilə Avropa birləşdirilir. "Cənub Qaz Dəhlizi" layihəsinə 45 milyard dollar sərmayə qoyulub. Bu, Azərbaycanın böyük qaz ixracatçısına çevrilməsinə imkan verəcək. Bizim enerji əməkdaşlığımız milli maraqlara əsaslanır. Azərbaycan əlverişli coğrafi mövqedə yerləşir, ancaq müvafiq infrastruktur yaradılmalıdır. Şimal-Cənub, Şərq-Qərb dəhlizi Azərbaycanın ixrac və tranzit potensialını genişləndirəcək. Həmin dəhlizlərin qurulması üçün sərmayə qoyuruq, eyni zamanda, qonşularımıza kömək edirik. Təhlükəsizlik olmadan bu layihələrin heç biri həyata keçirilə bilməz. Yaxın ətrafımızda baş verən müharibələr, qarşıdurmalar bizi narahat edir. Dövlətimizin başçısı qeyd etdi ki, Azərbaycanın həyata keçirdiyi siyasət bütün region üçün vacibdir. Prezident İlham Əliyev Azərbaycanda qaçqın və məcburi köçkünlərin problemlərinin həllinə xüsusi diqqət yetirildiyini söyləyərək dedi ki, 250 min qaçqın və məcburi köçkün yeni qəsəbələrdə yerləşdirilib. Azərbaycanda əhalinin təhsilinə xüsusi diqqət yetirilir, bu sahədə 100 faiz göstəriciyə nail olunub. Birinci Avropa Oyunlarının Bakıda keçirildiyini xatırladan Prezident İlham Əliyev diqqətə çatdırdı ki, gələn il Azərbaycanda İslam Həmrəyliyi Oyunları keçiriləcək. Medianın dəstəyi olmadan bu, mümkün deyil.(azərtac)

16 Noyabr 2016 12:57

“Rasim Əkbərov Goranboyda yenə “at oynadır”” – “Pulunun sayını bilmir”

“Rasim Əkbərovla məlum hadisələrdən sonra heç bir əlaqəm yoxdur. Onu bilirəm ki, Goranboyda özü üçün şad-xürrəm yaşayır. O mənada ki, Goranboyda 400-dən artıq şəhid var, amma onların heç birinə heç nə verməyiblər. Rasim Əkbərovun isə böyük daş karxanası var, 100 minlik maşın sürür. Pulunun sayını bilmir”. Bu barədə Modern.az saytına goranboylu Milli Qəhrəman Maşallah Abdullayev məlumat verib. Maşallah Abdullayevin sözlərinə görə, Rasim Əkbərov Goranboyda böyük işləri təkbaşına idarə etmir. “Görünür Rasim Əkbərovun yuxarı dairələrdə kimlərləsə bağlılığı var. Əvvəlki illərdə olduğu kimi, bu gün narkotiklə məşğul olmur. Sadəcə, orta dərəcəli narkomanları müdafiə etmək gücünə malikdir. 400 şəhidin birinə bir sot torpaq sahəsi verməyiblər. Amma Rasim Əkbərov həbsdən çıxıb Goranboya gələndən sonra ona daş karxanası idarə etməyi tapşırıblar. Bu işlərdən icra başçısının da xəbəri var. O, özbaşına bu var-dövlətə sahib olmayıb. Goranboyun icra başçısı da dövlətə xəyanət edir. Rasimə çox böyük səlahiyyət verib. İcra başçısı Goranboyda özbaşınalıq edir”. Milli Qəhrəman onu da əlavə edib ki, vaxtilə Rasim Əkbərova etdiklərinə görə çox peşmandır. “Rasim Əkbərova “Milli Qəhrəman” adının verilməsinə görə özümü günahkar hesab edirəm. Bunu etməklə çox böyük cinayət törətmiş oldum. Çünki o zaman rəhmətlik Əbülfəz Elçibəydən xahiş etmişdim ki, ona bu adı versin. Bu adam narkotik istifadəçisi olub. Ona ad veriləndə çağırıb təbrik elədim. Komandir təyin etdim. Ona ad veriləndən sonra əlini “Quran”a basıb dedi ki, “mən dövlətçilyimizə xidmət edəcəm”. Lakin qısa müddət ərzində Surət Hüseynovun dəstəsinə qoşuldu və çevrilişdə iştirak etdi”. Rasim Əkbərovun etdiklərinə gəlincə, Maşallah Abdullayev deyib ki, bu gün hardasa peşmandır: “Bu adam çox pis əməllər törədib. Vaxtilə dövlətə, xalqa etdiklərinə görə Rasim Əkbərov indi peşmançılıq hissi keçirir”. Xatırladaq ki, Rasim Əkbərov Azərbaycanın Milli Qəhrəmanı adına layiq görülsə də, həbs ediləndə bu fəxri adı ləğv olunub. O, dövlət çevrilişinə cəhddə günahlandırılıb və 15 illik həbs cəzası alıb.

15 Noyabr 2016 6:46

Kim haqlıdır,bəlkə dava “yorğan” davasıdır?!

Gəncə  İmamzadə Kompleksinin axundu Hacı Tahir Abbasovla  Gəncə Şəhər İcra Hakimiyyətinin başçısı Elmar Vəliyev arasında yaşanan gərginlik barədə bir neçə gün əvvəl mətbuatda xəbərlər yayıldı. Əvvəlcə axund  şəhər rəhbərliyini intihar edəcəyi ilə hədələdi, ardınca dövlət büdcəsindən və Prezidentin Ehtiyat Fondundan Gəncə İmamzadə Kompleksinin tikintisi üçün ayrılan 10 milyon vəsaitin talan olunduğu iddiası ilə hüquq-mühafizə orqanlarına şikayət edəcəyini bəyan etdi.Dərhal da sosial şəbəkələrdə Elmar Vəliyevin əleyhinə fikirlər səslənməyə başladı. Saatlar sonra isə bir neçə saytda şəhər rəhbərliyi ilə axundun arasında baş verən gərginliyin İmamzadə Kompleksinin “torqovıy sentr”ə çevrilməsindən,  İmamzadə Kompleksinin tikintisi zamanı orada işləyən fəhlələr üçün hər gün kəsilən iki quzunun Tahir Abbasov tərəfindən  kilosu 3 manata satılmasından  qaynaqlandığına dair xəbərlər yer aldı. Həqiqətdə nə baş verir? Faktinfo.az-ın əldə etdiyi məlumatlara görə bu hadisədən sonra Hacı Tahir Abbasova Gəncədə müəyyən şəxslər tərəfindən “dəstəkləyirik” mesajları göndərilib. Bu da onun göstəricisidir ki, artıq Gəncə şəhərində Elmar Vəliyevin tələblərindən cana yığılan təbəqə var və axundu qabağa verir. Bura  ələlxüsus bəzi idarə, müəssisə rəhbərləri, təhsil  ocaqlarının  direktorları aiddir. Başçıdan müəyyən mənada obyekti əlindən alınmış, dağıdılmış, tənəzzülə  uğramış sahibkarlar da narazıdır. Bu siyahıda zamanla vergi ödəyicisi hesab edilən onlarla narazı  iş adamları da var. Bu da hamısı deyil.Sadəcə tərəflər arasında gərginlik mətbuatın bir neçə gün əvvəl qeyd etdiyi kimi xırda məsələlərdən qaynaqlanmayıb. Hacı Tahir Abbasova gəlincə ,onun da batmanla  ölçülməyəcək nöqsanları var. Bəli, Gəncə  İmamzadə Kompleksinin axundu Hacı Tahir Abbasov qanlı 20 Yanvar 1990-cı il hadisələrində Lifertovo həbsxanasında yatmasından  belə  danışmaqla yeri gələndə şəxsinə faydalana bilib. Gəncə Dini Memarlıq Kompleksinə gəlincə oranı “torqovıy sentr”ə çevirməsi, oradan şəxsi məqsədlər naminə istifadə etməsi həqiqətdir. Hətta onun haqqında bundan on dəfə artığını yazmaq olar. Məsələn, zamanla mətbuat axund Hacı Tahir Abbasovun bina tikdirməsinə, maşın satışı salonunu açmasına, otel biznesi ilə də məşğul olmasına dair iddialar səsləndirib. Gəncə şəhərində 3 nömrəli qəbiristanlığa qardaşı Rəşid Abbasov rəhbərlik edir ki, orada qəbir yerləri 200-300 manatdan aşağı deyil. Bu da şəriət qanunları ilə bir araya sığmayan hərəkətdir. Eləcə də ,bacısının həyat yoldaşı Ələddin (soyadını dəqiqləşdirə bilmədik) Gəncə Əhaliyə Vətəndaşlıq Trestinin müdiridir , onun da işi axund Tahir və qardaşı Rəşad Abbasovlarla əlaqəlidir ki, orada da ürəkaçan heç nə  yoxdu. Yəni,bütün bunların fövqündə Gəncə Şəhər İcra Hakimiyyətinin başçısı Elmar Vəliyevlə birincinin arasında baş verənləri ancaq və ancaq “yorğan davası” kimi xarakterizə etmək olar. O səbəbdən hazırda sosial şəbəkələrdə aparılan müzakirələrdə Elmar Vəliyevin birtərəfli şəkildə tənqid olunması da heç yerində deyil. Fuad İsgəndərov Faktinfo.az

14 Noyabr 2016 5:19

“Hektarlarla torpağı nəvələri üçün zəbt ediblər” – Deputatdan etiraz

“Kimsə hektarlarla torpağı hasarlayıb əkmirsə, həmin torpaqlar alınaraq kənd təsərrüfatı üçün istifadə olunacaq”. Bunu Milli Məclisin Aqrar siyasət komitəsinin sədr müavini Eldar Quliyev deyib. Millət vəkili xatırladıb ki, söhbət pay torpaqlarından getmir: “Bir ara belə fikir yaranmışdı ki, pay torpaqları geri alınacaq. Burada pay torpaqlarından söhbət getmir. 100, 200 və 1000 hektarlarla torpaq sahələri var ki, hasarlanıb və istifadə olunmur. Ölkə başçısı çıxışı zamanı bu məsələyə münasibət bildirib. Qeyd edib ki, zəbt olunan torpaqlar geri alınmalı, həmin sahələr mütləq əkilməlidir. Torpaqların əkilməsində məqsəd odur ki, ölkəmizdə bolluq yaransın. Kənd təsərrüfatı sahəsində bolluq yaranarsa, ərzaq təhlükəsizliyimizi təmin edə bilərik. Həmçinin xaricə məhsul da sata bilərik”. E.Quliyev qeyd edib ki, hazırda ölkəmizdə əkinə yararlı torpaq sahələrinin sayı azdır: “Nə üçün əkinə yararlı min hektarlarla ərazi çəpərlənərək saxlanmalıdır? İnsanlar var ki, bir neçə sot torpaq axtarır ki, əksin, becərsin. Bəziləri isə torpaqları hasarlayıb əkmir. Kimsə hektarlarla torpağı alıb, nəvəsi üçün qoruyur. Bu, düzgün deyil. Torpaqları əkmək lazımdır. Bununla kəndlərdə işsizlik problemi də həll olunar” Xatırladaq ki, Prezident İlham Əliyev noyabrın 12-də Füzuli rayon ictimaiyyətinin nümayəndələri və məcburi köçkünlər ilə görüşündə bu məsələyə toxunub. Ölkə başçısı bildirib ki, zəbt edilən torpaqlar geri alınacaq. “Əgər əlindən alınmağını istəmirsə əkib-becərsin, həm özü pul qazansın, həm də ki, insanlara xeyir versin. Ancaq o torpaqları zəbt edənlər görünür, maraqlı deyillər ki, orada nəsə iş görsünlər. Görünür, onların pulu o qədərdir ki, o torpaqlardan pul qazanmaq fikrində deyillər. Ona görə bu proses davam edəcək. Çünki bu gün kənd təsərrüfatında gedən proseslər artıq öz bəhrəsini verir. Biz pambıqçılığı bərpa etmişik. Hava şəraitinin pisləşməsinə baxmayaraq, – oktyabr ayında aramsız yağışlar yağırdı, qoymurdu ki, məhsul yığılsın, – bu il 60 min ton, yəni, keçən illə müqayisədə iki dəfə çox pambıq tədarük edilib. Amma hələ ki, yığım gedir və biz istədiyimiz rəqəmə çatacağıq. Gələn il isə 250 min ton, bəlkə də 300 min ton pambıq yığılacaq. Biz pambıqçılığın şöhrətini qaytaracağıq. Gələcəkdə bizim planlarımız ondan ibarətdir ki, hər bir rayon özünü təmin edə bilsin. Yəni, bu gün rayonların bir çoxu dotasiya ilə yaşayır. İndi Azərbaycan dövlətinin gücü, maddi imkanları var, biz bunu edirik və edəcəyik. Ancaq hər bir rayon çalışmalıdır ki, öz hesabına yaşasın. Buna imkan var”, – deyə prezident vurğulayıb. Faktinfo.az

14 Noyabr 2016 4:11

ABŞ mətbuatından maraqlı iddia: Tramp prezident olmaya da bilər

  Yalan, yaxud doğru olduğunu bilmirəm, ancaq onu bilirəm ki, ABŞ-da prezident seçkilərini Donald Trampın qazandığı xəbəri yayılan kimi, sosial şəbəkələr maraqlı bir məlumatla alt-üst oldu. İddia edilirdi ki, guya bəzi məmurlar Trampın bu qələbəsinin şərəfinə Bakıda böyük bir şadyanalıq keçiriblər. Məşhur restoranların birində toplanan “Trampsevərlər” ABŞ-ın yeni prezidentinin sağlığına o ki var, “vurublar”. Həmin ziyafətin hələ bir ay davam edəcəyi belə, yayılan xəbərlər arasındaydı. Bu gün ABŞ mətbuatında verilən bir məlumat isə, “Trampsevərlər”in kefinə soğan doğrayacaq. Nədən ki, xəbərə inansaq, şadyanalıq üçün çəkilən xərclər bata bilər. Yox, yox, ABŞ mətbuatı konkret olaraq, Bakıdakı ziyafətdən bəhs etməyib. Sadəcə, Trampın prezident seçilməmə ethtimalından yazıb. Strateq.az xəbər verib ki, bəzilərinin kefinə soğan doğrayacaq həmin ehtimalı ABŞ-ın nüfuzlu nəşrlərindən hesab olunan “Newsweek” irəli sürüb. Ehtimal iki əsas versiyaya əsaslanır. İlk versiyaya görə, “Trampsevərləri” sevincdən məhrum edəcək bu ehtimal ona səs verəcəyi güman olunan nümayəndələrin milyarderə arxa çevirməsi ilə baş tuta bilər. Bildirilir ki, ABŞ Konstitusiyasına əsasən, prezidenti birbaşa xalq seçmir. Seçicilər sadəcə öz nümayəndələrini müəyyənləşdirirlər. Həmin nümayəndələr isə namizədlərdən birinə səs verirlər. Hazırkı göstəricilərə görə, seçicilər respublikaçı nümayəndələrə bu səlahiyyəti veriblər. Amma nümayəndələr “sədaqət” sözlərini tutmayıb, Klintona da yönələ bilərlər. Hardasa, bir aydan sonra öz vəzifə borclarını yerinə yetirəcək nümayəndələrin bu addımı Klitonu da prezidentlik kürsüsündə oturda bilər. Maraqlıdır ki, namizədinə xəyanət etmək faktı ABŞ siyasət tarixində, nə az-nə çox, düz 157 dəfə yaşanıb, hətta 1836-cı ildə Virciniya əyalətinin 23 nümayəndəsi bir yerdə sözlərinə xilaf çıxıblar. Lakin namizədlər arasında fərq böyük olduğu üçün bu "xəyanət" əks tərəfin xeyrinə nəticələnməyib. Mümkündür ki, eyni proses yenə təkrarlansın və Trampın sevinci gözündə qalsın. Qeyd edək ki, son seçkinin nəticələrindəki fərq də o qədər də ciddi deyil. Düzdür, Tramp 290, Klinton isə 228 nümayəndəyə sahibdir, amma 21 nəfər respublikaçı namizədin yanından ayrılsa, onun prezident seçilmə ehtimalı da aradan qalxmış olacaq. Deməli, ABŞ-da tarixdə ilk dəfə təkrar seçkiyə getmək durumu da istisna deyil. Klintonun prezident olması üçünsə 32 nümayəndənin Donalda xəyanət etməsi lazımdır. İkinci ehtimal isə ABŞ seçkilərindəki rəsmi nəticələrin hələ də açıqlanmamış olmasıdır. İndiki nəticələr sadəcə, bütün media qurumlarının “Associated Press” xəbər agentliyinin məlumatlarına güvənərək, Trampın 270 baryerini keçib prezident seçildiyini barədə proqnozundan ibarətdir. Üstəlik, bir çox əyalətdə iki namizəd arasında fərq o qədər az ki, rəsmi nəticələr tamamilə fərqli ola bilər…

13 Noyabr 2016 9:53

Hacı Tahir Elmar Vəliyevə qarşı korrupsiya iddiası irəli sürməyə hazırlaşır

Hacı Tahir Elmar Vəliyevə qarşı korrupsiya iddiası irəli sürməyə hazırlaşır Gəncənin icra başçısı Elmar Vəliyevlə İmamzadə Türbəsinin axundu Hacı Tahir Abbaszadə arasında qalmaqal davam edir. Bir neçə gün əvvəl xural.com saytı Hacı Tahir Abbaszadəyə istinadən məlumat yaymışdı ki, Elmar Vəliyev İmamzadə Türbəsinə hücum təşkil edib. Məqsəd axundu həbs etdirmək olub. Hacı Tahir Abbaszadə isə şərlənəcəyi təqdirdə intihara əl atacağını deyib. Gununsesi.info isə məlumat yayıb ki, hazırda Gəncədən kənarda olan Hacı Tahir Abbaszadə Elmar Vəliyevə qarşı korrupsiya iddiası irəli sürəcək. Məlumatda qeyd olunur ki, illərdir icra başçısı tərəfindən sıxışdırılan, hətta son zamanlar həbs edilmə təhlükəsi ilə üzləşən Hacı Tahir Abbaszadə əks-hücuma hazırlaşır. Belə ki, o, dövlət büdcəsindən və Prezidentin Ehtiyyat Fondundan Gəncə İmamzadə Kompleksinin təmiri üçün ayrılan on milyonlarla vəsaitin talan olunduğu iddiası ilə bağlı hüquq-mühafizə orqanlarına şikayətlərdə bulunacaq. Onun əlində kompleksin tikintisi zamanı məsrəflərin şişirdilməsi, habelə, podratçı şirkətlərin pullarının verilməməsi, çoxmilyonluq korrupsiya halları barədə məlumatlar olduğu bildirilir. İmamzadə Kompeksinin yenidən qurulması prosesini Gəncə İcra Hakimiyyəti həyata keçirib. Qafaqaz Müsəlmanları İdarəsi bu prosedən ilk gündən kənarda qalıb. Hacı Tahir Abbaszadə isə saytı bildirib ki, səhhətində ciddi problem var və hazırda sistem altındadır: “Vəziyyətim yaxşı deyil. Bu, birinci hal deyil ki, baş verir. Bu qədər də olmaz. Mən özüm sizinlə əlaqə saxlayıb, danışacam”. Elmar Vəliyevin baş verənlərə münasibətini öyrənmək mümkün olmayıb. İcra başçısının telefonuna cavab verən köməkçisi onun məşğul olduğunu əsas gətirib.

12 Noyabr 2016 11:37

Fakt

Bizi izləyin