Hacı İbrahim aeroportda saxlanılıb

O, Gəncə aeroportundan dostunun özəl təyyarəsi ilə Türkiyəyə uçmaq istəyib “Oliqarxqeyt” işində adı keçən ən iri sahibkarlardan biri - Hacı İbrahim Nehrəmli bir neçə gün öncə Daxili İşlər Nazirliyinin Baş Mütəşəkkil Cinayətkarlığa Qarşı Mübarizə İdarəsinə (BMCQMİ) çağırılaraq saatlarla dindilmişdi. Daha sonra o, azadlığa buraxılmışdı. İki gün öncə isə onu yenidən həmin idarəyə gətiriblər. O, hələ də həmin idarədə saxlanılır. Faktinfo.az -in "Müsavat"a istinadla verdiyi məlumata görə, “Avesta” konserninin rəhbəri olan Hacı İbrahim Nehrəmli mayın 13-də BMCQMİ-yə aparılandan sonra istintaqla aralarında razılaşma əldə edilib. Buna görə də ona saxlanılan digər sahibkarlardan fərqli münasibət göstəriblər, dindirmədən sonra azad ediblər. İş adamı sərbəst buraxılandan sonra mətbuata açıqlama verərək Beynəlxalq Bankdan götürdüyü kredit borclarını mayın 19-na qədər geri qaytarmaq öhdəliyi götürdüyünü açıqlamışdı. Belə görünürdü ki, Hacı İbrahim Nehrəmli Beynəlxalq Bankdan aldığı 78 milyonluq krediti geri qaytarmaq niyyətindədir. Amma belə deyilmiş. Qaynağımızın verdiyi bilgiyə görə, Hacı İbrahim Nehrəmli ölkədən gizli yolla çıxmaq istəyib. O, Gəncə aeroportuna gedərək yaxın dostunun özəl təyyarəsi ilə Türkiyəyə uçmaq istəyib. Lakin təyyarəyə son anda uçuş icazəsi verilməyib. Təyyarədən düşürülən “Avesta” konserninin prezidentini Gəncədən birbaşa BMCQMİ-yə gətiriblər. Hacı İbrahim Nehrəmlinin barəsində məhkəmənin həbs qərarı verəcəyi gözlənilir. Analitik.az saytı Hacı İbrahim Nehrəmlinin əmlaklarının satışa çıxarılması haqda xəbər yayıb. Satışa çıxarılan əmlaklar arasında daşınmaz obyektlər, bahalı avtomobillər var. Krediti, daha dəqiq desək, Beynəlxalq Bankdan mənimsənilən vəsaiti qaytarmayacağı təqdirdə, həbs təhlükəsi ilə üz-üzə olması “Avesta” prezidentinə anladılandan sonra onun yaxın adamları vasitəsilə hərəkətə keçdiyi bildirilir. Sayt yazır ki, “Avesta holdinq” quru addan başqa bir şey deyilmiş. 150 milyardlıq “Xəzər Adaları” layihəsinə girişən holdinqin rəsmi əmlakı - dəyəri yoxdur. Üzərinə “Avesta” sözləri yazılan binanın da satışa çıxarılması barədə məlumat yayılıb. “Gənclik” metrosu yaxınlığında, Məmməd Araz küçəsində yerləşən “Avesta” binasının isə sənədlərinin satış üçün hazır olmadığı məlum olub. Son günlər “Avesta” ümumiyyətlə fəaliyyətini dayandırıb. Tikinti işləri ilə az-çox məşğul olan, konsernə daxil olan şirkətlər də iflic vəziyyətindədir. Rəsmən işçi kimi sənədləşdirilmiş 5-10 nəfər də şirkətin bağlanacağı günü gözləyir. Yeri gəlmişkən, maraqlısı odur ki, 150 milyardlıq layihəni həyata keçirən şirkətin rəsmi işçilərinin sayı barədə məlumat verilmir. Ötən həftənin sonundan “Avesta”da həyat dayanıb. Binaya isə real alıcının tapılacağına ümid yoxdur. Xatırladaq ki, ötən həftədən Azərbaycanda kredit borcu olan bir neçə məşhur iş adamları həbs olunub. Onlardan bəziləri dindiriləndən sonra buraxılsa da, bir neçəsinin barəsində həbs-qətimkan tədbiri seçilib. Həbs olunanlar arasında “GlobusPlaza”nın sahibi, eks-deputat Dünyamin Xəlilov, “İnterGlass” şirkətinin prezidenti Fariz Muradov, Beynəlxalq Bankın Dubay filialının rəhbəri Adil Hüseynov və başqaları var. Onlar ümumilikdə Beynəlxalq Bank vasitəsilə dövlətə 6 milyard manata qədər zərər vurublar. Yayılan məlumatlara əsasən istintaqa cəlb edilən və borcunu ödəyən sahibkarlar həbs edilmirlər. Borcu ödəməyənlər isə həbs olunur, əmlakları siyahıya alınır. “Oliqarxqeyt” işinin bir neçə ay davam edəcəyi haqda məlumatlar da var.

20 May 2015 11:41

Bakıda bina sakinləri “Penoplast” üzlükləri sökməyə başlayıb (FOTO)

50-dən çox sakin tezalışan plastik üzlüklərin vurulmasına etiraz ediblər Bakı şəhəri, Binəqədi rayonunda yaşayış binasında baş verən və 16 nəfərin ölümü, 60-dan çox insanın yaralanması ilə nəticələnən dəhşətli yanğın bu hadisənin törənməsinin əsas səbəbi olan "penoplast"dan üzlük çəkilmiş digər binaların sakinlərini də hərəkətə gətirib. Bir çox belə üzlük çəkilmiş binalarda sakinlər özləri binanın fasadını bu tez alışan materialdan təmizləməyə başlayıblar. Xətai rayonundakı oxşar binaların sakinləri hadisədən bir neçə saat sonra etiraz aksiyası keçiriblər. Musavat.com-un hadisə yerində olan müxbiri sakinlərin etirazlarını işıqlandırıb. 50 nəfərdən çox sakin binanın qarşısında toplaşaraq, tezalışan plastik üzlüklərin vurulmasına etiraz ediblər. Hadisə yerinə FHN-nin əməkdaşları da gəliblər. Nazirlik nümayəndəsi sakinlərə "penoplast" üzlüklərin tezliklər söküləcəyini deyib. Lakin sakinlər bildiriblər ki, bir müddət öncə binaların bu materialla üzlənməsinin dayandırılacağına söz verilsə də, hazırda üzlənmə prosesi davam etdirilir və üzlənməsi yarımçıq qalan binalara "penoplast" üzlük vurulur. Etirazçılar deyirlər ki, Zığ şossesində baş verən yanğın hadisəsindən sonra 2 minə yaxın imza toplayaraq, "penoplast" üzlüklərin sökülməsi ilə bağlı müvafiq icra orqanlarına müraciət ediblər. Lakin binaların fasadındakı "penoplast" üzlüklər nəinki sökülməyib, əksinə, yarımçıq qalan binalarda da eyni materildan olan üzlük vurulub.

19 May 2015 7:15

“Qara polkovnik”in oğlunun 8 milyonluq şirkəti və 318 milyon alan digər şirkətlər…

İri məbləğdə kredit dələduzluğu işi üzrə (“Beynəlxalq Bankın işi” qalmaqalı) həbs edilən oliqarxlardan biri, “Qara polkovnik” kimi tanınan mərhum polis polkovniki Fətulla Hüseynovun oğlunun şirkətinin hesabında hazırda 3 milyon funt-sterlinq var Əvvəllər Beynəlxalq Bankın baş direktoru olan, daha sonra bankın Dubay şöbəsinə rəhbərlik edən Adil Hüseynovun Londonda qeydiyyatdan keçmiş “KİNGSWAY TRADE LLP” şirkətinin Britaniyanın vergi xidmətinə təqdim etdiyi maliyyə hesabatına əsasən şirkətin 2014-cü ilin yekunları üçün maliyyə göstəriciləri belədir: hesabındakı vəsaitin məbləği - £2,946,981, aktivləri - £ 4205177, dəyəri - £ 5.236.750, öhdəlikləri - £ 3.367. Xəbər verdiyimiz kimi, ötən həftə Nərimanov Rayon Məhkəməsi Adil Hüseynova Cinayət Məcəlləsinin 178.3.2-ci (dələduzluq - külli miqdarda ziyan vurmaqla törədildikdə) maddəsi ilə ittiham elan edərək onun barəsində 4 aylıq həbs qətimkan tədbiri seçib. Oliqarxın vəkili Kamandar Nəsibov bildirib ki, Adil Hüseynov 318 milyon dolları mənimsəməkdə ittiham olunur. “KİNGSWAY TRADE LLP” şirkəti 2006-cı ildə qeydiyyatdan keçib, şirkətin yeganə mülkiyyətçisi və direktoru Adil Hüseynovdur. Companycheck.co.uk portalından götürülmüş məlumatlara əsasən şirkətin aktivlərinin dəyəri 2010-cu ildə 450 min funta yaxın olub, 2013-cü ildə 632 min funt təşkil edib. Şirkətin nağd vəsaitlərinin həcmi 2010-cu ildə 8 min funtdan bir qədər çox olub, 2013-cü ildə də təxminən eyni səviyyədə qalıb - 8,4 min funt. Ancaq 2014-cü ildə kəskin artaraq 3 milyon funta yaxınlaşıb. Adil Hüseynov 1966-cı ildə anadan olub, işgüzar karyerası ancaq Beynəlxalq Bank və “KİNGSWAY TRADE LLP” şirkəti ilə bağlıdır. “Qara polkovnik”in digər oğlu, 1964-cü ildə anadan olmuş Tahir Hüseynov isə 2012-ci ildə faciəli şəkildə həlak olub. Onun idarə etdiyi “Toyota” markalı avtomobil yüksək sürətlə hərəkət edərkən Bakının Suraxanı rayonunda yoldan çıxaraq aşıb. Nəticədə sürücü həlak olub, avtomobildəki sərnişin isə ağır xəsarətlər alıb. Xatırladaq ki, polkovnik Fətulla Hüseynov digər polis polkovniki Hacı Məmmədovun bandası tərəfindən sifarişlə qətlə yetirilib. Virtualaz.org saytı Adil Hüseynovun vəkili Kamandar Nəsibovdan dəqiqləşdirib ki, onun müdafiə etdiyi şəxs yüz milyonlarla dollarlıq krediti heç də öz şirkətinin adına götürməyib (Əslində ötən həftə yayılan ilkin xəbərlərdə kreditin Adil Hüseynovun şirkətinə verildiyi yer almışdı). Vəkilin bildirdiyinə görə, ittiham aktında “KİNGSWAY TRADE LLP” şirkətinin adı keçmir. Adil Hüseynov Beynəlxalq Bankın Dubay şöbəsi üzərindən yüz milyonlarla dollarlıq krediti müxtəlif şirkətlərə kredit kimi verilməsini təşkil etməkdə ittiham olunur. Həmin kreditlər isə geri qaytarılmayıb. İttiham aktında 318 milyon dollarlıq kreditlərin hansı şirkətlər üzərindən mənimsənildiyi göstərilir.

18 May 2015 6:43

Oliqarx məmurların Bakıdakı villaları belə söküldü (FOTO)

Bir çox villaların söküntü prosesi praktiki olaraq başa çatıb Bir çox məmur və oliqarxların Bakının Səbayel rayonunda, Salyan şosesi, 37 ünvanındakı villalarının söküntüsü prosesi praktiki olaraq başa çatıb. Virtualaz.org saytının reportyor qrupu bu gün səhər saatlarında söküntü işləri aparılan ərazidə olub və Bakı Şəhər İcra Hakimiyyətinin (BŞİH) həmin əraziyə cəlb etdiyi xüsusi texnikanın məmurların “əziyyətlə” tikib başa çatdırdığı mülkləri necə sökməsini əyani şəkildə izləyib. Öncə onu qeyd edək ki, dəbdəbəli villaların söküntüsü aparılan ərazidə BŞİH nümayəndələri də vardı. Hər halda həmin şəxslər özlərini meriyanın nümayəndələri kimi təqdim etdilər. Lakin mətbuatla hər hansı ünsiyyətdən qəti şəkildə imtina etdilər. Bundan əlavə, onların mətbuat təmsilçilərinə münasibəti də aqressiv oldu. “Burada nə işiniz var?! Burada çəkiliş aparmaq olmaz. Biz sadəcə rəhbərliyin göstərişini yerinə yetiririk. Sizə müfəssəl məlumat lazımdırsa, BŞİH-ə müraciət edin. Biz sizə heç nə deməyəcəyik” - deyə söküntü işlərinə rəhbərlik edən “başçı” bildirdi. Lakin müxbirlərimiz villaların söküntüsü prosesini izləyən yerli sakinlərdən bəzi məlumatlar əldə edə bilib. Onlardan birinin sözlərinə görə, bu villalar dövlət başçısının göstərişinə uyğun olaraq sökülür. “Bəzilərinin dediyinə görə, bu malikanələr velotrekin görünüşünə mane olur. Digərləri deyir ki, bu villalar qanunsuz tikilib, mülk sahiblərinin heç bir sənədi yoxdur. Bura srağagündən texnika töküblər, həmin gündən söküntü gedir. Bu elitar mülklərin heç birinin sahibi hələ bura gəlməyib, villasının taleyi ilə maraqlanmayıb. Söküntü dünən demək olar ki, tama başa çatıb, amma villa sahiblərindən heç kimi burada görən yoxdur. Yəqin bu villalar həmin adamlardan ötrü xırda şeydir. Görünür, onlar həddən artıq böyük adamlardır, veclərinə də deyil. Biz heç həmin sökülən mülklərin kimə məxsus olduğunu da bilmirik” - deyə sakinlərdən biri bildirdi. Qonşuluqda yaşayan digər sakinin sözlərinə görə, bu ərazidə 1 sot torpağın qiyməti 30 min manatdan başlayır. Heydər Əliyev parkına doğru irəlilədikcə torpağın qiyməti də artır. “Oliqarxlar burada böyük torpaq sahələri almış və villalar tikməyə başlamışdılar. Məsələn, baxın, burada 5 mərtəbəli nəhəng malikanə var idi. Dünən sökdülər. Sahibinin isə heç vecinə də olmadı. Adam bura heç ayağını da qoymadı. Nəyinə lazımdır?! Buradakını sökürlər, gedib başqa yerdə ayrısını tikəcək” - deyə həmsöhbətimiz başını bulayır. Yeri gəlmişkən, söküntü işləri aparılan ərazidə canlanma və aşkar narahatlıq da hiss olunurdu. Yaxın ərazidə - söküntü zonasının qonşuluğundakı villa və mülklərin sahibləri bura aylarla ayaq basmasalar da dünəndən etibarən gələrək onların da evinin söküntü planına düşüb-düşməyəcəyi ilə maraqlanmağa başlayıblar. Amma artıq bu adamda da belə qənaaət yaranıb ki, onların da evləri buldozerə veriləcək.

17 May 2015 4:38

150 minlik oğurluğun üstü açıldı

Göyçay rayonunda vətəndaşa məxsus mənzildən küllü miqdarda pul və qızıl-zinət əşyaları oğurlayan 3 nəfər həbs olunub Faktinfo.az  xəbər verir ki, Göyçay rayon sakini Ömərov İlqar Muxtar oğlu rayon Polis Şöbəsinə ərizə ilə müraciət edərək mənzilindən kulli miqdarda pul və qızıl zinət əşyalarının oğurlanması barədə məlumat verib. Aparılan təxirəsalınmaz əməliyyat-axtarış tədbirləri nəticəsində oğurluqda şübhəli bilinən rayon sakinləri saxlanılıb. Məlum olub ki, Ömərov Namiq İlqar oğlunun təklifi və başçılığı ilə tanışları Quliyev Seymur Qəzənfər oğlu və Həsənov Teymur Məzahir oğlu ilə qabaqcadan əlbir olan bir qrup şəxs halında Ömərov İlqar Muxtar oğluna məxsus Göyçay rayonu, Potu kəndində yerləşən yaşayış evinə qanunsuz daxil olublar. Onlar yataq otağında olan seyfi çıxarıblar, həmin seyfin qapısını kəsib açaraq içində olan 139 000 ABŞ dollarını, 21 000 manatı, külli miqdarda qızıl-zinət əşyalarını və 21 ədəd özəlləşdirmə çekini oğurlayıblar. Seyfi oğurladıqdan sonra onu Seymür Quliyevin həyətinə aparıblar, seyfi açıb pulların xeyli hissəsini və qızılları götürüblər. Sonradan Yuxarı Şirvan kanalının üzərinə gediblər və orada seyfin içərisndə yenidən axtarış aparmaq istəyən zaman, qəflətən kənardan bir naməlum avtomobilin həmin istiqamətə gəldiyini görüb seyfi kanala atıblar. Saxlaanılan şəxslərin dediyinə görə. seyfin içərisində xeyli sənədlər, müxtəlif vətəndaşlara məxsus pensiya kartalrı, məbləği hələlik məlum olmayan miqdarda pullar seyflə birlikdə kanala atılıb. Keçirilmiş əməliyyat tədbirləri zamanı oğurlanmış pullardan 91 250 dollar, qızıllı zinət əşyalarının hamısı və 21 ədəd özəlləşdirmə çekləri maddi sübut qismində götürülüb. Hazırda digər maddi sübutların aşkar edilməsi istiqamətində əməliyyat axtarış tədbirləri davam etdirilir. Faktla bağlı Cinayət Məcəllləsinin 177.2.1 və 177.3.2-ci maddələri ilə cinayət işi başlanıb, araşdırma aparılır.

16 May 2015 6:44

Qəzalı körpüdən yeni xəbər (FOTO)

Boladiçay üzərində yerləşən qəzalı körpünün aşırım tirlərinin sökülməsinə başlanılıb Ələt-Astara-İran İslam Respublikası ilə dövlət sərhədi avtomobil yolunun 186-cı kilometrliyində, Lənkəran rayonunun Liman şəhəri ərazisində Boladiçay üzərində yerləşən qəzalı körpünün aşırım tirlərinin sökülməsinə başlanılıb. Nəqliyyat Nazirliyi “Azəryolservis” ASC-dən ANS PRESS-ə verilən məlumata görə, qısa müddət ərzində körpünün bərpa edilməsi planlaşdırılır. Nəqliyyat Nazirliyi “Azəryolservis” ASC tərəfindən ötən gün axşam saatlarından nəqliyyat vasitələrinin müvəqqəti hərəkəti üçün çay yatağına boru düzülərək alternativ yol salınıb. Nəqliyyat vasitələri müvəqqəti salınan yolla hərəkətlərinə davam edə bilərlər. Hələlik yeni salınan müvəqqəti yollun hərəkət hissəsi eyni vaxtda yalnız bir istiqamətə hərəkətə imkan yaradır. Bu üzdən nəqliyyat vasitələrinə növbəli şəkildə sözügedən yolla hərəkət etmələrinə icazə verilir. Hazırda müvəqqəti yolun hərəkət hissəsinin genişləndirilməsi işləri aparılır və yaxın müddət ərzində həmin yolla hər iki istiqamətə maneəsiz hərəkət tam təmin olunacaq. Xatırladaq ki, Lənkəran rayonunun Liman şəhəri ərazisində Boladiçay üzərində yerləşən körpüdə ağır yüklü maşınların intensiv hərəkəti nəticəsində 12 may tarixində, axşam saat 20:00 radələrində körpünün orta aşırımında 3 ədəd aşırım tiri sınıb. Nəticədə körpü qəzalı vəziyyətə düşüb. Nəqliyyatın hərəkəti körpü üzərində tam məhdudlaşdırılıb. Körpü 1961-ci ildə inşa edilib. Ümumi uzunluğu 50 metr, eni isə 7 metr olan körpü 3 aşırımdan ibarətdir.

14 May 2015 12:54

Azərbaycanda körpü uçdu

Körpü ortadan 14 metr sahədə dağılaraq yarasız vəziyyətə düşüb Lənkəran rayonunda magistral yolda körpü uçub. ANS PRESS-in bölgə müxbirinn verdiyi məlumaat görə, hadisə Ələt-Astara magistralının 185 kilometrliyində, yolun rayonun Liman şəhəri ərazisindən keçən Boladıçay üzərindəki körpüdə qeydə alınıb. Hadisə nəticəsində uzunluğu 50, eni 7 metr olan körpü tən ortadan 14 metr uzunluğunda dağılaraq yarasız vəziyyətə düşüb. Hadisə yerinə 42 saylı Lənkəran rayon Yol İstismar Sahəsinin əməkdaşları cəlb olunub. Qurumun baş mühəndisi Mövsüm Həsənov bildirib ki, ağır tonnajlı yük maşınlarının intensiv hərəkəti nəticəsində baş verib. “Bir neçə maşın ardıcıl olaraq körpüdən keçməsi nəticəsində körpünün orta aşırım tirindən 3 rels sınıb. Yaxşı ki, qəza baş verməyib. Bu körpünün aşırım tinləri dəyişdirilməlidir. Dayaqlar normal vəziyyətdədir. Hələlik körpüdən alternative yol verəcəyik ki, körpü təmir olana kimi hərəkət bərpa olunsun”, - deyə Mövsüm Həsənov bildirib. Hadisə yerinə müvafiq qurumların əməkdaşları, habelə xeyli sayda ağır texnika cəlb olunub. Hazırda nəqliyyat vasitələri alternativ Lənkəran-Boradigah və Boladi-Zövlə yollarından istifadə edir. Körpünün təmirinə ən azı 1 həftə vaxt lazım olacağı bildirilir. Qəzanın nəticələrinin aradan qaldırılması, alternativ yolun salınması istiqamətində işlər davam etdirilir. Qeyd edək ki, uçan körpü 50 il bundan əvvəl istifadəyə verilib.

13 May 2015 1:37

Fakt

Bizi izləyin