Rəzalət: “Anamla evlənən əmim məni ad günümdə…” – OLAY

Təcavüz qurbanı olan yeniyetmə qızın qan donduran faciəsi "Atam rəhmətə gedəndə mən beş, bacım üç yaşında, anam isə hamilə idi. Atamın yoxluğundan sonra maddi vəziyyətimiz çətinləşdi. Ana nənəmgil də kasıb olduğundan bacımla məni qəbul etmədi. Anam öz ata evində, biz isə ata nənəmgildə yaşamalı olduq” - bunu deyərək göz yaşlarını saxlaya bilmir. Yanağından süzülən yaşlar çənəsinə çatanda köynəyinin qolu ilə silir. illər öncə baş verən o hadisəni Səbinə (şərti addır) belə xatırlayır: - Anam kiçik bacımı dünyaya gətirəndən sonra işləməyə başladı. Demək olar ki, gecə-gündüz bizim üçün çalışardı. Onun bir arzusu var idi, o da övladlarını başına yığıb yaşamaq. Anam öz ata yurdunda bizim üçün ev tikdirməyə başladı. Nəhayət, mənim 13 yaşım olanda evimiz hazır oldu. Uzun ayrılıqdan sonra yenə bir ailə kimi yaşadıq. Kasıb, lakin xoşbəxt idik... Kiçik əmisinin onlara qonaq gəlməsi ilə qara günlərinin başladığını söyləyir: - Hər şey çox gözəl idi. Ta ki, əmim bizə gələnə qədər. Atam rəhmətə gedəndən bəri bizi bir dəfə də axtarmayan əmim birdən-birə peyda olmuşdu. Tez-tez evimizə qonaq gələr, anamla əlaqə saxlayardı. Sonralar anama qeyri-rəsmi nikahda yaşamağı təklif etdi. Və əmim bizim evə köçdü. Əvvəllər bizə hədiyyələr alar, sevgimizi qazanmağa çalışardı. Amma mənim ondan xoşum gəlmədiyi üçün qəbul etməzdim. Bir müddət keçəndən sonra əmim mənə qarşı fərqli davranmağa başladı. Əvvəl sadəcə saçlarımı sığallayan əlləri sonralar bədənimi sığallayırdı. Bacılarını əmisindən qoruyan Səbinənin əmisi ilə problemləri başlayır: - Əmim evə gələn kimi mən o biri bacılarımı da başıma yığıb, öz otağıma aparardım. Axı mən böyük bacı idim, onları qorumalıydım. Heç vaxt bacılarımın əmimlə otaqda tək qalmağına imkan verməzdim. Əmim də mənim qızları ondan uzaqlaşdırdığımı hiss edirdi. Beləcə, onunla aramızdakı konfliktlər hər gün daha da dərinləşirdi. Məni daim pisləyir, anamın gözündən salmağa çalışırdı. Sonra əmim bizimlə bir həyətdə yaşayan xalalarımla da münasibətimi korlamağı bacardı. Artıq hər kəsin gözündə tərbiyəsiz, asi, söz eşitməyən, yalançı biri idim. Beləcə ailədə hər kəsdən uzaq qaldım, özümə qapandım. Evdə kimsə ilə danışmaz, söhbət etməzdim. Bu da əmimin işinə daha çox yarayırdı. O gecə anası evdə olsaydı, bəlkə də hər şey başqa cür olardı: - Anam gecə növbəsində işə başlamışdı. O gecə əmimlə evdə tək idik. Gecə yarısı o mənim otağıma gəldi və mənə təcavüz etdi. Səhərə qədər yatmadım, anamın işdən gəlməyini gözlədim. Təsəvvür edirsiniz, nə anam, nə də xalalarım mənə inanmadı. Əmim də mənə "gördün, heç kəs sənə inanmır. Heç vaxt da inanmayacaqlar” deyirdi. Anasıgilin ona inanmaması əmisini daha da cəsarətləndirib: - Sonralar hər dəfə evdə tək qalanda o mənə təcavüz edirdi. Anamın əmimlə birlikdə yaşamağa başladığı gündən atam tərəf bütün qohumlar bizdən üz döndərmişdilər. Odur ki, dərdimi deməyə bir kimsəm olmayınca başıma gələnləri müəlliməmə danışmağa qərar verdim. Doğmalarımın mənə inanmadığı bir vaxtda o mənə inandı və bir başa polisə xəbər verdi. Mənim dilimdən izahat alındı və əmim şübhəli şəxs kimi saxlanıldı. İnanmayacaqsınız, amma anam hələ də mənə inanmırdı. Ekspertizanın nəticəsini görəndə ”kiminləsə etmisən, əminin boynuna şər atırsan” dedi. Elə düşünməyin ki, anam məni sevməzdi. Yox, əksinə, o məni və bacılarımı çox sevərdi. Sadəcə, əmim öz xeyrinə bütün arqumentləri qabaqcadan hazırlamışdı. Artıq mən anamın və ətrafın gözündə yalançı, tərbiyəsiz biri idim. Həm əmimə nifrət etdiyim üçün anam qisas almaq üçün ona şər ata biləcəyimi düşünürdü. Anasının xətrinə sonradan şikayət ərizəsini geri götürür: - Bir gün anam mənim otağıma gəlib, dedi: "Ərizəni geri götür, bu məsələ bağlansın. Mən sənə söz verirəm ki, əmin bir daha bu evə ayaq basmayacaq”. Baş verənlər ona pis təsir etmişdi. Saatlarla otaqda oturub fikrə gedər, yemək yeməzdi. Birinci məhkəmədə olanları düz danışsam da, anamın halına dözməyib növbəti məhkəmədə hakimə yalan danışdığımı, əmimin günahsız olduğunu dedim və onu buraxdılar. Həyatdan tamamilə ümidi kəsilən Səbinə dəfələrlə intihar etməyə cəhd edir: - Ölmək istəyirdim. Öz bədənimdən iyrənir, güzgüdə öz üzümə baxa bilmirdim. Dənizdə boğulmaq, özümü maşının altına atmaq istədim. Amma hər dəfəsində məni xilas etdilər. Əmimin mənə təcavüz etməsindən də çox anamın mənə inanmaması ağır gəlirdi. Bir müddət sonra əmisi yenə evə qayıdıb: - Növbəti dəfə əmim mənə öz doğum günümdə, on altı yaşım tamam olanda təcavüz etdi. Bu dəfə mən əşyalarımı yığıb evdən qaçdım. Qarşıma çıxan ilk polisə başıma gələnləri danışdım. Onlar məni polis idarəsinə, ordan da reabilitasiya mərkəzinə göndərdilər. İnsanlara güvənim qalmamışdı. Orda kimsə ilə danışmaz, otaqda uzanıb saatlarla ağlayardım. Gecələr pis yuxular görərdim. Gün ərzində gördüyüm yad kişilər gecə yuxumda mənə təcavüz edərdi. Orda bir neçə ay psixoloji müalicə alandan sonra məhkəmə prosesi başladı. Əmim məhkəməyə sənəd təqdim etdi ki, guya o xəstə, impotentdi. Amma məhkəmə ekspertizası sübut etdi ki, sənədlər saxtadı, o tam sağlamdı. Bir müddət o mərkəzdə qaldım. Evə qayıtmaq istəmirdim. Sonralar zamanla anamla münasibətlərimi düzəltməyə başladım. Tez-tez özümə bir sualı verirəm. Anamı bağışlamışammı? Bilmirəm. Bəlkə də bağışlamışam, amma unutmamışam. Artıq bir il olar ki, məhkəmə işi yekunlaşıb: - Məhkəmə əmimə iki il iş verdi. Düşünürəm ki, çox yüngül cəza alıb. Lakin məhkəmə müddəti dindirilmələrdə çox ağır günlər yaşadım. Bunları təkrar yaşamamaq üçün məhkəmənin qərarı ilə razılaşdım. İndi evimizdəyəm. Bacılarımla xoşbəxtəm. Onları çox sevirəm. Hələ də subay olan xalalarım elə düşünürlər ki, mənim başıma gələn bu hadisələrdən sonra daha kimsə onlarla evlənməyəcək. Səbinə gələcək arzularından da danışdı: Peşə məktəbində təhsil alıram, gələcəkdə modelyer olmaq istəyirəm. Bir vaxtlar bir dənə belə olsun arzum yox ikən indi çoxlu arzularım var. Yaşamaq istəyirəm. Ən böyük arzum ailə qurmaqdı. İstəyirəm qızım olsun. Amma mən anamdan fərqli olaraq daim qızıma inanacağam. Analara bir sözüm var, həmişə övladınızı dinləyin, onlara inanın, güvənin!

11 Avqust 2016 3:58

4 oğlan Novxanı çimərliyində qadını PİS VƏZİYYƏTƏ SALDI – FOTO

Çimərlikdə istirahət edən qadının çantasını oğurlayan şəxslər polis əməkdaşları tərəfindən saxlanılıblar. Pubblika.az-ın xəbərinə görə, onlardan biri 19 yaşlı oğlan, 3-ü isə yeniyetmədir. Binəqədi Rayon Polis İdarəsinə ərizə ilə müraciət edən vətəndaş avqust ayının 4-də rayonun Novxanı qəsəbəsində yerləşən çimərlikdə istirahət edərkən ona məxsus çantanın naməlum şəxslər tərəfindən oğurlandığını bildirib. Çantanın içərisində 48 manat pul və 2 ədəd mobil telefon olub. Rayon polis idarəsinin əməliyyatçılarının keçirdiyi əməliyyat tədbirləri nəticəsində hadisəni törətməkdə şübhəli bilinən 19 yaşlı Mirhikmət Həmidov və yeniyetmə olan 3 şəxs saxlanılaraq idarəyə gətiriliblər. İdarədə dindirilən şəxslər törətdikləri cinayəti səmimi etiraf ediblər. Mirhikmətin sözlərinə görə, o və 3 məhəllə uşagı sərinləmək üçün çimərliyə gediblər. Lakin istirahətin sonunda pulları qurtardığı üçün oğurluğa əl atmaq qərarına gəliblər. Elə buna görə də qadına məxsus çantanı gizlicə götürüblər. Mirhikmət Həmidov - saxlanılan şəxs: "Mənə dedi ki, plan qurub, bu çantanı götürmək istəyirəm. Yalandan bir az fırlandı. Çantanı qoydum onun yanına, dedim ki, mən gedirəm. Sonra o, dalımca gəldi, çantanı açdı, 48 manat pul, 1 dənə "S3", 1 dənə "S4", vəssalam". Pulları öz aralarında xərcləsələr də, tutduqları əməlin nəticələrindən qorxaraq telefonlardan birini sındırıb, digərini isə tullayıblar. Artıq saxlanılan şəxslərin barəsində Binəqədi Rayon Polis İdarəsində Cinayət Məcəlləsinin müvafiq maddəsi ilə cinayət işi başlanıb, araşdırma aparılır. (Region TV)  

11 Avqust 2016 1:57

DƏHŞƏT: Ata və ana 6 yaşlı qızını öldürüb yandırdı, sonra…

Qızlarının göldə boğulduğunu deyən ata və ana bir neçə gün əvvəl polislərə "tamaşa" oynayıb. Valideynlər polisə verdiyi məlumatda 6 yaşlı qızları - Veronikanın avqustun 6-da evdən çıxdığını və suda batdığını deyib. Polis dərhal axtarışa başlayıb, axtarışlara könüllülər də qoşulub. Moskva ətrafı göldə itkin düşən Veronika Çernikovanı şəhərin bütün polisləri və yüzlərlə könüllüləri axtarsa da, heç bir nəticə əldə etmək mümkün olmayıb.Qeyd edək ki, Veronika cütlüyün ögey qızı olub. Cütlük onu bir neçə il əvvəl uşaq evindən götürüb.Avqustun 8-də Çerkikov ailəsinin qəfil yoxa çıxması polisə qəribə gəlib. Evdə heç kəs olmayıb, telefon zənglərinə cavab verilməyib. Lakin müstəntiqlərin və əməliyyatçıların səyi nəticəsində kişi ilə qadının harada gizləndiklərini öyrənmək mümkün olub. Bundan sonra qızın yoxa çıxmasında cütlüyün əli olduğuna dair heç bir şübhə yeri qalmayıb. Belə ki, şübhəli bilinənlər Gümüş Göllər qəsəbəsində qəbiristanlığın ərazisində tapılıb, hər ikisi sərxoş vəziyyətdə olub. Moskva vilayəti üzrə istintaq komitəsinin rəhbərinin baş köməkçisi Olqa Vradiy bildirib ki, ögey valideynləri cinayəti etiraf edib. Onlar qızın guya hələ aprel ayında hamamda boğulduğunu və baş verən hadisədən qorxduqları üçün meyitdən yaxa qurtarmaq qərarına gəlib və qızı tonqalda yandırıblar. Ögey valideynlər qızın yoxa çıxmasını uzun müddət hamıdan gizlədə bilib. Lakin qəyyumluq orqanlarının əməkdaşlarının onlara gələcəyini eşidəndə polis çağırıb qondarma "tamaşa" oynayıblar. İndi müstəntiqlər ər-arvadın dediklərinin nə dərəcədə həqiqətə uyğun olduğunu yoxlayır və qızın cəsədinin axtarışları aparılır.

10 Avqust 2016 11:35

Fakt

Bizi izləyin