Maşın bazarında bərbad durum – Hər ay 10 faiz ucuzlaşma

Ötən ay Azərbaycanda ikinci əl avtomobil bazarında yenidən ucuzlaşma baş verib. Faktinfo.az  xəbər verir ki, avtomobil ekspertləri fins.az-a bildiriblər ki, yanvar ayı ilə müqayisədə fevralda qiymətlər yenidən ucuzlaşmaqda davam edib. Alıcı tapılmaması qiymətləri 10 % da aşağı salıb. Badamdar avtomobil bazarından satıcılar bildirirlər ki, xaricdən ölkəyə biznes üçün demək olar ki, avtomobil gətirilmir. Satıcı Oley Şamxalovun sözlərinə görə, hazırda yanlız dövlət sifarişi ilə, ya da hansısa satıcı dostunun sifarişi əsasında avtomobil gətirir. Avtomobil bazarında durğunluq, alıcı tapılmaması hər gün qiymətləri bir qədər də aşağı salır. Ötən ay avtomobil bazarında qiymət 2-8 min manat arasında ucuzlaşıb. “Lexus”, “Mitsubishi” və “Range Rover”ə baxan yoxdur Satıcının sözlərinə görə, manatın ucuzlaşmasından sonra gəlirləri azalan əhalinin avtomobilə münasibəti də dəyişib. İri mühərrikli, ehtiyat hissələri baha olan, çox yanacaq işlədən avtomobilləri demək olar ki, alan yoxdur. Məsələn, 2006-cı ilin “Lexus LX350” modeli 21-22 min manata satılırdısa, hazırda bu avtomobil 13-14 min manata təlif edilsə də, alan yoxdur. Nəticədə 2004-cü il model “Lexus LX 330” avtomobili bir ay ərzində 14 min manatdan 11 min manata kimi ucuzlaşıb. O.Şamxalov bildirib ki,ötən həftə 2004-cü il model “Range Rover” avtomobilinin sahibi onu 12 min manata təklif etsə də, sonda 10 min manata satmağa məcbur oldu. İri mühərrikli modellər sırasında “Mitsubishi”lərin də qiymətləri enməkdə davam edir. Məsələn, 2015-ci il model 3.8 l mühərrikli “Mitsubishi Pajero” 38 500 dollardan 35 min dollara qədər ucuzlaşıb. “Passat”ı buna görə alımırlar Satıcıların sözlərinə görə satılmayan modellər sırasında 2012-2013-cü il model “Volksvagen Passat” avtomobilləri də var. Bu avtomobillərin ehtiyat hissələrinin baha olması və diskomfort olması alıcılarını itirməsinə səbəb olub. Nəticədə qiymətlərdə 5 min manata qədər enmə müşahidə edilir. Məsələn, yanvar ayında 12-13 min manata satılan eyni model indi 8-9 min manata kimi ucuzlaşıb. “Hyundai” və “Nissan”da 4-7 min manat ucuzlaşma Avtomobillərin ucuzlaşması bazarla yanaşı elektron satışlarda da müşahisə edilir. Belə ki, avtomobil elanı saytlarında da qiymətlərdə ucuzlaşma müşahidə edilir. Alsat.az saytının rəhbəri Vaqif Hüseynov deyir ki, hər gün 500-dən çox avtomobil elanı yerləşdirilsə də, alıcı tapılmır. Nəticədə “Lexus”dan “Nissana” qədər bütün avtomobillər fevral ayında ucuzlaşmaqda davam edib. Məsələn, yanvar ayında 2011-2013-cü il model “Hyundai İX35” modeli 15 min dollara satılırdısa, hazırda son qiymət 8 min dollar təşkil edib. “Nissan” modelləri isə 4 min manata kimi ucuzlaşıb. 2006-2013-cü il model “Nissan Murano” avtomobilləri yanvar ayında 11 manata təklif edilirdisə, indi 5-7 min manata bu avtomobili alan yoxdur. Ən çox alınan “Mercedes”, “Vaz” və “Opel”lərdir Satıcılar bildirirlər ki, hazırda daha çox alınan avtomobillər 5-15 min manatlıq “Mercedes”lər,“Vaz” və köhnə“Opel”lərdir. Bu da həmin avtomobillərin və ehtiyat hissələrinin ucuz başa gəlməsi, daha davamlı olması ilə bağlıdır. O.Şamxalovun sözlərinə görə, bir ayda bazarda cəmi 40-50 avtomobil satılır. Bu avtomobillərin 25-i “Vaz”, 12-si “Mercedes”, 3-4-ü isə “Opel”dir. Amma ümumi ucuzlaşma bu avtomobillərində qiymətlərinə təsir göstərib. “Mercedes” və “Vaz” avtomobilləri 700-1000 manata yaxın ucuzlaşıb. Məsələn, 1.8 mühərrikli 1998-ci il model “Mercedes”əvvəl 7 min manata satılırdısa, hazırda 6300-6500 manata təklif edilir. Son vaxtlar məşhur olan “Lada Priora”lar 6500 manatdan 5500 manata kimi ucuzlaşıb. Furqon 1995-2002-ci il model 1.6-1.8 l mühərrikli “Opel”lər isə 1500-4000 manata satılır. Ucuzlaşma mart ayında da davam edəcək Avtomobil ekspertləri bildirirlər ki, avtomobil qiymətlərində ucuzlaşma son deyil. Belə ki, mart ayında dolların yenidən bahalaşmağa başlaması və “Novruz bayramı” ilə əlaqədar bazar uçurma doğru irəliləməkdə davam edəcək. Ekspertlər hesab edirlər ki, belə vəziyyətdə insanlar daha ehtiyyatlı davranmağa çalışırlar.Yəni avtomobil almaq istəyənlər əl saxlayır, pulu dollara çevirməyə başlayırlar.

10 Mart 2016 1:26

“Böyük söküntü Bakıda kirayə bazarını yerindən oynadacaq”

“Bank sektorundakı durum 2015-ci ilin əvvəlindən əmlak bazarına dəstəyini göstərməkdə davam edir. Yanvar və fevral aylarında da böyük həcmdə pul vəsaitləri daşınmaz əmlak bazarına sərf edilib. Hesab edirik ki, bazara əlavə olaraq ən aşağısı 100 milyon manata yaxın vəsait daxil olub. Mərkəzi Bankın müvafiq statistikaları dərc ediləndən sonra artıq təqribi qiymətləndirməni daha dəqiq vermək olacaq”. Bu haqda Modern.az saytına məlumat verən daşınmaz əmlak bazarı üzrə ekspert Rəşad Əliyev hələ yanvar ayının əvvəlindən bazarda qiymət artımı müşahidə olunduğunu qeyd edib: “Fevral ayının ortalarında da sizin sayta bildirmişdim ki, fevralda bazarda aktivlik artıb. Hamını düşündürən odur ki, bazarda nə baş verir? Çünki belə aktivliyin fundamental iqtisadi əsası azdır. Çox sadə dillə desək, burada iqtisadi, həm də texniki amillərin təsiri var. Bundan əlavə, nəzərə almaq lazımdır ki, bazarda gözləmə mövqeyində olan çox sayda potensial alıcılar mövcud olub. Onlar qiymət enməsini gözləyirdilər. Bəziləri hesab edirlər ki, indiki qiymətlər cəlbedicidir. Digərləri isə ümumiyyətlə, psixoloji cəhətdən gözləyə bilmirlər. Çünki hesab edirlər ki, qeyri-müəyyənlik çoxdur. Elə alıcılar var ki, onlar hələ də gözləməyi üstün tuturlar. Hansı qərarın doğru olub-olmamasını zaman göstərəcək. Sadaladığım bu 2 məsələ bazarı aktivləşdirən amillərdir”. Gözlənilən böyük söküntünün təsirləri R.Əliyev baş verəcək böyük söküntü prosesinin bazara təsirlərindən də danışıb: “Nəzərə almaq lazımdır ki, böyük söküntü işlərinin başlanacağı hələ bazara təsir etməyib. Düzünü desəm, mən də bu işlərin böyük həcmdə görüləcəyinə şübhə ilə yanaşıram. Ancaq bu işlər böyük həcmlə başlasa, bazara təsiri sözsüz ki olacaq. Məsələn, kirayə bazarını bu, ümumiyyətlə yerindən oynada bilər. Sökülən binaların sakinləri müvəqqəti olaraq haradasa qalmalıdır. İşlər tam həcmdə görülsə, belə çıxır ki, bazara kirayə ev axtarışına minlərlə müştəri çıxacaq. Ancaq yenə də qeyd edirəm ki, bu işlərin böyük həcmlə görülməsinə şübhə edirəm”. Qiymətlər hələ ki, sabitdir... Bazarda qiymətlərin necə dəyişdiyinə gəlincə, ekspert deyib ki, bazar üzrə orta qiymətlər elə dekabr devalvasiyasının ilk günlərindən başlayıb: “Bəzi obyektlər üzrə bahalaşma texniki xarakter daşıyıb. Məsələn, dollarla qiymətləndirilən obyektlərin qiyməti məntiqi olaraq yeni məzənnəyə uyğun korrektə edilib. Elə mənzillər var ki, qiymətləri bu günə kimi eyni qalıb, eləsi də var ki, qiyməti qalxıb. Ancaq bir incəliyə nəzər yetirmək lazımdır ki, bazarda son dövrlər likvidlik artıb, bu isə deməkdir ki, qiymət güzəştləri də azalıb. İlkin bazarda qiymət bahalaşması əsasən ucuz mənzil sinfinə aid olanlar üzrədir. Bu isə maya dəyərinin artımı ilə əlaqədar qeydə alınıb. Bahalı sinfə aid olan mənzillərin qiymətlərini bəzi şirkətlər ümumiyyətlə qaldırmayıblar”. Neft bahalaşmayınca, qiymətlərin enməsi davam edəcək R.Əliyev hazırda bazardakı aktivliyin müvəqqəti xarakter daşıdığını qeyd edib: “Çünki, bu aktivlik əllərdə toplanmış küllü miqdarda vəsaitlərin bazara daxil olması ilə əlaqədardır. Mövcud iqtisadi şəraitdə isə bu, davamlı ola bilməz. Hətta bir çox insanlarda qiymətlərin artacağı illuziyası yaranıb. Bunun illuziya olub-olmaması isə neftin qiymətlərindən asılı olacaq, çünki hazırda nəinki əmlak bazarını, eyni zamanda bütün iqtisadiyyatın durumunu məhz neftin qiymətləri müəyyən edir. Son günlər neftin qiymətinin artımı bir çox insanlarda optimizmin yaranmasına səbəb olub. Ancaq bir amili nəzərə almaq lazımdır ki, neftin qiyməti indiki səviyyədən hələ əhəmiyyətli dərəcədə artmalıdır. Əgər neftin qiymətində əhəmiyyətli artım olmasa, bazarda qiymət enməsi davam edəcək”.

10 Mart 2016 1:00

Azərbaycan Dövlət Neft Fondu Bakı-Tbilisi-Qars dəmir yolu layihəsinə 590 mln. dollar ayırıb

Ötən il isə Fond bu layihənin maliyyələşdirilməsinə 52 mln. dollar yönəldib Azərbaycan Dövlət Neft Fondu (ARDNF) tərəfindən 2007-2015-ci illər ərzində Bakı-Tbilisi-Qars dəmir yolu layihəsinin maliyyələşdirilməsinə ümumilikdə 485,7 mln. manat və yaxud 588,1 mln. ABŞ dolları məbləğində vəsait ayrılıb.Faktinfo.az xəbər verir ki, bu barədə Nazirlər Kabinetinin 2015-ci ildə fəaliyyəti haqqında hesabatda qeyd olunub.Hesabata əsasən, 2015-ci ildə Fond tərəfindən bu layihənin maliyyələşdirilməsinə 61,5 mln. manat və ya 51,5 mln. dollar yönəldilib və bu maddə üzrə Fondun xərcləri ARDNF-nin büdcəsində nəzərdə tutulana nisbətən (111,5 mln. manat) manat ifadəsində 55,2% səviyyəsində icra olunub.Layihənin sifarişçisi olan Nəqliyyat Nazirliyinin məlumatına əsasən, 2015-ci ildə layihə üzrə Fondun büdcəsində nəzərdə tutulan vəsaitin 44,8% aşağı icra olunması il ərzində tikinti ərazisində hava şəraitinin əsasən sərt keçməsi, sahə üzrə relyefin mürəkkəb olması və Gürcüstan hökuməti tərəfindən nəzərdə tutulan torpaq sahələri üzrə karxanaların vaxtında ayrılmaması kimi amillərlə əlaqədardır.Layihə çəırçivəsinddə Türkiyə ərazisində 76 km, Gürcüstan ərazisində 26 km uzunluğunda olan Qars-Axalkalaki dəmir yolu xəttinin tikintisi və 160 km uzunluğunda Axalkalaki-Marabda yolunun bərpası və yenidən qurulması işlərinin həyata keçirilmısi nəzərdə tutulur.

9 Mart 2016 1:20

Banklar bunu zaminə demirlər – ZAMİNLƏR ÜÇÜN SÜRPRİZ

Azərbaycanda manatın təkrar devalvasiyasından sonra bank müştərilərinin əksəriyyətinin kreditini normal ödəməməsi onlara zamin durmuş şəxslərə problemlər yaratmağa başlayıb. Borclulardan pulunu vaxtında ala bilməyən banklar kreditin qaytarılmasını dərhal zaminlərdən tələb edirlər. Mütəxəssislər isə deyir ki, əgər kimsə bankda başqasına zamin durubsa borcun ödənilməməsinə görə məsuliyyət daşıyır, amma bu məsələdə də müəyyən məqamlar var. Yəni bank dərhal zamini axtarmamalıdır… Zaminliyin fərqli formaları varmış Hüquqşünas Əkrəm Həsənovun sözlərinə görə, qanunla zamin durmağın 2 forması mövcuddur: Birgə zaminlik və əlavə zaminlik. 1-ci halda zamin kreditin qaytarılmasına görə borclu ilə paralel məsuliyyət daşıyır. Yəni, kredit ödənilməsə bank həm borcludan, həm də zamindən eyni vaxtda pulu tələb edə, onları məhkəməyə verə bilər. Zamini narahat etmək olmaz Əlavə zaminlikdə isə vəziyyət fərqlidir. Bank ilk növbədə borclunu məhkəməyə verməli, borcun qaytarılması ilə bağlı qərarın çıxarılmasına nail olmalı və icra məmuru vasitəsi ilə borcu tələb etməlidir. Əgər borcalan imkanı ola-ola borcu ödəmirsə, o halda bank zamindən pulu tələb edə bilməz. Zamin yalnız o vaxt krediti qaytarmalıdır ki, borclunun ödəniş qabiliyyəti olmasın. Əks təqdirdə, bankın zamindən nə isə istəməyə hüququ yoxdur və pulu elə borcludan tələb etməlidir: «Əgər bank lap borclunu tapa bilməsə belə, onu zamin tapıb banka göstərməli deyil. Çünki söhbət əlavə məsuliyyətdən gedir». "Banklar bunu zaminə demirlər" Əkrəm Həsənov deyir ki, zaminlər zaminliyin forması ilə bağlı bəri başdan seçim etməli və bunun kredit müqaviləsində qeyd olunmasına çalışmalıdırlar. Yalnız bu yolla məsuliyyəti minimim həddə endirmək olar. Azərbaycan təcrübəsində müqavilələrin 99%-də zaminlər birgə məsuliyyətə imza atırlar: «Zaminliyin forması barədə vətəndaşların çoxunun məlumatı yoxdur. Bankda isə kredit müqaviləsi imzalananda zaminə demirlər ki, sənin belə bir hüququn var. Çünki banklar birgə zaminlikdə maraqlıdır. Son nəticədə müqavilələrin demək olar ki, heç birində əlavə zaminlik yoxdur». 1 ildən sonra zaminlik qüvvədən düşür Əksər Həsənovun sözlərinə görə, son vaxtlar müştərilərindən dollar kreditlərini vaxtına ala bilməyən banklar kredit müqaviləsinin müddətini artırırlar. Bu isə avtomatik olaraq zaminliyin qüvvədən düşməsi deməkdir: «Vətəndaş konkret müddət üzrə zamin durub. Əgər müqavilə zaminin xəbər olmadan dəyişdirilirsə, müddət artırılırsa, bu, o deməkdir ki, artıq zamin məsuliyyətdən yaxa qurtarır». Bundan başqa, hüquqşünas deyir ki, borcun ödənilməməsinə görə, borclu 3 il ərzində məhkəməyə verilə bilərsə, zaminlər üçün bu müddət 1 ildir. Müqavilənin müddətinin bitməsindən 1 ildən çox vaxt keçibsə, artıq zamindən məhkəmə yolu ilə heç nə tələb edilə bilməz. fins.az

9 Mart 2016 12:05

Azərbaycan Dövlət Neft Fondu bu gün hərraca daha 50 mln. dollar çıxaracaq

"Report": Sabah dolların rəsmi məzənnəsi 1,63 AZN/USD-ni üstələyə bilər Azərbaycan Dövlət Neft Fondu (ARDNF) Azərbaycan Mərkəzi Bankı (AMB) vasitəsi ilə martın 9-da keçiriləcək növbəti hərraca 50 mln. ABŞ dolları həcmində valyuta kütləsini satışa çıxaracaq. Bu barədə "Report"a bank dairələrindən məlumat verilib. "Report"un analitik qrupu qeyd edir ki, kommersiya banklarının cari tələbatının əvvəlki səviyyədə qalacağı və təklifi üstələcəyi təqdirdə, martın 10-na dolların rəsmi məzənnəsinin minimum 1,6309 AZN/USD olacağı gözlənilir: "Lakin məzənnənin proqnozlaşdırılan səviyyəni də üstələyəcəyi istisna edilmir və bu, banklararası əqdlərin olub-olmaması və bu seqmentdəki balansdan asılı olacaq". "Sabah dolların məzənnəsi ən azı 1,6309 manat müəyyən edilərsə, marja nəzərə alınmaqla kommersiya banklarında ABŞ valyutasının satış məzənnəsi maksimum 1,6961 AZN/USD-yə kimi artırıla bilər", - deyə analitiklər qeyd ediblər. Qeyd edək ki, bu gün Bakıda nağd dollar 1,6700 manat qiyməti ilə satılır, lakin marja nəzərə alınmaqla maksimal satış məzənnə 1,6877 AZN/USD-yə kimi artırıla bilər. Xatırladaq ki, martın 7-də ARDNF hərracda 50 mln. dollar həcmində valyutanı satışa çıxarıb və kommersiya bankları bu məbləğin 49,7 mln. dollarını alıb. Nəticədə, bu günə rəsmi məzənnə 1,6228 AZN/USD səviyyəsində müəyyən edilib.

9 Mart 2016 11:39

Fakt

Bizi izləyin