Nazirimiz Rusiyada zavod tikməyə başladı – 70 milyonluq layihə 

14193

Azərbaycanın fövqəladə hallar naziri Kəmaləddin Heydərov Rusiyanın meyvə şirəsi sektoruna böyük miqdarda maliyyə yatırıb Bu barədə “business-gazeta.ru” saytındakı reportaj-məqalədə deyilir. Qeyd olunur ki, Heydərovun biznes klanına daxil olan “Benkons Group” şirkəti Tatarstanda Sokurı şəhərinin Laişev rayonunda 4 milyard rubl dəyərində (Təxminən 70 milyon manat) zavodun tikintisinə başlayıb. Oktyabrın 7-də Tatarstan Respublikasının prezidenti Rustam Minnixanovun iştirakı ilə təntənəli təməlqoyma mərasimi keçirilib. Mərasimdə Kəmaləddin Heydərov da iştirak edib. “Benkons Group” bu il fevral ayında adıkeçən şirkətlə AİR RT arasında saziş imzalanıb, iyun ayında Laişevdə 75 hektar torpaq sahəsi alıb və cəmi bir neçə gün əvvəl zavod inşaatına start verib. Bu şirkət “Rusiyada içilən meyvə şirələrinin hər 10-cu stəkanını” Tatarstanda istehsal etməyə iddialıdır. İnvestorlar yerli almalara ümid etsələr də, bildirilir ki, bu həcmdə istehsal üçün yerli məhsul azlıq edəcək və Azərbaycandan gətirilməsinə ehtiyac var. 4,06 milyardlıq investisiya layihəsinin istehsal gücü saatda 25,5 min litr və ya ildə birnövbəli rejimlə 53,8 milyon litr təşkil edir. Zavodun yanında xammal anbarı və hazır məhsullar üçün anbarlar olan böyük logistika mərkəzi tikiləcək. Zavodun fəaliyyətə başlaması 2017-ci ilin ilk yarısına planlaşdırılır. “Benkons Group”un kommersiya direktoru Emil Zalov bildirib ki, şirkət uğurlu nəqliyyat infrastrukturu, yaxşı investisiya mühiti və xoşagələn iqlim şərtlərinə görə Tatarstana yatırım etmək etmək qərarına gəlib. “Biz burda meyvələrin, ilk növbədə alma yetişdirilməsi üçün böyük potensial görürük. Bu bizə istehsal qiymətlərini azaltmaq imkanı verəcək. Meyvə ucuzdur, lakin onu daşımaq bahadır. Regionun yerli kənd təsərrüfatı imkanlarından yararlanacağımıza ümid edirik”, – deyə Emil Zalov qeyd edib. Onun sözlərinə görə, konsentratlardan bərpa olunan əksər şirələr üçün əsas meyvə olan almanın təxminən yarısı yerli xammal kimi Tatarstandan alınacaq. Zavoda ildə 40-50 min ton alma lazım olacaq. Jurnalistlərin “bu qədər almanı Tatarstanda hardan tapacaqsınız” sualına Zalov belə cavab verib ki, alma tez yetişən məhsuldur və üç il ərzində ilk məhsulu toplamaq mümkün olacaq. Şirkət ümid edir ki, yerli istehsalçılar da bu istiqamətdə çalışacaq, zavodu xammalla təmin edəcəklər. Lakin ilk mərhələdə konsentratın Azərbaycandan gətiriləcəyi deyilir. Kommersiya direktorunun sözlərinə görə, ancaq yerli xammala ümid etmək olmaz, belə ki, Rusiyada ən çox içilən şirə portağal suyudur: “Çətin ki, biz Tatarstanda portağal yetişdirək”. E.Zalov 75 hektarlıq ərazisin ancaq 12 faizinin zavod kompleksi üçün istifadə olunacağını, qalan 63 hektarın isə “gələcək genişlənmə” üçün saxlanıldığını deyib. “Benkons Group”un kommersiya direktorunun sözlərinə görə, Azərbaycandan Rusiya bazarında hazırda idxal edilən şirə həcmi ildə 3-4 milyon litrə çatır və şirkət bu istiqamətdə federal şəbəkələrlə əməkdaşlır edir: “Lakin logistika və gömrük prosedurları gəlirin böyük hissəsini “yeyir”. Bizim vəzifəmiz ondan ibarətdir ki, məhsul təchizatına tamamilə Sokurıdakə zavodla keçək”. Şirkət nümayəndəsi əlavə edib ki, həmçinin burdan Çin və Şərqi Asiyaya da məhsul ixrac etmək planları var, çünki Azərbaycandan bu proses çətin və baha başa gəlir. Qeyd edək ki, sözügedən məqalədə müəllif Kəmaləddin Heydərovun personasına da diqqət yetirərək, Vikileaks saytına istinadla onu “Azərbaycanın ən nüfuzlu oliqarxı” adlandırır. Ümumiyyətlə, hazırki iqtisadi tənəzzül dövründə F.Heydərovun Rusiyada belə bahalı layihə həyata keçirməsi maraqlıdır. Belə görünür ki, neftin qiymətinin kəskin ucuzlaşması Azərbaycan iqtisadiyyatına ciddi təsir etsə də, oliqarxlarımızın inkişaf planlarına təsir edə bilməyib.(azpolitika.info)

10 Oktyabr 2015 1:46

“Neftin qiymət artımı müvəqqətidir”

72264

  Ekspertlər bildirirlər ki, tezliklə neft 40 dollardan da aşağı düşə bilər... Dünya bazarında neft yenidən bahalaşır. Ekspertlər bildirirlər ki, neftin bahalaşmağa bir neçə amil var. Burada Rusiyanın Suriyada apardığı hərbi əməliyyatlar da əhəmiyyətli rol oynayır. Həmçinin, ABŞ-da hasilatın azalacağı ilə bağlı proqnozlar da təsirsiz ötüşməyib. Ancaq qiymət artımının uzunmüddətli olmayacağı vurğulanır. Bildirilir ki, tezliklə qiymətlər yenə aşağı düşəcək. Ekspert Natiq Cəfərli məsələ ilə bağlı musavat.com-a açıqlamasında bildirib ki, neftin müvəqqəti və çox az bahalaşmasının yeganə səbəbi dünyada risk iştahının artması, FED-in faiz artımını ertələməsi olub: “Bütün birjalarda yüksəlişlər oldu, bu da neftə də təsir etdi. Çünki dollar ucuzlaşanda neft bahalaşır. Nə Suriya hadisələrinin, nə də Rusiyanın müdaxiləsinin neftə təsiri yoxdur, ola da bilməz. Dünyada neft hasilatı, istehlakı gündəlik 3 milyon bareli üstələyir, ciddi artıq neft hasilatı var. Hələ heç İran da bazara girməyib. Hasilat artdıqca, İran bazara girdikdə, qiymətlər yenə enəcək, yaxın 1-2 ayda hətta 40 dollardan da aşağı enə bilər. Çünki dünyada iqtisadi artım tempi də xeyli zəifləyib”. Ekspert Vüqar Bayramov isə deyib ki, oktyabr ayında dünya bazarında Brent markalı neftinin qiyməti 11 faizə yaxın yüksəlib. “Doqquz gündə iki rəqəmli qiymət yüksəlişinə imza atan xam neft məhsulları son dövrün rekrod artımını rəsmilləşdirib. Neftin dünya bazar qiymətində artımlar davam edir. Bununla da neftin dünya bazar qiyməti son 2 ayda ən baha qiymətə satılır. Qiymət artımına əsas kimi ABŞ-da açıqlanan iqtisadi göstəricilər qeyd edilir. Belə ki, Birləşmiş Ştatlarda benzin tələbatının yüksəlməsi və bir sıra neft buruqlarının bağlanması da enerji bazarına ciddi təsir göstərib. Beynəlxalq Enerji Akademiyasının məlumatına görə, ötən ay ABŞ-da neft hasilatı gündəlik 120 min barel azalıb. Bu son 1 ildə ABŞ-da qeydə alınan ən aşağı istehsal göstəricisidir. Eyni zamanda Birləşmiş Ştatlarda hasilatın azalacağı ilə bağlı proqnozlar verilməkdədir. Digər tərəfdən, investorların yalnız ABŞ-da deyil, eyni zamanda digər neft bölgələrində də sərmayə qoyluşunu azaltması müşahidə olunur ki, bu da neftin potensial təklifinə təsir göstərməkdədir”. Ekspert həmçinin qeyd edib ki, digər əsas səbəb Rusiyanın Suriyada apardığı hərbi əməliyyatlardan sonra dünyanın ən böyük enerji hasilatçılarından olan Yaxın Şərqdə qeyri-stabilliyin yaranacağı ilə bağlı narahatçılıqdır: “NATO-nun son münaqişəyə ilə bağlı açıqlamaları və Rusiyanın regionda qalmaq istəyi hərbi əməliyyatların bütün Yaxın Şərqə yayılması təhlükəsi yaradıb. Bu isə potensial neft təklifinin azalacağı ilə bağlı investorlar arasında ciddi narahatçılıq formalaşdırıb”. V.Bayramovun sözlərinə görə, Neftin dünya bazar qiymətinin yüksəlməsi Azərbaycan üçün olduqca faydalıdır: “Bu ölkəyə daxil olan valyutanın həcminin artmasının, büdcə gəlirlərinin çoxalmasının, monetar stabilliyin və dövlət rezervlərinin həcminin qorunub saxlanmasının əsas şərtlərindən hesab edilir”.

10 Oktyabr 2015 11:34

“Azəryolservis” yollarda kanalizasiya quyuları qoyur

dc0f3df0-1d8a-426b-82e7-62d7f709610e_292

Yollarda səth sularının normal kənarlaşdırılması üçün yağış-kanalizasiya sistemi qurulur Nəqliyyat Nazirliyinin “Azəryolservis” ASC tərəfindən 2015-2016-cı illərin payız-qış mövsümünə hazırlıq, avtomobil yollarının və yol qurğularının normal istismarını, hərəkətin fasiləsizliyini və təhlükəsizliyini təmin etmək məqsədilə hazırlanan tədbirlər planına uyğun olaraq işlər aparılır. Bu məqsədlə Heydər Əliyev prospektinin Sabunçu yol qovşağından Bakıxanov qəsəbəsinə gedən yolda səth sularının normal kənarlaşdırılması üçün yağış-kanalizasiya sisteminin qurulması işlərinə start verilib. “Azəryolservis”in mətbuat xidmətindən "Report"a verilən məlumata görə, yağış-kanalızasiya sisteminin qurulması üçün yolun kənarı 1,5-3,5 metr dərinlikdə qazılıb. Səth sularının normal axıdılması üçün 400 mm diametrlik borudan istifadə olunur, hər 25-30 metrdən bir kanalizasiya quyuları qoyulur. Bundan sonra qazılan ərazinin üstü bərkidilərək asfaltlanacaq və quyuların üzərinə yağış barmaqlıqları qoyulacaq.Qeyd edək ki, sözügedən ərazidə səth sularının normal kənarlaşdırılması üçün yağış-kanalizasiya sistemi olmadığından həm yağış yağarkən, həm də yolun kənarlarındakı yaşıllıq suvarılarkən axıdılan su yolun hərəkət hissəsinə yığılırdı. Bu isə həm nəqliyyat vasitələrinin hərəkətinə mane olurdu, həm də yolun asfalt-beton örtüyünün yuyulmasına səbəb olurdu. Məhz bütün bunlar nəzərə alınaraq həmin yolda yağış-kanalizasiya sisteminin qurulması işlərinə start verilib.

8 Oktyabr 2015 3:49

İş adamları Fazil Məmmədova meydan oxumağa başladılar

fazl4

  İri şirkətlər Vergilər Nazirliyini ard-arda məhkəməyə verirlər Azərbaycanda Vergilər Nazirliyinə qarşı məhkəmə iddiaları sürətlə artır. Ən maraqlısı isə odur ki, son bir neçə ayda Fazil Məmmədovun nazirliyi ilə problemlərini hüquq müstəvisində həll etmək istəyənlərin sayı xeyli artıb. Sonuncu belə məhkəmə iddiası haqqında dünən məlumat yayılıb. Məlumatda bildirilir ki, Azərbaycanda fəaliyyət göstərən Türkiyə şirkəti Vergilər Nazirliyini məhkəməyə verib. Belə ki, “DEMTA lSl VE ENDÜSTRİYEL TESİSLER SANAYİ VE TİCARET LİMİTED ŞİRKETİ” Vergilər Nazirliyinin Bakı şəhəri üzrə Vergilər Departamentinə qarşı səyyar vergi yoxlaması aktının və qərarının etibarsız hesab edilməsi barədə iddia tələbi ilə Sumqayıt şəhər İnzibati-İqtisad Məhkəməsinə müraciət edib. Hazırda məhkəmədə iddiaya baxılır. Ümumiyyətlə isə son bir ildə Azərbaycanın özəl sektoru ilə Fazil Məmmədovun rəhbərlik etdiyi qurum arasında faktiki olaraq “məhkəmə müharibəsi” yaşanır. Məsələn, bu ilin iyulunda Hacı İbrahim Nehrəmlinin (İbrahimovun) “Avesta Konserni” Azərbaycan Vergilər Nazirliyi və Bakı şəhər Vergilər Departamentini məhkəməyə verib. Şirkət vergi borcunun ləğv edilməsi barədə iddia qaldırıb. 2 saylı Bakı İnzibati-İqtisadi Məhkəməsi iddianı təmin etməyib. Bakı Apellyasiya Məhkəməsi 2 saylı Bakı İnzibati-İqtisadi Məhkəməsinin qəbul etdiyi aktı qismən ləğv edib və yeni qərar qəbul edib. Vergi borcunun məbləği açıqlanmayıb. Vergilər Nazirliyinin analitik-informasiya şöbəsindən həmin vaxt bildirilib ki, “Avesta Konserni” MMC ona hesablanmış torpaq vergisini məhkəmədə mübahisələndirmişdi və hazırda məhkəmə çəkişməsi davam edir”. Ötən ay isə "Zövq MTB" Məhdud Məsuliyyətli Cəmiyyəti (MMC) Azərbaycan Vergilər Nazirliyi yanında Bakı Vergilər Departamentinin Bəyannamələr və vergi borclarının alınması idarəsini məhkəməyə verib. MMC idarənin qəbul etdiyi aktın və qərarın ləğv edilməsini tələb edib. Yenə bu ilin avqustunda məlum olub ki, “Evro Stroy-S” MMC tikinti şirkəti Vergilər Nazirliyi yanında Bakı Vergilər Departamentini məhkəməyə verib. Şirkət nazirliyin müfəttişinin 631 min manatlıq cərimə sanksiyasının ləğv olunmasını tələb edib. Nazirliyin müfəttişi sanksiya sənədini 2014-cü il fevralın 19-da imzalayıb. “Evro Stroy-S” MMC 1 saylı Bakı İnzibati-İqtisadi Məhkəməsinə müraciət edib. Məhkəmə şirkətin iddiasını təmin edib. Sentyabrda isə "NN Təmir Tikinti" Məhdud Məsuliyyətli Cəmiyyəti (MMC) Vergilər Nazirliyi (VN) yanında Bakı Vergilər Departamentini məhkəməyə verib. MMC kameral vergi yoxlamasının nəticələrinin təqdim olunmasını tələb edib. Qeyd edək ki, bunlar son aylarda Vergilər Nazirliyinə qarşı qaldırılan məhkəmə iddialarının sadəcə bir hissəsidir. Mövzu ilə bağlı danışan adının açıqlanmasını istəməyən ekspert deyib ki, son bir neçə ayda Vergilər Nazirliyi ilə hüquqi müstəvidə çəkişən şirkətlərin sayının kəskin artması maraq doğurur və ciddi tendensiyadan xəbər verir: “Məsələ burasındadır ki, bu ilin iyulunda ölkə başçısı İlham Əliyevin Nazirlər Kabinetinin 2015-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasında vergi sistemi ilə bağlı sərt tənqidi fikirlər söyləyib. Dövlət rəhbəri bildirib ki, ölkədə vergivermə mədəniyyəti tam şəkildə, şəffaf qaydada formalaşmayıb. Prezident əlavə edib ki, Vergilər Nazirliyi Bakıda və rayonlarda haqq qoyur, pay istəyir, “krışalıq” edir: “Bu, dözülməz haldır, buna son qoyulmalıdır. Əgər hesab edirlərsə ki, bunu heç kim bilmir, səhv edirlər. Bu, çox ciddi məsələdir və mənə siqnallar gəlir ki, bu, bəzi yerlərdə kütləvi xarakter alıb. Bu, tamamilə yığışdırılmalıdır. Ona görə, bax, bu gün mən bütün aidiyyəti qurumlara və eyni zamanda, sahibkarlara göstəriş verirəm. Mənə məlumat versinlər, qorxmasınlar, siqnal versinlər, məktub yazsınlar, e-mailə yazsınlar”. Məhz ölkə başçısının Vergilər Nazirliyi ilə bağlı belə bir sərt tənqidi çıxışından sonra bu qurum qarşısında haqqını arayanların məhkəməyə üz tutma presedentinin intensivləşməsi təsadüfi deyil”. Həmsöhbətimiz hesab edir ki, ölkə başçısının məlum çıxışı iş adamlarını Fazil Məmmədov və onun nazirliyinə qarşı cəsarətləndirib: “Vaxtilə hansısa şirkətin Vergilər Nazirliyi ilə məhkəmə davasına çıxması nadir, hətta qeyri-adi hadisə hesab olunurdu. İndi isə bu adət halını alır. Hesab edirəm ki, burada birinci ən önəmli faktor adıçəkilən qurumun artıq prezident səviyyəsində kəskin tənqididir. İkinci amil isə Vergilər Nazirliyinin özəl sektora münasibətinin aşırı aqressivləşməsindən doğur. Dünyadakı və Azərbaycandakı iqtisadi proseslər elə bir vəziyyət yaradıb ki, heç kim əsassız yerə Vergilər Nazirliyinin hər hansı haqsız qərar və aktlarına, cərimə sanksiyalarına tabe olmaq istəmir. İş adamları üçün artıq hər manatın dəyəri var, belədə onlar bütün riskləri göz önünə alırlar ki, Fazil Məmmədovun nazirliyinin yanlış qərarları ucbatından ciddi məbləğdə pullar itirməsinlər”. Ekspert Vergilər Nazirliyi əleyhinə artan məhkəmə iddialarının Fazil Məmmədov üçün yarada biləcəyi təhlükəyə də toxunub: “İlham Əliyevin məlum çıxışından sonra Fazil Məmmədovun adı onsuz da “qara siyahı”da olan nazirlər sırasında hallanır. Getdikcə artan məhkəmə iddiaları sözügedən nazirliyin onsuz da kifayət qədər qaranlıq imicini daha da pisləşdirə və Fazil Məmmədovun əvəzlənməsinin qaçılmaz zərurətə çevrildiyini, Nazirliyin “islah”ına onun rəhbərliyindən başlanılmalı olduğunu aydın şəkildə nümayiş etdirə bilər”.(unikal)

7 Oktyabr 2015 12:26

SOCAR nəhəng layihəsini dayandırdı

socar2

  Azərbaycanın Gürcüstanda inşa etdiyi karbamid zavodunun tikintisi qeyri-müəyyən vaxta qədər saxlanılıb Bunu APA-ya "SOCAR Georgia" (SOCAR-ın törəmə şirkəti) şirkətinin baş direktoru Mahir Məmmədov bildirib. M.Məmmədovun sözlərinə görə, bu layihənin ləğv olunması barədə yayılan xəbərlər əsassızdır: "Gürcüstanın Rustavi şəhərində Azot zavodu fəaliyyət göstərir. Həmin müəssisənin 3 mindən artıq işçisi var. Müəssisənin çox gözəl infrastrukturu var. Bu zavodun effektivliyi də kifayət qədər yaxşıdır. Ancaq bu müəssisə bu gün öz məhsulunu sata bilmir. Çünki xammalın qiyməti onların istədiyi qədər aşağı düşməyib. Ancaq dünya bazarında məhsulun özünün qiyməti aşağı düşüb. SOCAR da karbamid zavodunu bu gün Gürcüstanda tiksəydi, onun aqibəti bu cür olacaqdı". Baş direktor qeyd edib ki, Azərbaycan tərəfi Gürcüstan hökuməti ilə məsləhətləşmələr apardıqdan sonra belə qərara gəlinib ki, layihənin tikintisi müəyyən dövrə qədər saxlanılsın: "Əgər zavodun xammalı yoxdursa, xammalın qiyməti barədə nigarançılıq varsa, bu zavod necə tikilə bilər? Bu, həm SOCAR-ın, həm də Gürcüstan hökumətinin birgə qərarıdır. Gürcüstanda olan zavod xammalı dünya qiymətləri ilə alacaq və dünya qiymətlərinə uyğun şəkildə istehsal etdiyi məhsulu dünya bazarında çıxaracaq", - deyə M. Məmmədov bildirib. Zavodun tikintisinə nə zaman başlanacağına gəldikdə, SOCAR rəsmisi deyib ki, bunu demək mümkün deyil. "Hazırda bütün dünyada enerji daşıyıcılarının qiyməti aşağı düşüb. Həm bazarlarda, həm də bir sıra ölkələrdə qeyri-sabitlik var. Buna görə, zavodun nə vaxta qədər təxirə salındığını demək mümkün deyil", - deyə baş direktor qeyd edib.

5 Oktyabr 2015 10:58

Fakt

Bizi izləyin