Dollarla olan əmanətlərin faizi aşağı salındı

Azərbaycanın kommersiya bankları dollarda qəbul edilən əmanətlər üzrə faiz dərəcəsini kəskin aşağı salıblar. “Marja”nın məlumatında, əhalinin dollar əmanətinə axınının qarşısını almaq üçün xarici valyutada, o cümlədən dollarda yerləşdirilən əmanətlər illik 2-8% dərəcəsi ilə qəbul edilir. Halbuki, bir müddət əvvəl, banklar manat və dollar hesablı əmanətlərinin faiz dərəcələrini 14%-dək qaldırmışdılar. Məsələn, hazırda müddətindən asılı olaraq dollar hesablı əmanətləri Kapital Bank 2-6,5%-lə, AccessBank 3-5%-lə, Yapıkredi Bank Azərbaycan 2-5%-lər ilə qəbul edir. Digər banklar da, xarici valyutada qəbul edilən əmanətlər üzrə faiz dərəcələrini aşağı salıblar. “Marja”ın banklardan əldə etdiyi məlumata görə, xarici valyutada yerləşdirilən əmanətlər üzrə faiz dərəcəsinin aşağı salınması tövsiyəsi Mərkəzi Bank tərəfindən verilib. Hazırda banklar Manat ilə yerləşdirilən əmanətlərə daha yüksək faiz təklif edirlər. Manat ilə yerləşdirilən əmanətlər bankdan və müddətindən asılı olaraq 12-16%-lər ilə qəbul olunur. Qeyd edək ki, əhali devalvasiya ilə bağlı olaraq və manatın ucuzlaşacağından ehtiyat edərək əmanətlərini dollarda yerləşdirməyə üstünlük verir. Mərkəzi Bankın məlumatına görə, banklardakı əmanətlərin 70%-i xarici valyutadadır. Banklar xarici valyutada cəlb etdikləri vəsaitləri xarici valyutada da yerləşdirməlidirlər. Lakin dollar ilə verilən kreditlərə maraq azaldığından banklar dollarda cəlb etdikləri əmanətləri kredit şəkilində verməkdə çətinlik çəkirdilər. İndi dollar əmanətləri üzrə faiz dərəcələrinin azaldılması, Manat əmanətlərinin isə yüksək faizlə qəbul edilməsi bankları rahatlaşdıra bilər.

21 İyun 2015 3:20

Sumqayıt sərnişin stansiyasında məskunlaşan qaçqınlar köçürülür

Azərbaycan Dəmir Yolları" Bakı-Sumqayıt dəmir yolu marşrutu üçün Tarif Şurasına müraciət edəcək Bakı-Xırdalan-Sumqayıt dəmir yolunun əsaslı təmiri çərçivəsində "Sumqayıt Sərnişin" stansiyasında məskunlaşan qaçqınlar ərazidən köçürüləcəklər. Bunu Azərbaycan Dəmir Yolları" QSC-nin mətbuat xidmətinin rəhbəri Nadir Əzməmmədov bildirib: "Artıq onlarla razılıq əldə olunub, yaxın günlərdə onların köçürülməsi həyata keçiriləcək. Stansiyada yaşayan 40 ailənin hər birinə təxminən 30 min manat həcmində vəsait ayrılıb". "Bundan sonra, stansiyada yenidənqurma işləri həyata keçiriləcək. Bakı-Xırdalan-Sumqayıt dəmir yolu sahəsində 63 km yol çəkilməlidir, onun 52 kilometri artıq çəkilib. Hazırda "Keşlə", "Bakı Sərnişin", əsasən də "Sumqayıt Sərnişin" stansiyalarında iş aparılır. Sonuncuda yeni iki paltforma qurulmalıdır. Çünki ikimərtəbəli hündür qatarlarda sərnişinlərin daha rahat qalxıb-düşməsi təmin edilməlidir. Həmçinin yeraltı keçid tikilir, abadlıq işləri görülür", - deyə N.Əzməmmədov əlavə edib. Qeyd edək ki, hazırda Bakı Sərnişin-Keşlə-Xırdalan-Güzdək-Sumqayıt baş stansiyasına daxil olmadan Sumqayıt stansiyasına hərəkət etmək üçün 1,65 km uzunluğunda yeni birləşdirici yol tikiləcək və bununla da qatarlar Sumqayıta girəcək. Bundan əlavə, stansiyada elektrik təchizatı və rabitə siqnalizasiya sistemi də yenilənməlidir. Bakı-Xırdalan-Sumqayıt dəmir yolu paytaxtla Sumqayıt arasında yollarda müşahidə olunan sıxlığı aradan qaldırmaq, sərnişinlərin sürətli daşınmasını həyata keçirmək üçün, yəni Suqmayıtdan qatara minən sərnişinin birbaşa Bakının mərkəzinə ("28 May" m/st.) hərəkət etməsinə imkan yaradacaq. Bu yolda sərnişin 40 dəqiqəyə Bakıda Sumqayıta və əks istiqamətdə hərəkət edəcək. Dəmir yolunda şəhərlər arasında hərəkətin təşkilinə dair tarifin müəyyən edilməsi məqsədilə "Azərbaycan Dəmir Yolları" QSC Tarif Şurasına müraciət etməyə hazırlaşır. N.Əzməmmədov bildirib ki, hazırda monitorinq aparılır, təkliflər hazırlanır: "İnsanların sosial vəziyyətinə uyğun tarifin müəyyən olunacağı gözlənilir". "Azərbaycan Dəmir Yolları" layihənin tez bir zamanda bitməsini hədəfləyib. Bakı-Xırdalan-Sumqayıt dəmir yolu istiqamətində “Stadler Rail Group” şirkətinin “Stadler Minsk” zavodunda istehsal olunmuş “KISS” markalı elektrik qatarları işləyəcək. Qatarların hər birində 4 vaqon var. Ümumi sərnişin tutumu 919 nəfər olan hər bir qatarda 396 oturacaq var ki, onlardan da 84-ü biznes-klassdır. Qeyd edilənlərlə yanaşı fiziki qüsurlu insanların da hərəkəti üçün müvafiq şərait nəzərdə tutulub.

19 İyun 2015 3:39

​Bakıda kənd təsərrüfatı seminarı keçirilir

Tədbirin ümumi məqsədi ərzaq təhlükəsizliyinin gücləndirilməsidir Bu gün BMT-nin Ərzaq və Kənd Təsərrüfatı Təşkilatının (FAO) Azərbaycan Kənd Təsərrüfatı Nazirliyi ilə birgə həyata keçirdiyi “Mərkəzi Asiya ölkələrində fitosanitar nəzarətin gücləndirilməsi” regional layihəsi çərçivəsində ikigünlük seminar işə başlayıb. Nazirliyin mətbuat xidmətindən verilən məlumata görə, Azərbaycanda və 4 Orta Asiya (Qazaxıstan, Qırğızıstan, Tacikistan və Özbəkistan) ölkəsində növbəti iki il ərzində həyata keçiriləcək layihənin ümumi məqsədi ərzaq təhlükəsizliyinin gücləndirilməsi, əhalinin qidalanma səviyyəsinin yaxşılaşdırılması və ətraf mühitin mühafizəsi məqsədilə kənd təsərrüfatı məhsullarının istehsalı və ixracı sahəsində siyasətin təkmilləşdirilməsi və əsas fitosanitar məsələləri sahəsində milli potensialın gücləndirilməsidir. Layihə çərçivəsində ticarətin inkişaf etdirilməsi məqsədilə ixrac və idxal bazarlarının qiymətləndirilməsinin aparılması sahəsində layihənin benefisiar ölkələrində milli fitosanitar nəzarət xidmətlərinin dəstəklənməsi, milli fitosanitar qanunvericiliyə baxılması və onların Beynəlxalq Bitki Mühafizəsi Konvensiyası və ÜTT-nin Sanitar və Fitosanitar Qanunvericiliyə uyğunlaşdırılması, zərəvericilərin idarə olunması, beynəlxalq fitosanitar standartlar, zərərvericilərin risk analizinin aparılması sahəsində təlimlərin keçirilməsi vasitəsilə milli potensialın artırılması, eyni zamanda bitki karantin məntəqələrinin və laboratoriyaların müvafiq avadanlıqlarla təmin edilməsi və bu sahədə təlimlərin keçirilməsi vasitəsilə karantin zərərvericilərinin aşkarlanması və ticarət tərəfdaşlarının tələblərinin ödənilməsi məqsədilə ixracın sertifikatlaşdırılması sahəsində institusional imkanların gücləndirilməsi nəzərdə tutulur. FAO-nun Azərbaycandakı nümayəndəsi Mustafa İmir bildirib ki, Kənd Təsərrüfatı Nazirliyi yanında Dövlət Fitosanitar Nəzarət Xidməti tərəfindən zərərvericilərin əmələ gəlməsi və yayılmasının qarşısının alınması sahəsində aparılan məqsədyönlü işlərə istinad edib, lakin hazırkı dövrdə ətraf mühit faktorlarının çevik dəyişməsi, ticarətin inkişafı və regionda ölkələr arasında ticarət dövriyyəsinin artması zəminində ölkəyə yeni zərərvericilərin daxil olmasının böyük risk doğurduğunu vurğulayıb. Bu baxımdan, karantin zərərvericilərinin əmələ gəlməsi və yayılmasının qarşısının alınması sahəsində region ölkələri arasında əməkdaşlıq təşəbbüslərinin inkişaf etdirilməsinə böyük zərurətin olduğunu qeyd edib ki, həyata keçiriləcək bu layihənin də məhz bu məqsədə xidmət edəcəyini bildirib. İki gün davam edəcək seminarda layihə çərçivəsinədə beynəlxalq mütəxəssislərlə yerli mütəxəssislər arasında fikir mübadiləsi aparılacaq.

17 İyun 2015 1:44

Bu il arpa və buğda istehsalında ciddi azalmalar gözlənilir

Vahid Məhərrəmov: " Əksər taxıl sahələrində apardığımız baxışlar zamanı bitkilərdə sünbülün qısa, dənin cılız, sünbüldə dənin kütləsinin az olduğu müəyyən olundu" Kənd təsərrüfatı üzrə mütəxəssis, ekspert Vahid Məhərrəmov rəsmi facebook səhifəsində yağışların intensivliyi nəticəsində taxıl bitkilərinin inkişafı sahəsində nöqsanların yarandığını və bu il həmin sahələrdə ciddi azalmaların olacağını bildirib: "Taxıl sahələrində apardığımız monitorinqlər göstərdi ki, bu il arpa və buğda istehsalında ciddi azalmalar gözlənilir. Taxıl zəmilərində bitkilərə, sünbüllərə baxış göstərdi ki, son aylarda yağışların yağması taxıl bitkilərinin inkişafı üçün münbit şərait yaratsa da, əksinə, yağışların intensivliyi bu sahədə yol verilmiş bir çox nöqsanları ortaya çıxarmışdı. Belə ki, sahələrdə əyilmiş (yatmış) bitkilərə daha çox rast gəlinir. Bu kimi hal bitkilərin zəif inkişafından xəbər verir. Yəni, taxıl bitkilərinin inkişaf fazalarında vaxtlı-vaxtında aqrotexniki qaydalara əməl olunmaması səbəbindən bitkilər ilkin böyümə etapında normal inkişafdan məhrum olmuş, sonrakı fazalarda isə bu çatışmazlıqlar özünü bitkinin gövdəsinin zəif, nazik olmasında göstərmişdi. Elə bu səbəbdən də yağışlar yağan zaman bitkilər əyilmişdir. Əksər taxıl sahələrində apardığımız baxışlar zamanı bitkilərdə sünbülün qısa, dənin cılız, sünbüldə dənin kütləsinin az olduğu müəyyən olundu. Bu isə məhsulun kəmiyyətinin az olmasını göstərməklə yanaşı həm də əldə olunan dənin keyfiyyətinin aşağı olduğundan xəbər verir. Yağan yağışlar taxıl sahəsində uzun müddət geniş yayılan alaq otların intensiv inkişafını təmin etməklə yanaşı, həm də yabanı vələmirin (yulafca) də daha geniş yayılmasına səbəb olmuşdu. Bu isə biçin zamanı əldə olunan məhsulda zibil qarışığının həcmini artırmaqla yanaşı, həm də gələcəkdə mövcud əkin sahələrində alaq otlarının daha da geniş yayılmasına səbəb olacaq". Gülşən ŞƏRİF

17 İyun 2015 12:15

Bakıda kommersiya obyektləri ucuzlaşır

  Bakı şəhərində 1 kv.metr qеyri-yaşayış sahəsinin orta qiyməti (təklif üzrə) bu ilin may ayında apreldəki 3 618 dollardan 3 418 dollara enib. Beləliklə, aylıq qiymət azalması 5,53% təşkil еdib. Faktinfo-nun verdiyi xəbərə görə, bu barədə “MBA Ltd.” konsaltinq şirkəti monitorinq qrupunun açıqladığı aylıq hesabatda deyilir. Hesabata əsasən, mayda bazarda qеyri-yaşayış sahələrinin 1 kv.m-nin orta qiymətindən (3 418 dolları) aşağı olan obyеktlər ümumi portfеldə 69,5% paya malik olub. Ay ərzində qеyri-yaşayış sahələri ilkin bazarında qiymət artımı Nİzami (6,7%), Səbail (1,2%), Suraxanı (31,7%) və Yasamal (29,3%) rayonlarında qeydə alınıb. Ən çox qiymət azalması isə Nərimanov (-12,8%), Sabunçu (-10,1%) və Xətai (-24,0%) rayonlarında müşahidə olunub. May ayı ərzində qiymətlərin azalması ilə yanaşı ümumi satış portfelində təkliflərin sayının da azalması baş verib. Bazara çıxarılan obyektlərin sayı ay ərzində 11,5% azalaraq 177 ədəddən 156-ə düşüb. Satış məqsədi ilə bazara təklif olunan kommersiya obyektlərinin həcmində əsas paya 38,0%-lə “boş yer” təyinatlı sahələr malikdir. Bu, o tip obyektlərdir ki, təyinatı dəqiq deyil və onlar ofis, mağaza və ya xidmət təyinatı altında istifadə oluna bilər. Xidmət və mağaza təyinatlı yerlər isə bazarda müvafiq olaraq 28,3% və 15,2% paya sahibdir. Satışda olan ofis təyinatlı yerlərin payı 10,9%, zirzəmi təyinatlı obyektlər isə 7,6% olub.

13 İyun 2015 11:00

Fakt

Bizi izləyin