Bakıda Prezidentin iştirakı ilə “Xocalı yürüşü” – Foto

XX əsrdə bəşər tarixinə Xocalı soyqırımı kimi daxil olan qanlı faciənin 25-ci ildönümü ilə əlaqədar fevralın 26-da Bakıda ümumxalq yürüşü keçirilir. Axar.az xəbər verir ki, Azərbaycan Respublikasının Prezidenti İlham Əliyev və Birinci vitse-prezident xanım Mehriban Əliyeva yürüşdə iştirak ediblər. Paytaxtın Azadlıq meydanından Xətai rayonunda ucaldılmış abidəyə doğru hərəkətə başlayan və 40 mindən çox insanın iştirak etdiyi ümumxalq yürüşünün məqsədi Xocalı faciəsi qurbanlarının xatirəsini ehtiramla yad etmək, erməni faşistləri tərəfindən insanlığa qarşı törədilmiş bu vəhşi cinayəti yenidən dünya ictimaiyyətinin diqqətinə çatdırmaqdır. Ön sırasında Prezident İlham Əliyevin və Birinci vitse-prezident xanım Mehriban Əliyevanın olduqları yürüş iştirakçıları Xocalı soyqırımı qurbanlarının xatirəsinə Bakının Xətai rayonunda ucaldılmış abidəyə doğru hərəkətə başladılar. Ümumxalq yürüşünün iştirakçıları və onların keçdiyi prospekt və küçələr boyu düzülmüş minlərlə gənc əllərində qanlı qırğının günahsız qurbanlarının - xüsusi qəddarlıqla qətlə yetirilmiş uşaqların, qadınların və qocaların portretləri, 25 il bundan əvvəl törədilmiş hadisələrin dəhşətli səhnələrini əks etdirən fotoşəkillər, faciənin təqsirkarlarından cavab tələb etmək, onları cəzalandırmaq, bu soyqırımına beynəlxalq səviyyədə siyasi-hüquqi qiymət vermək barədə çağırışlar və soyqırımı qurbanlarının adları, soyadlarının əks olunduğu Azərbaycan, rus, ingilis, fransız dillərində plakatlar və transparantlar tutmuşdular. Marşrut boyunca yolların kənarlarındakı monitorlarda, binaların fasadlarında və balkonlarında “Dünya Xocalı soyqırımını tanımalıdır!”, “Xocalıya ədalət!”, “Xocalını unutmayın!”, “Rədd olsun erməni faşizmi!”, “Xocalı – XX əsrin soyqırımı”, “Cinayətkarlar cəzasız qalmayacaqlar!”, “Xocalı soyqırımı – 25 il” və s. çağırışlar və şüarlar nümayiş etdirilirdi. Faciənin 25-ci ildönümü ilə əlaqədar Azərbaycan Respublikasının Prezidenti İlham Əliyev 2017-ci il yanvarın 24-də “Xocalı soyqırımının iyirmi beşinci ildönümü haqqında” Sərəncam imzalayıb. Azərbaycan Respublikasının Prezidenti Administrasiyası rəhbərinin sərəncamı ilə “Xocalı soyqırımının iyirmi beşinci ildönümünün keçirilməsinə dair tədbirlər planı” təsdiq edilib. Xocalı qırğını haqqında həqiqətlərin dünyaya çatdırılması, bu faciənin xalqımıza qarşı soyqırımı aktı kimi tanınması üçün Azərbaycan dövləti bütün zəruri addımları atır. Bu sahədə məqsədyönlü fəaliyyət ümummilli lider Heydər Əliyev Azərbaycanda siyasi hakimiyyətə qayıdandan sonra başlanıb. Ulu Öndərin təşəbbüsü ilə Xocalı soyqırımına siyasi-hüquqi qiymət verilib, fevralın 26-sı “Xocalı soyqırımı günü” elan edilib. 2008-ci ildə Heydər Əliyev Fondunun vitse-prezidenti Leyla Əliyevanın təşəbbüsü ilə başlanmış “Xocalıya ədalət!” beynəlxalq kampaniyası bu istiqamətdə təbliğat işini daha da fəallaşdırıb. Faciə ilə əlaqədar dəhşətli faktlar bu kampaniya çərçivəsində aparılan işlər sayəsində geniş beynəlxalq ictimaiyyətə çatdırılıb, planetin bütün guşələrində milyonlarla insan erməni millətçilərinin əsl simasını tanıyıb və bilib ki, ermənilər öz sərsəm ideyalarını həyata keçirmək naminə heç nədən, o cümlədən uşaqları qətlə yetirməkdən çəkinmirlər. İslam Əməkdaşlıq Təşkilatı Parlament İttifaqı ermənilərin Xocalıda törətdiyi mənfur əməlləri “insanlığa qarşı kütləvi cinayət” kimi tanıyıb və üzv dövlətləri bu faciəyə lazımi siyasi-hüquqi qiymət verməyə çağırıb. Dünyanın 10-dan çox ölkəsinin parlamenti, ABŞ-ın 20-dən artıq ştatının qanunverici orqanı Xocalı qırğınını soyqırımı aktı kimi tanıyıb. Xatırladaq ki, 1992-ci il fevralın 25-dən 26-na keçən gecə silahlı erməni dəstələri keçmiş sovet ordusunun Xankəndidə yerləşən 366-cı motoatıcı alayının ağır texnikası və şəxsi heyətinin köməyi ilə Azərbaycanın qədim Xocalı şəhərinin üzərinə hücum edib və onun dinc əhalisinə amansızcasına divan tutublar. Xocalı soyqırımının qanlı statistikası belədir: Hücum zamanı şəhərdə olan 3 min nəfərdən 613-ü, o cümlədən 106 qadın, 63 uşaq və 70 qoca xüsusi qəddarlıqla öldürülüb, 487 dinc sakin ağır yaralanıb, 1275 nəfər girov götürülüb və insanı alçaldan işgəncələrə məruz qalıb, 197 nəfərin taleyi hələ də məlum deyil. Səkkiz ailə tamamilə məhv edilib. Həmin insanlar yalnız etnik mənsubiyyətlərinə - azərbaycanlı olduqlarına görə amansızcasına öldürülüb, işgəncələrə məruz qalıb və şikəst ediliblər. Ermənilərin bu cəza tədbiri hərtərəfli planlaşdırılıb və yeganə bir məqsədlə törədilib – dinc sakinləri milli mənsubiyyət əlamətinə görə qismən və ya tamamilə məhv etmək. Beynəlxalq hüquqa görə belə hərəkətlər “soyqırımı” anlayışına uyğundur və dünya ictimaiyyəti tərəfindən bu cür tanınmalıdır. Xocalı soyqırımı qurbanlarının abidəsinin ətrafında fəxri qarovul dəstəsi və tər çiçəklər düzülmüşdü. Prezident İlham Əliyev Xocalı soyqırımı abidəsinin önünə əklil qoydu, faciə qurbanlarının xatirəsini ehtiramla yad edib. Birinci vitse-prezident xanım Mehriban Əliyeva, Baş nazir Artur Rasizadə, Milli Məclisin sədri Oqtay Əsədov, Prezident Administrasiyasının rəhbəri Ramiz Mehdiyev, Heydər Əliyev Fondunun vitse-prezidenti Leyla Əliyeva, Arzu Əliyeva, Heydər Əliyev abidənin önünə tər güllər qoyublar. Dövlət və hökumət rəsmiləri, Milli Məclisin deputatları, nazirlər, komitə və şirkətlərin rəhbərləri, diplomatik korpusun nümayəndələri, dini konfessiyaların başçıları, habelə qırğından xilas ola bilmiş Xocalı sakinləri də abidənin önünə güllər düzüblər.  

26 Fevral 2017 12:39

Əkbər Hacıyevlə Rövnəq Adbullayev vətəndaşların qəsdinəmi durur və ya”QAZ SABOTAJI”NDA MƏQSƏD NƏDİR?

Son vaxtlarda SOCAR-ın “Azəriqaz” İstehsalat Birliyinin Bakı və Abşeron yarımadasındakı yaşayış məntəqələrində qaz verilişini dayandırması mütəmadi xarakter alıb. O gün yoxdur ki, Bakı və Abşeron yarımadasındakı yaşayış məntəqələrinin hansındasa  qaz verilişinə məhdudiyyətlər qoyulmasın. Və bu qaz verilişi məhdudiyyətləri   6-8 saat, hətta, daha çox çəkir. Havalar soyuq olanda isə bir çox hallarda axşam saatlarında qaz kəsilir və insanları gecələr qazsız qoyurlar. Onsuz da əziyyət içində inləyən vətəndaşlar  soyuqdan donmamaq, həyatda qalmaq uğrunda mübarizə aparır. Məsələ ilə bağlı  “Azəriqaz” İstehsalat Birliyinin mətbuat xidmətinin rəhbəri İbrahim Kərbalayevə müraciət edəndə də, o, deyir ki,  xəttlərdə təmir işləri gedir və axşam saatlarında qazın verilişi təmin olunacaq. Bu gün də yenə də Abşeron rayonunun bir sıra yaşayış məntəqlərində qaz verilişi dayandırlıb. Məsələ ilə bağlı “Azəriqaz” İstehsalat Birliyinin mətbuat xidmətinin rəhbəri İbrahim Kərbalayevə müraciət etdik. O, bildirib ki, “Qaradağ” xəttində təmir işləri getdiyi üçün qaz verilişi dayandırılıb. Vər hər zaman olduğu kimi, yenə də qazın verilişinin axşam saatlarında bərpa olunacağını deyib. Ancaq “Azəriqaz” İB deyilən zamanda yox,  bir neçə saat sonra qaz verilişini bərpa edir. Və bunu da özlərinə “qənimət” bilirlər.   Burada bir məqamı da ədalət naminə demək lazımdır ki, “Azəriqaz” İstehsalat Birliyinin mətbuat xidmətinin rəhbəri İbrahim Kərbalayev ictimaiyyət açıq və istənilən məlumatı verən bir məmurdur. Bizlərsə onun işindən deyil, sadəcə, təmsil olunduğu təşkilatın rəhbərliyinin yarıtmaz fəaliyətindən narazıyıq. Axı, “Azəriqaz” İB niyə vaxtında qışa hazırlıq işləri ilə məşğul olmur ki, qışın bu oğlan çağında da  qaz verilişini kəsməklə, xalqı ölkə başçısından narazı salır?! Bax, maraqlı məqam burasındadır. Niyə zamanıda,  isti havalarda qaz kəmərlərindəki nazasılığı aradan qaldırmır?! Gözləməlidir ki, hansısa qaz kəmərində partlayış və digər hansısa qəza baş versin, insanlara, dövlətə ciddi ziyan dəyin, ondan sonra hansısa  təmir-bərpa işləri aprsın?.. Bu işləri də keyfiyyətsiz görərək, yeni problemlərə yol açsın?.. “Azəriqaz” İB bu fəaliyyəti ilə vətəndaşları avam yerinə qoyur, yoxsa,  dövlət başçısının  əhalinin sosial vəziyyətinin yaxşılaşdırılamsı iqtiqamətində həyata keçirdiyi siyasəti sabotaj edir?.. Hələ biz istehlakşıya verilən qazın keyfiyyətindən danışmırıq… “Azəriqaz” İB  xalqın qazını kəsməklə işini bitirmiş hesab etmir.  Belə ki, qaz verilişi bərpa olunduqdan sonra  smart kart aparatlarında da ciddi problem yaranır. Yəni, smart kart aparatları koda düşür və qaz bərpa edildikdən sonra evlərə qaz gəlmir. Bu da bir çox hallarda ciddi  faciələrə  gətirib çıxarır. Misal üçün deyim ki,  fevralın 16-18-da Ceyranbatanda  qaz verilişi dayandırılmışdı.  Qaz verilişi bərpa ediləndə isə qəsəbənin demək olar ki, yarısında smart kart aparatında   belə problemlər yaşandı. Koda düşən  smart kartı bərpa etmək üçünsə gərək vətəndaş yenidən kartına bir manatlıq qaz yükləməlidir. Elə oldu ki, bir çox insanlar  bu halı bir neçə dəfə təkrara etdikdən sonra  koda düşən smart kart aparatının kodunu aça bildi. Bəlkə birinin  maddi imkanı yoxdur?  Bəlkə onun yaşadığı yerdə terminal yoxdur və ya işləmir? Onda nə etməli? Vətəndaş ölməlidirmi? Ancaq “Azəriqaz” İB-də çalışan  və adının çəkilməsini istəməyən əməkdaşlarından verlən  məlumata görə, SOCAR əslində qaza qənaət etmək üçün bu taktikadan istifadə  edir. “Azəriqaz” İB bu fəaliyyəti ilə əslində  istehlakçının hüquqlarını kobud surətdə pozur.Və bu hərəkətinə görə “Azəriqaz” İB məhkəmə qarşısında cavab verməlidir. İqtisadçı ekspert Qadır İbrahimli isə əhalinin  üzləşdiyi qaz probemi ilə bağlı Gununsesi.info-ya açıqlamasında deyib ki, qaz təchizatı ilə bağlı problemlərin yaranması SOCAR-ın yarıtmaz fəaliyyəti ilə bağlıdır: “Əhaliyə satılan təbii qazın qiyməti 33 dəfə bahalaşdığı halda qaz təchizatında heç bir irəliləyiş yoxdur. Bu SOCAR-dakı total korrupsiya mühiti ilə bağlı bir məsələdir – qaz xəttlərinin təmirinə ayrılan pullar korrupsiya yeminə çevrilir, işlər vaxtında görülmür və natcədə qazın verilməsində fasilələr yaranır”. İqtisadçı ekspert  hesab edir ki, SOCAR bu məsələdə məsuliyyət daşıyır.

23 Fevral 2017 4:41

Qarabağda müharibə başlayacaq – Felgenhauer

Qarabağda yeni toqquşmalar başlaya bilər. Bunu Ermənistanın “1in.am” saytına müsahibəsində rusiyalı hərbi ekspert Pavel Felgenhauer söyləyib. “Qarabağda hərbi fəaliyyətlər mütəmadi qaydada olur. Şübhəsiz ki, konfliktin eskalasiyası mümkündür. Yeni müharibə ehtimalı var, amma onun nə vaxt baş verəcəyini deyə bilmərəm. Məncə, konfliktin eskalasiyası qaçılmazdır. Ona görə ki, tərəflər arasında ciddi danışıqlar aparılmır, tərəflərin mövqeyi üst-üstə düşmür. Yekun nəticədə Qarabağ cəbhəsi, hətta Ermənistan-Azərbaycan sərhədində də yeni toqquşmalar ola bilər. Tərəflər hərbi baxımdan buna hazırlaşırlar. Əvvəl-axır toqquşma olacaq. Ona görə ki, siyasi proses yoxdur. Hər iki tərəf yeni silahlar alır. Üstəlik, hər iki tərəf müəyyən mənada Dördgünlük müharibənin nəticəsindən razı deyil. Azərbaycan ictimaiyyətində daha çox mövqeləri ələ keçirmək tələbi var, erməni ictimaiyyəti isə heç olmasa, apreldə itirilmiş mövqeləri geri qaytarmaq istəyir”. O, Rusiyanın Qarabağda yeni konflikt arzulamadığını söyləyib: “Qarabağ konfliktində eskalasiya Moskvaya gərək deyil. Digər tərəfdən isə Kremlin diqqətə alacağı başqa qayğıları var. O, bu məsələyə ciddi toqquşmalar olana qədər diqqət ayırmır. Əgər yenidən toqquşmalar olsa, Moskva tərəflərə apreldəki kimi təzyiqlər edəcək və onları hərbi əməliyyatları dayandırmağa məcbur edəcək. Qarabağ konflikti Rusiya üçün müəyyən təhdid yaradır, amma bu, hələlik əsas təhdid demək deyil. Artıq tam başqa təhdidlər mövcuddur. Bu konflikt İrəvan və Bakı üçün prioritetdir, amma Moskva üçün yox. Rusiyaya hazırda orada müharibə lazım deyil. Prinsipcə, Rusiya həm İrəvan, həm də Bakı ilə yaxın əlaqələrə sahib olmaq, Zaqafqaziyada özünün sovet dövründəki dominantlığını bərpa etmək istəyər. Rusiya hazırda tərəflər arasında balansı saxlamağa çalışır ki, bu da öz növbəsində İrəvanda çoxlarının xoşuna gəlmir. Ona görə ki, Ermənistan Rusiyanın müttəfiqidir. Amma hər iki ölkə Rusiyaya lazımdır”.

22 Fevral 2017 3:53

Xaçmaz Mədəniyyət Mərkəzinin direktoru iş yerlərini satışa çıxarıb? -İttiham

Son illər regionlarda aztəminatlı ailələrə dəstək verilməsi, yeni iş yerlərinin açılması, bir sözlə, mövcud iqtisadi çətinliklər şəraitində yaşayan vətəndaşların sosial vəziyyətini yaxşılaşdırmaq məqsədilə bir çox tədbirlər həyata keçirilir. Belə olduğu halda, Xaçmaz rayon Mədəniyyət Mərkəzinin direktoru Zöhrab Məmmədovla bağlı redaksiyamıza daxil olan şikayət məktublarını təəccüb və təəssüflə qarşıladıq. Şikayətçilərin yazdığına görə, Zöhrab Məmmədov rəhbərlik etdiyi mərkəzdəki ştatlara işə qəbulu özü üçün qazanc mənbəyinə çevirib. Əgər xatırlayırsınızsa, “Təzadlar”ın ötən saylarında Xaçmaz rayonunun Qoçaqlı kənd sakini Koroğluyeva Gülnaz Hətəm qızının nümayəndəsi Vüsal Başaratvinin Azərbaycan Respublikasının Baş prokuroru cənab Zakir Qaralova ünvanladığı müraciətini dərc etmişdik. Müraciətdə Zöhrab Məmmədovun mərkəzdə aylıq 120 manat əmək haqqısı olan kompüter operatoru ştatına işə qəbul etdiyi Koroğluyeva Gülnazdan aldığı 1500 manat rüşvətin qarşılığında ona verdiyi maaş kartında cəmi 55 manat oturdulması ikinci tərəfin etirazına səbəb olduğu bildirilirdi. Z.Məmmədovdan bunun səbəbi soruşulanda, narahatlığa heç bir əsas olmadığını bildirib, növbəti aydan əmək haqqının 120 manat olacağını deyib. Lakin o gündən sonra nə karta maaş yüklənib, nə də Koroğluyeva Gülnaz direktora verdiyiı pulu geri ala bilib. Şikayətdə eyni zamanda bildirilirdi ki, Xaçmaz rayonunun Qoçaqlı kənd sakini Başaratov Nəcməddin Zöhrab Məmmədova sürücülük ştatına 1500 manat, Nurahmədov Samir isə nəzarətçi ştatına 2000 manat pul verib. Hətta aldadıldığını bilən Nurahmədov Samir 1500 manatını geri almaq üçün Zöhrab Məmmədovdan Xaçmaz rayon Prokurorluğuna şikayət edib. Bundan xəbər tutan Zöhrab Məmmədov iki nəfərin şahidliyi ilə qalan 1500 manatı qaytaracağı barədə əlyazma qəbz imzalayaraq Nurəhmədov Samirə verib və onu prokurorluğa yazılan şikayəti geri götürməsinə razı salmağı bacarıb. Şikayətçilərin fikrincə, bütün bunlar Xaçmaz Mədəniyyət Mərkəzinin direktoru Zöhrab Məmmədovun insanların etibarından sui-istifadə edərək külli miqdarda pul mənimsədiyini deməyə əsas verir. Biz də mətbuat olaraq Xaçmaz rayonunun Qoçaqlı kənd sakini Koroğluyeva Gülnaz Hətəm qızının nümayəndəsi Vüsal Başaratvinin Azərbaycan Respublikasının Baş prokuroru cənab Zakir Qaralova ünvanladığı müraciətlə bağlı mövqeyini öyrənmək üçün Xaçmaz Mədəniyyət Mərkəzinin direktoru Zöhrab Məmmədovla telefon əlaqəsi saxladıq. Z.Məmmədov şikayətin əsassız olduğunu və bu barədə rəsmi mövqe bildirəcəyini söylədi. Lakin aradan neçə həftə keçməsinə baxmayaraq, hələ də Mədəniyyət Mərkəzinin direktorundan bir xəbər yoxdur. Çox vaxt isə telefonu bağlı olur. *** Bu yazımızda isə şikayətçilərin özlərinin aidiyyəti qurumlara ünvanladıqları müraciətləri və redaksiyamıza təqdim etdikləri digər sənədlərlə bağlı araşdırmamızı təqdim edəcəyik. Beləliklə, Xaçmaz rayonunun Qoçaqlı kənd sakini Başaratov Nəcməddin Hətəm oğlunun “Təzadlar”a daxil olan Azərbaycan Respublikası Baş prokurorunun müavini - Azərbaycan Respublikasının Baş prokuroru yanında Korrupsiyaya qarşı Mübarizə Baş İdarəsinin rəisi Kamran Əliyevə, mədəniyyət və turizm naziri Əbülfəs Qarayevə invanlı müraciətini təqdim edirik. Müraciətdə deyilir: “Hörmətli cənab Kamran Əliyev! Hörmətli cənab Əbülfəs Qarayev! 2015-ci ilin iyun ayında atam mənə dayım Ağabəyov Əlövsət Ağabəy oğlunun məsləhəti ilə Xaçmaz Mədəniyyət Mərkəzində boş iş yerlərinin olduğunu və evdə işsiz oturmaqdansa orada işə düzəlməyimi söylədi. Düzü, əvvəlcə razılaşmasam da, sonradan bekar gəzməyin faydası olmadıgını düşünüb işləmək qərarına gəldim. Dayımın dediyinə görə, Mədəniyyət Mərkəzindəki boş iş yerləri nəzarətçi və sürücü ştatları idi. Öyrəndim ki, Xaçmaz rayon Mədəniyyət Mərkəzinin direktoru Zöhrab Məmmədov sürücü ştatı üçün 1500 manat, nəzarətçi vəzifəsi üçün isə 2000 manat rüşvət istəyir. Onu da deyim ki, sürücü maaşı 120 manat, nəzarətçi maaşı isə 150 manat idi. Dayıma zəng edib sürücü işləməyə razı olduğumu söylədim. Dayım bildirdi ki, qaynımın oğlu Samir Nurahmədov da nəzarətçi ştatına işə düzələcək, onunla görüşüb birlikdə Xaçmaza gedək. Dayım həm də səhəri gün Xaçmazda bizimlə görüşüb Zöhrab Məmmədovun yanına birlikdə gedəcəyimizi, lakin məsələni yalnız özümüz danışıb razılaşacağımızı bildirdi. Səhərisi Samirlə birlikdə Xaçmaz şəhərinə getdik. Şəhərə çatanda dayımla zəngləşib görüşdük. Sonra birlikdə Xaçmaz rayon Mədəniyyət Mərkəzinin direktoru Zöhrab Məmmədovla görüşməyə getdik. Zöhrab Məmmədov Mədəniyyət Mərkəzinin yaxınlığındakı çayxanalardan birində çay içə-içə söhbət etməyi məsləhət gördü. Çayxanada söhbət zamanı Zöhrab Məmmədovdan işimizin nədən ibarət olacağını və hansı sənədlərin lazım olduğunu soruşduq. Z.Məmmədov mənə işə gəlməyimə ehtiyac olmadığmı, sadəcə, işdə adımın gedəcəyini, bunun üçün isə şəxsiyyət vəsiqəsinin surətini və 2 ədəd 3x4 ölçüdə şəkil gətirməyimi söylədi. Yaxınlıqdakı kserokopiya yerində şəxsiyyət vəsiqəsinin surətini Samirlə birlikdə çıxarıb gətirdik. Sonra mən 2 ədəd 3x4 ölçüdə şəkli və 1500 manatı, Samir isə 2000 manatı sayıb Zöhrab Məmmədova verdik. Z.Məmmədov iyul ayının 25-dən sonra gəlib jurnala imza ataraq ilk ayın maaşını alacağımızı, maaş kartlarımızın isə 3 aydan sonra hazır olacağını bildirdi. Bir aydan sonra Samirlə zəngləşib ilk ayın maaşını almağa getdik. Direktorun dediyi kimi jurnala imza atdıqdan sonra ilk ayın maaşı adı ilə hərəmizə 100 manat verdilər. Maaşın az olmasının səbəbini Zöhrab Məmmədovdan soruşanda, o, dedi ki, “narahat olmayın, kartınızı alandan sonra hər ay sən 120, Samir isə 150 manat maaş alacaq. 2 aydan sonra da gəlib maaş kartlarınızı alarsınız. Əgər işləmək istəyən tanışlarınız varsa, onları da gətirin, hazırda “motorist”, elektrik, kompüter operatoru və başqa boş ştatlarım var”. Avqust ayında yenidən Samirlə birlikdə maaş almağa gedəndə direktor Z.Məmmədov müxtəlif bəhanələrlə pulumuzu vermək istəmədi, lakin çox söhbətdən sonra hərəmizə 30 manat verərək başımızı aldatdı. Sentyabr ayında ailəmdə yaranan problemlərlə əlaqədar həyat yoldaşımdan boşanmalı oldum. Dekabr ayında isə həyat yoldaşımın qaldırdığı alimentlə bağlı məhkəməm var idi. Bu səbəbdən də məhkəməyə əmək haqqı ilə bağlı arayış təqdim etməliydim. Dekabrın 18-də Zöhrab Məmmədovun yanına gedib vəziyyəti ona danışdım. Eyni zamanda, aradan 5 ay keçməsinə baxmayaraq, nə tam maaşımı, nə də maaş kartımı vermədiyini xatırlatdım. Həm də xahiş etdim ki, mənə işlədiyim barədə arayış versin. O, problem olmadığını bildirərək, mənə əmək haqqımla bağlı arayış verdi. Lakin sonradan gördüm ki, arayışda mənim Xaçmaz rayon Mədəniyyət Mərkəzində sürücü yox, nəzarətçi vəzifəsində çalışdığım yazılıb. Düzü, 3 ay məhkəmələrə get-gəl yarandığından həmin ərəfədə bu işin üstünə düşmədim. Məhkəmə ilə bağlı işim bitəndən sonra hər ay mütəmadi olaraq Zöhrab Məmmədovla ya zəngləşir, ya yanına gedib maaş kartımı verməsini, ya da ona verdiyim 1500 manatı geri qaytarmasını tələb edirdim. O isə çox vaxt “gəl, maaşını al” - deyə yanına çağırsa da, maaşı vermədən geri qaytarırdı. Axırda məcbur olub Xaçmaz Regional Mədəniyyət və Turizm İdarəsinin müdiri Nazim Ağayevin qəbuluna düşüb Zöhrab Məmmədovdan şikayət etdim. O da Fərid adlı köməkçisinə zəng edərək, mənim adımı və soyadımı qeyd edib Zöhrab Məmmədovu rayon prokurorluğuna verəcəyini söylədi. Lakin bu şikayətimin də bir faydası olmadı. Hörmətli cənablar, çox təəssüf ki, bu günə kimi Zöhrab Məmmədovdan pulumu geri ala bilmirəm. Sonradan öyrəndim ki, o, təkcə məni aldatmayıb, elə bizim kənddən 20-dən çox vətəndaşı işə düzəltmək adı ilə onların hər birindən 1200-3000 manat arası pul alaraq mənimsəyib”. Sonda şikayətçi N.Başaratov mətbuat vasitəsilə Azərbaycan Respublikasının Baş prokuroru yanında Korrupsiyaya qarşı Mübarizə Baş İdarəsinin rəisi Kamran Əliyevdən və mədəniyyət və turizm naziri Əbülfəs Qarayevdən xahiş edir ki, Xaçmaz rayon Mədəniyyət Mərkəzinin direktoru Zöhrab Məmmədov barəsində ciddi tədbir görülsün və onun mənimsədiyi pulların geri qaytarılmasına köməklik göstərsinlər. Qarşı tərəfi də dinləməyə hazırıq. (Davamı var) \\tezadlar.az\\

21 Fevral 2017 2:50

Fakt

Bizi izləyin