Eldar Mahmudova biət etmiş məmurlar – siyahıda kimlər var?

MTN çetesinin iş adamlarına divan tutmasının yeni detalları “Yeni Müsavat”da… Eldar Mahmudovun çetesi ifşa ediləndən sonra bir çox iş adamlarının adları ittiham aktlarına zərərçəkən qismində yazıldı. Bu şəxslərin əksəriyyəti vaxtilə ləğv olunmuş Milli Təhlükəsizlik Nazirliyinin yarıqaranlıq dəhlizlərindən keçmiş, var-yoxları əllərindən alınmışdı, özlərinin adı ən müxtəlif qondarma işlərə təqsirləndirilən şəxs kimi yazılmışdı. Eldar Mahmudovun özü və ətrafı varlandıqca, iş adamları sıradan çıxır, ölkədə biznes mühiti də xoş olmayan məcraya yönəlmişdi. Böyük xərcə salınan iş adamları ən müxtəlif yollara əl atmaqla vəziyyətdən çıxmağa çalışıblar. Belə şəxslərdən biri də “Qozbel İman” ləqəbli İman Quliyev olub. Onun barəsində əvvəllər yazmışdıq. “Xalqlar Dostluğu” ticarət mərkəzinin sahibi, tikinti maqnatı İman Quliyev vaxtilə “MTN çetesi”nin qarmağına düşüb. Onu MTN-ə aparıb qorxudub, şantaj edib pulunu alıblar, özünü isə sərbəst buraxıblar. Bu hal bir neçə dəfə təkrarlansa da, onun adı “MTN işi” üzrə aparılan araşdırmalar çərçivəsində zərərçəkən kimi keçmir. İman Quliyev Redaksiyamıza daxil olan məlumata görə, İ.Quliyev “MTN çetesi”nin həbs edilməyən, sərbəst hərəkət imkanları olan üzvlərinin ona qarşı qanunsuz addımlar atmasından çəkinir. Gələn məlumatlara görə, İman Quliyev rəsmən müflisləşib. İş adamı obyektlərini satışa çıxarıb. Söhbət Yasamal rayonunda yerləşən “Filiz” şadlıq sarayı və 8-ci kilometrdəki “Şərq Saray”dan gedir. Məlumata əsasən, ümumi sahəsi 18 sot olan “Filiz” şadlıq sarayı “Quzu” restoranı ilə birlikdə satılır. Şadlıq evinin qiyməti 4 milyon 800 min manatdır. İndi icarədə olan “Filiz” sahibinə ayda 25 min manat gəlir gətirir. “Şərq Saray”ı da hazırda fəaliyyət göstərir. Ümumi sahəsi 65 sot olan şadlıq evinin qiyməti öncəki şadlıq sarayından 3 dəfə bahadır - 12 milyon manat. İ.Quliyev çoxsaylı obyektlərin - “Romans” şadlıq evi, “Şərq Saray” şadlıq evi, “Xalqlar Dostluğu” ticarət mərkəzinin, “Qreen Haus” istirahət mərkəzləri şəbəkəsinin sahibidir. Eyni zamanda tikinti sektorunda da ciddi payı olub. Hakimiyyətdəki iki nüfuzlu generalla qohumluq əlaqələri olan İ.Quliyevin son vaxtlar öz biznesini xaricə köçürdüyü haqda məlumatlar var. Ölkədə Mahmudov çetesinin quldurluğu ilə üzləşən bir çox sahibkarlar bizneslərini daha təhlükəsiz dövlətlərə ərazi köçürüblər. Bundan ziyan çəkən Azərbaycan dövlətnin büdcəsi, iş yerlərini itirən sadə vətəndaşlar olub. Varlanan, harınlaşanlar isə Eldar Mahmudov və ətrafında qərarlaşıblar. Maraqlıdır ki, MTN generallarına çəpik çalan, onların qanunsuz əməllərini mədh edən, can-başla yerinə yetirən vəzifə sahibləri də çox olub. Bakı Ağır Cinayətlər Məhkəməsinin hakimi Ənvər Seyidovun Eldar Mahmudova mədhnamə yazması, onun qanunsuz əməllərini təqdirəlayiq hərəkətlər kimi təqdim etməsi yaddaşlardan silinməyib. Ə.Seyidovun məktubu üzə çıxmasaydı, bu gün onun MTN çetesi ilə əlaqələri bilinməyəcəkdi. Onun özü də kölgədə qalacaqdı. Bu gün “mahmudovçu”larla əlaqələri bilinən vəzifə sahiblərindəndir. Amma bilinməyənləri də az deyil. Uzun illər boyunca qarşılıqlı mənfəətə əsaslanan münasibətlər sistemi də formalaşıb. İcra hakimiyyəti başçılarının bəziləri də “mahmudovçu”ların maraqlarını təmin edənlər sırasında olub. Xəzər rayon icra hakimiyyətinin başçısı Gülağa İslamovun adı da bu sırada ilk yerlərdən birində gəlir. Bu haqda bir müddət əvvəl vəkil Ramiz Zeynalov yazmışdı. Bildirmişdi ki, 2010-cu ildə Türkan qəsəbəsində 8 hektar torpaq sahəsini Xəzər RİH Türkan qəsəbəsi üzrə nümayəndəsi Rahib Babayev və İlham İslamov tərəfindən hasara alınıb. Sonradan isə həmin torpaq sahəsi Gülağa İslamov tərəfindən Eldar Mahmudova hədiyyə edilib. 2013-cü ildə də sabiq nazirə belə bir hədiyyə verilib. Bu dəfə aeroport şossesində yerləşən “Azpetrol” yanacaqdoldurma məntəqəsinin arxasındakı 10 hektar torpaq sahəsi G.İslamovun qanunsuz sərəncamı ilə E.Mahmudovun əmisi oğlu Yaşar Mahmudova peşkəş edilib. Ərazi hasarlanıb və restoran kompleksi inşa olunub. Vəkil yazıb ki, Gülağa İslamov rayonun Mərdəkan qəsəbəsində yerləşən unikal Dendrari parkının və ona bitişik Kurortlar Şurasının balansında olan 5 hektar sahəni qanunazidd olaraq 2008-ci il tarixli sərəncamı ilə sabiq nazir Eldar Mahmudova fərdi yaşayış evi inşa etmək üçün ayırıb. 2014-cü ilin yanvar ayında isə G.İslamov Eldar Mahmudovun ən yaxın adamı Lalə Əhmədovanı özünə müavin təyin edib. Lalə Əhmədova 2015-ci il parlament seçkilərində 17 saylı Yasamal seçki dairəsindən hakim Yeni Azərbaycan Partiyasının namizədi kimi seçkilərə qatılıb. Lakin Eldar Mahmudov 17 oktyabrda prezident İlham Əliyev tərəfindən vəzifəsindən çıxarıldıqdan 10 gün sonra Lalə Əhmədova könüllü olaraq namizədliyini geri götürdü. Həmin vaxt icra başçısının xanım müavinin seçkilərdə namizədliyinin məhz MTN rəhbərliyi tərəfindən irəli sürülməsi ilə bağlı mətbuatda xəbərlər vardı. Xəzər rayon İcra Hakimiyyəti başçısının müavini Vaqif Həsənovun MTN-in Antiterror Mərkəzinin müavini olmuş, həbsdə müəmmalı şəkildə dünyasını dəyişmiş İlqar Əliyevə 2 mərtəbəli mağaza bağışlaması haqda məlumat da var. Həmin mağaza Mərdəkan qəsəbəsinin girəcəyinin solunda, hazırda “Embawood” şirkətinin icarəsində olan 2 mərtəbəli binadır. Bina Əmlak Məsələləri üzrə Dövlət Komitəsinin sədr müavini Rafiq Cəlilov vasitəsilə rəsmiləşdirilərək bağışlanıb. Beləliklə, iki müavin birləşib MTN-çi İ.Əliyevə bina bağışlayıb. Redaksiyamıza daxil olan məlumata görə, hazırda Mahmudovun çetesinə tabe olmuş və icra hakimiyyəti strukturlarında post tutan məmurlarla bağlı müvafiq araşdırmalar aparılır. Bu strukturlar arasında Eldar Mahmudova boyun əymiş, onunla əməkdaşlıq etmiş, tapşırıqlarını icra etmiş və MTN xətti ilə icra başçısı vəzifəsinə təyin olunmuş məmurlar təftiş edilir. Onların siyahısı hazırlanır və Prezident Administrasiyasına təqdim olunacaq. Paralel olaraq hazırda vəzifədə olmayan, keçmiş icra başçıları ilə bağlı araşdırmalar aparılır. Onlar barəsində mətbuatda kifayət qədər yazılıb. Adı MTN işində keçmiş icra başçıları ilə bağlı hansı qərar veriləcəyi bilinmir. Faktinfo.az

6 Mart 2017 11:54

Bu gün Rəsulzadənin anım günüdür

Bu gün Azərbaycanın dövlət və ictimai xadimi, siyasətçi və publisist, Azərbaycan Xalq Cümhuriyyətinin (1918-1920) banilərindən və siyasi mühacirətinin liderlərindən olmuş Məhəmməd Əmin Rəsulzadənin 62-ci ildönümüdür. Faktinfo.az xəbər verir ki, Məhəmməd Əmin Rəsulzadə 1884-cü il yanvarın 31-də Bakının Novxanı kəndində anadan olub. M.Ə.Rəsulzadə məşhur pedaqoq Sultan Məcid Qənizadənin müdir olduğu ikinci "Rus-müsəlman" məktəbində təhsil alıb. O, buranı bitirdikdən sonra təhsilini Bakı texniki məktəbində, rus dilində davam etdirib. Azərbaycan milli istiqlal hərəkatının və təkcə türk ellərində deyil, bütün Şərq, İslam aləmində ilk respublika üsul-idarəsi olan Azərbaycan Demokratik Respublikasının təməl daşını qoyan Məhəmməd Əmin Rəsulzadənin inqilabi fəaliyyətinin ilk illəri də məhz bu dövrə təsadüf edir. O, hələ 17 yaşında ikən - 1902-ci ildə "Müsəlman gənclik təşkilatı"nı yaradıb. Bu, XX əsrdə Azərbaycanda rus müstəmləkə üsul-idarəsinə qarşı gizli mübarizə aparan ilk siyasi qurum idi. 1917-ci ilin payızında M.Ə.Rəsulzadə Rusiya parlamentinə Azərbaycan və Türküstandan millət vəkili seçilib. 1918-ci il mayın 26-da Zaqafqaziya seymi daxili fraksiyaların çəkişmələri nəticəsində ləğv olunub. Həmin ayın 27-də seymin müsəlman fraksiyasına daxil olan müxtəlif partiyaların üzvlərindən ibarət olan Azərbaycan Milli Şürası yaranıb. Səs çoxluğu ilə M.Ə.Rəsulzadə Milli Şüranın sədri seçilib. 1918-ci il mayın 28-də bütün ölkələrin radio stansiyaları və qəzetləri Azərbaycan istiqlaliyyətinin elan olunmasını dünyaya yaydılar. Bu o demək idi ki, Azərbaycan xalqı öz varlığını, bir xalq kimi mövcudluğunu bütün bəşəriyyətə çatdırır və milli dövlətinin qurduğunu tam şəkildə bəyan edirdi. Fətəli Xan Xoyskinin başçılığı ilə Azərbaycan Demokratik Respublikası hökuməti təşkil olunub. Beləliklə, Azərbaycan xalqı nəinki türk xalqları arasında, həmçinin bütün Şərqdə ilk dəfə olaraq respublika qurub. Lakin Azərbaycan Xalq Cümhuriyyətinin ömrü cəmi 23 ay çəkib. 1920-ci ilin 28 aprelində, Azərbaycanın sovet Rusiyası tərəfindən işğalından sonra M.Ə.Rəsulzadə vətəni tərk etmək məcburiyyəti ilə üzləşib. Uzun illər xaricdə Azərbaycanın azadlığı uğrunda mübarizə aparmış M.Ə.Rəsulzadə 1955-ci il martın 6-da Ankarada şəkər xəstəliyindən vəfat edib. 1992-ci ilin 24 dekabrında Azərbaycan Prezidenti Əbülfəz Elçibəy Məhəmməd Əmin Rəsulzadənin anadan olması münasibətilə "Görkəmli ictimai-siyasi xadim M.Ə.Rəsulzadənin totalitar sovet rejimi dövründə repressiyaya məruz qalmış ailə üzvlərinin Azərbaycana qaytarılması və onların sosial-məişət məsələlərinin həlli haqqında" sərəncamı imzalayıb. 1993-cü ilin 29 dekabrında Azərbaycan Prezidenti Heydər Əliyev "Azərbaycanın görkəmli ictimai-siyasi xadimi M.Ə.Rəsulzadənin anadan olmasının 110 illik yubileyinin keçirilməsi haqqında" fərman imzalayıb. Həmçinin Azərbaycan Respublikasının Prezidenti İlham Əliyev 2013-cü ilin 22 noyabrında "Məhəmməd Əmin Rəsulzadənin 130 illik yubileyinin keçirilməsi haqqında" sərəncam imzalayıb.

6 Mart 2017 1:09

Görkəmli şair Mikayıl Müşfiq “mərdimazar” oldu…

Bir neçə gün əvvəl görkəmli şair Mikayıl Müşfiqin heykəlinin heç bir açıqlama verilmədən götürülməsi və ərazidə söküntü işlərinin aparılması ölkədə şok effekti yaratdı.  Hətta ölkə rəhbərliyindən tutmuş, ən sıravi vətəndaşlara  qədər hər kəs bu məsələdən hiddətləndiklərini və günahkarların cəzalandırılmalı olduqlarını bildirdilər. Doğrudan da, az sonra 3 nəfər cəzalandırıldı. Onlar da kim olsa, yaxşıdır: bir iş icraçısı və iki fəhlə. Vallah, adam deməyə söz tapmır. Yəqin ki, Mikayıl Müşfiqin özü sağ olsaydı, o da razı olmazdı ki, ona görə gündəlik çörək puluna işləyən hansısa binəvalar cəzalandırılsın. Maraqlıdır ki, söküntü-tikinti işləri aparan “Azəravtoyol” ASC-nin  rəhbərliyi, ərazinin yerləşdiyi Yasamal rayon İcra Hakimiyyətinin rəsmiləri kənarda qaldı. Halbuki ilk günlər “Azəravtoyol” ASC-nin sədri Saleh Məmmədov və Yasamal rayon İcra Hakimiyyətinin başçısı İbrahim Mehdiyevin adı əsas günahkarlar kimi KİV-də daha çox tənqid olunurdu. Əsində nə baş verib və nə etmək lazım idi? Hər şeydən əvvəl “Azəravtoyol”un rəhbərliyi bilməli idi ki, görkəmli ədibin heykəlinin götürülməsi əksər  vətəndaşların, o cümlədən ,jurnalistlərin,bloqqerlərin,şairsevərlərin diqqətini çəkər,bir sözlə ictimailəşə bilər.Bu səbəbdən də ilk növbədə ərazidə iş aparan “Azəravtoyol”un rəhbərliyi rəsmi şəkildə aidiyyatı qurumları və aparıcı KİV-lər vasitəsilə geniş ictimaiyyəti görüləcək işlər barədə ətraflı məlumatlandırmalı idi. Necə ki,paytaxtın hansısa küçəsində yolun təmiri ilə bağlı əvvəlcədən əhali xəbərdar edilir.Bu olmadı, “Azəravtoyol”un rəhbərliyi susmağa üstünlük verdi ki, bəlkə məsələnin üstündən keçilə. Amma,mətbuat durmadan yaranmış vəziyyəti tənqid etdi,ölkə ictimaiyyətini məlumatlandırdı.Bu zaman  isə bildirilməliydi ki, ərazidə yol genişləndiriləcək, abadlıq işləri aparılacaq və gözəl bir park salınacaq. Həmin  işlər görülərkən orada işləyən texnika Müşfiqin büstünə istəmədən zədə yetirə bilər.Bu məsələ nəzərə alınaraq görkəmli şairin büstü müvəqqəti oradan götürülüb və işlər başa çatdıqdan sonra əvvəlkindən də  gözəl bir şəkildə   yerinə qoyulacaq. Fikrimizcə, belə bir açıqlama olsaydı, heç bu qədər ajioataj da əmələ gəlməzdi. Butun bunlar ölçülü şəkildə, mühəndisi nöqteyi nəzərdən “Azəravtoyol”un rəhbərliyi tərəfindən hadisənin ilk günündən əsaslandırılmalı idi ki, bu da olmadı.Belə olan təqdirdə “Azəravtoyol” rəsmilərinin KİV-i məsələni şişirtməkdə günahlandırmaları nə dərəcədə ədalətlidir?! Faktinfo.az-a daxil olan məlumata görə, məsələdən Mədəniyyət və Turizm Nazirliyinin əvvəlcədən xəbəri olub, ancaq səhlənkarlıq göstərilərək hökumətə və ictimaiyyətə məlumat verilməyib. Dövlət başçısınn bu məsələ ilə bağlı sərt təpkisindən sonra isə Mədəniyyət və Turizm naziri Əbülfəs Qarayev hərəkətə keçdi, əl-ayağa düşərək büstün götürülməsindən xəbərsiz olduqlarını və günahkarların cəzalandırılmasına çalışacaqlarını bildirdi. Yeri gəlmişkən, cənab nazirə demək istərdik ki, əgər M.Müşfiqə hörmət və ehtiramları varsa, zəhmət çəkib şairin Qaradağ rayonu, Müşfiqabad qəsəbəsindəki heykəli ilə də maraqlansınlar. Çünki, həmin heykəl hazırda çirkab içərisindədir və çox utancverici bir vəziyyətə düşüb. Sonda bir daha təkrar olaraq qeyd etmək istərdik ki, Yasamalda Müşfiqin büstünün götürülməsinə görə 3 sıravi şəxsin cəzalandırılması heç ölməz şairin ruhuna da rahatlıq gətirmir və ölkə ictimaiyyəti tərəfindən də normal qarşılanmır.Çünki,ölməz şairin özü də  heç vaxt məqsədəuyğun bilməzdi ki,kimlərsə yol və park salınmasından milyonlar qazansın,bir-iki yetim-yesir də bu işin güdazına getsin.Qısası Mikayıl Müşfiq razı olmazdı ki, kimlərinsə məsuliyyətsizliyinə görə  cəzalandırılan binəvaların gözündə "mərdimazar"olsun. Rizvan Əhmədli   Faktinfo.az

3 Mart 2017 5:48

“Dedi, Abutalıbovla razılaşdırmışam, sərəncamı var…” – Heykəllə bağlı yeni açıqlama

Mədəniyyət və Turizm Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəisi Zakir Sultanov şair Mikayıl Müşfiqin Bakının İnşaatçılar prospektində, “Statistika dairəsi” adlanan ərazidə yerləşən heykəlinin “Azəravtoyol” ASC tərəfindən necə söküldüyünü danışıb. Zakir Sultanov APA-ya müsahibəsində deyib ki, Müşfiqin heykəlinin sökülməsindən bir həftə əvvəl “Azəravtoyol” Səhmdar Cəmiyyətindən ona zəng vurublar. Bildiriblər ki, Müşfiqin heykəlini sökmək istəyirlər, nazirlik bu barədə nə fikirləşir. Sitat: “Dedilər, bir çox dövlət orqanları ilə razılaşdırmışıq, sizinlə də razılaşdırmalıyıq. Mən dedim, əvvəla, siz birinci bizimlə razılaşdırandan sonra başqa dövlət orqanları ilə danışa bilərdiniz. Dedim, nə mənim rəhbərim cənab Əbülfəs Qarayev, nə də mən buna razı ola bilmərik. Yəni qəti etiraz edirik, heykələ toxunmayın. Əgər çox vacibdirsə, layihəni göndərin, baxaq, ölkə rəhbərliyinə göstərək, memarlarla müzakirələr aparaq, sonra çözüm yolu tapaq. Dedilər, yaxşı. Söhbət bitdi. Fevralın 27-də səhər bizim müfəttişliyin rəisi Etibar Axundov zəng vurdu ki, Müşfiqin abidəsini dağıdıblar”. Zakir Sultanov bildirib ki, nazirliyin müfəttişləri dərhal heykəlin sökülməsini yerində aktlaşdırıb, şəkillərini ona göndəriblər. “ “Əvvəlcə nazir Əbülfəs Qarayevə məlumat verdim. Daha sonra “Azəravtoyol”un rəhbəri ilə danışdım. Mənə dedi Bakı Şəhər İcra Hakimiyyətinin başçısı Hacıbala Abutalıbovla məsələni razılaşdırıb, sərəncamı var. Mən Yasamal rayon icra hakimiyyətinin başçısı İbrahim Mehdiyevlə danışmışdım, gördüm, məsələdən xəbəri yoxdur. Hacıbala müəllimlə telefonla danışdım, məlum oldu, heykəlin götürülməsindən onun da xəbəri yoxdur. Hacıbala müəllimə müraciət olunub, amma o razılıq verməyib”-Zakir Nuriyev deyib. Dövlət Xidmətinin rəisi bildirib ki, həmin vaxt artıq məsələ mətbuata çıxmışdı və müzakirələr aparılırdı. Onun sözlərinə görə, məsələyə ən doğru qiyməti cənab prezidentimiz verdi. “Xalqımız gördü ki, ölkə başçısı düzgünlüyün, ədalətin yanındadır. Müşfiqin heykəli bir ay müddətində bərpa olunacaq”-Zakir Nuriyev bildirib. Xatırladaq ki, Müşfiqin heykəlinin sökülməsini ilk dəfə virtualaz.org və haqqin.az saytları ictimailəşdirib, habelə nüfuzlu ictimai xadimlər, mədəniyyət xadimləri saytlara açıqlamalar verərək bu hadisəni kəskin pisləyiblər.

3 Mart 2017 4:21

İlham Əliyev: “İslamı terrorla əlaqələndirmək yanlış və qərəzli yanaşmadır”

Bunu prezident İlham Əliyev İslamabadda İqtisadi Əməkdaşlıq Təşkilatının XIII Sammitində çıxışı zamanı qeyd edib   Dövlət başçısı bildirib ki, Azərbaycan müsəlman ölkələri və dövlətləri arasında həmrəyliyə xüsusi əhəmiyyət verir:  “Azərbaycan 2017-ci ili “İslam Həmrəyliyi İli” elan etmişdir. İki aydan sonra Bakı IV İslam Həmrəyliyi Oyunlarına ev sahibliyi edəcəkdir. Bu gün islamofobiya dünyada ən ciddi təhlükələrdən biridir. Biz bu tendensiyanı qəti şəkildə pisləyirik. İslamı terrorla əlaqələndirmək yanlış və qərəzli yanaşmadır. Terrordan ən çox əziyyət çəkən məhz müsəlman dövlətləridir. Biz sülh, mərhəmət, dözümlülük və ədalət dini olan İslamın dəyərlərinin təşviqini davam etdirməliyik. Biz üzv dövlətlər arasında iqtisadi əməkdaşlığın gücləndirilməsinə xüsusi əhəmiyyət veririk. Qarşılıqlı ticarət və sərmayələrin artırılması, ixrac imkanlarının genişləndirilməsi və biznes dairələri arasında sıx əməkdaşlığın təşviqi bu məqsədə xidmət edəcəkdir. Beynəlxalq maliyyə institutlarının cəlb olunması da böyük önəm daşıyır. Bu baxımdan İqtisadi Əməkdaşlıq Təşkilatı Ticarət və İnkişaf Bankının regional əhəmiyyətli layihələrin maliyyələşdirilməsində daha fəal rol oynaması üçün onun bütün ölkələrimiz tərəfindən dəstəklənməsinə ehtiyac var”. Faktinfo.az

2 Mart 2017 10:49

“FVS-İnşaat” MMC əvvəl tikir,sonra rəsmiləşdirir- Fakt

Son illər ölkəmizdəki tikinti şirkətlərinin yol verdiyi  özbaşınalıqlar, qanunsuzluqlar , əhalinin başına açdığı oyunlar barədə çox yazılıb, çox deyilib. Bu cür şirkətlər hər kəsin gözü qarşısında istədikləri yeri hasara  alır, qısa zaman kəsiyində  orada nə varsa söküb dağıdır, yerində  tikinti normalarına uyğun gəlməyən  hündür  mərtəbli  binalar tikərək milyonlar qazanırlar. Belə göydələnlərin  əksəriyyəti  şəhər evlərinin  kiçik həyətində, uşaqlar üçün nəzərdə tutulan  oyun  meydançalarında , məktəblərin, bağçaların  bir neçə  metrliyində  inşa edilir. Nəticədə meyvə, dekorativ  və  həmişə  yaşıl ağaclar məhv edilir, sakinlər günəş işığından , oksigendən məhrum  olunur və s. Fəaliyyəti ciddi narazılıq doğuran tikinti şirkətlərindən  biri də “FVS-İnşaat” MMC-dir. Yeri gəlmişkən,bir neçə gün əvvəl  Prezident Administrasiyasının şöbə müdiri Süleyman İsmayılovun geniş təhlili materialında qeyd olunurdu ki,haqqında ən çox şikayət daxil olan tikinti şirkətlərinin sırasında “FVS-İnşaat”MMC-nin də adı var. Faktinfo.az-a daxil olan şikayət ərizəsində bildirilir ki ,adı çəkilən şirkətin  Nizami  rayonu  Kamil Balakişiyev küçəsində  iki 16 mərtəbəli yaşayış binası  ucaltması  ərazidə yaşayan sakinlərin  ciddi narazılığına səbəb olub. Çünki  inşa edilən  binalara görə, ərazidəki bütün yaşıllıqlar məhv edilib, 214  və  62 saylı  məktəblərin ərazisinə müdaxilə olunub, yaxınlıqdakı  uşaq bağçasının  yolu kəsilib , bir sözlə sakinlər çoxsaylı problemlərlə üz-üzə qalıb,tikinti normaları pozmaqla həyata keçirilir. Yaranmış vəziyyətlə bağlı  sakinlər  əvvəlcə  Nizami Rayon İcra Hakimiyyətinə müraciət ediblər. Rayon İcra Hakimiyyəti  təsərrüfat  şöbəsinin  müdirinin cavab məktubunda  bildirilib ki, 15.04.2014-cü il tarixdə “FVS-İnşaat” MMC tərəfindən tikilən iki  hündür 16 mərtəbəli  binanın   layihələndirilməsinə, 02.06.2015-ci il tarixdə  bu yaşayış binalarının  tikintisinə  Bak şəhər İcra Hakimiyyəti, 17.09.2015-ci il tarixdə  Memarlıq və Şəhərsalma  Baş İdarəsi, Nizami rayon Sanitar Epidemioloji Stansiyası, Ekologiya və Təbii Sərvətlər  Nazirliyi, Fövqəladə Hallar Nazirliyi  icazə  vermişdir. Halbuki, bir-birinin içində tikilən bu qoşa binanın tikintisinə 2014-cü il noyabrın 27-dən başlanmışdır. Göründüyü kimi “FVS-İnşaat” MMC  əvvəl  icazə  alıb, sonra tikintiyə  başlamaq əvəzinə, əvvəl tikinti  işərinə başlayıb, sonradan icazə almaq haqda fikirləşib. Bu nə deməkdir? Bu qədər özbaşınalıq, bu qədər qanunları  heçə saymaq olarmı?  Özü də  yeni tikililər  şəhər  sakinlərinin istifadəsində olan binaların kiçik həyətində inşa edilməklə  insanları günəş şüalarından ,oksigendən,rahat gediş-gəlişdən məhrum edilməklə  tikilib ki,bu da inşaat normalarına ziddir. Tikintinin sürətlə davam etdiyini görən sakinlər 2016-c ilin avqust ayında Azərbaycan  Respublikası Prezident Administrasiyasına və Nazirlər Kabinetinə müraciət ünvanlayıblar.  Həmin müraciətlər isə tədbir görülməsi üçün Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyinə göndərilib. Agentliyin rəis müavini Təyyar Hüseynlinin sakinlər adından müraciəti göndərmiş Nizami rayonu, Kamil Balakişiyev küçəsi, ev 46 a, mənzil 46 ünvanında yaşayan Rəfiqə Cəfərliyə yazdığı cavabda bildirib ki, “FVS-İnşaat”MMC tərəfindən  tikinti-quraşdırma  işləri  aparılan  zaman pozuntuya yol verildiyi  üçün hazırda işlər Agentlik tərəfindən dayandırılıb və nəzarətdə saxlanılır. Göründüyü kimi, Fövqəladə  Hallar Nazirliyi bir müddət əvvəl icazə verdiyi tikintinin qanunsuz olduğunu anlayıb və onun inşasını dayandırmaq məcburiyyətində qalıb,çıxılmaz duruma düşüb. Doğrudan da, həmin vaxtdan sonra tikinti işlərinə bir müddət ara verilib. Ancaq son həftələr sanki heç nə olmayıbmış kimi işlər yenidən qızışıb. Hətta 17-ci mərtəbə və 62 saylı məktəbə  doğru artırma  da tikilməyə başlayıb. Bu vəziyyət isə sakinləri növbəti dəfə hiddətləndirib. Onlar “FVS-İnşaat” MMC-nin özbaşınalıqlarına son qoyulmasın və tikintinin dayandırılmasını tələb edir,bu məqsədlə əvvəllər şikayət etdikləri dövlət qurumları ilə yanaşı, mətbuatdan da kömək istəyirlər. Məsələyə münasibət bildirən  “FVS-İnşaat” MMC-nin rəsmiləri isə bildirir ki,onlar bütün tikinti işlərini qanun çərçivəsində həyata keçirirlər və şikayətçilərin iddiası əsassızdır. Tikintinin qanuni və ya qanunsuz aparıldığını aydınlaşdırmaq üçün aidiyyəti qurumlara sorğu verilə bilər. Onu da qeyd edək ki,sözü gedən  tikinti şirkətinin əsas sahibi kimi Milli Məclisin deputatı Mahir Aslanovun adı çəkilir. Mövzunu diqqətdə saxlayacağıq. Faktinfo.az

1 Mart 2017 7:24

Leyla Əliyeva: “Sərt mövqe tutmağa hazırıq”

Moskvada "Xocalıya ədalət" beynəlxalq kampaniyası çərçivəsində Xocalı soyqırımının 25 illiyinə həsr olunan anım mərasimi keçirilib. APA-nın verdiyi məlumata görə, Ukrayna otelinin Konqres-parkında keçirilən tədbir Heydər Əliyev Fondu, Azərbaycanın Rusiyadakı səfirliyi, Ümumrusiya Azərbaycan Konqresi (ÜAK) və Rusiya Azərbaycanlı Gənclər Birliyi (AMOR) tərəfindən təşkil olunub. "Ölməz yaddaş" adı altında keçirilən anım tədbirində erməni əsirliyində olan Dürdanə Ağayevanın müəllifi olduğu "Erməni əsirliyində 8 gün" adlı kitabının təqdimat mərasimi keçirilib. Eyni zamanda tədbir çərçivəsində 25 Xocalı sakininin taleyindən bəhs edən sərgi nümayiş olunub. Tədbir çərçivəsində S.Q. Stroqonov adına Moskva Dövlət İncəsənət-Sənaye Akademiyasının tələbələri onlayn rejimdə Xocalı, müharibə, sülh və ədalət mövzusundan bəhs edən rəsmlər çəkiblər. Anım mərasiminin rəsmi hissəsi Xocalı soyqırımının qurbanlarının xatirəsinin bir dəqiqəlik sükutla yad edilməsi ilə başlayıb. Tədbirdə Heydər Əliyev Fondunun vitse-prezidenti Leyla Əliyeva çıxış edib. O, Ermənistanın Azərbaycana qarşı hərbi təcavüzü zamanı törədilmiş Xocalı soyqırımının təfərrüatları, baş verdiyi şərait və fəsadları barədə iştirakçıları məlumatlandırıb. Heydər Əliyev Fondunun vitse-prezidenti faciə qurbanlarının xatirəsini bir daha yad edərək, bu hadisələrdən 25 il keçməsinə baxmayaraq, onun yaddaşlarda daha da möhkəmləndiyini bildirib: “Deyirlər zaman yaraları sağaldır. Lakin bizim yaramızı zaman sağaltmaq gücündə deyil. Xocalı qurbanları hər zaman bizim yaddaşımızda qalacaq. Xocalı faciəsi törədilən vaxt körpə olan xocalılar artıq özləri valideyndirlər. Lakin onlar indiyənə kimi öz doğma yurdlarına gedə bilmirlər. Bu ağrılıdır və ədalətsizlikdir. Çox vacibdir ki, dünya ictimaiyyəti bu hadisəyə qiymət versin, təqsirkarlar öz cəzalarına çatsınlar. Artıq 30 ilə yaxındır ki, bu münaqişə davam edir. Nəticədə 20 faiz torpaqlarımız işğal altındadır, 1 milyondan çox qaçqın və məcburi köçkünümüz var. Azərbaycan sülh ölkəsidir. Bizim ölkədə əsrlər böyü müxtəlif xalqların, dinlərin nümayəndələri mehriban qonşuluq şəraitində yaşayıblar və yaşayırlar. Bizim qonşu ölkələrimizlə də mehriban münasibətlərimiz var. Lakin bu gün biz sərt mövqe tutmağa da hazırıq. Ona görə ki, öz ərazi bütövlüyümüz bərpasını tələb edirik, torpaqlarımız uğrunda mübarizə aparırıq". Leyla Əliyeva 2008-ci ildə "Xocalıya ədalət" beynəlxalq kampaniyasına start verdiklərini söyləyib: "Bu kampaniyanın məqsədi qorxunc faciə haqqında həqiqi məlumatların dünya ictimaiyyətinə çatdırılmasıdır. Bu günlərdə demək olar ki, dünyanın bütün ölkələrində Xocalı faciəsinə həsr olunan tədbirlər keçirilir. Biz konfranslar, seminarlar, sərgilər, təşkil edirik, filmlər çəkirik, kitablar nəşr edirik. Bu günlərdə, Afina, Brüssel, Vilnüs, London və Parisdə xatirə konsertləri keçirilib. Berlində sərgi, Bosniya və Hersoqaviniyada isə Xocalıya həsr olunan beynəlxalq konfrans keçirilib. Bir qədə əvvəl ABŞ-da "Sonsuz dəhliz" filminin təqdimat mərasimi keçirilib. Bu filmdə Xocalıda baş verən bütün dəhşətlər haqqında danışılır. Bu film münaqişə tərəflərinə aidiyyatı olmayan, böyük insani dəyərlərə malik, ədalətə inanan insanlar tərəfindən çəkilib. Bu gün hər zaman olduğu kimi bu gecəni Rusiya paytaxtında, Moskvada keçiririk. Azərbaycan və Rusiyanı dostluq və mehriban qonşuluq bir-birinə bağlayır. Biz əldə etdiklərimizlə kifayətlənməyəcəyik. Əlimizdən gələni edəcəyik ki, bütün dünya bu faciə haqqında bilsin. Ona görə ki, belə faciə dünyanın heç bir yerində bir daha təkrarlanmamalıdır. Bizim kampaniyamızı onlarla dövlətlər dəstəkləyir. Bir çox ölkələrin parlamentləri Xocalıda azərbaycanlılara qarşı soyqırımı faktı törədildiyini tanıyırlar". Tədbirin rəsmi hissəsi bitəndən sonra Rusiyanın xalq artisti Aleksandr Rudinin rəhbərliyi altında "Musica Viva" Moskva kamera Orkestrinin konsert proqramı baş tutub. Qeyd edək ki, anım mərasimində Rusiya ictimaiyyətinin, Moskvada akkreditə olunmuş diplomatik korpusun nümayəndələri və siyasətçilər iştirak ediblər.  

28 Fevral 2017 11:11

“O KİV-lər məsuliyyətə cəlb olunacaq” –Əflatun Amaşovdan xəbəradrlıq

“Erməni dəyirmanına su tökmək, düşmən təxribatına uymaq, ona məqsədinə çatmaqda yardımçı olmaq. Bəzi kütləvi informasiya vasitələrinin, eləcə də müəyyən sosial şəbəkə istifadəçilərinin davranışlarına başqa cür qiymət vermək olmur. Ermənilərin video-görüntülərindəki Azərbaycan əsgərinin cansız cəsədi bizim üçün informasiya yükü daşımamalıdır! Media cəmiyyəti çaşdırmamalı, xof, ruh düşkünlüyü yaratmamalıdır. Hələ sentimentallıq çağırışları da ediblər. “Əl-ələ tutaraq şəhid oldular” kimi sərlövhələr seçiblər. Özü də bunu edənlər içərisində ictimai rəyə müəyyən təsiri olan xəbər saytları da var". Bunu Milli Məclisin deputatı, Mətbuat Şurasının sədri Əflatun Amaşov Şuranın Ermənistan tərəfindən dövriyyəyə buraxılmış və Azərbaycan əsgərlərinin meyitlərinin yer aldığı video-görüntünün ölkəmizin bəzi informasiya saytlarında verilməsinə etiraz əlaməti olaraq yaydığı müraciətini şərh edərkən deyib. Ə.Amaşov bildirib ki, fevralın 24-dən 25-nə keçən gecə ermənilərin növbəti dəfə cəbhə xəttində təxribat törətmələri KİV-in fəaliyyətinə təsirsiz ötüşməyib: “Müşahidələrimiz onu deməyə əsas verir ki, sanki gərginlik dövrü üçün yaradılmış, bir növ mövsümi xarakter daşıyan informasiya resursları meydana çıxdı. Oxşar meyllər əvvəllər də nəzərə çarpıb. Ancaq müqayisə üçün deyə bilərəm ki, 2015-ci ilin avqustundan fərqli olaraq 2016-cı ilin aprelində media daha həssas davranmışdı. Demək olar, bütün məlumatlar Müdafiə Nazirliyinə istinadən verilmişdi. Bir neçə gün əvvəl cəbhədə gərginlik yarananda tam mənada neqativ mənzərəyə şahidlik etdiyimizi söyləyə bilmərik. Ümumən ictimai rəyə əsaslı təsir göstərən KİV həssaslığını qorudu. Ancaq bəzi internet media resurslarının sanki nə etmək istədikləri anlaşılmadı. Müşahidələrimiz onu deməyə əsas verir ki, tələskənliyə yol verənlər, hansısa formada populyarlıq qazanmağı hədəf seçərək media orqanları kimi fəaliyyət göstərdiyini iddia edənlər tapıldı. Onlar Ermənistan tərəfindən dövriyyəyə buraxılmış və Azərbaycan hərbçilərinin cəsədlərinin yer aldığı iddia olunan video-görüntünü öz resurslarında yaymaqla ilk növbədə peşəkarlıqdan uzaq davranış ortaya qoydular”. Deputat Mətbuat Şurasının müraciətində məlum video-görüntünü yaymamağa çağırışın ifadə olunduğunu vurğulayıb. “Biz bununla bağlı fikrimizi ifadə etdik. Ümumən də cəbhədəki vəziyyətlə, Milli Ordumuzla bağlı məsələyə həssas yanaşmaq lazımdır. Yeri gəlmişkən, az əvvəl bir video görüntü izlədim. Həmin görüntüdə həlak olmuş əsgərlərdən birinin tabutu evinə gətirilir. Bildiyimiz ürək ağrıdan səhnələr yaşanır. Mənə əlbəttə o ürək ağrısını həmin an kimin görüntülədiyi maraqlıdır. Bu qədərmi asandır belə çəkilişləri etmək?! Söz yox ki, övlad itkisi son dərəcə böyük faciədir. Ancaq daha böyük faciə övlad itkisinə reaksiyanın bir və ya bir neçə media orqanı tərəfindən yayımlanmasıdır. Bununla cəmiyyətə hansı mesajı verirlər?”, – deyən Ə. Amaşov bildirib ki, media müharibə dönəmlərində, çətin vəziyyətlərdə cəmiyyətdə ruh yüksəkliyi yaradan vasitə kimi çıxış etməlidir. MŞ sədri rəhbərlik etdiyi qurumun bir daha jurnalistləri həssas davranmağa çağırdığını vurğulayıb: “Əlimizdə belə yarıtmaz fəaliyyətlə məşğul olan KİV-in konkret materialları da var. Onlarla bağlı müvafiq qurumlara müraciətlər edilib. Məsələ tam ciddiyəti ilə araşdırılacaq. Heç bir dəlilə-sübuta əsaslanmadan cəbhə xəttinə yaxın kəndlərin guya boşaldıldığını iddia edən media orqanı da, düşməndən hansısa kəndi azad etdiyimizə dair yalan məlumat yayan kütləvi informasiya vasitəsi təmsilçisi də qanuni məsuliyyətə dəvət ediləcək. Buna kimsənin şübhəsi olmasın”. /APA

28 Fevral 2017 6:54

Aqrar Universitetdə süni mayalandırma işlərinin inkişafına aid tədbir keçirilib

Azərbaycan Dövlət Aqrar Universitetinin  “Baytarlıq təbabəti və zoomühəndislik” fakültəsində respublikada heyvandarlığın cins tərkibinin yaxşılaşdırlmasında həyata keçirilən tədbirlər, kadr hazırlığı məsələləri, uçot-hesabat sisteminin hazırlanmasında informasiya-kommunikasiya texnologiyaları və digər aktual məsələlər müzakirə edilib. ADAU-nun mətbuat xidmətindən bildirilib ki, Kənd Təsərrüfatı Nazirliyi tərəfindən icra edilən “Azərbaycanda maldarlığın və süni mayalanma xidmətlərinin inkişaf etdirilməsi” layihəsi çərçivəsində mütəxəssis hazılığının aparılması və beynəlxalq əlaqələrin qurulması sahəsində görülən işlər və planlaşdırılan tədbirlər ətrafında geniş fikir mübadiləsi aparılıb. Təhsil müəssisəsinin prorektoru Anar Hətəmov kadr hazırlığı sahəsində əldə edilən nailiyyətlərdən danışıb. Şəki, Zaqatala, İsmayıllı, Bərdə, Ağcabədi, Ağdaş, Goranboy, Daşkəsən, Samux, Göygöl və Şəmkir rayonundan olan süni mayalandırma mütəxəssisləri və rayon kənd təsərrüfatı idarələrinin əməkdaşları isə mövcud problemlər və qarşıda duran vəzifələr barədə məlumat verib.  Azərbaycan Dövlət Aqrar Universitetinin  rektoru, akademik İbrahim Cəfərov və  Kənd Təsərrüfatı Nazirliyinin Heyvandarlığın inkişafı şöbəsinin müdiri Qalib Əbdüləliyev də tədbirdə İştirak edib. Sonda “Heyvanların Süni Mayalandırıılması Mütəxəssisləri Assosiasiyası” İctimai Birliyinin yaradılması üzrə təsis iclası keçirilib. İclasa respublikanın müxtəlif rayonlarında fəaliyyət göstərən süni mayalanma, baytarlıq və zoomühəndislik mütəxəssisləri, elmi-tədqiqat institutunun və müvafiq aili və orta ixtisas tədris müəssisələrinin əməkdaşları qatılıb.        

27 Fevral 2017 11:32

Bakıda Prezidentin iştirakı ilə “Xocalı yürüşü” – Foto

XX əsrdə bəşər tarixinə Xocalı soyqırımı kimi daxil olan qanlı faciənin 25-ci ildönümü ilə əlaqədar fevralın 26-da Bakıda ümumxalq yürüşü keçirilir. Axar.az xəbər verir ki, Azərbaycan Respublikasının Prezidenti İlham Əliyev və Birinci vitse-prezident xanım Mehriban Əliyeva yürüşdə iştirak ediblər. Paytaxtın Azadlıq meydanından Xətai rayonunda ucaldılmış abidəyə doğru hərəkətə başlayan və 40 mindən çox insanın iştirak etdiyi ümumxalq yürüşünün məqsədi Xocalı faciəsi qurbanlarının xatirəsini ehtiramla yad etmək, erməni faşistləri tərəfindən insanlığa qarşı törədilmiş bu vəhşi cinayəti yenidən dünya ictimaiyyətinin diqqətinə çatdırmaqdır. Ön sırasında Prezident İlham Əliyevin və Birinci vitse-prezident xanım Mehriban Əliyevanın olduqları yürüş iştirakçıları Xocalı soyqırımı qurbanlarının xatirəsinə Bakının Xətai rayonunda ucaldılmış abidəyə doğru hərəkətə başladılar. Ümumxalq yürüşünün iştirakçıları və onların keçdiyi prospekt və küçələr boyu düzülmüş minlərlə gənc əllərində qanlı qırğının günahsız qurbanlarının - xüsusi qəddarlıqla qətlə yetirilmiş uşaqların, qadınların və qocaların portretləri, 25 il bundan əvvəl törədilmiş hadisələrin dəhşətli səhnələrini əks etdirən fotoşəkillər, faciənin təqsirkarlarından cavab tələb etmək, onları cəzalandırmaq, bu soyqırımına beynəlxalq səviyyədə siyasi-hüquqi qiymət vermək barədə çağırışlar və soyqırımı qurbanlarının adları, soyadlarının əks olunduğu Azərbaycan, rus, ingilis, fransız dillərində plakatlar və transparantlar tutmuşdular. Marşrut boyunca yolların kənarlarındakı monitorlarda, binaların fasadlarında və balkonlarında “Dünya Xocalı soyqırımını tanımalıdır!”, “Xocalıya ədalət!”, “Xocalını unutmayın!”, “Rədd olsun erməni faşizmi!”, “Xocalı – XX əsrin soyqırımı”, “Cinayətkarlar cəzasız qalmayacaqlar!”, “Xocalı soyqırımı – 25 il” və s. çağırışlar və şüarlar nümayiş etdirilirdi. Faciənin 25-ci ildönümü ilə əlaqədar Azərbaycan Respublikasının Prezidenti İlham Əliyev 2017-ci il yanvarın 24-də “Xocalı soyqırımının iyirmi beşinci ildönümü haqqında” Sərəncam imzalayıb. Azərbaycan Respublikasının Prezidenti Administrasiyası rəhbərinin sərəncamı ilə “Xocalı soyqırımının iyirmi beşinci ildönümünün keçirilməsinə dair tədbirlər planı” təsdiq edilib. Xocalı qırğını haqqında həqiqətlərin dünyaya çatdırılması, bu faciənin xalqımıza qarşı soyqırımı aktı kimi tanınması üçün Azərbaycan dövləti bütün zəruri addımları atır. Bu sahədə məqsədyönlü fəaliyyət ümummilli lider Heydər Əliyev Azərbaycanda siyasi hakimiyyətə qayıdandan sonra başlanıb. Ulu Öndərin təşəbbüsü ilə Xocalı soyqırımına siyasi-hüquqi qiymət verilib, fevralın 26-sı “Xocalı soyqırımı günü” elan edilib. 2008-ci ildə Heydər Əliyev Fondunun vitse-prezidenti Leyla Əliyevanın təşəbbüsü ilə başlanmış “Xocalıya ədalət!” beynəlxalq kampaniyası bu istiqamətdə təbliğat işini daha da fəallaşdırıb. Faciə ilə əlaqədar dəhşətli faktlar bu kampaniya çərçivəsində aparılan işlər sayəsində geniş beynəlxalq ictimaiyyətə çatdırılıb, planetin bütün guşələrində milyonlarla insan erməni millətçilərinin əsl simasını tanıyıb və bilib ki, ermənilər öz sərsəm ideyalarını həyata keçirmək naminə heç nədən, o cümlədən uşaqları qətlə yetirməkdən çəkinmirlər. İslam Əməkdaşlıq Təşkilatı Parlament İttifaqı ermənilərin Xocalıda törətdiyi mənfur əməlləri “insanlığa qarşı kütləvi cinayət” kimi tanıyıb və üzv dövlətləri bu faciəyə lazımi siyasi-hüquqi qiymət verməyə çağırıb. Dünyanın 10-dan çox ölkəsinin parlamenti, ABŞ-ın 20-dən artıq ştatının qanunverici orqanı Xocalı qırğınını soyqırımı aktı kimi tanıyıb. Xatırladaq ki, 1992-ci il fevralın 25-dən 26-na keçən gecə silahlı erməni dəstələri keçmiş sovet ordusunun Xankəndidə yerləşən 366-cı motoatıcı alayının ağır texnikası və şəxsi heyətinin köməyi ilə Azərbaycanın qədim Xocalı şəhərinin üzərinə hücum edib və onun dinc əhalisinə amansızcasına divan tutublar. Xocalı soyqırımının qanlı statistikası belədir: Hücum zamanı şəhərdə olan 3 min nəfərdən 613-ü, o cümlədən 106 qadın, 63 uşaq və 70 qoca xüsusi qəddarlıqla öldürülüb, 487 dinc sakin ağır yaralanıb, 1275 nəfər girov götürülüb və insanı alçaldan işgəncələrə məruz qalıb, 197 nəfərin taleyi hələ də məlum deyil. Səkkiz ailə tamamilə məhv edilib. Həmin insanlar yalnız etnik mənsubiyyətlərinə - azərbaycanlı olduqlarına görə amansızcasına öldürülüb, işgəncələrə məruz qalıb və şikəst ediliblər. Ermənilərin bu cəza tədbiri hərtərəfli planlaşdırılıb və yeganə bir məqsədlə törədilib – dinc sakinləri milli mənsubiyyət əlamətinə görə qismən və ya tamamilə məhv etmək. Beynəlxalq hüquqa görə belə hərəkətlər “soyqırımı” anlayışına uyğundur və dünya ictimaiyyəti tərəfindən bu cür tanınmalıdır. Xocalı soyqırımı qurbanlarının abidəsinin ətrafında fəxri qarovul dəstəsi və tər çiçəklər düzülmüşdü. Prezident İlham Əliyev Xocalı soyqırımı abidəsinin önünə əklil qoydu, faciə qurbanlarının xatirəsini ehtiramla yad edib. Birinci vitse-prezident xanım Mehriban Əliyeva, Baş nazir Artur Rasizadə, Milli Məclisin sədri Oqtay Əsədov, Prezident Administrasiyasının rəhbəri Ramiz Mehdiyev, Heydər Əliyev Fondunun vitse-prezidenti Leyla Əliyeva, Arzu Əliyeva, Heydər Əliyev abidənin önünə tər güllər qoyublar. Dövlət və hökumət rəsmiləri, Milli Məclisin deputatları, nazirlər, komitə və şirkətlərin rəhbərləri, diplomatik korpusun nümayəndələri, dini konfessiyaların başçıları, habelə qırğından xilas ola bilmiş Xocalı sakinləri də abidənin önünə güllər düzüblər.  

26 Fevral 2017 12:39

Fakt

Bizi izləyin