Taksi sürücülərinə qənim kəsilən dələduz peyda olub – VİDEO

taksi

  1Xəbər.com-un əməkdaşının hadisə yerindən verdiyi məlumata görə, taksi sürücüsü ilə bir dələduz arasında mübahisə yaranıb. Başı öz mübahisəsinə qarışmış taksist öz taksisi ilə yolu bağlayıb. Hadisə - Dilarə Əliyeva küçəsi ilə Azadlıq prospektinin kəsişməsində baş verib. Yolda hərəkət edən taksinin açıq şüşəli qapısına elə maşın hərəkətdə ikən özünü atan bir gənc ələ keçib. Yaşlı kişinin idarə etdiyi taksinin sürücüsü güclə avtomobilini saxlayaraq gənci tuta bilib. Sən demə, bu gənc qapını açıb oturmaq istəyib. Bunu maşın hərəkətdə ikən etdiyi üçün yaşlı taksi sürücüsünə güclü stress yaşadıb. Bu səbəbdən sürücü gənci polisə təhvil vermək istəyib. Ətrafda hadisəyə yığışmış bir neçə başqa taksi sürücüləri də gənci tanıyıb və onlar da bu tip hadisəylə rastlaşdığını bildiriblər. Anlaşılan, bu gənc dələduz artıq bir müddətdir ki, gecələr şəhərimizin taksi sürücülərinin qorxunc kabusuna çevrilib. Adətən, belə dələduzların məqsədi - avtomobil sürücülərini adam vurmaqda günahlandıraraq aylarla sürücüləri sözün əsl mənasında soymaqdır. Əvvəlcə, guya xəsarət almış canlarının müalicəsi üçün pul istəyirlər. Aylarla uzanan "müalicədən" sonra, bu dələduzlar "Sənin ucbatından gəzə bilmirəm, ailəmi saxlamaqda kömək et" - deyə, israr edir. Başına bu tip hadisə gəlmiş Bakı sürücüsünün etirafına görə, böyük mənəvi iztirab çəkib. Bu gün küçədə taksi sürücüləri tərəfindən tutulan gəncin isə ruhi xəstə və ya alkoqol düşgünü olduğu da istisna olunmur.   https://youtu.be/pKqbV2kwyJ4

5 İyul 2016 6:29

Nazirdən döyüşçülərə RAMAZAN TƏBRİKİ

20160705-092801link

Azərbaycanın müdafiə naziri general-polkovnik Zakir Həsənov Silahlı Qüvvələrin şəxsi heyətini Ramazan Bayramı münasibəti ilə təbrik edib. Nazirliyin mətbuat xidmətindən TİA.AZ-a verilən məlumata görə, təbrikdə deyilir: "Cənab zabitlər, gizirlər, miçmanlar, çavuşlar, əsgərlər və matroslar! Sizi Ramazan bayramı münasibəti ilə səmimi qəlbdən təbrik edirəm. Milli-mənəvi dəyərlər xalqın mənəvi sərvətidir. Bu dəyərləri həmişə yüksək tutan Ümummilli liderimiz Heydər Əliyev milli və dini adət-ənənələrimizin qorunub saxlanılmasının da qayğısına qalmışdır. Məhz onun hakimiyyəti dövründə ölkəmizdə sağlam dinlərarası münasibətlər qurulmuşdur. Bu gün Azərbaycanda vicdan azadlığı və tolerantlığın hökm sürməsi, ölkəmizin dünyanın multikulturalizm mərkəzinə çevrilməsi Ulu öndərimiz Heydər Əliyevin təməlini qoyduğu müdrik siyasətin nəticəsidir. Bərabərlik və mənəvi təmizlik kimi yüksək əxlaqi hisslər aşılayan, bu günümüzə qədər yaşadılan Ramazan bayramı Azərbaycanda yüksək səviyyədə qeyd olunur. Dünya dövlətləri arasında dini tolerantlıq nümunəsi kimi tanınan Respublikamız möhtərəm Prezidentimiz İlham Əliyevin rəhbərliyi altında sivil və demokratik inkişaf yolu ilə inamla irəliləyir.Bu gün ölkəmizdə iqtisadiyyatın dinamik inkişafı təmin edilmiş, əhalinin həyat səviyyəsi yaxşılaşmış, dövlətimizin müdafiə qüdrəti artmış, müstəqilliyimiz daha da möhkəmlənmişdir. Aprel döyüşləri Silahlı Qüvvələrimizin döyüş ruhunun, döyüş qabiliyyətinin və gücünün təsdiqi oldu. Torpaqlarımızın bir qismi işğaldan azad edildi. Cənab Ali Baş Komandan "Biz imkan verməyəcəyik ki, bizim torpağımızada ikinci erməni dövləti yaransın" fikrini dəfələrlə vurğulayıb. Biz də prezidentin və Azərbaycan xalqının etimadını doğrultmaq üçün əlimizdən gələni edib torpaqları qısa bir müddətdə işğaldan azad etməliyik. İnanıram ki, bundan sonra da Azərbaycan Respublikası Konstitusiyasına, Hərbi Anda və Nizamnamələrə sadiq qalaraq respublikamızın ərazi bütövlüyünün bərpa edilməsi, torpaqlarımızın işğaldan azad olunması naminə xidməti borcunuzu şərəf və vicdanla yerinə yetirəcək, döyüş və mənəvi-psixoloji hazırlığın daha da yüksəldilməsində səylərinizi artıracaqsınız.Hər birinizə möhkəm cansağlığı, uzun ömür, ailə səadəti və xidmətinizdə uğurlar arzulayıram".

5 İyul 2016 10:36

Prezident İlham Əliyev Azərbaycan xalqını təbrik etdi

ilham,

  Prezident İlham Əliyev Azərbaycan xalqını Ramazan bayramı münasibətilə təbrik edib. Faktinfo.az xəbər verir ki, təbrikdə deyilir: "Hörmətli həmvətənlər! Sizi müqəddəs Ramazan bayramı münasibətilə ürəkdən təbrik edir, ən səmimi arzu və diləklərimi yetirirəm. Müqəddəs kitabımız Qurani-Kərimin nazil olduğu mübarək Ramazan ayı mənəviyyatı möhkəmləndirən, müsəlmanlar arasında dini-mənəvi birlik duyğusunu gücləndirən, hər bir şəxsin daxili kamilliyinin formalaşmasına xidmət edən aylardan biridir. Bu bayram insanları savab əməllərə dəvət edir, onları yer üzündə sülhün, əmin-amanlığın və qardaşlığın bərqərar olması naminə birgə səylər göstərməyə çağırır. İslam dünyasının mədəni mərkəzlərindən biri kimi tanınmış Azərbaycanda dini və milli-mənəvi dəyərlərə hörmət həmişə xüsusi həssaslıqla qorunub saxlanılmışdır. Bu gün əsl tolerantlıq örnəyinə çevrilən ölkəmizdə ayrı-ayrı dinlər və təriqətlər arasında qarşılıqlı hörmətin inkişaf etdirilməsi dövlət siyasətinin əsas istiqamətlərindəndir. Azərbaycanda müxtəlif milli və dini mərasimlər, o cümlədən, Ramazan bayramı hər il dövlət səviyyəsində təntənəli şəkildə qeyd olunur. Eyni zamanda məmnunluqla deyə bilərik ki, ölkəmizdə yaşayan bütün dinlərin nümayəndələri bəşəri hadisə olan Ramazan bayramına böyük sevgi ilə yanaşır, ölkəmizin multikultural ənənələrini ehtiramla qoruyurlar. Əziz bacı və qardaşlarım! İnsanlarda vəhdət və humanizm duyğularını, Allah və vətən sevgisini daha da gücləndirən Ramazan bayramı hər il olduğu kimi, bu il də bütün xalqımız tərəfindən böyük ruh yüksəkliyi və könül xoşluğu ilə qeyd edilir. Bu əziz bayram günlərində sizi və ölkəmizdən kənarda yaşayan soydaşlarımızı bir daha təbrik edir, hər birinizə firavanlıq, ailələrinizə xoşbəxtlik, süfrələrinizə bərəkət arzulayıram. Ramazan bayramınız mübarək olsun!"

4 İyul 2016 6:45

Şəkidə xüsusi qərargah yaradıldı –80 nəfər təhlükəsiz əraziyə köçürüldü

seki

  İyulun 2-də Şəkidə baş verən sellə bağlı xüsusi qərargah yaradılıb. Bu barədə Şəki şəhər İcra Hakimiyyətindən məlumat verilib. Məlumatda bildirilir ki, şəhər rəhbərliyinin tapşırığına əsasən, yaranmış vəziyyətlə əlaqədar təbii fəlakət zonasının yaxınlığında şəhər icra hakimiyyətinin məsul işçilərinin, aidiyyəti idarə, müəssisə və təşkilatların, hüquq-mühafizə orqanlarının rəhbərlərinin iştirakı ilə operativ qərargah yaradılıb. FHN-nin əməkdaşlarının iştirakı ilə dərhal təbii fəlakət baş verən əraziyə baxış keçirilib, təhlükəli ərazidə yaşayan əhalinin təxliyə olunması, seldən mühafizə və ərazinin lil qatından təmizlənməsi məqsədilə “AR Meliorasiya və Su Təsərrüfatı” ASC-nin müvafiq təxnikası cəlb edilib. Məlumatda həmçinin qeyd olunur ki, Kiş çayının yaxınlığında yerləşən istirahət mərkəzlərində qalan 80 nəfər şəxs təhlükəsiz əraziyə – “Ovçular evi”ndə yerləşdirilib və ərzaqla təmin ediliblər. Yerli İcra Hakimiyyətinin, FHN-nin, “Azərsu” ASC-nin sudaşıyan maşınları əhalinin içməli su ilə təminatına cəlb ediliblər. Dünən saat 05:10 radələrində təhlükəli ərazidə olan insanların təxliyəsinə başlanılıb, saat 08:10 radələrində təxliyyə tamamilə başa çatdırılıb. Hazırda Kiş kəndinin elektrik enerjisi ilə təminatı istiqamətində işlər görülür. Həmçinin, dağlıq ərazidə çobanların olub-olmaması araşdırılır. Bildirilir ki, yaranmış vəziyyətlə əlaqədar müvafiq komissiyanın ayrılması barədə Baş nazir Artur Rasizadəyə müraciət edilib. Trend.az

4 İyul 2016 1:28

Şəkidə sel fəlakəti: Kiş kəndinin şəhərlə əlaqəsi kəsildi

seki

  Şəkinin dağlıq ərazilərinə yağan yağışlar Kiş çayının daşmasına səbəb olub. Faktinfo.az ANS PRESS-ə istnadən xəbər verir ki, çayın daşması nəticəsində Kiş kəndini şəhərlə birləşdirən körpü tamamilə dağıldığından kəndin Şəki şəhəri ilə əlaqəsi kəsilib. Çay özü ilə sel suları ilə bərabər lil təbəqəsi də gətirdiyindən ərazidə gediş-gəliş demək olar ki, məhdudlaşıb. Hadisə baş verdikdən sonra rayon icra hakimiyyətinin başçısı, hüquq mühafizə orqanlarının rəhbərləri və digər aidiyyatı qurumlar da əraziyə gəlib. Körpünün uçması nəticəsində şəhərlə əlaqə kəsildiyindən Kiş kəndinin yuxarı hissəsində, 50 nəfər adam qalıb. Onların 20 çayın yaxınlığında olan istirahət mərkəzlərinin birində qalan turistlər olub. İstirahət mərkəzində qalan insanları təxliyyə etmək üçün əraziyə Fövqəladə Hallar Nazirliyinin canlı qüvvəsi və xüsusi texnikası cəlb olunub. İnsanlar ərazidən helikopterlə təxliyyə ediliblər. 300 metrə yaxın əsas daşıyıcı qaz xəttinin boruları sıradan çıxıb, kəndə elektrik enerjisinin verilməsi kəsilib, telefon xəttləri sıradan çıxıb. Aidiyyatı qurumlarının iştirakı ilə ərazilərə baxış keçirdiyini deyən icra başçısı Elxan Usubov bildirib ki, ilk olaraq kəndlə əlaqənin bərpa olunması üçün rayonun Qoxmuq kəndi ərazisindən alternativ yol salınacaq. Açıq havada qərargah yaradıldığını deyən icra başçısı Kiş kəndinə qaz və elektrik verilişinin təhlükəsizlik səbəbindən dayandırıldığını deyib. Sel suları ərazidə yerləşən bir neçə istirahət mərkəzinə ciddi ziyan vurub. Ərazi hidrometrologiya idarəsindən bildiriblər ki, yağış nəticəsində Kiş çayının Damarçın qolu ərazisindən gələn sel suları daşqına səbəb olub. Yüksəklikdə yerləşən dərələrdən axan çayların meyllilik dərəcəsi yüksək olduğundan boyük sürət axını yaranıb. Bu zaman dərələrdə erroziya nəticəsində əmələ gələn yığıntılar isə lil təbəqəsi şəklində sel sularına qarışıb. Hidrometrologiya idarəsindən onu da bildirdilər ki, iyul 1-dən 4-dək yağıntılı hava barədə əvvəlcədən aidiyyəti qurumlara məlumat verilib.

3 İyul 2016 11:23

Gədəbəy fermerləri kömək istəyir

Loqo+Gedebey

Gədəbəy rayon bir qrup fermer tərəfindən Azərbaycan Respublikasının Prezidenti İlham Əliyev cənablarına ünvanlanan məktub Faktinfo.az saytna da göndərilmişdir.Məktubu olduğu kimi təqdim edirik:   Hörmətli Prezident! Gədəbəy dağlıq kənd rayonudur. Üstəlik cəbhə bölgəsidir. Əhalinin əsas məşğuliyyəti heyvandarlıqdır. Sovetlər dövründə də belə idi. İnsanlar öz şəxsi təsərrüfatlarında çalışmaqla dolanışıqlarını təmin edirlər. Siz, hər zaman digər rayonlar kimi Gədəbəyə də öz diqqət və qayğınızı əsirgəməmisiniz. Rayonumuzun abadlaşdırılması, yollarımızın yenilənməsi, əhalinin sosial-məişət şəraitinin yaxşılaşdrılması istiqamətində gördüyünüz işlər hər bir gədəbəyli kimi bizləri də sevindirir. Lakin bu gün biz xoşagəlməz bir vəziyyətlə üzləşmişik. Bu da Sovetlər dövründən bəri bu günümüzədək beş rayonun qışlaq-yaylaq sahəsi kimi istifadədə olunan “Ceyrançöl” yatağı ilə bağlıdır. Burada Qazax, Ağstafa, Şəmkir, Tovuz və Gədəbəy rayonlarının bu böyük yatağı bu gün də insanların istifadəsindədir. Burada yataq kimi istifadə edilə biləcək başqa bir ərazi yoxdur. Bu ərazidə bitən yovşan kolu heyvanlar üçün ən zəruri təbii yem hesab edilir. Sovetlər dönəmində bu əraziyə nəinki traktor, digər mexanizasiya daxil ola bilməzdi, hətta yovşan kolunun üstündən keçən avtomobil təkərinə görə böyük məbləğdə - 1000 manat cərimə ödənilərdi. Amma bu gün vəziyyət tam əksinə dəyişməkdədir. Bəzi insanlar şəxsi qazanc naminə ümumi işə ziyan verə biləcək əməllərlə məşğul olmağa başlayıblar. Bir qrup şəxs tərəfindən yataq ərazisində artıq taxıl səpininə başlanmışdır. Bu ərazidə şum aparılması orada yenidən yovşan kolu bitməsi ehtimalının üzərindən birdəfəlik xətt çəkmiş olacaq. Yeri gəlmişkən qeyd edək ki, bu günlərdə sizin sərəncamınızla respublikada heyvandarlığı inkişaf etdirmək məqsədilə 8,5 milyon manat məbləğində pul vəsaiti ayırmısınız. Bu, bir daha sizin kənd əhalisinə göstərdiyiniz qayğının bariz nümunəsidir. Ölkədə “Ərzaq Proqramı” qəbul edilib. “Ərzaq Proqramı”nda heyvandarlıq bir daha prioritet sahə kimi təsbit olunub. Bizim hər birimiz “Ərzaq Proqramı”nın həyata keçirilməsində maraqlıyıq.   Hörmətli cənab Prezident! Bakıdan Qazax rayonuna qədər yolboyu min hektarlarla əkinə yayarlı torpaq sahəsi boşdur. Yaxşı olardı ki, taxıl səpini həmin sahələrdə aparılsın. Təkcə “Ceyrançöl”də Gədəbəydən 300000 baş, bir o qədər də digər rayonların qoyun sürüsü yerləşir. Burada taxıl əkilməsi qoyunçuluğun məhvi deməkdir. Azərbaycanda dağ meronosunun vətəni Gədəbəydir. SSRİ dövrü bura ən böyük heyvandarlıq rayonu olub, çoban Qara Haqverdiyev və başqaları böyük dövlət mükafatları ilə təltif olunub. Ən böyük ziyan da Gədəbəyə dəyib. Biz taxılçılığın əleyhinə deyilik. Qış otlaq sahəsi əlimizdən alınıb, yerinə ərazi verilməyib. Yüz minlərlə manat xərcimiz çıxıb, bizə kompensasiya verilmir, aidiyyat instansiyalar müraciətlərimizə rədd cavabı verir. Əgər bizə tezliklə qış otlaq sahəsi ayrılmasa, tikililərimizin kompensasiyası ödənilməsə yarım milyon heyvan məhv olacaq. Xahiş edirik üzləşdiyimiz problemin öz qanuni həllini tapması üçün köməyinizi əsirgəməyəsiniz.   İmza:   Tomuyyev Akif  Səlim oğlu -Söyüdlü kəndi Abdullayev Telman Çoban oğlu- Söyüdlü kəndi Abdullayev Qəzənfər Bəşir oğlu Söyüdlü kəndi Kazımov İsrafil Murtuz oğlu –Söyüdlü kəndi    

1 İyul 2016 7:44

Azərbaycan çaylarındakı mövcud vəziyyət… –Nazirlik xəbər yaydı

cay-araz

Ötən günlər ərzində respublika çaylarının sululuğunda əsasən mühüm dəyişiklik müşahidə olunmayıb. Faktinfo.az Ekologiya və Təbii Sərvətlər Nazirliyinin Milli Hidrometeorologiya Departamentinə istinadən xəbər verir ki, hazırda Böyük Qafqazın Quba-Xaçmaz bölgəsi çaylarında sululuq ongünlük normanın 40-50, Kiçik Qafqazın çaylarında 50-100, Lənkəran-Astara bölgəsi çaylarında isə 30-80 faizini təşkil edir. Tranzit çaylarda hazırki vəziyyət.İyulun 01-də Kür çayının Qıraqkəsəmən məntəqəsində suyun səviyyəsində 2 sm azalma müşahidə olunub. Hazırda məntəqədə su sərfi 225 m3/s olmaqla ongünlük normanın 75 faizini təşkil edir. 2015-ci ildə isə bu rəqəm 213 m3/s olmaqla ongünlük normanın 71 faizini təşkil edib.Qanıx çayının Əyriçay məntəqəsində suyun səviyyəsində 3 sm azalma müşahidə olunub. Hazırda məntəqədə su sərfi 81 m3/s olmaqla, ongünlük normanın 55 faizini təşkil edir. 2015-ci ildə isə bu göstərici 53 m3/s təşkil edərək ongünlük normanın 36 faizinə bərabər olub. Kür çayının aşağı axınında hazırki vəziyyət İyulun 01-də Kür çayının aşağı axınında suyun səviyyəsində əsasən mühüm dəyişiklik müşahidə olunmayıb. Belə ki, Kür çayının Bankə məntəqəsində 2 sm azalma qeydə alınıb, Salyanda, Surrada, Araz çayının Novruzlu məntəqəsində isə suyun səviyyəsində dəyişiklik müşahidə olunmayıb. Hazırda Surra məntəqəsində suyun səviyyəsi 332 sm (2015-ci il iyulun 01-də 329 sm), Salyanda 98 sm (2015-ci il iyulun 01-də 80 sm), Bankədə 179 sm (2015-ci il iyulun 01-də 181 sm), Araz çayının Novruzlu məntəqəsində isə 48 sm (2015-ci il iyulun 01-də 48 sm) təşkil edir.

1 İyul 2016 1:01

Azərbaycanda qeyri-adi hava olacaq – Quru, isti və tozlu külək…

haa

İyulun 20-25-dən sonra Azərbaycana tropik quru isti hava kütləsinin gələcəyi - quru, isti, tozlu küləklərin əsəcəyi gözlənilir. Faktinfo.az xəbər verir ki, bu barədə Trend-ə Azərbaycan Milli Elmlər Akademiyasının (AMEA) Coğrafiya İnstitutunun İqlim və aqroiqlimşünaslıq şöbəsinin baş elmi işçisi, coğrafiya üzrə fəlsəfə doktoru Məhərrəm Həsənov deyib. Onun sözlərinə görə, iyulun 20-25-dən avqustun 15-dək olan dövr ərzində Azərbaycanda havanın quraq, yağıntısız keçəcəyi gözlənilir. M.Həsənov qeyd edib ki, iyulun 20-25-dən sonra atmosfer təzyiqinin fərqindən asılı olaraq, Azərbaycana ya Orta Asiyadan quru isti, ya da Şimali Afrikadan və Ərəbistan yarımadasından tropik quru isti hava kütləsi gələcək: “Bu hava kütlələrinin fərqləndirici cəhəti yalnız küləyin istiqamətində olur. Şimali Afrikadan və Ərəbistandan əsəndə külək cənub küləyi, Orta Asiyadan əsəndə isə şərq küləyi adlanır. Cənubdan gələn tropik hava kütləsi daha isti, quru və tozlu olur. Azərbaycana isə daha çox cənubdan hava kütlələrinin gələcəyi gözlənilir. Buna görə də Azərbaycanda cənub küləklərinin (gilavar) təkrarlanması ehtimalı daha çoxdur”. M.Həsənov deyib ki, Azərbaycanda yay ayları ərzində cənub küləkləri həmişə müşahidə edilir. Yay fəslinin əksər vaxtlarında cənub küləkləri əsir. Lakin bu il cənub küləklərinin iyulun 20-25-dən avqustun 15-dək olan dövr ərzində daha intensiv əsəcəyi gözlənilir: “Bu il hələ iyun ayı başa çatmasa da, artıq 37-38 dərəcə isti müşahidə edilir. Hadisələrin gedişatı göstərir ki, eyni zamanda ehtimallar da belədir ki, iyul ayının təqribən 20-dən sonra Azərbaycanda hava daha isti olacaq. Həmin hava kütlələrinin də məhz bu dövrdə Azərbaycana gəlməsi ehtimalı daha çox olacaq. Belə hava kütlələri həmişə müşahidə edilib. Ancaq bu il onların daha intensiv olacağı, həmin küləklərin təkrarlanması ehtimalının da daha çox olacağı gözlənilir”. M.Həsənov əlavə edib ki, builki quraqlıq dövrü təqribən keçənilki kimi olacaq. Müəyyən günlərdə 40 dərəcə istinin müşahidə ediləcəyi gözlənilir. Lakin builki quraqlığın fərqli cəhəti o olacaq ki, isti quru küləklər torpağın da rütubətini xeyli azaldacaq. Alim qeyd edib ki, belə hava şəraitinin isti küləklərlə müşahidə olunması kənd təsərrüfatına, xüsusilə birillik bitkilərə daha çox mənfi təsir edə bilər.

1 İyul 2016 10:12

Fakt

Bizi izləyin