Arzu Rəhimovun sevimli kadrından görünməmiş qanusuzluq – Sənədlərdə

Ağdamda xarici ölkə vətəndaşı zorla hərbi xidmətə aparılıb   Arzu Rəhimov qanunları kobud şəkildə tapdalayan öz sevimli kadrını niyə davamlı olaraq müdafiə edir? Bəzən elə hadisələrlə üz-üzə gəlirsən ki, yerlə göyün arasında baş verənə inanmağın gəlmir. Amma cənab fakt ortada olduqdan sonra adamın inanmaqdan başqa da çarəsi qalmır. Belə hadisələrdən biri Ağdam rayonunda baş verib. Belə ki, Səfərbərlik və Hərbi Xidmətə Çağırış Üzrə Dövlət Xidmətinin Ağdam Rayon Şöbəsinin rəisi Seymur Qurbanov zorla Rusiya vətəndaşını hərbi xidmətə aparıb. Bu Barədə Azmedia.info saytına ən kobud şəkildə hüquqları pozulan Nizami Bayramovun atası Ziyəddin Bayramov məlumat verib. Qeyd edək ki, ata və oğul Rusiya vətəndaşlardır və bu onların redaksiymıza təqdim etdikləri sənədlərdən də açıq aydın görünür. Nizami Bayramovun hərbi bileti Ziyəddin Bayramov Bayramov AzMedia.infoya bildirib ki, o, Ağdamın Quzanlı qəsəbəsində doğulub və sonradan Rusiyanın Altay vilayətinə köçüb və Rusiya vətəndaşlığı alıb. Uzun illər boyu Rusiyda yaşayan Ziyəddin Bayramov SSRİ dağıldıqdan sonra Azərbaycan vətəndaşlığını itirib və Rusiyada doğulan uşaqları da Rusiya vətəndaşlarıdır. 2014-cü ildə ailə Ağdama qayıdıb və Azərbaycan Respublikası Dövlət Miqrasiya Xidmətindən ölkədə 5 illik oturum və çalışmaq izni alıb. Ziyəddin Bayramovun oturma izni Elə həmin ildə Səfərbərlik və Hərbi Xidmətə Çağırış Üzrə Dövlət Xidmətinin Ağdam Rayon Şöbəsinin rəisi Seymur Qurbanov əsgərlik yaşında olan Nizami Bayramova çağırış vərəqəsi yollayıb. Ailə başçısı oğlunun Rusiya vətəndaşı olması ilə bağlı sənədləri Seymur Qurbanova versə də, Seymur Qurbanov bildirib ki, onlar əslən ağdamlıdırlar və əsgərlikdən yayınmaq üçün Rusiya vətəndaşlığı qəbul ediblər. Şöbə rəisi Ziyəddin Bayramova bildirib ki, oğlunu fərari kimi həbs etdirəsək. Və bundan sonra Nizami Bayramovu hərbi xidmətə aparmamaq üçün 5000 manat istəyib. Ziyəddin Bayramov bildirir ki, o həddindən artıq kasıb bir adamdır. Uzun illər boyu Rusiyada fəhlə olaraq çalışıb. Rusiyada rublun kəskin ucuzlaşmasından sonra onların gəlirləri çox azalıb və o, Azərbaycanda vəziyyətin daha yaxşı olacağını düşünüb. Vətənə dönən Ziyəddin Bayramov və ailəsi Rusiya vətəndaşlığını qoruyub saxlayıb və Dövlət Miqrasiya Xidmətindən oturum üçün 5 il isazə alıb. Nizami Bayramovun oturma izni Ziyəddin Bayramov bildirir ki, onun hüquqi savadı olmadığından Seymur Qurbanova etiraz etməyib. Lakin tələb olunan 5000 manatı da verə bilmədiyi üçün oğlunun hərbi xidmətə aparılmasına razılıq verib. Biçarə valideyn bildirir ki, o, oğlunun həbsdə yatacağına əsgərliyə getməsinə üstünlük verib. Və beləliklə görünməmiş bir hadisə baş verib. Səfərbərlik və Hərbi Xidmətə Çağırış Üzrə Dövlət Xidmətinin Ağdam Rayon Şöbəsinin səfərbər etdiyi çağırışçı, Rusiya vətəndaşı Nizami Bayramov il yarım müddətində Naxçıvanda həqiqi hərbi xidmət keçib. Hazırda isə Nizami Bayramov şəxsiyyət vəsiqəsi almaq üçün müraciət edib və ona bildiriblər ki, Rusyia vətəndaşı olduğu üçün ona şəxsiyyət vəsiqəsi verə bilməzlər. Bu zaman Qizami Bayramov hərbi biletini təqdim edib və bunlan sonra anlaşılmazlıq ortaya çıxıb. Miqrasiya Xidmətindən verilən arayış Ziyəddin Bayramov redaksiyamıza bildirib ki, o aldadıldığını yalnız indii anlayıb və buna görə də bir çox yerlərə şikayət edib. Lakin belə görünür ki, Səfərbərlik və Hərbi Xidmətə Çağırış Üzrə Dövlət Xidməti qalmaqalı ört-basdır etmək istəyir. Çünki məsələ ortaya çıxdıqdan sonra Səfərbərlik və Hərbi Xidmətə Çağırış Üzrə Dövlət Xidmətinin Ağdam Rayon Şöbəsinin rəisi Qubaya təyinat alıb. Bu yolla məsələni ört-basdır etməyə çalışan Arzu Rəhimov hazırda Nizami Bayramovun şikayətlərinə məhəl qoymur. Ziyəddin Bayraov isə bildirir ki, o qanunsuz yerə hərbi xidmətə aparılan oğluna kompensasiya verilməsini tələb edir. AzMedia.info-nun apardığı araşdırma zamanı isə bəlli olub ki, Seymur Qurbanov Səfərbərlik və Hərbi Xidmətə Çağırış Üzrə Dövlət Xidmətinin rəisi Arzu Rəhimova yaxın adam hesab olunur. Onun haqqında bu günə qədər çoxlu sayda şikayətlərin olması və xüsusən də saxta hərbi biletlərin satılması ilə bağlı şikayətlərin olması barədə məlumatlar var. Buna baxmayaraq Arzu Rəhimov öz sevimli kadrını həmişə müdafiə edir. Qarşı tərəfin mövqyeini dərc etməyə hazırıq.  Pia.az Faktinfo.az  

5 Oktyabr 2016 12:14

Korrupsiya haqda məlumat verən şəxs qorunacaq –Yeni qanun

Azərbaycanda korrupsiya halları barəsində müvafiq qurumlara məlumat verən şəxslər dövlət tərəfindən qorunacaq. Milli Məclisdən verilən məlumata görə, bu əlavə "Korrupsiyaya qarşı mübarizə haqqında" qanuna təklif edilən yeni maddədə öz əksini tapıb. Belə ki, "Korrupsiyaya qarşı mübarizə haqqında" qanuna 11-2-ci maddənin (Korrupsiya ilə əlaqədar hüquqpozmalarla bağlı məlumat verən şəxsin dövlət müdafiəsi) əlavə edilməsi təklif edilir. Bu maddəyə əsasən, korrupsiya ilə əlaqədar hüquqpozmalarla bağlı məlumat verən şəxs özü barədə məlumatın açıqlanmasını istəmədiyi halda, səlahiyyətli struktur bölmə, idarə, müəssisə və ya təşkilatın rəhbəri və korrupsiyaya qarşı mübarizə sahəsində ixtisaslaşmış orqanlar onun konfidensiallığını təmin etməlidirlər. Bu məlumat korrupsiya ilə əlaqədar hüquqpozmalarla bağlı məlumat verən şəxsin yazılı razılığı olduqda açıqlanır. Şəxsin konfidensiallığının pozulmasında təqsirli olanlar qanunla müəyyən edilmiş qaydada məsuliyyət daşıyırlar. Həmin maddəyə görə, korrupsiya ilə əlaqədar hüquqpozmalarla bağlı məlumat verən şəxsə və ya onun yaxın qohumuna hədə-qorxu gəlmək, onları təzyiqlərə məruz qoymaq, maddi və ya mənəvi ziyan vurmaq, təhqir və təhdid etmək, şərəf və ləyaqətini alçaltmaq qanunla müəyyən edilmiş qaydada məsuliyyətə səbəb olur.

5 Oktyabr 2016 11:21

Beyləqanın icra başçısı restoranda dava salıb – Sabiq işçisiylə

Vaqif Abdullayevlə icra hakimiyyətinin keçmiş şöbə müdiri əlbəyaxa olublar   Beyləqan rayonun icra başçısı Vaqif Abdullayevlə keçmiş şöbə müdiri arasında əlbəyaxa dava baş verib.  Bu barədə azerinews.tv-yə rayondakı etibarlı mənbələrdən məlumat daxil olub. Məlumata görə, iki gün öncə Vaqif Abdullayev başının dəstəsilə rayonda tanınmış "Kral" şadlıq sarayına gəlib və təsadüfən restoranda bir müddət əvvəl işdən çıxardığı, rayon icra hakimiyyətinin keçmiş hüquq şöbəsinin müdiri Zakir Mehdiyevlə üz-üzə gəliblər. Hər iki tərəf içkili olduğundan aralarında mübahisə yaranıb və sonda mübahisə dava-dalaşla nəticələnib. Deyilənə görə insident Vaqif Abdullayevin Zakir Mehdiyevin ünvanına "əəəə iş verən sən də burdasan" ifadəsindən sonra baş verib. Zakir Mehdiyev isə öz növbəsində icra başçısının "moşennik" adlandıb. Elə bundan sonra da tərəflər arasında əməlli başlı əlbəyaxa dava düşüb. Lakin icra başçısı Vaqif Abdullayevin yanında olanlar hər iki tərəfi birtəhər sakitləşdirə biliblər. Qeyd edək ki, Vaqif Abdullayev Beyləqana icra başçısı təyin olunandan sonra qurumun keçmiş hüquq şöbəsinin müdiri Zakir Mehdiyevi işdən kənarlaşdırıb. Keçmiş şöbə müdiri isə mətbuatda Vaqif Abdullayevi ittiham edərək bildirib ki, onu icra başçısı qanunsuz olaraq işdən çıxarıb. Səbəb isə 2012-ci ildə Vaqif Abdullayevin Beyləqana başçı təyin olunandan sonra necə deyərlər, daş qayaya rast gəlib. Zakir Mehdiyev icra başçısın hüquqi sənədlərə onunla razılaşmadan imza atmaqda və həmin sənədləri vətəndaşlara satmaqda ittiham edib. Şöbə müdiri buna etiraz edəndə isə o zaman Vaqif Abdullayev ona təzyiqlər göstərirmiş. O da dinc dayanmayıb başçının hərəkətlərindən müvafiq orqanlara şikayət yazıb yollayıb. Nəticədə isə Zakir Mehdiyev vəzifəsilə vidalaşmalı olub. Görünür elə bu keçmiş ədavət ucbatından tərəflər arasında dava baş verib. Məsələ ilə bağlı Beyləqan Rayon İcra Hakimiyyəti ilə əlaqə yaratmaq cəhdlərimiz baş tutmadığından qarşı tərəfin mövqeyini dərc etməyə hazırıq. Mənbə: azerinews.tv  Faktinfo.az

4 Oktyabr 2016 7:05

“Azərbaycan Dövlət Dəmir Yolları” QSC  yük  vaqonları  alıb

  “SOKAR” başda olmaqla bütün  qurumlarda ixtisarlar aparıldı. “Azərbaycan Dövlət Dəmir Yolları “QSC- də də belə ixtisarların aparılacağı gözlənilirdi ,amma bu baş vermədi. Əksnə, uzun müddətdən  bəri- “Azərbaycan Dövlət Dəmir Yolları “QSC-nin gəlirlə işlədiyi zamanlardan  tikintisi yarımçıq qalan işlər tamamlandı.Hətta,tikintisi kifayət qədər vəsait tələb edən Dəmir Yolunun binası yenidən tikilməyə  başladı. O cümlədən  taxıl ,şəkər tozu və digər ərzaq mallarını daşımaq üçün QSC lazımi səviyyəli vaqonların olmamasından çətinlik çəkirdi. Taxıl və digər qida məhsullarının daşınması  üçün  nəzərdə tutulan yükləri ölkəmizə gətirmək və aparmaq üçün vaqonlar Gürcüstan  və ya Rusiyadan alınırdı. Bu məqsədlə bir vaqona 24 saat üçün istifadə edilib-edilməməsindən asılı olmayaraq 41 manat pul ödənilirdi. Nəzərə alsaq ki,bu məqsədlə  gün ərzində yüzdən çox vaqon istifadə edilirdi, onda müəyyən etmək olar ki, “ADDY” QSC ay ərzində istifadə etdiyi vaqonlara görə digər dövlətin dəmiryol idarəsinə 120-150 min manat intervalda  vəsait ödəyirdi. Bu məbləğə isə bir təzə vaqon almaq mümkün idi. Hazırda bu aslılıq da aradan qaldırılıb, “ADDY”  QSC  3100 müxtəlif təyinatlı vaqon alıb ,bu vaqonların sırasında 100-dən çox təzə  yük vaqonları var.  Faktinfo.az     

4 Oktyabr 2016 6:10

Bakıda mühafizəçini döydürən “Range Rover“li xanımın əri həbs olundu

Bakıda mühafizəçini ölümcül döydürən '003' nömrə nişanlı 'Range Rover'in xanım sürücüsü ilə bağlı yeni faktlar ortaya çıxıb Ciminal.az saytı bir neçə gün əvvəl Səbail rayonu ərazisində, Abşeron mehmanxanasının yaxınlığında yerləşən yaşayış kompleksinin mühafizəçisinin bir qızın şikayəti ilə ölümcül hala salınması barədə xəbər vermşdi. Məlumata görə, cavan xanım sürücü idarə etdiyi ``-- -- 003`` dövlət nömrə nişanlı son model ``Range Rover`` markalı avtomobili park etmək istəyib. Yer olmadığından yaşayış kompleksinin həyətində saxlamaq istəyib. Lakin binanın mühafizəçisi ona icazə verməyib. Həmin xanım kiməsə zəng edərək mühafizəçidən şikayətlənib. Az sonra qara ``AA`` dövlət nömrə seriyalı ``Mercedes`` markalı avtomobillə iki nəfər həmin yerə gəlib. Onlar mühafizəçini huşunu itirənədək döyüb, sonra isə maşına əyləşərək ərazini tərk ediblər. Yerdə qan içərisində olan mühafizəçini təcili yardım maşını xəstəxanaya aparıb. Məlumat saytda yayımlanandan sonra məsələ Daxili İşlər Nazirliyinin rəhbərliyi tərəfindən nəzarətə götürülüb. Məlum olub ki, mühafizəçini döyən şəxs elə sifarişi verən qadının əridir. Qadının əri hadisədən sonra həbs olunub. Məsələ ilə bağlı Səbail Rayon Polis İdarəsindən açıqlama almaq mümkün olmadı. Həbs olunan şəxsin adı açıqlanmasa da, o, yüksək vəzifəli şəxslərlə yaxın əlaqələrə malikdir. Faktinfo.az

3 Oktyabr 2016 12:39

Rusiyadan gələn pullarda kəskin azalma

Rusiya Mərkəzi Bankı bank köçürmələri yolu ilə bu ilin birinci yarısında MDB respublikalarına pul köçürmələrinin həcmini açıqlayıb. Mərkəzi Bankın məlumatına əsasən Rusiyada əmək fəaliyyəti ilə məşğul olan azərbaycanlı miqrantlar ilin ikinci kvartalının yekunlarına əsasən vətənə cəmi 203 milyon dollar göndəriblər. Bu göstərici üzrə özbək miqrantlar liderdir, onlar göstərilən müddət ərzində Özbəkistana 696 milyon dollar göndəriblər. Sonrakı yerdə Tacikistan (495 milyon dollar), Qırğızıstan (487 milyon dollar) gəlir. Ermənistana isə Rusiyadan 179 milyon dollar daxil olub. Başqa sözlə, bütün MDB respublikalarına Rusiyadan göndərilən pullar kəskin azalıb. Müqayisə üçün qeyd edək ki, təkcə 2013-cü ildə özbək əmək miqrantları Özbəkistana 6.6 milyard dollar göndərmişdilər. Rusiya Mərkəzi Bankının açıqladığı rəqəmlər bu ölkəyə qazanc dalınca gedənlərdən Azərbaycana daxil olan pulların dollar ekvivalentində ilbəil azaldığını göstərir. Belə ki, azərbaycanlı miqrantlar 2014-cü ildə vətənə 1.3 milyard dollara yaxın pul göndərmişdilər. 2015-ci ildə isə bu göstərici iki dəfə aşağı düşərək 650 milyon dollara yaxın olub. Bunun əsas səbəbi Rusiya rublunun dollar qarşısında kəskin dəyər itirməsi və bu ölkədə iqtisadi şərtlərin ağırlaşmasıdır. Bu il isə belə görünür ki, azərbaycanlı miqrantların vətənə göndərdikləri pulun həcmi 400 milyon dollar həndəvərində olacaq. Lakin indiki azalmada rublun dəyərdən düşməsinin təsiri daha azdır. Çünki 2014-cü ilin sonunda rubl təxminən iki dəfə dəyər itirdikdən sonra əsasən sabitləşib və hazırda Rusiya milli valyutasının kursunda kəskin sıçrayışlar baş vermir. Azalmanın əsas səbəbi Rusiyadakı iqtisadi durğunluq və əhalinin gəlirlərinin kəskin azalmasıdır. Doğrudur, Rusiyadan göndərilən pullar Azərbaycanın ÜDM-ində Tacikistan kimi az qala 50 faizlik paya malik deyildi, bununla belə azərbaycanlı miqrantların vətəndəki yaxınlarına göndərdikləri pullar əhalinin gəlirlərində hiss olunacaq rol oynayır. Bu baxımdan azalmanın Azərbaycan iqtisadiyyatında təsirləri də özünü göstərməkdədir…

30 Sentyabr 2016 5:38

Məktəbdə 1-ci sinif şagirdi döyüldü – Qadınlar əlbəyaxa oldu

Dünən orta məktəblərin birində qadınlar arasında dava olub. Hadisə Səbail rayonu ərazisində yerləşən 51 saylı orta məktəbin inzibati binasında baş verib. Məktəbdə nəzartçisi işləyən qadınla şagirdin anası əlbəyaxa olub. Hər iki qadının xəsarət aldığı qeyd olunur. Məktəbin işçisi tərəfindən döyüldüyünü iddia edən Ağamalıyeva Ramella hadisənin necə baş verdiyini bizə danışıb. “ Qızımı məktəbə aparırdım. Qızım Ayan 51 saylı orta məktəbin binasında yerləşən 10 saylı Zəngilan məktəbində 1-ci sinfə gedir. Səhər dərsə gətirəndə məktəbin qapısında dayanan nəzarətçi qadın uşağı itilədi ki, tez keçsin. Həmin vaxt uşağın başı qapıya dəydi. Özü də qapı ilə divarın arasında sıxılıb qaldı. Bu mənim acığıma gəldi.Qadına etiraz edəndə mənə hücum çəkdi. Bunu bütün valideynlər də gördü. Uşağım qorxudan ağlayırdı. Bir ana kimi buna necə dözərdim? Ona görə də əlbəyaxa davamız oldu. Hadisə ilə bağlı artıq polisə müraciət etmişəm.Özümə də xəsarətlər yetirib.” Mübahisənin baş verdiyi 51 saylı orta məktəbin direktor müavini ilə əlaqə saxladıq. Kifayət müəllimənin sözlərinə görə, hadisə onların məktəbinin inzibati binasında baş versə də, bunun 51 saylı orta məktəbə aidiyyatı yoxdur. Çünki, 10 saylı Zəngilən məktəbinin bəzi sinifləri onların məktəbinin binasında dərs keçir. Mübahisə edənlər də məhz o məktəbin şagirdinin valideyni olub.Direktor müavininin sözlərinə görə, valideyn məktəbin işçisinə ciddi xəsarət yetirib.Artıq bununla bağlı həkimin rəyi də alınıb.

30 Sentyabr 2016 10:38

BTRİB-in həbsdəki baş direktorundan sensasion çıxış –Sabiq nazir hədəfə gətirildi

Bu gün Bakı Ağır Cinayətlər Məhkəməsində "Bakı Telefon Rabitəsi" İstehsalat Birliyinin Nizami telefon qovşağının rəisi olmuş Fətullah Seyidov və keçmiş baş mühasibi Rəşad Məmmədovun cinayət işi üzrə məhkəmə prosesi davam etdirilib. Hakim Əhməd Quliyevin sədrliyi ilə keçirilən prosesdə ilkin baxış iclası baş tutub. Dövlət ittihamçısı ittiham aktını elan edib. Bildirilib ki, adıçəkilən şəxslər dövlət büdcəsini 752 min manat mənimsəməkdə, tenderlərdə qanunsuz yollarla öz yaxın adamlarının şirkətlərini qalib etməklə vəzifə saxtakarlığı etməkdə ittiham edilirlər. Təqsirləndirilən şəxslərin hər ikisi özünü qismən təqsirli bildiyini deyib. Vəkillər müdafiə etdikləri şəxslərin ev dustaqlığına buraxılması barədə vəsatət veriblər. Hakim vəsatətin təmin edilmədiyini bildirib. F.Seyidov sərbəst ifadə verərək deyib ki, müvafiq olaraq yuxarı instansiyadan aldığı əmrə uyğun olaraq işləyib: "İttihamda yazılan qədər pul mənimsəməmişəm, amma atamdan qalan mirasları satıb, bunu ödəmişəm. Mən, ürək xəstəsiyəm". R.Məmmədov sərbəst ifadəsində tenderlərdə qalib gələn şirkətlərin kimə məxsus olduğunu bilmədiyini deyib: "Bizim qovşağın xüsusi bank hesabı olsa da, oradan özümüz pul çıxara bilmirdik. Bakı Telefon Rabitəsi İstehsalat Birliyinin rəsmi məktubla icazə alırdıq. Sadəcə rəhbərliyin göstərişi ilə saxta sənədlərə qol çəkmişəm. Heç bir məbləği mənimsəməmişəm. Sadəcə bayramda, toya gedəndə rəis 100-200 manat verirdi, bu da mükafat idi". Prosesə BTRİB-in hazırda həbsdə olan keçmiş sədri Beytulla Hüseynov şahid qismində ifadə verib. O, uzun müddət rabitə sahəsində işlədiyini və bir çox mükafatlara layiq görüldüyünü deyib: "Gördüyümüz işlər də dövlət proqramına salınan işlərdir. Nazirliyin tapşırdığı işləri görmüşük. Hamı bilir ki, Azərbaycanda paket sistemi var, hamıya da verilib. Tenderlər üçün lazım olan məbləğin 20-25 faiz şişirdilməsini mən yox, nazirlik qovşaq rəislərinə tapşırırdı". BTRIB-in həbsə olan sabiq baş mühasibiAnar Mustafayevdə şahid qismində ifadə verib. O, deyib ki, rəhbərliyin tapşırığı nə olubsa, həmin işi də icra ediblər: "Mən nə Fətullah Seyidova, nə də Rəşad Məmmədova pul vermişəm. Təmir-tikinti şirkətləri ilə danışıqları biz özümüz həll edirdik, bundan qovşaq rəislərinin xəbəri yox idi". Hazırda həbsdə olan, "3 nömrəli Rabitə Təmir Tikinti", "Rabitə Mülki Tikinti" MMC-lərinin sabiq direktoru Emin Məmmədovtəqsirləndirilən şəxslərdən yalnız F.Seyidovu tanıdığını deyib: "Qovşaqlar üçün tikinti işləri görürdük, lazım olan pulu 5-10 faiz artırırdıq. Bu da öz xərcimiz üçün idi". Daha sonra şahid qismində "Bakı Rabitə Təmir Tikinti" və "Təmir Təchizat Servis" MMC-lərinin sabiq direktoru Bayram Vəliyev, Qulu Namazov, Yaşar Nəzərəliyev və digərləri ifadə veriblər. Məhkəmə prosesi oktyabrın 6-da davam etdiriləcək.

29 Sentyabr 2016 5:18

“8-ci kilometr bazarı” Çovdarovun qızına necə verilib?

Bakıda «8-ci kilometr» adlanan ərazidə, konkret olaraq, Nizami rayonu, Naxçıvanski küçəsi, 50 ünvanında meyvə-tərəvəz bazarı var. Sən demə, bu məşhur meyvə-tərəvəz bazarı elə məşhur generalların da yaxınlarına məxsus imiş – keçmiş milli təhlükəsizlik nazirinin müavini Hilal Əsədovun həyat yoldaşı Nüşabə Əsədova və nazirliyin Energetika və Nəqliyyat Sahələrində Təhlükəsizlik Baş İdarəsinin keçmiş rəisi Akif Çovdarovun qızı Aidə Qasımovaya. Bazarın səhmləri hərəyə 50 faiz olmaqla, adları çəkilən xanımlar arasında bölüşdürülüb. 2015-ci ilin oktyabrında keçmiş MTN ətrafında baş verən hadisələrdən sonra həbs olunan və hazırda Bakı Hərbi Məhkəməsində mühakimə edilən Akif Çovdarova verilmiş ittihamlar arasında bu bazarın ələ keçirilməsi də var. İttihama görə, bazarı 2005-ci ilin dekabrında sahibi, «Maral-Veqa» MMC-nin təsisçisi Cəfər Səfərovun əlindən zorla alıblar. ADAMI APARIB BAŞA SALMAĞI TAPŞIRIB Cinayət işinin materiallarında yazılıb ki, 2005-ci il dekabrın 16-da bazarın giriş qapısı ilə üzbəüzdə yerləşən «Maral-Veqa» MMC-nin ofisinə MTN əməkdaşları silahlı basqın ediblər. Həmin vaxt Cəfər Səfərov ofisdə olmadığından onun qardaşı Qəhrəman Səfərovu, bazarın mühasibi Akif Əzimovu və direktoru Əyyub Novruzovu aparıblar. Onlar MTN-ə çatan kimi Akif Çovdarov Cəfər Səfərova zəng vurub, ondan nazirliyə gəlməyi tələb edib. Qorxuya düşən Cəfər Səfərov Bakıdan kənarda olduğunu desə də, Akif Çovdarov onun yalan danışdığını bildirib: «Yalan demə, bu dəqiqə sən «Elit»in qabağındasan…». Nazirliyə gedən Səfərovu Akif Çovdarovun otağına aparıblar. Həmin vaxt ofisdən aparılan üç nəfər də kabinetdə imiş. Çovdarov Səfərova deyib ki, keçmiş iqtisadi inkişaf naziri Fərhad Əliyevlə həmyerli olduğundan, bazarı da onlar üçün o alıb. Həmin vaxt Fərhad Əliyev iki ay idi ki, həbs olunmuşdu və o da MTN-in istintaq təcridxanasında saxlanılırdı. Cəfər Səfərov Fərhad Əliyevlə heç bir əlaqəsi olmadığını, bazarı 2002-ci ildə Çingiz Əsədov adlı şəxsdən 240 min dollara aldığını, hətta həmin pulun 120 min dollarını bankdan kredit götürüb, bazarı girov qoyduğunu, alqı-satqı müqaviləsinin də metronun «Neftçilər» stansiyasının yaxınlığındakı notariusda bağlandığını deyib. Bu zaman Çovdarov əsəbiləşib və işçilərinə bu adamı aparıb «başa salmağı» tapşırıb. Təxminən 4 saat onu qaranlıq otaqda saxlayıb, döyəndən sonra yenidən Çovdarovun kabinetinə qaytarıblar. Bu dəfə ona bildirilib ki, məsələdən nazir Eldar Mahmudovun da xəbəri var və onun göstərişi ilə bura gətirilib, 500 min dollar verib, azadlığa buraxıla bilər. Pulu gətirmək üçün həmin axşam Cəfər Səfərov və digər üç nəfəri buraxıblar. 70 MİN DOLLARDAN ARTIQ KREDİT GÖTÜRÜB Ertəsi gün Akif Çovdarov onunla yenidən əlaqə saxlayıb, bu dəfə bazarı təhvil verməyi tələb edib. Cəfər Səfərov bazarı verməkdən imtina edib, deyib ki, götürülmüş kredit tam ödənilmədiyindən əmlak hələ də bankda girovdur. Akif Çovdarov onu və qardaşlarını iynə ilə iflic etdirməklə, həbslə hədələyib. Hədələrdən qorxan Cəfər Səfərov bazarı təhvil verməyə razılaşıb. Dekabrın 20-də Akif Çovdarov şəxsən onunla birlikdə banka gedərək, 70 min dollardan bir qədər artıq krediti ödəyib və bazarın da daxil olduğu «Maral-Veqa» MMC-nin banka borcu olmaması barədə arayış alıb. Ardınca da Dövlət Əmlak Komitəsinə gediblər. Orada Çovdarov kiminləsə telefonla danışıb və sənədləri ona təhvil verib. Təxminən yarımsaat sonra əmlakın üzərində həbs olmadığını təsdiqləyən sənədi gətirib Çovdarova veriblər. Oradan da çıxıb notariusa gediblər. Notariat kontorunda meyvə-tərəvəz bazarı Eldar Mahmudovun, Akif Çovdarovun yaxın adamı kimi tanınan Qulu Cəfərov adlı şəxsə təhvil verilib. Ertəsi gün Akif Çovdarovun keçmiş qonşusu, ona yaxın adamlardan sayılan Elşən Hüseynovla nazir müavini Hilal Əsədovun qayınatası Ənvər Məmmədov bazara gəlib və işçilərə bildirilib ki, bundan sonra bazarı bu adamlar idarə edəcək. Elə bir müddət sonra bazarın səhmləri də Qulu Cəfərovdan Elşən Hüseynov və Ənvər Məmmədovun adına keçib. Ardınca Ənvər Məmmədov 50 faizlik payının 49-unu Nüşabə Əsədovaya verib, Elşən Hüseynovun 50 faizlik payının hamısı isə Çovdarovun qızı Aidə Qasımovanın adına keçib. BAZARI QAYINATASI ALIB VƏ XANIMINA BAĞIŞLAYIB Səfərov qardaşları Akif Çovdarovla üzləşdirilib və onlar hadisənin məhz bu cür olduğunu üzləşmədə də deyiblər. Əlavə ediblər ki, bazar əllərindən alınandan sonra bir neçə dəfə onu geri qaytarmağa cəhd göstəriblər, müxtəlif orqanlara, o cümlədən Çovdarovun özünə şikayət ediblər. Amma nəticəsi olmayıb. Çovdarov hər şikayətdən sonra onları həbs etdirməklə, «yox etdirmək»lə hədələyib. Akif Çovdarov və Hilal Əsədov isə bazarın zorla ələ keçirilməsi ittihamı ilə razılaşmır. AzadlıqRadiosunun əldə etdiyi məlumata görə, Hilal Əsədov bu məsələ ilə əlaqədar prokurorluqda dindirilib. O da Səfərov qardaşlarını «Fərhad Əliyevin yaxın adamları» kimi təqdim edib. Dediyinə görə, 2005-ci ilin axırlarında Akif Çovdarov onun yanına gəlib və Çingiz Əsədov adlı şəxsin sahibi olduğu bazarın 2002-ci ildə əlindən alınması barədə MTN-ə şikayət etdiyini məruzə edib. Hilal Əsədov ifadəsində bildirib ki, ümumiyyətlə, bu məsələ ilə əlaqədar ona bir gündə bir neçə dəfə məruzə olunub. Məruzələrdən birində Akif Çovdarov deyib ki, «Səfərov qardaşları öz əməllərini etiraf ediblər». Hilal Əsədovun sözlərinə görə, o da öz növbəsində bazarla bağlı bütün məlumatları Eldar Mahmudova məruzə edib. Əsədovun iddiasına görə, 1-2 günlük araşdırmalardan sonra Səfərov qardaşlarının bazarı 2002-ci ildə zorla ələ keçirdiyi müəyyənləşdirilib, qardaşlardan biri Akif Çovdarovun yanında olarkən bazarı geri qaytarmağa razılıq verib, Çingiz Əsədov da ərizəsini geri götürməyə razılaşıb. Sonradan bazar satılıb və qayınatası Ənvər Məmmədov onun bir hissəsini almaq istəyib. O da qayınatasına pulun bir hissəsini borc verməklə ona kömək edib. Bir qədər də keçəndən sonra qayınatası 50 faizlik payının 49-nu onun xanımı Nüşabə Əsədovaya bağışlayıb. «BARIŞMALARINI TƏKLİF ETDİM» Akif Çovdarov da iddia edir ki, bazarı Səfərov qardaşlarından zorla almaları barədə deyilənlər yalandır. Cəfər Səfərov bazarın əvvəlki sahibi Çingiz Əsədovun şikayəti əsasında MTN-ə çağırılıb. «Şəxsən özüm onlara barışmalarını, bu məsələni öz aralarında həll etmələrini təklif etdim», – deyib Çovdarov. Onun sözlərinə görə, həmin vaxt Çingiz Əsədov bazarı Səfərov qardaşlarından 300 min dollara geri almağa və şikayətindən imtina etməyə razılaşıb, amma sonradan deyib ki, bu qədər pulu yoxdur və bazarı geri ala bilmir. «Ona görə də bu məsələ MTN rəhbərliyinə məruzə olundu. Həmin bazar, əslində, Fərhad Əliyevin olduğundan, rəhbərlik bazarı tərəflərin hər ikisinin (Cəfər Səfərov və Çingiz Əsədovun) halallığı alınmaqla, mən və Hilal Əsədovun pulu ödəyib bazarı satın almağımızı təklif etdi», – Çovdarov əlavə edib. AzadlıqRadiosunun əldə etdiyi məlumata görə, Hilal Əsədovun həyat yoldaşı Nüşabə Əsədova, qayınatası Ənvər Məmmədov, Akif Çovdarovun qızı Aidə Qasımova, kürəkəni Rövşən Qasımov da bu məsələ ilə əlaqədar prokurorluqda dindirilib. Məlumatda bildirilir ki, Nüşabə Əsədova və Aidə Qasımova bazara necə sahib olmaları barədə ətraflı informasiyaları olmadığını, sadəcə, səhmlər adlarına keçirilərkən müəyyən sənədlərə qol çəkdiklərini bildiriblər. A.Çovdarov və digərlərinə vəzifə səlahiyyətlərindən sui-istifadə, rüşvət alma, mənimsəmə, qanunsuz silah saxlama, hədə-qorxu ilə pul tələb etmə və digər ağır maddələr ilə ittiham irəli sürülüb. Ötən ilin oktyabrında milli təhlükəsizlik naziri Eldar Mahmudov işdən çıxarılıb. Bunun ardınca da nazirliyin 20-yə yaxın yüksəkçinli əməkdaşı həbs olunub. Dekabrda isə nazirlik ləğv edilib, bazası əsasında Dövlət Təhlükəsizliyi Xidməti və Xarici Kəşfiyyat Xidməti yaradılıb.

29 Sentyabr 2016 3:34

Fakt

Bizi izləyin