Bakıda xəstəlik aşkarlanan uşaqların sayı açıqlandı

publika-az1471935180xerceng_xesteliyi

Bakı şəhər Baş Səhiyyə İdarəsinin tabeliyində olan 55 ambulator - poliklinik tibb müəssisəsi tərəfindən 730606 nəfər uşaq əhalisinə tibbi xidmət göstərilir. Səhiyyə Nazirliyinin mətbuat xidmətindən  verilən məlumata görə, yekun statistik məlumatlara əsasən uşaqlar arasında ilkin xəstəliklərin sayı 2014-cü ilə nisbətən bir qədər azalıb və bu xəstəliklərin 25%-i məhz icbari tibbi müayinələr zamanı aşkar olunub.2016-cı ilin 11 ayı ərzində uşaq poliklinikaları tərəfindən icbari tibbi müayinədən keçirilməsi planlaşdırılan 679420 nəfər uşaqdan 633936 nəfər uşaq (93%) müayinəyə cəlb edilib.Cari ilin 11 ayı ərzində müayinəsi nəzərdə tutulmuş 0-5 yaşda olan 224967 uşaqdan 209071 nəfəri (93%) profilaktik müayinədən keçib ki, onların 24%-i mütəşəkkil, 76%-i isə qeyri mütəşəkkil qrupa aiddir. Müayinə edilmiş 0-5 yaş uşaqlardan 6318 uşaq (3%) dispanser qeydiyyata alınıb və ambulator müalicəyə cəlb olunub. Cari ilin 9 ayı ərzində dispanser qeydiyyatda olan 0-5 yaş xəstə uşaqlar arasında sağalma ilə dispanser qeydiyyatdan çıxarılma (dispanser effektivlik) 67 % təşkil edir.6-13 yaşda olan 320962 uşaqdan 302354 uşaq (94%) müayinə olunub. Onlardan 90%-i məktəblilər təşkil edir. Aparılan müayinələr nəticəsində 7921 uşaq (2.6%) müxtəlif xəstəliklərlə əlaqədar dispanser qeydiyyata alınmış və ambulator müalicəyə cəlb edilib.14-17 yaşda olan 133491 uşaqdan 122511 uşaq (92%) müayinə olunub. Onlardan 93%-i məktəblilər təşkil edir. 4110 uşaq (3,3%) müxtəlif xəstəliklərlə əlaqədar dispanser qeydiyyata alınıb və ambulator müalicəyə cəlb edilib.Müayinələr nəticəsində xəstəlik aşkar edilmiş 52323 nəfər (8.3%) uşaqdan 18349 nəfəri (35%) dispanser qeydə alınıb, 1295 nəfər (2,5%) ixtisaslaşmış yardım alması üçün stasionara hospitalizə edilib, qalanları isə ambulator müalicəyə cəlb olunub.Aparılan ambulator müalicələr nəticəsində qeydiyyatda olan dispanser xəstələrin 62 %-i sağalma ilə dispanser qeydiyyatdan çıxarılıb.

27 Dekabr 2016 2:30

Apteklərə xəbərdarlıq edildi

apte

  Kənd Təsərrüfatı Nazirliyi yanında Dövlət Baytarlıq Nəzarəti Xidməti (DBNX) şəffaflığı təmin etmək üçün bir sıra addımlar atıb. Qurumun mətbuat xidmətindən Trend-ə verilən məlumata görə, Dövlət baytarlıq nəzarətində hüquqi və fiziki şəxslərə müvafiq xidmətlərin elektron formada göstərilməsi, heyvan və quşlar arasında aparılan epizootik tədbirlərin həyata keçirilməsində şəffaflığın təmin edilməsi istiqamətində bir sıra tədbirlər həyata keçirilib. Dövlət baytarlıq nəzarətində olan yüklərin, o cümlədən heyvan və heyvan mənşəli yüklərin, baytarlıq preparatları, yem və yem əlavələrinin idxal–ixracı zamanı rəyin verilməsi, eləcə də baytarlıq preparatları, yem və yem əlavələrinin dövlət reyestrinə alınması elektron formada həyata keçirilir. Həmçinin sənədlərin qəbulu elektron formada vətəndaşların iştirakı olmadan qəbul edilir və cavablandırılır. Müvafiq sənədlərin Dövlət Gömrük Komitəsinə ötürülməsi üçün Komitə ilə Xidmət arasında Vahid Avtomatik İnformasiya Sistemi (VAİS) yaradılıb. Dövlət büdcəsi hesabına alınan baytarlıq preparatlarının istifadəsində şəffaflığı təmin etmək məqsədilə 2017-ci il üçün heyvanlar və quşlar arasında epizootiya əleyhinə profilaktika və diaqnostika tədbirlər planına uyğun olaraq istifadə olunacaq biopreparatların, dezinfeksiya, dezinseksiya və müalicəvi dərman preparatlarının üzərində "SATILA BİLMƏZ” sözləri yazılıb. Dövlət büdcəsi vəsaiti hesabına alınmış baytarlıq preparatlarının istifadəsinin tənzimlənməsi, şəffaflığın təmin edilməsi və nəzarətin gücləndirilməsi məqsədi ilə rayon(şəhər) baytarlıq idarələrinə müvafiq tapşırıqlar verilib. Həmin tapşırıqlarda baytarlıq preparatlarının sahə baytarlıq məntəqələrinə bölgüsünə, onların yerlərdə tətbiqinə rayon (şəhər) baytarlıq idarələri tərəfindən ciddi nəzarət edilıməsi, dövlət büdcəsi vəsaiti hesabına alınmış və üzərində "SATILA BİLMƏZ” sözləri yazılmış biopreparatlar, dezinfeksiya, dezinseksiya və müalicəvi dərman preparatlarının özəl baytarlıq aptekləri, baytar həkimləri, digər fiziki və hüquqi şəxslər tərəfindən satışına qəti şəkildə yol verilməməsi, dövlət büdcəsi vəsaiti hesabına alınmış və üzərində "SATILA BİLMƏZ” sözləri yazılmış preparatların işlədilməsi zamanı epizootik və ambulator kitablarda qeydiyyatının aparılaraq istifadə edilməsi tapşırılıb. Baytarlıq idarələrinə göndərilən müvafiq tapşırıqda, eləcə də Xidmətin əməkdaşları tərəfindən reydlər aparılan zaman hər hansı rayon (şəhər) ərazisindəki özəl baytarlıq aptekində, fiziki və hüquqi şəxslərdə dövlət büdcəsi vəsaiti hesabına alınmış və üzərində "SATILA BİLMƏZ” sözləri yazılmış baytarlıq preparatları aşkarlanarsa bu işdə məsuliyyəti olan şəxslər haqqında ciddi inzibati cəza tədbirləri görüləcək.

23 Dekabr 2016 10:36

Dərmanların qiyməti dolların satış məzənnəsinin yuxarı həddi nəzərə alınaraq tənzimlənəcək

d%c9%99rman

Dərmanların qiymətinə yenidən baxılması ilə əlaqədar 2 aylıq müddət şərti ləğv edilib, özəl xəstəxanalara daha aşağı qiymətə dərmanlar almaq hüququ verilib Nazirlər Kabineti “Dövlət qeydiyyatına alınmış dərman vasitələrinin qiymətlərinin tənzimlənməsi və həmin qiymətlərə nəzarətin həyata keçirilməsi Qaydası”na dəyişikliklər edib.Qaydaya əsasən Səhiyyə Nazirliyi tərəfindən dövlət qeydiyyatına alınaraq “Azərbaycan Respublikasının dərman vasitələrinin Reyestri”nə daxil edilmiş dərman vasitələrinin qiymətləri Tarif (qiymət) Şurası tərəfindən tənzimlənir.Dövlət qeydiyyatına alınmış dərman vasitələrinin topdan və ya pərakəndə satışı Tarif (qiymət) Şurası tərəfindən müəyyən edilən qiymətlərlə həyata keçirilir. İndiyə qədər dərman vasitəsinin ölkədaxili topdansatış əczaçılıq müəssisəsinə şərti satış qiyməti qiymət bəyannaməsi verilən tarixə ABŞ dollarının Mərkəzi Bankın rəsmi internet saytındakı məzənnəsi və nəzarət markasının qiyməti nəzərə alınmaqla bazis qiymət əsasında hesablanan qiymət olub. Dəyişikliyə əsasən dərman vasitəsinin ölkədaxili topdansatış əczaçılıq müəssisəsinə şərti satış qiyməti Şura tərəfindən istinad üçün müəyyən edilən tarixə milli valyutanın ABŞ dollarına olan rəsmi məzənnəsi, Mərkəzi Bank tərəfindən təsbit edilən satış məzənnəsi üçün yuxarı hədd və nəzarət markasının qiyməti nəzərə alınmaqla bazis qiymət əsasında hesablanan qiymət olacaq.Qaydaya əsasən dərman vasitəsinin topdan və pərakəndə satış qiymətləri Şura tərəfindən ƏDV daxil olmaqla təsdiq edilir. Növbəti dəyişiklik bu sahədə tələbin bütün vergi ödəyiciləri üçün mütləq olduğunu əks etdirir. Başqa sözlə, vergi ödəyicisinin sadələşdirilmiş vergi ödəyicisi və ya ƏDV ödəyicisi olmasından asılı olmayaraq, dərman vasitələrinin topdan və pərakəndə satışı həmin qiymətlərlə həyata keçiriləcək.Mövcud Qaydaya görə hazırda dərman vasitələrinin qiymətlərinin tənzimlənməsi və ya həmin qiymətlərdə dəyişikliklər edilməsi məsələsinə Şura tərəfindən rübdə bir dəfə baxılmalıdır. Şuranın öz təşəbbüsü ilə və ya bu Qaydada nəzərdə tutulmuş hallarda dərman vasitələrinin qiymətlərinin tənzimlənməsi məsələsinə Şura tərəfindən növbədənkənar qaydada baxılır. Milli valyutanın ABŞ dollarına olan rəsmi məzənnəsində 5 faizdən artıq dəyişmələr olduqda və bu hal 2 aydan artıq müddətdə davam etdikdə, Şuranın təşəbbüsü ilə qiymətlərə növbədənkənar qaydada yenidən baxılır. Dəyişikliyə əsasən dərmanların qiymətinə yenidən baxılması ilə əlaqədar 2 aylıq müddət şərti ləğv edilib. Başqa sözlə, Milli valyutanın ABŞ dollarına olan rəsmi məzənnəsində 5 faizdən artıq dəyişmələr olduqda, Şuranın təşəbbüsü ilə qiymətlərə növbədənkənar qaydada yenidən baxılacaq.Dərman vasitələrinin tənzimlənən topdansatış qiymətlərindən aşağı qiymət təklif olunmasına dair prosedur da dəyişib. Hazırda dövlət satınalmaları zamanı tənzimlənən topdansatış qiymətlərindən aşağı qiymət təklif oluna bilər. Dəyişikliyə əsasən isə artıq dövlət büdcəsindən maliyyələşdirilməyən tibb müəssisələri tərəfindən dərman vasitələri satın alınarkən də dövlət satınalmaları zamanı tənzimlənən topdansatış qiymətlərindən aşağı qiymət təklif oluna biləcək. (APA)

21 Dekabr 2016 9:58

Azərbaycana keyfiyyətsiz peyvəndlər gətirilir? – AÇIQLAMA

vaksin

“Bəzən dövlət qeydiyyatından keçməmiş dərman vasitələri ilə biz də qarşılaşırıq. Bu barədə lazımı orqanlara məlumat verilir”. Faktinfo.az bildirir ki, bu sözləri Səhiyyə Nazirliyinin Dərman Vasitələrinin Analitik Ekspertiza Mərkəzinin dərmanların keyfiyyətinə nəzarət inspeksiyasının rəisi Pərviz Əzizbəyov deyib.O, dərmanın dövlət qeydiyyatının olmamasının keyfiyyətsizlik kimi başa düşülməməli olduğunu bildirib: “Nadir hallarda rast gəlinən dərman vasitələri dövlət qeydiyyatı olmadan belə ölkəyə idxal edilə bilər. Bu barədə vətəndaşlar tərəfindən şikayətlər ola bilir. Lakin bir məqamı vurğulamaq istəyirəm ki, dərmanın dövlət qeydiyyatının olmaması saxta olması demək deyil. Əgər hər hansı dərman vasitəsinin keyfiyyəti və ya saxta olması ilə bağlı məlumat daxil olarsa, araşdırıb lazımı tədbirlər görürük. Son illər ərzində saxta dərman vasitəsilə bağlı bizə müraciət daxil olmayıb. Dərman vasitələrinin keyfiyyətinə nəzarət daşınma, idxal nəqliyyat məsələsi böyük rol oynayır. Artıq dərman vasitələrinin daşınması, idxalı ilə bağlı yeni qaydalar hazırlanıb. Hesab edirəm ki, dərman vasitələrinin idxalına nəzarət gücləndirilməlidir. Dərman vasitəsinin ev şəraitində saxlanması da, keyfiyyətə təsir edən amillərdəndir. Ölkəyə rəsmi yolla idxal edilən, keyfiyyəti təsdiq edilən dərman vasitələrinin üzərinə nəzarət markası vurulur. Nəzarət markasız satılmaya görə İnzibati Xətalar məcəlləsində maddələr nəzərdə tutulub”. P.Əzizbəyov ölkəyə peyvəndlərin üçüncü ölkələrdən idxal edilməsi və keyfiyyətin aşağı olması ilə bağlı fikirlərə də münasibət bildirib: “Dövlət tərəfindən təmin olunan peyvəndlər Ümumdünya Səhiyyə Təşkilatı tərəfindən tövsiyə edilən ölkələrdən alınır. Onların tövsiyə etmədiyi ölkələrdən peyvənd idxal edilmir. Saxta peyvəndlərlə bağlı Hindistanın adı çəkilsə də, bu fikirlə birmənalı razılaşa bilmərik. Çünki bu ölkənin yaxşı dərman istehsalçıları da var. Peyvəndlərin uşaqlara əlavə təsirlərinə gəldikdə, peyvənd bioloji maddədir, onun əks təsirlərinin olmasında genetik faktorlar, uşağın xəstə olması səbəb ola bilər. Peyvənddən sonra temperaturun yüksəlməsinə normal yanaşmaq lazımdır. Çünki peyvəndlər uşaqların bədənində xəstəliklər mübarizə üçün antitellər yaradır. Nəticədə uşaq xəstəliyi yüngül formada keçirir”.

20 Dekabr 2016 2:35

212 adda dərmanın idxalına QADAĞA QOYULDU

derman

Dərman vasitələrinin idxal-ekspertiza şöbəsinə il ərzində 27000-dən çox seriyada dərman vasitəsinin ölkəyə idxalı üçün müraciətlər olub. Faktinfo.az  xəbər verir ki, bu sözləri Səhiyyə Nazirliyinin Dərman Vasitələrinin Analitik Ekspertiza Mərkəzinin ekspertiza şöbəsinin müdir müavini Vəfa Əbilova bu gün keçirilən mətbuat konfransında deyib.Onun sözlərinə görə, onlardan 23000-dən çox dərman vasitələrinin idxalı zamanı təqdim edilmiş sənəd və nümunələrdə heç bir uyğunsuzluq aşkar olunmayıb, 4000-ə yaxın dərman vasitəsinin idxalı zamanı bəzi uyğunsuzluq müəyyən edilməyib: “3000-dən çox dərman vasitələrinin uyğunsuzluqları istehsalçı və idxalçı şirkətlər tərəfindən aradan qaldırılıb”.V.Əbilova onu da bildirib ki, dərman vasitələrinin keyfiyyətinin yoxlanılması laboratoriyası tərəfindən il ərzində 28000-ə yaxın dərman vasitəsinin analizi aparılıb: “Bunlardan 15000-dən çox dərman vasitəsi müsbət qiymətləndirilib, 5 adda dərman vasitəsinin keyfiyyət göstəriciləri dövlət qeydiyyatı zamanı təsdiqlənmiş normativ sənədlərə uyğun olmadığına görə idxalına icazə verilməyib. Bu da öz növbəsində toplam olaraq 33534 ədəd qablaşdırma nəzərdə tutur. 1000-dən çox normativ sənəd hazırlanaraq təsdiq olunub. Həmçinin laboratoriyada saf su alınma sistemi quraşdırılmayıb”. O qeyd edib ki, 212 adda dərmanın idxalına qadağa qoyulub.

20 Dekabr 2016 12:18

Səhiyyə Nazirliyindən yeni tələbləri pozan həkimlərlə bağlı AÇIQLAMA

bash-hekim

Səhiyyə Nazirliyi (SN) həkimlər tərəfindən 2015-ci ilin noyabrın 6-dan etibarən qüvvəyə minən qərarın tələblərinin pozulmasına - reseptlərdə dərmanların təsiredici maddəsinin adının deyil, onun ticarət adının yazılmasına münasibət bildirib. Nazirliyin Analitik Ekspertiza Mərkəzinin direktoru Murad Süleymanov Trend-ə deyib ki, Səhiyyə Nazirliyi Kollegiyasının 21.10.2015-ci il tarixli 57 nömrəli qərarı ilə təsdiqlənmiş “Aptek təşkilatlarından dərman vasitələrinin buraxılması Qaydaları”na əsasən, həkimlər xəstələrə resept yazarkən dərman vasitəsinin ticarət adını deyil, beynəlxalq patentləşdirilməmiş adını (təsiredici maddə adını) qeyd etməlidirlər. Aptekə müraciət edən vətəndaşa əczaçı tərəfindən reseptdə göstərilən beynəlxalq patentləşdirilməmiş ada uyğun dərman vasitələri barədə məlumat verilməlidir. Vətəndaş isə reseptdə göstərilən beynəlxalq patentləşdirilməmiş ada və büdcəsinə uyğun olaraq, dərmanın seçimini qiymətə və istehsalçıya görə özü etməlidir.M.Süleymanov əlavə edib ki, həkimlərin bu qaydalara əməl etməməsi hallarını yalnız nəzarət tədbirləri zamanı aşkarlayıb aradan qaldırmaq mümkündür.Tibb müəssisələrinin SN tərəfindən təsdiqlənmiş resept blankları ilə təminatı məsələsinə toxunan M.Süleymanov deyib ki, dövlət müalicə-profilaktika müəssisələri yeni resept blankları ilə SN tərəfindən təmin olunurlar: "Özəl tibb müəssisələri isə yeni resept blanklarını Analitik Ekspertiza Mərkəzindən almalıdırlar. Yalnız bəzi özəl tibb müəssisələri tərəfimizdən edilən xəbərdarlıqlara baxmayaraq, hələ də yeni resept blanklarının alınması üçün Analitik Ekspertiza Mərkəzinə müraciət etməyiblər". Qeyd edək ki, 2015-ci ilin noyabrın 6-dan etibarən qüvvəyə minən qərara əsasən, reseptlərdə dərman vasitələrinin beynəlxalq patentləşdirilməmiş adı, yəni dərmanın təsiredici maddəsinin adı yazılmalıdır. Təyin edilmiş dərman vasitəsinin beynəlxalq patentləşdirilməmiş adı olmadığı halda (3 və daha artıq tərkibli, bioloji oxşar dərman vasitələri qrupuna aid olduqda) resept blankında onun ticarət adı yazılmalıdır. Bu tələblərin tətbiqində məqsəd həm də həkimlərlə əczaçılıq şirkətləri arasında olan "sövdələşmənin" qarşısını almaqdır.

20 Dekabr 2016 11:41

Dərmanlar niyə təsirsizdir? –Nazirlik açıqlama verdi

derman-44

Səhiyyə Nazirliyi ölkədə satılan dərmanların keyfiyyətinin əvvəlki illərlə müqayisədə aşağı, müalicə üçün təsirsiz olması, bütün bunların isə sifarişçi şirkətlərin istəyi ilə Azərbaycana gətirilən dərmanların əsas təsiredici maddəsinin miqdarının azaldılması ilə bağlı olması barədə səslənən iddialara münasibət bildirib. Məsələ ilə bağlı Trend-ə açıqlama verən Azərbaycan Səhiyyə Nazirliyi Analitik Ekspertiza Mərkəzinin direktoru Murad Süleymanov dərmanların müalicəvi təsirinin bir çox amillərdən asılı olduğunu bildirib. Onun sözlərinə görə, hər hansı bir dərmanın effektli və ya effektsiz olması klinik tədqiqatlar nəticəsində müəyyən edilir: "Dərmanların təsirli olması hallarının ¼-i insanın psixoloji halından, yəni müalicəyə, müalicə həkiminə inamından, müalicə rejiminə nə dərəcədə əməl etməsindən, həyat tərzindən asılıdır. Ümumiyyətlə, demək olar ki, dərman vasitələri plasebodan 1,3 dəfə daha çox müalicəvi təsir göstərir. Bu faktorlara cins, yaş, irq və genetik faktorlar da aiddir. Genetik faktorlar çox böyük rol oynayır. Hətta artıq dünyada farmakogenetik faktorların araşdırılmasına başlanılıb. Yəni genetik faktorlardan asılı olaraq, dərmanların effektivliyi fərdi xarakter daşıyır. Bəzi millətlər və irqlər üçün effektli olan dərmanlar başqa bir irq və millət üçün effektsiz ola bilər. Hər bir dərman preparatının effektivliyi həm də dozanın düzgün seçilməsindən asılıdır". M.Süleymanov qeyd edib ki, bu aşağı effektin "Azərbaycana gətirilən dərmanlardakı tərkiblərin miqdarının azaldılması" ilə əlaqədar olması fikri ilə razılaşmaq olmaz. Çünki ölkəyə gətirilən hər bir preparatın standart dozası olur ki, bu da dünya üzrə qəbulediləndir.Mərkəz direktoru bildirib ki, doza yüksək və ya aşağı ola bilər. Bu isə dərmanın qutusunda və istifadə üçün təlimatda açıq qeyd edilir: “Hər bir xəstə üçün doza həkim tərəfindən fərdi seçilir. Dərmanların təsirsiz olması fikri fərdi bir fikirdir. Təbii ki, 10 000 istifadə olunmuş dərmandan 100-ü təsirsiz ola bilir. Bu faizlərin hesablanması üçün həkimlərimiz və pasiyentlər mərkəzimizə dərmanın effektsiz olması barədə məlumat verə bilərlər. Bu halda elmi əsaslı tədqiqatlar aparılar və dərmanın həqiqətən effektsizliyi sübut olunduqda həmin dərman ləğv edilə bilər. Təbii ki, yalnız saxta və ya qeydiyyatsız dərmanlarda bu deyilənlər – təsiredici maddənin miqdarının dərmanın qutusu üzərində və istifadə üçün təlimatda normal göstərildiyi, lakin tərkibdə faktiki olaraq az olması fikri doğru ola bilər”. Beynəlxalq standartlara (İSO 17025) cavab verən laboratoriyalarında miqdari təyinatların aparıldığını deyən M.Süleymanov əlavə edib ki, qeydiyyatdan keçmiş bütün dərman vasitələrinin tərkibindəki təsiredici maddənin miqdarları tələblərə uyğundur.

19 Dekabr 2016 12:37

Apteklərin fəaliyyəti üçün YENİ TƏLƏBLƏR

aptek

Azərbaycan Səhiyyə Nazirliyi tərəfindən əczaçılıq müəssisələrinin yaradılmasını və fəaliyyətini tənzimləyəcək yeni tələblər hazırlanıb. Faktinfo.az-ın Trend-ə istinadən xəbərinə görə, bunu Nazirliyin Analitik Ekspertiza Mərkəzinin direktoru Murad Süleymanov deyib. M.Süleymanov bildirib ki, Azərbaycanda əczaçılıq fəaliyyəti “Dərman vasitələri haqqında”, “Lisenziyalar və icazələr haqqında” qanunları və Səhiyyə Nazirliyinin “Əczaçılıq fəaliyyəti sahəsində normativ sənədlərin təsdiq edilməsi barədə” 2 oktyabr 2006-cı il tarixli, 153 nömrəli əmri ilə tənzimlənir. Mövcud qaydaların qəbul olunmasından 10 ilə yaxın müddət keçdiyini deyən mərkəz direktoru qeyd edib ki, ötən müddətdə Ümumdünya Səhiyyə Təşkilatının və Beynəlxalq Əczaçılıq Federasiyasının dərman vasitələrinin istehsalı, saxlanması, daşınması, satışı zamanı dərman vasitəsinin keyfiyyəti, təhlükəsizliyi və effektivliyi üzərində nəzarət sahəsini tənzimləyən standartlarında yeniliklər baş verib. Bunları nəzərə alaraq əczaçılıq fəaliyyəti sahəsində mövcud normativ sənədlərin təkmilləşdirilməsi zərurəti yaranıb. M.Süleymanov əlavə edib ki, Nazirlər Kabinetinin bu il iyulun 10-da keçirilən iclasında Prezident İlham Əliyevin sosial-iqtisadi inkişaf sahəsində tapşırıqlarının icrasına dair hazırlanan “Tədbirlər Planı”na uyğun olraq, Analitik Ekspertiza Mərkəzi tərəfindən də “Tədbirlər Planı” tərtib edilib. “Tədbirlər Planı”na uyğun olaraq, əczaçılıq müəssisələrinin yaradılması və fəaliyyətini tənzimləyəcək yeni tələblər hazırlanıb. Ümumdünya Səhiyyə Təşkilatının və Beynəlxalq Əczaçılıq Federasiyasının müvafiq tövsiyələri əsasında hazırlanan “Etibarlı İstehsalat Təcrübəsi” (GMP), “Etibarlı Aptek təcrübəsi” (GPP), “Etibarlı distributor təcrübəsi” (GDP) və “Etibarlı saxlama təcrübəsi” (GSP) adlı yeni tələblər razılaşdırılmaq üçün yaxın vaxtlarda Standartlaşdırma, Metrologiya və Patent üzrə Dövlət Komitəsinə göndəriləcək.

13 Dekabr 2016 10:19

Bu dərmanları almayın! – Xəbərdarlıq

derman-1

  Uzun illər aparılan araşdırmalar nəticəsində alimlər, adları hamıya məlum olan bir sıra məşhur preparatların pasientlərin sağalmasına heç bir təsir göstərmədiyini müəyyən ediblər. Bu siyahıya liderliyi, yaxşı tanış olan "Arbidol" ("İmmustat"ın analoqu) edir. Bu dərman Şimali Koreya və keçmiş SSRİ ölkələrinin ərazisində 1974-cü ildə klinika şəraitində yoxlamadan keçirilib. Amma araşdırmalar göstərib ki, onun qrip virusları ilə mübarizədə heç bir effekti yoxdur. İkinci yerdə, bir çox pasientlərin "sevimli" dərmanı olan "Essensiale" gəlir. Bu dərman qara ciyəri öd ifrazı zamanı zədələnmələrdən və iltihabi proseslərdən qorumaq, həmçinin zədələnmiş hissələri bərpa etmək adı altında istehsal edilir. Bununla yanaşı, avropalı tibb işçiləri heç vaxt öz pasientlərinə «Xilak forte» və «Bifiform» tipli dərmanları yazmırlar. Çünki onların tərkibində emaldan dərhal sonra məhv olan ölü mikroorqanizmlər var ki, onlar da nəticədə orqanizmdəki 99% faydalı elementləri və mineralları məhv edir. Pankreatit və diabet zamanı istifadə olunan bütün pankreatinlərin də heç bir faydası yoxdur. Odur ki, son illərdə xüsusilə məşhur olan "Mezim forte"ni də unutmaq məsləhətdir. Faydasız dərmanlar sırasında, xüsusilə pensiyaçılar arasında populyar olan "Korvalol" da var. Tədqiqatçılar o qənaətə gəliblər ki, bu dərmanı ardıcıl olaraq qəbul etmək təhlükəlidir, çünki asılılıq yaradır. Eyni zamanda bu preparat koqnitiv və nevroloji pozulmaları inkişaf etdirir ki, nəticədə insan seksual funksiyalarının itirilməsi problemi ilə qarşılaşır. Nəhayət, öskürəyə qarşı populyar dərman vasitəsi olan "Qedeliks" öskürəyi müalicə etmək qabiliyyətinə malik deyil. Tərkibi, əsasən sarmaşıqdan ibarət olan bu preparatın öskürək və tənəffüs yolları xəstəliklərinin müalicəsində qeyri-effektiv olduğu aşkarlanıb. Alimlər bildiriblər ki, hazırda apteklərdə minlərlə dərman preparatları var ki, onların insanı narahat edən xəstəliklərin müalicəsinə heç bir təsiri yoxdur. Xüsusilə immuniteti artıran, qoruyucu və bərpaedici funksiyalarının olduğu söylənən dərmanların heç birinin orqanizmə müsbət effektiv təsiri yoxdur. Bu səbəbdən də, alimlər hesab edirlər ki, həkimlər ancaq birbaşa pasientlərin problemi ilə əlaqəli olan effektiv dərman vasitələrinə üstünlük verməlidirlər. Bunu yoxlamaq üçünsə, onların əlində laborator müayinələrdən başqa kifayət qədər imkan var. Belə ki, cəmi 3 xəstə üzərində eksperiment aparmaq kifayətdir ki, dərmanın xəstəliklə mübarizədə effektiv olub-olmadığını müəyyənləşdirsinlər. Sputnik  

9 Dekabr 2016 3:46

Ölkədə saxta və keyfiyyətsiz dərmanlar var – RƏSMİ

1433420223

"Dərman vasitələrinin keyfiyyəti və təhlükəsizliyi ölkəmiz üçün ən vacib və aktual məsələdir. Beynəlxalq mənbələrdə göstərilən məlumatlara əsasən, 2005-ci ildən saxta və keyfiyyətsiz dərman vasitələrinin dövriyyəsində 400% artım olub. Ümumdünya Səhiyyə Təşkilatının verdiyi məlumata görə, Asiya ölkələrində belə saxta və keyfiyyətsiz dərman vasitələrinin payı 30%-dir". Publika.az xəbər verir ki, bunu Səhiyyə Nazirliyi Analitik Ekspertiza Mərkəzinin direktoru Murad Süleymanov Trend-ə müsahibəsində deyib. Onun sözlərinə görə, bu cür dərman vasitələrinin ölkəmizə idxalının qarşısının alınması üçün bütün rəsmi idxal olunan dərman vasitələrinin seriyalar üzrə keyfiyyəti yoxlanılır: "Azərbaycanda olan qeydiyyatdan keçmiş dərman vasitələri keyfiyyəti yoxlanılmış, ekspertizası aparılmış və keyfiyyət standartlarına cavab verən dərman vasitələridir. Azərbaycanda qeydiyyata alınan dərman vasitələrinin 55,53 %-i Avropanın nüfuzlu dərman istehsalçıları olan şirkətlərin dərman vasitələridir. Xəstələrin müalicələrində istifadə olunan bütün dərman vasitələrinin keyfiyyətinə və təhlükəsizliyinə istehsalçıdan istifadəçiyə qədər bütün mərhələlərdə ciddi nəzarət tədbirləri həyata keçirilir. Dərman vasitəsinin keyfiyyətini və təhlükəsiz istifadəsini təmin etmək məqsədilə aparılan bütün fəaliyyətlər tərəfimizdən yoxlanılır və ona nəzarət edilir.M.Süleymanov deyib ki, dərman vasitələri hətta istifadə edildiyi zaman düzgün saxlanılmadıqda keyfiyyətini itirə bilər: "Təəssüf ki, ölkədə keyfiyyətsiz dərman vasitələri var ki, bunlar da Səhiyyə Nazirliyinin icazəsi olmadan, laborator yoxlamalardan keçməmiş, dövlət qeydiyyatına alınmamış, naməlum yollarla ölkəyə gətirilmiş dərman vasitələridir. Onlara qarşı mübarizədə hər bir vətəndaşımızın köməyi vacib və əhəmiyyətlidir. Aşkarlanan faktlar araşdırılır və onların aradan qaldırılması istiqamətində qanunvericiliyə uyğun tədbirlər görülür".

7 Dekabr 2016 12:25

Yanvarın 1-dən dərmanlarla bağlı yeni qadağa qüvvəyə minir –Nazirlik

derman-44

Gələn il yanvarın 1-dən etibarən istifadə təlimatı Azərbaycan dilində olmayan və Səhiyyə Nazirliyi Farmakoloji və Farmakopeya Ekspert Şurası tərəfindən təsdiqlənməmiş formada olan dərman vasitələrinin idxalına icazə verilməyəcək. Bunu Azərbaycan Səhiyyə Nazirliyi Analitik Ekspertiza Mərkəzinin direktoru Murad Süleymanov deyib. (Trend) Mərkəz direktorunun sözlərinə görə, bu barədə dərman vasitəsi idxalçıları və xarici istehsalçı müəssisələrin rəsmi nümayəndəliklərinə həm şifahi, həm də yazılı qaydada dəfələrlə xəbərdarlıq edilib. M.Süleymanov qeyd edib ki, bu məsələ ilə bağlı indiyədək dərman vasitəsi idxalçıları və xarici istehsalçı müəssisələrin rəsmi nümayəndəliklərindən narazılıq qeydə alınmayıb.O əlavə edib ki, istifadə təlimatı istehlakçının dərman vasitəsindən düzgün istifadə etməsi üçün zəruri məlumatları özündə əks etdirən mühüm vasitədir: "İstifadə təlimatında dərman vasitəsinin farmakoloji xüsusiyyətləri, istifadəsinə dair göstəriş və əks göstərişlər, digər dərman vasitələri ilə qarşılıqlı təsiri, hamiləlik və laktasiya dövründə istifadəsi, dərman vasitəsinin istifadə qaydası, əlavə təsirləri, doza həddinin aşılması zamanı yaranan simptomlar və onların müalicəsi, dərman vasitəsinin saxlanması (temperatur rejimi və dərman vasitəsinin saxlanması üçün tələb edilən digər şərtlər) qaydaları, yararlılıq müddəti, aptekdən buraxılma şərti (resept əsasında və ya reseptsiz) kimi dərman vasitəsilə düzgün davranış qaydalarını müəyyən edən məlumatlar öz əksini tapır. Məhz buna görə “Dərman vasitələri haqqında” qanunun 11-ci maddəsinə, eləcə də Nazirlər Kabinetinin 13 iyul 2007-ci il tarixli 108 nömrəli qərarı ilə təsdiq edilmiş “Dərman vasitələrinin dövlət qeydiyyatına alınması və reyestrinin aparılması Qaydaları”na 10 nömrəli Əlavəyə əsasən, dərman vasitələrinin istifadəsinə aid təlimatın mətni Azərbaycan dilində və istehlakçı üçün aydın şəkildə tərtib olunmalıdır". M.Süleymanov bildirib ki, “Dərman vasitələri haqqında “ qanununun 11.2-ci maddəsinə əsasən, dərman vasitələrinin istifadəsi təlimatları müvafiq icra hakimiyyəti orqanı – Səhiyyə Nazirliyi tərəfindən təsdiq edilir.

5 Dekabr 2016 11:44

Güclü təsirə malik dərmanların satışına icazə veriləcək

derm

Səhiyyə Nazirliyinin Analitik Ekspertiza Mərkəzində mərkəzin, Respublika Narkoloji Mərkəzinin və İnnovasiyavə Təchizat Mərkəzinin rəhbərliyinin, narkotik vasitələrə və psixotrop maddələrə aid olmayan güclü təsir edən maddələrin və zəhərli maddələrin topdan və pərakəndə satışı fəaliyyətinə xüsusi icazə almaq istəyən, çoxsaylı aptek şəbəkəsinə malik iri topdansatış əczaçılıq şirkətlərinin rəhbərlərinin iştirakı ilə toplantı keçirilib. Nazirliyin mətbuat xidmətindən virtualaz.org-a verilən xəbərə görə, Analitik Ekspertiza Mərkəzinin direktoru Murad Süleymanov və Respublika Narkoloji Mərkəzinin direktoru Telman Məmmədhəsənov "Güclü təsir edən maddələr və onların külli miqdarının, habelə zəhərli maddələrin siyahılarının təsdiq edilməsi haqqında" qanun, bu qanunla təsdiq olunmuş güclü təsir edən maddələr və zəhərli maddələrin idxalı, saxlanması və satışına olan tələblər barədə ətraflı məlumat veriblər. Əczaçılıq müəssisələri rəhbərləri güclü təsir edən maddələr və zəhərli maddələrin siyahısına daxil olan dərman vasitələrinin satışına xüsusi icazə almaq üçün Səhiyyə Nazirliyindən rəyin verilməsini istəyiblər. İclasda qeyd edilən dərman vasitələrinin istifadəsinə tibbi göstərişi olan xəstələrə əlçatan olmasının təmin edilməsi məqsədilə, qanunvericiliklə saxlanılması və satışı tələblərinə cavab verən əczaçılıq müəssisələrinin siyahısının hazırlanaraq Analitik Ekspertiza Mərkəzinə və Respublika Narkoloji Mərkəzinə təqdim olunduğu bildirilib. Sonda Analitik Ekspertiza Mərkəzinin, Respublika Narkoloji Mərkəzinin və İnnovasiya və Təchizat Mərkəzinin rəhbərləri toplantı iştirakçılarını maraqlandıran sualları cavablandırıb.

2 Dekabr 2016 4:27

36 milyondan çox insan bu virusu daşıyır

hiv_rapid_test

1 dekabr Ümümdünya QİÇS-lə mübarizə günüdür. Bu tarix dünya ictimaiyyətinin bu problemə diqqətinin yönəldilməsi məqsədilə 1988-ci ildə təsis olunub. Faktinfo.az  xəbər verir ki, UNAIDS-in hesabatına görə, 2016-cı ilin iyun ayının sonuna dünyada İİV-lə yaşayan insanların sayı 36,7 milyon nəfər təşkil edib. Onlardan da 2,1 mln. nəfəri son 1 ildə yoluxanlardır. İİV-lə yaşayan insanların 34,9 milyonu yaşlılar, 1,8 milyonu 15 yaşından kiçik olan şəxslərdir. Xilasedici ARV-terapiya (ART) qəbul edənlərin sayı 18,2 mln. nəfər olub ki, onların arasında uşaqlar 910 min nəfərdır. UNAIDS in hesabatında o da qeyd olunur ki, 2020-ci ilə kimi 30 mln. İİV-lə yaşayan insanı ARV terapiya ilə təmin etmək mümkün olacaq.İİV/QİÇS problemi Azərbaycandanda da aktual problemdir. Azərbaycan İİV-ə yoluxma səviyyəsi aşağı olan ölkələr sırasına daxildir və İİV-ə yoluxma halları əsasən yüksək riskli əhali qrupuna aid olan inyeksion narkotik istifadəçiləri arasında baş verir.2016-cı ilin 11 ayı ərzində Azərbaycanda yeni İİV-ə yoluxma faktı 464 nəfərdə təsdiqlənib.Onlardan 450-i (97,0%) Azərbaycan vətəndaşı, 14 nəfəri (3,0%) isə əcnəbidir. Qeydiyyata alınmış 450 Azərbaycan vətəndaşından 287-si (63,8%) kişi, 163-ü (36,2%) qadındır.Ümumilikdə 2016-ci ilin 1 dekabr tarixinədək Respublika QİÇS-lə Mübarizə Mərkəzində 5107 nəfər İİV-lə yaşayan insan rəsmi qeydiyyatdadır. Onlardan 72,4%-i (3695) kişi, 27,6%-i (1412) qadındır. QİÇS mərhələsində olanlar 1373 nəfər təşkil edir. İİV-infeksiyasından dünyasını dəyişmiş insanların sayı 794 nəfər olub.İİV-lə yaşayan insanlardan 46,3%-da İİV-ə yoluxma inyeksion narkotik istifadəsi nəticəsində, 42,7%-da heteroseksual, 1,9%-da isə homoseksual kontakt nəticəsində, 1,8%-da anadan uşağa keçməklə baş verib. 7,3%-də yoluxma yolu müəyyən edilməyib.

1 Dekabr 2016 12:55

Azərbaycanda 230 minə yaxın uşaqda müxtəlif xəstəliklər aşkarlanıb

vaqif-abdullayev

Azərbaycanda uşaqlar 2014-cü ildən etibarən icbari dispanzerizasiyaya cəlb edilib. Bu ilin 9 ayı ərzində respublikada uşaqların 1 672 556 nəfəri (64,6 %) tibbi müayinədən keçib. Bunu Səhiyyə Nazirliyinin baş pediatrı, Pediatriya İnstitutunun direktoru Nəsib Quliyev deyib. Onun sözlərinə görə, tibbi müayinədən keçən uşaqların 87 288 nəfəri (5,2 %) sağlamlıq vəziyyətinə görə dispanser qeydiyyata götürülüb: “Sağlamlığında müxtəlif problemlər aşkarlanan 227 955 nəfər (13,6 %) azyaşlıya müalicə-sağlamlaşdırıcı tədbirlər tətbiq edilib. Onlardan 14 345 nəfəri (0,9%) hospitalizasiya olunub,  4 569 nəfəri isə sanator müalicəyə göndərilib”. Baş pediatr əlavə edib ki, tibbi müayinədən keçən uşaqlar arasında tənəffüs üzvlərinin xəstəlikləri və qurd invaziyaları (helmintoz) üstünlük təşkil edir. Digər somatik yoluxucu xəstəliklərin də müşahidə olunduğunu deyən N.Quliyev qeyd edib ki, bu xəstəlik əsasən məktəbəqədər dövrdə və məktəb yaşlı uşaqlar arasında özünü büruzə verir: “Qurda yoluxma halına ən çox məktəbəqədər yaş dövründə rast gəlinir. Çünki həmin yaşda olan uşaqlar hərəkətdə daha çox olur, gigiyenik tələblərə riayət edilmir. Lakin tənəffüs üzvlərinin xəstəliklərinə kiçikyaşlı uşaqlarda daha tez-tez rast gəlinir.  Bu da uşaq orqanizminin anatomik fizioloji xüsusiyyətləri ilə izah olunur”. N.Quliyev vurğulayıb ki, hazırda Azərbaycanda 0-18 yaşadək uşaqların sayı 2 588 959 nəfərdir.

29 Noyabr 2016 12:26

4 mərkəzin direktoru işdən çıxarılıb –Ana ölümləri ilə bağlı

ss

"Hər il ana ölümünə görə həkimlər, baş həkimlər, bəzi müəssisələrin direktorları cəzalandırılır. Bu ilin 9 ayında Azərbaycanda qeydə alınan ana ölümü ilə bağlı 4 Perinatal mərkəzin direktoru və 10-a yaxın həkim işdən çıxarılıb”. Bunu Səhiyyə Nazirliyi Doğuşayardım Komissiyasının sədri, Respublika Perinatal Mərkəzin direktoru Sevinc Məmmədova deyib. Onun sözlərinə görə, ana ölümləri səbəbindən Quba, Gəncə, Şəki və Sabirabad Perinatal mərkəzlərinin direktorları işdən çıxarılıb və müəssisənin rəhbərliyi tamamilə dəyişilib. Komissiya sədri qeyd edib ki, işdən çıxarılanlar arasında rəhbər işçilərlə yanaşı, cərrahiyyə və doğuş şöbəsinin müdirləri, cərrah, ginekoloq, anestezioloq, hətta kənddə antonental qulluğu yararsız yerinə yetirən tibb bacısı-"mamaça” da var. S.Məmmədova vurğulayıb ki, ölkədə ana ölümlərinin azalması istiqamətində işlər görülür. 1993-cü ildə ana ölümü hər 100 min diridoğulmaya 60, 1994-cü ildə 70, 1996-cı ildə isə 57 olmuşdusa, son illər bu rəqəmlər stabil olaraq, 25-26-dan yuxarı qalxmır: "Bu da Səhiyyə Nazirliyi və dövlətin bu problemə olan diqqətin nəticəsidir. Respublikada baş verən ana ölümləri dərhal təhlil olunur, tibbi məhkəmə ekspertizadan keçdikdən sonra səbəblər Doğuşayardım Komissiyasında araşdırılır, rəy verilir, müvafiq dinləmələrdən sonra komissiyanın qərarı açıqlanır. Tibbi yardımın təşkili şöbəsi bu qərardan asılı olaraq cəza tədbirləri görür. Son illər ana ölümünün strukturu da dəyişilib. İndiyə kimi ekstrogenetal xəstəliklər, hamiləliklə əlaqəli olmayan xəstəliklər, qanaxmalardan baş verirdisə, son illər eksrogenetal xəstəliklərin, eklampsiya, preeklampsiya müalicəsinə yanaşmaların dəyişilməsi, müasir texnologiyaların istifadəsi, vaxtında diaqnoz qoyulması nəticəsində ana ölümündə rəqəmlərin azalmasına nail olunub".

22 Noyabr 2016 5:28

Xəstələri sürüyə-sürüyə küçəyə atıblar… – Bakıda sensasion olay

nigar-klinikasi

Noyabrın 5-də Çobanzadə küçəsi, 24/05 ünvanında yerləşən “Nigar” klinikasına bir qrup şəxs tərəfindən basqın olub. Onlar xəstəxanaya soxularaq həkimləri, müalicə üçün qəbula gələnləri, hətta reanimasiyada olan xəstələri belə sürüyə-sürüyə küçəyə çıxarıblar. Xəstəxananın qapılarını qıraraq bütün mühasibat və bank sənədləri, möhür, hətta xəstəlik tarixçələri belə götürülüb, kompüterlər sıradan çıxarılıb. Faktinfo.az xəbər verir ki, bu şikayətlə virtualaz.org-un redaksiyasına “Nigar” klinikasının təsisçisi, ixtisasca həkim olan iş adamı Şahbaz Şahbazov müraciət edib. Onun sözlərinə görə, bunu edən ortağı İlham Məmmədovdur. Bir neçə ortaq şirkətləri olduğunu deyən iş adamının sözlərinə görə, o, bu xəstəxananın da 33% ortaqlığını tələb edib. Ş.Şahbazovun razılaşmadığını gördükdə, bu addımı atıb. Xəstəxanadan köçürülən xəstələrin aqibəti məlum deyil. Nizami rayon məhkəməsi bu şəxslərin xəstəxanadan çıxarılması ilə bağlı qərar çıxarsa da, özəl xəstəxananın qanuni rəhbəri binanın həndəvərinə buraxılmır. Klinika rəhbəri bildirir ki, İlham Məmmədovla 1998-ci ildən ortaqdırlar, birlikdə bir neçə şirkət açıblar: “Bir müddət normal işləsək də, sonradan İ.Məmmədov mənə məxsus olan payı ələ keçirməyə başladı. Birlikdə açdığımız “Riyad Farm” şirkətini batırdı. İki ilə yaxındır ki, məni təqib edir. Ortaq olduğum şirkətlərdən bir ildir ki, 1 manat da olsun qazanc əldə etməmişəm. “Nigar” klinikasının isə ona heç bir aidiyyatı yoxdur. Bu klinikanı başqa bir ortağımla şərik açmışıq. Lakin klinikanın bir hissəsini ələ keçirmək istəyən İlham Məmmədov, onun əlaltısı İlham Qurbanov və onlara məxsus “Riyad” mühafizə şirkətinin qoçuları ilə birlikdə bizi işləməyə qoymur, ailəmə fiziki zor tətbiq edir. Noyabrın 5-də “Riyad” mühafizə şirkətinin 40-50 qoçusu xəstəxanamıza basqın edib, o vaxtdan bizi klinikamıza yaxınlaşmağa qoymurlar. Lisenziyalı şirkətin fəaliyyəti iflic olub. Xəstəxananın 70-ə yaxın işçisi küçəyə atılıb və maaşsız qalıb”. Ş.Şahbazovun sözlərinə görə, bundan bir qədər öncə həyat yoldaşı, “Nigar” klinikasında həkim işləyən Arzu Şahbazova həmin qoçular tərəfindən vəhşicəsinə döyülüb. Buna səbəb isə A.Şahbazovanın həyat yoldaşının şərikli açdığı “Azintroil” MMC, “Vicdan 1”MMC və digər tikinti və ticarət obyektlərindən özlərinə çatacaq gəliri tələb etməsi olub: “Bununla bağlı Nəsimi rayon polis idarəsinə şikayət etmişik, hazırda həmin şikayət araşdırılır”. Ş.Şahbazov bildirir ki, gənc yaşında dünyasını dəyişən qızının adını daşıyan klinika bərbad hala salınıb: ““Nigar” klinikası mənim 21 yaşında dünyasını dəyişmiş qızım Nigarın adınadır. Mən onun həkim olmasını istəyirdim, o isə hüquqşünas olmaq istədiyini bildirdi. Səbəbi belə əsaslandırdı ki, insanlar hüquqlarının pozulması səbəbindən xəstə olurlar. O, yaxşı hüquqşünas olub insanların hüquqlarını qoruya bilsə, onlar xəstələnməzlər. Mən qızımın bu şüarını xəstəxananın girişində şəkli ilə birlikdə vurmuşdum. Lakin qoçu dəstəsi xəstəxanaya girən kimi bu lövhəni də cırıq-cırıq edib. Bu hadisə mənə çox pis təsir etdi”. Şikayətçi bildirir ki, şəriki İ.Məmmədov onu şantaj etmək üçün aldığı şirkətlərin əvvəlki sahiblərini taparaq onlara müxtəlif vədlər verir. Şantaj üçün hətta üzünü belə görmədiyi “pasient”lərdən istifadə olunur: “8 il öncə aldığım müəssisənin köhnə sahibləri Ayaz, Bəyimxanım, Azad və Hikmət Məmmədovları tapıb. Bildiyimə görə, borcun içərisindədirlər. Onlara vədlər verərək məni şantaj edir. Məndən pul tələb edirlər və bildirilər ki, əgər bizə pul verməsən, o biri şəriklərini də tapıb pulunu əlindən alacağıq. İ.Məmmədov müxtəlif şəxslərin adından müxtəlif dövlət orqanlarına mənə qarşı şantaj dolu şikayətlər yazır. O, haqqı olmayanları tələb etmək üçün havadarlarına arxalanır. Heç vaxt müalicə etmədiyim xəstələrin adından müxtəlif orqanlara şikayət ərizələri yazılır ki, guya onlardan pul almışam”. Şikayətçinin bildirdiyinə görə, bu azmış kimi, İ.Məmmədov yaşadığı Həsən Əliyev küçəsi, 10A ünvanındakı binanın 3-cü mərtəbəsində yerləşən şəxsi ofisi də zəbt edib. Liftin 3-cü mərtəbəni göstərən düyməsi qoparılıb, həyətə “Riyad” mühafizə şirkətinin əməkdaşları qoyulub. Ş.Şahbazov öz ofisinə də yaxın düşə bilmir. Ş. Şahbazov deyir ki, İlham Məmmədov onun həyatı üçün təhlükə yaradır. O, daxili işlər, prokurorluq orqanları, hətta prezidentə qədər müraciət edib. Oktyabr ayının 28-dən özünə və ailəsinə qarşı hücumlar olduğunu deyən şikayətçinin sözlərinə görə, onu ölkədən çıxıb getməyəcəyi təqdirdə həbs olunacağı ilə hədələyirlər.

18 Noyabr 2016 5:06

Daha bir ana doğuş zamanı öldü

sad

Şamaxı rayonunda doğuş zamanı baş verən ana ölümünün ilkin səbəbləri açıqlanıb. Hadisə Şamaxı Mərkəzi Rayon Xəstəxanasının Doğum şöbəsində qeydə alınıb. Ərçiman kənd 1996-cı il təvəllüdlü Nuriyeva Qaratel Bəxtiyar qızı təbii doğuşla qız övladı dünyaya gətirib. Doğuşu qəbul edən mama-ginekoloq Nəzakət Abdulrazaqova APA-ya bildirib ki, normal keçən doğuşdan bir sutka sonra qadının vəziyyəti qəflətən pisləşib. Bu zaman aparılan müayinələr zamanı anada qaraciyər sirrozu, HELLP sindromu, kəskin qaraciyər və böyrək çatışmazlığı aşkarlanıb. Həkimin sözlərinə görə, bütün tədbirlərini görülməsinə baxmayaraq, ananı xilas etmək mümkün olmayıb. Bu, qadının ilk hamiləliyi olub. Faktla bağlı Şamaxı rayon Prokurorluğunda araşdırma aparılır. *** Bu gün Şamaxı rayonunda doğuş zamanı ana ölümü qeydə alınıb. Bu barədə Azərbaycanın baş mama-ginekoloqu Sevinc Məmmədova bildirib. Onun sözlərinə görə, hadisə bu gün səhər saatlarında qeydə alınıb. Artıq hadisə ilə bağlı Doğuşayardım Komissiyasına məlumat daxil olub. Sabah komissiyasının mütəxəssisləri Şamaxıya gedəcək və ana ölümünün baş vermə səbəblərini araşdıracaq. Şamaxı rayon Mərkəzi Xəstəxanasından fakt təsdiqlənib. Xəstəxanadan bildirilib ki, adı açıqlanmayan həmin qadının ağciyərində problem varmış . Faktla bağlı araşdırma aparılır.

17 Noyabr 2016 4:28

Azərbaycanlı gənc ana dünyaya 5 uşaq gətirdi, amma uşaqlar öldü

ss

Bu gün Respublika Perinatal Mərkəzində beşəm dünyaya gəlib. Respublika Perinatal Mərkəzinin direktoru Sevinc Məmmədova APA-ya deyib ki, 1991-ci il təvəllüdlü Bakı şəhər sakini Əzimzadə Aysel bu gün səhər saat 7 radələrində 4 oğlan, 1 qız olmaqla beşəm dünyaya gətirib. Onun sözlərinə görə, bu ananın 2-ci hamiləliyi olub. Şöbə müdiri qeyd edib ki, birinci hamiləlikdə uşaqlar əkiz olub, onlar inkişafdan qaldıqları üçün vaxtından əvvəl abort olunublar: “Ana 2-ci hamiləliyə dərmanlar vasitəsisə qalıb. Hamiləliyin 20-ci həftəsinə qədər ana 3 saylı şəhər xəstəxanasında həkim Həmzəyev Mehmanın xəstəsi olub. Hamiləlik boyunca ana hamiləliyin qorunması üçün müxtəlif dərmanlar qəbul edib. Vəziyyəti pisləşəndən sonra Aysel Əzimzadə noyabrın 11-də kəskin qanaxma ilə Mərkəzə daxil olub. Vəziyyəti kəskin ağır olan ananın qaraciyər və böyrək funksiyalarının stabilləşdirilməsi məqsədilə hospitallaşdırılıb və lazımi yardım göstərilib. Səhiyyə Nazirliyi və Bakı şəhər Baş Səhiyyə İdarəsinin müxtəlif xəstəlilər üzrə baş mütəxəssisləri Mərkəzə dəvət edilərək konsilium təşkil edilib, ananın vəziyyətinin stabilləşməsinə istiqamətində iş görülüb. Bu gün səhər saat 7-də doğuş spontan-özbaşına fəaliyyətə başlayıb. Nəticədə çəkisi 200 qramdan 420 qrama qədər olan 5 uşaq doğulub. Lakin aparılan bütün tədbirlərə baxmayaraq, körpələrin hamısı ölü doğulub. Son bir ayda ananın qaraciyər və böyrəyində kəskin surətdə baş verən pisləşmələr nəticəsində onun qanında müəyyən dəyişmələr var. Nəticədə uşaqlar 24-cü həftədə zəif inkişaf etmiş doğulublar, ananın böyrəyini və qaraciyərinin kəskin pisləşməsi hamiləliyə öz təsirini göstərib. Bundan sonra ananın sağlamlığının bərpa olunması istiqamətində bütün lazımi tədbirlər görüləcək”.

17 Noyabr 2016 1:51

Ailə quran gənclər daha bir neçə tibbi müayinədən keçməli olacaq

nigah

Azərbaycanda nikahdan əvvəl həyata keçirilən tibbi müayinələrin sayı artırıla bilər. Milli Məclisin Səhiyyə komitəsinin üzvü Musa Quliyev Trend-ə bildirib ki, irsi, infeksion xəstəliklərin bir şəxsdən digərinə və ya valideyndən övlada ötürülməsinin qarşısını almaq üçün nikahdan öncə tibb müayinələrin keçirilməsi çox mühüm bir addım idi.M.Quliyev bildirib ki, müayinə olunan xəstəliklərin sayının artırılması məsələsi də gündəmdədir: “Ancaq ən aktual xəstəliklər önə çəkilməklə 5-ə qədər xəstəliyin müayinəsi qərara alındı. Müayinələr çox olanda həm insanların vaxtı çox gedir, həm çox xərc tələb olunur. Müayinələrin çoxluğu ilk əvvəl insanları qorxuya da sala bilərdi. Amma tədricən siyahını artırmaq olar. İlk növbədə C qrup hepatitlərini və daha çox sosial xarakter daşıyan genetik xəstəlikləri üzə çıxarıb bu siyahıya daxil etmək olar. Ancaq mən düşünürəm ki, bunun əvəzinə daha çox maarifləndirmə işləri aparılmalıdır və aparılır da. Uşaqlar ilk doğulan dövrdə onların müayinələri aparılır, artıq elektron səhiyyə yaranıb, hər bir uşağın çip kartında xəstəliklərinin olub olmadığı əks olunur. Bu imkan verəcək ki, nikahdan öncəyə qədər kimin hansı xəstəlik daşıyıcısı olub-olmaması aşkarlansın. Hesab edirəm ki, tibbi müayinələrin tətbiqinin iki ilinin tamamında bu işin monitorinqi aparılar və ən çox aktuallıq tələb edən daha bir neçə xəstəliyi bu siyahıya əlavə etmək olar. Ancaq siyahının həddən artıq genişləndirilməsi praktiki cəhətdən mümkün deyil və özünü doğrultmayacaq”. M.Quliyev bildirib ki, ötən dövr ərzində 210 minə yaxın nikaha girmək istəyən şəxs müayinədən keçib və müayinələrin nəticəsində təxminən 6700-ə yaxın insanın talasemiya daşıyıcısı və yaxud da xəstəsi olduğu aşkara çıxarılıb, 150-ə yaxın insanda HİV virusu tapılıb: "Bu çox böyük addımdır. Biz qanunu qəbul edən zaman bir qrup insanlar deyirdilər ki, cəmiyyət buna hazır deyil, bu müayinələrə getməyəcəklər, qeyri-rəsmi nikahların sayı artacaq. Son 1 ilin müşahidələri göstərir ki, bu heç də belə deyil, insanlar bunu başa düşürlər və çox həvəslə də bu müayinələrdən keçirlər. Müayinələrin büdcə hesabına həyata keçirilməsi də dövlətin bu işə çox böyük dəstəyidir”.

17 Noyabr 2016 10:09

Səhiyyə Nazirliyindən antibiotiklərlə bağlı açıqlama

14792932282028442216_1000x669

Səhiyyə Nazirliyi tərəfindən noyabrın 16-da Bakı Sağlamlıq Mərkəzində Ümumdünya Antibiotiklərdən Səmərəli İstifadə Həftəsi ilə əlaqədar maarifləndirici seminar keçirilib. Nazirliyin mətbuat xidmətindən Azərtac-a bildirilib ki, tədbirdə Bakı Sağlamlıq Mərkəzinin, həmçinin Dünya Səhiyyə Təşkilatının Bakı nümayəndəliyinin əməkdaşları iştirak ediblər. Görüşdə qeyd olunub ki, kampaniyanın məqsədi antibiotiklərə qarşı davamlılıq kimi qlobal bir problemə dünya ictimaiyyətinin diqqətini cəlb etmək, eyni zamanda, bu sahədə qabaqcıl təcrübəyə əsaslanan məlumatları əhalinin geniş təbəqəsinin, o cümlədən səhiyyə işçilərinin və siyasi qərarlar verəcək şəxslərin nəzərinə çatdırmaqdır. Ötən ilin may ayında Ümumdünya Səhiyyə Assambleyasının 68-ci sessiyasında antibiotik və digər dərman preparatlarına davamlılıq probleminin həlli üçün Qlobal Fəaliyyət Planı razılaşdırılıb. Bu planın əsas məqsədlərindən biri effektiv kommunikasiya, təhsil və tədris hesabına məlumatlandırmanın yaxşılaşdırılması və bu problemin daha dərindən dərk edilməsidir.Kampaniyanın şüarı belə səslənir: “Antibiotiklərdən ehtiyatla istifadə edin!” Antibiotiklərdən yalnız həkimlərin təyinatı əsasında bakterial infeksiyaların müalicəsində istifadə etmək olar.Dünya Səhiyyə Təşkilatı bütün üzv ölkələri, səhiyyə sahəsindəki tərəfdaşları, təhsil müəssisələrini və əhalini bu kampaniyada iştirak etməyə və antibiotiklərə qarşı dayanıqlılıq problemi haqqında maarifləndirmə tədbirlərini gücləndirməyə çağırır.

16 Noyabr 2016 3:40

Fakt

Bizi izləyin