İlham Əliyevdən Sergey Lavrova və Turan İbrahimova DİPLOMATİYA DƏRSİ/VİDEO

115583

Prezident İlham Əliyevin Lapşinin Azərbaycana ekstradisiyasından sonra cəmiyyətdə yaranmış yüksək ovqatın ardından Milli Qəhrəman Çingiz Qurbanovun valideynlərini qəbul edərkən verdiyi açıqlama təkcə ermənilərə deyil, onların havadarlarına tərs şillə effekti verdi. Xüsusən də bu bəyanatı Dağlıq Qarabağ münaqişəsinin Azərbaycanın daxili işi olmadığı haqqında Rusiyanın baş diplomatının bir müddət öncə qalmaqala səbəb olan həyasız ermənipərəst açıqlamasına da İlham Əliyevin diplomatik qulaqburması hesab etmək olar. Dövlət başçısı ad çəkməsə də Dağlıq Qarabağ münaqişəsinə diqqəti yönəldərək bu torpaqların Azərbaycanın ayrılmaz tərkib hissəsi olduğunu, istənilən vaxt həmin əraziləri işğaldan azad etmək haqqına sahib olduğunu bəyan etməklə bir daha Rusiyanın ermənipərəst mövqeyini qınadı: "Ermənistan çox çalışdı ki, aprel döyüşlərindən sonra bu məsələyə beynəlxalq don geyindirsin. Çox çalışdı ki, Kollektiv Təhlükəsizlik Müqaviləsi Təşkilatı, - Ermənistan təşkilatın üzvüdür, - bu məsələ ilə bağlı öz mövqeyini bildirsin. Halbuki bunun üçün heç bir hüquqi əsas yoxdur. Biz öz torpağımızdayıq. Bizim Ermənistan torpağına iddiamız yoxdur. Baxmayaraq, hamımız yaxşı bilirik ki, bugünkü Ermənistan tarixi Azərbaycan torpaqlarında yaradılmışdır. Ancaq biz öz torpağımızı heç kimə verəsi deyilik. Ona görə, aprel döyüşləri və təmas xəttində yaşanan gərginlik və toqquşma bizim daxili işimizdir. Dağlıq Qarabağ Azərbaycanın ayrılmaz hissəsidir. Bütün dünya Dağlıq Qarabağı məhz belə tanıyır və bu münaqişə yalnız ölkəmizin ərazi bütövlüyü çərçivəsində öz həllini tapa bilər". Diqqətçəkən bir məqam da son vaxtlar yaranmış münbit şəraitdən maksimum bəhrələnməyə çalışaraq özünü politoloq kimi cəmiyyətə sırımaq istəyənlərin də pafoslu bəyanatlarının təsdiqini tapmamasıdır. Bu baxımdan ATV telekanalında səhər proqramının aparıcısı olan Turan İbrahimovun politoloq kimi təqdimatındakı siftənin də korlandığını iddia edə bilərik. Xatırladaq ki, Turan İbrahimov az qala Lavrovun dediklərini yamsılayaraq Dağlıq Qarabağ münaqişəsinin artıq Azərbaycanın daxili işi olmadığını bəyan etmişdi. İndi sual olunur, görəsən "gənc və perspektivli politoloq" dediyini danacaqmı, İlham Əliyevin bəyanatının haqlı olduğunu etiraf edəcək, yoxsa yenə də lavrovsayağı açıqlamasının üstündə duracaq? Çətin dursun, çünki onun çürük məntiqinin artıq ayaqlarına titrətmə düşdüyünü iddia etmək heç də münəccimlik etmək anlamına gəlməməlidir. Bu olay bir daha digər öncəgörənlərə də dərs olmalıdır ki, danışanda diqqətli olsunlar, sözü ağızlarında bişirdikdən sonra çıxarsınlar, yoxsa sonradan Turan İbrahimovun acınacaqlı aqibətini yaşamasınlar.

10 Fevral 2017 12:55

Prezidentliyə namizəd François Fillon:”Bu bir səhv idi, üzr istəyirəm”

c79800b8ef2ffe01cc0d6976bd72757bf373cb1f

Fransa prezidentliyinə namizəd François Fillon təşkil etdiyi mətbuat konfransında həyat yoldaşı və uşaqlarının Milli Assambleya və Senatda məsləhətçi qismində çıxış etmələri mövzusunda ona qarşı irəli sürülən ittihamları cavablandırıb. Faktinfo.az  xəbər verir ki, ittihamların "siyasi sui-qəsd cəhdinə" çevrildiyini irəli sürən Fillon "Mən və ailəm qeyri-qanuni heç bir şey etməmişik,bu səbəbdən namizədliyimi geri  götürməyim  mümkün deyil. Seçicilərimin səsi ilə namizəd olmuşam,  sabahdan etibarən seçki kampaniyasını başladıram." deyib. Həyat yoldaşının işləmədən maaş alması ittihamının əsassız və haqsız olduğunu söyləyən Fillon  Penelopenin millət vəkili qismində iştirak etdiyi işlərin  məsləhətçisi olaraq  məvacib  aldığını ifadə edib. O illərdir Fransada parlament üzvlərinin  yaxın qohumlarını məsləhətçi olaraq işlətməsi faktının  artıq yaxşı qarşılanmadığını da vurğulayıb:" Mən həyat yoldaşım və uşaqlarımla işləməyə üstünlük vermişdim, ancaq bunun sonda narazılığa gətirib çıxardığını  gördüm. Bu bir səhv idi və mən buna görə üzr istəyirəm". Bununla belə prezidentliyə namizəd  Fillon həyat yoldaşı və uşaqlarına ödənilən məvaciblə  bağlı siyahını internetdə  paylaşacağını da söyləyib. Qeyd edək  ki, Prokurorluq Fillonun həyat yoldaşının 8 il müddətində Milli Assambleyada işləmədən "məsləhətçi" qismində 900 min avro maaş aldığını, siyasətçinin iki uşağının senatda iki il ərzində  işləmədən  "məsləhətçi" qismində 84 min avro məvacib alması ittihamları üzrə ilkin istintaq başlatmışdı.

7 Fevral 2017 5:45

Ərdoğan və Merkel mətbuat konfransı zamanı mübahisə ediblər

Merkel-Ərdoğan

Almaniyanın federal kansleri Angela Merkel Türkiyədəki Konstitusiya dəyişikliyində hakimiyyət bölgüsü prinsipinə təminat verilməsinin zəruriliyini vurğulayıb. A. Merkel bu sözləri bu gün Ankaraya səfəri çərçivəsində Türkiyə prezidenti Rəcəb Təyyib Ərdoğanla keçirdiyi birgə mətbuat konfransında deyib. O bildirib ki, yeni idarəetmə sistemində türk xalqının müdafiə etdiyi demokratik prinsiplər qorunub saxlanılmalıdır. A. Merkel ATƏT müşahidə missiyasının Türkiyədəki Konstitusiya dəyişikliyinə dair referendumun müşahidəçiliyinə dəvət olunmasını təklif edib. Mətbuat konfransında İŞİD-dən bəhs olunarkən A. Merkelen “islamist terror” ifadəsi işlətməsi R. T. Ərdoğanın etirazına səbəb olub. “İslamist terror ifadəsi biz müsəlmanları ciddi şəkildə üzür. Belə bir ifadədən istifadə olunması doğru deyil. Çünki islamla terror bir araya gələ bilməz. İslam sözünün mənası sülhdür. Bu sözdən lütfən istifadə etməyək. İstifadə edilsə, biz buna qarşı çıxacağıq, çünki səssiz qalmaq bunu qəbul etmək olar. Mən bir müsəlman prezident olaraq bunu əsla qəbul edə bilmərəm”, – deyə R. T. Ərdoğan söyləyib. A. Merkel isə cavab olaraq “islamist” sözü ilə “islami” sözü arasında fərq olduğunu vurğulayıb: “Din azadlığı mənim üçün çox önəmlidir və bunu demokratiyanın bir parçası olaraq görürəm. Almaniyada müsəlmanların öz ibadətlərini azad şəkildə yerinə yetirmələri üçün əlimizdən gələni edirik. İslamist sözü ilə islami sözü arasında fərq var”.  (APA)

2 Fevral 2017 7:04

Fakt

Bizi izləyin