Azərbaycan Türkiyə ilə Rusiya arasında vasitəçi ola bilər

  Hakimiyyətin barış üçün vasitəçilik təşəbbüsünə müxalifətdən dəstək Azərbaycan Türkiyə ilə Rusiya arasında yaranan gərginliyin aradan qalxması üçün vasitəçilik etmək istəyir. Son iki gündə Azərbaycan hakimiyyətinin təmsilçilərinin verdiyi açıqlamalardan belə məlum olub. Milli Məclisin sədri Oqtay Əsədov dünən bəyan edib ki, Azərbaycan Türkiyə ilə Rusiya arasında yaranan gərginliyin aradan qaldırılması üçün əlindən gələni etməyə hazırdır. Bundan bir gün əvvəl isə baş nazirin müavini, YAP-ın icra katibi Əli Əhmədov bildirib ki, Azərbaycan son günlərdə məlum insidentlə əlaqədar Türkiyə ilə Rusiya arasında münasibətlərin gərginləşməsindən təəssüflənir və narahatdır. Ə.Əhmədov qeyd edib ki, Türkiyə bizim üçün qardaş və strateji müttəfiq ölkədir, Rusiya da Azərbaycanın yaxın qonşusudur, ölkələrimiz arasında hərtərəfli sıx dostluq əlaqələri mövcuddur: “Azərbaycanın həm Türkiyə, həm də Rusiya ilə əlaqələrinin böyük tarixə malik olduğunu ayrıca vurğulamağı lazım bilirəm. Azərbaycana dost olan ölkələrin arasında qarşıdurmanın yaranmasını və dərinləşməsini arzu etmirik. Biz mümkün qədər tezliklə hər iki ölkə arasında gərginliyin aradan qaldırılmasının tərəfdarıyıq. İnanıram ki, bu bütün tərəflərin maraqlarına cavab verir, habelə bölgədə xoşagəlməz proseslərin qarşısını almağa xidmət göstərə bilər. Qəti əminliklə demək istəyirəm ki, Azərbaycan tərəfi Türkiyə ilə Rusiya arasında yaranmış arzuolunmaz gərginliyin tezliklə aradan qaldırılması naminə hər iki ölkə ilə dostluq münasibətləri çərçivəsində xidmətlərini təklif etməyə, zəruri addımlar atmağa hazırdır”. Müxalifət partiyaları Azərbaycanın Türkiyə və Rusiya münasibətlərinin düzəlməsi üçün vasitəçilik etməsi məsələsinin gündəmə gətirilməsini müsbət qarşılayıblar. KXCP sədri Mirmahmud Mirəlioğlu “Yeni Müsavat”a bildirdi ki, əgər hakimiyyət Türkiyə ilə Rusiyanın münasibətlərinin normallaşmasına yardım etmək təşəbbüsünü qaldırırsa, bunu normal təşəbbüs hesab etmək lazımdır. Eyni zamanda bu təşəbbüsün real işə çevrilməsi istiqamətində addımlar atılmalıdır: “Azərbaycan bu müsbət təşəbbüsü rəsmi olaraq qaldırsın. Türkiyə ilə Rusiya bunu qəbul edər, ya eləməz, bu başqa məsələdir. Bu gün Türkiyənin xarici işlər naziri Bakıdadır. Bəlkə də indi söhbət etdiyimiz məsələ ilə bağlı da bir məsləhətləşmə olub. O da istisna deyil ki, Rusiyadan Türkiyə ilə münasibətlərin normallaşması, Putinin səhvinin yuyulması üçün mesaj verilsin. Azərbaycan hakimiyyətinin təmsilçiləri də buna görə barışdırıcılıq təşəbbüsündə bulunurlar. Hər bir halda barışdırıcılıq missiyası müsbət missiyadır. Qardaş Türkiyə ilə qonşuluğumuzda olan Rusiya arasında gərginliyin artması Azərbaycanın xeyirinə deyil. Ona görə də Azərbaycanın münasibətlərin normallaşmasını istəməsi təbiidir”. KXCP sədri onu da vurğuladı ki, bəzi adamların özlərindən müştəbehlik edərək Türkiyəni Rusiyadan üzr istəməyə çağırması yanlışlıqdır, bağışlanmaz səhvdir, xəyanət dərəcəsində hərəkətdir. AXP sədri Pənah Hüseyn bildirdi ki, Azərbaycan təyyarə hadisəsi ilə bağlı beynəlxalq hüququn yanında olmalıdır. Beynəlxalq hüquq da bu məsələdə daha çox Türkiyənin mövqeyini dəstəkləyir: “Rusiya ilə Türkiyə arasında gərginliyin aradan qaldırılması üçün Azərbaycanın vasitəçilik rolu oynaya bilmək imkanlarından istifadə olunması doğru olar. Azərbaycanın Türkiyə ilə Rusiya arasında münasibətlərin gərginləşməsindən narahat olması təbiidir. O baxımdan da mən hakimiyyətdən vasitəçilik istiqamətində açıqlamaları xeyli dərəcədə səmimi hesab edirəm”. Azərbaycanın vasitəçiliyinin nəticə verib-verməyəcəyi məsələsinə gəldikdə isə P.Hüseyn dedi ki, nə mümkündürsə onu eləmək zəruridir. Bütün mümkün addımlar atılsa müəyyən müsbət təsirləri ola bilər. (musavat.com)

28 Noyabr 2015 10:35

“Nardaran hadisələrində İranın əli var“ – Politoloq

“Ötən gün Nardaranda baş verən hadisələrdə İranın izinin olması danılmazdır İran dövləti hələ də bizim müstəqilliyimizi qəbul edə bilmir. Orada təxribat törədən şəxslər İranın agentləridirlər”. Bu barədə Azvision.az-a açıqlamasında politoloq Qabil Hüseynli bildirib. Onun sözlərinə görə, Nardaranda dini təxribatla məşğul olan şəxsləri İran maliyyələşdirir: “Nardaran hadisələrində İranın izinin olması danılmazdır. Çünki gizli çəkilmiş videokadrlardan da görünür ki, Taleh Bağırov İranlı ayətullahların əllərini əyilərək öpür. Nardaran İranla sıx əlaqədə olan kənddir. Nardaran əhalisinin dövlətçilik ideyası əsasında birləşdiriləsi müəyyən çətinliklər yaradır. Orada keçirilən tədbirlərdə Azərbaycan bayrağına, Azərbaycanın simvollarına rast gəlmək çox çətin olur. İran və ya dini xarakterli bayraqlara daha çox rast gəlinir”. Q.Hüseynli deyir ki, son hadisələr Nardaran sakinlərinin silahlandığını göstərdi: “Onlar bu silahları haradan alıblar? Kim verib? Görünür kimsə Nardaran sakinlərinin silahlanmasında maraqlı görünür. Guya onların məqsədi dinə əsaslanan şəriət dövləti yaratmaqdır. Nardaran İran inqilabının ixracına bənzəyən modelidir. Nardaran ciddi şəkildə nəzarətə alınmalıdır. Hadisələr bu həddə gəlib çıxmamalıydı, əvvəlcədən profilaktik tədbirlər görülməlidir”. Politoloqun fikrincə, “Müsəlman birliyi ”təşkilatı” “Müsəlman qardaşları təşkilatının” prototipidir və rayonlarda yayılıb. “Bu hadisəni dövlətçilik üçün, millətin gələcəyi üçün təhlükəli addım hesab edirəm. Fikrimcə, ciddi tədbirlər görülməlidir. İmkan vermək lazım deyil ki, bu kimi dini provakatorlar əhalinin gözünü boyasın”. Politoloqun fikrincə, tutulan Taleh Bağırzadə və onun dəstəsi İrandan maliyyə dəstəyi alaraq,dövlətə qarşı təxribata əl atmaq niyyətində olub. “Dini savadı kifayət qədər olmayan bir şəxsin bahalı maşınlarda gəzməsi nəyin hesabına başa gələ bilər? Təbii ki, pulun. Pul da müxtəlif mənbələrdən, İrandan gəlir”. Ötən gün Nardaranda baş verən silahlı insidentə deputat seçildiyi Sabunçu rayonundan Nardaran qəsəbəsini də təmsil edən Eldar Quliyev də münasibət bildirib. O, mətbuata verdiyi açıqlamada insidentdə iştirak edən dindarların başqa dövlətə işlədiyini və insidentin baş verməsinə səbəbkarların agentlər olduğunu deyib.

27 Noyabr 2015 4:14

Cəmil Həsənli: “Türkiyə qətiyyət və siyasi əxlaq nümayiş etdirdi”

Milli Şuranın sədri Cəmil Həsənli Türkiyənin Rusiya hərbi təyyarəsini vurması ilə iki ölkə arasında yaranan gərginliklə bağlı fikirlərini paylaşıb. C.Həsənli feysbuk səhifəsində yazıb: “Türkiyə səmasında vurulmuş Rusiya qırıcı təyyarəsi ilə bağlı əsəblər gərilməkdədir. Moskvada Türkiyə səfirliyinin daşa basılması, Rusiya Dumasında “Erməni genosidinin” tanınması məsələsinin gündəliyə gətirilməsi, rus mətbuatı və televiziyasında, habelə rəsmi dairələrin açıqlamalarında Türkiyənin ünvanına böhtanların səsləndirilməsi heç bir sağlam məntiqə sığmır. Türkiyə özünə hörmət edən ölkədir və onun səviyyəsində olan heç bir ölkə sərhədlərinin dəfələrlə pozulmasına, suverenliyinə hörmətsiz münasibətə biganə qala bilməzdi. Rusiya beynəlxalq hüququ və beynəlxalq münasibətlərin universal prinsiplərini, sərhədlərin toxunulmazlağı haqqında BMT nizamnaməsini pozub. Bunun ayrı adı yoxdur. Söhbət yolun azmış, dumana düşmüş sərnişin təyyarəsinin vurulmasından getmir. Söhbət suveren bir ölkələrin sərhədlərini pozmuş hərbi təyyarənin vurulmasından gedir. Türkiyə bu addımı şüurlu şəkildə atıb. Belə də olmalı idi. Cənab Putin son bir neçə ildir ki, öz siyasətini risk və blef üzərində qurmuşdu. Bu risk bir sıra məqamlarda ona uğur gətirmişdi. Bu dəfə belə olmadı. Rusiya təyyarəsi cəmisi 17 saniyə Türkiyə səmasında olmuşdu. Sürətlə hərəkət edən hərbi təyyarəni vurmaq üçün bu çox az vaxt idi. Amma rusların Türkiyənin hava sərhədlərini pozması ilə bağlı bir neçə xəbərdarlıqdan sonra Türkiyə bu qətiyyəti hətta 17 saniyə ərzində göstərməyə qərarlı idi və göstərdi də. Bundan daha böyük qətiyyət sərhəd pozucusu kimi Rusiya təyyarəsinin Türkiyə tərəfindən vurulduğunun rəsmi səviyyədə elan edilməsi idi. Hər halda Rusiya onun təyyarəsinin Türkiyə hava qüvvələri tərəfindən vurulduğu iddiasında israrlı deyildi. Amma Türkiyə israrlı olaraq bildirdi ki, SU-24 bombardımançı təyyarə türk şahinləri tərəfindən vurulub. Yəqin ki, vaxtilə Uzaq Şərqdə Cənubi Koreyanın sərnişin təyyarəsinin Sovetlər tərəfindən, ötən ilin yayında isə Malayziya sərnişin təyyarəsinin ruslar tərəfindən vurulması yaddan çıxmayıb. Hər iki hadisə inkar edilsə də, lakin təkzibedilməz dəlillərdən yayınmaq mümkün olmadı. Türkiyə isə tək qətiyyət deyil, həm də siyasi əxlaq nümayiş etdirdi. Açığı cənab Putin Krımın işğalı, Gürcüstan, Ukrayna və Suriyaya müdaxiləsi ilə ölkəsində və dünyada özünün qorxunc, türklər demiş “dəli Petro” obrazını yarada bilmişdi. Qərbin centlmen rəhbərləri ondan uzaq olmağa, rus tanklarının qarşısına bəyanatlarla çıxmağa üstünlük verir, son rus çarının güc siyasətinə adaptasiya olmağa meyllənirdilər. Cənab Ərdoğan öz qətiyyəti və iradəsi ilə dünyanı Putinin girovluğundan xilas etdi. İmitasiya deyil, mövqe nümayiş etdirdi, ölkəsinə və şəxsinə hörmət hissini ortaya qoydu. Hava sərhədlərini pozmuş Rusiya təyyarəsini vurmaq türklər üçün risk deyildi, zərurət idi, ölkənin nüfuzu məsələsi idi. Azərbaycanda bəziləri üzrxahlıq fikrini atıb ortaya. Tamamilə yanlış yanaşmadır. Baş vermiş olayda Türkiyə suç sahibi deyil, güc nümayişinin qarşısında Ankara qətiyyət sərgilədi. Hər ləyaqətli ölkə, hər ləyaqətli lider belə etməli idi. Ərdoğan da bunu etdi!”.

26 Noyabr 2015 6:08

Hakimiyyət Türkiyəni müdafiə etmədi; YAP-dan “hər ikisi günahkardır” açıqlaması

“Rusiya təyyarəsinin Türkiyə tərəfindən vurulmasından sonra olan gərginlik Azərbaycana ciddi təsir etməyəcək. Çünki Azərbaycan həmin problemin iştirakçısı deyil”. Bu sözləri AzNews.az-a açıqlamasında Yeni Azərbaycan Partiyasının (YAP) Siyasi Təhlil və Proqnozlaşdırma şöbəsinin müdiri, deputat Aydın Mirzəzadə deyib. O, bildirib ki, Azərbaycan hər iki ölkə arasındakı münasibətlərin yaxşılaşmasına çalışır: “Hər iki ölkə ilə Azərbaycanın sıx dostluq münasibətləri var. Dostlarımızın bir-biri ilə kəskin düşmən vəziyyətinə gəlməsi heç də xoşa gələn məsələ deyil. Azərbaycan öz tərəfindən bu iki ölkə arasındakı gərginliyi səngitmək üçün maksimum tədbirlər görəcək. Türkiyə və Rusiya regionun lider dövlətləridir. Onlar dünyada gedən proseslərə ciddi təsir etmək imkanına malik ölkələrdir. Son vaxta qədər onlar arasında çox sıx dostluq əlaqələri var idi. Təyyarənin vurulması məsələsi onlar arasındakı məsələni kəskinləşdirdi. Ümumilikdə, bu hadisə lider anlamlı bir problem ortaya çıxarda bilər. Həmçinin regionda gərginliyin və vəziyyətin ağırlaşmasına səbəb ola bilər. Bu baxımdan hər iki ölkə arasındakı gərginliyin minimuma endirilməsi lazımdır. Azərbaycan da bu istiqamətdə mümkündür ki, öz addımlarını atsın. Hər iki tərəf bizim üçün dostdur. Bu baxımdan Azərbaycan hər iki ölkə ilə münasibətlərinin yenidən yaxşı olmasına çalışır. Hesab edirəm ki, bu tip məsələlərdə günahkar və ya haqlı axtarmaq düzgün deyil. Hər iki dövlət dünyada təhlükəsizliyin qorunmasında məsuliyyətlidir. Bu səbəbdən hər iki tərəf vəziyyəti bu həddə çatdırmamalı idi”.

25 Noyabr 2015 7:31

Pənah Hüseyn: “İnqilablar bir qayda olaraq daxildən olur…”

Müxalifət xaricdən ixrac edilən inqilab ssenarilərində yer alıbmı... Təqaüddə olan xüsusi xidmət orqanının polkovniki Tofiq Rəcəbovun bir neçə gün öncə “Yeni Müsavat”a müsahibəsi ölkədə əks-səda doğurub. Polkovnik müsahibəsində iki il öncə prezident seçkiləri ərəfəsində Rusiya vasitəsilə ölkəmizdə dövlət çevrilişinə cəhd olunduğunu, bunun üçün 18 milyard pul ötürüldüyü, lakin pulların Bakı Hava Limanında saxlanıldığını bildirib.2000-ci ildə işdən çıxarılan T.Rəcəbov dövlət çevrilişi planının başında sabiq milli təhlükəsizlik naziri Eldar Mahmudovun dayandığı barədə sensasion faktlar açıqlayıb. Polkovnik 18 milyardın Beynəlxalq Bankın sabiq prezidenti Cahangir Hacıyev tərəfindən götürüldüyünü də iddia edib. O, məbləğin xaricə göndərildiyini, bu prosesdə iki gün öncə deputatlığı əlindən alınan Çingiz Əsədullayev vasitəsilə “Azəriqazbank”dan istifadə olunduğunu söyləyib. Azərbaycan müxalifətinin iddia olunan inqilab ssenarisində rol alıb-almadığı haqda isə polkovnik konkret nə isə açıqlamayıb.Bəs Azərbaycan müxalifəti indiyə qədər xaricdən ixrac olunan inqilab ssenarilərində hansısa şəkildə iştirak edibmi?Azərbaycan Xalq Partiyasının sədri Pənah Hüseyn öncə bildirdi ki, Azərbaycandan yüz milyonlarla, milyardlarla pulların çıxarıldığından söhbət getsəydi, daha inandırıcı olardı: “Amma Azərbaycana 18 milyard pul gətirilməsi söhbəti inandırıcı görünmür. Müxalifətin indiyə qədər hansısa xaricdən ixrac edilən inqilab ssenarilərində yer aldığı barədə bir şey deyə bilmərəm. Bundan sonra da müxalifətin belə ssenarilərdə yer alıb-almayacağı haqda da konkret fikir söyləmək çətin olar. Mənə elə gəlir ki, inqilablar bir qayda olaraq daxildən olur və daxildən olmayanda fəsadlar törədir”.Xatırladaq ki, 2013-cü il prezident seçkilərindən öncə Azərbaycanda Rusiyanın hakimiyyət dəyişikliyi planları olduğu haqda böyük səs-küy yaradan proseslər müşahidə edilmişdi. Rüstəm İbrahimbəyov və “Milyarderlər ittifaqı” projeləri dövriyyəyə buraxılmışdı.

21 Noyabr 2015 11:05

“Yalan yayan KİV-lər cəzalanacaq” – Əli Həsənov

“Azərbaycan Respublikasında söz və məlumat azadlığı, hər kəsin, o cümlədən kütləvi informasiya vasitələrinin, jurnalistlərin sərbəst şəkildə informasiya əldə etmək, hazırlamaq və yaymaq hüququ tam təmin edilib” Faktinfo.az xəbər verir ki, Azərbaycan Respublikası Prezidentinin ictimai-siyasi məsələlə üzrə köməkçisi Əli Həsənov son zamanlar kütləvi informasiya vasitələrində sui-istifadə hallarının artması faktı ilə bağlı Azərtac-a açıqlamasında belə deyib.Ə. Həsənov bildirib ki, KİV-lər Azərbaycanın daxili və xarici siyasəti, cəmiyyət həyatının müxtəlif sahələri, habelə dünyada baş verən mühüm hadisələr haqqında çoxsaylı məlumatlar, müxtəlif şərh və təhlillər hazırlayır və ictimai rəyə təqdim edirlər: “Söz və məlumat azadlığı Azərbaycanda vətəndaş cəmiyyəti quruculuğunun mühüm tərkib hissəsidir və qarşıdan gələn dövrdə də Azərbaycan dövləti KİV-lərin müstəqilliyinin gücləndirilməsi istiqamətində səylərini davam etdirəcəkdir.Bununla yanaşı, təəssüflə qeyd etmək lazım gəlir ki, KİV-lərin sərbəst fəaliyyəti üçün yaradılmış əlverişli şəraitdən son zamanlar sui-istifadə halları artıb. Xüsusilə internet media orqanlarında müxtəlif dövlət strukturları, onların rəhbərləri və əməkdaşları haqqında həqiqətə uyğun olmayan, əsassız, qərəzli, hətta şantaj xarakterli çoxsaylı məlumatlar yayılır. Vəzifəli şəxslərin guya işdən “kənarlaşdırılması”, rəhbərlik etdikləri qurumlarda “yoxlamalar”, evlərində “axtarışlar” aparılması, məmurların “həbsi”, vəzifələrindən uzaqlaşdırılmış bəzi dövlət qurumlarının rəhbərləri ilə “əməkdaşlığı” və s. bu tipli qərəzli məlumatlar məqsədli şəkildə dövriyyəyə buraxılır. Əminliklə demək olar ki, belə məlumatlar yayan KİV-lər bununla öz tirajlarını artırmağa və mənfəət əldə etməyə çalışırlar. Diqqətə çatdırıram ki, bu tipli fəaliyyət qanuna ziddir və birbaşa hüquqi məsuliyyət doğurur.Təəssüf ki, bəzi hallarda aparıcı KİV-lər də belə dezinformasiyaları tirajlayaraq öz oxucularını çaşdırırlar. Sosial şəbəkələrdə və məqsədli şəkildə fəaliyyət göstərən internet saytlarında yerləşdirilmiş yalan məlumatlar yoxlanılmadan, həqiqiliyi araşdırılmadan həmin ciddi media orqanlarının səhifələrinə yerləşdirilir.Nəzərə almaq lazımdır ki, mövcud hal dövlət orqanlarının nüfuzuna xələl gətirir, onların iş rejiminin pozulmasına, cəmiyyətdə çaşqınlıq yaranmasına səbəb olur və ümumilikdə, Azərbaycan dövlətinin imicinə mənfi təsir göstərir.Hesab edirik ki, Azərbaycan KİV-ləri, jurnalistlər daim məsuliyyətli olmalı, mövcud qanunvericiliyin tələblərinə əməl etməli, KİV-lərin sərbəst fəaliyyəti üçün yaradılmış əlverişli şəraitdən sui-istifadə hallarına yol verməməlidirlər. Jurnalist birlikləri, xüsusilə Mətbuat Şurası hazırda müşahidə olunan mənfi meyllərin aradan qaldırılması istiqamətində əməli tədbirlər görməlidirlər. Əks-təqdirdə qanuna zidd fəaliyyət göstərən, yalan məlumatlar yayan, cəmiyyətdə çaşqınlıq yaradan KİV-lər və jurnalistlər haqqında müvafiq hüquqi ölçü götürüləcəkdir”.

18 Noyabr 2015 3:59

Fakt

Bizi izləyin