“Qarabağ”ın “Beşiktaş” yalanı

85a6886bc880ade448141237a2ddc9aa

7 Yanvar 2017 14:28

Xəbər 12 dəfə oxunub

Azərbaycan çempionu “Qarabağ”ın Türkiyə Superliqasının son qalibi “Beşiktaş”la yoldaşlıq görüşü yaxın aylarda baş tutmayacaq. Faktinfo.az xəbər verir ki, bu barədə İstanbul klubunun mətbuat xidmətinin rəhbəri Selim Şakarcan məlumat verib.

 

O bildirib ki, yaxın zamanlarda hər hansı oyun nəzərdə tutulmayıb. Şakarcan bunun üçün “Beşiktaş” klubunun vaxtının olmadığını da əlavə edib.

 

Halbuki ötən ay “ağ-qaralar”ın prezidenti Fikrət Orman Türkiyə mətbuatına açıqlamasında klubun adını çəkmədən, Azərbaycanda özəl oyun keçirəcəklərini bildirmişdi. Daha sonra isə “Qarabağ”ın icraçı-direktoru Əmrah Çəlikəl “Beşiktaş”ın məhz Ağdam təmsilçisi ilə yoldaşlıq görüşü keçirəcəyini açıqlamışdı. Lakin məlum olub ki, yanvar ayına planlaşdırılan qarşılaşma həm bu, həm də yaxın aylarda baş tutmayacaq.

 

Ötən ilin əvvəlində isə “Qarabağ”ın Türkiyənin digər nəhəng klubu “Qalatasaray”la yoldaşlıq matçı keçirəcəyi haqda xəbərlər yayılmışdı. Ancaq martın 29-na planlaşdırılan həmin oyun da baş tutmamışdı.