STAR zavodunun podratçıları tətil elan edib

7 Yanvar 2017 11:15

Xəbər 34 dəfə oxunub

SOCAR-ın Türkiyədəki aktivi olan STAR neft emalı zavodunun tikintisində iştirak edən əsas podratçı şirkətlərdən biri “İlk İnşaat”ın təxminən 600 işçisi tətil elan edib.

 

Faktinfo.az  Türkiyə mətbuatına istinadən xəbər verir ki, Hindistandan olan işçilər maaşlarını nizamlı şəkildə ala bilmədiklərini və qeyri-qənaətbəxş şərtlərlə çalışdıqlarını əsas gətirərək ötən gün işə çıxmayıblar.

 

Uzun müddətdir əmək haqlarının ödənmədiyini deyən işçilər sığınacaqlarının, o cümlədən qidalanma şərtlərinin də çox pis olduğunu qeyd edib. Məlumata görə, onlar üçün xüsusi olaraq ayrılan hindli aşpazın olmasına baxmayaraq, yeməkxanada yalnız türk yeməkləri verilir.

 

Məsul şəxslərin müdaxiləsi və şərtlərin düzəldiləcəyi ilə bağlı vədlərin verilməsindən sonra işçilər yenidən çalışmağa başlayıb.
“İlk İnşaat”dan sonra daha bir podratçı şirkət – “Gemont”un işçiləri də etiraz edib. Digər iki podratçı şirkətin işçilərini hava durumu ilə əlaqədar “Çayağzı” istiqamətindəki düşərgəyə göndərməsi “Gemont”un işçilərinin etirazına səbəb olub. Onlar bunun haqsızlıq olduğunu bildirərək çalışmaqdan imtina ediblər. Nəticədə xeyli işçi eyni anda işi dayandırıb.
Məsələ ilə bağlı açıqlama verən STAR neft emalı zavodunun rəsmilərinin sözlərinə görə,  hindli işçilərin qidalanması məsələsi ilə bağlı kiçik problem yaranıb və məsələ artıq həll edilib: “Yemək məsələsinin bizimlə əlaqəsi yoxdur. Düşərgədə hindli işçilərin yeməkləri xüsusi hindli aşpaz tərəfindən hazırlanır. Lakin bəzən burada türk yeməkləri də verilir. Bu zaman yeməyin çəkisində müəyyən fərq yaranır ki, bu da narazılığa səbəb olur. Biz işçilərlə danışaraq məsələni həll etmişik”.

Azərbaycanda neft hasilatı 7,3% azalıb

Bu ilin yanvar-fevral aylarında Azərbaycanda sənaye sahəsində 6,5 mlrd. manatlıq və ya əvvəlki ilin müvafiq dövrü ilə müqayisədə 3,7% az sənaye məhsulu istehsal edilib. Dövlət Statistika Komitəsindən “APA-Economics”ə verilən məlumata görə, sənayenin qeyri-neft sektorunda məhsul istehsalı 5% artıb, neft sektorunda isə 5,1% azalıb. Sənaye məhsulunun 71,8%-i mədənçıxarma sektorunda, 22,5%-i emal sektorunda, 5%-i elektrik enerjisi, qaz və buxar istehsalı, bölüşdürülməsi və təchizatı sektorunda, 0,7%-i isə su təchizatı, tullantıların təmizlənməsi və emalı sektorunda istehsal olunub. Mədənçıxarma sektorunda neft hasilatı 7,3% azalıb, əmtəəlik qaz hasilatı isə 5,3% artıb. Emal sektorunda qida məhsullarının istehsalı 1%, içkilərin istehsalı 59,8%, toxuculuq sənayesi məhsullarının istehsalı 2,6 dəfə, geyim istehsalı 48,5%, ağacın emalı və ağacdan məmulatların istehsalı 46,7%, kağız və karton istehsalı 4,6%, əczaçılıq məhsullarının istehsalı 58,9%, rezin və plastik kütlə məmulatlarının istehsalı 82,3%, tikinti materiallarının istehsalı 71,2%, metallurgiya sənayesi məhsullarının istehsalı 23%, kompüter və elektron məhsulların istehsalı 82,8%, elektrik avadanlıqlarının istehsalı 3,4 dəfə, sair nəqliyyat vasitələrinin istehsalı 25,6%, mebel istehsalı 73,2% artıb, tütün məmulatlarının istehsalı 63,5%, dəri və dəri məmulatlarının, ayaqqabıların istehsalı 36,2%, poliqrafiya məhsullarının istehsalı 66,1%, neft məhsullarının istehsalı 6,1%, kimya sənayesi məhsullarının istehsalı 6,7%, hazır metal məmulatlarının istehsalı 11,0%, maşın və avadanlıqların istehsalı 66,2%, maşın və avadanlıqların quraşdırılması və təmiri işləri isə 53,7% azalıb. Elektrik enerjisi, qaz və buxar istehsalı, bölüşdürülməsi və təchizatı sektorunda istehsalın həcmi 3,3 faiz artıb, su təchizatı, tullantıların təmizlənməsi və emalı sektorunda isə 1,3% azalıb.

14 Mart 2017 18:23

Dollar bahalaşacaq, neft ucuzlaşacaq… – Neçayev

Rubl kəskin ucuzlaşacaq. Bunu jurnalistlərə açıqlamasında Rusiyanın keçmiş iqtisadiyyat naziri Andrey Neçayev söyləyib. “Rusiya OPEK ölkələrini neft hasilatını azaltmağa razı saldığı dövr ərzində Amerika şirkətləri slans neftinin hasilatı üçün texnologiyalarını inkişaf etdirdilər. OPEK və Rusiyanın hasilatı azaltmasından sonra ABŞ dərhal hasilatı artırdı. Bununla ABŞ başqa ölkələrin etdiyi ixtisarların yarısını kompensasiya etmiş oldu. Beynəlxalq Energetika Agentliyinin proqnozlarına əsasən, gələn il ABŞ-da sutkalıq hasilat 9,73 milyon barrelə çatacaq və OPEK-lə Rusiyanın ixtisarından sonra yaranmış boşluğu dolduracaq. Belə olan halda OPEK ölkələrinin ixtisar haqqında razılaşmanı saxlayacaqları böyük sual doğurur. Əgər Tramp özünün seçkiqabağı vədlərini yerinə yetirsə və Meksika körfəzi ilə Arktikada hasilata izn versə, o zaman neft bazarında situasiya kəskin şəkildə pisləşəcək. Buraya yaxın günlərdə ABŞ-ın Federal Ehtiyat Sisteminin faiz dərəcələrinin artırılması gözləntisini də əlavə edin. Bu, həm də dolları möhkəmləndirəcək. Bütün bu faktorlar neftin qiymətinin təxminən 10% düşməsinə imkan yaratdı. Böyük ehtimalla neftin qiyməti bu günlərdə 50 dollardan da aşağı düşəcək. Rubl artıq təzyiq altındadır. Yaxın günlərdə biz dolların daha 2-3 rubl bahalaşmasına şahid olacağıq”, – deyə o bildirib. Faktinfo.az

11 Mart 2017 12:31