ABŞ generalından şok: YPG-ni qorumaq üçün burdayıq 

Faktinfo.az Axar.az-a istinadən  xəbər verir ki, ABŞ ordusunun yüksək rütbəli zabiti general Pol Funkın Menbiçə səfəri və burada PYD/YPG terrorçuları ilə çəkilmiş fotoları qardaş ölkədə böyük rezonans doğurub.

Məlumata görə, Menbiçin qərbində yerləşən, Türkiyə Silahlı Qüvvələrinin və ASO-nun “Fərat qalxanı” bölgəsinin sərhədindəki Səyyadə, Aseliyyə, Muhsinə, Əl-Fərat, Um Meadise, Şeyx Yəhya və Cübbəl Arus kəndlərində patrul xidməti aparan ABŞ əsgərləri Dandaniyə və Səyyadə kəndlərində PKK terrorçuları ilə birlikdə 24 saat ərzində keşik çəkməyə başlayıb.

General Pol Funk Menbiçdə jurnalistlərə verdiyi açıqlamasında ABŞ əsgərlərinin İŞİD-i tam məğlub etmək üçün burada olduqlarını və bölgədən çəkilməyəcəklərini deyib.

General eyni zamanda bildirib ki, ABŞ əsgərləri YPG-ni dəstəkləmək və Türkiyənin həyata keçirdiyi əməliyyatdan sonra gərginliyi azaltmaq üçün Menbiçdədirlər.

Türkiyə ordusunun “Zeytun budağı” əməliyyatından narahatlıq keçirib-keçirmədiyi ilə bağlı suala isə general belə cavab verib:

“Narahat deyiləm. Xidmət zamanı narahatlıq olmaz, mənim işim döyüşməkdir”.

Qeyd edək ki, Menbiç ərazisində 3 hərbi qərargah quran Pentaqonun Tışrin su anbarı bölgəsində də ən azı 300 əsgəri və bir bazası olduğu barədə məlumatlar var. PKK mövqelərində keşik çəkən ABŞ əsgərlərinin sayının isə 80 olduğu bildirilir.