Aqil Abbas da yaxınlaşıb dedi ki, restoran açsan... -Çingiz Abdullayev

Təbiidir, xalqın gələcəyi üçün restoran da, bazar da lazımdır. Ancaq kitab mağazaları hamısından üstün olmalıdır.

Faktinfo.az xəbər verir ki, bu sözləri xalq yazıçısı Çingiz Abdullayev "Libraff" kitab mağazasının açılışında çıxışı zamanı deyib.

Onun sözlərinə görə, xalqın gələcəyi kitabdan asılıdır: “Siyasətimiz, iqtisadiyyatımız, ordumuz, elə Qarabağ məsələsi də bundan başlayır. Xalq inkişaf eləməsə, heç nəyə nail ola bilməyəcəyik. Mənə “Türklər kitab oxumur, azərbaycanlılar tacir xalqdır” deyəndə çox toxunurdu, mənsə deyirdim ki, xeyr, mən azərbaycanlıyam, türkəm, mən də, ətrafımdakı dostlar və uşaqlar da kitab oxuyur. Cənab Prezidentimiz 5 dildə sərbəst danışır: ingilis, fransız, rus, türk, Azərbaycan. Bəlkə biz də nümunə götürək, uşaqlarımız bu dilləri öyrənməyə istiqamətləndirək. Bu gün ingilis dilini bilməyən yaxşı alim olmayacaq. O biri dilləri bilməyənlər isə ümumiyyətlə internetdən istifadə edə bilməyəcək. Hər şey kitaba bağlıdır. Uşaqlıqda kitab oxumayan sonradan onu sevə bilmir. Mədəniyyət ocaqları nə qədər çox olacaqsa, xalqımız o qədər çox inkişaf edəcək”.

Çingiz Abdullayevin fikrincə, yazıçılar təvazökar ola bilməz: “Ona görə ki, hər bir yazıçı kitablarının oxunmasını istəyir. Azərbaycan yazıçılarının kitabları dünyada nə qədər çox satılsa, bizi o qədər çox tanıyacaqlar. Yazıçı xalqın ədəbiyyatda vəkilidir, onu təmsil edir. Əgər sən Azərbaycan yazıçısısansa, öz xalqını müdafiə etməlisən, sən etməsən kim müdafiə edəcək, erməni gəlib edəcək, yoxsa gürcü, rus?! Heç bir xalqın əleyhinə danışmıram. Bu xalqın yazıçısısansa, elə xalqın da tərəfində olmalısan”.