"Azərbaycanın Misirlə əlaqələrinin dərinləşdirilməsi diqqət mərkəzində saxlanılır" -Aqiyə Naxçıvanlı

Bu məqsədlə dövlətimiz İslam həmrəyliyi prinsipini daim rəhbər tutaraq ərəb ölkələri ilə həm ikitərəfli, həm də İslam Əməkdaşlıq Təşkilatı, Birləşmiş Millətlər Təşkilatı və digər beynəlxalq təşkilatlar çərçivəsində əməkdaşlığı inkişaf etdirir. Ölkə Prezidenti cənab İlham Əliyevin iyun ayının 7-də Misir Ərəb Respublikasına rəsmi səfəri də ölkələrimiz arasında əlaqələrin inkişafına böyük töhfə olacaq. Səfər çərçivəsində dövlət başçılarının keçirdikləri təkbətək və geniş tərkibdə görüşlər zamanı bir çox vacib məsələlər müzakirə olunmuş, Orta Şərq və Cənubi Qafqaz regionlarında gedən proseslər barədə fikir mübadiləsi aparılmışdır.”

Bu sözləri mətbuata verdiyi açıqlamasında Milli Məclisin deputatı Aqiyə Naxçıvanlı deyib.

A.Naxçıvanlı Prezident İlham Əliyevin Fələstin-İsrail münaqişəsinin nizamlanması istiqamətində səsləndirdiyi fikirlərindən danışarkən o, burada ədalətli və prinsipial mövqedən də bəhs edib: "İyunun 8-də Qahirədə mətbuata bəyanatla etdiyi çıxışında cənab Prezident İlham Əliyev bu gün bütün Ərəb dünyasını narahat edən məsələlər barədə dəyərli fikirlər səsləndirmişdir.O cümlədən Fələstin-İsrail münasibətlərinin tənzimlənməsi ilə bağlı Azərbaycanın birmənalı mövqeyini vurğulayan dövlət başçımız bildirmişdir ki, müstəqil Fələstin Dövləti qurulmalıdır, Şərqi Qüds onun paytaxtı olmalıdır. 

Qeyd olunmalıdır ki, bu məsələ ölkəmizin Qoşulmama Hərəkatına sədrliyi dövründə də hər zaman diqqət mərkəzində olub, mövzu ilə bağlı bir çox tədbirlər keçirilib. Cənab Prezident həmçinin bildirdi ki, bu gün Qəzzada yaşanan faciənin tezliklə dayandırılması və bütün məsələlərin danışıqlar yolu ilə həll olunması istiqamətində Misirin göstərdiyi səylər Azərbaycan tərəfindən dəstəklənir və bu təşəbbüslər mütləq diqqətə alınmalıdır. Öz çıxışında dövlət başçımız Azərbaycan-Ermənistan münasibətlərinə da toxunaraq bir daha bildirmişdir ki, hazırda iki ölkə öz dövlət sərhədlərini müəyyənləşdirmək işində müəyyən uğurlara nail olublar. Azərbaycanın Qazax rayonunun otuz ildən çox müddət ərzində işğal altında olmuş dörd kəndi danışıqlar yolu ilə ölkəmizə geri qaytarılmışdır və bu, əlbəttə ki, çox müsbət haldır. Hazırda danışıqlar prosesində irəliləyiş üçün yaxşı imkanlar var və Azərbaycan bu danışıqları aparmağa hazırdır. 

Cənab Prezident İlham Əliyev bir daha diqqətə çatdırdı ki, Azərbaycanın keçən ilin sentyabr ayında öz dövlət suverenliyini və ərazi bütövlüyünü tam bərpa etməsi Ermənistan ilə münasibətlərin normallaşdırılması yolunda önəmli amil olacaqdır” – deyə, Aqiyə Naxçıvanlı bildirib.