"Balaəli niyə dekan olmasın ki?!" – Fazil Mustafa

"Təhsilsizəm, amma hansı universitetə getsəm, dekan işləyərəm"

Təbii ki, meyxanaçının bu sözləri birmənalı qarşılanmayıb.

Mövzu ilə bağlı Bizim.Media-ya danışan Fazil Mustafa bildirib ki, əslində bu bir insani istəkdir:

“Bu istək də cəmiyyətimizdəki reallıqlara dayanır. Reallıqsa odur ki, minlərlə insan elmi, savadı olmadan belə diplom, elmi dərəcə ala bilir. Belə bir reallıqda Baləli niyə dekan olmasın?! Etiraf edək ki, ali məktəblərdə savadlı insanlar, elm adamları da var. Bununla paralel onlarla eyni cərgədə dayanan çox sayda savadsız insanlar da var.

Təəssüf ki, savadsız insanların da bir qismi həm dekandır, həm kafedra müdiridir, həm də uzun illərin “pedaqoqu”dur. Baləli də bunlara baxıb o iştaha düşüb. Axı, bizdə çox zaman insanlar qabiliyyətinə görə nəsə istəmir ki... Hamı ənənəyə görə, ətrafda baş verənlərə görə, gerçəkliyi görüb nəsə istəyir.

Kimsə öz ixtisası üzrə çalışmağı düşünmür. Düşünür ki, sıradan biri o statusa sahib çıxıbsa, deməli mən də onun kimi işləyə bilərəm. Ona görə də bu fikirlərinə görə Balaəlini qınamaq doğru olmaz. Baxır və özünü harasa layiq bilir. Nə olar ki, meyxanaçı olanda. Yəqin o fikirləşir ki, dekan kimi daha faydalı ola bilər”.

Millət vəkili təəssüflə qeyd edib ki, o qədər dekanlarımız, alimlərimiz var ki, elm sferasında bir dənə də olsun fikrinə rast gəlməmişik:

“Ona görə də belə vəziyyətdə Balaəlini yox, mühitimizi qınamaq lazımdır. O mühiti ki, insanlar orada özünə qabiliyyətindən daha artığını istəyir. Bu da guya bəzi hallarda qıcıq doğurur. Niyə qıcıq doğursun axı?! Ali məktəblərdə azmı balaəlilər var?! Və yaxud da ki, cəmiyyətimizdə üzdə olanların arasında Balaəli səviyyəsində olanlar azdımı?!

Ona görə də bu fikirlərə görə Balaəlini qınamaq doğru olmaz. Nə qədər ki, cəmiyyətimizdə insanlar qabiliyyətinə görə müəyyən bir mövqeyə gəlib çatmayırsa, bir o qədər də “balaəlilər” söz və mənsəb sahibi olacaq”.