BSU-da Bilik günü qeyd olunub 

Faktinfo.az-a verilən məlumata görə,tədbirin əvvəlində universitetin foyesində yerləşən Ulu Öndər Heydər Əliyevin büstü önünə əklil qoyulub. Mərasimin ardından Azərbaycan Respublikasının Dövlət himni səsləndirilib.

Tədbiri giriş sözü ilə açan BSU-nun rektoru, professor Nurlana Əliyeva tələbələri yeni tədris ili münasibətilə təbrik edərək onlara dərslərində uğurlar arzulayıb. Rektor Azərbaycan təhsil sisteminin müasir dövrdə çox böyük nailiyyətlər əldə etdiyini diqqətə çatıdıraraq bəşər sivilizasiyasına böyük töhfələr bəxş etmiş Azərbaycan xalqının zəngin maarifçilik ənənələri, pedaqoji fikir tarixi ilə qürur duyduğunu dilə gətirib. Professor N.Əliyeva bildirib ki, son illər ölkəmizdə humanitar sahədə qazanılan uğurların dövlət başçısı cənab İlham Əliyevin təhsilin inkişafı ilə əlaqədar imzaladığı proqramlar çərçivəsində həyata keçirilən islahatların, ölkənin birinci xanımı Mehriban Əliyevanın təhsil obyektlərinin yeniləşməsi sahəsində gördüyü işlərin və dövlətimizin bu sahəyə xüsusi qayğısının nəticəsi kimi dəyərləndirilməlidir. Nurlana Əliyeva qeyd edib ki, Bakı Slavyan Universitetində təhsilin səviyyəsi, burada tələbələrin biliklərə yiyələnməsi üçün yaradılan şərait hər zaman diqqət mərkəzində olub. Universitetin potensialı istiqamətində mütəmadi olaraq işlər görüldüyünü deyən N.Əliyeva bu il BSU-ya qəbul sayının ötən illərlə müqayisədə daha da artdığını diqqətə çatdırıb. Rektor universitetin qarşıda duran məqsədlərindən söz açaraq deyib: ”Hazırda Bakı Slavyan Universiteti regionun xarici ölkə universitetləri ilə beynəlxalq əməkdaşlıq

quran ən fəal universitetlərindən birinə çevrilib. Bu əlaqələri inkişaf etdirməklə dünya təhsilinin ən mütərəqqi ənənlərini universitetimizdə tətbiq etmək, tədris və tərbiyə sahəsində yeni uğurlara imza atmaq, universitetin maddi-texniki bazasını beynəlxalq standartlara uyğunlaşdırmaq başlıca məqsədimizdir”.

Sonra BSU tələbələrinin hazırladığı bədii kompozisiyalar, şeirlər, milli rəqslər təqdim olunub.

Nəsimi rayon İcra Hakimiyyətinin başçısı Asif Əsgərov çıxışında ölkədə təhsil məsələləri ilə bağlı görülən işlərdən, Azərbaycan Respublikasının Prezidenti cənab İlham Əliyev tərəfindən təhsilə olan diqqət və qayğıdan danışaraq bildirib ki, Nəsimi rayon ərazisində yerləşən ali və orta məktəblərdə həm təhsil səviyyəsinə, həm də müəssisələrin vəziyyətinə ciddi fikir verilir. İcra başçısı qeyd edib ki, təhsil ocaqlarında yaradılan münbit şərait, onların texniki avadanlıqlarla təmin olunması müasir təhsil sisteminin ölkəmizdə inkişafının göstəricisidir.

Tədbirdə bu il Bakı Slavyan Universitetinə yüksək bal toplayaraq qəbul olan tələbələrə rektor Nurlana Əliyeva tərəfindən hədiyyələr bağışlanıb. BSU-nun filologiya və xarici dil müəllimliyi fakültəsinə 622 balla qəbul olan birinci kurs tələbəsi Sitarə Şahmuradlı, 599 bal toplayan Aytac Hüseynli qazandıqları müvəffəqiyyətlə bağlı öz təssüratlarını bölüşüblər.

Millət vəkilləri Qənirə Paşayeva və millət vəkili Elman Nəsirov BSU-ya yüksək göstərici ilə qəbul olan gəncləri təbrik edərək olara təhsil sahəsində uğurlar arzulayıblar.

Bilik günü ilə bağlı təbrik nitqi ilə çıxış edən BSU-nun professoru Rəhilə Quliyeva yeni tələbə adı qazanan gəncləri öz bilikləri, bacarıqları, əxlaqları ilə cəmiyyətdə nümunə olmağa çağırıb, tələbələri ölkənin ictimai-siyasi həyatında fəal iştirak etməyə səsləyib.

Tədbirdə Qırğızıstan Respublikasının Azərbaycandakı sabiq səfiri Ayciqit Buranov, millət vəkilləri Sahibə Qafarova, Kamilə Əliyeva, Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova, “İki sahil” qəzetinin baş redaktoru Vüqar Rəhimzadə, təhsil ekspertləri Şahlar Əsgərocv, Nadir İsrafilov və mətbuat nümayəndələri iştirak ediblər.

Tədbir konsert proqramı ilə davam edib.