Bu çörəklər sağlamlığımız üçün zərərlidir - Ekspert 

Bərəkətin dadından ləzzət ala bilməyən vətəndaşlar problemi çörək sexlərinə, zavodlara nəzarət edilməməsində görürlər.

Problemlə əlaqədar Axar.az-a açıqlama verən Azad İstehlakçılar İctimai Birliyinin sədri Eyyub Hüseynov bildirib ki, son zamanlar onlara da çörəklə bağlı daxil olan şikayətlər artıb.

E.Hüseynov bildirib ki, bu ilin iyulun 1-dən etibarən çörəklə bağlı standartlar məcburi hesab olunmur:

“Yəni kim necə istəsə, çörəyi o formada hazırlayıb bazara çıxara bilər. Qiymətlərə də heç kimin müdaxilə etmək hüququ yoxdur.

Üzü qırmızı qaysaq bağlayan zavod çörəklərində adətən şəkərin miqdarı çox olur. Belə çörəklər insanların sağlamlığı üçün zərərlidir. Qətiyyən məsləhət deyil, xüsusilə uşaqlara.

Çörəklərlə bağlı xüsusi bir monitorinq aparılmır. Yalnız daxil olan şikayətlər araşdırılır. Hazırda ölkədə çörəklərlə bağlı problemlər var”.

E.Hüseynov bildirib ki, bu gün Azərbaycanda çörəkbişirmə bazarın ən liberallaşmış biznesidir. Kim harda istəsə, çörək istehsal edə bilər:

“Bəzən çörək istehsalında tərkibində ağır metallar olan, yodlaşdırılmayan duzlardan istifadə olunur.

Çörəklə bağlı şikayətlər daha çox iki formada olur: çörəyin tez bir zamanda xarab olması və içərisinin yapışqan olması. Bu o deməkdir ki, çörəyin tərkibindəki unda və ya bişirildiyi avadanlıqda problem var. Bəzi çörək sexlərində çörəyin bişirildiyi avadanlıq bakteriyalarla zənginləşdiyi üçün çörəkdə kartof xəstəliyi əmələ gəlir. Belə şərtlərdə çörək istehsalı dayandırılmalı, avadanlıqlar yuyulub-təmizlənməlidir”.

Azərbaycan Qida Təhlükəsizliyi Agentliyinin mətbuat xidmətinin rəhbəri Mənsur Piriyev məsələ ilə bağlı açıqlamasında bildirib ki, agentliyə daxil olan şikayətlərin araşdırılması üçün xüsusi təftiş şöbəsi var:

“Vətəndaşın aldığı çörəklə bağlı şikayəti varsa, agentliyin “Qaynar xətti”nə müraciət edə bilər. Çörəyi aldığı yer, çörəyin hansı şirkətə məxsus olduğunu bildirdiyi təqdirdə şikayət araşdırılır”.