Ədibə İsmayılova:Şikayət anonim olduğuna görə qərəzlidir,burada hər kəs kabinetində oturub işini görür 

Bunu Axundov adına Milli Kitabxananın direktor müavini Ədibə İsmayılova mətbuata açıqlamasında bildirib.O, kitabxanada heç kimin təhqir olunmadığını,fəhlə əvəzi işlədilmədiyini vurğulayıb.Elə bir hal baş versəydi,yəqin şikayətçinin kimliyi bəlli olardı,deyib. 

Faktinfo.az xəbər verir ki, Ədibə İsmayılova mövzu ilə bağlı Musavat.com saytına da münasibət bildirib: "Yayılan məlumatlar doğru deyil.Bəlkə kimsə qərəzli yazıb. Bu barədə direktora da məlumat verəcəyəm.Ola bilsin ki, kimsə qəsdən belə bir iş tutub. Biz kimi fəhlə kimi işlədirik ki? Burada hamı ali təhsilli kitabxanaçılardır, kabinetində oturub işlərini görürlər. Hesab edirəm ki, şikayətlər anonim olduğuna görə qərəzlidir”.

Onu da xatırladaq ki, yayılmış məlumatlarda o da vurğulanıb ki,Gülüstan Sarayında keçiriləcək Milli Kitabxananın 100 illik yubiley tədbirinə sıravi işçilərin dəvət edilməməsi də zamanla narazılıq doğurub.Belə ki, 2023-cü ilin sentyabr ayında Azərbaycan Milli Kitabxanasının əməkdaşları işə çıxmamağa qərar veriblərmiş.

Faktinfo.az xatırladır ki,o dövr xəbərlər yayılanda məsələyə Axundov adına Milli Kitabxananın rəhbərliyi adekvat cavab verdi. Qarşı tərəfin mövqeyi belə idi: "Bir sıra saytlarda Gülüstan sarayında keçiriləcək Milli Kitabxananın 100 illik yubiley tədbirinə sıravi işçilərin dəvət edilməməsi səbəbilə işə çıxmamalarına qərar vermələri haqqında yayılmış xəbərlərin heç bir əsası yoxdur.Kitabxananın bağlı olması barədə yazılan məlumatlar da düzgün deyil.Milli kitabxana açıqdır və hazırda Elmi-praktik konfrans keçirilir. Eləcə də,Gülüstan sarayında keçiriləcək Milli Kitabxananın 100 illik yubiley tədbirinə sıravi işçilərin dəvət edilməməsi məsələsinə deyə bilərik ki, kitabxananın 100 illik yubiley tədbirinə nəinki sıravi işçilər,hətta Milli Kitabxanada işləmiş hazırda təqaüddə olan keçmiş əməkdaşlar da dəvətli idilər. Sadəcə 21.09.2023-cü ildə  keçiriləcəyi planlaşdırılmış M.F. Axundov adına Milli Kitabxananın 100 illik yubiley tədbiri,Qarabağ iqtisadi rayonunda törədilən genişmiqyaslı təxribatlar nəticəsində  şəhidlərimizin olması səbəbindən təxirə salındı."

Faktinfo.az