Əhliman Əmiraslanov rektor olduğu dövrdə Rəhimə Atəşə "Saxta" həkim-fizioterapevt vəsiqəsi verilib? -YENİLƏNİB

Hazırda ABŞ-da yaşayan jurnalist Qənirə Ataşova Azərbaycanda daha bir həkimin diplomunun saxta olduğu ilə bağlı məlumat paylaşıb.

Özünün "instagram" sosial şəbəkə  platforması hesabında paylaşdığı məlumatı və faktları təqdim edirik:

Azərbaycanın axsaq səhiyyə sisteminin diqqətinə! Bu sənədin sahibi Azərbaycan Səhiyyə Nazirliyindən həkim-fizioterapevt kimi sertifikat alıb.O,digər tibb universiteti məzunları kimi tam ixtisaslı həkim sertifikatını necə əldə edib? Gəlin, onun təhsil yoluna nəzər salaq:

2003-2008-ci ildə Odalar Yurdu Universitetində tibbi biologiya ixtisası üzrə bakalavr təhsil alıb.

Maraqlıdır ki,bir il sonra tibbi biologiya ixtisasını bitirən şəxs Şəmkir Rayon Xəstəxanasında həkim-fizioterapevt kimi internatura keçib. Saxtakarlığın ilk təməli elə burada qoyulub.

Tibbi biologiya üzrə təhsil alan biri hansı əsasla Şəmkirdə həkim-fizioterapevt kimi internatura keçə bilər? Daha sonra Azərbaycan Səhiyyə Nazirliyindən fizioterapiya və tibbi bərpa ixtisası üzrə praktik fəaliyyətlə məşğul olmaq üçün icazə alıb. Bu sertifikat həkimlərə verilən sertifikata çox bənzəyir, lakin tam eyni deyil. Bu şəxs isə bütün günü ekranlarda həkim-fizioterapevt kimi təqdim olunur və klinika idarə edir. Bu saxtakarlığı təkcə mən görürəm, yoxsa səhv görürəm? Bəs həkim kimdir? Tibbi biologiya ixtisasını bitirənlər nə vaxtdan həkim elan ediliblər?

Tibbi bioloq – biologiyanın tibbi aspektləri ilə məşğul olan mütəxəssisdir.O, insan orqanizminin bioloji proseslərini, xəstəliklərin molekulyar və hüceyrə səviyyəsində yaranma səbəblərini, onların diaqnostikası və müalicəsi üçün bioloji üsulları araşdırır.Tibbi bioloqlar laboratoriyalarda, tədqiqat institutlarında və biotexnologiya şirkətlərində çalışırlar.Başqa bir sual, ixtisası necə rahatlıqla dəyişmək olur? İnsan bədəninə sirayət edənlərə kim bu haqqı tanıyıb? Bu sualların cavabını xalq bilməlidir! Səhiyyə Nazirliyi və TƏBİB isə susmağa davam edir! Səhiyyə Nazirliyi heç nəyi görmək istəmir deyə Qənirə Ataşova qeyd edib.

Qeyd edək ki, 1992-ci ildən 24 noyabr 2015-ci ilədək Azərbaycan Tibb Universitetinin rektoru,hal-hazırda  Milli Məclisin Səhiyyə Komitəsininin sədri Əhliman Əmiraslanov olub.

Məlumat üçün bildirək ki,həmin şəxsə  Azərbaycan Tibb Universitetinin 2011-ci ildə Buraxılış imtahan komissiyası tərəfindən fizioterapevt ixtisası üzrə vəsiqə verilib. /Xalq.az

***

Bir necə gün öncə ABŞ-da yaşayan jurnalist Qənirə Ataşovanın Odlar Yurdu Universitetinin tibbi biologiya ixtisası üzrə bakalavr təhsilini başa vuran şəxsin həkim kimi çalışdığını yazaraq bu həkimə aid diplomları paylaşmışdı.

Apardığımız araşdıma zamanı bəlli oldu ki, Qənirə Ataşovanın paylaşdığı diplomlar fizioterapevt və reabilitiloq Rəhimə Atəşə məxsusdur.

Qənirə Ataşovanın yayımladığı xəbərdə bildirilirdi:

Azərbaycanın axsaq səhiyyə sisteminin diqqətinə! Bu sənədin sahibi Azərbaycan Səhiyyə Nazirliyindən həkim-fizioterapevt kimi sertifikat alıb. O, digər tibb universiteti məzunları kimi tam ixtisaslı həkim sertifikatını necə əldə edib? Gəlin, onun təhsil yoluna nəzər salaq:

- 2003-2008-ci ildə Odalar Yurdu Universitetinə tibbi biologiya ixtisası üzrə bakalavr təhsil alıb.

Maraqlıdır ki, bir il sonra tibbi biologiya ixtisasını bitirən şəxs Şəmkir Rayon Xəstəxanasında həkim-fizioterapevt kimi internatura keçib. Saxtakarlığın ilk təməli elə burada qoyulub.

Bu məlumat yayıldıqdan sonra, diplomun kimə məxsus olduğu öyrənməyə çalışdıq.

İddialara görə, bu diplomun sahibi Fizioterapiya və Reabilitasiya Mərkəzində çalışan, özünün sosial platmfora hesabında Dr. fizioterapevt və reabilitiloq kimi təqdim edən Rəhimə Atəşə məxsusdur.

Bu məlumatı yayımlamadan öncə, xanım reabilitiloq Rəhimə xanım Atəşlə əlaqə saxlamağa çalışdıq. Artıq iki gündür Rəhimə Atəşin qəbul telefonu ilə köməkçisi ilə əlaqə saxlayaraq, onun da mövqeyini təqdim etmək istədik. Amma nə yazıq ki, hər zəngimizdə Rəhimə Atəşin köməkçisi “Rəhimə xanıma məlumat vermişik, sizinlə əlaqə saxlayacaq”-deyə cavab verdi.

Redaksiyadan: Qarşı tərəfin də mövqeyini dərc etməyə hazırıq.

Vətəninfo.az