Görkəmli yazıçı, böyük alim və pedaqoq Mir Cəlal Paşayevin “Füzuli sənətkarlığı” əsərinin alman dilində nəşrinin təqdimat mərasimi keçirilib - FOTOLAR

Faktinfo.az xəbər verir ki,təqdimat mərasimində ADA universitetin rektoru Hafiz Paşayev, kitabın tərcüməçisi, Almaniyanın Giesen Universitetinin dosenti, şərqşünas-alim Mixael Raynhard Hess, Azərbaycan Respublikasının Mədəniyyət naziri Adil Kərimli, tanınmış elm və mədəniyyət xadimləri iştirak ediblər.

Qonaqları salamlayaraq tədbiri açan Milli Kitabxananın direktoru, prof. Kərim Tahirov istedadlı və orijinal yaradıcılıq üslubu olan Mir Cəlal Paşayevin Azərbaycan ədəbiyyatına yeni nəfəs gətirdiyini, çağdaş Azərbaycan tarixində ədəbiyyatşünas-nəzəriyyəçi alim kimi də müstəsna və özünəməxsus yer tutduğunu söyləyib. Qeyd edib ki, Mir Cəlal Paşayev 1940-cı ildə “Füzulinin poetik xüsusiyyətləri” əsərinə görə filologiya elmləri namizədi alimlik dərəcəsi alıb, 1958-ci ildə bu mövzuya yenidən müraciət edərək “Füzuli sənətkarlığı” adlı monoqrafiyasını nəşr etdirib, əsər sonralar latın qrafikası ilə 1994, 2007, 2018-ci illərdə təkrar nəşr olunub.

AMEA-nın prezidenti, akademik İsa Həbibbəyli Azərbaycan ədəbiyyatının əsas yaradıcılarından biri olan Mir Cəlal Paşayevin həm böyük alim, həm böyük pedaqoq, həm də böyük yazıçı kimi zəngin və çoxcəhətli fəaliyyətindən danışıb, Füzuli yaradıcılığının əsərdəki geniş təhlil ustalığı haqqında ətraflı bəhs edib.

AMEA-nın vitse-prezidenti, Akademik Ziya Bünyadov adına Şərqşünaslıq İnstitutunun baş direktoru, akademik Gövhər Baxşəliyeva dünən Azərbaycan Respublikasının Prezidenti cənab İlham Əliyev tərəfindən dahi Azərbaycan şairi Məhəmməd Füzulinin 530 illik yubileyinin qeyd edilməsi haqqında Sərəncamın imzalanması ilə bugünkü tədbirin üst-üstə düşməsini əlamətdar hesab edib, Füzuli yaradıcılığının ideya-mövzu və bədii-estetik cəhətlərinin dərindən araşdırıldığı bu əsərin Füzuli irsinin fərqli istiqamətlərdən öyrənilməsində mühüm önəm daşıdığını söyləyib.

AMEA Məhəmməd Füzuli adına Əlyazmalar İnstitutunun direktoru, akademik Teymur Kərimli günün simvolik olduğunu vurğulayaraq, elm yolunda ona işıq tutan, yol göstərən müəllimi Mir Cəlal Paşayevin “Füzuli sənətkarlığı” əsərinin elmi əhəmiyyətinə, qiymətli cəhətlərinə toxunaraq, XX əsr dünya Füzulişünaslığında Mir Cəlal müəllimin öz kürsüsü, öz yeri olduğunu bildirib, Füzuli dühasını dərindən açan bu əsərlə onun Füzulişünaslığın daşlı-kəsəkli yollarında Füzuli adına layiq əsər yaratdığını vurğulayıb.

AMEA-nın müxbir üzvü, BDU-nun professoru Təhsin Mütəllimov Mir Cəlal müəllimin əsərlərini bizlər üçün misilsiz yadigar adlandırıb, onun Füzulini dərindən bildiyini,  buna görə də Füzulinin  yaradıcılığını gözəl şəkildə açdığını söyləyib, Mir Cəlal Paşayevin həm tədqiqatçı, həm ustad-müəllim, həm də yazıçı kimi məktəb yaratdığını diqqətə çatdırıb.

AMEA Nizami Gəncəvi adına Ədəbiyyat İnstitutunun şöbə müdiri, Əməkdar elm xadimi,prof. Qəzənfər Paşayevin fitri istedada malik olduğunu, kitabın həmçinin İraqda da çap olunacağını qeyd edib.

Azərbaycan Respublikası Xarici İşlər Nazirliyinin idarə rəisi, dr. Rizvan Nəbiyev kitabın Almaniya və bir çox Avropa ölkələrində sürətlə yayıldığını, artıq bir çox universitet kitabxanalarının kataloqlarına daxil edildiyini, biblioqrafiyalara salındığını söyləyib, tərcüməçi-tədqiqatçıya Azərbaycan mədəniyyəti və ədəbiyyatının təbliğindəki xidmətlərinə görə təşəkkürünü bildirib.

Kitabın tərcüməçisi, Almaniyanın Giesen Universitetinin dosenti, şərqşünas-alim Mixael Raynhard Hess kitaba yazdığı “Giriş sözü”ndə həm Füzuli, həm də Mir Cəlal dövrünün ədəbi və tarixi-siyasi mühitinin elmi-tənqidi təhlilindən danışaraq, Füzuli dühasına Mir Cəlal Paşayevin bu əsəri vasitəsilə daha rahat daxil ola bildiyimizi, Füzuli və Mir Cəlal yaradıcılığının əksi olan bu əsərdə sənətlə elmin kəsişdiyini söyləyib, kitabın ərsəyə gəlməsinə görə onun təşəbbüskarı olan hörmətli Hafiz Paşayevə və tədbirin təşkilinə görə Mədəniyyət Nazirliyi və Milli Kitabxanaya minnətdarlığını bildirib, Füzulinin “Yetməzmi” adlı qəzəlini səsləndirib.

ADA universitetin rektoru, prof. Hafiz Paşayev əsərin yazılma tarixi haqqında Mir Cəlal müəllimin xatirələrindən danışıb, kitabın tərcüməçisi dr. Mixael Raynhard Hessə, tədbirin təşkilinə görə Milli Kitabxananın rəhbərliyinə və bütün qonaqlara təşəkkürünü bildirib.

Sonda XX əsr Azərbaycan ədəbiyyatının görkəmli nümayəndəsi, ədəbiyyatşünas-alim, professor Mir Cəlal haqqında Milli Kitabxananın hazırladığı Elektron məlumat bazasının təqdimatı olub.