Milli Kitabxanada “27 mart -Beynəlxalq Teatr Günü” adlı kitab sərgisi açılıb 

Faktinfo.az xəbər verir ki,sərgidə Azərbaycanda teatr  sənətinin qədim və zəngin tarixi, peşəkar teatrın inkişafı, səhnə fədailəri, ölkəmizdən xaricdə Azərbaycan teatrlarının mövcudluğu, Avropa, Amerika, Rusiya və bir çox başqa xarici ölkələrin məşhur teatrları, dünya teatr və kinosunun ən görkəmli aktyorları, rejissorları haqqında Azərbaycan və xarici dillərdə ədəbiyyatlar nümayiş olunur.

Sərgi bir həftə davam edəcək.

Qeyd edək ki, martın 27-si bütün dünyada Beynəlxalq Teatr Günü kimi İTİ Mərkəzləri, İTİ Əməkdaşlıq Üzvləri, teatr mütəxəssisləri, teatr təşkilatları, teatr universitetləri və teatrsevərlər tərəfindən qeyd olunur. Əlamətdar gün Beynəlxalq Teatr İnstitutunun 1961-ci ildə Vyanada keçirilən IX konqresində qəbul edilmiş qərara əsasən təsis olunub.

Hər il Dünya Teatr Günü münasibəti ilə nüfuzlu incəsənət xadimləri dünya ictimaiyyətinə müraciət edir. Bu ənənənin əsasını qoyan və ilk dəfə dünya ictimaiyyətinə Teatr Günü münasibəti ilə müraciət məktubu göndərən fransalı yazıçı Jan Kokto olub.

Bu il isə Beynəlxalq Teatr İnstitutu tərəfindən yunan rejissoru, Beynəlxalq Teatr Olimpiadası Komitəsinin sədri, Teodoros Terzopulos 2025-ci il üçün Ümumdünya Teatr Günü Mesajının Müəllifi seçilib.

Bu gün, bir qayda olaraq, bayram tədbirləri, konsertlər, aktyorluq sənəti üzrə ustad dərsləri, xeyriyyə tamaşaları, yeni əsərlərin premyeraları, istedadlı sənətkarlarla görüşlər təşkil olunur.