Milli Kitabxanada "Aprel döyüşləri – böyük zəfərin başlanğıcı" adlı virtual sərgi və eyniadlı ənənəvi geniş kitab sərgisi istifadəçilərə təqdim olunub - FOTO

Faktinfo.az xəbər verir ki,sərgilərdə Aprel döyüşlərində Lələtəpə yüksəkliyi, Talış yüksəkliyi və digər bir sıra mühüm strateji yüksəkliklərin işğaldan azad edilməsindən, "Aprel döyüşləri"nin canlı şahidləri - qazilərlə, iştirakçı olmuş kəşfiyyatçılarla müsahibələr, Vətən müharibəsi, Şanlı qələbə, tarixi zəfərimizin əldə olunmasında Müzəffər Ali Baş Komandan İlham Əliyevin uzaqgörən hərbi və siyasi strategiyasından, Azərbaycan əsgərinin əfsanəvi qəhrəmanlıqlarından, torpaqlarımızın azadlığı uğrunda canından keçən şəhidlərimizin döyüş yolundan bəhs edən Azərbaycan və müxtəlif dillərdə kitablar, dövri mətbuat məqalələri, fotolar nümayiş olunur.

Virtual Sərgi ilə tanış olmaq istəyənlər https://anl.az/el/vsb/Aprel_doyusleri/index.htm  linkindən istifadə edə bilərlər.

Ənənəvi sərgi bir həftə davam edəcək.

Qeyd edək ki, 2016-cı ildə “Aprel döyüşləri və ya dördgünlük müharibə” adı ilə tarixə düşmüş Aprel döyüşləri Azərbaycan üçün böyük zəfərin başlanğıcıdır. Dördgünlük müharibə Vətən müharibəsində işğalda qalan torpaqların işğaldan azad edilməsində həlledici rol oynayıb.

Azərbaycan Ordusu 2016-cı il aprelin 1-dən 2-nə keçən gecə Ermənistan silahlı qüvvələrinin təxribatlarına cavab verərək sürətli əks-hücum əməliyyatı ilə düşməni ağır məğlubiyyətə uğradıb. 4 gün davam edən əks-hücum əməliyyatında Talış kəndi ətrafındakı yüksəkliklər, Cəbrayıl rayonunun Lələtəpə yüksəkliyi, Cocuq Mərcanlı  və digər bir sıra mühüm strateji yüksəklikləri işğaldan azad edilib.

Geniş ərazini nəzarətdə saxlamaq imkanı verən olduqca strateji əhəmiyyətli Lələtəpə yüksəkliyinin  işğaldan təmizlənməsi Cəbrayılın Cocuq Mərcanlı qəsəbəsinin və Füzulinin Horadiz şəhərinin təhlükəsizliyini təmin edib. Döyüşlərdən sonra bir sıra yolların – Goranboyun Gülüstan kəndi, Tərtərin Suqovuşan (həmin zamanlar Madagiz adlanırdı) üzərindəki yolların nəzarətdə saxlanılması təmin edilib.

Faktinfo.az