Milli Kitabxananın nəzdində fəaliyyət göstərən Açıq Kitabxanada yazıçı-dramaturq Pərvin Nurəliyeva ilə görüş keçirilib - FOTOLAR

Tədbiri Azərbaycan Milli Kitabxanasının Elmi işlər və kitabxana-informasiya xidməti üzrə direktor müavini Ədibə İsmayılova açaraq qonaqları salamlayıb. Qeyd edib ki, 2016-cı ildə Açıq kitabxana layihəsi yaranandan  bu günə qədər açıq səma altında bir çox  poeziya gecələri, mütaliə axşamları, ayrı-ayrı yazıçı və şairlərlə görüşlər keçirilib, yazıçı və şairlərin yeni kitablarının təqdimat mərasimləri, imzalı görüşlər təşkil olunub. Belə görüşlərdən biri bu gün yazıçı-dramaturq, “Qobustan” dərgisinin baş redaktoru Pərvin Nurəliyeva ilə keçiriləcək.

Tədbirdə çıxış edən yazıçı-dramaturq Pərvin Nurəliyeva tədbirin təşkilində ev sahibliyi edən M. F. Axundov adına Azərbaycan Milli Kitabxanasının rəhbərliyinə və  Azərbaycan gənclərinin inkişaf hərəkatı ictimai birliyinə təşəkkürünü bildirib. Tədbir iştirakçıları və kitabsevər gənclər tərəfindən verilən sualları cavablandıran Pərvin xanım “190 yaşlı həmdəmim” kitabının yaranmasından, ədəbiyyat və incəsənətin həyatında kəsb etdiyi roldan  bəhs edib.

Qeyd edək ki, “İlin gənci”, “Qızıl Kəlmə” və bir sıra digər mükafatlara layiq görülən  Pərvin Nurəliyeva yaradıcılığa kiçik hekayələr, esselərlə başlayıb. Xalq yazıçısı Anarın yaradıcılığını təhlil edən “Anar dünyası”adlı nəsr kitabının və “Qar yağacaq” , “Balerin”(türkcə) kitablarının müəllifidir.

Sonda yazıçı-dramaturq Pərvin Nurəliyeva ilə imza mərasimi keçirilib, xatirə şəkilləri çəkilib.

Faktinfo.az