Ofisi olmayan "papka komitə"nin,həmkarlar ittifaqı komitəsi işdən çıxarılmağımızda "dəyənək rolu" oynayıbsa yoxlanılmalıdır -ŞİKAYƏT

Bu günlərdə şikayətçi müəllimlərin özləri tərəfindən araşdırılıb, göndərilən sonuncu məqalədən görünür ki,yaranmış vəziyyət Azərbaycan Kənd Təsərrüfatı və Qida Sənayesi İşçiləri Həmkarlar İttifaqı barədə də bəzi nüansları ortaya çıxarıb.

Ölkə mətbuatına,eləcə də Faktinfo.az saytına göndərilən məqaləni olduğu kimi təqdim edirik:

Tovuz Dövlət Sosial- İqtisadi Kollecinin müəllimləri olaraq Azərbaycan Respublikasının Elm və Təhsil Nazirliyinə, müxtəlif dövlət qurumlarına,həmçinin mətbuata şikayət və müraciətlər ünvanlamaqla hüquqlarımızın pozulması barədə məlumat vermişdik.

Bildirmişdik ki,Tovuz Dövlət Sosial- İqtisadi Kollecinin Həmkarlar İttifaqı Təşkilatı  kollecin direktorunun 6 noyabr 2024-cü il tarixli 058 № -li təqdimatını,14 noyabr 2024-cü il tarixində müzakirə edərək,Ələkbərova Şahnaz Azər qızı,Vəliyeva Aynurə Mirzəli qızı, İsayeva Aygün Müslüm qızı, Musayeva Şəhla Dilqəm qızının əmək fəaliyyətinə xitam verilməsi barədə qərar qəbul edib. Xəbər ictimailəşəndən bir müddət sonra İsayeva Aygün Müslüm qızı və Vəliyeva Aynurə Mirzəli qızı (yəni hazırkı halda biz) istisna olmaqla, digər üç müəllim müvafiq işlə təmin olunublar.

 Qeyd edək ki,Tovuz Dövlət Sosial-İqtisadi Kollecinin müəllimlərinin əmək fəaliyyətinə xitam verildikdən sonra adları yuxarda qeyd edilən müəllimlər tərəfindən hüquqlarının pozulması iddiası ilə Azərbaycan Həmkarlar İttifaqları Konfederasiyasının sədri Sahib Məmmədov cənabına məktub ünvanlanıb.Araşdırmalardan sonra müəllimlərə Azərbaycan Təhsil İşçiləri Azad Həmkarlar İttifaqı Respublika Komitəsinin (ATİAHİ) sədr müavini Mirzə Cəfərzadənin imzası ilə 10 dekabr 2024-cü il tarixində 16-1-1/2-321/2024 saylı cavab məktubu göndərilib. Məktubda yazılır: “Tovuz Dövlət Sosial-İqtisadi Kolleci Azərbaycan Təhsil İşçiləri Azad Həmkarlar İttifaqının üzv təşkilatı olmadığından, müraciətlərinizin tərəfimizdən cavablandırılması mümkün deyil."

Məlum cavab biz şikayətçi müəllimlər- İsayeva Aygün Müslüm qızı və Vəliyeva Aynurə Mirzəli qızı və digər müəllimlərdə təəccüb doğurdu. Bundan sonra müxtəlif səpkidə yenə dövlət orqanlarına şikayət məktubları ünvanlamağa məcbur olduq.

Onu da qeyd edək ki,illərlə üzvlük haqqı ödədiyimiz Tovuz Dövlət Sosial-İqtisadi Kollecinin Həmkarlar İttifaqı Təşkilatının,Azərbaycan Təhsil İşçiləri Azad Həmkarlar İttifaqı Respublika Komitəsinin (ATİAHİ) üzv təşkilatı olmadığından xəbərimiz olmayıb.Ona görə də şikayətçi müəllimlər olaraq hesab edirlər ki,illərlə müəllimlərin əmək haqlarından tutulan üzvlük haqlarının hansı istiqamətlərdə xərcləndiyi,tibbi əməliyyat olunan, müalicə götürən, həyat yoldaşını itirən müəllimlərə yardımların edilib-edilmədiyi,müəllimlərə bu illər ərzində sanatoriyaya, istirahət evinə putyovkaların verilib-verilmədiyi yoxlanılmalıdır. 

Hər iki şikayətçi müəllim olaraq vurğulayırıq  ki,Tovuz Dövlət Sosial-İqtisadi Kollecinin Həmkarlar İttifaqı Təşkilatının sədr seçkilərinin nə zaman keçirildiyi, buna hansı baş təşkilatın nəzarət etdiyi şəffaf şəkildə müəllimlərə bəyan edilməlidir. Həmçinin,nədən bu qurumun Azərbaycan Təhsil İşçiləri Azad Həmkarlar İttifaqı Respublika Komitəsinə (ATİAHİ) üzv olaraq fəaliyyət göstərmədiyi aydınlaşmalıdır.Demirlər biz şəffaf fəaliyyət göstəririk, elədirsə yoxlamalardan da qorxmamalıdırlar, bizim şikayət etməyimizdən də inciməməlidirlər. Yoxlanılsın, biz də görək ki, hər şey qaydasında imiş,illərlə müəllimlərdən tutulan üzvlük haqları da əsl sahiblərinə çatıb,xərclənib.İnanın səmimiyyətimizə,bundan sonra Tovuz Dövlət Sosial-İqtisadi Kolleci barədə ictimai nəzarəti ən yüksək səviyyədə həyata keçirdəcəyik.Hətta kollecdə qış sessiya imtahanları barədə də məlumat verəcəyik.

Şikayətçi müəllimlər olaraq onu da qeyd etməliyik ki,araşdırdıq  bəlli oldu ki, müəllimlərin narazı olduqları həmkarlar təşkilatı Azərbaycan Kənd Təsərrüfatı və Qida Sənayesi İşçiləri həmkarlar İttifaqı Tovuz Rayon Komitəsinin,Tovuz Dövlət Sosial - İqtisadi Kollecinin Həmkarlar İttifaqı Komitəsidir.Yəni,1986- cı ildə Aqrar Sənaye Kompleksi İşçiləri Həmkarlar İttifaqları,1991-ci ildə Azərbaycan Aqrar Sənaye Kompleksi İşçiləri Həmkarlar ittifaqının adı dəyişdirilərək, Azərbaycan Kənd Təsərrüfatı və Qida Sənayesi İşçiləri həmkarlar İttifaqı adlanıb.

Qurumun saytına girib araşdırdıqda isə məlum oldu ki,Azərbaycan Kənd Təsərrüfatı və Qida Sənayesi İşçiləri Həmkarlar İttifaqı Tovuz Rayon Komitəsinin,Tovuz Dövlət Sosial - İqtisadi Kollecinin Həmkarlar İttifaqı Komitəsinin üzv təşkilat kimi sistemdə adı yoxdur.Azərbaycan Kənd Təsərrüfatı və Qida Sənayesi İşçiləri Həmkarlar İttifaqının Tovuz Rayon Komitəsinə gəlincə,Tovuz rayonunda heç ofisləri yoxdur.Yəni "papka komitədir",sədri də yaşlı Sahib Feyzizadə adlı şəxsdir.Hazırda həmin şəxsin xəstə olduğunu nəzərə alıb onunla görüşə bilməmişik.Əgər ofisi olmayan "papka komitə"nin, Tovuz Dövlət Sosial- İqtisadi Kollecinin Həmkarlar İttifaqı Komitəsi qərarla işdən çıxarılmağımızda "dəyənək rolu" oynayıbsa yoxlanılmalıdır,şəffaflıq təmin olunmalıdır.Ümumiyyətlə,kollecin maliyyə-təsərrüfat fəaliyyəti də təftiş edilməlidir.Bu barədə Maliyyə Nazirliyinə də məktublar ünvanlayacağıq.Bütün bunlara rəğmən fəaliyyəti şübhə doğurduğundan şikayətçi müəllimlər olaraq sual veririk:

Azərbaycan Təhsil İşçiləri Azad Həmkarlar İttifaqına tabe olmayan təşkilatın müəllimlərin fəaliyyətinə xitam vermək hüququ varmı?

Qeyd: Bayram günləri olduğundan Tovuz Dövlət Sosial - İqtisadi Kollecinin Həmkarlar İttifaqı Komitəsi ilə əlaqə yarada bilmədik.Təhsil müəissəsinin həmkarlar ittifaqı komitəsinin mövqeyini məqaləyə əlavə edə bilərik.

Faktinfo.az