"OĞURLUQ EDƏNİN ÜZÜNƏ TÜPÜRƏRLƏR..." - Kılıçdaroğlu o sözləri kimə ünvanlayıb? 

Kılıçdaroğlu namizəd olmama səbəbini belə izah edib: “Mənim namizəd olmamağımın səbəbi “namizəd olsan, üzünə tüpürərlər” deyən siyasilərin hədələri deyil. Çünki oğurluq edənlərin üzünə tüpürərlər, mən isə oğurluq etməmişəm...

Namizəd olmamağımın səbəbi, "namizəd olsan, səni daşqalaq edəcəklər" şüarı ilə təşkil edilən linç kampaniyalarından qorxduğum üçün də deyil, getdiyim yolda ölüm də daxil olmaqla heç bir qorxuya yer verməmişəm, qorxmuram! 

Namizəd olmamağımın səbəbi, guya müxalifətçi, qurulmuş kirli düzənin "əsgərinə", pulun tətikçinə çevrilən  media mənsublarının  “sən hansı üzlə namizəd olacaqsan!” deyən media mənsublarının böhtanları da deyil. Çünki mənim ölkəm, partiyam uğrunda mübarizəm millətimin vicdanına əmanətdir.

Namizəd olmamağımın səbəbi yalnız partiyamızı daxili münaqişələrə sürükləməmək və diqqəti mübarizə sahəsindən başqa sahələrə cəlb etməmək üçündür. Qurultayımız millətimizə, ölkəmizə, partiyamıza xeyirli olsun.

Kölgəmiz olsun, millətimiz heç bir təhlükədən qorxmasın deyə günəşin altında dayanmağı borcumuz hesab edən bir ənənədən gəlmişik. Günəşin altında dayanmağa cəsarət edənlərə salam olsun...”

Azpolitika.info xəbər verir ki, Türkiyənin "Sabah" nəşrinin köşə yazarı Mahmut Övür yeni məqaləsində Kılıçdaroğlunun bu açıqlamalarını analiz edib, onun bu mesajının kimə ünvanladığını açıqlayıb.

O, qeyd edib ki, Kılıçdaroğlunun bu sözləri ilk olaraq ağla Meral Akşenerin fikirlərini gətirir. 

Belə ki, Kılıçdaroğlundan əvvəl onun "Altı masa"dakı müttəfiqi Meral Akşener də oxşar açıqlama vermişdi: “Seçilməsinə vəsilə olduğumuz, kömək etdiyimiz şəxslərin böyük oğru olduğunu anladığımız zaman çəkdiyimiz ağrıları təsvir etmək mümkün deyil”.

Məqalə müəllifi qeyd edir ki, əslində bu açıqlamaların hər ikisinin hədəfi bəllidir: "İndi hər kəs Kılıçdaroğlunun kimi nəzərdə tutduğu ilə maraqlanır. Əslində ünvan o qədər aydındır ki, başqa ad axtarmağa ehtiyac yoxdur. Bəziləri “hamı ola bilər” desələr də,  həqiqət açıqdır. Bu gün korrupsiya ilə Türkiyənin gündəminə gələn oğurluq edənlərin tək bir adı var - İstanbul Böyükşəhər Bələdiyyəsinin keçmiş sədri Əkrəm İmamoğlu və komandası... Hələlik İstanbul Böyükşəhər Bələdiyyəsi ilə bağlı korrupsiya faylında nə Özgür Özelin, nə də Kılıçdaroğluna “səni tüpürcəkləri ilə boğacaqlar” deyən Gökhan Zeybekin, nə də başqa bir CHP-linin adı hallanmayıb. Belə olan halda heç kim onların oğru olduğunu iddia edə bilməz. Amma hələlik…".

Müəllif yazır ki, Akşener də ad vermədi, amma yenə də ünvanı təxmin etmək çətin olmadı: "Siyasilər dolayı, üstü qapalı danışsalar da, hamı kimin nəzərdə tutulduğunu anlayır.

Məsələn, Kılıçdaroğluna yaxın bir CHP üzvü həmin açıqlamanı belə şərh etmişdi: "Sözün tamamı yalnlz axmaqlara deyilir”.

"O qədər zəhərli siyasi zəmin formalaşmışdı ki, sıxıntıda olan Kılıçdaroğlu namizəd olmaq bir yana, "xəncərçi" elan etdiyi İmamoğluna da səs verməyə məcbur oldu. Nəhayət, daha dözmədi və bütün prosesi bir cümlə ilə ümumiləşdirdi - namizəd olmamağımın səbəbi siyasətçilərin “namizəd olsan, üzünə tüpürərlər” deyə təhdidləri deyil, çünki oğurluq edənlər üzünə tüpürürlər, mən də oğurluq etməmişəm",- deyə o, bildirilir.

Müəllif yazır ki, Kılıçdaroğlu Dəniz Baykal qədər aydın və dəqiq danışa bilməsə də, bu qədəri belə CHP-ni sarsıtmağa kifayət etdi: "Bu əsasda qurultaya getmək, Özgür Özəlin həmin qurultaydan güclü yeganə namizəd kimi çıxması və ya İmamoğlunun partiyada hələ də nüfuz sahibi olduğunu xəyal etmək heç bir fayda verməyəcək. Sabiq CHP sədri Kılıçdaroğlunun oğurluq ittihamı onların yaxasını buraxmayacaq. Bu onlar üçün ağır hesabdır. Ona görə də bazar günü keçiriləcək qurultayın nəticəsi nə olursa olsun, CHP tarixinin ən mübahisəli qurultayı olacağı aydındır. Kılıçdaroğlu namizəd olmayacağını və qurultaya qatılmayacağını açıqlayıb. Belə olan halda xeyli sayda nümayəndə iştirak etməsə, qurultay nəinki korrupsiyanın kölgəsində qalacaq, həm də onun siyasi legitimliyi şübhə altına düşəcək".