![Saleh Səmədovun namizədliyi qeydiyyata alınarsa,Razi Nurullayev üçün çətin olacaq](https://www.faktinfo.az/uploads/posts/26a7fc3ce6ad6a7542d9be4d3acc8c72.jpeg)
Saleh Səmədovun namizədliyi qeydiyyata alınarsa,Razi Nurullayev üçün çətin olacaq
Milli Cəbhə Partiyasının sədri Razi Nurullayevi, ötən seçkilərdə olduğu kimi, bu dəfə də böyük çətinliklər gözləyir.
Faktinfo.az Azpolitika.info-ya istinadla xəbər verir ki, Yeni Azərbaycan Partiyası 81 saylı İmişli seçki dairəsindən namizədliyini irəli sürmüş partiya sədrinin qarşısına prinsipial rəqib çıxarmayıb.
Hakim partiyanın siyahısnda həmin dairədən Məmmədov İsrafil Zakir oğlu namizəd göstərilib. Rayondakı mənbələrdən əldə etdiyimiz məlumata görə, həmin şəxs İmişi rayon Mərkəzi Xəstəxanasının mühasibatlığında kiçik vəzifə tutur.
Bununla belə, 81 saylı dairədən bölgədə tanınmış iş adamı, rayon Ağsaqqallar Şurasının sədri Saleh Səmədov da namizədliyini irəli sürüb. Seçki elan olunduqdan dərhal sonra sənədlərini DSK-ya təqdim edən S.Səmədov rayonda xeyriyyəçi, ehtiyacı olan insanlara yardımlar etməsi ilə tanınır. Mənbələr bildirirlər ki, Razi Nurullayevə seçicilərin o qədər də yaxşı olmayan münasibəti fonunda iş adamının şansları kifayət qədər yüksək görünür. Qeyd olunur ki, iş adamı həm də hakim partiyanın üzvüdür.
Xatırladaq ki, 2020-ci ildə keçirilmiş növbədənkənar parlament seçkiləri zamanı gərgin çəkişmədən, uzun-uzadı mübahisələrdən sonra MSK tərəfindən Razi Nurullayevin az sayda səslə deputat seçildiyi elan olunmuşdu. Həmin vaxt 81 saylı seçki dairəsindən 17 nəfərin namizədliyi irəli sürülmüşdü. Onların arasında vətəndaş cəmiyyəti liderlərindən İlqar Hüseynli və Milli Olimpiya Komitəsinin üzvü Murad Fərzəliyev daha yaxşı seçki kampaniyası apararaq öndə olsalar da, siyasi dəstək Razi Nurullayevdən yana olmuşdu. Bu dəfə necə olacaq, sentyabr 1-də məlum olacaq.
***
Faktinfo.az-a İmişli rayonundan verilən məlumatda o da bildirilib ki,Saleh Səmədov rayonda müxtəlif vəzifələrdə çalışıb,bu mənada idarə,müəissə,təşkilat rəhbərləri arasında da xüsusi hörmətə malikdi.Onun namizədliyi qeydiyyata alınarsa 81 saylı İmişli seçki dairəsində mübarizə aparmaq Razi Nurullayev üçün çətin olacaq.
Bu xəbər üçün şərh yazın