Trampın qadın rəqibi demokratlardan tam dəstək aldı – Pullar “yağış kimi” yağmağa başladı 

“Associated Press” agentliyinin son hesablamalarına görə, təxminən 2700 qurultay nümayəndəsi Harrisə səs verməyə hazırdır. Prezidentliyə namizəd olmaq üçün 1976 nümayəndənin səsi tələb olunur. Səsvermə avqustun 1-dən 7-dək aparılacaq.

Baydenin prezidentliyə namizədliyini geri götürməsi demokratların prezident seçkilərində rəqabət aparması üçün formal qapı açıb. Bununla belə, Co Baydenin Kamala Harrisin namizədliyini dəstəklədiyini elan etdikdən sonra artıq ilk saatlarda bir çox aparıcı demokrat siyasətçilər onun namizədliyinin lehinə çıxış ediblər. Harrisin kampaniya fondu 888.000 donordan 80 milyon dollardan çox ianə alıb.

Bazar ertəsi axşam saatlarında Harrisdən başqa demokratlardan heç biri prezidentliyə namizəd olmaq niyyətini bildirməmişdi. Namizədlik uğrunda mübarizədə Kamala Harrisin mümkün rəqibləri kimi qeyd edilən bir neçə ştatın - Kentukki, İllinoys, Merilend, Miçiqan qubernatorları onun namizədliyini dəstəklədiklərini açıqlayıblar. Onlara əvvəlcə Harrisin namizədliyini açıq şəkildə dəstəkləməyən siyasi güc mərkəzinin keçmiş Nümayəndələr Palatasının spikeri Nensi Pelosi də qoşulub.

Harris kampaniyası Barak Obamanın baş prokuroru olmuş Erik Holderin vitse-prezident seçimi prosesinə rəhbərlik edəcəyini açıqlayıb. Kamala Harrisin kimi seçə biləcəyinə dair hələ dəqiq göstəriş yoxdur.

Kampaniya qərargahına səfəri zamanı Kamala Harris keçmiş prokuror olduğunu və buna görə də "yırtıcılar" və "fırıldaqçılar" ilə tanış olduğunu qeyd edərək, kampaniyasına start verib.

Donald Tramp sosial media səhifəsində Baydenin seçkidən çəkilmə qərarının “qəhrəmanlıq” adlandırılmasından şikayətlənib və Harrisin namizədliyini “uğursuzluq” adlandırıb./Azpolitika.info