1990-cı ilin qanlı 20 Yanvar hadisələrindən 29 il ötür 

1990-cı il yanvarın 19-dan 20-nə keçən gecə keçmiş SSRİ-nin hərb maşını həm quru, həm də dəniz yolu ilə Bakı şəhərinə basqın edərək, misli görünməmiş qəddarlıqla keçirilən cəza tədbirlərinə imza atıb. Bu hadisə nəticəsində heç bir günahı olmayan 133 dinc sakin öldürülüb, 744 nəfər yaralanıb, 841 nəfər qanunsuz həbs edilib. Həlak olanlar arasında yetkinlik yaşına çatmayanlar, qadınlar və qocalar da olub. Yanvarın 22-də şəhidlərin izdihamlı dəfn mərasimi Sovet imperiyasına qarşı ən kütləvi etiraz aksiyası kimi tarixə yazılıb.

1994-cü il martın 29-da Azərbaycan Respublikasının Milli Məclisi 1990-cı il yanvarın 20-də Bakıda törədilmiş faciəli hadisələr haqqında qərar qəbul edib. Bununla da Prezident Heydər Əliyevin təşəbbüsü və təkidi ilə 20 Yanvar faciəsinə dövlət səviyyəsində hüquqi-siyasi qiymət verilib, faciənin günahkarlarının adları açıq şəkildə bəyan edilib.

Dünya ictimaiyyətinin diqqətini Qanlı Yanvar faciəsinə yönəltmək üçün Azərbaycanın xarici ölkələrdəki səfirlikləri, diplomatik nümayəndəlikləri, Azərbaycan icmaları tərəfindən də müvafiq tədbirlər həyata keçirilir.

Yanvarın 20-də Bakı vaxtı ilə saat 12.00-da ölkə ərazisində şəhidlərin xatirəsi bir dəqiqəlik sükutla yad ediləcək, gəmilər, avtomobillər və qatarlar səs siqnalları verəcək. Həmin gün ölkə ərazisində matəm əlaməti olaraq Azərbaycanın dövlət bayraqları endiriləcək.

Faktinfo.az