Bakıda yeni doğmuş anaya səhv qan köçürdülər - Komaya düşdü 

Faktinfo.az-ın xəbərinə görə, bu barədə xəstəxananın Doğum şöbəsinə yerləşdirilən xəstə Sevinc Məmmədlinin atası Məhəbbət Məmmədov modern.az-a məlumat verib. O bildirib ki, qızı iyunun 4-də Respublika Perinetal Mərkəzində qeysəriyyə əməliyyatı olunub.

Atanın dediyinə görə, həkimlər qızına +II yox, səhvən –II qan köçürüb və onun vəziyyəti ağırlaşıb: “Biz o xəstəxanaya 1000 manat pul ödədik. Əməliyyat olan gün axşamtərəfi getdim, qızıma baş çəkəm, amma onu meyit vəziyyətində gördüm. Onda daxili qanaxma baş verib, həkim də orada olmayıb. Tibb bacısı həkimlə əlaqə saxlayıb və qanaxma haqda ona məlumat verib. Soruşub ki, xəstəyə qan vursun, ya yox? Həkim də deyib ki, qan vursun. Qızımın qan qrupu +II RH ola-ola, ona -II RH rezuslu qan vurublar. Həmin qan da qızımın daxili orqanlarını zədələyib. Daxildəki bütün kapilyar damarları partlayıb. Mən 8 gün həmin xəstəxananın qarşısında zülm çəkdim. Daha sonra həmin xəstəxananın baş həkimi vasitəsilə qızımı Baku Medical Plaza klinikasına köçürdük”.


M. Məmmədov deyir ki, qızının müalicəsinin davamı üçün artıq imkanları çatmır:“İyunun 9-dan qızım Baku Medical Plazada müalicə olunur. Respublika Perinatal Mərkəzi Baku Medical Plazaya 13500 manat pul ödədi. Sonra isə dedilər ki, onların vəsaitimi yoxdur, ödəmirlər. Daha sonra isə qızımın sağlamlığını düşünərək, pulu özüm ödəməyə başladım. Hər gün xəstəxanaya 240 manat pul ödəyirəm. Artıq borc etmədiyim yer qalmayıb. Respublika Perinatal Mərkəzi mənə həm maddi, həm də mənəvi ziyan vurub. Mən çıxılmaz vəziyyətdə qalmışam. Bilmirəm ki, dərdimi hara və kimə deyim. İmkanlı şəxslərdən xahiş edirəm ki, qızımı ayaq üstə qaldırmağıma mənə maddi kömək etsinlər”.

Respublika Perinatal Mərkəzin direktoru, baş mama-ginekoloq Sevinc Məmmədova Lent.az-a bildirib ki, mərkəzdə olan qan –II yox, +II qan qrupuna aid olub: “Həmin qan Qan Bankından alınıb. Bizdə ağır xəstələr olduğu üçün həmişə Qan Bankından qan alıb ehtiyat üçün saxlayırıq. Ehtiyat qanları mütəmadi olaraq yoxlayıb, yeniləyirik. Həmin xəstəyə də +II RH qan köçürülüb. Bizim Qan Bankından alıb soyuducuda saxladığımız qan +II RH olub. Yəni əlimizdə olan qan paketinin üzərinə Qan Bankında vurulan pasport, ştampa görə, içərisindəki qan +II RH-dır. Həmin qan paketinin içində müsbət yox, mənfi qan olmasını isə tibbi ekspertiza müəyyən edə bilər".

Direktor bildirib ki, xəstəyə vurulan qanı saxlayıblar, pasportu, sertifikatı da üzərindədir: "Gəlsinlər, aparıb ekspertiza etsinlər ki, içindəki qan müsbətdir, ya mənfi. Əgər üzərində Qan Bankının +II RH möhürü vurulan qan paketinin içərisindən –II RH qan çıxırsa, bu zaman məsuliyyət Qan Bankının üzərinə düşür”.

S.Məmmədova bildirib ki, qan köçürmə prosesi qaydalara uyğun icra edilib və birinci bioloji sınaq qoyulduğu zaman heç bir fəsadlaşma qeydə alınmayıb: “Qan köçürən həkim işi qaydalara uyğun icra edib. Yəni qan Qan Bankından alınıb, qanın sertifikatı var, qanın toplanması, qanın saxlanması pasportu həmin qan paketinin üstündə var, o qan heç bir insandan birbaşa götürülüb vurulmayıb. Qan sertifikasiya olunub və istifadədən əvvəl bioloji sınaq qoyulub. Bioloji sınağın nəticələri fiksasiya olub. Qanın köçürülmə texnikasının bütün bəndlərinə uyğun olaraq qan köçürülüb. Bu qan köçürülüb və xəstənin qanı eyni qruplu qana normal reaksiya verib. Eyni zamanda qadında kəskin qan azlığı olduğu üçün qan köçürməklə bağlı göstəriş olub".

Mərkəz direktorunun sözlərinə görə, əgər xəstənin qanı -II RH olsaydı və biz ona +II RH qan köçürsəydilər, o zaman çox təhlükəli ola bilərdi: "Xəstənin qanında artıq antigenlər var idi. –II qan isə təmiz qandır və tərkibində antigen yoxdur. Ona görə təmiz antigensiz qanı hətta +II-ə köçürmüş olsaq da, təhlükəli reaksiya verməzdi. Xəstədə digər səbəbdən qan gemolizə uğrayıb, yəni qan damarlarda parçalanmağa başlayıb. Bu, qanköçürmə zamanı baş verə biləcək bir fəsaddır və bu hal ölümlə nəticələnmir”.

Mərkəzin direktoru qeyd edib ki, ilk 5 gündə xəstəyə Perinatal Mərkəzdə yardım edilib və sonra Baku Medical Plazaya köçürülüb: “İlk günlərdə lazım olan bütün tibbi yardımı göstərdik. Aparatlara qoşduq, qan, qan plazma ilə xəstəni ağır durumdan çıxartdıq. Sonra xəstəyə geniş profilli aparat və nəzarət lazım olduğundan valideynlərin razılığı ilə Baku Medical Plazaya köçürtdük. Həmin xəstəxanaya da 17 min pul köçürtmüşük. Ailə imkanının olmadığını dedi və biz də 19 yaşlı bir ananın ölməsinə razı ola bilməzdik. Bu pul Mərkəzin hesabına yığıldı. Baku Medical Plazada üç gün sonra xəstənin durumu yaxşı olduğundan indi ikinci mərhələdə reabilitasiya müalicəsi alır. Hər gün durumu ilə maraqlanırıq. Əslində, biz danışmışdıq ki, xəstənin vəziyyəti yaxşı olandan sonra bizə qaytarılsın və yerdə qalan müalicəsini biz dövlət hesabına təmin edək. Ancaq atası razı olmadı və onlar özəl xəstəxanada daha yaxşı tibbi xidmət göstəriləcəyini düşündülər”.