Baş həkimdən şikayətçi oldu: "Sevin ki, əlil arabasına məhkum olmamısan”

Faktinfo.az-ın elektron poçtuna  daxil olan müraciəti olduğu kimi təqdim edirik:

 Hörmətli Cənab Prezident!

Siz hər zaman əhalinin problemlərini daim diqqətinizdə saxlayır və bu problemlərə öz probleminiz kimi yanaşırsınız. Bu sizin böyüklüyünüzdən və humanistliyinizdən irəli gəlir. Özünüz də həmişə çıxışlarınızda qeyd edirsiniz ki, mən hər bir Azərbaycan vətəndaşının prezidentiyəm. Bu ifadələr biz vətəndaşlarda tam arxayınlıq yaradır ki, Azərbaycan dövləti daim xalqın, vətəndaşın yanındadır. Bütün bunları nəzərə alaraq başıma gətirilən müsibətlərlə bağlı Sizdən  ədalətli qərar istəyirəm və ümidvaram ki, məni darda qoymayacaqsınız.

 Sağlamlığını həkimə etibar edərək şikəst əlilə çevrilmiş vətəndaş qismində ərz edirəm ki, 2015-ci ilin əvvəlində qasıq nahiyəmdə yaranmış kəskin ağrılarla bağlı Şirvan Müalicə-Diaqnostika Mərkəzində müayinə olundum. Müayinə zamanı mənə “sol tərəfli qasıq xaya yırtığı” klinik diaqnozu qoyuldu. Mərkəzin baş həkimi, cərrah Nəsib Səhratov yalnız əməliyyat yoluyla sağalacağımı bildirdi və sosial vəziyyətimi nəzərə almadan əməliyyat üçün məndən 300 manat tələb etdi. Əlavə olaraq 50 manat da aneztezioloq  Jalə həkim üçün pul tələb edərək əməliyyatın uğurla keçəcəyinə söz verdi.

Baxmayaraq ki, "Əhalinin sağlamlığının qorunması haqqında" Azərbaycan Respublikasının Qanununa əsasən, Dövlət tibb müəssisələrində tibbi xidmət pulsuzdur həkimin pasiyentdən rüşvət tələb etməsi qanunsuzdur.

 Möhtərəm Cənab Prezident!

17.02.2015-ci il tarixində Nəsib Səhratov məni əməliyyat etdi və əməliyyat zamanı mənə regional anaesteziya əvəzinə spinal anesteziya olundu. Əməliyyatdan sonra sol ayağımda kəskin keyimə baş verdi və Nəsib Səhratov bunun müvəqqəti olduğunu və tezliklə ayağımın açılacağını söylədi.Tez bir zamanda sağalacağını vəd etsə də, zaman keçdikcə ayağımın keyi açılmadı.  Dəhşətli ağrılarla bağlı mənə 14 gün morfin inyeksiyası vuruldu. Həkimin davranışlarından artıq şübhələnməyə başladım.  Aydın oldu ki, həkim əməliyyat zamanı ayaq sinirlərimi kəsib.

Nəsib Səhratovun səhlənkarlığı nəticəsində böyük əziyyətlərlə üzləşdim, sol ayaq sümüyümdə dözülməz ağrılar baş qaldırdı. Ağrılar məni iflic edirdi, güclü ağrıkəsici preparatlar qəbul etdim, xeyri olmadı.Getdikcə hərəkətlərimdə məhdudiyyətlər yarandı, yeriməkdən məhrum oldum.Bir neçə dəfə Nəsib Səhratova müraciət etdim ki, məni bu vəziyyətə sən salmısan, yaxşılaşmağım üçün bir tədbir gör. Cərrahın cavabı isə konkret oldu: "Sevin ki, əlil arabasına məhkum olmamısan” dedi.

Sağalmaq ümidilə 10 000 manat borc-xərc edərək aparıcı klinikalara üz tutdum, bahalı müalicə kursları aldım.Tibb elmləri doktoru Rövşən Həsənovun nevrologiya klinikasına və Kliniki tibbi mərkəzində oldum.Sonuncu dəfə Koreya Şərq Təbabəti Klinikasında müayinə  olundum. Əfsuslar olsun ki, heç bir nəticəsi olmadı. Klinikalar yekdilliklə faktı təsdiq edərək ayaq sinirlərimin kəsilməsini bildirdilər.  Fiziki və mənəvi əzablarla üzləşdim.

Bütün bunlar, vicdan sözünü unudaraq xəstəyə pul mənbəyi kimi baxan Nəsib Səhratovun səhlənkarlığı və səhvi ucbatından baş verdi.

 Külli miqdarda maddi ziyanla yanaşı, 25.02.2016-cı il tarixində, ƏƏSMN-nin 33 saylı Tibbi Sosial Ekspert Komissiyası məni müayinə etdi və“Sol aşağı ətrafın monoparezi, əzələ atrofiyası”diaqnozu qoyarar 3-cü qrup əlillik dərəcəsi təyin etdi. Səriştəsiz cərrah məni ömürlük əlilliyə düçar etdi, sağlamlıqdan məhrum oldum. Ailəmlə birgə ağır psixoloji sarsıntılara məruz qaldıq. 45 yaşım olmasına baxmayaraq artıq yaşamaq ümidim qalmayıb, dəfələrlə həyatla vidalaşmaq istəmişəm, yaxınlarım buna mane olub. Yaşayış vəziyyətimiz də ürək açan deyil.

Məni ömürlük şikəst qoyan Nəsib Səhratov barədə prezidentə,Birinci vitse-prezidentə, səhiyyə nazirinə və Baş prokurora məktubla dəfələrlə müraciət etmişəm. Etdiyim müraciətlər   hələ də cavabsız qalıb. Məni bu günə qoyan Nəsib Səhratovun cinayət əməli barədə Baş prokurorluğa etdiyim şikayət ərizələrimi araşdıran Şirvan şəhər keşmiş prokuroru həkimin cinayət əməlinin üstünü ört-basdır etdi. Eşitdim ki, Nəsib Səhratov məsuliyyətdən yayınmaq üçün müəyyən şəxslərlə əlaqədə olub.

Nəhayət ki, son müraciətimdən sonra Şirvana yeni təyin olunmuş prokuror Natiq  Abdullayev məni qəbul etdi və həkim rəyi almaq üçün 03.08.19 tarixində Səhiyyə Nazirliyinin "Məhkəmə-tibbi ekspertiza və Patoloji anatomiya" ETT  Birliyinə yolladı. Burada da Nəsib həkimin “səxavəti” nin şahidi oldum. Belə ki, Rafiq adlı həkim ekspertin qəbulunda olarkən şübhə doğuran hallarla rastlaşdım. Həkimin tez-tez otağından çağrılması və pıçıltılı telefon zəngləri, ekspertin Nəsib həkimlə “yaxın əlaqələrindən xəbər verirdi.                                                     

Xülasə, Rafiq həkim təkrar müayinədən keçirmək üçün məni 1 Saylı Şəhər Kliniki Xəstəxanasına (Semaşkoya) apardı. Bizi həkim otağının qarşısında gözlətdirərək əvvəl özü girdi. Aradan bir müddət keçəndən sonra məni ümumi cərrah Saday Əliyevin yanına apardı. Saday həkim “peşəkarlığını” nümayiş etdirərək dahiyanə şəkildə mobil telefona məxsus kabelvasitəsilə mənim sol ayağımı sağ ayağımın diametrini ölçdü və bundan sonra 10 gün müddətində mənə rəy verəcəyini bildirdi.

Bir vacib nüansı da diqqətinizə çatdırmaq istərdim. Belə ki, Saday həkimin adını və vəzifəsini əks etdirən lövhə olmadığından mən Rafiq həkimdən bizi qəbul edəcək həkimin kim olduğunu soruşdum. “ Məlum” səbəblər üzündən o mənə Saday həkimi öz adıyla deyil, “Mustafa Məmmədov” adıyla qələmə verdi. Sonra internet resursları vasitəsilə öyrəndim ki, həkimin adı Mustafa Məmmədov deyil, məhz Saday Əliyev imiş.

 Görünür, mənə veriləcək rəyin cavabı indidən planlaşdırıldığı kimi qeyri-obyektiv olacaqdır və mənim şikayətçi olacağımı bilən Rafiq həkim indidən Saday həkimi belə sığortalayır.

Bu yalanın arxasında nə durur? Təbii ki, rüşvət, korrupsiya şəbəkəsi və vəzifədən sui-istifadə faktları. Belə bir qənaətə gəlmək olar ki, “həkim həmrəyliyinin” başında Şirvan Müalicə-Diaqnostika Mərkəzininin baş həkim-cərrahı Nəsib Səhratov və onun korrupsiyaya bulaşmış həmkarları  durur. Əks halda MTEPAB-nin məsul həkimi bir səbəb olmadan mənə yalan danışmaz, Saday Əliyevi mənə başqa bir adla təqdim etməzdi. Belə olan halda cinayət yuvasının baş həkimi barədə niyə lazımi tədbirlər görülmür?  

Hörmətli İlham Əliyev cənabları!

Mən mətbuat vasitəsi ilə SİZDƏN xahiş edirəm ki, Şirvan Müalicə-Diaqnostika Mərkəzinin baş həkimi  cərrah Nəsib Səhratov və onun cinayət əməllərini ört-basdır edən korrupsioner  həkimlər barəsində qanuni tədbir görülməsi üçün mənə kömək edəsiniz. Eləcə də sizdən hüquqları pozulmuş əlil vətəndaş olaraq xahiş edirəm, MTEPAB  tərəfindən veriləcək rəyin cavabının fakta əsasən doğru və obyektiv verilməsini nəzarətinizdə saxlayasınız. Mənə başqa heç nə lazım deyil. 

Əvvəlcədən Sizə təşəkkür edirəm.

3-cü qrup əlil vətəndaş  Səfərov Elçin Eldar oğlu