Deputat pop-korn satan qızdan nə istəyir? – Şahbaz Xuduoğlunun yazısı
"Qanun Nəşrlər Evi"nin rəhbəri Şahbaz Xuduoğlu özünün feysbuk səhifəsində millət vəkili Rasim Musabəyovu tənqid edən yazı paylaşıb.
Sosial şəbəkədə deputat-politoloq Rasim Musabəyovun statusunu oxudum. Pop-korn satanları ittiham edirdi. Bakının və Bakı sakinlərinin rahatlığını pozurlar deyə. Musabəyov çox unikal şəxsdir. O, həmişə beynəlxalq münasibətlərdən danışır. Danışığı uğurlu və uzaqgörən olmasaydı, yəqin, bu vaxta qədər çoxdan susardı. Ya da, nə bilmək olur, indiki meyarlar fərqlidir. İndi ən çox danışanlar heç danışa bilməyənlərdi. Ya da danışığı imitasiya edənlər.
O, yerli problemlər barədə həmişə susub. Amma burda da yanlışlığa yol verə bilərəm. Onda lütfən səhvimi düzəldin: onu böyük dünyalar və böyük işlər maraqlandırır, bəs nədən birdən-birə pop-korn? Və niyə yeraltı keçid? Və niyə piştaxta arxasında pop-korn satan o məsum qız?
Bu nə vergi söhbəti, bu nə dövlət büdcəsi... Həzərat, nə baş verir? Guya, bu qızcığaz vergidən yayınır, dövlət büdcəsinə ziyan vurur. Deputat sanki Kiçik prinsin vətəninə düşüb... 
Bu yaxınlarda "Kolyma” filminə baxdım. Sovet dövründə 20 milyon insan ora sürgün olunub. 2 milyonu elə ordada ölüb. Filmdə məsum bir qızdan söhbət gedir. Küçədə dondurma satırdı. Dostunu görür və onu dondurmaya qonaq edir. Ama dondurmanı sənədləşdirməyi unudur. Axşam dövlət orqanı əskik gələn bir dondurmaya görə akt tərtib edir və qızı Kolyma sürgün edirlər. 50 dərəcə şaxtanın içinə. O vaxtlar bizlərdən də 10 minlərlə insanlar heç nəyin üstündə Sibirə sürgün edilib.
Deputatın pop-korn satana nifrətində 50 dərəcə Kolyma şaxtası var.
Küçələrdə pop-korn, qəzet, kitab ümidini xırda şeylər satmağa bağlayan yetimlərimizi qorumaq lazımdır./BakuPost.az
Bu xəbər üçün şərh yazın