Eynulla Fətullayevlə Əvəz Zeynallı üzləşdirildi 

Axar.az "Azadlıq radiosununa istinadən xəbər verir ki, E.Fətullayev dostu - Baku Steel Company MMC-nin keçmiş rəhbəri Rasim Məmmədovun həbsindən sonra vaxtilə özünün müdafiəçisi və isti münasibətləri olan Elçin Sadıqovun vəkil tutulmasını onun ailəsinə təklif etdiyini bildirib.

“Bir gün Elçin Sadıqov mənə dedi ki, Əvəz Zeynallı özünün Yutub kanalında Rasim Məmmədov haqqında təhqiramiz fikirlər işlədir. Bundan Mehriban xanım (Rasim Məmmədovun həyat yoldaşı) çox narahatdır. Elçin Sadıqov dedi ki, Əvəz Zeynallı ilə yaxınam, mən həll edəcəyəm”, - əlavə edib.

Onun sözlərinə görə, sonradan vəkil deyib ki, Ə.Zeynallı elə materialları dayandırmaqdan ötrü 20 min manat pul tələb edir. E.Fətullayev iddia edib ki, həbsdə olan iş adamının xanımı Mehriban Məmmədova 20 min manatı E.Sadıqov vasitəsilə Ə.Zeynallıya göndərib.

Fətullayev deyib ki, bir müddət keçəndən sonra “Xural”ın efirində Ə.Zeynallı yenidən Rasim Məmmədov haqqında təhqir xarakterli fikirlər səsləndirib. Bundan dərhal sonra vəkil E.Sadıqova zəng edərək, pulun geri qaytarılmasını istəyib:

“Mənim zəngimdən sonra Elçin Sadıqov Mehriban xanıma Əvəz Zeynallı ilə aralarında olan danışığın səs yazısını atıb. O da mənə göndərdi. Pulu qaytarmağına 1 saat vaxt qoymuşdum. O müddətdə qaytarılmadı, ona görə mən də o səsi yaydım...”.

Ə.Zeynallı E.Fətullayevdən soruşub ki, onunla münasibətləri olduğu halda, niyə dostuna aid məsələni ondan soruşaraq, 20 min manat məsələsini dəqiqləşdirməyib?

O da cavabında bildirib ki, iki mənbədən – vəkil və dostunun həyat yoldaşından bunu öyrəndiyindən, Əvəzə zəng etməyib.

Ə.Zeynallı həbs olunmasına görə E.Fətullayevi günahlandırıb: “Məni bura saldırmısan...”

Qarşı tərəf onun ittihamıyla razılaşmayıb: “Sən özün özünü ora salmısan...”

Ə.Zeynallının fikrincə, E.Fətullayevin özü onun “Xural” kanalında R.Məmmədov haqqında səsləndirdiyi fikirlərə qulaq asmayıb:

“Siz heç bilmirsiniz ki, mən orada nə demişəm. Amma deyirsiniz ki, guya təhqir eləmişəm. Mən heç kimi təhqir eləmirəm. İstintaqdakı ifadənizdə demisiniz ki, Elçin mənim səsimi yazıb, pulu alıb Rasim Məmmədov haqqında danışmayacağımla bağlı sövdələşməyə getməyim barədə. Guya Elçin sizə deyib. Elə səs yazısı vardısa, niyə istintaq onu ortaya çıxarmadı?”

Ə.Zeynallı R.Məmmədovun ailəsiylə heç bir sövdələşməyə getmədiyini, pul almadığını deyib.

Qeyd edək ki, Ə.Zeynallı ötən il sentyabrın 9-da həbs edilib. Ona qarşı ilk ittiham R.Məmmədovun ailəsindən 20 min manat rüşvət alınması olsa da, sonradan başqa ittihamlar (rüşvət verməyə təhrik, vəzifəli şəxslərin qərarlarına təsir göstərmə və s.) da irəli sürülüb.

Lakin “Xural” rəhbəri bunların heç birini qəbul etmir və sifarişlə həbs olunduğunu deyir.