"İlham Əliyev Qranadada hazırlanan kirli oyunu pozdu" - Hulusi Kılıç

Bunu yeniazerbaycan.com-a açıqlamasında Türkiyənin ölkəmizdəki keçmiş səfiri, "İMZA" Sosial İnkişafa Dəstək İctimai Birliyinin Türkiyə təmsilçisi Hulusi Kılıç deyib.

Onun sözlərinə görə, Prezident haqlı olaraq beşli masada Türkiyənin də olmasınl istəmişdi: “Bu da son dərəcə haqlı bir istəkdir. Çünkü Türkiyə bölgə ölkəsidir. Bölgənin problemlərinin həlli üçün orada olmalı idi. Prezidentin qərarından sonra Türkiyə prezidentu Rəcəb Tayyib Ərdoğanın da İspaniyaya getməkdən imtina etməsi Fransa, Almaniya və Avropa İttifaqına bir zərbədir. Üstəlik iki qardaş prezidentin arasındakı həmrəyliyin hansı səviyyədə olduğunu da açıqca göstərməkdədir. Prezidentin dediyi kimi Almaniya, Fransa, Avropa Birliyi bir masa qurur, o masada Türkiyənin olmasını istəmir. Bu, bir oyundur. Almaniya və Fransa nə haqla orada oturur və Azərbaycanla bağlı qərar qəbul edir? Biz bilirik ki, bunu hazırlayan Fransadır. Fransa Ermənistanı dəstəkləmək adı altında orada özünə bir yer etməyə çalışır. Bu, qəbuledilməzdir. Fransa prezidenti ermənipərəstliyi ilə Azərbaycanın haqq və hüquqlarını görməzlikdən gəlir.

Biz bölgədə sülh olsun deyirik. Fransa isə ermənilərə silah satmaqdan söz açmaqla savaşa səbəb olmaq istəyir. Bu da bir tərəfdən savaşa təhriketmə cinayətidir. Qarabağ Azərbaycan torpağıdır, Qarabağda yaşayanlar da Azərbaycan vətəndaşlarıdır. Erməni lobbisinin oyuncağı olan Makron və Avropa Parlamenti sürətlə dəyər itirməkdədir. Bizim sizə güvənimiz də qalmayıb. Azərbaycandan təbii qaz istəyən və qapısını döyən Avropa İttifaqı bir az daha ədalətli olmalıdır. Türkiyə də Ermənistanla əlaqələri normallaşdırmaq arzusundadır. Amma bunun önündəki əngəl Ermənistanla Azərbaycan arasında sülh anlaşmasının imzalanmamış olmasıdır. Bu mənada bölgədən kənar ölkələr məsələyə qarışdıqca sülhü təhdid etməkdədirlər. Biz məsələmizi öz aramızda həll edəcəyik”.