Prorektordan Mehriban Əliyevaya çikayət olundu- ADMİU-da nə baş verir?

Faktinfo.az xəbər verir ki,Yenicag.az-a bu barədə Sənətşünaslıq üzrə fəlsəfə doktoru, dosent Mehriban Novruzova məlumat verib.

Mehriban Novruzova Azərbaycanın Birinci vitse-prezidenti Mehriban Əliyevaya ünvanladığı məktubunda yaranmış vəziyyətlə bağlı bunları deyib:

“Azərbaycan Dövlət Mədəniyyət və İncəsənət Universitetinin Tədris işləri üzrə prorektoru Validə Məmmədova hal-hazırda vəziyyətdən istifadə edərək, yeni təyin edilmiş rektorun xəbəri olmadan, “Təsviri sənət tarixi və nəzəriyyəsi” kafedrasının müəllimi Bayram Hacızadənin dərs yükünü qeyri-rəsmi şəkildə kafedranın digər gənc müəllimləri arasında bölərək, onun dərslərdə iştirak etməməsini təmin edir. Həmin gənc müəllimləri istismar etməklə, onlara Bayram Hacızadədən aldığı pul məbləğini aylıq əmək haqqı kimi ödəməyi vəd edib, lakin bu vədinə əməl etməyib.

Kafedra müdiri olduğum halda əvvəldən Bayram Hacızadənin “ölü can” kimi qeydə alınmasına etiraz etdikdə, Rəssamlıq fakültəsinin dekanı Sevil Kərimova və prorektor Validə Məmmədova tərəfindən dəfələrlə təzyiqlərə məruz qalmışam və bu səbəbdən bizim aramızda bir neçə dəfə münaqişə yaranıb. Təzyiqlərə tab gətirməyərək mən öz xahişim ilə 24.01.2019-cu il tarixində kafedra müdiri vəzifəsindən azad olunmağım barədə ərizə yazmışam. Azərbaycan Dövlət Mədəniyyət və İncəsənət Universitetində baş verən bu ədalətsizliyə son qoymaq üçün cəza tədbiri görməyinizi xahiş edirəm. Müxtəlif orqanlara müraciət etdiyim məktubu bu mətnə əlavə edirəm və onu açıq məktub kimi nəşr etməyinizi xahiş edirəm”.

Mehriban Novruzova qeyd edib ki, Validə Məmmədova ilə aralarındakı problem hələ Rəssamlıq Akademiyasında dekan vəzifəsində çalışdığı zaman başlayıb:

“2010-cu ildə Rəssamlıq Akademiyasında dekan vəzifəsinə təyin olundum. Burada prorektor vəzifəsində çalışan Validə Məmmədovanın haqsızlıqların qurbanı təkcə mən olmamışam. Dəfələrlə şahidi olmuşam ki, Validə Məmmədova digər dekanlarla da kobud davranır. Artıq vəziyyət o həddə çatdı ki, tab gətirə bilmədim və öz ərizəmlə işdən çıxdım. Validə Məmmədova elə bir vəziyyət yaratmışdı ki, akademik Ömər Eldarov ondan işdən çıxması barədə ərizə yazmasını tələb etdi. Bundan bir qədər sonra isə Validə Məmmədova Azərbaycan Dövlət Mədəniyyət və İncəsənət Universitetində Tədris işləri üzrə prorektor vəzifəsinə təyin edildi. 2014-cü ilə qədər Rəssamlıq Akademiysında işləmişəm, sonra isə Azərbaycan Dövlət Mədəniyyət və İncəsənət Universitetində işləməyə başladım. Burada da Validə Məmmədovanın təzyiqi ilə rastlaşdım. Necə ki zamanında Validə Məmmədovaya görə dekanlıqdan imtina etdim, indi də kafedra müdürlüyündən öz ərizəmlə imtina etdim”.

Mehriban Novruzova bildirib ki, bunları deməkdə və dövlət rəhbərliyinə müraciət etməkdə məqsədi işinə bərpa olunmaq deyil, Validə Məmmədovaya qarşı tədbir görülməsidir.