Qəzeti 1 dəqiqəlik sükutla yad etməyin vaxtı çatdı 

Bu fikirləri təhsil eksperti Etibar Əliyev Kütləvi İnformasiya Vasitələrinə Dövlət Dəstəyi Fondunun qəzetlərə ayırdığı vəsaitin verilməsi ilə bağlı şərtləri dəyişdikdən sonra bir neçə qəzetin çap fəaliyyətini dayandırmasına münasibət bildirərkən deyib. E.Əliyev Rusiya qəzetləri ilə müqayisələr aparıb:

“Rusiyada çıxan "Arqumentı i faktı" qəzetinin tirajı 1.509.086, "Literaturnaya qazeta"nın tirajı 113.800, "Kommersant" qəzetinin tirajı isə 125.000 ədəddir. Bu qəzetlərin indi çıxan nömrələrini 2-3 ildən sonra da oxusan, görəcəksən ki, aktuallığı itirməyib. Bizim qəzetlər çıxdığı günün günortasından sonra makulaturaya çevrilir”.

Ekspert bildirib ki, islahat deyildikdə qəzetlərin keyfiyyətini artırmaq nəzərdə tutulmalı idi:

“Qəzet köşkləri” artıq “siqaret köşkləri” kimi tanınır. Köşklər geriyə qəzet qaytarmaqdan beziblər. Qəzetlərin keyfiyyəti (məzmununu nəzərdə tuturam) çox aşağı səviyyədədir. Tarixən qəzetlərin əsas alıcıları orta və yaşlı təbəqə sayılırdı ki, onlar da artıq qəzet oxumurlar. Bütün hallarda deyilən islahatlar keyfiyyəti nəzərdə tutmalıdır. Bu isə çox çətin məsələdir. İndiyə qədər bu edilməyibsə, bundan sonra bunu etmək mümkün deyil. Qəzeti 1 dəqiqəlik sükutla yad etməyin vaxtı çatdı”.Axar.az