Xəzər Dəniz Gəmiçiliyi rəhbərindən Prezidentə ŞOK ŞİKAYƏT - “Haqqımız dayı-bacıoğlu tərəfindən təhqiramiz formada mənimsənilməsin” 

Surəti “Təzadlar” qəzetinə göndərilən müraciət-şikayətdə QSC-də baş verən və kimsənin belə təsəvvür edə bilmədiyi problemlərdən bəhs olunur. Aşağıda həmin müraciəti və əlavə olunmuş fotosübutları təqdim edirik və şikayətçilərin xahişi ilə (məktubda belə yazıblar) KİV-də işıqlandırıldığından imzalarını hələ ki təqdim etmirik:

Hörmətli cənab Prezident!

Bildiririk ki, Sizin 2021-ci il 11 fevral tarixli sərəncamınıza əsasən yaradılmış “Azərbaycan Xəzər Dəniz Gəmiçiliyi” Qapalı Səhmdar Cəmiyyətinin Müşahidə Şurası təsis edilmişdir. Müşahidə Şurasının sədri, maliyyə naziri Samir Şərifovdur. Azərbaycanın Avropa ilə Asiya arasında əlverişli coğrafi mövqeyi və Xəzərdən keçən beynəlxalq yükdaşıma marşrutları hazırda Xəzər Dəniz Gəmiçiliyinin nəqliyyat donanmasının tranzit yükdaşımalarının həyata keçirilməsində xüsusi əhəmiyyətini daha da artırır. Eləcə də “Azərbaycan Xəzər Dəniz Gəmiçiliyi” QSC Xəzər dənizində irimiqyaslı neft və qaz layihələrinin və beynəlxalq yük daşınmalarının həyata keçirilməsində vacib rol oynayır. Biz dənizçilər-gəminin matros və kapitanları bununla fəxr edirik. Lakin bizim iş və social şəraitimiz, əmək haqlarımız... ölkə iqtisadiyyatı qarşısında göstərdiyimiz misilsiz xidmətlərə qətiyyən uyğun gəlmir. Dəfələrlə “Azərbaycan Xəzər Dəniz Gəmiçiliyi” QSC-nin İdarə Heyətinin sədri Rauf Vəliyevə müraciətlərimiz olub ki, mövcud problemlərin aradan qaldırılmasına nail olunsun. Amma heç bir xeyri olmayıb. Həmin problemlər isə bunlardan ibarətdir: Beynəlxalq Dəniz Təşkilatının (İMO) tövsiyyələri və beynəlxalq qanunlara görə biz dənizçilərə maaşdan əlavə sutkalıq əlavələr də verilməlidir. Yəni, nə qədər ki, sahilə çıxmırıq, sudayıq, bu əlavələr ödənilməlidir. Biz isə qonşu Xəzəryanı ölkələrdən, o cümlədən Qazaxıstandan, Türkmənistandan, Rusiyadan nefti gətirib boşaldırıq, bəzən günlərlə sahilə çıxmırıq. Digər yük gəlincə Türkanda reyddə qalmalı oluruq. “Azərbaycan Xəzər Dəniz Gəmiçiliyi” QSC rəhbərliyi isə təzə qayda çıxarıb ki, ayda yalnız 5 gün sutkalıq pulu verilsin. Qalanını isə vermirlər. Azərbaycan büdcəsinə yüz milyonları gətirən biz dənizçilərə bu cür münasibət nə dərəcədə ədalətlidir?

Cənab Prezident!

“Azərbaycan Xəzər Dəniz Gəmiçiliyi” QSC-nin gəmilərində matrosun maaşı 400 manatdır, matorçunun maaşı isə vur-tut 500 manat. Bu maaşdan isə bəhanə edib “Yaşat” Fonduna məcburi pul tuturlar. Hansı ki, QSC-nin hesabında milyonlarla sərbəst vəsait var. Lazımsız yerlərə milyonları silməkdənsə, bu Fonda pul köçürə bilərlər. “Sutka” pulu isə günə 15 dollar olmalıdır, onun isə 5 gününü verirlər, qalanını saxlayırlar. vermirlər. Gəmilər, tankerlər (13 min tonluq yük götürənlər) təxminən 15-dir, 5 min tonluq yük daşıyanlar isə təxminən 5-6, bərələr təxminən 10-12, quru yük gəmiləri isə daha çoxdur. Heç birinə sutkalıq pul vermirlər. Əvvələr verirdilər, sabiq rəis Aydın Bəşirovun vaxtında. Yəni, bu Beynəlxalq Dəniz Təşkilatının (İMO-nun) qərarıdır. Azərbaycan da İMO-nun üzvüdür.
Ən dəhşətlisi budur ki, bu qədər əziyyətlərə qatlaşan biz dənizçilərə verilən ərzaqlar da ölkənin iri ticarət mərkəzlərində satılmayan, vaxtı keçmiş, məhv edilməyə veriləsi ərzaqlardır ki, bizə verirlər (fotoşəkillərini göndədirik). Gəmilərdə bizə heç bir gigiyena, sanitar ləvazimatları da verilmir. Amma bilirik ki, bunlara kifayət qədər pul silinir. Axı biz dənizçilər bəzən 6 ay evimizdən uzaq oluruq. Dəhşətli hal həm də budur ki, gəmilərin hamısında ərzaq təchizatına Gəmiçiliyin rəisi Rauf Vəliyevin qardaşı rəhbərlik edir. Rauf Vəliyevin Zaur adlı bacısı oğlu var, onun üçün ərzaq, yemək və s. xidmətlər göstərən “Grand Catering” şirkəti yaradıblar və bütün bu korrupsiya əməlləri bu şirkətin əli ilə edilir. Əgər təftiş edilsə və audit yoxlaması aparılsa, məlum olacaq ki, bu şirkətin əli ilə biz dənizçilərin ailəsinin boğazından kəsilən pullar necə silinir. Məsələn, bir acınacaqlı fakt: bizə aprel ayının ilk günlərində fotosunu təqdim etdiyimiz xamanı veriblər. 28 mart tarixində istifadə müddəti bitmişdi, qorxumuzdan yemədik. Fotosunu təqdim etdiyimiz bu kolbasanın istifadə müddəti isə fevral ayında qurtarıb. Hətta gəmi aşpazları yeyilməsi təhlükəli olan bu kolbasaları və digər ərzaqları dənizə tullamayaraq soyuducuya yığıb itlərinə aparırlar. Novruz bayramında isə Rauf Vəliyev günlərlə dənizdə can çürüdən biz dənizçilərə Bayram payı göndərtmişdi (fotosu təqdim edilir). Hərəyə 5-6 ədəd alma, 2 ədəd apelsin, 6 ədəd kivi ruletinə bənzər nəsə. Müddəti keçdiyindən dadı zəhər kimi idi.

Cənab Prezident!

Təsəvvür edin, gəmiləri keyfiyyətli ərzaq məhsulları ilə təmin etməli olan “Grand Catering” şirkətinin Zaur adlı direktoru, dayısı Rauf Vəliyevə arxalanaraq istədiyini edir. Hətta diqqətinizə çatdıraq ki, Rauf Vəliyevin rəhbərliyi ilə 40 köhnə gəmini kəsib-doğratdırıb metallom kimi satdılar. Bütün işlərə isə, qeyd etdiyimiz kimi, Rauf Vəliyev və qardaşı rəhbərlik edirdi.
Biz dənizçilər nə istəyirik: istəyirik ki, Azərbaycanın büdcəsinə milyardlarla qazanc gətirən biz dənizçilərə insan rəftarı və münasibəti olsun, haqqımız bu dayı-bacıoğlu tərəfindən təhqiramiz formada mənimsənilməsin. Nə vaxta kimi istifadə müddəti keçmiş ərzaqları bizə yedirdəcəklər??? Bəlkə buna görədir ki, Beynəlxalq Araşdırmaçı Jurnalistlər Konsorsiumunun dərc etdiyi siyahıda (mətbuatdan oxumuşuq) Rauf Vəliyevin adı korrupsiyalaşmış məmur siyahısındadır. Həmin hesabatda qeyd olunur ki, Bakı şəhəri, Bəşir Nuriyev 77 ünvanında qeydiyyatda olan Rauf Vəliyev 16 noyabr 2000-ci ildə İsveçrənin Cenevrə şəhərində “Braxon Group S.A” şirkətini yaradan dörd şəxsdən biri olub (vizual). Daha sonra şirkət Britaniyanın Virgin adalarında fəaliyyətini davam etdirib. Şirkətin son 16 ildə hansı əməliyyatlar keçirməsi və dövriyyəsi barədə yəqin ki Azərbaycanın hüquq mühafizə orqanları məlumat verə bilər.

Güman edirik, bu gün gəmiçilikdəki əksər problemlər doğru olmayan kadr siyasəti ilə də bağlıdır. Sosial şəbəkələrdən də oxuyuruq ki, “Azərbaycan Xəzər Dəniz Gəmiçiliyi”ndə vacib postlarda çalışan şəxslərin əksəriyyəti sədr Rauf Vəliyevin yaxın adamları, qohumlarıdır. Misal kimi, onun birinci müavini Zamiq İsmayılovu, müavini Nəzrəddin Əhmədzadəni, eyni zamanda Azərbaycan Dövlət Dəniz Akademiyasının rektoru Çingiz Əliyevi, Xəzər Dəniz Nəqliyyat Layihə-Axtarış və Elmi-Tədqiqat İnstitutunun baş direktoru Fazil Qəhrəmanovu, Dəniz Nəqliyyatı Donanmasının rəisi Emin Nəzərovu, Xəzər Dəniz Neft Donanmasının rəisi İsrail Bayramovu, “Bibiheybət” Gəmi Təmiri Zavodunun direktoru Nəsib Qəhrəmanovu, “Zığ” Gəmi Təmiri Zavodunun direktoru Rəfail Mikayılovu, İstehsalat Xidmətləri İdarəsinin rəisi Faiq Xəlilovu, Sosial İnkişaf İdarəsinin rəisi Namiq Nurməmmədovu göstərmək olar.

Cənab Prezident!

Dənizçilərin həyatı suda keçir, onların problemləri, gəmiçilikdə baş verən neqativlər sanki görünməz olur. Biz mövcut problemləri qaldırdıq ki, bu nöqsanlar aradan qaldırılsın. Siz dəfələrlə bildirmisiniz ki, mənə məlumat verin, korrupsioner məmurların barəsində ölçü götürülsün. Bu məqsədlə də Sizə müraciət etdik. İnanırıq ki, tezliklə “Xəzər Dəniz Gəmiçiliyi” QSC-də və “Grand Catering” MMC-də yoxlamalar aparılacaq, ciddi tədbirlər görüləcək.
Redaksiyadan: Cənab Prezidentə ünvanlı şikayətlə əlaqədar “Xəzər Dəniz Gəmiçiliyi” QSC-nin də mövqeyini dinləməyə və dərc etməyə hazırıq.
Müraciətdə bəzi ciddi faktlar vardır ki, araşdırılmasına ehtiyac vardır, bunun üçün “Xəzər Dəniz Gəmiçiliyi” QSC-yə və Baş Prokurorluğa, eləcə də Hesablama Palatasına rəsmi sorğu göndəriləcək.
”Təzadlar”ın
Araşdırma Qrupu