“QƏNAƏTCİL” NAZİR BU ŞİRKƏTLƏRƏ 250 MİLYON VERİB! - Bir binanın təmirinə 27 milyon ayırıb?

İctimai fəal Bəxtiyar Hacıyev Azərbaycanın ən “qənaətcil və insaflı” nazirlərindən biri sayılan Əmək və Əhalinin Sosial Müdafiəsi naziri Sahil Babayevin “tender siyasəti” ilə bağlı maraqlı paylaşım edib.

“AzPolitika.info” xəbər verir ki, B.Hacıyev paylaşımında S.Babayevin rəhbərlik etdiyi nazirliyin "Aznest" və "Aqri Kon" şirkətlərinə 160 milyon manatdan artıq dəyəri olan şübhəli tenderlər verdiyini yazır. 

Və misal olaraq, Göygöl rayonunda yerləşən Dövlət Sosial Müdafiə Fondunun 3 saylı Psixonevroloji Sosial Xidmət Müəssisəsinin əsaslı təmirinə 27 milyon(!) manat xərclənməsini göstərir: “Sahil Babayev nazir təyin olunduqdan 2 ay sonra yaranan, bu günə qədər saytları, işlək telefonları, ofisləri olmayan, telefon nömrələri ard-arda gizlədilən "Aznest" və "Aqri Kon" şirkətlərinin açıq mənbələrdə 160 milyon manatdan çox tender udduğu qeyd olunur. Soldakı sənəddən də göründüyü kimi açıq mənbələrdə bütün tenderlər qeyd edilməyib, məsələn, 3 saylı Psixonevroloji müəssisənin təmirinə nə az, nə çox, 27.6 milyon manat ayrılıb. Ancaq bu məlumat elektron satınalmalar portalında yoxdur. Belə tenderləri, nazir müavininin "Ekvita"sı, "Ekvita" işçisinin "Global Legal" şirkətlərini də əlavə etsək, Sahil Babayev təxminən 250 milyon manatdan çox vəsaiti bu şirkətlərə verib.”

Xatırladaq ki, B.Hacıyevin adını çəkdiyi "Ekvita" və "Global Legal" şirkətlərinə Əmək və Əhalinin Sosial Müdafiəsi Nazirliyi tərəfindən elektron xidmətlər adı altında milyonlarla manatlıq müəmmalı tenderlər verildiyi bildirilir. Həmin şirkətlərinsə Sahil Babayevin müavini Anar Kərimova yaxlın olduğu qeyd edilir. Lakin nazirlik indiyədək bununla bağlı ittihamlara heç bir rəsmi cavab verməyib.

Ardınca paylaşımda sözügedən nazirliyin əməkdaşlıq etdiyi şirkətlər barədə deyilir: “"AqriKon" QSC-nin saytı yoxdur. Facebookdakı səhifəsini hazırda 4(!) nəfər izləyir. Son post 2019-cu ildə yenilənib. Şirkətin nömrəsi GetContactda "Aznest" nömrəsi gizlədildiyi gün gizlədilib. Əmək və Əhalinin Sosial Müdafiəsi Nazirliyi bu qədər sıx əməkdaşlıq etdiyi, 160 milyon manatdan çox tender verdiyi şirkətlərin rəhbərlərini cəmiyyətə təqdim etməlidir. Onların ofislərini çəkib, ictimaiyyətə məlumat verməlidirlər. Təsisçi mətbuat konfransı keçirməlidir, bu tenderləri necə udmaqları barədə açıqlama verilməlidir. Əks halda, susduqları müddətcə bu şirkətlərin Sahil Babayevə məxsus olması, Sahil Babayevin kabinetini təmir edən fəhlənin üstünü təmizləyərək atdığı imza ilə milyonların ora köçürülməsi barədə deyilənləri səssizlikləri ilə təsdiq etmiş olacaqlar. Eyni zamanda milyonlarla insanımız pensiya, müavinət dərdi çəkdiyi, işsizlikdən əziyyət çəkdiyi bir vaxtda naməlum, heç bir əlaqə məlumatları işləməyən, facebookda 4 izləyicisi olan şirkətlərə 160 milyon manat ayırmaqlarının cinayət olduğunu qəbul etdiklərini göstərəcəklər. “

 Anar Kərimov

Adətən, qanunsuz hesab olunaraq kəsilən pensiyaların məbləği barədə tez-tez fəxrlə hesabatlar verən, reallıqda isə çox zaman “qurunun oduna yaşın da yanması”, həmçinin əlillərin qəpik-quruşdan ibarət pensiyalarının müxtəlif bəhanələrlə və süründürməçiliklə kəsilməsilə, aylarla verilməməsilə müşaiyət olunan “qənaət prosesini” həyata keçirən nazirliyin 4 mərtəbəli və elədə böyük olmayan bir binanın təmirinə 27 milyon manat xərcləməsi doğrudan da düşündürücüdür…

Elə B.Hacıyev də nazirliyin bu “qənaətcilliyinə” eyham vuraraq yazıb: “Tikinti sektorunda təcrübəsi olan dostlar, bizi aydınlada bilərsinizmi ki, Sahil Babayev Göygöl kimi bahalı rayonda hazır tikilmiş olan bu boyda böyük binanı cəmi-cümü 27-cə milyon manata necə əsaslı təmir etdirib, necə qənaət edib o boyda böyük vəsaitə? Bu binanın əsaslı təmiri əslində neçə yüz milyon manat olmalı idi?”