Tələbəni məhkəməyə verən dekan müavini səfirin bacısı imiş… –BDU-dakı qalmaqalla bağlı məhkəmədə ilginc faktlar səsləndi 

Faktinfo.az Musavat.com-a istinadən xəbər verir ki, Bakı Dövlət Universitetinin (BDU) İlahiyyat fakültəsinin dekan müavini Nigar İsmayılzadə fakültənin tələbəsi olan Zəka Mirağayevə qarşı daha bir maddə ilə ittiham qaldırıb.

Xatırladaq ki, bundan əvvəl Zəka Murağayevin Cinayət Məcəlləsinin 147.2-ci (ağır cinayətdə ittiham etməklə böhtan atma) maddəsi ilə cəzalandırılması üçün Yasamal rayon Məhkəməsinə müraciət edən dekan müavini mayın 25-də məhkəmədə daha bir iddia qaldırıb.

Hakim Azər Tağıyevin sədrliyi ilə keçirilən məhkəmə prosesində dekan müavininin tələbəyə qarşı xüsusi ittiham qaydasında qaldırdığı iddiaya baxılıb.

Məhkəmədə dekan müavini Nigar İsmayılzadə çıxış edərək deyib ki, fakültənin dördüncü kurs tələbəsi olan Zəka Mirağayev mediada ona böhtan atıb. Dekan müavini tələbə tərəfindən "rüşvətxor” adlandırıldığını söyləyib. Dekan müavini həmçinin əlavə edib ki, tələbə mətbuatdakı açıqlamalarında onu universitetdə neqativ əməllərlə məşğul olmaqda da ittiham edib. N.İsmayılzadə məhkəmədəki çıxışında "MTN işi” çərçivəsində həbs edilmiş və həbsdə olarkən intihar edən İlqar Əliyevlə adının birlikdə çəkilməsinə də etiraz edib.

Onun sözlərinə görə, intihar etmiş MTN polkovniki İlqar Əliyevlə əlaqəsi haqda yazılanları özünə təhqir hesab edir: "Mətbuatda "Xanım dekan müavininin intihar etmiş MTN polkovniki ilə nə əlaqəsi var?” başlığı ilə məqalə yayılmışdı. Azərbaycanlıyıq, bu cümləni oxuyan mənim haqqımda nə düşünər? Guya, mənim dekan müavini təyin olunmağımda İlqar Əliyevin rolu olub. Yalandır. İlqar Əliyev mənim qrup yoldaşım olub, "Türkologiya”da birlikdə təhsil almışıq. Dekan müavini nə vəzifədir ki, məni MTN polkovniki ora təyin elətdirsin? Mənim təqdimatımı dekanımız, dünya şöhrətli alim Vasim Məmmədəliyev verib”.

Nigar İsmayılzadə iddia qaldırdığı tələbənin 14 ildir, universiteti bitirə bilməməsinə də toxunub: "Tələbə Zəka Mirağayev 14 ildir universiteti bitirə bilmir. Mənim fikrimcə, belə ittihamlar səsləndirən tələbəni kimlərsə öyrədir”.

Məhkəmədə Nigar İsmayılzadəni hazırda həbsdə olan MTN generalı Akif Çovdarovun vəkilləri Kamandar Nəsibov və Sadiq Rəsulov müdafiə edirlər. Vəkillər iddia ərizəsinə əlavəni məhkəməyə təqdim ediblər.

Məlum olub ki, dekan müavini tələbənin Cinayət Məcəlləsinin 148-ci (təhqir) maddəsi ilə də cəzalandırılmasını istəyir. Xüsusi ittihamçı "anaxeber” saytında yer almış yazıdakı "Nigar İsmayılzadə "İlahiyyat” fakültəsinin adına layiq deyil”cümləsini təhqir hesab edir.

Tələbənin vəkili Elçin Sadıqov da məhkəmədə çıxış edib. Vəkil iddiaya əlavənin icraata qəbul olunmasına etiraz edib. E.Sadıqov bildirib ki, qanuna görə, məhkəmə icraata qəbul elədiyi işdən kənara çıxa bilməz: "Xüsusi ittihamçısının iddia ərizəsində də yalnız 147-ci maddə qoyulmuşdu. İndi isə yeni ittiham irəli sürürlər”.

Məhkəmə etiraza baxmayaraq, iddiaya əlavəni icraata qəbul edib.

Tələbə Zəka Mirağayev də məhkəmədə ifadə verib.

O, deyib ki, irəli sürülən ittihamlarla özünü qətiyyən təqsirli hesab etmir. Dekan müavinini "rüşvətxor” adlandırmasına münasibət bildirən tələbə deyib ki, bu barədə sübutu var və prosesin gedişində müəyyən adamların dindirilməsi ilə bağlı vəsatət qaldıracaq: "Nə mən birbaşa dekan müavininə rüşvət vermişəm, nə də o, məndən istəyib. Rüşvət məsələsi məndən kənarda baş verib. Əlimdə sübutlar var, prosesin gedişində ortaya qoyacam. Mən burada rüşvətin çekini ortaya qoya bilmərəm ki… Amma bildiyim faktları universitet rəhbərliyinə də demişəm, prokurorluğa da göndərmişəm”.

14 ildir universiteti bitirə bilməməsilə bağlı dekan müavininin dediklərinə də müansibət bildirən Zəka Mirağayev söyləyib ki, 2005-ci ildə rüşvətə etirazına görə universitetdən çıxarılıb, 2014-cü ildə isə yenidən bərpa olunub: "Dekan müavini öz istəyi ilə məni məhkəməyə verməyib. Dekan Vasim müəllim fakültənin adının hallanmasını istəmirdi. Dekanlıqda görüşdə bu məsələnin həlli ilə bağlı təklif verəndə Nigar İsmayılzadə dedi ki, "mən böyüklərimlə məsləhətləşməliyəm”. Bu da mənim dediklərimi sübut edir”.

Qeyd edək ki, dekan müavini Azərbaycanın Yaponiyadakı səfiri Gürsəl İsmayılzadənin bacısıdır.

Növbəti məhkəmə prosesi iyunun 8-də davam edəcək.