19 aya bir ünvanda 285 şirkət necə açılıb? – Sensasion faktlar 

Ölümündən əvvəl Xəzər TV-yə danışıb və deyib ki, xəbəri olmadan onun adına 5 şirkət açıblar. Həmin şəxs şirkət rəhbəri olduğunu Vergilər Xidmətindən göndərilən borc bildirişindən sonra öyrənib. İndi prokurorluq bu şəxsin intihar etdiyini, yaxud da öldürüldüyünü araşdırır.

Faktinfo.az saytı Axar.az-a istinadən  xəbər verir ki, bu barədə sosial şəbəkə istifadəçisi Allahverdi Aydın araşdırmasını təqdim edib.

O bildirib ki, Azərbaycanda hər il yüzlərlə bu cür şirkət açılır:

“Cəmi 19 ay ərzində “Nizami rayonu, Yavər Səfərov ev 28. m. 28” ünvanında 285 şirkət qeydiyyata alıblar. Cəmi bir il əvvəl qeydiyyatdan keçən bu şirkətlərin 3 milyon manatdan çox vergi borcları var.

Məsələn, 10 noyabr 2020-ci il tarixində "JASMIN AZ LTD" MMC adlı şirkət qeydiyyata alınıb. Qısa müddət sonra 395 min manat vergi borcu yaranıb. Rəsmi sənədlərdə şirkətin rəhbəri kimi Yakuşev Stanislav Ələskəroviç göstərilir. Məlum olur ki, Yakuşev Stanislav Ələskəroviç şirkət təsis olunmazdan qısa müddət əvvəl işsiz olduğu üçün sürücü işi axtarırmış”.

Müəllif cəmi 19 aya bir ünvanda, eyni şəxslərin adına 285 şirkət açmağın ciddi araşdırılması gərəkdiyini xüsusi vurğulayıb:

“Kim zəmanət verir ki, Yakuşev Stanislav və onu kimi şəxslərin də taleyi Zaur Sovqatov kimi olmayacaq?!”